1. ¿Ambe jukaparhakua ambeksï jatsiski para erakuni úni iámindu kʼuiripuecha?

 INI jurhiatikuecha jimbo, iáminduechachi jatsiska para erakuni sinchi Jeobani apoiariua enga meru juramutika auandarhu ka echerirhu, ochi Satanasini jingoni úkuarhia enga Tata Diosïri ikiatspitika. Jatsiakachi para meru erakuni ambechi uaa jimboka ixú xarharaaka sinchi jatsia tsípikua para méntkisï o nómbe (Mat. 25:31-33, 46). Enga kʼéri mískuarhita úkuarhini jauakia, Tata Diosïri marhuaricha engaksï no méni jurajkuaka imani, markaksï ma jatsikunhaati paraksï úni tsípiti pakarani (Jaŋ. 7:14; Ezeq. 9:4, 6). Ka ima kʼuiripuecha engaksï animaliri marka jukaaka, kʼamajkunhaatiksï (Jaŋ. 14:9-11).

2. a) ¿Ambejtsïni pʼímarhisïni úni Ebreu 10:35-39? b) ¿Nénajtsïni jarhuatasïni libru Jaŋaskuecha?

² (Arhinta je Ebreu 10:35-39). Engajtsï chá apoiarini jakaia Tata Diosï Jeobaeri Reinuni, kánikuajtsï sési úxaka. Seguru eskajtsï uékani jaka jarhuataani máteruechani parakaksï májkueni uaaka. Ka libru Jaŋaskuecha kánikuaksïni jarhuataati jimboka uápuru uandantasïnga ambe engaksï úkuarhinchaaka imeecha engaksï jurajkujka Jeobani ka ístu uandasïndi kóntperatechani engaksï jatsiauaka imeecha engaksï apoiariuaka imeeri juramukuani. Ísï jimbo, kánikua sési jauati eskachi exeauaka ini jorhentperakuechani engaksï xáni jukaparhakueka jimbokajtsïni jarhuataaka parachi eratsetini jarhani seguirini marhuakuni Jeobani. Ístuchi uaaka úrani indeni ambe engachi jorhenguarhikia parachi jarhuataani máteruechani parakaksï imajtu májkueni sési eratseaka ka nóksï jámani jurajkuni Tata Diosï Jeobani.

3. ¿Náki kurhamarhikuechanchi mókuantani jaua ini jorhenguarhikua jimbo?

³ Ini jorhenguarhikua jimbo, arini kurhamarhikuechanchi mókuantani jauaka: ¿ambeksï jatsia imeecha engaksï apoiariuaka  Tata Diosïri gobiernuni? ka ¿ambeksï úkuarhinchaa imeecha engaksï erakuaka apoiarini animali charhapitini enga libru Jaŋaskuecha uandajka?

4. ¿Náki grupuni exesïni apostoli Pablu enga Jesúsini jingoni japka auandarhu?

⁴ Apostoli Pablu jánhaskakua ma jimbo tsimani grupuechani exeasïndi engaksï apoiarijka Tata Diosï Jeobaeri gobiernuni ka engaksï intsïnhajka tsípikua para méntkisï iámindu kóntperatecha jingoni. Primeru grupurhu, 144,000 kʼuiripuechaksï jarhasti (Jaŋ. 7:4). Imeechaksï Echerirhu anapuesti ka auandarhuksï nirasïndi paraksï Jesúsi jingoni májku kʼéri juramuni. Iáminduechaksï parhakpinirhu anapuechani juramukuasïndi (Jaŋ. 5:9, 10; 14:3, 4). Juanu exeasïndi anhandetinksï jarhani Jesúsini jingoni juáta Sionirhu enga auandarhu jaka (Jaŋ. 14:1).

5. Nóteru ióndani, ¿ambeksï úkuarhinchaa kristianu erakukatecha engaksï pakarani jaka Echerirhu?

⁵ Desde jiáni engaksï apostolicha irekapka asta iásï jamberi, uánikua kʼuiripuechaksï erakunhasti paraksï imani grupu jingoni úkuarhini engaksï jindeeka 144,000 (Luk. 12:32; Rom. 8:17). Peru Juanu arhinhasïndi eska últimu jurhiatikuecha jimbo solu grupu sapichu ma tsípiti pakarapiringa parhakpinirhu. Ante de ueenani kʼéri mískuarhita, i kristianuecha engaksï erakukateka, engaksï útasï pakarani jaka, míndaksï ma intsïnhaati enga arhikuekajka eska Tata Diosï Jeoba jaiapanheantaskia (Jaŋ. 7:2, 3; 12:17). Tátsekua enga kʼéri mískuarhita jauaka, ícha engateruksï pakarani japka, auandarhuksï pánhaati parakaksï máteruecha jingoni jauaka engaksï jindeeka 144,000 ka engaksï uarhika sési marhuakuparini Tata Diosïni. Juramuatiksï Jesúsini jingoni Tata Diosïri Reinurhu (Mat. 24:31; Jaŋ. 5:9, 10).

6, 7. a) ¿Tátsekua náki grupuni exesïni Juanu ka ambechi míteski imeecheri ambe? b) ¿Andiksïsï Kristianu erakukatecha ka ‘uánikua kʼuiripuecha’ jatsipirini para uékani míteni ambe enga uandajka kapitulu 7 libru Jaŋaskuecha?

⁶ Ísï tátsekua enga na exejkia grupuni jini auandarhu, Juanu “uánikua kʼuiripuechani” exeasïndi. Íksï no májkuenisti eska 144,000, jimboka no nema úsïnga kuenta uáni (Jaŋ. 7:9, 10). ¿Ambechi míteski imeecheri ambe? Juanu arhinhaspti: “Íchaksï jindeesti engaksï xáni no sési kánhaka ka engaksï Karichi sapichueri iurhiri jimbo jupaantaka imeecheri xukuparhakuechani ka sésiksï uraperaantani” (Jaŋ. 7:14). Engaksï na tsípiti pakarajkia kʼéri mískuarhitarhu uératini i ‘uánikua kʼuiripuecha’, Echerirhuksï irekaati ka kʼérati kóntperatechanksï intsïnhauati (Sal. 37:9-11, 27-29; Prov. 2:21, 22; Jaŋ. 7:16, 17).

⁷ Ia sea engachi erakunhaka para auandarhu nirani o parachi Echerirhu pakarani, iáminduechachi jatsipiringa para exekuarhini “foturhu” enga kapitulu 7 jimbo uandajka libru Jaŋaskuecha jimbo, ¿no ísïiski? ¡Ambakiti tiempu máeuati para i tsimani grupuecha engaksï sési marhuakujka Tata Diosïni! Ka juchajtuchi kánikua sési pʼikuarheraaka jimbokachi erakuska apoiarini Tata Diosïri juramukuani. ¿Ambeterujtsïni aiangusïni libru Jaŋaskuecha kʼéri mískuariteri ambe? (Mat. 24:21).

8. ¿Néna ueenakuarhia kʼéri mískuarhita, ka ambeksï uaa sáno iámindu kʼuiripuecha?

⁸ Eskachi na exekia máteru jorhenguarhikua jimbo, i parhakpini anapu politikuechaksï nóteru ióndani uarhipeati Kʼéri Babilonia jingoni engaksï jindeeka interu parhakpinirhu anapu relijioni no jurhimbiticha (Jaŋ. 17:16,17). Ini uarhiperakua jingoni uénakuarhiati kʼéri mískuarhita. ¿Uaa i ambe eskaksï iásï kʼóru kʼuiripuecha uékaaka kómarhini Tata Diosï Jeobani? Nómbe. Sánderu sési, eska na uandajka kapitulu 6 libru Jaŋaskuecha, jiminisï xarharaati ambe engaksï erakuaka úni. Imeecha engaksï no marhuakuni jaka Jeobani, niuatiksï kuájchakukuarhini politikuecha ka komersianticha jingoni, enga ini  kapitulu jimbo Biblia juátecha jingoni terukutantaajka. Jimbokaksï i kʼuiripuecha no apoiariuaka Tata Diosïri Reinuni, Tata Diosï ísï exeauati komueska imeeri ikiatspiticha (Luk. 11:23; Jaŋ. 6:15-17).

9. ¿Andiksïsï iáminduecha Tata Diosïri iretani eraani jaua kʼéri mískuarhitarhu ka ambe úkuarhia tátsekua?

⁹ Indeni tiempu jimbo enga xáni no sési jánhaskuarhiaka, iámindu kʼuiripuechaksï ambakiti Tata Diosï Jeobaeri marhuarichantku erauani jauati jimbokaksï imeechajkusï marhuakuni jauaka Tata Diosï Jeobani ka ístuksï no apoiarini jauati “animalini” (Jaŋ. 13:14-17). Engaksï exeauaka eskaksï sési eratsetixaka Tata Diosïni marhuakuni, imeecha engaksï no apoiarijka Tata Diosï Jeobani kánikuaksï ikiauati. Ísï jimbo, grupu ma nasionicheri uarhipeati Tata Diosïri ireta jingoni engaksï iámu parhakpinirhu jaka. Biblia uandasïndi eska i uarhiperata arhinhasïnga: uarhiperata Gog de Magog (Ezeq. 38:14-16).

10. Eska na arhijka Jaŋaskuecha 19:19-21, ¿ambe uaa Jeoba engaksï uarhipeaka imeeri iretani jingoni?

¹⁰ ¿Ambe uaa Jeoba engaksï uarhipeaka imeeri iretani jingoni? Ima mismujtsïni aiangusïndi: “Niáraaka kánikua ikiani” (Ezeq. 38:18, 21-23). Jaŋaskuecha kapitulu 19 uandantasïndi ambe enga úkuarhiaka tátsekua. Jeoba axasti imeeri Uájpani para kuájpini imeeri iretani ka kʼamajkuani imeeri ikiatspitichani. Ka Jesúsi no jandiajku jauati, imani jingonksï jauati auandarhu anapu sondaduecha engaksï jindeeka ambakiti ánjelicha ka ístu 144,000 (Jaŋ. 17:14; 19:11-15). ¿Néna kʼamareraa i guerra? Kʼuiripuecha ka organisasionicha engaksï no apoiarijka Tata Diosï Jeobani, kʼamajkunhaatiksï (arhinta je Jaŋaskuecha 19:19-21).

11. ¿Ambe jimbo sánderu kʼéri tsípikuarhita jarhasïni enga libru Jaŋaskuecha uandajka?

¹¹ ¿Nénaksï pʼikuarheraa ambakiti kristianuecha ixú Echerirhu engaksï exeaka eskaksï tsípiti pakaraska jiáni enga Tata Diosï kʼamajkuauaka imeeri ikiatspitichani? ¡Kánikuaksï tsípini pʼikuarheraati! Ka nájkiruka auandarhu kánikua tsípini pʼikuarheranhaaka enga Kʼéri Babilonia kʼamajkunhaaka, sánderu kʼéri tsípikuarhita ma jauati (Jaŋ. 19:1-3). Uaakachi uandani eska sánderu kʼéri tsípikuarhita enga libru Jaŋaskuecha uandajka, jindeesti enga Karichi sapichueri tembuchakua jarhajka (Jaŋ. 19:6-9).

12. ¿Káni úkuarhia Karichi sapichueri tembuchakua? (Jaŋaskuecha 21:1, 2).

¹² ¿Káni úkuarhia inde tembuchakua? Nájkirukaksï iáminduecha 144,000 auandarhu jauakia ante de ueenani Armajedoni, no jiániuati Karichi sapichueri tembuchakua (arhinta je Jaŋaskuecha 21:1, 2). Sánderu sési, jiániuati enga na nitamaakia guerra Armajedoniri, engaksï iámindu Tata Diosïri ikiatspiticha kʼamajkunhaakia (Sal. 45:3, 4, 13-17).

13. ¿Ambe arhikuekasïni Karichi sapichueri tembuchakua para imeecha engaksï jima partisiparijka?

¹³ ¿Ambe arhikuekasïni Karichi sapichueri tembuchakua para imeecha engaksï jima partisiparijka? Tembuchakuarhu ma, márkuksï úkuarhintasïndi tataka ma ka nanaka ma. Ísï jimbo, ini tembuchakuarhu enga no meru tembuchakueka, arhikuekasïndi eska Rei Jesukristu ka imeeri nobia engaksï jindeeka 144,000, márkuksï úkuarhintasïnga. Ini ambakiti ambe jingoni enga úkuarhijka, Jesúsi ka 144,000 ueenaatiksï juramuni iámu parhakpinirhu Mili Uéxurhini (Jaŋ. 20:6).

14, 15. ¿Ambe jingonksï terukutantasïni 144,000 enga Jaŋaskuecha kapitulu 21 jimbo uandajka? (Exe je dibujuni enga ueenakuarhu jaka i rebistarhu).

¹⁴ Tátsekua, Jaŋaskuecha kapitulu 21 jimbo, terukutantasïndi 144,000 sési jásï ireta ma jingoni enga arhinhajka ‘Jimbanhi Jerusaléni’ (Jaŋ. 21:2, 9). Inde ireta 12 tsakapuechani jukaasti engaksï pítsekuecheeka ka jimaksï karakata jarhasti 12  nombricha “engaksï jindeeka Karichi sapichueri 12 apostolicheri”. Seguru eska Juanu ísku pakaraspka ini ambe jimbo. ¿Andi? Jimboka exesïnga eska imeeri nombri jima karakata jarhaspka ma i tsakapuecha jimbo. ¡Xáni kʼéri kóntperata ma! (Jaŋ. 21:10-14; Efes. 2:20).

¹⁵ I ireta enga arhikuekajka ambe ma, no ma ireta jingoni terukuntasïndi. Xanharu enga jima inchaakujka, puru orueristi, ka 12 puertecha jindeestiksï 12 perlecha, ka bardecha ka pítsekuechaksï sési járhati tsakapuecha jingoni úkata jarhasti ka na enga xáni kʼéka iámindu ambe, sésku tsʼéritakata jarhasti (Jaŋ. 21:15-21). Joperu Juanu exesïndi eska kueratasïnga ambe ma. ¿Ambeia? Ima uandasïndi: “Ka imani ireta jimbo, no ma [templu] exeskani jimboka Tata Diosï enga Iámindu ambe Újka úni ka ístu Diosïri Karichi sapichu, jindeeska imeecheri [templu]. Ka nóksï uétarhinchasïreendi jurhiatani ka nijtu lunani para eskaksï eramarhaskutaminhapiringa jima, jimboka Diosïri tʼíntskua jindeeska enga eramarhaskutajka, ka Diosïri Karichi sapichu jindeesti imeeri eramarhaskutarakua” (Jaŋ. 21:22, 23). Imeecha engaksï Jimbanhi Jerusaléni jimbo jaka, uaatiksï jurhimbitku inchani Tata Diosï Jeobani jingoni (Ebr. 7:27; Jaŋ. 22:3, 4). Ísï jimbosï uandanhajti eska Jeoba ka Jesúsi, ireteri templueska.

16. ¿Náki kóntperatechanksï jatsiaua kʼuiripuecha jiáni enga Tata Diosïri Reinu juramuni jauakia Mili Uéxurhini?

¹⁶ Kristianu erakukatechaksï kánikua tsípisïndi engaksï eratsejka i ireteri ambe. Peru ístu, imeecha engaksï erokuarhini jaka irekani ixú parhakpinirhu, jatsipirindiksï para uékani sánderu míteni indeeri ambe. Jimboka enga Tata Diosïri Reinu juramuni jauakia Mili Uéxurhini ixú parhakpinirhu, Jimbanhi Jerusaléni uánikua kóntperatechani íntspiauati. Juanu exesïndi eskaksï inde kóntperatecha ísï iorhexaka komueska “itsï tsípikueri” ka eskaksï uanamukuni jarhaska anhatapuecha tsípikueri ka imeecheri “chkurhi jindeespti remedia enga jimbo iámindu kʼuiripuecha sési pʼikuarhereenga” (Jan. 22:1, 2). Iámindu ima kʼuiripuecha engaksï jiáni irekaaka, uaatiksï intsïnhaani indeni kóntperatechani. Ka imeecha engaksï kurhandiraaka sánhanksï ariati perfektueni. Nóteru jauatia pʼamenchakua ambe, ni no sési pʼikuarherakua ambe, ni uekua ka ni kómu pʼikuarherakua (Jan. 21:3-5).

17. ¿Néksï jatsiaua kóntperatechani enga Jesúsi juramuni jauaka Mili Uéxurhini? (Jaŋaskuecha 20:11-13).

¹⁷ ¿Neechaksï intsïnhaua indeni kóntperatechani? Orheta, ‘uánikua kʼuiripuecha’ engaksï tsípiti pakaraaka Armajedonirhu ka ístu sapiicha engaksï jimbanhi parhakpinirhu andajpenuaka. Joperuksï no imeechajkueuati. Jaŋaskuecha  kapitulu 20 jimbo, aiatspesïndi eskaksï uarhiricha tsíntaaka (arhinta je Jaŋaskuecha 20:11-13). ¿Néksï niára irekani ménderu Echerirhu? Imeecha engaksï “ambarhatiika”, engaksï jindeeka ambakiti Jeobaeri marhuaricha engaksï ióntki uarhika; ka ístuksï tsíntaati “maluecha”, o ima kʼuiripuecha engaksï no niáraka míteni Tata Diosï Jeobani (Uku. 24:15; Juanu 5:28, 29). ¿Arhikuekasïni i ambe eskaksï iáminduecha tsíntaaka Echerirhu jiáni enga Jesúsi juramuni jauakia Mili Uéxurhini? Nómbe. Imeecha engaksï no uékaaka marhuakuni Tata Diosï Jeobani ante deksï uarhini, nóksï niáraati irekani jimbokaksï no uékaska ísï úni ka xarhatastiksï eskaksï no uékasïreenga irekani Paraisurhu (Mat. 25:46; 2 Tes. 1:9; Jaŋ. 17:8; 20:15).

18. ¿Nénaksï irekani jauaia kʼuiripuecha enga na kʼamaraakia Mili Uéxurhini?

¹⁸ Enga na kʼamaraakia Mili Uéxurhini, iámindu imeecha engaksï echerirhu irekaaka perfektueuatiksïa. Nóteru nema kómu nitamakuarhiatia Adániri pekadu jimbo (Rom. 5:12). Nóteru ambe ma jauatia enga iásï Adániri pekadu jimbo jaka. Uaakachi uandani eska enga na kʼamaraakia Mili Uéxurhini, iámindu imeecha engaksï Echerirhu irekaaka, perfektueuakaksï (Jaŋ. 20:5).

19. ¿Andisï uétarhia últimu tsʼéjkukua ma?

¹⁹ Míteskachi eska Jesúsi no méni jurajkuspka Tata Diosïni nájkiruka Noambakiti tsʼéjkupka. Joperu, ¿májkuenksï uaa kʼuiripuecha engaksï perfektueuakia enga Satanasi tsʼéjkuauaka? Mándani arhinksï mókuntaati ini kurhamarhikuani enga na kʼamaraakia Mili Uéxurhini, jiáni enga Satanasi ménderu petanhantaaka jima uératini enga ónhakata jauaka (Jaŋ. 20:7). Imeecha engaksï no méni jurajkuaka Tata Diosïni engaksï últimuterku tsʼéjkunhaakia, intsïnhaatiksï tsípikua para méntkisï ka niáraatiksï sési jimbo libreeni (Rom. 8:21). Imeecha engaksï no uékaaka kurhajchani Tata Diosïni, kʼamajkunhaatiksï para méntkisï májkueni eska Noambakiti ka imeeri demoniuecha (Jaŋ. 20:8-10).

20. ¿Nájtsï pʼikuarherasïni chá iásï engajtsï exeaka xáni sési járhati profesiechani engaksï libru Jaŋaskuecha jimbo jaka?

²⁰ ¿Nájtsï pʼikuarherasïni chá iásï engachi exeka sánisï libru Jaŋaskuecha? ¿Sésijtsï pʼikuarherasïni exekuarhini indeni fotu jimbo ka exeni jarhani na engaksï ísï úkuarhini jaka inde profesiecha engajtsïni ísku pakatajka? ¿Uékaxakijtsï pʼímarhiani máteruechani parakaksï jurhimbikua jingoni kómarhiaka Tata Diosïni juchantsïni jingoni? (Jaŋ. 22:17). Iásï engachi exekia xáni sési jásï ambe enga sánderu orhepatini jauaka, seguru eskachi kánikua tsípini pʼikuarherajka ka jamberichi uéjka uandani ísï eska apostoli Juanu: “Amen. Ísï úkuarhie. Junguachkanderu ia juchaari tata Jesukristu” (Jaŋ. 22:20).