1, 2. ¿Andichisï jatsipirini para uékani míteni ambe enga uandajka libru Jaŋaskuecha?

 ¿MÉNISÏJTSÏ exeski máteru nemeeri fotuechani? Jamberijtsï no iáminduechani míteajka engaksï fotuecharhu xarharajka. Joperujtsï exentasïnga fotuni ma engajtsï pakarerajka exeni. ¿Andi? Jimbokajtsï chájtu jima jarhaska. Jingontkujtsï exesïnga ka jánguarhintasïngajtsï miántani káni ka nanijtsï pʼitakuarhispi fotuni. Ka ístujtsï jánguarhintasïnga míteantani imeechani engaksï jima xarharajka. I fotu kánikua jukaparhakuesti para chá.

² Libru Jaŋaskuecha, sáno májkuenisti eska i fotu. ¿Andi? Tsimani ambe jimbo. Orheta, jimboka karakata jarhaska para jucha. Ueenani jámani arhisïndi: “I jindeesti tata Jesukristueri jánhastpikua enga [Tata] Diosï íntskuka imani para jánhastaani imeeri jántspirichani indeni ambe enga úkuarhiaka no ióni jimbo” (Jaŋ. 1:1). Jimajkani, i libru no jindeesti para iámindu kʼuiripuecha, sino para Tata Diosïri marhuaricha. Jimbojtsïnisï no ísku pakatajti míteni eskachi jarhuajpexaka paraka úkuarhiaka ambe enga i libru uandajka. ¡I libru ísïisti komueska “fotu ma” nani engachi jucha jaka!

3, 4. Seguni eska na uandajka libru Jaŋaskuecha, ¿kánksï úkuarhipirini profesiecha engaksï jimini uandajka, ka ambechi jatsipirini para úni?

³ Máteru ambe engachi jimbo jatsipiringa para míteni ambe enga uandajka, jindeesti para míteni káni úkuarhia inde ambe. Apostoli Juanu uandaspti káni úkuarhipirini i ambe. Ima uandaspti: “Juchaari Tateeri jurhiatikua jimbo, jima jánhastanhaskani espiritu santuni jimbo” (Jaŋ. 1:10). Juanu karaspti ini ambe uéxurhini 96 jimbo ísï, despuesi de Jesúsi. Jiánisï útasï kánikua tiempu kuerataxapti para niárani “Tateeri jurhiatikua” (Mat. 25:14, 19; Luk. 19:12). Peruksï Biblieri profesiecha xarhatasïndi eska ima jurhiatikua 1914 jimbo ueenaska kumplirikuarhini, jiáni enga  Jesúsi niárapka Reini auandarhu. Ka jiáni uératinksï ueenaspti úkuarhini profesiecha enga Jaŋaskuecha uandajka ka engaksï Tata Diosïri ireteri ambe uandajka. Ísï jimbo, juchachi irekaxaka “Tateeri jurhiatikua jimbo”.

⁴ Jimbokachi irekaxaka tiempu ma jimbo enga kʼéri ambe úkuarhini jaka, jatsiskachi para kurhajchani konsejuni enga Jaŋaskuecha 1:3 jimbo jaka, enga arhijka: “Na xáni sési uéraa [o tsípini] ima enga arhintajka ka ístu imeecha engaksï kurhandiani jarhajka uandakuechani engaksï uandantajka ambe enga úkuarhiaka, ka engaksï patsajka [ambe] enga ixú karakata jaka, jimboka no ióni jimbo úkuarhiaka”. Ísï jimbo, jatsiskachi para jingontku arhiantani uandakuechani engaksï uandantajka ambe enga úkuarhiaka, kurhandini ka ísï úni. ¿Nákiskiksï máru uandakuecha engachi jatsika para kurhajchaani?

5. ¿Néna xarhatasïni libru Jaŋaskuecha sini Tata Diosï Jeoba jaiapanhentasïni ambe engachi újka para kʼéri ambe arhini?

⁵ Primeru kapitulurhu uératini, úsïngachi exeni eska Jesúsi iámindu ambe exesïnga ambe enga úkuarhijka kúnguarhikuecharhu (Jaŋ. 1:12-16, 20; 2:1). Enga uandakua axakuapka imani kúnguarhikuechani engaksï Asia Menor japka, xarhatasïndi eska i ambe ísïiska. Konsejuechani íntsaaspti enga jarhuataapiringa primeru siglurhu anapu kristianuechani parakaksï jánguarhintapiringa exeni sini Tata Diosï Jeoba jaiapanhentani japi ambe engaksï úni japka para kʼéri ambe arhini. Í konsejuechaksï ístu jarhuataasïndi iásï anapu Tata Diosïri marhuarichani. ¿Ambejtsïni jorhendasïni i ambe? Eska juchaari Orhejtsïkuti, tata Jesukristu, sési míteska na engachi jaka Tata Diosïni jingoni. Imajtsïni orhechepasïndi ka kuájchakuni ka no ma ambe jarhasti enga ima no mítejka. Ístu mítesti ambe engachi jatsika para úni parakajtsïni Tata Diosï Jeoba seguirini jauaka jaiapanhentani. Ju je exeani máru konsejuechani enga ima íntspiapka ka engachi jatsika para iásï kurhajchaani.

6. a) Seguni eska na uandajka Jaŋaskuecha 2:3, 4, ¿ambeksï úkuarhinchaspi Éfesu anapu kristianuecha? b) ¿Ambechi jorhenguarhisïni jucha?

⁶ (Arhinta je Jaŋaskuecha 2:3, 4). Ju je seguirini xénchani Tata Diosï Jeobani ísï eska ueenakuarhu. Ambe enga Jesúsi arhiapka Éfesu anapu kristianuechani xarhatasïndi eskaksï tekaantaspka ka eskaksï seguirispka sési marhuakuni Tata Diosï Jeobani nájkirukaksï no sési nitamakuarhini japka. Peruksï nóteru ísï xénchasïrendia eska ueenakuarhu. Ka engaksï uékeenga eska Tata Diosï jaiapanhentapiringa ambe engaksï ueenga para kʼéri ambe arhini, jatsisptiksï para ménderu ísï xénchani eska ueenakuarhu. Ka májkueni úkuarhisïndi iásï, nóchi solu jatsiska para tekaantani, sino jatsiskachi para mintsita jingoni ísï úni. Tata Diosï Jeoba no solu exesïndi ambe engachi újka, sino ístu andichisï ísï újki. Para ima kánikua jukaparhakuesti ambe engachi jimbo újka ambe ma. Ima uékasïndi eskachi kʼéri ambe arhiaka jimbokachi xénchasïnga ka jimbokachi agradesidu jarhaska imani jingoni (Prov. 16:2; Mar. 12:29, 30).

7. a) Eska na arhijka Jaŋaskuecha 3:1-3, ¿náki uandanhiata exespi Jesúsi Sardisi anapu kúnguarhikuarhu? b) ¿Ambechi jatsiski para úni jucha?

⁷ (Arhinta je Jaŋaskuecha 3:1-3). Ju je seguirini jingontku jarhani. Sardisi anapu kúnguarhikua máteru uandanhiatechani jatsiaspti. Nájkirukaksï ióntki sési marhuakuni japka Tata Diosï Jeobani, tátsekuaksï nóteru xáni jánguarhintaxaptia. Ísï jimbo, Jesúsi arhiaspti eskaksï jatsispka para jingontku jarhani. Ka juchachi uaaka jorhenguarhini inde amberi enga arhiapka. Ísïisti, Tata Diosï no mirikurhisïndi ambe engachi újka para imani marhuakuni (Ebr. 6:10). Peruchi no jatsiska para nóteru jánguarhintania eratseparini eskachi ióntki jánguarhintaskia marhuakuni. Jamberichi iásï nóteru újkia úni ambe engachi antesi ueenga, joperuchi  jatsiska para seguirini jarhani Tata Diosïri ánchikuarhitani úni ka jingontkuchi jarhani astaka i parhakpini kʼamajkunhaaka (1 Kor. 15:58; Mat. 24:13; Mar. 13:33).

8. ¿Ambechi jorhenguarhisïni ima ambeeri enga Jesúsi arhiapka Laodisea anapu kristianuechani? (Jaŋaskuecha 3:15-17).

⁸ (Arhinta je Jaŋaskuecha 3:15-17). Ju je tsípikua jingoni ka mintsita jingoni kʼéri ambe arhini Tata Diosï Jeobani. Enga Jesúsi uandakua axakuapka Laodisea anapuechani, máteru problemeri ambe arhiaspti. Imeechaksï no mintsita jingoni marhuakusïreendi Tata Diosï Jeobani. Jimbosï Jesúsi uandapti eskaksï imeecha no sáni tsípikua jingoni jámasïreenga ka “lastima” úkuenksï. Ísï jimbo, jatsisptiksï para mintsita jingoni marhuakuni Tata Diosï Jeobani ka xénchani (Jaŋ. 3:19). ¿Ambechi uaa jorhenguarhini íri ambe? Engachi nóteru tsípikua jingoni marhuakuni jakaia Tata Diosïni, jatsiskachi para eratsentani ambe engajtsïni xáni íntskujka ima ka imeeri kúnguarhikua (Jaŋ. 3:18). Ka ju je no jurajkuni eskajtsïni ójkutaaka máteru ambe, sino orheta peerani marhuakuni Tata Diosïni.

9. Míteparini ambe enga Jesúsi arhiapka Pérgamu ka Tiatira anapu kúnguarhikuechani, ¿ambe jingonchi jatsiski para jingontku jarhani?

⁹ Ju je no jiókuarhini ambe engaksï jorhentpijka apostatecha. Jesúsi xukaaspti Pérgamu anapu máru kristianuechani jimbokaksï úxapka eska kúnguarhikua arhukurhitini japiringa (Jaŋ. 2:14-16). Joperu felisitariuaspti Tiatira anapu kristianuechani jimbokaksï no jiókuarhispka ambe enga Satanasi jorhentpienga ka pʼímarhiaspti parakaksï no jurajkupiringa jurhimbikuani (Jaŋ. 2:24-26). Kristianuecha engaksï nóteru sési marhuakuni japkia Tata Diosïni ka engaksï jakajkupka chkuanderakua ambe, jatsisptiksï para móantani. Ísï jimbo, juchajtuchi jatsiska para no jiókuarhini ambe enga no terukuntajka imani ambe jingoni enga Tata Diosï Jeoba uéjka. Jamberiksï apostatecha uandajti eskaksï janhanharhisïnga Tata Diosïni, peru ʻmintsitarhu nóminduksï janhanharhiniʼ (2 Tim. 3:5). Engachi sési jorhenguarhiska Tata Diosïri Karakatani, uaakachi sóntku exeni ambe enga chkuanderakua ambeeka ka nóchi jakajkuaka indeni ambe (2 Tim. 3:14-17; Jud. 3, 4).

10. ¿Ambe máteru ambechi jorhenguarhisïni ima ambeeri enga Jesúsi arhiapka Pérgamu ka Tiatira anapu kúnguarhikuechani?

¹⁰ Ju je no niátani ísku jándikua ambe nijtu jiókuarhini indeni ambe. Pérgamu ka Tiatira anapu kristianuechaksï máteru problema jatsispti. Máru kúnguarhikuarhu anapuechaksï ísku jándikua ambe niátasïreendi ka Jesúsi xukaaspti indeni ambe jimbo (Jaŋ 2:14, 20). I ambejtsïni jorhendasïndi eska Tata Diosï Jeoba  no sáni jaiapanhentaaka engachi jucha ísku jándikua ambe niátaska, nájkirukachi ióni páni jauakia imani marhuakuni ka uánikua ánchikuarhitechanchi jatsiani kúnguarhikuarhu (1 Sam. 15:22; 1 Ped. 2:16). Nájkirukaksï kʼuiripuecha no no sési exejka no sési jásï ambe niátani, Tata Diosï erokuarhisïndi eskachi janhanharhiauaka imeeri juramukuechani (Efes. 6:11-13).

11. ¿Ambe ka ambechi jorhenguarhiskia? (Ístu exe je rekuadruni “ Ambe engachi jorhenguarhijka”).

¹¹ ¿Ambe ka ambechi jorhenguarhiskia? Jorhenguarhiskachia eska kánikua jukaparhakueska exeni sini Tata Diosï jaiapanhentaxaki ambe engachi újka para kʼéri ambe arhini. Engachi úni jaka ambe ma enga no sési jaka, ju je sóntku jurajkuni inde ambe (Jaŋ. 2:5, 16; 3:3, 16). Peru Jesúsi ístu arhiaspti máteru ambe kúnguarhikuechani. ¿Ambeespi?

12. ¿Ambechi jorhenguarhisïni ima amberi engaksï arhinhapka Esmirna ka Filadelfia anapu kúnguarhikuecha? (Jaŋaskuecha 2:10).

¹² Iásï ju je exeni ambe engaksï arhinhapka Esmirna ka Filadelfia anapu kúnguarhikuecha. Jesúsi arhiaspti eskaksï no jámapiringa chéni engaksï no sési kánhani japiringa, jimboka Tata Diosï Jeoba kóndeantapiringa engaksï no méni jurajkupiringa (arhinta je Jaŋaskuecha 2:10; 3:10). ¿Ambechi jorhenguarhisïni? Eskachi eratsetini jauaka eskachi no sési kánhaaka ka eskachi jatsiska para preparadu jarhani para úni tekaantani (Mat. 24:9, 13; 2 Kor. 12:10). ¿Andisï xáni jukaparhakue miáni jarhani ini ambe?

13, 14. ¿Ambeksï úkuarhinchaxaki Tata Diosïri marhuaricha imani ambe jingoni enga Jaŋaskuecha kapitulu 12 uandajka?

¹³ Libru Jaŋaskuecha arhisïndijtsïni eska “Tateeri jurhiatikua” jimbo, engaksï jindeeka i jurhiatikuecha engachi irekani jaka, Tata Diosïri marhuaricha no sési kánhapiringa. Kapitulu 12 uandasïndi eska enga Jesúsi Rei únhapkia Tata Diosïri Reinurhu, guerra ma úkuarhispka auandarhu. Migueli, enga tata Jesukristueka ka imeeri ánjelichaksï uarhiperhaspti Satanasi ka imeeri demoniuecha jingoni (Jaŋ. 12:7, 8). Peru íksï Tata Diosïri ikiatspiticha nóksï andaspti ka Echerirhuksï kʼuanijpanhaspti ka úxatiksï eskaksï kʼuiripuecha kánikua no sési nitamakuarhiaka (Jaŋ. 12:9, 12). Ini ambe jingoni enga úkuarhipka, ¿ambe úkuarhinchaxaki Tata Diosïri ireta?

¹⁴ Tátsekua, libru Jaŋaskuecha uandasïndi ambe enga úni jaka Satanasi. Jimboka nóteru úsïngia auandarhu kʼuanhatsentani, kánikua ikiakuasïndi kristianu erakukatechani engaksï útasï Echerirhu jaka, jimbokaksï imeecha jindeeska engaksï representarini jaka Tata Diosïri Reinuni ixú Echerirhu ka “engaksï uandantani jaka Jesúsiri ambe” (Apoc. 12:17, TNM; 2 Kor. 5:20; Efes. 6:19, 20). ¿Néna úkuarhiski i profesia?

15. ¿Neeskiksï ʻtsimani testiguechaʼ enga Jaŋaskuecha kapitulu 11 uandajka, ka ambeksï úkuarhinchaspi?

¹⁵ Satanasi úspti eskaksï Tata Diosïri ikiatspiticha no sési kaapiringa erachichani engaksï  erakukatepka ka engaksï orhejtsïkuni japka para aianhpinhani Tata Diosïri Reinu. Máru i erachichaksï kʼérati ánchikuarhitechani jatsiaspti kúnguarhikuarhu ka íksï jindeespti ʻtsimani testiguechaʼ * enga libru Jaŋaskuecha uandajka (Jaŋ. 11:3, 7-11). Uéxurhini 1918 jimbo, ochu ima erachicheri engaksï orhejtsïkuenga aianhperakuani, chkuanderakua ambeksï jauataminhaspti ka indeni ambe jimbo arhinhasptiksï eskaksï ióni japiringa kárselirhu. Para kʼuiripuecha, ísï xarharasïreendi enajkiksï nóteru úpirinia aianhpini Tata Diosïri Reinueri ambe.

16. Nájkiruka no nema erokuarhini japka, ¿ambe úkuarhispi uéxurhini 1919 jimbo, peru ambe seguirixaki úni Satanasi desde jiáni uératini?

¹⁶ Profesia enga Jaŋaskuecha kapitulu 11 jimbo uandajka, ístu arhisïndi eskaksï ima ʻtsimani testiguechaʼ tsíntapiringa enga na nitamapiringia ma tiempu. Nájkiruka no nema erokuarhini japka, i ambe meru ísï úkuarhispti jimboka no jamberi ma uéxurhini jimbo, marsuni 1919 jimbo, kristianu erakukatechaksï uéntaspti kárselirhu ka sánderu tátsekua kénditaminhasptiksï imani ambe engaksï jimbo ónhanhapka. Ka erachichaksï ménderu jirejiresï ueenaspti aianhpini Tata Diosïri Reinueri ambe. Peru Satanasi no ísku pakaraspti. Desde jiáni uératini, mámaru ambe úxati enga ísïika komueska “kʼéri iurhekua ma” para no sési kaani Tata Diosïri marhuarichani (Jaŋ. 12:15). Ísï jimbo, iáminduechachi uétarhinchasïnga “tekaantskua” ka “mintsikani” Tata Diosïni (Jaŋ. 13:10).

17. Nájkirukaksï no erokuarhini jarhajka, ¿nénaksï jarhuatanhaxaki Tata Diosïri marhuaricha nájkiruka Satanasi no sési kaani jaka?

¹⁷ Tátsekua, Jaŋaskuecha kapitulu 12 uandasïndi eskaksï Tata Diosïri marhuaricha jarhuatanhapiringa nájkirukaksï imeecha no erokuarhini japiringa. Jimini uandasïndi eska “echeri” arhukurhispka ka eska “itsï” jima inchatsespka (Jaŋ. 12:16). Ka meru ísï úkuarhixati. Ménichani, Satanasiri parhakpinirhu anapu ambe, komu máru tribunalicha jarhuatastiksïa Tata Diosïri iretani. Pori ejemplu, uánikua xanhari andastiksïa tribunalicharhu paraksï jurajkunhani aianhpini. Ka engaksï ísï jurajkunhani jaka, jánguarhintaxatiksï xáni eskaksï xáni uaaka paraksï úni ánchikuarhitani enga Tata Diosï Jeoba íntskuaka (1 Kor. 16:9). ¿Ambe ka ambeksï úsïni paraksï ini ánchikuarhitani úni?

18. Ini últimu jurhiatikuecha jimbo, ¿nákiski ánchikuarhita enga sánderu jukaparhakueka?

¹⁸ Jesúsi uandaspti eskaksï imeeri chúxapaticha  aianhpipiringa iápurisï “ambakiti aianhperakuani Tata Diosïri Juramukueri” ambe ante de i parhakpini kʼamajkunhani (Mat. 24:14). Ka paraksï íni ánchikuarhitani úni, uánikua ánjelichaksï jarhuataaxati engaksï aianhpini jaka “ambakiti aianhperakuani enga jindeeka para méntkisï, iámindu imeechani engaksï parhakpinirhu irekani jaka iámindu nasionicharhisï, ka tribuechani ka imeechani engaksï táchani jásï idioma uandajka ka iámindu kʼuiripuechani” (Jaŋ. 14:6).

19. ¿Ambeksï máteru ambe jatsiski para aianhpini imeecha engaksï xénchajka Tata Diosï Jeobani?

¹⁹ Peruksï Tata Diosïri marhuaricha no solu aianhpisïndi Tata Diosïri Reinueri ambe, ístuksï jarhuataasïndi imani ánjelichani enga Jaŋaskuecha kapitulu 8 a 10 jimbo uandajka. I ánjelichaksï aianhpisïndi ambe engaksï úkuarhinchaaka imeecha engaksï no jiókuarhiaka Tata Diosïri Reinuni. Ísï jimbo, Jeobaeri testiguechachi aianhpixaka ambe ma enga ísïika komueska “xanuata ka chpiri”. I aianhperakua xarhatasïndi ambe enga Tata Diosï úkuauaka imeechani engaksï Satanasiri jájki jimbo jaka (Jaŋ. 8:7, 13). Kʼuiripuechaksï jatsisti para míteni eska nóteru ióni jimbo parhakpini kʼamajkunhaakia, soluksï ísï uaati mójtakurhini paraksï úni tsípiti pakarani jiáni enga Tata Diosï Jeoba xarhataaka imeeri ikiatapuni (Sof. 2:2, 3). Joperu jimbokaksï kʼuiripuecha no uékasïnga kurhaani ini ambe, jatsiskachi para balori jukani. Enga kʼéri mískuarhita úkuarhini jauakia, kʼuiripuechaksï sánderu ikiauati engachi aianhpiaka eska Satanasiri parhakpini kʼamajkunhaaka (Jaŋ. 16:21).

20. ¿Ambechi exeni jaua máteru tsimani jorhenguarhikuecha jimbo?

²⁰ Kánikua jukaparhakuesti eskachi kurhajchauaka “uandakuechani engaksï uandantajka ambe enga úkuarhiaka” jimbokachi jucha jarhuajpexaka paraka kumplirikuarhiaka ambe enga Jaŋaskuecha uandajka (Jaŋ. 1:3). Peru, ¿ambejtsïni jarhuataa parachi tekaantani engachi no sési kánhani jauaka ka parachi seguirini balori jingoni aianhpini ambe enga úkuarhiaka? Tsimani ambe: orheta, ambe enga arhijka Jaŋaskuecha Tata Diosïri ikiatspiticheri ambe ka kóntperatechani engachi intsïnhauaka engachi no méni jurajkuaka Tata Diosïni. Íri ambechi uandani jauaka máteru tsimani jorhenguarhikuecha jimbo.