SEMANA 20
Ju je seguirini tsípikua jingoni aianhpini
“Jatsinta chíti semiiani ka eskaksï chíti jájkicha no ísku jauaka” (ECL. 11:6).
PIREKUA 70 Ju je jirinhantaani ambakiti kʼuiripuechani
AMBE ENGACHI EXEAKA *
Enga Jesúsi na kʼuanhatsentapkia auandarhu, imeri chúxapatichaksï seguirispti tsípikua jingoni aianhpini jini Jesuraléni ka uánikua máteru lugaricharhisï (exe je semana 20, párrafu 1).
1. ¿Náki ejemplu xarhatakuaspi Jesúsi imeri chúxapatichani ka ambeksï úspi imecha? (Exe je imajenini enga uénakuarhu jaka i rebistarhu).
ENGA Jesúsi Echerirhu japka, méntkisï tsípikua jingoni aianhpispti ka uékasïndi eskaksï imeri chúxapatichaksï ístu tsípikua jingoni aianhpiaka (Juanu 4:35, 36). Jesúsiri chúxapatichaksï tsípikua jingoni aianhpesïrendi jimboka Jesúsi imecha jingoni jarhaspka (Luk. 10:1, 5-11, 17). Joperu ma tiempu jimbo, chkésptiksï jiáni engaksï jupikapka ka uándikuni imecheri jorhentpirini (Juanu 16:32). Tátsekua enga Jesúsi na tsíntapkia, arhiaspti eskaksï jánguarhintapiringa aianhpini. Ka enga Jesúsi auandarhu japkia, imeri chúxapatichaksï xáni tsípikua jingoni aianhpesïrendi enga jamberi imecheri ikiatspitichaksï uandapka: “Mítetarpiskajtsïa iápuru Jerusaléni chári jorhentpikuani” (Uku. 5:28).
2. ¿Nénajtsïni jarhuatasïni Jeoba aianhpikuarhu?
2 Primeru siglurhu, Jesúsi orhejtsïkuaspti orheta kristianuechani paraksï aianhpini ka jimboka Jeoba jarhuataaspka, uánikua kʼuiripuechaksï kurhajchaaspti. Por ejemplu, Pentekostesirhu uéxurhini 33 jimbo, ma 3,000 kʼuiripuechaksï itsï atakuarhispti (Uku. 2:41). Ka sánhani arhixaptiksï sánderu uánini Jesúsiri chúxapaticha (Uku. 6:7). Ka ístu, Jesúsi uandaspti eska últimu jurhiatikuecha jimbo, sánderu uánikua kʼuiripuechaksï jiókuarhipiringa ambakiti aianhperakuani (Juanu 14:12; Uku. 1:8).
3, 4. a) ¿Andisï máru lugaricha jimbo úkua jukajki para aianhpini? b) ¿Ambechi exea ini jorhenguarhikua jimbo?
3 Iáminduechachi jánguarhintasïnga tsípikua jingoni aianhpini. Ka máru lugaricharhu i ambe fásilisïndi, jimbokaksï uánikua kʼuiripuecha uékasïnga Bibliaeri ambe jorhenguarhini. Máruksï jatsisïndi para erokuarhini astakaksï erachicha uáka jorhendaani Bibliaeri ambe. Joperu máteru nanisï, aianhpirichaksï sáni úkua jukanchasïndi jimbokaksï no uánikua kʼuiripuecha jarhasïnga imeecho, ka engaksï jarhajka, jamberiksï no káni uékajti míteni Bibliaeri ambe.
4 Ambe engachi ixú exeaka uátijtsïni jarhuatani engachi jimesïsï irekajka nani enga sáni úkua jukaka para aianhpini. Exeakachi ambe engaksï úka máru erachicha paraksï sánderu uánikua kʼuiripuecha jingoni uandontskuarheni ka andichisï jatsi para tsípikua jingoni aianhpini nájkirukajtsïni kʼuiripuecha no uékaaka kurhajchani.
JU JE SEGUIRINI TSÍPIKUA JINGONI AIANHPINI NÁJKIRUKACHI NO EXEANTAUAKA KʼUIRIPUECHANI
5. ¿Ambeksï nitamakuarhisïni máru Testiguecha?
5 Para uánikua Testiguecha sánhani arhisïndi úkua jukani uandontskuarheni kʼuiripuecha jingoni imeecho. Máruksï jimesï irekasïndi engaksï kʼérati edifisiuecha jaka ka enga no jiáratperanhajka para né uéjki inchaakuni jimboka kʼuiripu ma jarhasïnga enga kuáni jarhajka ka imantkusï jiárhitajti inchaakuni enga sésikua jatsika o enga pʼímarhinhajka. Ka máteru nanisï, erachichaksï úsïndi aianhpini kʼumanchikuecha jimbo joperuksï no uánikua kʼuiripuechani exeantasïndi. Ístu jarhastiksï aianhpiricha engaksï ireta sapirhaticharhisï aianhpijka o jimesïsï enga iauanika nani enga namunitu kʼuiripu irekaka. Jamberiksï iauani xanharajti paraksï úni uandontskuarheni nemani jingoni ka engaksï na niárajkia, no nema jarhasïndi kʼumanchikuarhu. Engachi ménisï niáraska ini ambe nitamakuarhini, ¿ambechi uá úni parachi no kuatantani ka únchi sánderu kʼuiripuecha jingoni uandontskuarheni?
6. ¿Andisï aianhpikua ísï terukuntajki komueska kuruchechani pʼímaani?
6 Jesúsi ísï terukutantaspti aianhpikuani komueska kurucha pʼímani (Mar. 1:17). Kʼuiripu ma enga kurucha pʼímajka, jamberi uánikua jurhiatikua erokuarhijti para úni pʼímaani kuruchechani joperu no kuatantasïndi, sánderu sési, exesïndi ambe úni. No méntkisï májku lugari jimbojku niárasïndi nijtu májkueni ambe úrani ka ístu mójtakusïndi ora. Juchajtuchi uáka májkueni úni aianhpikuarhu. Ju je exeni néna.
Jimesïsï engachi úkua jukanchajka exeantani kʼuiripuechani imeecho, ju je mámaru jandora nirani aianhpini, mámaru lugaricha jimbo o mámaru ambe úraparini. (Exe je párrafu 7 a 10). *
7. ¿Ambe uá úkuarhini engachi mámaru jandora niraska aianhpini?
7 Ju je máteru ora jimbo nirani aianhpini. Sánderuchi uáni kʼuiripuecha jingoni uandontskuarheaka engachi ima jandora niraska aianhpini engaksï kʼuiripuecha imeo jauaka. Ka nóchkandi kʼuiripuechaksï jatsisïndi para imeo niántani. Uánikua erachichaksï aianhpisïndi inchatirisï o enga na chúrini jarhajkia jimbokaksï sánderu uáni kʼuiripuechani exeantasïnga kʼumanchikuarhu. Ístu, inde jandorisï jamberiksï kʼuiripuecha mintsikuarhini jarhajtia ka jamberiksï uékani sánderu uandontskuarheni. Ochi uáka májkueni úni eska orhejtsïkuti ma enga David arhinhajka. Engaksï sáni ióni jámajkia aianhpini territoriu ma jimbo, David ka erachi enga imani jingoni jámani jarhajka, ménderuksï kʼuanhatsentasïndi imani kʼumanchikuecha jimbo enga no nema uérapka antesi. David uandasïndi: “Engachi ménderu kʼuanhatsentajka, ískuni pakarasïnga engachi uánikua kʼuiripuechani exeantajka”. *
Jimesïsï engachi úkua jukanchajka exeantani kʼuiripuechani imeecho, ju je mámaru jandora nirani aianhpini. (Exe je párrafu 7 ka 8).
8. ¿Nénajtsïni uá jarhuatani aianhpikuarhu ambe enga uandajka Eclesiastés 11:6?
8 Karakata nani enga pʼitakata jaka i jorhenguarhikua, miátantasïndijtsïni eskachi no jatsiska para kuatantani (arhinta je Eclesiastés 11:6). David engachi párrafu siete jimbo uandapka, ima no méni kuatantaspti. Ísï ióni jimbo, úspti kʼuiripuni ma jingoni uandontskuarheni. Acheeti máespti enga uékenga sánderu míteni Bibliaeri ambe. Ka ima acheeti arhispti: “Ma ochu uéxurhinistia engani ixú irekaka, ka i primeru xanharisti enga Jeobaeri testigu ma uámutajka puertarhu”. David uandasïndi: “Exeskia eska engachi na exeantajkia kʼuiripuechani imeo, uánikuechajtsïni kurhajchasïndi”.
Jimesïsï engachi úkua jukanchajka exeantani kʼuiripuechani imeecho, ju je nirani aianhpini mámaru lugaricha jimbo. (Exe je párrafu 9).
9. ¿Ambeksï úsïni máru erachicha paraksï uandontskuarheni kʼuiripuecha jingoni engaksï no exeantajka imeo?
9 Ju je no májku lugari jimbo aianhpini. Máru aianhpirichaksï mámaru lugaricha jimbo aianhpisïndi paraksï úni uandontskuarheni ima kʼuiripuecha jingoni engaksï no exeantajka imeecho. Por ejemplu, jima engaksï kʼérati edifisiuecha jaka, nani engaksï aianhpiricha no újka kʼumanchikuecha jimbo aianhpini, sánderu sési nikuasïndi engaksï xanharu jimbo aianhpijka o karrituecha jingoni. Ini ambe úparini, erachichaksï úsïndi uandontskuarheni kʼuiripuecha jingoni engaksï antesi no uénga imeo niárani. Ístu, uánikua aianhpirichaksï exestia eska kʼuiripuechaksï uékasïnga uandontskuarheni o jiókuarhiani publikasionichani engaksï parkirhu jarhajka, merkadurhu ka tiendecharhisï. Floiran enga sirkuitueri orhejtsïkutika jini Bolivia, uandasïndi: “Nirasïngachi aianhpini merkaduecharhu ka tiendecharhu a la una ísï asta tresisï jamberi jiáni engaksï atarantsticha nóteru xáni ánchikuarhini jarhajkia. Sáno méntkisïchi sési uandontskuarhesïnga kʼuiripuecha jingoni asta jamberichi uénasïnga uánikua kʼuiripuechani Bibliaeri ambe jorhendaani”.
Jimesïsï engachi úkua jukanchajka exeantani kʼuiripuechani imeecho, ju je aianhpini mámaru ambe úraparini. (Exe je párrafu 10).
10. ¿Ambechi máteru ambe uá úni parachi úni uandontskuarheni kʼuiripuecha jingoni?
10 Ju je máteru ambe úrani para aianhpini. Ju je eranhaskani eskachi territoriurhu, someni jánguarhintaskia kʼuiripu ma jingoni uandontskuarheni. Mámaru jandorachi nirasïnga imeo joperuchi no exentasïnga. ¿Ambechi máteru ambe uá úni? Pirenchi ma enga Katarína arhinhajka, uandantasïndi: “Karakuasïnga imechani engani no exeantajka imeo ka karakuasïnga ambe engani arhiapiringa jiáni engani imechani jingoni uandontskuarhepiringa”. ¿Ambejtsïni jorhendasïni i ambe? Eskachi jatsiska para mámaru ambe úrani parachi úni uandontskuarheni kʼuiripuecha jingoni engaksï territoriurhu jaka.
JU JE SEGUIRINI TSÍPIKUA JINGONI AIANHPINI NÁJKIRUKAJTSÏNI KʼUIRIPUECHA NO UÉKAAKA KURHAJCHANI
11. ¿Andiksïsï máru kʼuiripuecha no uékajki kurhaani ambe engachi aianhpijka?
11 Máru kʼuiripuechajtsïni no uékasïndi kurhajchani. Eratsesïndiksï eskaksï no uétarhinchasïnga jorhenguarhini Tata Diosïri ambe ni Bibliaeri ambe. Jamberiksï máru no jakajkujti Tata Diosïni jimbokaksï exesïnga eska parhakpinirhu kánikua no sési nitamakuarhinhasïnga ka nóksï jiókuarhisïndi ambe enga Biblia arhijka jimbokaksï exesïnga eskaksï relijioniri orhejtsïkuticha nóksï úsïnga ambe engaksï jorhentpijka. Máteruechaksï masi arhisïndi sánderu ánchikuarhini, sánderu uandanhiani imecheri familiani jimbo o imecheri uandanhiatecha jimbo ka nóksï jamberi exeni eska Biblia uáka jarhuataani. ¿Nénachi uá méntkisï tsípikua jingoni aianhpini nájkirukaksï uánikua kʼuiripuecha no exejka eska kánikua jukaparhakueska ambe engachi aianhpijka?
12. ¿Nénajtsïni uá jarhuatani aianhpikuarhu ambe enga uandajka Filipusʌ 2:4?
12 Ju je xarhatani eskachi uandanhiasïnga kʼuiripuechani jimbo. Uánikua kʼuiripuecha engaksï ióntki no uékenga kurhaani ambe engachi aianhpienga tátsekuaksï niárasti kurhaani jimbokaksï exespka eska ima kʼuiripu enga aianguapka Tata Diosïri ambe xarhataspti eska meru uékasïrenga jarhuatani (arhinta je Filipusʌ 2:4). Por ejemplu, David engachi antesi uandaka, uandasïndi: “Enga nema uandajka eska no uékasïnga míteni, jatsirantasïnga Bibliani ka publikasionichani ka jánguarhintasïngachi míteni andisï kʼuiripu ísï uandajki”. Kʼuiripuechaksï jukaparharasïndi enga nema uandanhiajka imechani jimbo. Jamberiksï no miájti ambe engachi arhiapka joperuksï kʼóru miájti na engachi pʼikuastapka. Ka nájkirukajtsïni kʼuiripu jamberi no jiárhitaaka uandani, uákachi xarhatakuni juchari jángua jingoni ka na engachi nínharhiaka eskachi uandanhiasïnga imani jimbo.
13. ¿Ambechi uá úni parakaksï kʼuiripuecha uékaaka kurhaani ambe engachi aianhpijka?
13 Ma ambe engachi uáka úni para xarhatakuani kʼuiripuechani eskachi uandanhiasïnga imechani jimbo, jindesti imani ambe aianguani enga marhuakuauaka ka engaksï tsitiaka. Por ejemplu, ¿exesïnchi ambe ma engajtsïni arhiaka eska ima kʼuiripu kaasïni sapiichani? Jamberiksï táticha sánderu uékaati kurhaani ambe enga Biblia arhijka paraksï tʼarhexeraani sapiichani o paraksï sánderu tsípikua jingoni irekani imeri familia jingoni. Ka engachi exeska eska puerta ma jimbo uánikua ambe jukaska para sési míkani, uákachi arhini kʼuiripuni eska iásï nóteru xáni segurueskia sési irekani ka ístuchi uáka aianguni eska inde ambe nóteru méni jauakia. Jiájkani, méni engajtsïni kʼuiripu ma kurhajchaaka, ju je jánguarhintani eska kʼuiripu kurhanguaka na enga Biblia uáka jarhuatani. Katarína engachi párrafu 10 jimbo uandaka, uandasïndi: “Eratsentasïnga na engareni jarhuatakia jíndeni míteni jurhimbikua ambe”. Ísï úparini, no sáni chéparini uandantasïndi ambe enga jakajkujka ka kʼuiripu exesïndi indeni ambe.
14. Ísï eska na uandajka Proverbios 27:17, ¿nénajtsïni marhuachesïni nemani jingoni nirani aianhpini?
14 Ju je jurajkuni eskajtsïni máteruecha jarhuataaka. Primeru siglurhu, Pablu jorhendaspti Timoteuni néna sánderu sési aianhpini ka jorhentpini ka ístu arhispti Timoteuni eska imajtu májkueni úpiringa para máteruechani jarhuataani (1 Kor. 4:17). Ísï eska Timoteu, juchajtuchi uáka jorhenguarhini kúnguarhikuarhu anapu erachicheri ambe engaksï sánderu míteka eska jucha (arhinta je Proverbios 27:17). Ju je exeni ambe enga nitamakuarhipka erachi ma enga Shawn arhinhajka, ima prekursorispti ireta sapichu ma jimbo ka jima anapu kʼuiripuecha, sáno iáminduechaksï sési pʼikuarherasïrendi imecheri relijioni jingoni. ¿Ambe jarhuataspi para ima no chkéni? Ima uandasïndi: “Méntkisï engani úpiringa, erachi ma jingoni nirasïrenga. Engachi máteru kʼumanchikua jimbo nirani jarhengia, jánguarhintasïrengachi uandontskuarheni néna sánderu sési aianhpini. Por ejemplu, miántasïrengachi ambe engajtsïni kʼuiripu ma arhienga ka tátsekuachi uandontskuarhesïrenga ambe engachi úpiringa uandani engajtsïni ístu máteru kʼuiripu májkueni ambe arhipiringa”.
15. ¿Andisï xáni jukaparhakue eskachi kómarhiaka jiáni engachi aianhpini nirajka?
15 Ju je kurhakuni Jeobani eskajtsïni jarhuataaka. Méni engachi niuaka aianhpini, ju je kómarhini Jeobani parajtsïni jarhuatani. Jimbokachi no ma ambe úpiringa úni engajtsïni imeri espiritu santu enga xáni uinhapitika, nójtsïni jarhuatapiringa (Sal. 127:1; Luk. 11:13). Engachi kómarhiaka Jeobani ju je kurhakuni ambe engajtsïni jimbo jatsika para jarhuatani. Por ejemplu, úpiringachi kurhakuni eskajtsïni jarhuataaka ambakiti kʼuiripuni ma exentani engajtsïni uékaaka kurhajchani. Tátsekua, ju je juchajtu jánguarhintani ka aianguani iámindu kʼuiripuechani engachi xáni uáka.
16. ¿Andisï xáni jukaparhakue jatsini máeri jorhenguarhikua parajtsïni sánderu sési nicheni aianhpikuarhu?
16 Ju je arhutani tiempu parachi jatsini máeri jorhenguarhikua. Tata Diosïri Karakata uandasïndi: “Parajtsï ísï úni jánhaskani ambe enga jindeeka enga Diosï uékajka eskajtsï uáka enga ambakitika ka enga jaiapanhinhantajka ka enga no ma ambe jimbo kueratajka jurhimbikueni” (Rom. 12:2). Engachi sánderu jakajkujka eska ísïska ambe engachi jorhenguarhijka Tata Diosïri ambe, nóchi xáni chéparini aianguasïnga kʼuiripuechani inderi ambe. Katarína uandasïndi: “Nótki xáni iónisti engani exeka eskani jatsiska parani sánderu mintsikani máru ambe enga ma orheta jatsika para míteni Bibliaeri ambe. Ísï jimbo, sési jorhenguarhispka imani ambe enga xarhatajka eska jarhaska nema engajtsïni kueraaka, eska Biblia Tata Diosïri Karakateska ka eska iásï, Tata Diosï kúnguarhikuani ma jatsiska enga imeri nombrini pájka”. Katarína uandasïndi eska imeri jorhenguarhikua jarhuataspka sánderu mintsikani Tata Diosïni ka para sánderu tsípikua jingoni aianhpini.
ANDICHISÏ SEGUIRINI JAKI TSÍPIKUA JINGONI AIANHPINI
17. ¿Andisï Jesúsi méntkisï tsípikua jingoni aianhpieni?
17 Jesúsi seguirispti tsípikua jingoni aianhpini nájkirukaksï máru kʼuiripuecha no uékapka kurhajchani. ¿Andisï ísï uéni? Jimboka mítespka eskaksï kʼuiripuecha jatsispka para míteni jurhimbikuani ka uékasïrendi xáni uáni kʼuiripuechani jarhuataani na enga xáni úpiringa. Ístu mítespti eskaksï tátsekua niárapiringa jiókuarhini Tata Diosïri Juramukueri ambe ima kʼuiripuecha engaksï antesi no uékenga. Ka inde ambesï úkuarhipti imeri familia jingoni. Ima tanimu uéxurhini ka terujkani enga Jesúsi aianhpini jámapka, no ma imeri ermanuti jámasïrendi chúxapani (Juanu 7:5). Joperu tátsekua enga Jesúsi na tsíntapkia, jiáni kʼóruksï kristianu úkuarhisptia (Uku. 1:14).
18. ¿Andichisï seguirini jaki aianhpini?
18 Nóchi míteska né niáraa jorhenguarhini Bibliaeri ambe engachi jorhentpijka. Máru kʼuiripuechaksï ióni jimbo niárasïndi míteni jurhimbikuani asta imecha engajtsïni no uékajka kurhajchani exesïndiksï juchari ambakiti jánguani ka eskachi tsípikua jingoni jámasïnga ka jamberiksï tátsekua niáraati kʼéri ambe arhini Tata Diosïni (1 Ped. 2:12).
19. Eska na uandajka 1 Korintu 3:6, 7, ¿ambechi jatsiski para miáni?
19 Nájkirukachi jucha ikarajka ka itsï jatsikuni, jatsiskachi para miáni eska Tata Diosïska enga újka eska kʼuiripiaka (arhinta je 1 Korintu 3:6, 7). Etiopía anapu erachi ma enga Getahun arhinhajka, uandasïndi: “Jukari 20 uéxurhini jimbo, jíjkusïni jindeepka Testigu territoriu ma jimbo enga iauani méni aianhpinhajka. Joperu iásï, 14 aianhpirichaksï jarhastia. Juchiti uarhiiti ka juchiti tanimu sapiichaksï itsï atakuarhistia ka indeecha jingoniksï tresestia engaksï itsï atakuarhika. Tánguarhikuecharhu, sáno méntkisïksï 32 kʼuiripuecha nirasïndi”. Getahun tsípisïndi jimboka no kuatantaspka aianhpini, sánderu sési, tekaantskua jingoni erokuarhispti eska Jeoba andaparhataapiringa imeri kúnguarhikuarhu ambakiti kʼuiripuechani (Juanu 6:44).
20. ¿Nénachi jucha ísïski komueska ima kʼuiripuecha engaksï nirajka jirinhatpintani?
20 Jimboka Jeoba kánikua jukaparharasïnga kʼuiripuecheri tsípikuani, íntskustijtsïni sésikua parachi imeri Uájpani jingoni ánchikuarhini ka iápurisï anapu kʼuiripuechani tánantani imeri iretarhu ante de i parhakpini kʼamajkunhani (Ageo 2:7). Engachi aianhpini nirajka, ísïskachi komueska ima kʼuiripuecha engaksï juátarhisï nirajka jirinhantaani ima kʼuiripuecha engaksï juátarhisï tsïnchejka. Ka nájkirukaksï no iáminduecha engaksï nirajka jirinhaantani újka exeantani kʼuiripuechani, kánikua jukaparhakuesti ambe engaksï újka iáminduecha. Májkuenisti aianhpikua jingoni: nóchi míteska namuni kʼuiripuechaksï útasï uá pʼímutantskata uérani Noambakitiri parhakpini jimbo, joperu Jeoba uáti né uéjki juchantsïni axani parachi jarhuatani. Andreas enga Bolivia irekani jaka, uandasïndi: “Míteska eska uánikua kʼuiripuecheri jarhuajperata jingoni, nema niárasïnga míteni jurhimbikuani ka itsï atakuarhini”. Ísï jimbo, ju je jánguarhintani méntkisï tsípikua jingoni aianhpini. Ka engachi ísï úska, Jeobajtsïni újchakuraati ka sánderuchi tsípikua jingoni irekaaka engachi niraska aianhpini.
PIREKUA 66 Ju je ambakiti ambe aianhpini
^ párr. 5 Iámindu jásï aianhpikuarhu, aianhpirichaksï jatsisti para ísï úni eskaksï na uandajka paisirhu anapu leicha para kuájchakuni kʼuiripuecheri informasionini.
^ párr. 7 Ini jorhenguarhikua jimbo, exeakachi máru ambe engajtsïni jarhuataaka tsípikua jingoni aianhpini nájkirukachi no exeantauaka uánikua kʼuiripuechani imeecho o engajtsïni no uékaaka kurhajchani.
^ párr. 60 AMBE ENGAKSÏ XARHATAJKA IMAJENICHA: (karhakua uénasti asta kétsekua jamberi): Temungurhiri ma jimesïsï aianhpixati nani enga úkua jukajka exeantani kʼuiripuechani kʼumanchikuarhu. Ima kʼuiripu enga primeru kʼumanchikuarhu irekaka, ánchikuarhixati, enga segundu kʼumanchikua jimbo irekaka, doktori jingoni jarhasti ka enga terseru kʼumanchikuarhu irekaka, piántani ambe jámaxati. Tátsekua, temungurhiri úsïndi uandontskuarheni imani jingoni enga ánchikuarhini japka jimbokaksï ménderu kʼuanhatsentasïnga sánderu tátsekua. Ka segundu kʼumanchikuarhu anapuni, jiániksï úsïndi uandontskuarhekuni engaksï karritu jingoni aianhpini jarhajka ospitalirhu no iauani. Ka imani jingoni enga terseru kʼumanchikuarhu irekaka, telefonu jimboksï uandontskuarhekusïndi.
