Inde ambe enga úkuarhipka, jarhuatasptireni parani uénani jirinhantani Kuerajpirini. Joperu ante deksïni aianguni ambe enga úkuarhipka ima chúrikua, jurajkuksïni aianguni ambe engani nitamanchapka engani sapichuepka ka engareni jarhuataka parani jirinhantani Tata Diosïni.

Uéxurhini 1937 jimbo andajpenuska jini Guesnain, ireta ma engaksï minecha jaka jini norte de Francia. Juchiti táti jima ánchikuarhisïrendi enga karboni p’itanhenga ka jorhendasptirini eska kánikua jukaparhakuespka eska ma ánchikuarhiriuaka. Ístureni jorhendasti eska kánikua jukaparhakueska eska ma jurhimbitku uáka ambe ma. Jánguarhintasïrendi jarhuatani imani kʼuiripuechani engaksï minecharhu ánchikuarhienga enga xáni peligrosuepka, isï jimbosï grupuecharhu jámendi enga kuájpiauenga imechani engaksï minecharhu ánchikuarhienga ka inchamukusïrendi uelgaecharhu ísï. Ístu, juchiti táti no sáni tsitisïrendi na engaksï jámenga iretarhu anapu saserdoticha. Nájkirukaksï imecha jatsikuarheripka, útasïksï tumina ka t’irekua kurhakuasïrendi imechani engaksï minecharhu ánchikuarhienga nájkirukaksï ícha apenasi andangutenga. Ísï jimbo, nóreni méni jorhendaspti relijioniri ambe nijturini Tata Diosïri ambe uandontskuarhechipi.

Engani kʼuiripini japka, no sáni jaiapanhentasïrenga na engaksï menusi uáuenga máteru nanisï anapuechani engaksï Francia irekapka. Joperuni ji tsitisïrenga imecheri uájpecha jingoni kúnguarhini ka futboli chʼanani. Ístu, juchiti nándi Polonia anapuespti.  Ji uékasïrenga eskaksï iámindu kʼuiripuecha májkueni kánhapiringa ka eskaksï sési pájperapiringa nájkirukaksï táchani jásï rasepiringa.

Uéxurhini 1957 jimbo, uandajpanhaspka parani ejersiturhu jarhani, isï jimbosïni ima chúrikua engani uénakuarhu uandaka, Argelia anapu juátecharhu japka. Engani na uandapkia“¡Tata Diosï, jarhuatarini!”, juátarhu anapuni burruni ma exepka eska juchiti orhepani jimbo jarhaspka ka no soldadu ma engachi jingoni uarhiperani japka. ¡P’íjtsamaspka! Ka íni ambe jimbo ka guerrani jimbo, uénaspka kurhamarhikuarhini: ¿andisïni irekani jaki?, ¿pendienti pájki Tata Diosï juchantsïni jimbo?, ¿niáraa ménisï sési pájperanhani?

Ísï tátsekua, engani nípka pʼorhembiani juchiti tátichani, Jeobaeri testiguni ma mítespka engareni Biblia ma íntskupka. Engani Argelia kʼuanhatsentapka, uénaspka arhintani. Ka eratsentani pakaraspka ambe enga arhijka Jaŋaskuecha 21:3, 4: “Diosïri tiosta ixú jarhastia kʼuiripuechani jingoni. [...] Ka Diosï kutsunharhikuauati iámindu uekua, ka nóteru jauatia uarhikua, ka ni uandanhiata ka nóteru nema ueraati o pʼamenchani”. No méni arhintaxapka inde jásï ambe. Ísï jimbo, kurhamarhikuarhispka sini ísïpi inde ambe. Jiáni isï, no ma ambe mítespka ni Tata Diosïri ambe ka ni Bibliaeri ambe.

Engani na uéntapkia ejersiturhu uéxurhini 1959 jimbo, mítespka Testiguni ma enga François arhinhajka, engareni uánikua ambe jorhendapka Bibliaeri ambe, komueska Tata Diosï arhinhasïnga Jeoba (Sal. 83:18). Ístureni, jorhendaspti eska Jeoba kʼamajkuaka iámindu imani ambe enga no sési úkuarhini jaka ixú parhakpinirhu ka eska Echeri Paraisu máeuaka ka eska uáka ambe enga aiatspejka Jaŋaskuecha 21:3, 4.

Ima ambe engani jorhenguarhini japka, xarharasïrendi eska ísïspka ka mintsitarhurini niárachespti. Joperu ístu, kánikua ikiaspka saserdotichani jingoni ka uékasïrenga uandantani eskaksï no jorhentpixapka ambe enga Biblia uandajka. Útasï isï eratsesïrenga eska juchiti táti ka sóntkuni uékaxapka úni ambe ma.

Françoisiri jarhuajperata jimbo ka máteru Testiguecheri, sánhani arhispka jorhenguarhini p’íngukuarhini. Íksï jimbanhi amiguechajtsïni jorhendaspti eskachi kristianuecha no jatsiska para jusgariani kʼuiripuechani, sino jorhendaani ambakiti ambe enga Tata Diosïri Reinu uáka. Í ambesï úpti Jesúsi ka indeni ambesï juramukuapti imeri chúxapatichani eskaksï úpiringa (Mat. 24:14; Luk. 4:43). Ístuni jatsispka parani jorhenguarhini sési uandontskuarhekuani kʼuiripuechani ka janhanharhikua jingoni na uéjkiksï máteru ambe jakajkuni. Biblia arhisïndi: “Uétarhisïndi eska Diosïri jántspiri no uinhamarhitspiaka, sino eska kaxumbitiuaka para iáminduechani jingoni” (2 Tim. 2:24).

Mójtakuspka juchiti irekuani ka uéxurhini 1959 jimbo itsï atakuarhispka eska Jeobaeri testigu ma kʼéri tánguarhikua sirkuitueri ma jimbo. Jima mítespka pirenchini ma engani kánikua tsitipka. Arhinhasïrendi Angèle. Uénaspka pʼorhembini imeri kúnguarhikuarhu, ka uéxurhini 1960 jimbo, niáraspkachi témbuperani. Ambakiti uarhiiti máesti, ka ambakiti regalu ma engareni Jeoba íntskuka (Prov. 19:14).

Desde ióni ísï, uánikua ambakiti ambe jorhenguarhiskia erachicheri engaksï ióni marhuakukia  Jeobani. Exeska eska para úni sési úni ánchikuarhita ma enga úkua jukaka, uétarhisïndi para ma kaxumbitiini ka isï úni eska na arhijka Proverbios 15:22, enga arhijka: “Engaksï uánikuecha jarhajka engaksï konseju íntspijka sési uérasïndi ambe” ma.

Uéxurhini 1964 jimbo, uénaspka exeni eska meru ísïska eska í karakata na arhijka. Imani uéxurhini jimbo, niáraspka sirkuitueri orhejtsïkutini, ka pʼorhembiasïrenga kúnguarhikuechani parani uinhaperaantani erachichani ka jarhuataani paraksï sánderu andarhierani Tata Diosïni. Apenasi 27 jatirispka ka nótkini xáni sési mítespka néna úni indeni ánchikuarhitani. Ísï jimbosïni uánikua ambe no uénga sési úni. Joperu, jánguarhintaspka jorhenguarhini inderi ambe. Ka ístuni ambakiti ambe jorhenguarhispka ima konsejuecheri engajtsïni erachicha íntskupka engaksï ióni marhuakukia Tata Diosïni.

Por ejemplu, engani uénapkia pʼorhembiani kúnguarhikuechani, París anapu kúnguarhikuani ma pʼorhembispka ka engani na kʼamarapkia, erachi ma enga sési marhuakuni japka Tata Diosïni, kurhamarhisptireni sinchi úpirini uandontskuarheni. Ji arhispka eska “jo”.

Kurhamarhisptireni: “Louis, enga doktori ma kʼumanchikuarhu ma niárajka, ¿néchani nirasïni exeani?”.

Ka ji arhispka: “pʼamenchatichani”.

“Ísïsti —arhisptirini—. Joperuni exeska eskari sánderu uandontskuarhesïnga imani erachichani jingoni engaksï sési marhuakuni jaka Tata Diosïni, komu orhejtsïkutini jingoni enga orhekupajka máteru orhejtsïkutichani. Kúnguarhikuarhu uánikua erachichaksï jarhasti engaksï jimbanhika o engaksï no xáni uandarika o engaksï chkétakuarhitini jaka. Exesïnga eska kánikua uinhaperantauaka engari uandontskuarheska imecha jingoni ka engari niraska imeecho ka imecha jingoni tʼireni”.

¡Ambakiti konsejurini ma íntskuspti i erachi! Mintsitarhurini niárachespti na enga xáni xénchenga Jeobaeri karichichani. Nájkirukani úkua jukanchapka, jiókuarhispka ambe engareni arhipka ka jirejiresï uénaspka isï úni eskarini na arhipka. Agradesidu jarhaska Jeoba jingoni í járhati erachicha jimbo.

Uéxurhini 1969 ka 1973 jimbo, tsimani k’éri tánguarhikuechaksï úkuarhispti jini Colombes (París), ka kurhachisptijtsïni eskani orhejtsïkupiringa Grupuni enga Tʼirekueri ambe exenga. K’éri tánguarhikuarhu enga 1973 jimbo úkuarhipka, jatsispkachi para sinku jurhiatikua jimbo, 60, 000 kʼuiripuechani tʼirerani. No jánhaskasïrenga néna úpirini ini ánchikuarhitani. Joperu ambe engareni jarhuatapka, jindeespti úni ambe enga Proverbios 15:22 arhijka: Konseju kurhakuani imechani engaksï míteka. Jarhuajperata kurhakuaspka  erachichani engaksï sési marhuakuenga Tata Diosïni, engaksï mítepkia néna úni ini ánchikuarhitani. Uandajpaspka erachichani engaksï kʼuiripeta atarantenga, engaksï ikarenga ambe ma, engaksï t’irekua ambe úmantenga ka engaksï jorhenapka piáni ambe ma. Imecheri jarhuajperata jingoni úspka úni ini xáni k’éri ánchikuarhitani.

Uéxurhini 1973 jimbo, p’ímarhinhaspkachi para Francia anapu Beteli jimbo marhuani. Ima ánchikuarhita engani orheta intsïnhapka, kánikua úkua jukaspti. Jatsispka parani jirinhakuntani néna engani úpiringa axakuani publikasionichani Camerún anapu erachichani. Uéxurhini 1970 ka 1993 jimbo, nóchi sésikua jatsispka para juchari ánchikuarhitani úni imani paisi jimbo. Ménderuni no jánhaskasïrenga ambe úni. Péringarini sïtamarhipka erachi enga jiánisï exeenga ánchikuarhitani enga Francia úkuarhienga, jimbokarini arhispka parareni uinhaperantani: “Camerún anapu erachichaksï kánikua uétarhinchaxati publikasionichani. ¡Ka juchachi jatsiska para kuidariuani!”. Ka ísïchi úspka.

Uánikua xanhari niraspka imani paisicha jimbo engaksï Camerún pírikurhitini jaka parani tánguarhini Camerún anapu orhejtsïkuticha jingoni. Í erachicha engaksï balori jukapka ka jánhastiini, jarhuatasptijtsïni exeni néna engani úpiringa someni axakuani jarhani publikasionichani Camerún anapu erachichani. Ka Jeoba újchakuraspti na engachi xáni jánguarhintapka. Asta ma 20 uéxurhini jimbo, nóksï méni kueratanchaspti rebistani Aianhpiri ka ístu máteru publikasionini enga jiáni isï arhinhenga Nuestro Servicio del Reino enga mándani kutsï uéreenga.

Engachi uénapka Angèle jingoni mítperani, kuenta íntskukuarhispka eska ambakiti pájperakua ma jatsispka Jeobani jingoni. Ka engachi témbuperapkia sánderuni exespka. Por ejemplu, ima chúrikua engachi tembuperapka, arhisptirini eskani kómarhipiringa Jeobani ka arhini eskachi uékasïrenga májku k’éri marhuakuni. Ka Jeoba kurhaaspti juchari kómarhikuani.

 Ístureni Angèle jarhuataspti parani sánderu mintsikani Jeobani. Por ejemplu, engachi pʼímarhinhapka para Beteli marhuani 1973 jimbo, ji no seguru jarhaspka, jimbokani kánikua tsitisïrenga sirkuitueri ánchikuarhitani. Joperureni Angèle miátantaspti eskachi aiakuspka juchari tsípikuani Jeobani ka eskachi jimbosï jatsipka para úni ambe engajtsïni imeri kúnguarhikua arhipiringa (Ebr. 13:17). Ískurini pakataspti. Ísï jimbo jiókuarhispkachi p’ímarperakuani ka niraspkachi Beteli. Juchiti uarhiiti jánhastiisti, kaxumbitiini ka kánikua xénchasïndi Jeobani. I ambe ústi eskachi sési pájperaaka ka eskachi ambakiti ambe erakupiringa úni iámu ini uéxurhinichani jimbo.

Nájkirukachi jatirikia, Angèle útasï ambakiti uarhiiti máesti ka seguirixatirini jarhuatani. Por ejemplu, uánikua eskuelechaksï inglesi jimbo úkuarhisïndi. Ísï jimbo, parachi úni nirani ma eskuelarhu, Angèle ka ji, uénaspkachi sánderu sési jorhenguarhini ini idioma. Ka mótsespkachi máteru kúnguarhikuarhu enga inglesi jimboepka, nájkirukachi jiánisï sáno 75 jatiripkia. Jimbokani Grupurhu jarhaska enga Francia anapu Betelini orhejtsïkujka, no káni tiempu jatsisïnga parani jorhenguarhini máteru idioma. Joperuchi tsimarhani jarhuajperasïnga. Iásïchi jukari 80 jatiriskia ka útasïchi seguirixaka inglesi ka francesi jimbo prepararikuarhini para tánguarhikuecharhu. Jánguarhintasïngachi jarhuajpeni tánguarhikuecharhu ka aianhpikuarhu. Jeoba újchakuraxati na engachi xáni jánguarhintani jaka para inglesi jorhenguarhini.

Uéxurhini 2017 jimbo, k’éri kóntperatachi ma intsïnhaspka parachi jorhentperakuarhu nirani para Grupuecha enga Betelini ma orhejtsïkujka ka imecheri témbecha, engaksï úkuarhijka kʼumanchikuarhu nani enga Watchtower jorhentpijka, jini Patterson (Nueva York).

Ísïsti, Jeoba jindesti Ambakiti Jorhentpiri (Is. 30:20). Jimboksïsï iámindu imeri marhuaricha, tumbiicha ka jatiriicha, sánderu ambakiti jorhentperakuaksï intsïnhajti (Deut. 4:5-8). Exeska eska tumbiicha engaksï kurhajchaajka Jeobaeri konsejuechani ka erachicheri ka pirenchicheri engaksï ióni páni jakaia marhuakuni Jeobani ambakiti ambeksï erakusïnga úni ka niárasïndiksï ambakiti kristianuecheni engaksï no méni jurajkujka Jeobani. Ísïsti ambe enga uandajka Proverbios 9:9: “Arhistajku janaskatini ma, ka sánderu jánhaskati úkuarhiati. Jorhenda nemani enga jurhimbitika, ka sánderu jorhenguarhiati”.

Ma 60 uéxurhini nitamastia, ka ménichani eratsentasïnga ambe enga úkuarhipka ima chúrikua Argelia anapu juátecharhu. No eranhaskasïrenga eskani xáni tsípikua jingoni irekapiringa. ¡Kánikua ambe jorhenguarhiskia máteruecheri! Jeobajtsïni ambakiti irekua ma íntskusti Angèleni ka jíndeni ka ústi eskachi uánikua ambe úpiringa ka tsípikua jingoni. Jimbochisï eratsetini jaka seguirini jarhani jorhenguarhini juchari Táti auandarhu anapueri ambe, ka erachicheri ka pirenchicheri engaksï xénchajka Jeobani, engaksï jánhaskatiika ka engaksï ióni páni jakaia marhuakuni.