1. ¿Na jásï uandanhiatechanchi jatsiasïni Jeobaeri marhuaricha?

¿NO SÉSI ambechi nitamakuarhixaki? Jamberijtsïni kúnguarhikuarhu anapu erachi ma no sésijtsïni pʼikuastati (Sant. 3:2). O jamberijtsïni eskuelarhu o ánchikuarhitarhu anapu kompanieru ma teresmarhuntsïni jimbokachi marhuakuxaka Jeobani (1 Ped. 4:3, 4). O jamberi juchari familia uékani jarhani eskachi nóteru niuakia tánguarhikuecharhu o parachi nóteru aianhpinia Jeobaeri ambe (Mat. 10:35, 36). Engajtsïni i ambe kánikua no sési pʼikuastani jaka ka ísïchi pʼikuarherani jarhani enajkichi nóteru uáia, uákachi seguru jarhani eskajtsïni Jeoba íntskuaka uinhapikua ka jánhaskakua parachi úni orhepani uérakuni náki uéjki uandanhiata ma.

2. Eska na arhijka Roma 15:4, ¿nénajtsïni uá marhuacheni arhintani Tata Diosïri Karakatani?

² Jeobajtsïni aiangusïndi imeri Karakatarhu na engaksï nitamakuarhipka máru kʼuiripuecha ka aiangusïndijtsïni parachi jorhenguarhini imecheri ambe, i ambesï karapti apostuli Pablu ixú Roma 15:4 (arhinta je). I ambejtsïni uinhaperantasïndi ka erokuarhikuajtsïni ma íntskusïndi, no soluchi jatsiska para arhintani Bibliani, sino jurajkuni eska mójtakuaka juchari eratsekuani ka eskajtsïni niárachiaka juchari mintsitarhu. Parachi úni orhepani uérakuni uandanhiatechani, uákachi arini ambe úni: 1) kómarhikua úni, 2) eranhaskani, 3) eratsentani ka 4) úni ambe engachi jorhenguarhijka. Ini jorhenguarhikua jimbo, exeakachi néna úni ini tʼámu ambe. * Ka tátsekuachi exeaka ambe engachi uáka jorhenguarhini rei Dabidiri ka apostuli Pablueri ambe, ini tʼámu ambe úraparini.

3. Antede uénanchi arhintani Bibliani, ¿ambechi jatsiski para úni ka andi?

 ³ ◌1) Kómarhikua úni. Antedechi uénani jorhenguarhini Bibliani, ju je kurhakuni Jeobani eskajtsïni jarhuataaka kurhanguni ambe engachi arhintaaka. Engachi problema ambe jatsiaka, jatsiskachi para kurhakuni Jeobani eskajtsïni jarhuataaka exentani ambakiti konseju ma Bibliarhu parachi úni orhepani uérakuani uandanhiatechani (Filip. 4:6, 7; Sant. 1:5).

4. ¿Ambejtsïni uá jarhuatani parachi sánderu sési kurhanguni engachi arhintani jauaka Bibliani?

⁴ ◌2) Eranhaskani. Úni eranhaskani Jeobaeri intsïmperata máesti. Parajtsïni úni marhuacheni ambe engachi arhintani jauaka Bibliarhu, jatsiskachi para eranhaskani eskachi jima jarhaska, eskachi jucheska ima kʼuiripu enga Biblia uandajka. Ju je jánguarhintani exeni ambe enga ima exeni japka ka na enga pʼikuarherani japka.

5. ¿Ambeski eratsentani ka ambejtsïni jarhuata ísï úni?

⁵ ◌3) Eratsentani. Jindesti iatsitakuarhu eratsentani ambe engachi arhintani jauaka. Engachi eratsentaaka ambe engachi arhintaaka sánderuchi sési kurhanguaka. No eratsentani ambe engachi arhintaaka Bibliarhu, ísïsti komu rompekabesa ma etsandurhikata jatsini mesarhu ka no úntani jarhani, peru engachi eratsentajka ísïsti komu eska indeni rompekabesani úntani jarhani. Ma ambe engajtsïni jarhuataaka eratsentani jindesti mókuantani ini járhati kurhamarhikuechani: “¿Ambe úspi i kʼuiripu para orhepani uérakuani uandanhiatechani? ¿Néna jarhuataspi Jeoba? ¿Ambe uá jorhenguarhini íri ambe parani úni orhepani uérakuani uandanhiatechani?”.

6. ¿Andichisï jatsi para úni ambe engachi jorhenguarhijka?

⁶ ◌4) Úni ambe engachi jorhenguarhijka. Jesusi uandasti eska engachi no uáka imani ambe engachi jorhenguarhijka ísïuakachi komueska acheeti ma enga imeri kʼumanchikuani kutsarirhu újka. Joperu no marhuasïndi na enga xáni jánguarhintajka, jimboka jiáni enga janiaka, tarhiani ka iorhentpeni xerhentaaka imeri kʼumanchikuani (Mat. 7:24-27). Májkueni, engachi kómarhiska, eranhaskani ka eratsentani joperu engachi no úska ambe engachi jorhenguarhijka, no ma ambe marhuauati ima ambe engachi xáni úkia ka jiáni engachi uandanhiata ambe jatsiaka juchari jakajkukua no xáni uinhapiti jauati. Joperu engachi ísï úska eskachi na jorhenguarhika, uákachi ambakiti ambe erakuni úni, sánderuchi pínandikua jatsiaka ka sánderuchi mintsikaaka Tata Diosïni (Is. 48:17, 18). Úraparini ini tʼámu ambe, ju je exeni ambe engachi uáka jorhenguarhini rei Dabidiri ambe.

7. ¿Néri ambechi jorhenguarhini jaua?

⁷ ¿Niáraskijtsïni amigu ma o familiarhu anapu ma traisionarini? Enga ísïka, kánikuajtsïni marhuacheati miántani ambe enga Biblia uandajka Absaloniri, rei Dabidiri uájpa ma. Absaloni niáraspti traisionarini imeri táti jémbani ka ima uékasïrendi juramutini (2 Sam. 15:5-14, 31; 18:6-14).

8. ¿Ambechi uá úni parajtsïni Jeoba jarhuatani?

⁸ ◌1) Kómarhikua úni. Miáparini ambe engachi arhintaaka, jatsiskachi para kómarhini Jeobani ka aiangukuarhini na engachi meru pʼikuarherajka indeni ambe jimbo engajtsïni úchika (Sal. 6:6-9). Ka tátsekua, kurhakuni eskajtsïni jarhuataaka exentani Bibliarhu ambe engachi jatsika para úni.

9. ¿Ambe úkuarhispi Dabidi ka Absaloni jingoni?

⁹ ◌2) Eranhaskani. Ju je eratsentani ambe enga úpka Absaloni ka na enga no sési úkupka Dabidini. Absaloni, ióni jánguarhintasptia kʼuiripuechani jaiapanherantaani (2 Sam. 15:7). Jiáni enga exepkia eska tiempuespka, axaaspti  espiechani iámu Israeli parakaksï kʼuiripuecha imani jiókuarhipiringa komueska jimbanhi rei, asta niáraspti támisï jánhastani Aitofelini enga jindeepka rei Dabidiri amigu ka enga konseju ambe íntskuenga. Absaloni niáraspti arhini kʼuiripuni eska ima jíndespkia jimbanhi rei (Sal. 41:1-9). Enga Dabidi mítepka eska Absaloni jirinhantaxapka para uándikuni, niraspti sïpakuarhini Jerusaleni. Absaloniri ejersitu niáraspti uarhiperani Dabidiri ejersitu jingoni, joperuksï no úspti andani ka niárasptiksï uándikuni Absalonini.

10. ¿Ambe úpirini úni rei Dabidi?

¹⁰ Ju je eranhaskani na enga pʼikuarherapka Dabidi. Ima xénchasïrendi Absalonini ka mintsikasïrendi Aitofelini, joperuksï imecha no sési pʼikuataspti, astaksï uékasïrendi uándikuni. Dabidi úpirindi eratseni eskaksï máteru imeri amiguecha, ístuksï Absaloni jingoni niáraspka úkuarhini o jandiajku sïpakuarhini máteru paisi jimbo. Joperu no úspti i ambe, sánderu sési, úspti orhepani uérakuni ini uandanhiatani. ¿Néna?

11. ¿Ambe úspi rei Dabidi enga no sési nitamakuarhini japka?

¹¹ ◌3) Eratsentani. ¿Ambechi uá jorhenguarhini ambe enga nitamakuarhipka Dabidi? Úpiringachi kurhamarhikuarhini: “¿Ambe úspi Dabidi para jandiajku orhepani uérakuni ini uandanhiatani?”. Kurhakuspti Jeobani eska jarhuatapiringa ka ístu imeri amiguechani. Ka no jurajkuspti eska chétapu jimbo, imani ambe úpiringa enga no sési japiringa o eska no jánhaskapiringa ambe úni. Ka nájkiruka komu pʼikuarherani japka seguirispti tsípikua jingoni irekani ka seguirispti mintsikani Jeobani ka ístu imeri amiguechani.

12. ¿Néna jarhuataspi Jeoba, Dabidini?

¹² ¿Néna jarhuataspi Jeoba, Dabidini? Engachi sánderu inbestigariska, uákachi exeni eska Jeoba íntskuspka uinhapikua ka tekaantskua enga uétarhinchani japka para orhepani uérakuni indeni uandanhiatani (Sal. 3:1-8; ambe enga karhakua arhijka antede uénani i kapitulu). Ístu újchakuraspti ambe enga ima erakupka úni ka jarhuataaspti Dabidiri ambakiti amiguechani jiáni engaksï uarhipeni japka paraksï imani kuájchakuni.

13. ¿Nénachi uá májkueni úni eska Dabidi engajtsïni nema no sési pʼikuastaaka? (Mateu 18:15-17).

¹³ ◌4) Úni ambe engachi jorhenguarhijka. Ju je kurhamarhikuarhini: “¿Néna uá májkueni úni eska Dabidi?”. Jánguarhintani sóntku sési peentani uandanhiata ambe engachi jatsiaka. Seguni ambe engachi nitamakuarhini jauaka, uákachi úni ambe enga Jesusi uandapka ixú Mateu kapitulu 18, o ístu i ambejtsïni uáti jarhuatani exeni ambe engachi jatsika para úni (arhinta je Mateu 18:15-17). Nóchi jatsipiringa para jurajkuni eska ima ambe engachi pʼikuarherani jauaka, uáka eskachi no eratseparini erakuaka úni ambe ma. Jatsiskachi para kurhakuni Jeobani eskajtsïni jarhuataka sési erakuni úni ambe ma. Jatsiskachi para seguirini mintsikaani juchari amiguechani ka jiókuarhini imecheri jarhuajperatani (Prov. 17:17). Joperu enga sánderu jukaparhakueka, jindeesti jiókuarhini Jeobaeri konsejuechani engajtsïni imeri Karakatarhu íntsaajka (Prov. 3:5, 6).

14. ¿Kántsïni uá jarhuatani arhintani 2 Timoteo 1:12-16 ka 4:6-11, 17-22?

¹⁴ ¿Juchari familia no uékasïni eskachi marhuakuaka Jeobani? O ¿imani paisini jimbochi irekaxaki engajtsïni no jurajkujka para aianhpini? Enga ísïika, uátijtsïni uinhaperantani ambe enga arhijka 2 Timoteo 1:12-16 ka 4:6-11, 17-22. * Pablu jiáni karaaspti ini karakatechani enga ónhakata japka.

15. ¿Ambechi uá kurhakuni Jeobani?

 ¹⁵ ◌1) Kómarhikua úni. Antede arhiantani ini karakatechani, ju je aianguni Jeobani juchari uandanhiatechani ka na engachi pʼikuarherajka. Meruchi imani ambe aianguaka ambe engajtsïni uandanhiatajka. Jiájkani engachi arhintani jauaka ambe enga nitamakuarhipka Pablu, ju je kurhakuni Jeobani eskajtsïni jarhuataaka exeantani konsejuechani engajtsïni juchantsïntu uáka májkueni jarhuatani.

16. ¿Ambe ka ambe nitamakuarhinchaxapi Pablu?

¹⁶ ◌2) Eranhaskani. Ju je eranhaskani eska jucha jindeeska Pablu. Ónhakata jarhaspti jini Roma. Nájkiruka antesi ónhakata japkia, iásï seguru jarhasptia eska uándikunhapiringa. Máru imeri kompanieruechaksï jurajkuspti ka kánikua kuataratixaptia (2 Tim. 1:15).

17. ¿Ambe úpirini úni Pablu?

¹⁷ Pablu úpirindi ióntki anapu ambe miántani ka eratseni eska enga máteru ambe erakupiringa úni, jamberi no ónhakata japiringa. Úpirindi ikiani pakarani Asia anapuecha jingoni engaksï jurajkupka ka nóteru mintsinharhiania imeri amigu jémbecha. Peru no ísï úspti. ¿Ambe jarhuataspi para seguirini mitsinharhiani imeri amiguechani ka Jeobani?

18. ¿Ambe úspi Pablu?

¹⁸ ◌3) Eratsentani. Uákachi kurhamarhikuarhini: “¿Ambe úspi Pablu para ima mismu jarhuatakuarhini?”. Nájkiruka mítepkia eska nóteru ióndani uarhipiringia, no mirikurhispti sánderu jukaparhakua ambe, k’éri ambe arhini Tata Jeobani. Ístu, seguirispti jirinhakuntani néna jarhuataani máteruechani ka mintsikakua jingoni kómarhikuarhispti Tata Jeobani (2 Tim. 1:3). No eratsentani pakaraspti andiksïsï máteruecha jurajkupi, sino agradeserikuaspti imeri amigu jémbechani engaksï no jurajkupka, engaksï xénchperakua xarhatakupka ka engaksï jarhuatapka. Ístu seguirispti jorhenguarhini Tata Diosïri Karakateri ambe (2 Tim. 3:16, 17; 4:13). Ka ambe enga sánderu jukaparhakueka, seguru jarhaspti eska Jeoba ka Jesusi xénchasïrenga, eskaksï no méni jurajkuspka ka eskaksï kóndintapiringa.

19. ¿Néna jarhuataspi Jeoba, Pabluni?

¹⁹ Jeoba aianguspti Pabluni eska niárapiringa no sési kánhani enga kristianuepiringia (Uku. 21:11-13). ¿Néna jarhuataspi Jeoba, Pabluni? Mókukuantaspti imeri kómarhikuechani ka uinhaperantaspti (2 Tim. 4:17). Ístu Jeoba arhispti eska intsïnhapiringa kóntperatani enga jimbo xáni jánguarhintapka ka úraaspti Pablueri amigu jémbechani parakaksï jarhuatapiringa imani ambe jingoni enga ima uétarhinchani japka.

20. ¿Nénachi uá májkueni jásï ma jakajkukua jatsini eska apostuli Pablu na uandapka ixú Roma 8:38, 39?

²⁰ ◌4) Úni ambe engachi jorhenguarhijka. Ju je kurhamarhikuarhini: “¿Néna uá májkueni úni eska Pablu?”. Májkueni eska Pablu, míteskachi eskachi no sési kánhaaka juchari jakajkukua jimbo (Mar. 10:29, 30). Parachi no méni jurajkuni Jeobani jatsiskachi para kómarhini mintsinharhikua jingoni ka jánguarhintani pauani pauani jorhenguarhini Bibliaeri ambe. Nóchi méni jatsiska para mirikurhini eska ambe enga sánderu jukaparhakueka jindeeska k’éri ambe arhini Tata Jeobani. Uákachi seguru jarhani eskajtsïni ima no méni jurajkuaka ka eska no nema uáka úni eskajtsïni ima nóteru xénchaakia (arhinta je Roma 8:38, 39; Ebr. 13:5, 6).

21. ¿Ambe jarhuataspi Aya ka Hectorini paraksï úni orhepani uérakuani uandanhiatechani?

²¹ Ambe uéjki engachi nitamakuarhini jauaka, Bibliarhu anapu ejempluechajtsïni uáti jarhuatani. Por ejemplu, Aya, Japóni anapu prekursora ma, uandasïndi eska ambe enga Jonasi  nitamakuarhipka, jarhuataska para nóteru chénia aianhpini xanharuecha jimbo. Hector, Indonesia anapu tumbi ma, enga marhuakujka Jeobani nájkiruka imeri táti jémbecha no Testigueka, uandasïndi eska Rutiri ejemplu jarhuataska para sánderu uékani jorhenguarhini Jeobaeri ambe ka marhuakuni.

22. ¿Nénajtsïni uá sánderu sési marhuacheni bideuecha, Bibliaeri arhintskuecha engaksï uandantskueni arhikuarhintajka ka libru Ambe engani jorhenguarhijka Bibliaeri?

²² ¿Nanichi uá exentani sánderu informasioni ima kʼuiripuecheri enga Biblia uandaajka ka engajtsïni uáka uinhaperantani? Bideuecharhu, Bibliaeri arhintskuarhu engaksï uandantskueni arhikuarhintajka ka librurhu Ambe engani jorhenguarhijka Bibliaeri, engaksï xarhatajka na enga úkuarhipka ambe ma. * Antede exeani, kurhauani o arhiantaani i ambe enga xáni sési úkata jaka, kurhakuakachi Jeobani eskajtsïni jarhuataaka exeni na engajtsïni marhuacheaka i ambe. Ju je eranhaskani eskachi jucha ima kʼuiripueska enga Biblia uandajka. Eranhaskani ambe enga úpka ka néna enga jarhuatapka Jeoba imeri marhuarini para úni orhepani uérakuani uandanhiatechani ka tátsekua, ísïchi uáka eskachi na jorhenguarhika. Ka últimu, ju je uinhaperaantani ka jarhuataani máteruechani ka ísïchi xarhatakuni jauaka Jeobani eskachi agradeserikusïnga imeri jarhuajperatani.

23. ¿Ambejtsïni aiachisïni Jeoba ixú Isaías 41:10, 13?

²³ Úpirindi úkua jukani ini parhakpini jimbo irekani enga Noambakiti juramuni jaka ka ménisïchi no jánhaskani ambe úni (2 Tim. 3:1). Peruchi no jatsiska para uandanhiani o chéni, jimboka Jeoba mítetixaka ambe engachi nitamakuarhini jarhajka, engachi uétarhinchani jarhajka jarhuajperata imajtsïni aiachisïndi eskajtsïni jarhuataaka imeri jurhijkandani anapu jájkini jingoni enga kánikua uinhapitiika (arhinta je Isaías 41:10, 13). Seguruchi jarhaska eskajtsïni Jeoba jarhuataaka ka Bibliajtsïni uinhaperantaati parachi úni orhepani uérakuani náki uéjki járhati uandanhiatechani.