1. ¿Andichisï uétarhinchajki Tata Diosïri jánhaskakua? (Proverbios 4:7).

 ¿MÉNISÏJTSÏ jatsispi para erakuni ambe ma enga jukaparhakuepka? Enga ísïika, merujtsï kurhakupka Tata Diosï Jeobani eskaksïni íntskupiringa jánhaskakua jimbokajtsï mítespka eskajtsï uétarhinchaxapka (Sant. 1:5). Rei Salomóni karaspti: “Jánhaskakua jindeesti enga sánderu jukaparhakua ambeeka” (arhinta je Proverbios 4:7). Ísïisti, ima no uandaxapti kʼuiripuecheri jánhaskakuani, sino imani enga Tata Diosï Jeoba íntspijka (Prov. 2:6). Peru, ¿uaajtsïni Tata Diosïri jánhaskakua jarhuatani parachi úni iásï orhepani uérakuani uandanhiatechani? Jo. Ka i jorhenguarhikuajtsïni jarhuataati exeni eska ísïiska.

2. ¿Ambechi uaa úni parachi jánhastiini?

² Ambe engachi uaaka úni parachi jánhastiini, jindeesti jorhenguarhini ka úni ambe engaksï tsimani kʼuiripuecha jorhentpipka engaksï mítekatepka jimbokaksï kánikua jánhastiispka. Orheta, Salomóniri ambechi uandani jauaka. Biblia uandasïndi eska Tata Diosï úspka “eska Salomóni kánikua jánhastiipiringa ka eska sési kurhangupiringa” (1 Rey. 4:29). Ka tátsekuachi Jesúsiri ejempluni exeaka enga sánderu jánhastiipka ixú Echerirhu (Mat. 12:42). Profesia ma enga Jesúsiri ambe uandajka, uandasïndi: “Tata Diosï Jeobaeri espiritu imani jingoni jauati, espiritu para jánhaskani ka kurhanguni” (Is. 11:2).

3. ¿Ambechi exeni jaua ini jorhenguarhikua jimbo?

³ Enga Tata Diosï úpka eska Salomóni ka Jesúsi jánhastiipiringa, imeechaksï úspti ambakiti konsejuechani íntspiani para iáminduecha. Ini jorhenguarhikua jimbochi exeni jauaka tanimu konsejuechani: parachi sésku exeni jatsikuarhekua ambe, parachi sésku  exeni ánchikuarhitani ka parachi juchajkumindu sésku exekuarhini.

4. ¿Andisï no májkuenipi na enga xáni jatsikuarhepka Salomóni imani ambe jingoni enga Jesúsi jatsikuarhepka?

⁴ Salomóni kánikua jatsikuarherispti ka kánikua sési jásï ambe jatsispti (1 Rey. 10:7, 14, 15). Joperu Jesúsi no kánikua ambe jatsikuarhespti ka nijtu jatsipi kʼumanchikua ma (Mat. 8:20). Joperu Salomóni ka Jesúsi séskuksï exesïreendi jatsikuarhekua ambe, jimboka imeecheri jánhaskakua Tata Diosï Jeobani jimboespka.

5. ¿Salomóni néna sésku exesïreni sentabuni?

⁵ Salomóni exespti eska sentabu “kuájchakukua” máeska (Ecl. 7:12). Sentabujtsïni marhuachesïndi parachi úni jatsini ambe engachi uétarhinchajka ka parachi úni sáni piákuarhini ambe engachi tsitini jauaka. Joperu, nájkiruka Salomóni xáni jatsikuarheripka, kurhanguspti eska jarhaspka máteru ambe enga sánderu jukaparhakua ambeepka eska sentabu. Pori ejemplu, karaspti: “Sánderu sésisti ambakiti ambe jimbo mítekateni ka eska uánikua jatsikuarhekua ambe jatsini” (Prov. 22:1; nota). Ístu, kuenta íntskukuarhespti eskaksï ima kʼuiripuecha engaksï tsitijka kánikua ambe jatsikuarheni, nóksï konforme jarhasïnga imani ambe jingoni engaksï jatsijka (Ecl. 5:10, 12). Ka ístu uandaspti na enga xáni no sésiika para ma sentabuni mintsikani, jimbokachi iásï uaaka jatsini ka pauani nóteru ambeia (Prov. 23:4, 5).

6. ¿Jesúsi néna sésku exesïreni jatsikuarhekua ambeni? (Mateu 6:31-33).

⁶ Jesúsi sésku exesïrendi jatsikuarhekua ambe. Tsitisïreendi tʼireni ka itsïmani (Luk. 19:2, 6, 7). Ma xanhari, itsïni binu úntaspti enga kánikua ambakitiipka, ka inde jindeespti primeru milagru enga úpka (Juanu 2:10, 11). Ístu, jiáni enga uándikunhapiringa, xukuparhakua ma jukarixapti enga kánikua jukaparhapka (Juanu 19:23, 24). Joperu jatsikuarhekua ambe no jindeespti ambe enga sánderu jukaparhakua ambeepka para ima. Arhiaspti imeeri jorhenguarhirichani: “No nema úsïndi marhuakuani tsimani patronichani [...]. Nójtsï uaaka marhuakuni [Tata] Diosïni ka jatsikuarhekuani” (Mat. 6:24). Jesúsi jorhentpispti eska engachi  orheta úska Reinueri ambe, Tata Diosï Jeoba uaaka úni eskachi jatsiaka ambe engachi uétarhinchani jauaka (arhinta je Mateu 6:31-33).

7. ¿Náki kóntperatechani jatsiaski erachi ma jimboka no sánderu jukaparharaska sentabuni?

⁷ Uánikua erachichani ka pirenchichani kánikua marhuakuasti ísï úni eskaksï Tata Diosï Jeobaeri konsejuecha na uandajka sentabueri ambe. Ju je erachiri ejempluni ma exeni enga no tembuchatini jaka enga Daniel arhinhajka. Ima uandantasïndi: “Engani tumbi sapichuepka uandaspka eska marhuakuni Tata Diosï Jeobani sánderu jukaparhakua ambeespka”. Jimboka Danieli jánguarhintaska arisku sáni irekani, úspti úrani imeeri tiempuni ka ambe enga ima jorhenaka úni para jarhuajpeni ka para Beteli marhuani. Ístu uandasïndi: “No méni pʼamondakuarhiska indeni ambe jimbo engani erakuka úni. Ísïisti eskani úpiringa kánikua sentabu andani engani sánderu indeni ambe uékapiringa, joperuni no jatsiapiringa ambakiti amiguechani engani iásï jatsiaka. Ístu, orheta peerani Reinueri ambe úsïndi eskani kánikua sési pʼikuarheraaka ka eska engani jánguarhintapiringa sentabu andani. Sentabu méntku no sáni terukukuarhintasïndi imani kóntperatecha jingoni engareni Tata Diosï Jeoba íntsaakia”. Ísïisti, engachi jánguarhintaska orheta peerani Tata Diosïri ambe ka no para sánderu sentabu jatsini, andanchi uérasïnga.

8. ¿Nénachi jimbo míteski eska Salomóni sésku exesïreenga ánchikuarhitani? (Eclesiastés 5:18, 19).

⁸ Salomóni uandaspti eska engachi sési pʼikuarherajka ánchikuarhita jimbo, “Tata Diosïri kóntperata” máeska (arhinta je Eclesiastés 5:18, 19). Ístu karaspti: “Iámindu ambe jimbo enga jánguarhinhantajka, kóntperatechaksï jarhasïndi” (Prov. 14:23). Ka ima no ísku jatinisï ísï uandani japti. Ima sési mítesti ambe enga jindeeka ánchikuarhini jimboka kʼumanchikuechani uaaspka, ubasï ambe jatsikuspti, jardinichani uaaspti, posuechani para itsï pʼitani ka iretechani (1 Rey. 9:19; Ecl. 2:4-6). Salomóni meru kánikua ánchikuarhispti ka sési pʼikuarheraspti indeni ambe jimbo. Peru mítespti eska uétarhisïreenga sánderu ambe para ma úni meru tsípini pʼikuarherani. Ístu uánikua ambe úspti para Tata Diosï Jeoba. Pori ejemplu, orhejtsïkuspti para sési jásï templu ma úkuni para kʼéri ambe arhini, ka inde ánchikuarhita siete uéxurhini jimbo kʼamarakuarhispti (1 Rey. 6:38; 9:1). Enga na mámaru ambe úpkia, exespti eska Tata Diosïri ambe sánderu jukaparhakua ambeespka. Karaspti: “Engari na kurhaakia iámindu ambe, ari ambesï jukaparhakueti: kánikua janhanharhi Tata Diosïni enga jurhimbitiika ka ú ambe enga ima juramujka” (Ecl. 12:13).

9. ¿Ambe úspi Jesúsi para no sánderu jukaparharani ánchikuarhini?

⁹ Jesúsi kánikua ánchikuarhirispti. Enga tumbiipka, karpinteruespti (Mar. 6:3). Taati jémbeechaksï meru agradesidu pʼikuarhereendi imani jingoni jimboka jarhuataasïreenga paraksï úni kéndani imeeri familiani enga kánikua kʼépka. Ka jimboka perfektuespka, sési uaasïreendi ánchikuarhitechani ka jamberi uánikua klientichani jatsiapti. Úsïngachi eratseni na enga xáni sési pʼikuarhereenga Jesúsi imeeri ánchikuarhita jimbo. Joperu no jurajkusïreendi eska ójkutapiringa para Tata Diosïri ambe úni (Juanu 7:15). Ka enga Tata Diosïri ambe jorhentpini japkia, arini konsejuni íntspispti: “Ánchikuarhi je no para andani tʼirekua enga sóntku kʼamarajka sino para andani indeni tʼirekuani enga jindeeka para tsípikua méntkisï jatsini” (Juanu 6:27). Ka enga Juátarhu Arhijtsïkpipka, uandaspti: “Sino patsa je chaari jatsikuarhekuani auandarhu” (Mat. 6:20).

10. ¿Náki peligru úpirinchi jatsini engachi ambakiti ánchikuarhiri máeuaka?

¹⁰ Tata Diosï Jeobaeri jánhaskakuajtsïni jarhuatasïndi  sésku exeni ánchikuarhitani. Kristianuechachi arhinhasïnga eskachi kánikua ánchikuarhiaka ka eskachi ambakiti ánchikuarhita ma uaaka (Efes. 4:28). Someni, juchaari patronichaksï exesïndi eskachi jurhimbitku úsïnga ambe ma ka eskachi ánchikuarhiriska ka jamberijtsïni arhijti eskaksï tsitisïnga na engachi ánchikuarhijka. Úpirindi eskachi sési úni jámani ueenapiringa sánderu ánchikuarhini paraka juchaari patroni sési exeauaka Jeobaeri testiguechani. Joperu engachi ísï úpiringa, jamberichi nóteru xáni pendienti japiringia juchaari familieri ka ístuchi nóteru xáni úpiringia Tata Diosïri ambe. Enga ísï úkuarhipiringa, jatsipiringachi para úni ambe ma parachi no sánderu jukaparharani ánchikuarhitani.

11. ¿Ambe jorhenguarhiski William orhejtsïkutiri ma?

¹¹ Erachi ma enga tumbiika, enga William arhinhajka exesti na enga xáni jukaparhakueka sésku ánchikuarhini. Ma tiempu ánchikuarhispti para erachi ma enga orhejtsïkutipka. Imeeri ambe uandaparini, William uandantasïndi: “Ambakiti ejemplu máesti na enga jindeeka para sésku úni ambe ma. Kánikua ánchikuarhisïndi ka imeeri klientichaksï konforme jarhasti imeeri ánchikuarhita jingoni. Joperu enga na uéntajkia ánchikuarhitarhu, arhutasïndi tiempu para imeeri familia jingoni jarhani ka para Tata Diosïri ambe úni. Exesïnga eska kánikua tsípikua jingoni irekasïnga”. *

12. ¿Néna xarhataspi Salomóni eska sésku exekuarhisïreenga, joperu ambe úspi eska nóteru ísï exekuarhipiringia?

¹² Enga Salomóni sési marhuakuni japka Tata Diosï Jeobani, sésku exekuarhisïreendi. Enga tumbiipka ka enga ueenani japka juramuni, ma xanhari exespti eska uánikua ambe no úsïreenga úni ka kurhakuspti Tata Diosïni eska jarhuatapiringa (1 Rey. 3:7-9). Ístu, sési mítespti eska no sési jarhaspka eska ma niárapiringa kʼéramakuarhini. Karaspti: “Kʼéramakuarhikua jurhasïndi ante de ma no sési pakarani ka sési exekuarhikua, ante de no sési kʼamarhukuni” (Prov. 16:18). Xáni no sési enga tátsekua  mirikurhiapka ini uandakuechani. Enga ióni sáni páni japkia juramuni, niáraspti kʼéramakuarhini ka nóteru kurhajchasptia Tata Diosïri juramukuechani. Pori ejemplu, Lei arini ambe juramukuasïreendi rei ebreuechani: “Ístu no jatsisti para uánikua témbechani jatsiani paraka imeeri mintsita no támisï niuaka” (Deut. 17:17). Peru Salomóni no kurhajchaspti ini leini ka 700 témbechani jatsiaspti ka 300 uarhiitichani ka uánikua imeechaksï diosï úkatechani kómarhiasïreendi (1 Rey. 11:1-3). Jamberi eratsepti eska iámu ambe sési jarhaspka. Ia sea enga ísï eratsepka o nómbe, kánikua no sési úkuarhinchaspti jimboka jurajkuspka Tata Diosï Jeobani (1 Rey. 11:9-13).

13. ¿Ambechi jorhenguarhisïni engachi eratsentajka na enga xáni kaxumbitiipka Jesúsi?

¹³ Jesúsi méntkisï kaxumbikua jingoni jámasïreendi ka no kʼéri ambe exekuarhisïreendi. Ante de jurhani parhakpinirhu, uánikua sési jásï ambe úspti para Tata Diosïni marhuakuni. Kolosasi 1:16 uandasïndi eska ‘iámindu ambe imani jimbo kueraanhaska enga auandarhu jaka ka echerirhuʼ. Jamberi, jiáni enga Jesúsi itsï atakuarhipka miántapti ambe enga xáni úpka enga imeeri Taati jingoni japka auandarhu (Mat. 3:16; Juanu 17:5). Joperu no kʼéramakuarhispti indeni ambe jimbo ka no méni sánderu kʼéri pʼikuarheraspti eska máteruecha. Arhiaspti imeeri chúxapatichani eska no jurhaspka parhakpinirhu “para marhuaminhani sino para marhuatspini ka íntspini imeeri tsípikuani para uánikuechani euajpiantani” (Mat. 20:28). Ístu uandaspti eska ima no jandiajku pʼitsikuarhiparini úsïreenga ambe ma (Juanu 5:19). ¡Xáni enga kaxumbitiipka Jesúsi! ¿A no eskachi juchajtu májkueni uékasïnga jámani eska ima?

14. ¿Nénajtsïni jarhuatasïni Jesúsiri uandakuecha parachi sésku exekuarhini?

¹⁴ Jesúsi jorhendaaspti imeeri chúxapatichani eskaksï jatsipiringa para sésku exekuarhini. Ma xanhari arhiaspti: “Asta chaari jauiri jamberi iámindu kuentukata jarhasti” (Mat. 10:30). Kánikuajtsïni sési pʼikuastantasïndi i uandakuecha ka sánderia engachi ísï exekuarhijka enajkichi no sáni jukaparhakua ambee. Miátantasïndijtsïni eska juchaari Taati auandarhu anapu pendienti pásïndi juchantsïni jimbo ka eskajtsïni kánikua jukaparharasïnga. Enga Tata Diosï Jeoba exejka eskachi uaaka marhuakuni ka irekani  para méntkisï jimbanhi parhakpinirhu, ¿neeskichi jucha parachi arhini eska inde ambe no ísïiska?

15. Eska na uandapka rebista La Atalaya, ¿nénachi jatsiski para exekuarhini? b) Eska na xarharajka fotuecharhu pájina 4 jimbo, ¿náki kóntperatechanchi no jatsiasïni engachi juchajkumindu pendienti pákuarhijka?

¹⁵ Ma 15 uéxurhini ísïistia engajtsïni rebista La Atalaya pʼímarhika parachi sésku exekuarhini. Uandaspti: “Ísïisti, eskachi no uékasïnga jukari jukaparharakuarhini enga uaaka eskachi kʼéramakuarhiaka, joperuchi nójtu uékasïnga méntku ménderueni exekuarhini ka uandani eskachi no ma ambe jukaparharaska. Sánderu sési, uékasïngachi exeni ambe engachi meru újka úni. Ísï jimbo, jatsiskachi para exeni ambe engachi sési újka ka ambe engachi no újka úni. Pirenchi ma ini ambe uandaspti indeeri ambe: ‘Nijtuni noambakiti kʼuiripu máe ka nijtuni sánderu ambakiti kʼuiripu máe. Ísï eska iáminduecha, sési úsïnga máru ambe ka máteru ambe no úsïnga sési úniʼ”. * ¿A no eska kánikua jukaparhakueska sésku exekuarhini?

16. ¿Andijtsïnisï íntskujki Tata Diosï Jeoba ambakiti konsejuechani?

¹⁶ Tata Diosï Jeoba ambakiti konsejuechantsïni íntsaasïndi imeeri Karakatarhu jimbokajtsïni xénchasïnga ka uékasïndi eskachi sési pʼikuarheraaka (Is. 48:17, 18). Sánderu ambakiti ambe engachi uaaka úni, jindeesti orheta peerani Tata Diosï Jeobani. Inde ambesï uaati úni eskachi sési jimbo sési pʼikuarheraaka. Ístuchi, no xáni uandanhiatechani jatsiauaka eska imeecha engaksï uéjka sánderu sentabu jatsini o sánderu ánchikuarhini o jandiajkumindu pendienti pákuarhini. Ísï jimbo, ju je jánhaskakua jingoni jámani ka úni eska Tata Diosï Jeobaeri mintsita sési pʼikuarheraaka (Prov. 23:15).