SEMANA 22
PIREKUA 127 Jánguarhintaaka ísïini eska Jeoba na uéjka
Ambeksï jatsiski para úni nobiuecha para sési nikuani
“Na engajtsï jásï kʼuiripueka chaari mintsitarhu [...] Tata Diosï kánikua sési exesïndi” (1 PED. 3:4).
AMBE ENGACHI JORHENGUARHIAKA
Ambe engaksï jatsika para úni nobiuecha para sési nikuani ka nénaksï uaa jarhuataani kúnguarhikuarhu anapu erachiicha.
1, 2. ¿Ambeksï uandantasïni máru jiáni engaksï nobiuepka?
KÁNIKUA sési jásï ambeesïndi jiáni engari nobiuejka nema jingoni ka ísturi mámaru ambe pʼikuarherasïnga. Engari mítperani jaka nema jingoni, jamberiri uéjka eskakeni iámu ambe sési uérachiaka. Etiopía anapu pirenchi ma enga Diana arhinhajka, a uandasïndi: “Jiáni engani juchiiti acheetini jingoni nobiuepka, kánikua sési nitamakuarhispka. Uandontskuarhesïreengachi imeeri ambe enga jukaparhakuepka ka engachi jatsipka para exeni, joperuchi ístu tsípikuarhisïreenga. Kánikua sési pʼikuarheraspka exentani nemani engareni kánikua uékapiringa ísï eska ji imani”.
2 Joperu jarhasti máteru erachi enga Países Bajos anapueka ka enga arhinhajka Alessio, ima uandantasïndi: “Kánikua tsípikuarhispka jiáni engani juchiiti uarhiitini jingoni nobiuepka, joperu ístuchi uánikua ambe jimbo nitamakuarhispka enga úkua jukapka”. Ini jorhenguarhikua jimbochi exeni jauaka imani ambe engaksï úkua jukanchajka máru nobiuecha ka néna uaa jarhuataani Biblia nobiuechani para sési nikuani. Ka ístuchi exeni jauaka nénaksï uaa jarhuataani kúnguarhikuarhu anapu erachiicha.
PARA AMBE MARHUASÏNI NOBIUENI
3. ¿Para ambe marhuasïni nobiueni? (Proverbios 20:25).
3 Ísïisti, kánikua sési jásï ambeesti nobiueni, joperu ístu no chʼanakua ambeesti jimboka jindeeska paraka ma niáraaka tembuperani. Jiáni engaksï nobiuecha tembuperajka, Tata Diosï Jeobani japarinksï aiatsperasïndi eskaksï xénchperaaka ka janhanharperani jiáni jamberi engaksï uarhiaka. Ante deksï ini ambe úni oksï máteru ambe aiatsperani, jatsistiksï para kánikua sési eratsentani (arhinta Proverbios 20:25). Nobiueni nema jingoni, marhuasïndi paraksï sánderu sési mítperani ka únksï sési eratsentani ambe engaksï uaaka, ia sea tembuperani o kʼamarhukuni. Engaksï eratsejka kʼamarhukuni, inde ambe no arhikuekasïndi eska inde tiempuni engaksï nobiuepka no marhuaska, sánderu sési, jarhuataasti paraksï sési eratsentani ambeksïsï úpirini.
4. ¿Andisï xáni jukaparhakue sési kurhanguni para ambe marhuasïni nobiueni?
4 ¿Andisï xáni jukaparhakue sési kurhanguni para ambe marhuasïni nobiueni? Jimboka ísï, tumbi ma o uátsï ma no ísku jatini ueenaati mítperani nemani jingoni ka jini no uékani tembuchani o uambuchani. Joperu no solu tumbiichajkuksïsï jatsiti para sési kurhanguni ambe enga arhikuekajka nobiueni, sino iáminduechachi jatsiska para sési kurhanguni. Pori ejemplu, máruksï eratsesïndi eskaksï nobiuecha meru jatsiska para pájperani, joperu ísï eratseni no sési jarhasti jimboka úsïnga eskaksï tumbiicha chéaka. Estados Unidos anapu ma pirenchi enga Melissa arhinhajka, uandasïndi: “Máru erachiichaksï méntku arhiani jarhasïndi nobiuechani eskaksï jatsiska para tembuperani, jimboksïsï máru nobiuecha no jurajperajti nájkiruka no xáni sési nikuani jauaka. Ka jimboksïsï máru no uéjti míteni nemani paraksï no indeni ambe nitamakuarhini”.
JÁNGUARHINTA JE SÉSI MÍTPERANI
5, 6. ¿Ambe máteru ambeksï jatsiski para míteni imeecha engaksï nobiueka? (1 Pedru 3:4).
5 ¿Nénari uaa míteni sindi tembuchaa o uambuchaa imani jingoni engari míteni jaka? Jánguarhinta sési míteni na enga jásï kʼuiripueka. Jamberiri sánisï tʼuini mítepkia na enga jásïika ante dejtsï nobiueni. Joperu iásïri jatsiskia para sánderu sési míteni na enga jásï kʼuiripueka imeeri mintsitarhu (arhinta je 1 Pedru 3:4). I ambe arhikuekasïndi eskari jatsiska para míteni na enga xáni mintsikajka Tata Diosï Jeobani, na jásïiski o na jámasïni ka na enga eratsejka. Jatsiskari para sési eratsentani arini ambe: “¿Ambakiti uámba o témba máeua? ¿Terukua jíndeni jingoni?” (Prov. 31:26, 27, 30; Éfes. 5:33; 1 Tim. 5:8). “¿Uaachi xénchperani ka pendienti jarhani máteruni jimbo? ¿Uaa tekaakuntani enga ménisï niáraska no sési úni?” (Rom. 3:23). b Ka asï mirikurhi eskaksï ima kʼuiripuecha engaksï újka kurhangutsperani jindeeska imeecha engaksï jánguarhintajka sési pájperani paraksï úni terukutani ka no imeecha engaksï májkueni jásïika.
6 ¿Ambeeri máteru ambe jatsiski para míteni jiáni engari nobiuejka nema jingoni? Ante deri ueenani sánderu ambe p’ikuarherani imani kʼuiripu jimbo, sési japirindi eskajtsï uandontskuarheaka imeeri ambe enga jukaparhakueka, pori ejemplu, náki meteechantsï jatsiaski. Ístu ma úpirindi uandontskuarheni sentabueri ambe, pʼamenchakueri ambe o ambe enga ma nitamakuarhika ióntki. Ísïisti, nójtsï jatsiska para jirejiresï uandontskuarheni indeeri ambe (terukutanta je Juanu 16:12 jingoni). Engari exejka eskari tiempu uétarhinchasïnga parari aianguni máru ambe, uaakari arhini eskakeni erokaaka. Joperu miá, ima jatsiska para míteni indeni ambe para úni sési erakuni ambe uaa. Ísï jimbo, na uéjki jatini jatsiskajtsï para uandontskuarheni chaari ambe.
7. ¿Ambeksï uaa úni nobiuechani paraksï sánderu sési mítperani? (Ístu exe rekuadruni “ Enga chiiti nobiu o nobia iauanisï irekaka”).
7 ¿Ambekini jarhuataa parari sánderu sési míteni máteruni? Asï ché uandontskuarhekuni máru ambeeri, uaakari kurhamarhini ka jingontku kurhaani ambe engakeni ima arhiaka (Prov. 20:5; Sant. 1:19). Jamberiri uaaka imani jingoni tʼireni, nirani sáni xanharani o tsimarhantsï uérani aianhpini, i ambeksïni jarhuataati parajtsï úni sánderu uandontskuarheni. Ísturi uaaka sánderu sési míteni engajtsï amiguecha jingoni jauaka o familia jingoni. Uaakari úni ambe ma máteru kʼuiripuecha jingoni parari exeni na enga jámajka o ambe enga újka enga uánikuechani jingoni jarhajka. Indeni ambesï úpti Albert enga Países Bajos anapueka jiáni enga Alicia jingoni mítperani japka: “Márkuchi úsïreenga ambe ma engajtsïni jarhuatapka sánderu sési mítperani. Pori ejemplu, ménichanchi márku úmantasïreenga, ambantskantani kʼumanchikuarhu o máteru ambe. Ka ísïchi úspka míteni ambechi úsïreeni úni ka ambe nómbe”.
Ambe enga jarhuatauaka nobiuechani paraksï sánderu sési mítperani jindeesti imani ambe úni enga jarhuatauaka paraksï úni uandontskuarheni. (Exea párrafuechani 7 ka 8).
8. ¿Néna jarhuataasïni nobiuechani engaksï márku estudiariijka?
8 Máteru ambe engakeni jarhuataaka sánderu sési míteni chiiti nobiuni o nobiani, jindeesti márku jorhenguarhini Biblieri ambe. Engajtsï tátsekua niáraska tembuperani, jatsiakajtsï para arhutani tiempu parajtsï jatsini familieri jorhenguarhikua parakaksïni Tata Diosï Jeoba méntkisï jarhuataaka (Ecl. 4:12). Ísï jimbo, sési japirindi eskajtsï desde iásï úndapiringa arhutani tiempu parajtsï tsimarhani jorhenguarhini, ¿a no? O ¿tʼu na exesïni? Ísïisti, nájkirukaksï nobiuecha nótki familia máeka ka tataka nótki orhejtsïkutiini nanakeeri, tsimarhanksï uaati exeni sini tataka o nanaka ambakiti pájperakua ma jatsiski Tata Diosï Jeoba jingoni engaksï desde iásï pʼindeska tsimarhani jorhenguarhini Biblieri ambe. Estados Unidos anapu temungurhiri ma engaksï Max ka Lisa arhinhajka uandasïndiksï eska ístu jarhuataaspka jimbokaksï márku estudiarisïreenga. Max uandantasïndi: “Desde engachi ueenapka mítperani, márkuchi jorhenguarhisïreenga publikasionichani engaksï nobiuecheeri ambe uandeenga, temungurhiriikueri ambe ka familieri. Inde ambejtsïni jarhuataspti parachi uandontskuarheni imeeri ambe enga kánikua jukaparhakueka, jimboka engachi no ísï úpiringa, nóchi méni úpiringa uandontskuarheni indeeri ambe”.
MÁTERU AMBE ENGAJTSÏ JATSIKA PARA EXENI
9. ¿Nobiuechaksï neechani uaa aianguani eskaksï mítperaxaka?
9 ¿Neechantsï aianguaua? Indentsï chá tsimarhani exeakia. Engajtsï apenasi ueenani jaka mítperani, jamberijtsï uékaaka namunitku kʼuiripuechani aianguani (Prov. 17:27). Ísïksïni no xáni uánikua ambe kurhamarhini jauati ka nijtuksïni arhini ambe engajtsï jatsika para úni. Joperu ménderu engajtsï no nemani aianguska, jamberijtsï uaaka jarhariani máteruechani jimbokajtsï chésïnga eska mítekuarhiaka ka inde ambe úpirindi kánikua no sési jarhani. Ísï jimbo, sési japirindi eskajtsï aianguapiringa imeechani engaksïni uaaka jarhuatani ka íntsaanksïni ambakiti konsejuecha, pori ejemplu, úpiringajtsï aianguani familiariichani, amiguechani engaksï eratsekua jukariika o orhejtsïkutiichani (Prov. 15:22).
10. ¿Nénaksï uaa nobiuecha pímbinhasï jarhani?
10 ¿Ambeksïni jarhuataa parajtsï tsimarhani pímbinhasï jarhani? No no sési jarhasti eskajtsï sánhani arhiaka sánderu xénchperani ka sánderujtsï uékani márku jarhani. Joperu ístujtsï no uékasïnga imani ambe úni enga Tata Diosï Jeoba kurhunhijka (1 Kor. 6:18). Ísï jimbo, jánguarhinta je no uandontskuarheni ísku jándikueri ambe, nijtu tsimarhantku jarhani ka nijtu jámani jukari alkoli arhani (Éfes. 5:3). Jimboka inde ambe uaaka eskajtsï sánderu úkua jukanchaaka pímbinhasï jarhani ka niárantsï ísku jándikua ambe úni. Ísï jimbo, jánguarhinta je uandontskuarheni ambejtsï uaa úni parajtsï janhanharhiani Tata Diosï Jeobaeri juramukuechani engajtsï jamberi nobiueuaka (arhinta Proverbios 22:3). Exe je ambe engaksï úpka David ka Alma engaksï Etiopía anapueka: “Méntkisïchi juchaari amiguechani jingoni jarhasïreenga o jimeesïsï enga uánikua kʼuiripu jámajka. Nóchi méni tsimarhantku pakarasïreenga karrurhu ma ka nijtu kʼumanchikuarhu ma. I ambejtsïni jarhuataspti parachi no méni eratseni no sési ambe niátani”.
11. ¿Ambeksï jatsiski para exeni nobiuecha engaksï uéjka xénchperakua xarhatatsperani?
11 ¿Ka sési jarhaski eskari xarhatakuaka chiiti nobiuni o nobiani eskari xénchasïnga? Engajtsï na sáni ióni páni jauakia mítperani, jamberijtsï uékaakia xarhatatsperani eskajtsï xénchpesïnga joperu enga no no sési jauaka (Cant. 1:2; 2:6). Joperu engari sánderu uékaska relasioni seksuali jatsini, sánderuri imani ambejku eratseni jauakia ambe engari pʼikuarherajka ka mirikurhiakari imani ambe enga sánderu jukaparhakueka, komu para ambe enga marhuajka nobiueni. Ísï jimbo, jatsiskajtsï para pʼíngukuarhini parajtsï no ísku jándikua ambe niátani (Prov. 6:27). Jimajkani, engajtsï ueenani jauakia mítperani nemani jingoni, uandontskuarhi je ambejtsï uaa úni ka ambe nómbe parajtsï ísï úni eskaksï Biblieri prinsipiuecha na uandajka (1 Tes. 4:3-7). c Kurhamarhikuarhi je: “¿Néna exea kʼuiripu engani xénchperakua xarhatakuska juchiiti nobiuni o nobiani? ¿Inde ambe uaa eskani ji o ima niáraaka ísku jándikua ambe únchani?”.
12. Jiáni engaksï nobiuecha problema ambe jatsiaka, ¿ambeksï jatsiski para úni?
12 Engajtsï niáraska problema ambe jatsini ojtsï no úni jarhani kurhangutsperani, ¿ambejtsï uaa? Engajtsï ménisï no májkueni eratseska, no arhikuekasïndi eskajtsï no sési úxaka ambe ma. Iámindu nobiuechaksï ménisï no úni jarhasïndi terukutani ambe ma jimbo. Temungurhiriicha engaksï kánikua sési pájperajka jindeesti jimbokaksï tsimarhani jánguarhintasïnga sési peentani ambe ma. Ísï jimbo, na engajtsï iásï sési peentauaka problemechani, xarhataati na engajtsï pájperaaka temungurhirikuarhu. Kurhamarhikuarhi je: “¿Úsïnchi iatsitakuarhu ka respetu jingoni uandontskuarheni? ¿Jirejiresïchi jiókuarhisïni eskachi jerrariiska ka jánguarhintasïnchi nóteru ísï únia? ¿Jurajkusïnchi eska ísï úkuarhiaka eska máteru na uandajka? ¿Jorhenaskichi puátsperantani ka arhijperani ‘tekaachintariniʼ?” (Éfes. 4:31, 32). Joperu engajtsï someni arhirperani jauaka ojtsï no úni jarhani terukutani ambe ma jimbo, asï jáma je eratseni eskajtsï jiáni kʼóru sési uaakia engajtsï na tembuperaakia. Engari exeska eska ima kʼuiripu no jindeeska para t’u, sánderu sésiuati para tsimarhani engajtsï nóteru nobiueuakia. d
13. ¿Ambe jarhuataua nobiuechani paraksï míteni náksï xáni ióni nobiueua?
13 ¿Náksï xáni tiempu jatsiski para mítperani? Enga nema sóntku uéjka úni ambe ma, tátsekua no sési nikusïndi (Prov. 21:5). Ísïisti, uétarhisïndi tiempu para sési míteni máteru kʼuiripuni. Joperu no uétarhisïndi ióndani úni ambe ma, jimboka Biblia uandasïnga: “Enga no niárani jarhajka úkuarhini ambe enga ma erokuarhini jarhajka, mintsita no sési pʼikuarherasïndi” (Prov. 13:12). Ístu engajtsï sánderu ióni nobiueska, sánderu úkua jukaati pʼíngukuarhini paraksï no ísku jándikua ambe niátani (1 Kor. 7:9). Asï masi arhi eratseni na engari xáni ióni páni jakaia nobiuni, sánderu sési kurhamarhikuarhi: “¿Ambeteruni jatsiski parani míteni ima kʼuiripueri ambe parani erakunia ambe engani uaaka?”.
¿NÉNAKSÏ UAA MÁTERUECHA JARHUATANI NOBIUECHANI?
14. ¿Ambe ka ambechi uaa úni parachi úni jarhuataani nobiuechani?
14 Engachi míteka eska nema kámasïngia nobiuni o nobiani, ¿nénachi uaa jarhuatani? Jamberichi uaaka pʼímarhiani parachi tʼireni sáni, májku k’éri jatsini familieri jorhenguarhikua o nirani sáni nani (Rom. 12:13). Ísïksï imeecha uaati sánderu sési mítperani. Enga uétarhiaka, uaakachi nirani pámbetaani nani o eskaksï juuaka kʼumanchikuarhu paraksï úni sáni uandontskuarheni ka ísïksï no imeechajku jarhani (Gal. 6:10). Alicia engachi párrafu 7 jimbo uandaka, uandasïndi: “Albert ka ji kánikuachi agradeserikuasïreenga erachiichani engajtsïni arhienga eskachi úpiringa pʼorhembiani na engachi jatini uékapiringa parachi márku jarhani ka parachi no xáni juchajku jarhani”. ¿Ka engajtsïni nobiuecha arhiska parachi imeecha jingoni jarhani ma ratu? Ju je tsípikua jingoni jarhuataani, joperu ístu uétarhiati eskachi íntsauaka tiempu paraksï imeecha uandontskuarheni imeeri ambe enga jukaparhakueka, ka nájkirukachi jurajkuauaka sáni, no arhikuekasïndi eskachi méntku jurapkuauaka (Filip. 2:4).
Engachi míteska eska nema kámasïnga nobiuni o nobiani, ju je exeni nénachi uaa jarhuataani. (Exea párrafuechani 14 ka 15).
15. ¿Ambeteruchi uaa úni parachi jarhuataani nobiuechani? (Proverbios 12:18).
15 Máteru ambe engachi uaaka úni parachi jarhuataani nobiuechani jindeesti eskachi jatsiska para jingontku jámani jimbokachi úpiringa jukari uandani. Ménisï uétarhiati eskachi pʼímukukuarhiaka (arhinta Proverbios 12:18). Pori ejemplu, jamberichi ménisï xáni tsípini jauaka engachi uékaaka aianguani máteruechani eska nema kámasïngia nobiu o nobiani, joperu sánderu sésiuati eskaksï imeecha uandantaaka. Nóchi jatsiska para uandatsiani jarhani ni arhinchani jarhani imeechani (Prov. 20:19; Rom. 14:10; 1 Tes. 4:11). Ístuchi no jatsiska para kurhamarhiani jarhani ni arhiani jarhani eskaksï imeecha meru tembuperaaka. Pirenchi ma enga Elisa arhinhajka ka imeeri uámba, uandantasïndiksï: “Jucha no káni sési pʼikuarherasïreenga engajtsïni nema kurhamarhipiringa ambechi úxapi para juchaari boda ka jini jucha nótkini jamberi uandontskuarheni jarhani indeeri ambe”.
16. ¿Ambechi uaa úni engachi míteska eska nema nóteru kámasïngia nobiuni o nobiani?
16 Ka engachi míteska eska nema nóteru kámasïngia nobiuni o nobiani, nóchi jatsiska para jámani jarhani kurhanguarhini andiksïsï nóteru nobiueia, nijtuchi jatsi para sánderu kuájpini nemani (1 Ped. 4:15). Pirenchi ma enga Lea arhinhajka, uandasïndi: “Engani mítepka eskajtsïni máteruecha uénaspka uandatsini andisïni nóteruni kámeenia nobiuni, kánikua no sési pʼikuarheraspka”. Eskachi na exekia, enga nema nóteru kámani jarhajkia nobiuni o nobiani, no arhikuekasïndi eska ambe ma no sési uéraska, sánderu sési, arhikuekasïndi eskaksï ambakiti ambe erakuska úni. Joperuksï kʼóru niáraati no sési p’ikuarherani ka jandiajku. Ísï jimbo, jatsiskachi para jingontku jarhani parachi jarhuataani (Prov. 17:17).
17. ¿Ambeksï jatsiski para seguiriini jarhani úni nobiuecha?
17 Eskachi na exekia, ménisï úkua jukasïndi enga nema nobiuni o nobiani kámani jarhajka, joperu ístu ambe máesti enga kánikua sési jásï ambeeka. Jessica uandantasïndi: “Paraksïni mátirku aianguni, nobiuni kámani o nobiani, uétarhisïndi kánikua tiempu úrani ka ístu kánikua jánguarhintani. Joperu inde ambekini meru kánikua jarhuatasïndi”. Enga t’u nobiuni o nobiani kámani jaka, seguiriini ja kánikua jánguarhintani sési míteni imani kʼuiripuni. Engari ísï úska, kánikuakeni sési nicheati parakari ambakiti ambe erakuaka úni.
PIREKUA 49 Ju je tsíperani Jeobaeri mintsitani
a Mójtakurhistiksï máru nombriicha.
b Exeantauakari máteru kurhamarhikuechani librurhu Lo que los jóvenes preguntan. Respuestas prácticas (volumen 2), kapitulu “¿Será esta la persona para mí?”, pájina 39 ka 40.
c Enga nema pʼajchukuaka máteru kʼuiripuni, ísku jándikua ambeesti ka kúnguarhikuarhu anapu orhejtsïkutiichaksï jatsisti para komite judisiali ma úkuni. P’arhini chichicharhu o ísku jándikua ambeeri uandontskuarheni mensaji o telefonu jimbo, ístu orhejtsïkutiichaksï úpirindi komite judisiali ma úni.
d Exentaakari sánderu informasioni partirhu “Preguntas de los lectores”, enga uéraka rebistarhu La Atalaya 15 de agostu de 1999.