1. ¿Ambe uétarhisïni úni kʼuiripu ma ante de uénani kʼumanchikua ma úni?

ERANHASKA JE eska nema eratsesïnga kʼumanchikua ma úni ka sési mítetixatiia na enga jásï ma uéjka. ¿Peru jirejiresï niua piáni ambe ka uénani úni kʼumanchikuani? Nómbe. Ante de uénani, jarhasti ambe ma enga jatsika para úni: exeni na enga xáni tumina úraaka para kʼumanchikuani úni. ¿Andi? Jimboka jatsiaka para exeni sini andangutaa tumina. Enga ini ambe úska, sánderu segurueuati eska uáka úni kʼumanchikuani.

2. Eska na arhijka Lukasʌ 14:28-30, ¿ambejtsï jatsiski para sési eratsentani ante dejtsï itsï atakuarhini?

² ¿Eratsexakijtsï itsï atakuarhini jimbokajtsï exesïnga eskajtsï xénchasïnga Jeobani ka jukaparharani iámindu ambe enga ima úka chánksïni jimbo? Enga ísïka, jatsiskajtsï para sáno májkueni ambe úni eska ima acheeti enga kʼumanchikua ma uéjka úni. ¿Andichisï ísï uandajki? Eratsi je ambe enga Jesusi uandapka ixú Lukasʌ 14:28-30 (arhinta je) jimbo. Jesusi uandaxapti ambe enga arhikuekajka imeri chúxapati máeni: jatsiskachi para úni ambe enga xáni uétarhiaka, i ambe arhikuekasïndi tekaantani engachi ménisï no sési nitamakuarhiaka ka ístu niárani jurajkuni máru ambe (Luk. 9:23-26; 12:51-53). Ísï jimbo, ante dejtsï itsï atakuarhini, jatsiskajtsï para sési eratsentani ambe enga xáni arhikuekajka Jesusiri chúxapatiini. Engajtsï ísï uáka, sánderujtsï sési marhuakuni jauaka Tata Diosïni engajtsï na itsï atakuarhiakia.

3. ¿Ambechi exea ini jorhenguarhikua jimbo?

³ Míteparini ambe enga xáni arhikuekajka itsï atakuarhini, ¿uétarhijki eska nema xáni jánguarhintaaka ísï úni? ¡Jo! Engajtsï itsï atakuarhiska, uákajtsï jatsiani uánikua kóntperatechani iásï ka sánderu orhepani. Ini jorhenguarhikua jimbo, exeuakachi máru kurhamarhikuechani engaksï itsï atakuarhikueri ambe uandajka. Ambe engajtsï mókuntaaka, jarhuataatiksïni exeni sintsï listu jarhaskia parajtsï ísï úni.

4. a) ¿Ambe arhikuekasïni aiakukuarheni Jeobani? b) ¿Ambe arhikuekasïni nóteru irekania para májkumindu eska na uandajka Mateu 16:24, TNM?

⁴ ¿Ambe arhikuekasïni aiakukuarheni Jeobani? Jindesti ambe ma enga nema újka ante de itsï atakuarhini. Aiakukuarheni, jindesti iámu mintsita jingoni kómarhini Jeobani eskajtsï cha marhuakuaka para méntkisï. Enga nema aiakukuarhejka Jeobani, nóteru irekasïndia para imajkumindu sino para Jeoba (arhinta je Mateu 16:24, TNM). Jiáni uératini, Jeobaerisïndia, inde ambe kʼéri kóntperata máesti (Rom. 14:8). Enga nema aiakukuarhejka Jeobani, arhisïndi eska jiáni uératini ambe enga sánderu jukaparhakueuaka, jindeuaka Jeobani marhuakuni ka no úni ambe enga ima kʼuiripu uéjka. Aiakukuarheni Tata Diosïni, kánikua jukaparhakua ambesti. Jeoba no afuersa uékasïndi eskachi ísï uáka, peru engachi na aiakukuarhejkia, ima erokuarhisïndi eskachi uáka ambe engachi aiakukia (Sal. 116:12, 14).

5. ¿Andisï no májkueni aiakukuarheni Jeobani ka itsï atakuarhini?

⁵ ¿Andisï no májkueni aiakukuarheni Jeobani ka itsï atakuarhini? Aiakukuarheni, ambe máesti engajtsï chájku mítejka ka Jeoba. Peru itsï atakuarhini, ambe máesti engajtsï uánikuechani japarini újka, sáno méntkisï jiáni úkuarhisïndi i ambe enga kʼéri tánguarhikua ma úkuarhijka. Jiáni engajtsï itsï atakuarhijka, xarhatasïngajtsï iáminduechani japarini eskajtsï aiakukuarheskia Jeobani. * Ojtsï xarhatakuani jarhasïnga máteruechani eskajtsï iámu mintsita, eratsekua ka uinhapikua jingoni xénchasïnga Jeobani ka eskajtsï erakuskia marhuakuni para méntkisï (Mar. 12:30).

6, 7. Eska na arhijka 1 Pedru 3:18-22, ¿nákiskiksï tsimani rasonicha enga jimbo nema jatsika para itsï atakuarhini?

⁶ ¿Meru uétarhisïni eska nema itsï atakuarhiaka? Eratsi je ambe enga uandajka 1 Pedru 3:18- 22 (arhinta je). Ísï eska arka na xarhatenga eska Noe mintsikasïrenga Jeobani, engajtsï itsï atakuarhiska, xarhatantsï jauaka eskajtsï aiakukuarhiskia Jeobani. ¿Peru meru uétarhisïni eska nema itsï atakuarhiaka? Jo, ka Pedru uandaspti andisï uétarhijki eska nema ísï uáka. Uénani jámani, uandaspti: ‘Indejtsïni májku jásï pʼímutantasïndi’. Itsï atakuarhini, uátijtsïni pʼímutantani engachi juchari úkuecha jingoni xarhataska eskachi mintsikasïnga Jesusini ka jakajkuni eska ima juchantsïni jimbo uarhiska, eska tsíntaska ka auandarhu karhanchentani ka eska iásï Jeobaeri “jurhijkandani ladu jimbo” jarhaskia.

⁷ Tsimani úni jámani, itsï atakuarhini úsïndi eskachi uáka ambakiti konsiensia ma jatsini. Jiáni engachi aiakukuarheka Jeobani ka itsï atakuarhini, uénaskachi ambakiti pájperakua ma jatsini imani jingoni. Tata Diosïjtsïni puácheantasïndi juchari pekaduechani jimbokachi mintsita jingoni móantaskia ka jakajkuni eska Jesusi juchantsïni jimbo uarhiska parajtsïni pʼímutantani. Ini ambe jimbo, úsïngachi ambakiti konsiensia ma jatsini.

8. ¿Andijtsïsï uéjki itsï atakuarhini?

⁸ ¿Andijtsïsï uéjki itsï atakuarhini? Bibliaeri jorhenguarhikua jimbo, chájtsï uánikua ambe míteskia Jeobaeri ambe, komu na enga jásï Tata Diosï máeka ka na enga eratsejka. Iámindu i ambeksïni mintsitarhu niárachesti ka ústi eskajtsï kánikua xénchaaka. Engajtsï erakuaka itsï atakuarhini, jindeuati jimbokajtsï xénchasïnga Jeobani.

9. ¿Ambe arhikuekasïni itsï atakuarhini Táteri, Uájperi ka espiritu santueri nombri jimbo ísï eska Mateu 28:19, 20, TNM na arhijka?

⁹ Ístujtsï uékaaka itsï atakuarhini imani ambe jimbo engajtsï jorhenguarhikia Bibliaeri ambe ka exentsï eska ísïska. Eratsi je ambe enga Jesusi juramupka jiáni enga uandapka eskachi jatsiska para kʼuiripuechani jorhendaani (arhinta je Mateu 28:19, 20, TNM). Ima uandaspti eska imecha engaksï itsï atakuarhijka, jatsiskaksï para  “Táteri, Uájperi ka espiritu santueri nombri jimbo” úni. I ambe arhikuekasïndi iámu mintsita jingoni jakajkuni ambe enga Biblia jorhentpijka Jeobaeri ambe, imeri Uájpa Jesusiri ka ístu espiritu santueri ambe. Ini ambe míteni, uátiksïni kánikua jarhuatani ka niárachenksïni chári mintsitarhu (Ebr. 4:12). Ju je exeni máru ambe.

10, 11. ¿Ambejtsï niáraskia cha jorhenguarhini ka jakajkuni juchari Tátiri ambe?

¹⁰ Miásïntsï jiáni engajtsï arini ambe jorhenguarhipka juchari Tátiri ambe, eska ima arhinhasïnga Jeoba, ima jindesti enga “Sánderu Kʼéri ambeka iámu parhakpinirhu” ka eska imajkusï jindeka Tata Diosï jurhimbiti (Sal. 83:18; Is. 37:16). Ima, juchari Kuerajpiristi ka imajkusï újti pʼímutantspini (Sal. 3:8; 36:9). Ístu, ústi ambe enga xáni uétarhika parajtsïni pʼímutantani uarhikueri ka pekadueri ka parachi úni irekani para méntkisï sánderu orhepani (Juanu 17:3). Engajtsï aiakukuarhiakia ka itsï atakuarhini, xarhatantsï jauaka iáminduechani japarini eskajtsï Jeobaeri testigueska (Is. 43:10-12). Familia ma jingontsï kuenta úkuarhiaka enga Jeobani kómarhijka, tsípikua jingoni úrajka imeri nombrini ka mítetarpini (Sal. 86:12).

¹¹ Kʼéri kóntperata máesti míteni ambe enga jorhentpijka Biblia juchari Tátiri ambe. Engajtsï niáraaka jakajkuni ini ambe, mintsita jingontsï uékaaka aiakukuarheni Jeobani ka itsï atakuarhini.

12, 13. ¿Ambejtsï niáraskia cha jorhenguarhini ka jakajkuni Tata Diosïri Uájperi ambe?

¹² ¿Nénajtsï pʼikuarheraspi jiáni engajtsï niárapka arini jurhimbikua ambe jorhenguarhini Tata Diosïri Uájperi ambe? Jesusi jindesti enga sáno májkueni kʼéri ambeka eska Jeoba. Ima jindesti juchari Pʼímutantspiti, jimboka ima íntspiska imeri tsípikuani parajtsïni pʼímutantani. Engachi úkuecha jingoni xarhatajka eskachi jakajkusïnga ini ambe, uákachi puáminhantaani pekaduechani, ambakiti pájperakua ma jatsini Tata Diosï jingoni ka irekani para méntkisï (Juanu 3:16). Ístu Jesusi jindesti juchari Kʼéri Saserdoti jimbokajtsïni uékasïnga jarhuatani parachi kóntperatechani jatsiani imeri pʼímutantskua jimbo ka parachi ambakiti pájperakua ma jatsini Jeoba jingoni (Ebr. 4:15; 7:24, 25). Jimboka ima Reiska Tata Diosïri Reinuerirhu, Jeoba imani úraati para pímbinhajkuntani imeri nombrini, para kʼamajkuni no sési jásï ambe ka parajtsïni újchakurani para méntkisï jimbanhi parhakpinirhu (Mat. 6:9, 10; Jaŋ. 11:15). Ístu, Jesusi jindesti juchari ejemplu (1 Ped. 2:21). Úraspti imeri tsípikuani para úni ambe enga Jeoba uéjka ka ísïjtsïni xarhatachesti ambe engachi juchajtu jatsika para úni (Juanu 4:34).

¹³ Jiáni engajtsï exeaka eska ísïska ambe enga Biblia jorhentpijka Jesusiri ambe, niáraakajtsï xénchani Tata Diosïri Uájpani enga ima xáni xénchajka. Xénchani Jesusini, uáti eskajtsï uékaaka méntkisï úni ambe enga Tata Diosï uékajka, ísï eska na úpka Jesusi. Ka tátsekuajtsï uékaaka aiakukuarheni Jeobani ka itsï atakuarhini.

14, 15. ¿Ambejtsï niáraskia cha jorhenguarhini ka jakajkuni espiritu santueri ambe?

¹⁴ ¿Ambejtsï eratsespi jiáni engajtsï niárapka arini jurhimbikua ambe jorhenguarhini espiritu santueri? Espiritu santu no diosï máesti, sino Tata Diosïri uinhapikuesti. Jeoba úraspti para arhiani ambe engaksï karapiringa imecha engaksï Bibliani karapka ka inde mismu espiritu santujtsïni jarhuatasïndi kurhanguni ambe engachi arhintajka ka ísïchi úni (Juanu 14:26; 2 Ped. 1:21). Jeoba úrasïndi imeri espiritu santuni parajtsïni íntskuni “uinhapikua enga xáni kʼéri ambeka” (2 Kor. 4:7). Espiritu santujtsïni íntskusïndi uinhapikua parachi ambakiti ambe aianhpini, úni tsʼéjkukuechani tekaantani, no úni ambe enga no sési jaka, ka no kuatantani. Ístujtsïni jarhuatasïndi parachi xarhatani imani ambakiti ambe “enga espiritu santu úrpijka” (Gal. 5:22). Tata Diosï tsípikua jingoni íntsaasïndi espiritu santu imechani engaksï imani  mintsikajka ka engaksï mintsita jingoni kurhakujka (Luk. 11:13).

¹⁵ Kánikuajtsïni sési pʼikuastasïndi míteni eska imecha engaksï Jeobani kómarhijka, úsïnga mintsikani eska espiritu santu jarhuatauaka paraksï Tata Diosïni marhuakuni. Jiáni engajtsï niáraaka exeni eska ísïska ambe enga Biblia jorhentpijka espiritu santueri ambe, uékaakajtsï aiakukuarheni Jeobani ka itsï atakuarhini.

16. ¿Ambechi jorhenguarhiskia ixú jamberi?

¹⁶ Kánikua jukaparhakua ambesti erakuni Tata Diosïni aiakukuarheni ka itsï atakuarhini. Eskachi na exekia, chájtsï jatsiska para úni ambe enga xáni uétarhiaka. Peru sánderu uánikuestiksï kóntperatecha engajtsï jatsiauaka ka eska ambe engajtsï niáraaka úni o jurajkuni. Itsï atakuarhini, uátiksïni pʼímutantani ka uáti eskajtsï ambakiti konsiensia ma jatsiaka para Tata Diosïni marhuakuni. Engajtsï cha itsï atakuarhiaka, jindeuati jimbokajtsï xénchasïnga Jeobani. Ístu, jatsiskajtsï para mintsita jingoni jakajkuni jurhimbikua ambe engajtsï jorhenguarhikia Tátiri, Uájperi ka espiritu santueri ambe. Míteparini iámindu i ambe engachi jorhenguarhikia, ¿uandapirintsï eskajtsï uákia itsï atakuarhini?

17. ¿Ambe jatsiski para úni nema enga uékajka itsï atakuarhini?

¹⁷ Engajtsï cha exejka eskajtsï listu jarhaskia parajtsï itsï atakuarhini, jamberijtsï kánikua jánguarhintakia parajtsï ambakiti pájperakua ma jatsini Jeoba jingoni. * Jimbokajtsï jorhenguarhixaka Bibliaeri ambe, uánikua ambejtsï míteskia Jeobaeri ka Jesusiri ambe, ka niáraskajtsï mintsikani indeni ambe (Ebr. 11:6). Chájtsï mintsikasïnga ambe enga Jeoba aiatspejka Bibliarhu ka jakajkusïngajtsï eska mintsikani Jesusiri uarhikuani uákaksïni pʼímutantani pekadueri ka uarhikueri. Moantaskajtsïa o kánikuajtsï no sési pʼikuarherasïnga imani ambe jimbo engajtsï no sési úka ka kurhakuskajtsïa Jeobani eskaksïni puáchintaaka. Mójtakuskajtsïa na engajtsï irekenga o nóterujtsï ísï irekaxakaia eska ióntki ka iásïjtsï úsïnguia ambe enga Jeoba jaiapanhintajka (Uku. 3:19). Kánikuajtsï tsitisïnga máteruechani aianguani ambe engajtsï jakajkujka. Úskajtsïa ambe enga uétarhijka para kúnguarhikua jingoni uérani aianhpini, nájkirukajtsï nótki itsï atakuarhini jaka (Mat. 24:14). Jeoba kánikua sési pʼikuarherhasïndi ka tsípini jimbokajtsï iámindu ini ambe úskia (Prov. 27:11).

18. ¿Ambejtsï útasï jatsiski para úni ante dejtsï itsï atakuarhini?

¹⁸ Parajtsï úni itsï atakuarhini, jatsiskajtsï para orheta máteru ambe úni. Eskachi na exekia, jatsiskajtsï para aiakukuarheni, i ambe arhikuekasïndi iámu mintsita jingoni kómarhini Jeobani ka arhini eskajtsï úraaka chári tsípikuani para úni ambe enga ima uékajka (1 Ped. 4:2). Tátsekua, arhi je orhejtsïkutini enga orhekupaajka máteru orhejtsïkutichani chári kúnguarhikuarhu, eskajtsï uékasïnga itsï atakuarhini. Ima, orhejtsïkutichani máru arhiauati eskaksï uandontskuarhiaka chánksïni jingoni. Ka asï uandanhia je, jimbokaksïni i ambakiti erachicha sési  míteska ka kánikuaksïni xénchasïndi. Imechaksï chánksïni jingoni exeati máru ambe engajtsï jorhenguarhikia Bibliaeri ambe paraksï exeni sintsï sési kurhangusïni iámu ambe ka sintsï míteski na enga xáni jukaparhakueka aiakukuarheni Jeobani ka itsï atakuarhini. Engaksï imecha exeaka eskajtsï listu jarhaskia, arhiatiksïni eskajtsï uákia itsï atakuarhini kʼéri tánguarhikua ma jimbo enga ísï no ióni jimbo úkuarhiaka.

19, 20. Engajtsï na itsï atakuarhiakia, ¿ambejtsï jatsia para úni ka ambeksïni uá jarhuatani?

¹⁹ Engajtsï na itsï atakuarhiakia, ¿ambejtsï jatsia para úni? * Miá je eska aiakukuarheni Tata Diosïni, kánikua jukaparhakua ambeska ka eska Jeoba erokuarhisïnga eskajtsï uáka ambe engajtsï aiakuaka. Ísï jimbo engajtsï na itsï atakuarhiakia, jatsiakajtsï para irekani ísï eskajtsï na aiakukia. ¿Ambeksïni uá jarhuatani?

²⁰ Asï jarhari je chári kúnguarhikuani. Engajtsï na itsï atakuarhiakia niáraakajtsï kuenta úkuarhini iámindu erachicha jingoni (1 Ped. 2:17). Kúnguarhikuarhu anapu erachichaksï jindeuati chári familia. Engajtsï no kuerataska tánguarhikuecharhu, niáraakajtsï sési pájperani imecha jingoni. Arhinta je Bibliani pauani pauani, ka arhuta je tiempu para eratsentani (Sal. 1:1, 2). I ambe arhikuekasïndi eska, engajtsï na arhintaakia sáni Biblia, jatsiskajtsï para erokuarhini ka eratsentani ambe engajtsï arhintaaka. Engajtsï ísï úska, mintsitarhuksïni niárachiati. Ístu, jatsiskajtsï para úni ambe enga Jesusi uandapka, méntku jauenani kómarhini (Mat. 26:41). Mintsita jingoni kómarhini, uáti eskajtsï sánderu andarhieraka Jeobani. Ka seguiri je jánguarhintani orheta pérani Reinueri ambe (Mat. 6:33). Ka uákajtsï ísï úni engajtsï orheta péraska aianhpikuani chári irekuarhu. Engajtsï no jurajkuaka aianhpini, chári jakajkukua sánderu kʼéati ka jamberijtsï uáka jarhuataani máteruechani parakaksï niáraaka irekani para méntkisï (1 Tim. 4:16).

21. ¿Náki kóntperatechantsï jatsiaua engajtsï itsï atakuarhiska?

²¹ Erakuni aiakukuarheni Jeobani ka itsï atakuarhini, jindesti ambe enga sánderu jukaparhakueka chári irekuarhu. Ísïsti eska uétarhisïnga úni máru ambe. Peru niáraakajtsï uánikua kóntperatechani jatsiani. Uandanhiatecha engajtsï niáraaka jatsiani ini parhakpini jimbo, ma ratu jimbojkuestiksï ka nóksï kʼuetsapiti ambesti (2 Kor. 4:17). Peru engajtsï itsï atakuarhiakia, niáraakajtsï sánderu sési irekani iásï ka irekani para méntkisï sánderu orhepani (1 Tim. 6:19). Ísï jimbo, sési eratsenta je, kómarhi je Jeobani ka mókunta je arini kurhamarhikuani: “¿Uáia itsï atakuarhini?”.