SEMANA 21
PIREKUA 107 Jeobajtsïni jorhendasïndi uékpini
Nénari uaa míteni né jingoni tembuchani o uambuchani
“¿Né uá exentani ambakiti témbani ma? Sánderu jukaparhasti ka eskaksï koralicha” (PROV. 31:10).
AMBE ENGACHI JORHENGUARHIAKA
Exeni jauakachi Bibliarhu anapu prinsipiuechani engaksï marhuajka para ma úni exeni né jingoni tembuchani o uambuchani ka ístu nénaksï uaa máteru erachiicha jarhuataani.
1, 2. a) ¿Enga nema eratseni jaka tembuchani ambe jatsiski para eratsentani? b) ¿Ambe arhikuekasïni nobiueni? (Ístu exe je “Jukaparhakua ambe”).
¿UÉKAPIRINDI tembuchani o uambuchani? Uánikua erachiicha ka pirenchiicha engaksï mámaru jatiriika uékasïndiksï tembuchani o uambuchani, peru paraksï tsípikua jingoni irekani no uétarhisïndi eska ma meru tembuchatini o uambuchatini jauaka. Joperu ante deri eratseni indeni ambe úni jatsiskari para exeni sindi sési jarhaski Tata Diosïni jingoni, jatsindi sentabu ka sésiri eratsetini jarhani ambe engari uéjka úni (1 Kor. 7:36). a Ísïkeni sánderu sési nicheati temungurhirikuarhu.
2 Joperu no méntkisï fásiliisïndi exentani né jingoni tembuchani o uambuchani (Prov. 31:10). Ka nájkirukari exentakia nemani engari tsitipiringa sánderu míteni, jamberi no fásiliuati parajtsï ueenani nobiueni. b Ini jorhenguarhikua jimbochi exeni jauaka ambe uaa jarhuataani tumbiichani paraksï exeni né jingoni tembuchani ka únksï ueenani nobiueni. Ístuchi uandani jauaka néna engaksï uaaka jarhuataani iámu kúnguarhikuarhu anapuecha imeechani engaksï uékani jakaia tembuchani.
AMBEKINI UAA JARHUATANI PARARI AMBAKITI KʼUIRIPUNI MA EXENTANI
3. ¿Amberi jatsiski parari eratsentani ante deri jirinhani imani kʼuiripuni engari jingoni tembuchaaka?
3 Ante deri nemani jingoni nobiueni, jukaparhakuesti eskari exeaka na enga jásïiuaka ima kʼuiripu engari jingoni uéjka tembuchani o uambuchani. Engari no ísï úska, jamberiri úpiringa no kasu úni imani kʼuiripuni enga sési jaka para tʼu o nobiu úkuarhini imani jingoni enga no káni sési jaka para tʼu. Ísïisti uétarhisïndi eska ima kʼuiripu Testigueuaka (1 Kor. 7:39). Peru inde ambe no arhikuekasïndi eska né uéjkini enga itsï atakuarhitini jakaia sési jauaka para tʼu. Sési japirindi eskari kurhamarhikuarhipiringa: “¿Ambe uékasïni úni juchiiti tsípikua jingoni? ¿Na járhati kualidadichani uékasïni eska jatsiauaka ima kʼuiripu engani jingoni uéjka tembuchani o uambuchani? ¿Sési jarhaski ambe engani erokuarhijka ima kʼuiripueri?”.
4. ¿Ambe máteru ambeksï kurhajkuarhisïni tumbiicha imeeri kómarhikuecharhu?
4 Engari uéjka tembuchani, jamberiri aiangukia Tata Diosï Jeobani indeeri ambe (Filip. 4:6). Ísïisti, Tata Diosï Jeobajtsïni no aiachisïndi eskajtsïni jirinhachiaka nemani. Joperu ima uékasïndi míteni na engari pʼikuarherajka ka ambe engari uétarhinchajka, ka uaatikeni jarhuatani parari exentani imani kʼuiripuni engari uéjka. Ísï jimbo seguirii aianguni imeeri ambe engari uéjka ka na engari pʼikuarherajka (Sal. 62:8). Kurhaku tekaantskua ka jánhaskakua (Sant. 1:5). John c Estados Unidos anapu ma erachi enga tumbiika uandasïndi ambe enga kurhajkuarhijka kómarhikuecharhu: “Uandontskuarhekusïnga Tata Diosï Jeobani imani kualidadicheeri engani jirinhajka pirenchiiri ma. Kurhakusïnga eskani ménisï uaaka míteni nemani. Ístuni kurhakusïnga eskani uaaka jatsiani kualidadichani parani úni ambakiti uámba máeni”. Pirenchi ma enga Sri Lanka anapueka ka enga Tanya arhinhajka uandasïndi: “Kurhakusïnga Tata Diosï Jeobani eskarini jarhuataaka parani sési marhuakuni, sési exeni ambe ma ka tsípini jarhani engani jamberi exentaaka imani erachi enga sési jauaka para ji”. ¿Ka enga nitamaska tiempu ka útasïri nótki nemani exentani jarhani? Tata Diosï Jeobakini aiachisïndi eskakeni íntskuaka iámindu ambe engari xáni uétarhinchaaka ka ístu eskari uaaka tsípikua jingoni jámani (Sal. 55:22).
5. ¿Ambe jarhuataua tumbiichani paraksï míteani máteruechani engaksï xénchajka Tata Diosï Jeobani? (1 Korintu 15:58).
5 Bibliajtsïni arhisïndi “méntku ánchikuarhikuni ja je Tatani” (arhinta 1 Korintu 15:58). Engari úska ambe enga uandajka i konseju, uaakari arhutani tiempu para jarhani erachiicha ka pirenchiicha jingoni. Ka ísï nóri solu uaaka jatsiani ambarhati amiguechani, sino ísturi uaaka míteani máteru tumbiichani engaksï ístu jánguarhintani jaka sési marhuakuni Tata Diosï Jeobani. Ístu, jimbokari jánguarhintani jauaka úni ambe ma para sési marhuakuni Tata Diosï Jeobani méntkisïri sési pʼikuarheraaka.
Engari seguiriini jauaka sési marhuakuni Tata Diosï Jeobani, niáraakari uánikua erachiichani o pirenchiichani míteani, ka jamberiksï imajtu uéjti tembuchani o uambuchani. (Exe párrafu 5).
6. ¿Ambeksï jatsiski para miáni tumbiicha engaksï jirinhani jaka néni jingoni tembuchani?
6 Joperu asï jurajku eska sánderu jukaparhakueuaka jirinhani jámani jarhani né jingoni tembuchani (Filip. 1:10). Ambe enga újka eska kristianu ma sési jimbo tsípiaka, jindeesti Tata Diosï Jeobaeri amigueni ka no jandiajku jarhani o tembuchatini jarhani (Mat. 5:3). Engari tumbijka sánderu fásiliisïndi eskari jatsiaka tiempu para sánderu sési marhuakuni Tata Diosï Jeobani (1 Kor. 7:32, 33). Ísï jimbo engari tumbiika sési úra chiiti tiempuni. Jessica, enga Estados Unidos anapueka ka enga sáno kuarenta uéxurhini jatiri uambuchapka, uandasïndi: “Nájkirukani uékeenga uambuchani ambe engareni jarhuatapka parani méntkisï sési pʼikuarherani, jindeespti aianhpini”.
ORHETA SÉSI MÍTI NA ENGA JÁSÏ KʼUIRIPU MÁEKA
7. ¿Andisï sési jaki eskari eratsentaaka ka eskari sési exeaka na jásï kʼuiripu máeski ima engari tsitijka ante deri arhini ambe engari p’ikuarherajka? (Proverbios 13:16).
7 Ka engari exentakia nemani engari jingoni uaaka tembuchani o uambuchani, ¿jatsipirindi para sóntku nirani arhini ambe engari pʼikuarherajka imani jimbo? Biblia arhisïndi eska kʼuiripu jánhaskati ma orheta jatsisïnga para sési eratsekuni ka jiáni úni ambe ma (arhinta Proverbios 13:16). Ísï jimbo, sánderu sési jauati eskari ma tiempu jánguarhintaaka sési exeni na enga jásï kʼuiripu máeka ka tátsekuari arhini ambe engari p’ikuarherajka imani jimbo. Erachi ma enga Países Bajos anapueka ka enga Albet arhinhajka, uandasïndi: “Ísï eska ma na sóntku niárajka pʼikuarherani ambe ma, máteruni jimbo, ístu uaati sóntku kéndikuni. Ísï jimbo, sánderu sésiisti eskari úraaka tiempu parari sési exeni na jásï kʼuiripu máeski ka nóri sóntku jámani nobiani ma jatsini nomasi imani ambe jimbo engari pʼikuarherajka”. Engari iátsitakuarhu exeska nemani, jamberiri uaaka sánderu sési eratsentani ka exeni eska ima no jindeeska para tʼu.
8. Tumbi ma o uátsï ma enga uékani jaka sánderu míteni nemani, ¿néna uaa exeni na jásï kʼuiripueski?
8 Jamberiri kurhamarhikuarhiaka: ¿Néna uaa exeni na enga jásï kʼuiripu máeka joperu eska no kuenta íntskukuarheaka? Pori ejemplu, Kʼumanchikua Reinuerirhu o reunioni sosialirhu ma uaakari exeni na enga jásïika, ambe enga újka o sini sési marhuakuxaki Tata Diosïni. ¿Na járhati amiguechani jatsiaski? ¿Ambeeriksï uandontskuarhesïni? (Luk. 6:45). ¿Májku jásï meteechani jatsiaski eska tʼu? Jamberiri uaaka uandontskuarhekuani imeeri kúnguarhikuarhu anapu orhejtsïkutiichani o máteru erachiichani engaksï sési míteka imani parari úni sánderu míteni imeeri ambe (Prov. 20:18). Úpiringari kurhamarhiani na mítekateeski ka na jásï kualidadichani jatsiaski (Rut 2:11). Joperu engari jámani jauaka exeni na enga jásï kʼuiripu máeuaka jánguarhinta no no sési pʼikuastani nijtu uékani iámu ambe míteni ka no ísï pʼikuastani eskari imantku chúxapani jámaxaka.
Ante deri arhini nemani ambe engari pʼikuarherajka imani jimbo, orheta exe na enga jásï kʼuiripu máeka (Exea párrafuechani 7 ka 8).
9. Ante deri arhini nemani ambe engari pʼikuarherajka imani jimbo ¿ambeeriri jatsiski para seguru jarhani?
9 Jiájkani, ¿nári jatini uaaia arhini ambe engari pʼikuarherajka imani jimbo? Engari jukari sóntku arhiska, jamberi eratseati eskari jukari sóntku uékasïnga ambe ma (Prov. 29:20). Ka engari jukari ióndaaka arhini, jamberi ima eratseati eskari no míteska ambe engari uéjka (Ecl. 11:4). Miá eska parari arhini nemani ambe engari pʼikuarherajka imani jimbo nóri jatsiska para eratseni eskari meru imani jingoni tembuchaaka. Joperu jatsiskari para seguru jarhani eskari listu jarhaskia parari tembuchani ka eska jamberi ima kʼuiripueska engari t’u jirinhani jaka.
10. ¿Amberi jatsiski para úni engari exeska eskakeni nema tsitisïnga joperuri t’u no májkueni pʼikuarherani imani jimbo?
10 Ka engari exejka eskakeni nema tsitisïnga, ¿amberi uaa úni? Engari no májkueni ambe pʼikuarherajka eska ima, jánguarhinta úkuecha jingoni xarhatakuni eskari tʼu no tsitisïnga. Jimboka kánikua no sési japiringa jurajkuni eska nema pʼikuarherani japiringa ambe ma tʼungini jimbo ka tʼu no májkueni pʼikuarherani imani jimbo (1 Kor. 10:24; Éfes. 4:25).
11. Imani lugariicha jimbo engaksï erakukuajka tumbiichani né jingonksï tembuperani, ¿ambe uétarhisïni miáni jarhani?
11 Máru lugariicha jimbo taatiicha o máteru familiarichaksï arhisïndi tumbini o uátsïni né jingoni tembuchaa o uambuchaa. Ka máteru lugariicha jimbo, amiguecha o familiarichaksï jirinhakusïndi nemani ka tátsekuaksï eratsesïndi ambe engaksï uaaka úni parakaksï imeecha mítperaaka ka exenksï sinksï uaa terukutani o nómbe. Engajtsïni nema kurhacheska jarhuajperata, ju je exeni ambe engaksï uéjka ka ambe engaksï uétarhinchajka i tsimani kʼuiripuecha. Engachi eratsejka eskachi ambakiti kʼuiripuni ma exentaskia para juchaari amigu o familiarhu anapu ma, ju je jánguarhintani xáni eskachi xáni uaaka parachi míteni na enga jásïika, na enga járhati kualidadiichani jatsiaka ka sini jukaparharasïni Tata Diosïiri ambe. Ambe enga sánderu jukaparhakueka jindeesti eska sési jásï pájperakua ma jatsiaka Tata Diosï Jeoba jingoni ka no sentabu ambe, na enga xáni estudiariika o sini jatsikuarheriiski. Ambe uéjki úkuarhini, nóchi jatsiska para mirikurhini eska tumbi ka uátsïsï jatsika para erakuni sini tembuchaa nemani jingoni o nómbe (Gal. 6:5).
NÉNA UEENANI NOBIU ÚKUARHINI
12. Engari uéjka nemani jingoni nobiu úkuarhini, ¿nénari uaa indeni ambe arhini?
12 Engari uéjka nemani jingoni nobiu úkuarhini, ¿nénari uaa arhini indeni ambe? d Jamberiri uaaka uandontskuarheni imani jingoni jimeesïsï enga uánikua janhaaka, telefonu jimbo o ístu bideuiamada jimbo. Mátirku arhi eskari tsitisïnga imani ka eskari uékapiringa sánderu míteni (1 Kor. 14:9). Engakeni arhiska eska uékasïnga sánderu sési eratseni, íntsku tiempu (Prov. 15:28). Ka engakeni arhiska eska no ma ambe uékasïnga, respetari ambe enga eratsejka.
13. ¿Amberi uaa úni engakeni nema arhiaka eskakeni tsitisïnga? (Kolosasi 4:6).
13 ¿Amberi uaa úni engakeni nema arhiaka eskakeni tsitisïnga? Miá eska ima balori uétarhinchaska parakeni arhini ambe enga pʼikuarherajka tʼungini jimbo, ísï jimbo sési mókukunta ka respetu jingoni (arhinta Kolosasi 4:6). Ka engari exejka eskari tiempu uétarhinchasïnga parari sési eratsentani uaakari arhini eskakeni íntskuaka tiempu. Joperu jánguarhinta no xáni ióndani aianguni (Prov. 13:12). Ka engari no ma ambe uéjka imani jingoni, jánguarhinta sési erakuani uandakuechani parari arhini eska nómbe. Australia anapu ma erachi enga Hans arhinhajka, uandantasïndi ambe enga úpka enga pirenchi ma arhipka eska uékasïreenga sánderu sési míteni: “Jánguarhintaspka sési exeni néna arhini eskani no ma ambe uékasïreenga imani jingoni. Jánguarhintaspka sóntku ísï úni paraka ima no seguiriini japiringa pʼikuarherani ambe ma jíndeni jimbo. Ka jiáni uératini jánguarhintaspka xéparini jámani ka exeni ambe engani arhipiringa”. Joperu, engari uékani jaka nobiueni nemani jingoni, uandontskuarhi imani jingoni ka arhi ambe engari pʼikuarherajka, ístu ambe engari erokuarhijka engajtsï na nobiu úkuarhiakia, jimbokajtsï jamberi no májkueni járhati pʼindekuechani jatsiaka.
¿NÉNACHI UAA JARHUATAANI TUMBIICHANI?
14. ¿Engachi uéjka jarhuataani tumbiichani ambechi jatsiski para úni?
14 ¿Ambechi jatsiski para úni iáminduecha parachi jarhuataani tumbiichani engaksï uékani jaka tembuchani? Orheta, jatsiskachi para jingontku jámani imani ambe jingoni engachi uandaaka (Éfes. 4:29). Ju je kurhamarhikuarhini: “¿Mámaru ambe arhiani jarhasïni imeechani engaksï uéjka tembuchani? Engani exejka tumbini ma ka uátsïni ma uandontskuarheni jarhani, ¿jirejiresï eratsesïni eskaksï nobiueska?” (1 Tim. 5:13). Joperu ístu, ju je no no sési pʼikuastani erachini nomasi jimboka ima no tembuchatixaka. Hans, engachi antesi uandaka, uandasïndi: “Máru erachiichaksï uandasïndi, ‘¿Andiresï nótki tembuchajki? Nóteruri xáni sapichueskia, tátsekuari nóteru tembuchaakia’. Ini járhati uandakuechaksï úsïndi eska tumbi ma no sési pʼikuarheraaka ka eska ísï pʼikuarheraaka eska no xáni jukaparhakueska ka ísï sánderu kókuani uékania tembuchani”. Ísï jimbo, sánderu sési jarhasti eskachi jirinhakuntaaka na jatini arhini ambe ma parachi sési pʼikuastani (1 Tes. 5:11).
15. a) Eska na uandajka Roma 15:2, ¿ambechi jatsiski para miáni ante de jarhuatani nemani para ima míteni máteru nemani? (Ístu exe je imajenini). b) ¿Ambejtsï sánderu tsitiski imeeri ambe enga bideurhu uandajka? (Ístu exe je notani).
15 Ka engachi eratseska eska erachi ma ka pirenchi ma márkuksï sési xarharapiringa, ¿sési jarhaski ísï eratseni? Biblia uandasïndi eskachi jatsiska para exeni na enga pʼikuarherajka mándani kʼuiripu (arhinta Roma 15:2). Uánikua tumbiichaksï no uékasïndi eska nema mítetarauaka nemani, ka jatsiskachi para respetariini ambe engaksï uékajka (2 Tes. 3:11). Joperu máteruechaksï uékasïndi eskaksï jarhuatanhaaka sáni, peru soluchi jatsiska para ísï úni jiáni engajtsïni imeecha arhiaka (Prov. 3:27). e Ka máteruechaksï uékasïndi eskaksï jarhuatauaka joperu sánkisï. Alemania anapu pirenchi ma enga Lydia arhinhajka uandasïndi: “Uaakari kʼéri grupu ma úni ka inchaatani imani erachini ka pirenchini parakaksï mítperaaka. Ísïiri uaaka jarhuataani ka máteru ambe imeechani jurajkukua”.
Reunioni sosiali ma jimbo, tumbiicha ka uátsïichaksï úsïndi uandontskuarheni. (Exe párrafu 15).
16. ¿Ambeksï jatsiski para miáni tumbiicha?
16 Engari tembuchatini jaka o nómbe, iáminduechachi uaaka sési irekuarhini ka tsípikua jingoni (Sal. 128:1). Ísï jimbo, engari uékani jaka tembuchani joperuri nótki exentani jarhani néni jingoni, seguirii sési marhuakuni jarhani Tata Diosï Jeobani. Macao anapu ma pirenchi enga Sin Yi arhinhajka uandasïndi: “Engari eratsentaska na engari xáni ióni irekaaka chiiti acheeti o uarhiiti jingoni Paraisurhu, jarhuatasïndikini exeni eska iáiasï no ma ambeeska no tembuchatini jarhani o uambuchatini jarhani. Ísï jimbo, sési úra indeni tiempuni ka tsípikuarhi”. Joperu, ¿engari exentakia nemani ka nobiuentsïia? Máteru jorhenguarhikua jimbochi exeni jauaka ambejtsï uaa úni parakaksïni sési nicheaka.
PIREKUA 137 Juchari pirenchicha
a Kánikuakeni marhuacheati arhintani artikuluni enga jw.org jimbo jaka, “Ser novios. Parte 1: ¿Estoy listo para salir con alguien?”.
b JUKAPARHAKUA AMBE: Ini jorhenguarhikua jimbo ka máteru jimbo, enga uandajka nobiueni, imani tiempunisï arhikuekajti enga tumbi ma ka uátsï ma sánderu sési mítperani jarhajka paraksï exeni sinksï uaa sési pájperani temungurhirikuarhu. Ka jiánksï ueenasïndi nobiueni, enga tumbi ma ka uátsï ma arhijperajka eskaksï tsitijperasïnga ka jiáni jamberiksï nobiuesïndi astaka tumbi kurhajkuarhiaka uátsïni paraksï tembuperani o asta jiáni jamberi engaksï uandaakia eskaksï nóteru uékasïngia nobiueni. Máru lugariicha jimbo, indeni tiempunksï ísï arhisïndi: mítperani jarhani, nobiu úkuarhini, nema jingoni uérani, nobiuecheni o nema jingoni jámani.
c Mójtakurhistiksï máru nombriicha.
d Máru lugariicha jimbo, tumbisï ueenajti uandontskuarhekuni uátsïni. Joperu ístu sési jarhasti enga uátsï ueenaaka uandontskuarhekuni tumbini (Rut 3:1-13). Uaakari exentani sánderu informasioni artikulurhu “¿Cómo le digo lo que siento por él?”, rebistarhu ¡Despertad!, 22 de oktubri de 2004.