1, 2. ¿Néchaksï uá jarhuatani Bibliaeri jorhenguarhirini ma paraka niáraaka itsï atakuarhini?

PIRENCHI ma enga Amy arhinhajka ka enga Fiyi irekaka, uandasïndi: “Kánikua tsitisïrenga ambe engani jorhenguarhini japka Bibliaeri ambe. Mítespka eska i jindeespka jurhimbikua, joperuni úkua jukanchasïrenga mójtakuni juchiti irekuani. Engani uénapka kúnguarhini erachicha ka pirenchicha jingoni, i amberini jarhuataspti parani úni mójtakuni ambe ma ka niárani itsï atakuarhini”. Ambe enga Amy nitamakuarhipka jorhendasïndijtsïni jukaparhakua ambe: sánderu segurueuati eska jorhenguarhiri ma niáraaka marhuakuni Jeobani ka itsï atakuarhini engaksï kúnguarhikuarhu anapu erachicha jarhuataska.

² Iámindu aianhpirichaksï uáti jarhuajpeni paraka kúnguarhikuarhu sánderu uáninhaaka (Efes. 4:16). Prekursora ma enga Leilani arhinhajka ka enga Vanuatu anapueka, uandasïndi: “Jarhasti uandakua ma enga arhijka eska iámu ireta uáka jarhuajpeni paraka sapi ma tʼarhexeaka. Ji exeasïnga eska sáno májkueniska engachi Jesusiri chúxapatichani uájka: sáno méntkisï, uétarhisïndi eska iámu kúnguarhikua jarhuajpeaka paraka nema jurhimbikuarhu jauaka”. Para sapi ma tʼarhexeranhani, uétarhisïndi eskaksï familiaricha jarhuajpeaka, amiguecha ka maestruecha, iáminduechaksï úsïndi uinhaperantani ka ambakiti ambe jorhendani. Sáno májkueni, aianhpirichaksï úsïndi jarhuajpeni paraka jorhenguarhiri ma niáraaka itsï atakuarhini engaksï konseju íntskuaka, uinhaperantaaka ka engaksï ambakiti ejemplu ma íntskuaka.

3. ¿Ambechi jorhenguarhisïni imeri ambe engaksï Ana, Dorín ka Leilani uandajka?

³ Engachi jorhendani jaka nemani Bibliaeri ambe, ¿andichisï jatsi para jiókuarhini eskaksï máteru aianhpiricha jarhuataaka? Ju je exeni ambe enga uandajka Ana, prekursora espesiali ma enga Moldavia jaka: “Jorhenguarhiri ma uánikua ambe uétarhinchasïndi  ka jorhentpiri no méntkisï uáti jarhuatani iámindu ambe jimbo”. Máteru prekursori espesiali ma enga Dorín arhinhajka ka enga ima mismu paisi jimbo jaka, uandasïndi: “Sáno méntkisï máteru aianhpirichaksï arhisïndi ambe ma jorhenguarhirini enga mintsitarhu niárakuaka, ambe ma engani ji no méni eratsepiringa arhini”. Leilani uandasïndi máteru ambe enga jimbo sési jaka eskachi jiókuarhiaka eskajtsïni máteruecha jarhuataaka. “Enga jorhenguarhiri exejka eskaksï erachicha ka pirenchicha uékasïnga ka uandanhiani imani jimbo, kuentaksï íntskukuarhisïndi eska i jindeeska Jeobaeri ireta” (Juanu 13:35).

4. ¿Ambechi exea ini jorhenguarhikua jimbo?

⁴ Joperu jamberichi kurhamarhikuarhijka: “¿Néna uá jarhuatani jorhenguarhirini ma engani no ji jindeeka engani jorhendani jaka Bibliaeri ambe?”. Ini jorhenguarhikua jimbo, exeakachi ambechi uá úni engajtsïni nema pʼímarhiska parachi nirani pámbetani Bibliaeri ambe jorhendani nemani ka enga jorhenguarhiri ma uénaaka tánguarhikuecharhu nirani. Ístuchi jorhenguarhiaka ambeksï uá úni orhejtsïkuticha paraksï jarhuataani jorhenguarhirichani paraksï niárani itsï atakuarhini.

5. ¿Ambechi jatsiski para úni engajtsïni nema arhiaka parachi pámbetani enga Bibliaeri ambe niuaka jorhentpini?

⁵ Bibliaeri jorhenguarhikua ma jimbo, jorhentpirisï jatsiti para jarhuatani jorhenguarhirini sési kurhanguni Tata Diosïri Karakatani. Engajtsïni jorhentpiri pʼímarhiska parachi nirani pámbetani, ju je miáni eskachi niuaka parachi jarhuatani (Ecl. 4:9, 10). Jimajkani, ¿nénachi uá sési jarhuatani?

6. ¿Nénachi uá úni ambe enga uandajka Proverbios 20:18 engachi niuaka pámbetani nemani Bibliaeri ambe jorhentpini?

⁶ Ju je sési prepararikuarhini. Orheta uákachi arhini jorhentpirini eskajtsïni uandontskuarhecheaka máru ambe jorhenguarhiri (arhinta je Proverbios 20:18). Uákachi kurhamarhini ambe nitamakuarhixaki, ambeksï jorhenguarhia ka ambe uékasïni eska jorhenguarhiaka ima jorhenguarhikua jimbo. Ístuchi úpiringa kurhamarhini ambechi uá uandani o úni ka ambe nómbe ka ambechi uá úni parachi uinhaperantani paraka niáraaka marhuakuni Jeobani. Ísïsti, jorhentpiri nójtsïni méni aianguati ambe ma jorhenguarhiriri irekueri ambe. Joperu ju je sési úrani imani ambe engajtsïni arhiaka. Misionera ma enga Joy arhinhajka inde ambe arhiasïni imechani engaksï nirajka pámbetani, ima uandasïndi: “I ambe jarhuatasïndi imani engareni pámbetajka paraka uékaaka jarhuatani jorhenguarhirini ka para míteni ambe uandani jorhenguarhikuarhu”.

7. ¿Andisï xáni jukaparhakue eskachi sési prepararikuarhiaka?

⁷ Engachi niuaka pámbetani nemani enga Bibliaeri ambe jorhentpiaka, sési jauati eskachi sési prepararikuarhiakia imani ambe jingoni engachi jorhenguarhiaka (Esd. 7:10).  Dorín engachi párrafu 3 uandaka, uandasïndi: “Kánikua sési pʼikuarherasïnga enga ima engareni nirajka pámbetani sési prepararikuarhijka, ísï úsïndi uandani ambe ma enga marhuakuaka jorhenguarhirini”. Ístu i ambe ambakiti ejemplu ma íntskuati jorhenguarhirini, jimboka kuenta íntskukurhiaka eskajtsï sési preparadu nirasïnga. Engajtsï no úska sési jorhenguarhini imani jorhenguarhikuani engajtsï exeaka, tiempu arhuta je parajtsï exeni náki sánderu jukaparhakua ambeski ima jorhenguarhikueri.

8. ¿Ambejtsïni jarhuataa parachi imani ambe kurhajkuarhini kómarhikuarhu enga jorhenguarhiri ma uétarhinchani jauaka?

⁸ Kómarhikua kánikua jukaparhakuesti engachi jorhentpini jauaka. Ísï jimbo, jukaparhakuesti eskachi sési eratseakia ambe engachi uandaaka engachi arhinhaaka parachi jucha kómarhikua úni. Ísïchi uáka imani ambe uandani enga jorhenguarhiri uétarhinchaaka (Sal. 141:2). Hanae pirenchi ma enga Japón anapueka útasï miásïndi kómarhikuechani enga pirenchi ma uénga enga pámbetenga imeri jorhentpirini. Uandasïndi: “Exesïrenga eska ambakiti pájperakua ma jatsispka Jeoba jingoni ka ji uékasïrenga ísïni eska ima. Ístu, enga uandenga juchiti nombrini imeri kómarhikuecharhu, úsïrendi eskani sési pʼikuarherapiringa”.

9. Eska na uandajka Santiagu 1:19, ¿nénachi uá ambakiti kompanieru máeni, enga erachi ma jorhentpini jauaka Bibliaeri ambe?

⁹ Ju je jarhuatani jorhentpirini. Prekursora espesiali ma enga Omamuyovbi arhinhajka ka enga Nigeria irekaka, uandasïndi: “Ambakiti kompanieru ma, jingontku jarhasïndi enga ma jorhentpini jarhajka Bibliaeri ambe. Ístu, ambakiti ambe uandasïndi ka no jukari, jimboka mítesti eska jorhentpirisï jatsika para jorhendani Bibliaeri ambe jorhenguarhirini”. Jimajkani, ¿kánchi jatsiski para uandani ka ambe? (Prov. 25:11). Ju je kánikua jingontku kurhajchani jarhani jorhentpirini ka ístu jorhenguarhirini (arhinta je Santiagu 1:19). Ísïchi uáka listu jarhani para jarhuajpeni enga uétarhiaka. Ísïsti, nóchi jatsiska para kánikua uandani, ójkutani jorhentpirini enga ima jorhendani jauaka, ochi máteru amberi uandani jarhani. Joperu uákachi uandani máru ambe, ejemplu ma úrani o kurhamarhikua ma paraka jorhenguarhiri sési kurhanguaka ambe enga jorhenguarhini jauaka. Ménisïchi úpiringa eratseni eskachi no kánikua jarhuajpexaka, joperu engachi felisitariska jorhenguarhirini ka engachi xarhataska eskachi uékasïnga jarhuatani, jarhuatanchi jauaka paraka niáraaka marhuakuni Jeobani.

10. ¿Néna uá jarhuatani jorhenguarhirini ma engachi aianguaka ambe engachi jucha nitamakuarhika?

¹⁰ Ju je aianguni ambe engachi nitamanchaka jucha. Engachi sési exeaka, uákachi sáni uandontskuarhekuni jorhenguarhirini nénachi jorhenguarhiski jucha jurhimbikuani, nénachi úski orhepani uérakuani uandanhiatechani o na engajtsïni Jeoba jarhuataka juchari irekuarhu (Sal. 78:4, 7). Jamberi i ambesï uétarhinchani jati kurhaani jorhenguarhiri ka úpirindi eska sánderu  mintsikaaka Tata Diosïni o jarhuatani para úni imani ambe enga uétarhijka para itsï atakuarhini o jarhuatani para orhepani uérakuni uandanhiatani ma (1 Ped. 5:9). Gabrieli prekursori ma enga Brasil irekaka, miásïndi ambe enga jarhuatapka jiáni enga Bibliaeri ambe jorhenguarhini japka. “Engajtsïni erachicha uandontskuarhechenga ambe engaksï nitamakuarhienga, jorhendastirini eska Jeoba míteaska juchari uandanhiatechani. Engaksï imecha úka orhepani uérakuani, jíjtuni uáka ísï úni”.

11, 12. ¿Andichisï jatsi para tsípikua jingoni erokaani imani jorhenguarhirichani engaksï uénaaka tánguarhikuecharhu jurhani?

¹¹ Paraka Bibliaeri jorhenguarhiri ma niáraaka itsï atakuarhini, jatsisti para no kueratani tánguarhikuecharhu ka ísï úni eska na jorhenguarhiaka (Ebr. 10:24, 25). Jamberi primeru xanhari enga niuaka tánguarhikuecharhu, jindeuati jimboka imeri jorhentpiri pʼímarhiska. Joperu, ¿nénachi uá iáminduecha jarhuajpeni paraka jorhenguarhiri seguiriuaka nirani tánguarhikuecharhu?

¹² Ju je sési erokani jorhenguarhirini (Rom. 15:7). Engachi úska eska jorhenguarhiri sési pʼikuarheraaka Kʼumanchikua Reinuerirhu, jamberi i ambe uáti eska no kuerataaka tánguarhikuecharhu. Ju je sési uandajpani ka mítetaraani máteru erachichani, joperu nóchi uáka imani ambe enga no sési pʼikuastaaka jorhenguarhirini, ni jandiajku jurajkuni eratseparini eska nema imani jingoni jarhaska; jamberi imeri jorhentpiri nótki niárani jarhani o úni jarhani ambe ma kúnguarhikuarhu. Ju je jingontku kurhajchani ka uandanhiani imani jimbo. ¿Néna uá jarhuatani i ambe? Ju je exeni ambe enga uandajka Dimitri enga apenasi máru uéxurhinika enga itsï atakuarhika ka enga iásï orhejtsïkutiri jarhuajpirikia. Enga miántajka primeru xanhari enga nípka tánguarhini uandasïndi. “No inchaspka Kʼumanchikua Reinurhu jimbokani chéxapka. Erachi marini exespti ka imarini incharaspti. Ískurini pakataspti engajtsï uánikuecha andarhierapka parajtsïni uandajpani. Xáni tsitispka i ambe engani uékenga eska pauani pauani japiringa tánguarhikuecha. No méni ísï pʼikuarheraxapka”.

13. ¿Néna uá jarhuatani juchari jángua jorhenguarhirichani?

¹³ Ju je ambakiti ejemplu ma íntspini. Juchari jángua ístu uáti jarhuajpeni paraka jorhenguarhiri ma seguru jauaka eska i jindeeska jurhimbikua (Mat. 5:16). Vitali prekursori ma enga Moldavia anapueka, uandantasïndi: “Engani exepka na engaksï irekenga, eratseni ka na engaksï jámenga kúnguarhikuarhu anapu erachicha, seguru jarhaspka eskaksï Jeobaeri testiguecha jindeespka relijioni jurhimbiti”.

14. ¿Néna úpirini juchari ejemplu jarhuatani nemani para niárani Jeobani marhuakuni?

¹⁴ Enga jorhenguarhiri ma uékaaka itsï atakuarhini, jatsisti para ísï irekani eska na jorhenguarhini jaka. I ambe no méntkisï fásilisïndi.  Joperu enga jorhenguarhiri exeaka na engajtsïni marhuachejka ísï irekani eska Biblia na uandajka, imajtu uékaati májkueni úni eska jucha (1 Kor. 11:1). Ju je exeni ambe enga nitamakuarhipka Hanae, engachi párrafu 8 jimbo uandaka. Miásïndi: “Erachichaksï imani ambe úsïrendi ambe engani ji jorhenguarhini japka. Imechani exepariani, jorhenguarhispka uinhaperantaani máteruechani, puátspintani ka uékperakua xarhatakuani. Méntkisïksï ambakiti ambe uandasïrendi máteruecheri. Ji uékasïrenga ísïni eska imecha”.

15. Eska na uandajka Proverbios 27:17, ¿andichisï jatsi para amigu úkuarhini ima jorhenguarhiricheri engaksï uénajkia tánguarhikuecharhu nirani?

¹⁵ Ju je jorhenguarhiriri amigueni. Méntkisï enga jorhenguarhiri niuaka tánguarhikuecharhu, ju je xarhatani eskachi uékasïnga jarhuatani (Filip. 2:4). No inchakukuparini imeri irekuarhu, uákachi sánderu sési míteni engachi kurhamarhiska imeri familieri ambe, imeri ánchikuarhiteri ambe o na enga nikuni jaka imeri jorhenguarhikuarhu. Ístuchi uáka felisitarini engachi exeaka eska mójtakuskia máru ambe. Ísïchi uáka sánhani arhini imeri amigueni ka jarhuatani paraka niáraaka marhuakuni Jeobani ka itsï atakuarhini (arhinta je Proverbios 27:17). Hanae enga iásï prekursora regularikia, uandasïndi na enga pʼikuarherenga enga uénapka nirani tánguarhikuecharhu: “Engani uénapka jatsiani amiguechani kúnguarhikuarhu, sánderuni uékasïrenga tánguarhikuecharhu nirani. No méni kueratasïrenga nájkirukani kuátaratini japiringa. Kánikua tsitisïrenga juchiti jimbanhi amiguecha jingoni jarhani ka i amberini jarhuataspti para nóteruni kúrhiania imechani engaksï no marhuakuenga Jeobani. Itsï atakuarhispka jimbokani uékasïrenga sánderuni andarhiera Jeobani ka ístu erachichani”.

16. ¿Ambechi máteru ambe uá úni paraka jorhenguarhiri ma sési pʼikuarheraaka kúnguarhikuarhu?

¹⁶ Enga jorhenguarhiri mójtakurhini jauakia, ju je jarhuatani paraka kuenta úkuarhiaka kúnguarhikua jingoni. Uákachi ísï úni engachi pʼímarhiska juchinio (Ebr. 13:2). Denís, erachi ma enga Moldavia marhuani jaka, i ambe miásïndi enga Bibliaeri ambe jorhenguarhini japka: “Erachichajtsïni someni pʼímarhisïrendi jíndeni ka juchiti uarhiitini parachi imecha jingoni jarhani. Uinhaperantasïrendijtsïni engajtsïni aianguenga na enga Jeoba jarhuataapka imecheri irekuarhu, ima ambejtsïni jarhuataspti parachi seguru jarhani eskachi uékasïrenga Jeobani marhuakuni ka eskachi ambakiti irekua ma jatsipiringa engachi ísï úpiringa”. Enga jorhenguarhiri ma uérajkia aianhpini, uákachi pʼímarhini paraka juchantsïni jingoni uéraaka aianhpini. Brasil anapu erachi ma enga Diego arhinhajka, uandasïndi: “Uánikua erachichajtsïni pʼímarhispti parani imecha jingoni uérani aianhpini, ísï úspka sánderuni sési míteani ka sánderuni sési aianhpini. Uánikua ambe jorhenguarhispka ka sánderuni andarhieraspka Jeobani ka Jesusini”.

17. ¿Ambeksï uá úni orhejtsïkuticha jorhenguarhiricha jimbo?

¹⁷ Arhutani tiempu para jorhenguarhiricha.  Orhejtsïkuticha, chári uékperakua ka engajtsï uandanhiaska jorhenguarhini jimbo, uáti úni eska ima niáraaka itsï atakuarhini. ¿Úpirintsï uandontskuarheni imecha jingoni tánguarhikuecharhu? Jorhenguarhirichaksï exeati eskajtsï uandanhiasïnga imechani jimbo engajtsï miántaska imecheri arhinhakuani, sánderia engaksï uénaaka komentariu íntspini tánguarhikuarhu. ¿Úpirintsï pámbetani aianhpirini ma enga niuaka Bibliaeri ambe jorhendani nemani? I ambe uáti kánikua jarhuatani jorhenguarhirini. Jackie, prekursora ma enga Nigeria irekaaka, uandasïndi: “Uánikua jorhenguarhirichaksï ísku pakarasïndi engaksï kuenta íntskukuarhijka eska erachi engareni pámbetajka orhejtsïkutiska. Jorhenguarhirini ma arhispti: ‘Juchiti pastori no méni úpirindi i ambe. Ima imechantkusï pʼorhembiajti engaksï jatsikuarherika ka jiántku engaksï maiamuaka’”. I kʼuiripu iásï niraxatia tánguarhikuecharhu.

18. ¿Nénaksï uá úni orhejtsïkuticha ambe enga uandajka 1 Pedru 5:2?

¹⁸ Jorhendaani ka uinhaperaantani jorhentpirichani. Orhejtsïkuticha chájtsï ambakiti ánchikuarhita jatsiska, jorhendaani jorhentpirichani parakaksï ambakiti aianhpiricheuaka ka ambakiti jorhentpiricheni (arhinta je 1 Pedru 5:2). Enga nema no seguru pʼikuarheraaka jorhendani nemani Bibliaeri ambe jimbokajtsï chá jima jauaka, arhi je eskajtsï chá uáka jorhendani jorhenguarhirini. Jackie, engachi máteru párrafu jimbo uandaka, uandasïndi: “Orhejtsïkutichajtsïni someni kurhamarhisïndi náksï niraxaki juchiti jorhenguarhiricha. Engani uandanhiata ambe jatsijka, imajtsïni ambakiti konsejuechani íntsaasïndi”. Orhejtsïkutichaksï kánikua uáti jarhuajpeni para uinhaperaantani ka jarhuataani jorhentpirichani paraksï no kuatantani (1 Tes. 5:11). Jackie ístu uandasïndi: “Kánikua tsitisïnga engajtsïni orhejtsïkuticha uinhaperantajka ka engajtsïni arhijka eskaksï kánikua jukaparharasïnga na engani xáni jánguarhintajka. Imecheri uandakuechaksï ísïsti eska itsï tsʼirapiti enga uinhamu aparhikuarhini jarhajka. Úsïndi eskani sánderuni mintsikaaka Jeobani ka eskani sánderuni tsípikua jingoni niuaka jorhentpini Bibliaeri ambe” (Prov. 25:25).

19. ¿Ambe jimbochi uá sési pʼikuarherani iáminduecha?

¹⁹ Nájkirukachi iásï no nemani jorhendani jaka Bibliaeri ambe, uákachi jarhuajpeni paraka nema sánderu andarhieraaka Jeobani. No kánikua uandaparini uákachi jarhuatani jorhentpirini engachi sési eratseska ambe engachi uandaaka jiáni engachi jorhentpini jauaka Bibliaeri ambe. Engaksï jorhenguarhiricha niuaka Kʼumanchikua Reinuerirhu, ju je imecheri amigu úkuarhini ka ambakiti ejemplu máeni para imecha. Ka orhejtsïkutichaksï uáti uinhaperantani jorhenguarhirichani engaksï tiempu arhutaska para imecha jingoni jarhani ka engaksï jorhendaaska ka felisitariuani jorhentpirichani. Kánikuachi sési pʼikuarherasïnga engachi újka sáni jarhuatani nemani paraka niáraaka xénchani ka marhuakuani Jeobani.