1. ¿Ambechi jorhenguarhiski tánguarhikua 2023 anapu jimbo enga mándani uéxurhini úkuarhijka?

 TÁNGUARHIKUARHU 2023 anapu enga mándani uéxurhini úkuarhijka, ambakiti ambechi aiangunhaspka. a Indeni tánguarhikua jimbo sésijtsïni aianguspti ima ambeeri engachi antesi jakajkuenga ka ístu uandanhaspti máru anunsiuecha enga aianhpikueri ambeepka. Pori ejemplu, aiangusptijtsïni eskaksï jamberi máru kʼuiripuecha Tata Diosï Jeoba jingoni úkuarhiaka enga na kʼamajkunhaakia K’éri Babilonia. Ístujtsïni arhispti eska nobiembrini 2023 uératini nóteruchi jatsipiringia para iámindu ambe jatsikuni ambe engachi xáni újka aianhpikuarhu. ¿Arhikuekasïni i ambe eska aianhperakua nóteru xáni jukaparhakueskia ka eska nóteru uétarhisïngia jánguarhintani ísï eska antesi? ¡Nómbe!

2. ¿Andisï uétarhijki eskachi pauani pauani sánderu jánguarhintaaka aianhpini? (Markusï 13:10).

² Pauani pauani uétarhisïndi eskachi sánderu jánguarhintaaka aianhpini. ¿Andi? Jimboka tiempu nóteru kánikua pakaraxakaia. Ísï eska na arhijka Markusï 13:10 (arhinta je), ju je eratsentani ambe enga Jesúsi uandapka eska úkuarhipiringa aianhpikua jingoni últimu jurhiatikuecha jimbo. Ka ístu ísï eska na arhijka Mateu jimbo, Jesúsi uandaspti eska ambakiti aianhperakua aianhpinhapiringa iápurisï ante de ‘kʼamajkunhani parhakpini’ (Mat. 24:14). I uandakua arhikuekasïndi eska mátirku kʼamajkunhaaka Satanásiiri parhakpini. Tata Diosï Jeoba exerixatiia “na jatini ka na jandora úkuarhia” ambe enga uandarini jakaia (Mat. 24:36; 25:13; Úku. 1:7). Pauani pauani enga nitamajka sánderu axuterku jarhastia para kʼamajkunhani iámu ambe (Rom. 13:11). Joperu enga jamberi niáraaka ima jurhiatikua, jatsiskachi para seguiriini aianhpini.

3. ¿Andichisï aianhpijki?

 ³ Jarhasti ambe ma enga kánikua jukaparhakueka engachi iáminduecha jatsika para kurhamarhikuarhini: ¿Andichisï aianhpijki ambakiti aianhperakuani? Xénchperakua jimbochisï ísï újka. Engachi aianhpijka xarhatasïngachi eskachi jukaparharasïnga ambakiti aianhperakuani, eskachi xénchaasïnga kʼuiripuechani, joperu ístu eskachi kánikua xénchasïnga Tata Diosï Jeobani ka imeeri nombrini. Ini ambechi exeni jauaka.

AIANHPISÏNGACHI JIMBOKACHI JUKAPARHARASÏNGA AMBAKITI AIANHPERAKUANI

4. ¿Ambechi úsïni engachi ambakiti notisia ma aiangunhajka?

⁴ Jánguarhinta je miántani na jatini últimuespi engaksïni nema aiangupka ambakiti notisia ma. Jamberiksïni arhipti eska familiari ma kánguarhispka charhakuni ma o eska exentaska ánchikuarhita ma enga ióni páni japkia jirinhani. ¿Nájtsï pʼikuarheraspi? Kánikuajtsï tsípini japka ka uékantsï jarhania aianguani chaari parientichani ka amiguechani. Sáno májkuentsï pʼikuarherapka jiáni engajtsï kurhaapka sánderu ambakiti aianhperakuani, jo, jiáni engajtsï ueenapka kurhaani ambakiti aianhperakua Tata Diosïiri Reinueri ambe, ¿a no?

5. ¿Nénajtsï pʼikuarheraspi engajtsï ueenani japka jorhenguarhini Biblieri ambe?

⁵ Ístu miánta je na engajtsï pʼikuarherapka engajtsï jorhenguarhini japka Biblieri ambe. Jorhenguarhispkajtsï eskaksïni Tata Diosï Jeoba xénchasïnga, eska uékasïnga eskajtsï imeeri familia jingoni kuenta úkuarhiaka, eskaksïni ima aiachixaka eska kʼamajkuaka iámindu imani ambe jingoni engaksïni no sési pʼikuastajka, ka eska jimbanhi parhakpinirhu tsítantauaka juchaari familiariichani engaksï uarhikia (Mar. 10:29, 30; Juanu 5:28, 29; Rom. 8:38, 39; Apok. 21:3, 4). Iámindu i ambeksïni mintsitarhu niárachespti (Luk. 24:32). Niáraspkajtsï kánikua jukaparharani ambakiti ambe engajtsï jorhenguarhini japka ka uékaxapkajtsïa iáminduechani aianguani (terukutanta je Jeremías 20:9 jingoni).

6. ¿Ambeksïni jorhendasïni Ernest ka Roseeri eksperiensia?

⁶ Ju je exeni ambe enga nitamakuarhipka erachi ma enga Ernest arhinhajka. b Ima uandantasïndi eska jiáni enga 10 jatiriipka imeeri taati jémba uarhispka. Uandantasïndi: “Kurhamarhikuarhisïreenga:  ‘¿Auandarhu niki, o ambe úkuarhia imani jingoni?’. No sési pʼikuarherasïreenga engani exeauenga máteru sapiichani engaksï káuenga imeeri taati jémbeechani”. I erachi kasi pauani pauani nirasïreendi panteonirhu, tinguixurhisïreendi jima engaksï taati jémbani jatsintapka ka kómarhisïreendi: “Jimboetakua Tata Diosï, uékasïnga míteni nani jarhaski papa”. Jiáni enga ima, ma 27 jatiriipka arhisptiksï eskaksï jorhendapiringa Biblieri ambe ka ima uékaspti. Kánikua tsípispti enga mítepka eskaksï uarhiriicha no ma ambe mítesïnga, eskaksï ísï jarhasïnga enajkiksï uinhamu kʼuíni jarhajki ka eska Biblia aiatspesïnga eska jauaka tsíntskua ma (Ecl. 9:5, 10; Úku. 24:15). Iásï kʼóru mítesptia ambe enga xáni ióni kurhamarhikuarhipka. Kánikua joperu kánikua tsípixapti imani ambe jimbo enga Bibliarhu jorhenguarhini japka. Imeeri uarhiiti Rose ístu ueenaspti jorhenguarhini imani jingoni ka kánikua tsípixapti imani ambe jimbo enga jorhenguarhini japka. Ísï tátsekua, 1978 jimbo tsimarhanksï itsï atakuarhispti. Uékaxaptiksïa aianguani ambe engaksï jorhenguarhini japka imeeri parientiichani, imeeri amiguechani ka iámindu imeechani engaksï uékapiringa kurhajchaani. Ka kánikua sési nikuaspti, jimboka Ernest ka Rose úsptiksï jarhuataani jukari 70 kʼuiripuechani paraksï míteni Tata Diosï Jeobani ka itsï atakuarhinksï.

7. ¿Ambechi uaa engachi mintsita jingoni jukaparharaska indeni ambe enga Biblia jorhentpijka? (Lukasï 6:45).

⁷ Engachi mintsita jingoni jukaparharaska indeni ambe enga Biblia jorhentpijka, tsípikua jingonchi uékaaka aianguani kʼuiripuechani (arhinta je Lukasï 6:45). Ísïchi pʼikuarherasïnga eskaksï primeru siglurhu anapu Jesúsiiri chúxapatiicha engaksï uandapka: “Jucha no uaaka no uandantani ima ambeeri engachi exekuarhika ka engachi kurhaaka” (Úku. 4:20). Niárasïngachi xáni jukaparharani jurhimbikua ambe engachi uéjka aianguani iámindu kʼuiripuechani.

AIANHPISÏNGACHI JIMBOKACHI XÉNCHAASÏNGA KʼUIRIPUECHANI

8. ¿Andichisï aianguajki kʼuiripuechani ambakiti aianhperakuani? (Exe je rekuadruni “ Xénchaa je kʼuiripuechani: Jarhuataa je Jesúsiiri chúxapatiini”; ístu exe je imajenini).

⁸ Májkueni eska Tata Diosï Jeoba ka Jesúsi, juchajtuchi xénchaasïnga kʼuiripuechani (Prov. 8:31; Juanu 3:16). Pʼamojkuasïngachi imeechani engaksï sési jimbo no míteka Tata Diosïni ka ístuksï no míteni eska ambakiti ambe úkuarhiaka sánderu orhepani (Éfes. 2:12). Kʼuiripu xáni uánikua uandanhiateechani jatsiasïndi enga méntku no jánhaskajka ambe úni, joperu juchachi uaaka jarhuataani engachi aianguaska ambakiti aianhperakua Tata Diosïiri Reinueri ambe. Xénchaasïngachi kʼuiripuechani ka ístuchi pʼamojkuasïnga jimbochisï kánikua jánguarhintajka aianguani ambakiti aianhperakuani. Jo, aianguasïngachi indeni ambe  enga uaaka sési pʼikuastaantani kʼuiripuechani ka jarhuataani paraksï tsípikua jingoni irekani ini jurhiatikuechani jimbo, ka sánderu orhepatini “tsípikua jatsini enga sési jimbo tsípikueka”, jo, irekani para méntkisï jimbanhi parhakpinirhu (1 Tim. 6:19).

9. ¿Ambechi aianguasïni kʼuiripuechani, ka andi? (Ezequiel 33:7, 8).

⁹ Xénchperakua ístujtsïni jarhuatasïndi parachi aianguani kʼuiripuechani eska no ióni jimbo parhakpini anapu ambe kʼamajkunhaaka (arhinta je Ezequiel 33:7, 8). Kánikuachi kómu pʼikuarherasïnga engachi exeajka kʼuiripuechani ka juchaari parientiichani engaksï no Testigueka ísïksï irekani jarhani enajki no ma ambe úkuarhia. Mateu 24:21 arhisïndi: “Imani jurhiatikuechani jimbo, kánikua no sési nitamakuarhinhaati. No méni ísï nitamakuarhinhaxapti desde enga kʼuiripu kueraanhaka ka nóteru méni ísï nitamakuarhinhaatia”. Uékasïngachi aianguani ambe enga úkuarhiaka jiáni enga Tata Diosï jusgarpiaka: orhetaksï kʼamajkunhaati iámindu relijioniicha engaksï no jurhimbitiika, ka tátsekua Armajedoni jimbo, kʼamajkunhaati iámu no sési jásï ambe enga xáni parhakpinirhu jaka (Apok. 16:14, 16; 17:16, 17; 19:11, 19, 20). Kurhakusïngachi Tata Diosï Jeobani eskaksï kʼuiripuecha jiókuarhiaka ambe engachi aianguajka ka eskaksï uékaaka juchantsïni jingoni marhuakuni imani. ¿Joperu ambeksï úkuarhinchaa ima kʼuiripuecha ka ístu juchaari familiariicha engaksï no jiókuarhini jaka iáiasï ambe engachi jucha aianguajka?

10. ¿Andisï jukaparhakue eskachi seguiriuaka jánguarhintani aianguani kʼuiripuechani?

¹⁰ Ísï eskachi na exekia máteru jorhenguarhikua jimbo, jamberi Tata Diosï Jeoba tsípiti pakatauati imeechani engaksï móantaaka jiáni engaksï exeaka na enga kʼamajkunhaaka K’éri Babilonia. I ambejtsïni jarhuatasïndi sánderu sési kurhanguni eska kánikua jukaparhakueska seguiriini jánguarhintani aianhpini. Ju je eratsentani ini ambe: ambe engachi iásï aianguaska kʼuiripuechani, imani ambeksïsï miántaati tátsekua (terukutanta je Ezequiel 33:33 jingoni). Jamberiksï niáraati miántani imani ambe engachi aianguapkia ka ístuksï niárani marhuakuni Tata Diosï Jeobani juchantsïni jingoni ante de nóteru jarhania tiempu. Ísï eska Filipusï anapu achamasï enga kárselirhu kuáriipka na jiáni jiókuarhipka jurhimbikuani enga k’éri ma jenchepka, jamberiksï ístu jauati kʼuiripuecha engaksï jiáni jiókuarhiaka jurhimbikuani engaksï na exeakia eska kʼamajkunhaskia K’éri Babilonia (Úku. 16:25-34).

AIANHPISÏNGACHI JIMBOKACHI XÉNCHASÏNGA TATA DIOSÏ JEOBANI KA IMEERI NOMBRINI

11. ¿Nénachi ‘kʼéri ambe arhisïni, kʼéri ambe exeni ka uinhapikua íntskuni’ Tata Diosï Jeobani? (Apokalipsisi 4:11; ístu exea je imajeniichani).

¹¹ Sánderu jukaparhakua ambe jimbo engachi aianhpijka ambakiti aianhperakua, jindeesti jimbokachi xénchasïnga Tata Diosï Jeobani ka imeeri pímbinhasï nombrini. Engachi aianhpijka, k’éri ambechi arhisïnga Tata Diosïni. Juchajtuchi uandasïnga eska Tata Diosï Jeobajkusï “jukanchaka  k’éri ambe arhinhani, kʼéri ambe exenhani ka uinhapikua intsïnhani” (arhinta je Apokalipsisi 4:11). ¿Nénachi k’éri ambe arhisïni ka k’éri ambe exeni? Jimbokachi aianguasïnga kʼuiripuechani ka exeraani pruebechani eska Tata Diosï Jeoba kueraaska iámindu ambe ka eskajtsïni ima íntskuska tsípikua. ¿Ka nénachi íntskusïni uinhapikua, indeni uinhapikuani engachi jucha jatsika? Íntskusïngachi juchaari uinhapikua engachi úrajka juchaari tiempu, juchaari tsípikuani ka ambe engachi jatsikuarheka para aianhpini na engachi xáni uaaka (Mat. 6:33; Luk. 13:24; Kol. 3:23). I ambe arhikuekasïndi eskachi tsitisïnga uandontskuarheni Tata Diosïiri ambe, imeeri engachi xáni xénchajka. Joperu ístu uékasïngachi uandontskuarheni imeeri nombriiri ambe ka ambe enga arhikuekajka. ¿Andi?

12. ¿Nénachi pímbinhajkuntasïni Tata Diosï Jeobaeri nombrini engachi aianhpini nirajka?

¹² Jimbokachi xénchasïnga Tata Diosï Jeobani, uékasïngachi pímbinhajkuntani imeeri nombrini (Mat. 6:9). I ambe arhikuekasïndi eskachi uékasïnga jarhuajpeni paraka kʼuiripu nóteru jakajkuakia imani chkuanderakua ambe enga Noambakiti uandaka Tata Diosï Jeobaeri ambe (Gén. 3:1-5; Job 2:4; Juanu 8:44). Ísï jimbo, engachi nirajka aianhpini, uékasïngachi kuájpini Tata Diosï Jeobani ka aianguani jurhimbikua ambe imeechani engajtsïni uéjka kurhajchani. Uékasïngachi eska iápuru parhakpini anapuecha míteaka eska imeeri kualidadi enga sánderu jukaparhakueka jindeeska xénchperakua, eska ambakiti juramuti máeska ka eska no ióni jimbo imeeri Reinu kʼamajkuaka kómu nitamakua ambe ka eskaksï iámindu kʼuiripuecha pínandikua jatsiaka ka tsípikua jingonksï irekani (Sal. 37:10, 11, 29; 1 Juanu 4:8). Engachi iámindu ini ambe úni jarhajka, pímbinhajkuntanchi jarhasïnga Tata Diosï Jeobaeri nombrini. Ístu, sésichi pʼikuarherasïnga jimbokachi mítesïnga eskachi úxaka juchaari ánchikuarhitani jimbokachi Jeobaeri testigueska. ¿Andichisï ísï uandajki?

13. ¿Andichisï sési pʼikuarherajki engachi ísï mítekateeka komueska Jeobaeri testiguecha? (Isaías 43:10-12).

¹³ Tata Diosï Jeobajtsïni juchantsïni erakusti parachi imeeri ‘testigueni’ (arhinta je Isaías 43: 10-12). Máru uéxurhini ísïistia enga Grupu enga Orhejtsïkuajka iámindu kúnguarhikuechani uandapka karta ma jimbo: “No jarhasti sánderu k’éri kóntperata ma eska jindeeni Jeobaeri testigu”. c Eranhaska je eska nema uandaska eskachi no sési ambe úska, ka jusgadurhuchi jarhaska. Ísï jimbo, uétarhinchasïngachi eskajtsïni nema kuájpiaka. ¿Nénchi erakupirini? Jamberichi imani kʼuiripuni arhipiringa engachi sési míteka ka enga mintsinharhikueka ka enga ambakiti kʼuiripu máeka paraka iámindu ambe jakajkuminhaaka. Májkueni, Tata Diosï Jeobajtsïni juchantsïni erakusti parachi uandantani eska imajkusï jindeeka Tata Diosï jurhimbiti, jimbokajtsïni sési míteska ka mintsinharhisïndijtsïni. Para jucha kʼéri kóntperata máesti ka sésichi pʼikuarherasïnga imeeri testigueni, jimbochisï jánguarhintajka mítetarpini imeeri nombrini ka jurhimbikua ambe aianguani kʼuiripuechani Tata Diosïiri ambe. Ka engachi ísï újka, xarhatani jarhasïngachi eskachi imeeri testigueska (Sal. 83:18; Rom. 10:13-15).

JIÁNI JAMBERICHI AIANHPIAKA ENGA JAMBERI KʼAMAJKUNHAAKA PARHAKPINI

14. ¿Ambe ambakiti ambe uaa úkuarhini sánderu orhepatini?

¹⁴ ¡Ambakiti ambechi erokuarhixaka! Erokuarhisïngachi eska Tata Diosï Jeobaeri jarhuajperata jimbo, útasïksï uánikua kʼuiripuecha jiókuarhiaka jurhimbikua ambe ante de ueenani kánikua no sési nitamakuarhinhani. Joperu ístuchi tsípisïnga míteni eska jiáni enga kánikua no sési nitamakuarhinhaaka, jauakaksï kʼuiripuecha engaksï jurajkuaka Satanásiiri parhakpinini ka k’éri ambeksï arhini Tata Diosï Jeobani juchantsïni jingoni (Úku. 13:48).

15, 16. ¿Ambechi seguiriini jaua úni, ka asta na jatini jamberi?

¹⁵ Kʼéri ánchikuarhitachi ma jatsiska para úni, aianhpini ambakiti aianhperakua Tata Diosïiri Reinueri ambe iámu Echerirhu ka i ánchikuarhita nóteru méni úkuarhiatia. Ka ístuchi jatsiska para seguiriini aianguani kʼuiripuechani eska no ióni jimbo kʼamajkunhaakia iámindu no sési jásï ambe enga parhakpinirhu jaka. Ka jiáni enga Tata Diosï ueenaakia jusgarpini, kʼuiripuechaksï kuenta íntskukuarheati eska Tata Diosï Jeobaeri ambeespka ambe engachi jucha aianhpienga (Ezeq. 38:23).

¹⁶ Jiájkani, ¿ambechi eratsetixaki úni? Jimbokachi kánikua jukaparharasïnga ambakiti aianhperakuani, xénchaani kʼuiripuechani ka sánderia Tata Diosï Jeobani ka imeeri nombrini, seguiriini jauakachi kánikua jánguarhintani ka tsípikua jingoni aianhpini astaka Tata Diosï Jeoba uandaaka: “¡Asteru aianhpia je!”.