1. ¿Ambechi uá uandani tumbi sapirhaticheri engaksï itsï atakuarhikia?

TUMBIICHA, chájtsï uánikua ambe uáka úni. Uánikuajtsï uinhapitiska ka nójtsï sóntku kuatarasïnga (Prov. 20:29). Kánikuajtsï jarhuajpesïnga kúnguarhikuarhu, seguru eskajtsï uánikuecha uéjka marhuani komu orhejtsïkuticheri jarhuajpiricha. Joperujtsï máru úpiringa ísï pʼikuarherani eskaksïni máteruecha ísï exesïnga eskajtsï jukari sapirhatiska o eskajtsï no míteska néna úni ánchikuarhita ma enga jukaparhakueka. ¿Ísïri pʼikuarherasïni? Nájkirukari sapichku jaka, jarhastiksï máru ambe engari uáka úni desde iásï uératini paraksïni kúnguarhikuarhu anapuecha mintsikaaka ka janhanharhini.

2. ¿Ambechi exea ini jorhenguarhikua jimbo?

² Ini jorhenguarhikua jimbo, exenchi jauaka rei Dabidiri ambe. Ístuchi exeni jauaka ambe engaksï úpka tsimani Judá anapu reicha: Asá ka Jeosafati. Exeakachi náki uandanhiatechanksï jatsiaspi, ambe engaksï úpka ka ambe engaksï uáka jorhenguarhini tumbi sapirhaticha imecheri ejemplu jingoni.

3. ¿Nénaksï uá jarhuataani tumbi sapirhaticha kúnguarhikuarhu anapu erachichani engaksï jatirikia?

³ Enga Dabidi tumbipka, uánikua ambe jorhenguarhispti úni enga jukaparhakua ambepka para máteruecha. Xarharasïrendi eska sési pájperasïrenga Tata Diosï jingoni; ístu jánguarhintaspti para ambakiti kústati máeni ka úraspti indeni ambe enga jorhenapka para jarhuatani Saulini, reini enga Tata Diosï erakupka (1 Sam. 16:16, 23). Májkueni eska Dabidi, uánikua tumbi sapirhatichaksï mítesti úni ambe ma enga uáka jarhuataani kúnguarhikuarhu anapuechani. Por ejemplu, uánikua erachicha  engaksï jatirikia jukaparharasïndiksï enga nema jarhuatajka tabletani úrani o máteru aparatuechani paraksï jandiajku jorhenguarhini Bibliaeri ambe ka paraksï prepararikuarhini tánguarhikuecha jingoni. Ambe engari tʼu mítekuka ini aparatuecheri ambe uáti kánikua jarhuataani.

4. Májkueni eska Dabidi, ¿náksï jatsiski para jámani tumbi sapirhaticha? (Exe imajenini enga uénakuarhu jaka i rebisteri).

⁴ Dabidi xarhataspti eska méntkisï úsïrenga ambe enga arhinhenga ka eska mintsinharhikuespka. Por ejemplu, enga tumbi sapichuepka, arhinhaspti eska kuidariuapiringa táti jémberi karichichani ka ima jánguarhintaspti sési úni i ánchikuarhitani, nájkiruka peligrosuepka. Sánisï tátsekua, arhispti rei Saulini: “Ji juchiti tátiri karichichani eranguasïnga. Ma xanhari leoni ma jurhaspti ka páspti karichini ma ka ménderu osu ma jurhaspti ka ístu páspti karichini ma. Ji niraspka andanguani ka ataaspka, ka euamukuantaspka karichichani” (1 Sam. 17:34, 35). Dabidi mítespti eska jatsipka para kuidariuani karichichani ka no sáni chéparini kuájpiaspti. Tumbi sapirhatichaksï uáti májkueni úni engaksï sési úska náki uéjki ánchikuarhita ma engaksï intsïnhaaka.

5. Ísï eska na xarhatajka Salmo 25:14, ¿ambeksï sánderu jukaparhakua ambe uá úni tumbi sapirhaticha?

⁵ Ístu, desdeka Dabidi tumbi sapichuepka, ambakiti pájperakua ma jatsispti Jeoba jingoni. I ambe sánderu jukaparhakuespti eska imeri balori o na enga xáni sési kústenga arpani. Para Dabidi, Jeoba no solu imeri Tata Diosïspti, sino ístu imeri sánderu ambakiti amigu (arhinta Salmo 25:14). Tumbi sapirhaticha, sánderu jukaparhakua ambe engajtsï uáka úni, jindeesti sánderu ambakiti pájperakua ma jatsini chári Táti auandarhu anapu jingoni. Engajtsï ísï úska uákajtsï sánderu ánchikuarhita ambe intsïnhani kúnguarhikuarhu.

6. ¿Ambeksï no sési ambe uandasïreni máru kʼuiripuecha Dabidiri ambe?

⁶ Ma ambe enga Dabidi jatsipka para tekaantani, jindeespti ambe engaksï máteruecha no sési uandanhenga imeri ambe. Por ejemplu, enga Dabidi uandapka eska ima nipiringa Goliati jingoni uarhipeni, rei Sauli no jurajkuxapti ka arhispti: “Tʼuri solu tumbi sapichku máeska” (1 Sam. 17:31-33). Sánisï antesi, imeri ermanu jémbajtu arhispti eska no úsïrenga ambe enga arhinhenga (1 Sam. 17:26-30). Joperu, jimboka Jeoba sési mítespka Dabidini, no ísï exesïrendi eska no úsïrenga ambe enga arhinhenga o eska jukari sapichkuespka.  Ka jimboka Dabidi mintsikasïrenga eska imeri amigu jémba, Jeoba, íntskupiringa uinhapikua úspti uándikuni Goliatini (1 Sam. 17:45, 48-51).

7. ¿Amberi uá jorhenguarhini ima amberi enga Dabidi nitamanchapka?

⁷ ¿Amberi uá jorhenguarhini ima amberi enga Dabidi nitamanchapka? Orheta, jatsiskari para tekaantstini. Jamberi imecha engaksïni desde sapichku míteka, uátiksï úkua jukanchani exeni eskari kʼéskia. Joperu asï mirikurhi eska Jeoba no imani ambejkusï exejka eska ma na xarharajka, imakeni sési mítesti ka ístu ambe engari uáka úni (1 Sam. 16:7). Ístu, uákari jánguarhi sánderu sési pájperani imani jingoni. Dabidi úspti ísï úni, jimboka exesïrenga ambe enga Jeoba kueraapka ka eratsentasïrendi ambe enga jorhendenga inde ambe Jeobaeri (Sal. 8:3, 4; 139:14; Rom. 1:20). Ka máteru ambe, jatsiskari para Jeobani kurhakuni eskakeni íntskuaka uinhapikua. Por ejemplu, engaksïni eskuelarhu anapu kompanieruecha teresmarhuska jimbokari Testigueska, kómarhi Jeobani eskakeni jarhuataaka parari tekaantani. Ístu, jánguarhi ísï úni eskaksï na arhijka ambakiti konsejuecha engaksï Bibliarhu jaka, juchari publikasionicharhu ka bideuecharhu. Méntkisï engari exeaka eskakeni Jeoba jarhuataska uandanhiata ma jingoni, sánderuri mintsikaaka imani. Ka engaksï máteruecha exeska eskari mintsikasïnga Jeobani, imajtuksïni mintsikaati.

8, 9. a) ¿Ambe jarhuataspi Dabidini tekaantskua jingoni erokuarhini para uénani juramuni? b) ¿Ambeksï uá jorhenguarhini tumbi sapirhaticha Dabidiri ejemplueri?

⁸ Ju exeni máteru uandanhiata enga Dabidi jatsipka. Enga na erakunhapkia para reiini, jatsipti para uánikua uéxurhini erokuarhini para uénani juramuni (1 Sam. 16:13; 2 Sam. 2:3, 4). ¿Ambe jarhuataspi para tekaantskua jingoni erokuarhini? Enbesde chkétakuarhini ka ísku pakarani, jánguarhintaspti imani ambe úni enga úpiringa. Por ejemplu, enga sïpakuarhini jámani japka, irekaspti filisteuecheri echericha jimbo, indeni tiempuni jimbo uarhipespti Israeliri ikiatspiticha jingoni ka ísï kuájchakuaspti Judáeri echerichani (1 Sam. 27:1-12).

⁹ ¿Amberi uá jorhenguarhini Dabidiri ejemplueri? Eskari jatsiska para marhuakuni Jeobani ka chíti erachichani jiáni engari uáka ísï úni. Eratsenta ambe enga nitamakuarhipka erachi ma enga Ricardo arhinhajka. * Enga apenasi tumbi sapichu máepka, uékasïrendia prekursori regularini, joperu nótki listu jarhaspti. Enbesde kuátantani o ikiani, sánderu jánguarhintaspti aianhpini. Uandasïndi: “Iásï exesïngia eskani sánderu tiempu uétarhinchasïrenga parani sánderu sési marhuakuni Tata Diosïni. Jánguarhintasïrenga kʼuanhatsentani imecha jingoni engaksï uékenga jorhenguarhini Tata Diosïri ambe ka sési prepararikuarhisïrenga parani nirani pʼorhembiantani. Asta uénaspka Bibliaeri ambe jorhendani nemani. Engani sánderuni aianhpienga, sánderuni nóteru chésïrengia”. Iásï, Ricardo orhejtsïkutiri jarhuajpiri máestia ka ambakiti prekursori regulari ma.

10. ¿Ambe úspi Dabidi ma xanhari antede erakuni úni ambe ma enga jukaparhakuepka?

¹⁰ Ju exeni máteru uandanhiata enga Dabidi jatsipka para orhepani uérakuni. Ma xanhari enga ima ka imeri soldaduecha jirikuarhikuni jámani japka rei Saulini, jurajkuasptiksï imecheri familiechani paraksï nirani uarhipeni. Joperu máru imecheri enemiguecha, niárakuasptiksï imecheri kʼumanchikuecharhu ka paasptiksï imecheri familiechani. Dabidi úpirindi eratseni eska jimboka sési mítekuspka uarhipeni, úpiringa úni ambe ma para pʼímutantaani. Joperu no ísï úspti, Jeobani kurhakuspti jarhuajperata. Saserdotiri jarhuajperata ma jingoni enga Abiatari arhinhenga, kurhamarhispti Jeobani: “¿Niua andanguani ini kʼuiripuechani  engaksï sïpatspeni jámajka?”. Jeoba arhispti eska nipiringa ka eska sési nikupiringa (1 Sam. 30:7-10). ¿Amberi uá jorhenguarhini i amberi?

11. ¿Amberi uá úni antederi erakuni úni ambe ma?

¹¹ Konseju kurhajkuarhi antederi úni ambe ma. uandontskuarhi chíti táticha jingoni o orhejtsïkuticha jingoni engaksïni uáka jarhuatani. Imaksïni uáti ambakiti konsejuechani íntsaani. Jeoba mintsikaasïndi orhejtsïkutichani ka tʼujturi uáka ísï úni. Jindestiksï ‘intsïmperakuecha’ enga Jeoba kúnguarhikuani íntskuka (Efes. 4:8). Ambakiti amberi uáka erakuni úni engari ísï mintsikaska Tata Diosïni eska imecha ka engari kurhajchaaska imecheri ambakiti konsejuechani. Ju exeni iásï ambe engajtsïni jorhendajka rei Asáeri ejemplu.

12. Rei Asá, ¿na jásï kʼuiripu máespi enga uénapka juramuni?

¹² Enga rei Asá tumbipka, kaxumbitispti ka balori jukaspti. Enga imeri táti jémba Abíasi uarhipkia, ka ima niárani reiini, uénaspti diosï úkatechani kénditaani paisirhu. Ístu, “arhispti Judáni eska jirinhapiringa Jeobani, imecheri ióntki anapu parienticheri Tata Diosïni, ka eska úpiringa iámindu ambe enga Juramukua arhijka” (2 Crón. 14:1-7). Ka enga Etiopía anapu Séra, inchaakupka Judá ma miioni soldaduecha jingoni, Asá sési erakuspti úni ambe ma ka kurhakuspti Jeobani eska jarhuatapiringa. Mintsita jingoni kómarhispti: “Oh, Jeoba, tʼuri úsïnga májkueni jarhuataani imechani engaksï uinhapitika ka imechani engaksï débilika. Jarhuatajtsïni Jeoba, juchari Tata Diosï, jimbokaksïni tʼungini mintsikasïnga”. Íksï sési járhati uandakuecha xarhatasïndi eska Asá mintsikasïrenga eska Jeoba pʼímutantapiringa imani ka imeri iretani. Asá mintsikaspti imeri Táti auandarhu anapuni ka “Jeoba andaaspti Etiopía anapuechani” (2 Crón. 14:8-12).

13. ¿Ambe úkuarhinchaspti Asá tátsekua ka andi?

¹³ Meru úkua jukapti uarhipeni ma miioni soldaduecha jingoni. Joperu Asá mintsikaspti Tata Diosïni ka ísï jimbosï sési nikupti. Ísï tátsekua, Israeli anapu rei Baasá, uékaspti no sési úkuni. Nájkiruka no xáni kʼéri uandanhiata máepka, Asá kánikua no sési úspti enga jarhuajperata kurhakupka Siria anapu reiini ka no Jeobani. Enga ísï úpka kánikua no sési úkuarhichaspti. Profeta Ananini úraparini, Jeoba arhispti: “Jimbokari mintsikaska Siria anapu juramutini ka no chíti Tata Diosï Jeobani, nóteruri chíti jájki jimbo jatsiskia  Siria anapu juramutiri ejersituni”. Jimajkani uératini, Asá méntkisï guerrechani jatsiasptia (2 Crón. 16:7, 9; 1 Rey. 15:32).

14. a) ¿Nénari uá xarhatani eskari mintsikasïnga Jeobani? b) Eska na arhijka 1 Timoteo 4:12, ¿amberi uá úni engari ísï úska?

¹⁴ ¿Amberi uá jorhenguarhini Asáeri ejemplueri? Eskari méntkisï jatsiska para kaxumbitiini ka mintsikani Jeobani. Engari itsï atakuarhipka, xarhataspkari eskari jakajkusïrenga ka mintsikani Jeobani. Ka Jeobakini tsípikua jingoni jiókaspti imeri familiarhu. ¡I kʼéri kóntperata máesti! Iásï, ambe engari jatsika para seguirini úni, jindeesti jarhuajperata kurhakuni Jeobani. I ambe úpirindi ísï xarharani enajki no úkua juka engachi jukaparhakua ambe erakuni jauaka juchari tsípikuarhu. Joperu uétarhisïndi eskari májkueni uáka iámindu ambe jingoni engari erakuaka úni. Iá sea imani ambe jingoni engari tsípikuarhini uékaaka, ánchikuarhita jingoni ka ambe engari uékaaka úni chíti tsípikuarhu. Enbesde imani amberi úni enga tʼu exeaka eska sési jarhaska, exe ambe engaksï Bibliaeri karakatecha uandajka ima amberi engari nitamakuarhini jaka ka ísï ú (Prov. 3:5, 6). Engari ísï úska, sésiri pʼikuastaaka Jeobani ka uákari eskaksïni erachicha janhanharhiaka (arhinta 1 Timoteo 4:12).

15. Eska na uandajka 2 Crónicas 18:1-3 ka 19:2, ¿ambe ka ambe no sési úspi rei Jeosafati?

¹⁵ Ísïsti, májkueni eska iámindu jucha, tʼujturi no perfektueska ka ménichandi nóri uáka sési úni ambe ma. Joperu i ambe, nókini jatsipirindi para ójkutani parari Jeobani marhuakuni xáni eskari na xáni uáka. Rei Jeosafatiri ejempluni eratsi. Ima ambakiti kualidadichani jatsiaspti. Enga uénapka juramuni, “imeri táti jémberi Tata Diosïni jirinhaspti ka kurhajchaspti imeri juramukuechani”. Ístu, axaaspti prinsipechani Judá anapu iretecharhu parakaksï jorhentpipiringa Jeobaeri ambe (2 Crón. 17:4, 7). Joperu Jeosafati ménichanisï no sési erakusïrendi úni ambe ma. Jimbosï ma xanhari, Jeobaeri jántspiri ma jatsipti para jurhimberantani (arhinta 2 Crónicas 18:1-3; 19:2). Ju exeni ambe engari uáka jorhenguarhini imeri ejemplueri.

16. ¿Amberi uá jorhenguarhini ima amberi enga Rajeev nitamanchapka?

¹⁶ Kánikua jukaparhakuesti eskari jiókuarhiauaka konsejuechani ka ísï úni. Májkueni eska máteru tumbiicha, jamberiri úpiringa úkua jukanchani jarhani sánderu jukaparharani Jeobani marhuakuni. Joperu asï chkétakuarhi. Eratsenta ambe enga nitamakuarhipka  erachi ma enga Rajeev arhinhajka. Enga miántajka jiáni enga sapichuepka, ima uandasïndi: “Imani uéxurhinichani jimbo, no nanimaru jánhaskasïrenga. Májkueni eska máteru tumbiicha, sánderuni tsitisïrenga chʼanani nirani ka tsípikuarhini ka eskani tánguarhikuecharhu nirani o aianhpini”. ¿Ambe jarhuataspi? Ima uandantasïndi eska orhejtsïkuti ma uékperakua jingoni konseju ma íntskuspka. Uandasïndi: “Jarhuatasptireni kurhanguni ambe enga Biblia uandajka ixú 1 Timoteo 4:8”. Rajeev kaxumbikua jingoni jiókuarhispti ini konsejuni ka eratsentaspti ambe enga sánderu jukaparhakuepiringa imeri tsípikuarhu. Uandasïndi: “Erakuspka eskani orheta peerapiringa marhuakuni Tata Diosïni”. Ima mismu uandantasïndi na enga nikupka: “Máru uéxurhini tátsekua engani intsïnhapka konsejuni, úspkia marhuani komu orhejtsïkutiri jarhuajpiri”.

17. ¿Ambeksï eratsesïni erachicha engaksï jatirikia tumbi sapirhaticheri engaksï marhuakujka Jeobani?

¹⁷ Tumbi sapichu, kúnguarhikuarhu anapu erachicha engaksï sánderu jatirika, kánikuaksï jukaparharasïndi engari ‘májku kʼéri’ marhuakuni jaka Jeobani imecha jingoni (Sof. 3:9). Tsípisïndiksï exeni na engari xáni tsípikua ka uinhapikua jingoni újka imani ánchikuarhitani engari intsïnhajka. Janhanharhisïndiksïni ka mintsikani (1 Juanu 2:14).

18. Eska na arhijka Proverbios 27:11, ¿na exeasïni Jeoba tumbi sapirhatichani engaksï marhuakujka?

¹⁸ Asï méni mirikurhi eskakeni Jeoba xénchasïnga ka eskakeni mintsikasïnga. Ima uandaspti eska últimu jurhiatikuecha jimbo uánikua tumbiicha japiringa engaksï uékapiringa imani marhuakuni (Sal. 110:1-3). Ima mítesti eskari xénchasïnga ka eskari uékasïnga sési marhuakuni. Ísï jimbo, tekaantsti chíti ambe jingoni ka ístu máteruecha jingoni. Engari no uáka sési úni ambe ma, jiókuarhea konsejuechani ka engaksïni jurhimberantaaka. Miá eskakeni Jeobasï arhini jaka (Ebr. 12:6). Sési ú imani ánchikuarhitechani engari intsïnhauaka. Ka ambe enga sánderu jukaparhakueka, jánguarhinta paraka chíti Táti auandarhu anapu sési pʼikuarheraaka tʼungini jimbo (arhinta Proverbios 27:11).