1, 2. ¿Ambeksï jatsispi para erakuni judiuecha engaksï Babilonia irekapka? (Esdras 1:2-4).

 ¡UANDANHASPTIA! Judiuecha engaksï 70 uéxurhini páni japkia Babilonia, úpirindiksï kʼuanhatsentani Israeli, imeecheri echeri jimbo (arhinta je Esdras 1:2-4). Solu Tata Diosï Jeoba úpirindi úni indeni ambe. ¿Andi? Jimbokaksï Babilonia anapuecha no jurajkuasïreenga imeechani engaksï jupiauenga (Is. 14:4, 17). Peru Babilonia andanhaspti ka jimbanhi juramuti uandaspti eskaksï judiuecha úpiringa kʼuanhatsentani imeecheri paisi jimbo. Ísï jimbo, iámindu judiuecha ka sánderia imeecha engaksï taatiipka, jatsisptiksï para erakuni ambe úni, Babilonia pakarani o níntani. Peru para máru, jamberi i ambe kánikua úkua jukapti. Ju je exeni andi.

² Máruksï kánikua jatiriisptia paraksï xáni iauani biajarini. Ka jimbokaksï sáno iámindu judiuecha Babilonia andajpenuspka, ima jindeespti imeecheeri ireta. Ireta Israeli, imeecheeri ióntki anapu parientiicheri echeriispti ka no imeecheeri. Ístu, péringaksï uánikua judiuecha riku úkuarhipka Babilonia. Jamberi inde ambe úpti eskaksï úkua jukanchapiringa jurajkuani imeecheeri sési járhati kʼumanchikuechani ka negosiuechani paraksï mótsini ireta ma jimbo engaksï no miiupka.

3. ¿Náki kóntperataksï jatsipirini ima judiuecha engaksï kʼuanhatsentapiringa Israeli?

³ Ima judiuecha engaksï sési marhuakuni japka Tata Diosïni, mítesptiksï eska engaksï kʼuanhatsentapiringa Israeli, uánikua kóntperateechanksï jatsiapiringa ka eska engaksï Babilonia pakarapiringa. Sánderu kʼéri kóntperata jindeespti eskaksï úpiringa sési kómarhini Tata Diosïni. Babilonia, jukari 50 templuechaksï jarhaspti para diosï no jurhimbitiichani kómarhiani, peru no ma templu jarhaspti para Tata Diosï Jeoba. Israeliteechaksï no úsïreendi íntspiani imani kéjtsïtakuechani enga Moisésiiri Lei uandeenga, jimboka no jarhaspka altari ma ni saserdotiicha engaksï indeni kéjtsïtakuechani uaapiringa. Ístu, imeecha engaksï janhanharhienga  Tata Diosï Jeobani ka kurhajchaanksï imeeri juramukuechani, sánderuksï namunituespti eska iámindu imeecha engaksï no jurhimbiti diosïichani kómarhiauenga. Ísï jimbo, ima judiuecha engaksï janhanharhienga Tata Diosïni, uékaxaptiksïa kʼuanhatsentani imeecheri echeri jimbo ka ménderuksï ísï kómarhini Tata Diosïni eska ima na uékajka.

4. ¿Ambe aiakuaspi Tata Diosï Jeoba judiuechani?

⁴ Para Israeli niárani Babilonia uératini, ma tʼámu mesiicha jimboepirindi ka kánikua úkua jukapirindi. Peru Tata Diosï Jeoba aiatspespti eska ima kénditapiringa ambe uéjki enga úpiringa ójkutaani. Profeta Isaíasi karaspti: “¡Preparari je Jeobaeri xanharuni! Jurhimbiti xanharu ma ú je para juchaari Tata Diosï desierturhu. […] Jatsisti para pareju jántskanhantani nani enga no sési jándeka ka sési jántskanhantani nani enga no pareju jándeka” (Is. 40:3, 4). ¿Úsïntsï eranhaskani? Para judiuecha sánderu fásiliipirindi xanharu ma jimbo nirani enga pareju jándepiringa ka pákua ma jimbo ka eska juáteechani káramaani ka kétsiantani. Ístuksï sánderu sóntku niárapirindi ka no xáni úkua jukakuapirindi.

5. ¿Na arhinhasïreeni ima xanharu enga Isaíasi uandapka ka enga Babilonia uératini asta Israeli niáreenga?

⁵ Uánikua xanharuechaksï nombri ma jukasti, máteruechaksï númeru ma. ¿Ka ístu jukaski nombri ma ima xanharu enga Isaíasi uandapka? Jo. Biblia uandasïndi: “Jauati xanharu sapichu ma, jo, xanharu ma enga arhinhajka Xanharu Pímbinhasïkueri. Ima enga no pímbinhaxeka no jámaati ini xanharu jimbo” (Is. 35:8). ¿Ambeksï arhikuekasïreeni i uandakuecha para israeliteecha? ¿Ka ambeksï arhikuekasïni para jucha?

6. ¿Andisï uandanhapi eska í xanharu pímbinhasïispka?

⁶ “Xanharhu Pímbinhasïkueri”. ¿A no eska kánikua sési jáxeska i nombri para xanharueri nombri máeni? ¿Andisï uandanhapi eska í xanharu pímbinhasïispka? Jimboka Israeli iáminduechaksï jatsispka para pímbinhasïini. I ambe arhikuekasïreendi eska no ma judiu jatsispka para ísku jándikua ambe niátani, diosï úkateechani kómarhiani o kʼéri pekadu ma úni. Ima judiuecha engaksï kʼuanhatsentapiringa, jatsisptiksï para ʻpímbinhasï ireta máeniʼ para imeecheri Tata Diosï (Deut. 7:6). ¿Arhikuekasïni i ambe eska ima judiuecha engaksï uéakuntapiringa Babilonia iámindu ambeksï sési úxapka? Nómbe. Jatsisptiksï para mójtakurhini paraka Tata Diosï Jeoba jaiapanheantapiringa.

7. ¿Ambeksï jatsispi para úni máru judiuecha? Uanda je ejemplu ma.

⁷ Ísï eskachi antesi na uandakia, sáno iámindu judiuechaksï Babilonia andajpenuspti, ka jamberiksï uánikuecha, májkueni eratseeni ka májkuenksï jámani eska jima anapuecha. Uánikua uéxurhini tátsekua engaksï máru judiuecha kʼuanhatsentapkia Israeli, Esdrasi aiangunhaspti eskaksï máru judiuecha tembuchaspka máteru nasioni anapu nanakeecha jingoni (Éx. 34:15, 16; Esd. 9:1, 2). Ka sánderu tátsekua, juramuti Neemíasi ísku pakaraspti enga exepka eska inde judiuecheeri uájpeecha, nóksï jorhenaspka ebreu uandani (Deut. 6:6, 7; Neh. 13:23, 24). Ísï jimbo, ¿nénaksï úpirini xénchani ka kómarhini Tata Diosï Jeobani engaksï no kurhanguenga imani idioma enga jimbo karakata japka Tata Diosïiri Uandakua? (Esd. 10:3, 44). Indeni ambe jimbo, inde judiuechaksï jatsispti para kánikua mójtakukuarhini, ka engaksï Israeli irekapiringa, sánderu fásiliipirindi indeni ambe úni, jimboka jima ménderu ueenanhaxapka ísï kómarhinhani Tata Diosï eska ima na uéjka (Neh. 8:8, 9).

8. ¿Andichisï jatsipirini para míteni ambe enga úkuarhipka ióntki judiuecha jingoni? (Exe je imajenini enga ueenakuarhu jaka i rebistarhu).

⁸ Jamberiksï máru uandajti: “Kánikua sésiisti míteni ambe enga úkuarhipka ióntki judiuecha jingoni. Peru iásï, ¿arhikuekasïni ambe ma para jucha?”. Jo. Jimbokachi juchajtu pori ísï arhini, jámaxaka “Xanharu Pímbinhasïkueri” jimbo.  I xanharu úsïndi eskachi iásï uaaka kómarhini Tata Diosï Jeobani. Ístu, uaati eskachi sánderu orhepani jatsiauaka kóntperateechani enga Tata Diosïiri Reinu juauaka. Ísï jimbo, erakukateecha ka ʻmáteru karichiichaʼ, jatsiskachi para indeni xanharu jimbo jámani (Juanu 10:16). b Ka 1919 jimbo, uánikua acheetiicha, uarhiitiicha ka sapiicha, uéakuntastiksï Kʼéri Babilonia uératini, enga jindeeka iámindu no jurhimbiti relijioniicha, ka pori ísï arhini ueenastiksï jámani “Xanharu Pímbinhasïkueri” jimbo. Jamberijtsï chájtu indeni xanharu jimbo nirani jaka. Nájkiruka ma 100 uéxurhini ísïikia enga mítanhaka inde xanharu, uánikua uéxurhini antesi ueenanhasti prepararinhani.

9. Ísï eska Isaías 57:14 na arhijka, ¿néna prepararinhaski “Xanharu Pímbinhasïkueri”?

⁹ Engaksï judiuecha kʼuanhatsentapka Babilonia uératini, Tata Diosï Jeoba kénditakuaspti xanharurhu iámindu ambe enga úpiringa ójkutaani (arhinta je Isaías 57:14). ¿Ka májkueni úski iásï anapu “Xanharu Pímbinhasïkueri” jimbo? Jo. Uánikua uéxurhini antesi de 1919, Tata Diosï Jeoba ueenaspti úraani acheetiichani engaksï kánikua janhanharhienga, paraksï ambantskantani indeni xanharuni (terukutanta je Isaías 40:3 jingoni). Pori ísï arhini, imeechaksï ánchikuarhispti ini xanharu jimbo paraka sánderu orhepatini, kʼuiripuecha engaksï ambakiti mintsita ma jataka, úpiringaksï uéakuntani Kʼéri Babilonia uératini ka únksï kómarhini Tata Diosï Jeobani imeeri ireta jingoni ísï eska ima na uéjka. Ju je exeni máru ambe engaksï úpka paraksï prepararini ini xanharuni.

10, 11. Engaksï sánderu uánikua kopiecha únhaka Biblieri ka tradusirinhani, ¿para ambe marhuaski? (Ístu exe je imajenini).

¹⁰ Kopiecha. 1450 jimbo ísï, Biblia jájki jimbo kopiarhinhasïreendi. Para ini ánchikuarhitani úni, kánikua tiempu pásïreendi jimboksïsï no uánikua Biblieri kopiecha japti ka ístuksï kánikua jukaparhaspti. Peru engaksï ueenapka jarhani makineecha engaksï ueenga imprimiriini, sánderu fásiliisptia Biblieri kopiechani uaani ka etsakuani.

¹¹ Tradusiriini. Uánikua uéxurhini, Biblia latíni jimbojkusï japti, idioma ma engaksï imajku ueenga kurhanguni engaksï kánikua estudiariipka. Joperu jimbokaksï sánderu kopiecha jarhaspkia, ima kʼuiripuecha engaksï kánikua janhanharhienga Tata Diosïni, kánikuaksï jánguarhintaspti para Bibliani tradusiriini imani idiomeecha jimbo engaksï kʼuiripuecha uandeenga. Ka ísï, ima kʼuiripuecha engaksï Bibliani arhinteenga, úsïreendiksïa terukutantani ambe engaksï iglesiecharhu kurhandienga imani ambe jingoni enga Biblia jorhentpijka.

12, 13. Uanda je ejemplu ma na engaksï máru kʼuiripuecha xarhatapka eskaksï iglesiecha chkuanderakua ambe jorhentpixapka.

¹² Jarhuajperateecha para Bibliani jorhenguarhini. Máru kʼuiripuechaksï sési estudiarispti Bibliani ka uánikua ambeksï jorhenguarhispti. Ka aianguasïrendiksï máteruechani ambe engaksï jorhenguarhienga, ka inde ambe kánikua ikiataaspti uánikua relijioniiri orhejtsïkutiichani. Pori ejemplu, uéxurhini 1835 jimbo ísï, uánikua acheetiicha engaksï ambakiti mintsita ma jatapka, ueenasptiksï petaani trataduechani ka foietuechani engaksï uandeenga eskaksï iglesiecha chkuanderakua ambe jorhentpixapka.

¹³ Uéxurhini 1835 jimbo ísï, acheeti ma enga Henry Grew arhinheenga ka enga janhanharhienga Tata Diosïni, petaspti foietu ma enga uandeenga ambe enga úkuarhijka enga kʼuiripu ma uarhijka. Ima Bibliani úraparini xarhataspti eska Tata Diosïsï újka eska kʼuiripu ma uaaka irekani para méntkisï ka eska no jindeeska jimboka andajpenusïnga alma ma jingoni enga no méni uarhijka, ísï eskaksï sáno iámindu iglesiecha na jorhentpienga. Ka 1837 jimbo, relijioniiri orhejtsïkuti ma enga George Storrs arhinheenga, exentaspti ini foietuni jiáni enga trenirhu nirani japka. Enga arhintapka, exespti eska jorhenguarhispka  ambe ma enga kánikua jukaparhakueka. Ísï jimbo, aianguaspti máteruechani ambe enga jorhenguarhipka. Ka uéxurhini 1842 jimbo, nitamataraaspti máru arhijtsïkperateechani arini títulu jingoni: “¿Nóksï méni uarhisïni no sési úriicha?”. Ima ambe enga George Storrs karapka, kánikua jarhuataspti tumbini ma enga Charles Taze Russell arhinheenga.

14. ¿Néna marhuakuspi Russellini ka imeeri kompanieruechani ima ánchikuarhita engaksï máteruecha úpka? (Ístu exe je imajenini).

¹⁴ ¿Néna marhuakuspi erachi Rusellini ka imeeri kompanieruechani ima ánchikuarhita engaksï máteruecha úpka? Para ima tiempu jarhasptiksïa diksionariuecha, jarhuajperateecha para Bibliani kurhanguni ka uánikua Biblieri traduksionicha. Ísï jimbo, imaksï úsïreendi iámindu ini ambe úrani paraksï Bibliani jorhenguarhini. Ístu, marhuakuaspti ambe engaksï inbestigaripka Henry Grew, George Storrs ka máteruecha. Ístu, Russell ka imeeri kompanieruechaksï kánikua ánchikuarhispti “Xanharu Pímbinhasïkueri” jimbo, jimbokaksï uánikua libruechani ka trataduechani petaaspka engaksï Biblieri ambe uandeenga.

15. ¿Ambe ambakiti ambe úkuarhispi 1919 jimbo?

¹⁵ Uéxurhini 1919 jimbo, Tata Diosïiri ireta nóteru úsïreendia ambe enga jorhentpienga Kʼéri Babilonia, enga jindeeka no jurhimbiti relijioniicha. Indeni uéxurhini jimbo, niáraspti jarhani “jántspiri enga mintsinharhikueka” ka jánhastiini, meru jiáni enga uétarhini japka parakaksï kʼuiripuecha engaksï ambakiti mintsita ma jatapka ueenapiringaksï jámani “Xanharu Pímbinhasïkueri” jimbo (Mat. 24:45-47). Jimbokaksï máteruecha ánchikuarhispka paraksï prepararini indeni xanharuni, imeecha engaksï ueenapka indeni xanharu jimbo jámani, úsptiksï uánikua ambe jorhenguarhini Tata Diosï Jeobaeri ambe ka ima ambeeri enga ima uékajka úni (Prov. 4:18). Ístuksï mójtakukuarhispti paraksï úni jaiapanherantani Tata Diosïni. Ísïisti, ima no erokuarhisïreendi eskaksï mátirku mójtakukuarhipiringa. Sánderu sési, jurajkuxati eska iámindu ini tiempu jimbo imeeri ireta sánhani arhiaka pʼimbinhasïntani (exe je rekuadruni “ Tata Diosï Jeoba sánhani arhixati pímbinhajkuntani imeeri iretani”). ¿Úsïnchi eranhaskani na engachi xáni sési pʼikuarheraaka enga  niáraaka ima jurhiatikua engachi uaaka iámindu ambe jimbo jaiapanherantani Tata Diosïni? (Kol. 1:10).

16. ¿Néna ambantskanhantaxaki “Xanharu Pímbinhasïkueri” 1919 uératini? (Isaías 48:17; 60:17).

¹⁶ Paraka xanharu ma sési jauaka, uétarhisïndi méntku ambantskantani jarhani. Ka 1919 uératini, “Xanharu Pímbinhasïkueri” ambantskanhantaxati parakaksï sánderu kʼuiripuecha uaaka uéakuntani Kʼéri Babilonia uératini. Jántspiri enga mintsinharhikueka ka jánhastiini enga indeni tiempu jimbo uaxastanhapka, sóntku ueenaspti ánchikuarhini. Pori ejemplu, 1921 jimbo, petaspti libruni El Arpa de Dios, enga úkata japka para jarhuataani kʼuiripuechani paraksï míteni jurhimbikua ambe Biblieri. Sanóksï 6 miioni libruecha etsakunhaspti 36 idiomeecha jimbo, ka uánikuechaksï úspti jorhenguarhini jurhimbikua ambe Biblieri ini publikasioni jingoni. Ka nótki xáni ióniisti enga uéraka libru para kʼuiripuecha jingoni jorhenguarhini Tsípikua jingoni ireka je, enga kánikua marhuajka para Biblieri ambe jorhentpini. Ini tiempu jimbo, Tata Diosï Jeoba úraxati imeeri organisasionini parajtsïni seguiriini jorhendani imeeri ambe ka i ambejtsïni kánikua jarhuatasïndi parachi seguiriini jámani “Xanharu Pímbinhasïkueri” jimbo (arhinta je Isaías 48:17; 60:17).

17, 18. ¿Nani pájpesïni “Xanharu Pímbinhasïkueri”?

¹⁷ Pori ísï arhini, enga nema uékajka Biblieri ambe jorhenguarhini, sésikua intsïnhasïndi para “Xanharu Pímbinhasïkueri” jimbo jámani. Máruksï no iauani nirasïndi indeni xanharu jimbo ka jurajkusïndiksï. Joperu máteruechaksï sési eratsetixati seguiriini indeni xanharu jimbo jámani astakaksï niáraaka jima engaksï uékani jaka niárani. Peru, ¿naniksï uékasïni niárani?

¹⁸ Para imeecha engaksï erokuarhini jaka auandarhu irekani, “Xanharu Pímbinhasïkueri” paasïndi “[Tata] Diosïiri paraisurhu” enga auandarhu jaka (Jaŋ. 2:7). Ka para imeecha engaksï erokuarhini jaka Echerirhu irekani, i xanharu páuati asta jima enga Kristu na kʼamaraakia Juramuni Mili Uéxurhini, jiáni engaksï iámindu kʼuiripuecha perfektueuakia. Enga chá nirani jaka ini xanharu jimbo, asï tátsepanisï eraa je. Seguirii je xanharani astakajtsï niáraaka jima engajtsï uékani jaka, jimbanhi parhakpinirhu. “¡Eskaksïni iáminduechani sési nicheaka”.