1. ¿Ambejtsïni jorhendasïni Eclesiastés 3:1, 7?

MÁRUCHI tsitisïnga kánikua uandani, peru máteruechachi no káni uandariska. Ísï eska na arhijka tekstu nani enga pʼitakata jaka i jorhenguarhikua, jarhasti tiempu para uandani ka tiempu para pínasku pakarani (arhinta je Eclesiastés 3:1, 7). Peru jamberichi ménisï uéjka eskaksï máru juchari erachicha sánderu uandariuaka ka eskaksï máteruecha no xáni uandaaka.

2. ¿Néjtsïni jatsiski para arhini na jatinchi uandaa ka néna?

² Jeobaeri intsïmperakua máesti engachi jucha újka uandani (Éx. 4:10, 11; Jaŋ. 4:11). Imeri Karakata jimbo, jorhendasïndijtsïni parachi sési úrani ini intsïmperakuani. Ini jorhenguarhikua jimbo, exeauakachi máru Bibliarhu anapu ejempluechani engajtsïni jarhuataaka exeni na jatinchi uandaa ka na jatinchi pínasku pakaraa. Ístuchi jorhenguarhiaka na exesïni Jeoba ambe engachi arhiajka máteruechani. Ju je orheta exeni na jatinchi jatsiski para uandani.

3. Eska na arhijka Roma 10:14, ¿kánchi jatsiski para uandani Jeobaeri ka Reinueri ambe?

³ Méntkisïchi jatsiska para uandantani Jeobaeri ambe ka imeri Reinueri (Mat. 24:14; arhinta je Roma 10:14). Engachi ísï újka, májkuenchi úni jarhasïnga eska Jesusi. Ma ambe jimbo enga Jesusi jupka Echerirhu, jindespti para jurhimbitku ambe uandantani imeri Tátiri ambe (Juanu 18:37). Peru ístu, jatsiskachi para miáni eska kánikua jukaparhakueska exeni na engachi uandajka. Ísï jimbo, engachi aianhpini jauaka Jeobaeri ambe, jatsiskachi para “kaxumbikua [...] ka janhanharhikua jingoni” aianhpini ka no no sési pʼikuastpini imani ambe jimbo engaksï kʼuiripuecha jakajkujka (1 Ped. 3:15). Engachi ísï úska, nóchi ísku uandani jauaka, sino jorhendauakachi kʼuiripuechani ka jamberichi mintsitarhu niárakuani.

4. Eska na arhijka Proverbios 9:9, ¿para ambeksï marhuasïni juchari uandakuecha?

 ⁴ Engaksï orhejtsïkuticha exejka eska erachi o pirenchi ma uétarhinchaxaka konseju ma, nóksï jatsisti para pínasku pakarani. Peru orhetaksï jatsiati para exeni na jatinksï uá konseju íntskuni, jamberi jiáni engaksï uáka erachi o pirenchi jingontku uandontskuarheni paraksï no ísku jatini kʼuratsetani. Engaksï orhejtsïkuticha uéjka nemani konseju ma íntskuni, méntkisïksï jánguarhintasïndi janhanharhikua jingoni úni. Peruksï jirejiresï exeraasïndi erachini o pirenchini Bibliaeri konsejuechani engaksï jarhuatauaka imani ambe úni enga sési jaka (arhinta je Proverbios 9:9). ¿Andisï xáni jukaparhakue eskachi balori jukaaka para uandani jiáni enga uétarhiaka? Ju je exeani tsimani Bibliaeri ejempluechani, ma enga ísï úpka ka máteru enga méntku máteru ambe úpka. Ju je orheta acheetiri ma exeni enga jatsipka para jurhimberantaani imeri uájpechani ka tátsekuachi exeaka uarhiitiri ma enga jatsipka para uandontskuarheni kʼuiripu ma jingoni enga reipiringa.

5. ¿Andichisï uandajki eska kʼéri saserdoti Eli pínasku pakaraspka nájkiruka sáni xukaapka uájpechani?

⁵ Kʼéri saserdoti Eli tsimani uájpechani kaasïrendi enga kánikua xénchauenga. Peru íchaksï no janhanharhisïrendi Jeobani. Kʼéri ánchikuarhitaksï úsïrendi tabernakulurhu jimbokaksï saserdotispka. Peruksï ícha no sési úrasïrendi imani juramukuani engaksï jatsipka, nóksï janhanharhisïrendi ambe enga kʼuiripu pákuenga Jeobani ka nóksï sáni kʼuratseparini ísku jándikua ambeksï niátasïrendi (1 Sam. 2:12-17, 22). Seguni Moisesiri Lei, íchaksï jatsipirindi para uándikunhani, peru Eli ísku exeasïrendi. Iatsitakuarhu arhiaspti ambe engaksï no sési úni japka ka jurajkuspti eskaksï útasï tabernakulurhu marhuani japiringa (Deut. 21:18-21). ¿Na exespi ini ambe Jeoba? Kurhamarhispti Elini andisï sánderu janhanharhiani japi imeri uájpechani ka eska Jeobani. Ísï jimbo, kʼamajkuaspti ini tsimani acheeti no sési úrichani (1 Sam. 2:29, 34).

6. ¿Ambechi jorhenguarhisïni ima amberi enga Eli úpka?

⁶ Jukaparhakua ambechi jorhenguarhisïnga ima amberi enga Eli úpka. Enga amigu o familiarhu anapu ma no sési úka ambe ma, jatsiskachi para uandontskuarheni imani jingoni ka miátantani ambe enga juramujka Jeoba Bibliarhu. Tátsekua, jatsiskachi para jánguarhintani eskaksï orhejtsïkuticha jarhuataaka (Sant. 5:14). Nóchi méni uékasïnga ísïni eska Eli ka sánderu janhanharhini amiguni ma o familiarhu anapuni ma ka eska Jeobani. Uétarhisïndi balori jukani para uandontskuarheni nema jingoni enga uétarhinchani jaka para jurhimberanhantani, peru kánikua jukaparhakuesti ísï úni. Ju je exeni na enga Abigaili, uarhiiti ma enga Israeli anapuepka, méntku ménderueni úpka ambe ma eska Eli.

7. ¿Andisï Abigaili uandontskuarhepi Dabidi jingoni?

 ⁷ Abigaili, Nabaliri témbespti, acheeti jatsikuarheri ma enga uánikua echerichani jatsiapka. Jiáni enga Dabidi ka acheeticha engaksï imani jingoni sïpakuarhikuni japka Saulini, ma tiempuksï Nabaliri karichi eranguticha jingoni pakaraspti ka kuájchakuasptiksï paraksï no sïpaminhaani karichichani. ¿Nabali jukaparharaspi indeni ambe? Nómbe. Enga Dabidi kurhakupka eska íntsaapiringa sáni itsï ka tʼirekua acheetichani engaksï imani jingoni jámenga, Nabali kánikua ikiaspti, uinhachakuaspti ka no sési arhiaspti (1 Sam. 25:5-8, 10-12, 14). Ísï jimbo, Dabidi uandaspti eska uándikuapiringa iámindu acheetichani engaksï Nabaliri kʼumanchikuarhu japka (1 Sam. 25:13, 22). ¿Néna jimbo Dabidi no niárapirini xáni no sési ambe úni? Abigaili exespti eska jatsispka para uandani. Balori jingoni niraspti kúmani Dabidini ka imani 400 acheetichani engaksï uarhipetarakua ambe kámenga, engaksï kánikua kʼarhimani japka ka engaksï kánikua ikiani japka, ka uandontskuarhespti Dabidi jingoni.

8. ¿Ambechi jorhenguarhisïni ima amberi enga Abigaili úpka?

⁸ Abigaili balori ka janhanharhikua jingoni uandontskuarhekuspti Dabidini para mintsitarhu niárakuni. Nájkiruka Abigaili no ma ambe kulpa jatsipka, kurhakuspti Dabidini eska puákuntapiringa. Uandaspti eska Dabidi ambakiti kʼuiripu máespka ka mintsikaspti eska Jeoba jarhuatapiringa (1 Sam. 25:24, 26, 28, 33, 34). Májkueni eska Abigaili, jatsiskachi para balori jingoni uandani engachi exeni jauaka eska nema no sési ambe uáka (Sal. 141:5). Jatsiskachi para janhanharhikua xarhatani peru ístu balori jingoni ísï úni. Engachi uékperakua jingoni íntskujka konseju ma nemani enga uétarhinchani jaka, xarhatasïngachi eskachi ambakiti amigueska (Prov. 27:17).

9, 10. ¿Ambeksï jatsiski para miántani orhejtsïkuticha engaksï konseju ma íntskuaka nemani?

⁹ Uétarhisïndi eskaksï orhejtsïkuticha balori xarhataaka  para uandontskuarheni imecha jingoni engaksï no sési ambe úka (Gal. 6:1). Orhejtsïkutichaksï kaxumbitisti ka mítestiksï eskaksï imechajtu ma jurhiani úpiringa uétarhinchani konseju ma jimbokaksï no perfektueska. Peruksï no jurajkusïndi eska i ambe ójkutauaka para jurhimberantani nemani enga uétarhinchani jaka (2 Tim. 4:2; Titu 1:9). Engaksï konseju ma íntskujka nemani, jánguarhintasïndiksï para sési jorhendani ka tekaantskua jingoni. Xénchaasïndiksï erachichani ka jimboksïsï uéjti jarhuataani (Prov. 13:24). Peru ambe engaksï sánderu uéjka, jindesti kʼéri ambe arhini Jeobani, jimboksïsï jánguarhintajti paraka úkuarhiaka ambe enga ima juramujka ka kuájchakuasïndiksï kúnguarhikuarhu anapuechani (Uku. 20:28).

¹⁰ Ixú jamberichi exeskia kánchi jatsiska para uandani. Peru ménisï sánderu sésisti no ma ambe uandani. ¿Ná jatinchi úpirini úkua jukanchani pínasku pakarani?

11. ¿Náki ejemplu úraspi Santiagu ka andisï ambakiti ejemplu máe?

¹¹ Ménisï úkua jukasïndi pʼímukukuarhini. Santiagu enga karapka ma parti Bibliaeri, úraspti ambakiti ejemplu ma para uandani na enga xáni úkua jukaka pʼímukukuarhini. Ima uandaspti: “Enga ma kʼuiripu nómbe pekadu újka uandakua jimbo, ima kʼóru sési jimbo ambakitisti ka mítesti pʼíngukuarhini iámindu ambe jimbo” (Sant. 3:2, 3). Ini bersikulu jimbo, uandakua “pʼíngukuarhini”, imani frenuni arhikuekasïndi engaksï kabaiuecha jatsikunhajka. Jiáni enga ima kʼuiripu enga kabaiuni jatarini jarhajka antsitajka frenuni, úsïndi páni kabaiuni nani enga ima uéjka o anhaxustani. Peru enga no uáka pʼínguni, kabaiu uáti nani uéjkisï uiriani ka no sési úkuarhinchani o no sési úkuni imani enga jatarini jaka. Májkueni, engachi no pʼímukukuarhiska uákachi no sési útspini. Ju je exeani máru ejempluechani kánchi jatsiski para pʼíngukuarhini ka pínasku pakarani.

12. ¿Kánchi jatsiski para pʼímukukuarhini ka no kurhanguarhini jarhani ambe ma?

 ¹² ¿Ambechi úsïni enga erachi ma míteka ambe ma enga no jindeka para mítekuarhini? Por ejemplu, engachi mítejka nemani enga jima irekani jaka nani engaksï Testiguecha no újka aianhpini ni máteru ambe úni para Jeobani kómarhini, ¿uékanchi jarhasïni kurhamarhini nénaksï úsïni para Jeobani kómarhini imani lugari jimbo? Ísïsti, nóchi no sési ambe eratseparini kurhamarhipiringa ini ambe. Xénchaasïngachi erachichani ka uékasïngachi míteni nénaksï nitamakuarhixaki. Ístu, uékasïngachi míteni ambe jimbo kómarhijpikuani. Peru ini ambe jimbo, sánderu sésisti pʼímukukuarhini ka no kurhanguarhini jarhani ini ambe. Méntku arhini jarhani nemani eskajtsïni aianguaka ambe ma enga no jatsika para mítekuarhini, nóchi xarhatakuni japiringa uékperakua imani erachini ni imechani engaksï mintsikajka eska i erachi no ma ambe uandantaaka. Ísïsti, nóchi uékasïnga eskaksï sánderu úkua jukanchaaka ima erachicha engaksï irekani jaka imani lugari jimbo enga no jaka sésikua para juchari ánchikuarhitani úkuarhini. Ístu, no ma erachi enga imani lugarichani jimbo irekani jaka jámapirindi uandantani nénaksï úsïni para aianhpini o máteru ambe úni para Jeobani kómarhini.

13. Eska na arhijka Proverbios 11:13, ¿ambeksï jatsiski para úni orhejtsïkuticha ka andi?

¹³ Orhejtsïkutichaksï jatsisti para sánderu ísï úni eska Proverbios 11:13 na uandajka (arhinta je). Ísïksï úsïndi engaksï no uandantajka imani ambe enga no jindeka para mítekuarhini. I ambe úpirindi úkua jukani, sánderia para imecha engaksï tembuchatini jaka. Temungurhirichaksï kánikua sési pájperasïndi engaksï uandontskuarhejka ambe engaksï eratsejka, na engaksï pʼikuarherajka ka ambe enga uandanhiataajka. Peru orhejtsïkuti ma mítesti eska no jatsiska para “uandantani imani ambe enga aiangunhaka ka enga no jatsika para mítekuarhini” kúnguarhikuarhu anapu erachicheri ambe. Enga uandantapiringa ambe ma, máteruechaksï nóteru mintsinharhipirindia. Imecha engaksï juramukua jatsika kúnguarhikuarhu nóksï jatsisti para tsimani mintsita jingoni jámani (1 Tim. 3:8). I ambe arhikuekasïndi eskaksï orhejtsïkuticha no jatsiska para chkuanderani jámani o jámani uandantani ambe ma. Ka orhejtsïkuti ma enga xénchajka témbani, no aianguati ambe enga ima no jatsika para míteni.

14. ¿Néna uá témba jarhuatani uámbani paraka ambakiti orhejtsïkuti máeuaka?

¹⁴ Orhejtsïkutiri témba ma ístu uáti jarhuatani uámbani paraka ísï mitekateuaka eska ambakiti orhejtsïkuti máeska. ¿Néna uá ísï úni? Enga no méntku arhini jauaka uámbani eska aianguaka ambe ma enga no jatsika para uandantani. Ini ambe úparini, jarhuatasïndi imeri uámbani ka ístu janhanharhiasïndi imechani engaksï míntsinharhika uámbani. Ka ambe enga sánderu jukaparhakueka, jindesti eska tsíperasïnga Jeobani, jimboka ísï jarhuajpesïnga parakaksï kúnguarhikuarhu anapuecha sési pájperaaka ka eska pínandikua jauaka (Rom. 14:19).

15. ¿Ambe uandaspi Jeoba tanimu acheeticheri ambe engaksï nípka Jobuni exeni ka andi?

¹⁵ Bibliarhu anapu libru enga Job arhinhajka, jorhendasïndijtsïni na jatini uandani ka ambe uandani. Enga Jobu kánikua no sési jásï ambe nitamakuarhinchapka, tʼámu acheetichaksï niraspti konseju íntskuni Jobuni ka sési pʼikuastantani. Iónksï sáni pínasku pakaraspti. Peru ambe engaksï uandapka tanimu acheeticha —Elifasi, Bildadi, ka Sofari— sési xarhatasïndi eskaksï no úraspka imani tiempuni para eratsentani ambe engaksï arhipiringa Jobuni. Sánderu sési, eratsexaptiksï néna xarhatani eska Jobu no sési ambe úspka. Máru ambe ísïspti ambe engaksï uandapka, peru sáni no iámindu ambe engaksï uandapka Jobueri ka Jeobaeri ambe, no ísïspti ka no sésiksï pʼikuastaspti Jobuni. Ístuksï arhispti Jobuni eska no ambakiti kʼuiripu máespka (Job 32:1-3). ¿Néna exespi ini ambe Jeoba? Kánikua ikiaspti ini tanimu  acheeticha jingoni. Arhiaspti eskaksï tontuespka ka ístu eskaksï kurhakupiringa Jobuni eska kómarhijpikuapiringa (Job 42:7-9).

16. ¿Ambechi jorhenguarhisïni ima amberi engaksï no sési úpka Elifasi, Bildadi ka Sofari?

¹⁶ Ambe engaksï no sési úpka Elifasi, Bildadi ka Sofari, uánikua ambejtsïni jorhendasïndi. Orheta, eskachi no jatsiska para juchari erachichani jusgariani (Mat. 7:1-5). Sánderu sési, ante dechi uandani jatsiskachi para jingontku kurhajchaani. Solu ísïchi uáka kurhangukuani ambe engaksï nitamakuarhini jaka (1 Ped. 3:8). Máteru ambe engachi jorhenguarhijka, jindesti eskachi jatsiska para exeni eska ambe engachi uandaaka, no no sési pʼikuastpiaka ka eska jurhimbikua ambeuaka (Efes. 4:25). Ka para kʼamarani, eska Jeoba kánikua jukaparharasïnga ambe engachi arhiajka máteruechani.

17. ¿Ambechi jorhenguarhisïni Eliuri ambe?

¹⁷ Máteru i tʼámu acheeticheri engaksï nípka Jobuni exeni, jindespti Eliu, Abraaniri parienti ma. Eliu kurhaaxapti engaksï Jobu ka máteru acheeticha uandontskuarheni japka. Xarharasïndi eska jingontku kurhajchaaxapka ambe engaksï uandenga jimboka pʼamojperakua jingoni ambakiti konsejuechani íntsaaspka Jobuni engaksï jarhuatapiringa mójtakuni imeri eratsekuani (Job 33:1, 6, 17). Ambe enga sánderu jukaparhakuepka para Eliu, jindespti kʼéri ambe arhini Jeobani ka no máteru kʼuiripuechani ni eska ima kʼéri ambe exenhapiringa (Job 32:21, 22; 37:23, 24). Eliuri ejemplu jingoni, jorhenguarhisïngachi eska tiempu ma jarhaska para pínasku pakarani ka kurhaani (Sant. 1:19). Ístuchi jorhenguarhisïnga eska jiáni engachi konseju íntskuaka nemani, jindeuaka para kʼéri ambe arhini Jeobani ka no eskachi jucha kʼéri ambe exenhaaka.

18. ¿Nénachi xarhatasïni eskachi jukaparharasïnga engachi újka uandani?

¹⁸ Xarhatasïngachi eskachi jukaparharasïnga intsïmperakuani engajtsïni Jeoba íntskuka, enga jindeka uandani, úparini ambe enga Biblia uandajka parachi míteni na jatini uandani ka ambe uandani. Tata Diosïri jarhuajperata jimbo, rei Salomoni enga kánikua jánhaskatipka arini ambe karaspti: “Ima uandakua enga jiáni uandanhajka enga meru uétarhini jarhajka, ísïsti komu mansanecha orueri engaksï plateri adornu jukaka” (Prov. 25:11). Engachi jingontku kurhajchauaka máteruechani ka eratsenchi ante de uandani, juchari uandakuechaksï ambakitiuati ka kánikuaksï jukaparhakueni ísï eska inde mansanecha orueri. No arhiati engachi tsitijka kánikua uandani ochi no kánikua uandarini, sésichi pʼikuastauaka máteruechani imani ambe jimbo engachi uandaaka ka Jeoba kánikua sési pʼikuarheraati juchantsïni jimbo (Prov. 23:15; Efes. 4:29). No jarhasti máteru ambe engachi jimbo uáka xarhatani eskachi kánikua jukaparharasïnga ini Tata Diosïri intsïmperatani.