1, 2. ¿Jamberi ambechi uaa kurhamarhikuarhini?

 ¿MÉNISÏJTSÏ niáraski kurhamarhikuarhini sini Tata Diosï Jeoba mókuantajki chaari kómarhikuechani? Enga ísïika, nójtsï chájkueska. Uánikua erachiichaksï uandasïndi eskaksï niáraska indeni ambe kurhamarhikuarhini, ka sánderu jiáni engaksï no sési nitamakuarhini jarhajka. Jamberichi juchajtu úkua jukanchajka kuenta íntskukuarheni eska Tata Diosï Jeoba mókuantaxaka juchaari kómarhikuechani engachi no sési nitamakuarhini jarhajka.

² Ini jorhenguarhikua jimbo, exeakachi andichisï uaa seguru jarhani eska Tata Diosï Jeoba mókuantasïnga imeeri marhuariicheeri kómarhikuechani (1 Juanu 5:15). Ístuchi exeaka andisï ménichani ísï xarharajki enajki Tata Diosï no mókuantajki juchaari kómarhikuechani ka ístu na enga mókuantajka juchaari kómarhikuechani.

3. ¿Andisï uéjki Tata Diosï Jeoba eskachi kómarhiaka?

³ Bibliajtsïni arhisïndi eskajtsïni Tata Diosï Jeoba kánikua xénchasïnga ka eskajtsïni kánikua jukaparharasïnga (Ageo 2:7; 1 Juanu 4:10). Ísï jimbo, imajtsïni arhisïndi eskachi kómarhiaka ka eskachi kurhakuaka eskajtsïni jarhuataaka (1 Ped. 5:6, 7). Imajtsïni mintsita jingoni uékasïndi jarhuatani parachi sési pájperani imani jingoni ka parachi úni tekaantani engachi uandanhiateechani jatsiauaka.

4. ¿Nénachi míteski eska Tata Diosï Jeoba mókuantasïnga imeeri marhuariicheeri kómarhikuechani? (Ístu exe je imajenini).

⁴ Biblia uánikua uelta uandasïndi néna enga Tata Diosï Jeoba mókukuantapka kómarhikuechani imeeri marhuariichani. Jamberichi miántajka rei Dabidiiri ejempluni. Ima méntkisï kʼérati enemiguechani jatsiaspti, ka mémindu kurhakuspti Tata Diosï Jeobani eska jarhuatapiringa. Ma uelta, ima ini ambe kómarhispti Tata Diosïni: “Oh, Tata Diosï Jeoba, kurhaa juchiiti kómarhikuani; kurhaa  engakeni mintsita jingoni arhini jaka eskarini jarhuataaka. Mókuchintarini, jimbokari t’u no nemani jurajkusïnga ka jurhimbitkuri jámasïnga” (Sal. 143:1). Tata Diosï Jeoba mókukuantaspti imeeri kómarhikuechani ka jarhuataspti (1 Sam. 19:10, 18-20; 2 Sam. 5:17-25). Jimbosï Dabidi úpti uandani: “Tata Diosï Jeoba no iauani jarhasti imeecha jingoni engaksï kómarhijka”. Ka juchajtuchi uaaka májkueni uandani (Sal. 145:18).

5. ¿Mókukuantaspi méntkisï Tata Diosï Jeoba imeeri marhuariicheeri kómarhikuechani ísï eskaksï imeecha na erokuarhienga? Uandanta je ejemplu ma. (Ístu exe je imajenini).

⁵ Jamberijtsïni Tata Diosï Jeoba no ísï mókuchintaati eskachi jucha na erokuarhini jarhajka. Inde ambesï úkuarhinchapti apostoli Pablu. Ima kʼéri problema ma jatsispti enga ísïipka “komueska ma chekamita”, ima tanimu xanhari arhispti Tata Diosïni eska jarhuatapiringa. ¿Mókukuantaspi Tata Diosï Jeoba imeeri kómarhikuechani? Jo, peru no ísï eska Pablu na erokuarhini japka. Ima no kénditakuspti ambe enga nitamakuarhini japka, peru íntskuspti uinhapikua paraka ima seguiripiringa sési marhuakuni (2 Kor. 12:7-10).

6. ¿Andisï ménisï ísï xarharajki enajkijtsïni Tata Diosï Jeoba no mókuchiantajki juchaari kómarhikuechani?

⁶ Jamberijtsïni Tata Diosï Jeoba no ísï mókuchintaati na engachi erokuarhini jarhajka. Peruchi uaaka seguru jarhani eska ima míteska ambe enga sánderu sésiika para jucha. Ka ima úsïndi ‘iauani sánderu k’éri ambe úni ka eska enga jucha kurhajkuarhijka o eratseni’ (Efes. 3:20). Ísï jimbo, imajtsïni úpirindi mókuchintani jimajkani engachi jucha no erokuarhini jauaka ni ísï eskachi jucha na eratseni japka.

7. ¿Jamberichi andisï jatsia para mójtakuni ambe engachi kurhakujka Tata Diosï Jeobani? Uandanta je ejemplu ma.

⁷ Engachi niárajkia kurhanguni ambesï uéjki Tata Diosï Jeoba eskachi uaaka, jamberichi jatsiaka para mójtakuni ambe engachi kurhajkuarhijka kómarhikuecharhu. Erachi Martin Poetzinger indeni ambe úspti. Ísï no ióni jimbo enga tembuchapka, jimaksï axaspti nani engaksï nasiicha afuersa ánchitauenga kʼuiripuechani. Ueenakuarhu kurhakusïreendi Tata Diosï Jeobani eska jarhuatapiringa para úni uéntani jima ka imeeri témba jingoni jarhani ka para ménderu úni aianhpini. Peru tsimani semana nitamasptia ka ima ísï exesïreendi enajki Tata Diosï no úni japi ambe ma para petantani jima uératini. Ísï jimbo, erachi Poetzinger ini ambe kurhakuspti: “Jimboetakua, jarhuatarini exeni ambe engari uéjka eskani uaaka”. Jimajkani eratseantaspti iámindu problemeechani engaksï jatsiapka ima erachiicha engaksï ístu jima japka. Uánikua ima erachiicha, kánikuaksï uandanhiaxapti imeecheeri témbeecha ka uájpeecha jimbo. Ísï jimbo, erachi Poetzinger arhispti Tata Diosï Jeobani: “Diosmaiamu ini ánchikuarhita jimbo  engareni íntskuka. Jarhuatarini parani úni uinhaperaantani ka sési pʼikuastaantani juchiiti erachiichani”. Ka indeni ambe úspti nuebe uéxurhini enga ónhakuarhetini japka.

8. ¿Ambechi jatsiski para miántani engachi kómarhini jauaka Tata Diosïni?

⁸ Jatsiskachi para miántani eska Tata Diosï Jeoba eratsetixaka úni ambe ma, peru jiáni ísï uaati enga ima sési exeaka. Ima eratsetixati kʼamajkuni para méntkisï kómu nitamakua ambe, komu desastresi naturaliichani, pʼamenchakuechani ka uarhikuani. Tata Diosï Jeoba úraati imeeri Reinuni para úni ambe enga aiatspekia (Dan. 2:44; Jaŋ. 21:3, 4). Peru asta enga jamberi niáraaka ima jurhiatikua jurajkuxati eska Satanási juramuaka parhakpinirhu (Juanu 12:31; Jaŋ. 12:9). b Enga Tata Diosï Jeoba sési peeuantapiringa iámindu kʼuiripuecheri uandanhiateechani, ísï xarharapirindi enajki Satanási sési juramuni jaki parhakpinirhu. Ísï jimbo, nájkirukachi jatsiaka para erokuarhini astaka Tata Diosï uaaka máru ambe engajtsïni aiachikia, inde ambe no arhikuekasïndi eskajtsïni ima no jarhuatasïnga. Ju je exeni máru ambe enga Tata Diosï Jeoba újka juchantsïni jimbo.

9. ¿Nénajtsïni jarhuatasïni Tata Diosï Jeoba engachi exeni jarhajka ambe úni? Uandanta je ejemplu ma.

⁹ Íntskusïndijtsïni jánhaskakua. Tata Diosï Jeobajtsïni aiachisïndi eskajtsïni íntskuaka jánhaskakua parachi ambakiti ambe erakuni úni. Ka jiánchi sánderu uétarhinchasïnga eskajtsïni jánhastaaka engachi imani ambe uékaaka úni enga mójtakuaka juchaari tsípikuani, komu engachi exeni jauaka sinchi tembuchaa o nómbe (Sant. 1:5). Ju je exeni eksperiensia pirenchiiri ma enga María arhinhajka enga nótki uambuchatini jaka. c Ima tsípikua jingoni marhuakusïreendi Tata Diosï Jeobani komueska prekursora regulari. Tátsekua mítespti erachini ma. Pirenchi uandantasïndi: “Tiempu jingoni, niáraspkachi amigu úkuarhini ka ueenaspkachi tsitijperani. Mítespka eskani jatsispka parani exeni ambesïni úpirini. Ísï jimbo, kánikua kómarhispka Tata Diosï Jeobani indeeri ambe. Uétarhinchaxapka eskarini jarhuatapiringa, peruni mítespka eska no imasï erakupiringa jíndeni jimbo”. María exespti eska Tata Diosï Jeoba mókukuantaspka kómarhikuechani ka eska jánhaskakua íntskuspka. ¿Néna mókukuantaspi? Pirenchi jirinhaspti informasioni juchaari publikasionicharhu ka uánikua artikuluechani exeantaspti engaksï imeeri ambe uandeenga enga ima kurhamarhikuarhienga. Ístu, imeeri amamba enga Jeobaeri testigueka, ambakiti konsejuechani íntsaaspti engaksï jarhuatapka exeni ambesï meru pʼikuarhereeni. Tátsekua, María úspti ambakiti ambe erakuni úni.

10. Ísï eska na arhijka 2 Korintu 4:7, ¿néna jarhuataua Tata Diosï Jeoba imeeri marhuariichani? Uandanta je ejemplu ma. (Ístu exe je imajenini).

¹⁰ Íntskusïndijtsïni uinhapikua parachi tekaantani. Ísï eska na úpka apostoli Pablu jingoni, Tata Diosï Jeobajtsïni íntskuati uinhapikua parachi tekaantani engachi no sési nitamakuarhini  jauaka (arhinta je 2 Korintu 4:7). Ju je exeni na enga jarhuatapka erachini ma enga Benjamin arhinhajka. Desde enga tumbi sapichuepka, ióni irekaspti África imeeri familia jingoni kampo de refujiaduecha jimbo. Ima uandantasïndi: “Someni kómarhisïreenga Tata Diosï Jeobani ka kurhakusïreenga eskarini íntskupiringa uinhapikua parani imani ambe úni enga sési jaka. Imarini mókuchiantaspti juchiiti kómarhikuechani jimboka úspka eskani sési pʼikuarhinhepiringa, íntskusptirini balori parani seguiriini aianhpini ka íntsaasptireni publikasionichani parani seguiriini jorhenguarhini imeeri ambe”. Ístu erachi uandasïndi: “Arhiantani máteru erachiicheeri eksperiensiechani ka exeni néna enga Tata Diosï jarhuataapka paraksï tekaantani, jarhuatasptireni parani seguiriini jánguarhintani ka seguiriini marhuakuni Tata Diosïni”.

11, 12. ¿Néna uaa Tata Diosï Jeoba úraani juchaari erachiichani para mókuantani juchaari kómarhikuechani? (Ístu exe je imajenini).

¹¹ Úraasïndi juchaari erachiichani. Ima chúrikua ante de Jesúsi uarhini, mintsita jingoni kómarhispti Tata Diosïni. Ka kurhakuspti eska no jurajkupiringa eskaksï kʼuiripuecha uandapiringa eska ima no sési ambe uandaspka Tata Diosïiri ambe. Peru Tata Diosï no ísï úspti, sánderu sési, axaspti ánjelini ma enga Jesúsiiri ermanuepka, para jarhuatani ka uinhaperantani (Luk. 22:42, 43). Májkueni, jamberi Tata Diosï Jeoba úraati erachini ma engajtsïni uandajpaaka ojtsïni pʼorhembini parajtsïni uinhaperantani. Ísï jimbo, iáminduechachi uaaka exeni káni engachi uaaka ‘ambakiti uandakuechani’ arhiani juchaari erachiichani (Prov. 12:25).

¹² Ju je exeni ambe enga nitamakuarhika pirenchi ma enga Míriam arhinhajka. Máru semanecha ísï tátsekua enga imeeri uámba uarhipka, ima jandiajku jarhaspti imeecho ka kánikua no sési pʼikuarheraxapti ka kómu pʼikuarherani. Ka méntku uerani jarhasïreendi, uétarhinchaxapti uénhekuarhini nema jingoni. Pirenchi uandasïndi: “Xáni no sési pʼikuarheraxapka engani no nemani ueenga uandajpani, ísï jimbo kómarhispka Tata Diosï Jeobani. Ka engani útasïni ueparini kómarhini japka, telefonu kúskaspti. Orhejtsïkuti máespti, enga ambakiti amigu máepka”. Orhejtsïkuti ka imeeri témba sésiksï pʼikuastantaspti Míriamini, ka ima seguru jarhaspti eska Tata Diosï Jeobasï úpka eska erachi uandajpapiringa.

13. Uandanta je ejemplu ma na enga Tata Diosï Jeoba úraajka imani kʼuiripuechani engaksï no marhuakujka para mókuantani juchaari kómarhikuechani.

¹³ Uaati úraani imani kʼuiripuechani engaksï  no marhuakujka (Prov. 21:1). Ménichani, Tata Diosï Jeobajtsïni mókuchiantasïndi kómarhikuechani imani kʼuiripuechani úrapariani engaksï no marhuakujka. Pori ejemplu, úspti eska rei Artajerjesi jurajkupiringa Neemíasini para Jerusaléni kʼuanhatsentani para jarhuajpeni iretani úntani (Neh. 2:3-6). Ka iásïjtu Tata Diosï Jeoba uaati eska asta ima kʼuiripuecha engaksï no marhuakujka imani, jarhuataakajtsïni jiáni engachi uétarhinchani jauaka.

14. ¿Nénaksïni uinhaperantasïni ambe enga Soo Hing nitamakuarhika? (Ístu exe je imajenini).

¹⁴ Pirenchi ma enga Soo Hing arhinhajka, exespti na enga Jeoba úrapka doktorini ma para jarhuatani. Imeeri uájpa enga uánikua pʼamenchakuechani kájka mentirhu, kʼéri aksidenti ma úkuarhinchaspti. Ka indeni ambe jimbo Soo Hing ka imeeri uámba nóteruksï ánchikuarhisptia paraksï úni imeeri uájpani kuidarini. Ka inde ambe úspti eskaksï úkua jukanchapiringa sentabu ambe jimbo. Xánksï no sési nitamakuarhixapti enga Soo Hing uandapka eska nóteru úpiringia orhepani uérani ka eska kánikua kuataratixapkia. Ísï jimbo, uénhekuarhispti Tata Diosï Jeoba jingoni ka kurhakuspti eska jarhuatapiringa. Ima doktori engaksï jingoni nireenga, uékaspti jarhuataani ka úspti ambe ma paraka Gobiernu jarhuataapiringa ini erachiichani ka ístu jarhuataaspti exentani kʼumanchikua ma engaksï no kánikua maiampepiringa. Tátsekua Soo Hing uandaspti: “Exeskachi na engajtsïni xáni jarhuataka Tata Diosï Jeoba. Ima meru ‘kurhauasïndi kómarhikuechani’” (Sal. 65:2).

15. ¿Ambe jarhuataspi pirenchini ma exeni eska Tata Diosï Jeoba mókuantaxapka imeeri kómarhikuechani?

¹⁵ Sáno méntkisï, Tata Diosï Jeoba no kʼéri ambe úsïndi parajtsïni mókuchiantani kómarhikuechani. Perujtsïni imani ambe íntskusïndi engachi uétarhinchajka parachi no jurajkuni. Ísï jimbo, jatsiskachi para méntkisï jingontku jarhani parachi exeni na engajtsïni mókuchintajka juchaari Taati auandarhu anapu. Pirenchi ma enga Yoko arhinhajka ísï exesïreendi enajki Tata Diosï Jeoba no mókukuantani japi kómarhikuechani. Peru tátsekua ueenaspti karani ambe enga xáni kurhakuenga Tata Diosïni. Ka ma tiempu ísï tátsekua, exespti eska sáno iámindu ambe mókukuntaspka, asta ima ambe enga pirenchi nóteru miáuengia. Kánikua sésiisti eskachi ménichani arhutaaka tiempu parachi eratsentani na enga Tata Diosï Jeoba mókuantani jaka juchaari kómarhikuechani (Sal. 66:19, 20).

16. ¿Nénajtsïni jarhuatasïni mintsikani Tata Diosïni engachi kómarhijka? (Ebreu 11:6).

¹⁶ Jatsiskachi para mintsikani Tata Diosïni engachi  kómarhiaka, ka ístu jiókuarhini ambe uéjki engajtsïni mókuchintaaka (arhinta je Ebreu 11:6). Ju je exeni ambe engaksï nitamakuarhipka Mike ka Chrissy, temungurhiri ma engaksï Beteli uékeenga marhuani. Mike uandasïndi: “Uánikua ueltachi axaspka solisitudi ka somenchi kómarhisïreenga Tata Diosï Jeobani ini ambe jimbo, perujtsïni no méni pʼímarhispti”. Mike ka Chrissy seguirisptiksï mintsikani eska Tata Diosï Jeoba mítespka nani engaksï úpiringa sánderu sési marhuani. Imeechaksï seguirispti jánguarhintani xáni eskaksï xáni úpiringa: marhuasptiksï komueska prekursori regulariicha jima enga sánderu uétarhini japka aianhpinhani ka ístu jarhuajpesptiksï konstruksionirhu. Iásïksï sirkuitueri orhejtsïkutiistia. Mike uandantasïndi: “Tata Diosï Jeobajtsïni no méntkisï ísï mókuchiantasti kómarhikuechani eskachi jucha na erokuarhini japka, perujtsïni mókuchiantasti ka sánderu sési jamberi eskachi na eratseni japka”.

17, 18. Ísï eska na arhijka Salmo 86:6, 7, ¿ambeerichi seguru jarhaski?

¹⁷ (Arhinta je Salmo 86:6, 7). Dabidi seguru jarhaspti eska Tata Diosï Jeoba kurhauasïreenga ka mókukuantani imeeri kómarhikuechani. Ka chájtujtsï uaaka májkueni seguru jarhani. Ejempluecha engachi ini jorhenguarhikua jimbo exeaka, xarhatachesïndijtsïni eskajtsïni Tata Diosï Jeoba íntskusïnga jánhaskakua ka uinhapikua parachi úni tekaantani. Ístuchi exeska eska ima úsïnga juchaari erachiichani úraani o asta imani kʼuiripuechani engaksï no kómarhijka imani parajtsïni jarhuatani.

¹⁸ Jamberijtsïni Tata Diosï Jeoba no méntkisï ísï mókuchiaati eskachi jucha na erokuarhini jauaka, peruchi míteska eskajtsïni mókuchiaka. Íntskuatijtsïni ambe engachi uétarhinchajka ka jiáni enga sánderu sési jauaka. Ísï jimbo, ju je seguiriini kómarhini Tata Diosïni mintsikaparini eskajtsïni ima kurhajchaaka ka eskajtsïni kuidariuaka iásï ka eska jimbanhi parhakpinirhu íntskuakajtsïni ‘ambe engachi uétarhinchajka iámindu jucha engachi tsípiti jaka’ (Sal. 145:16).