Enga nema no jingontku arhiantajka ini tekstuechani úpirindi indeni ambe kurhamarhikuarhini. Joperuksï tsimani kʼuiripuecha jarhaspti engaksï Mefibóseti arhinheenga; ka engachi ménderu arhintaska ambe enga úkuarhipka jiáni, uaakachi jorhenguarhini ambe ma.

Israeli anapu rei Saúli siete tatakechani kaaspti ka tsimani nanakechani. Jonatáni sánderu kʼérispti. Tátsekua, máteru imeeri uarhiiti jingoni Rispá, kánguarhispti máteru tatakani enga Mefibóseti arhinheenga. Peru ístu Jonatáni kánguarhispti tatakani ma enga Mefibóseti arhinheenga. Ísï jimbo Saúliri uájpa ma ka nimakua jémba ma, Mefibóseti arhinhasïrendiksï.

Joperu, ¿andisï rei Dabidi íntspiapi uánikua achamasïchani parakaksï uándikunhapiringa? Rei Saúli ueenaspti ikiakuani gabaonitechani engaksï israelitecha jingoni irekapka ka uékasïreendi kʼamajkuani. Ka péringa uánikuechani uándikuapka. Inde ambe kánikua no sési jarhaspti, jimboka Josuéri jurhiatikua jimbo, Israeliri orhejtsïkutichaksï pakatperakuaksï ma úspti gabaonitecha jingoni parakaksï no méni uarhiperapiringa imeecha jingoni (Jos. 9:3-27).

Inde pakatperakua útasteru marhuaxapti Saúliri jurhiatikuecha jimbo. Joperu enbesi de úni ambe engaksï pakatperapka rei jánguarhintaspti uándikuani gabaonitechani. Indeni ambe jimbo, Saúli ka imeeri kʼumanchikuarhu anapuechaksï “tsïtatspisptiksï iurhiri” (2 Sam. 21:1). Enga Dabidi reipkia, ima gabaonitecha engaksï tsípiti pakarapka aiangusptiksï ambe enga úkuarhipka. Dabidi kurhamarhiaspti ambe úpirini úni para sési péntani imani xáni no sési jásï ambe enga Saúli úpka ka para úni eska Tata Diosï újchakurapiringa echerini. Imeechaksï no sentabu kurhajkuarhispti, sánderu sési uandasptiksï eska íntskuapiringa siete Saúliri uájpeechani parakaksï uándikuapiringa, jimboka Saúli uánikua gabaonitechani uándikuaspka (Núm. 35:30, 31). Ka Dabidi úspti ambe engaksï kurhakupka (2 Sam. 21:2-6).

Jiánisï, Saúli ka Jonatani tʼuinksï uarhisptia uarhiperakuarhu ma. Joperu Mefibóseti, Jonatániri uájpa útasï tsípiti jarhaspti. Enga Mefibóseti sapichuepka úkuarhinchaspti ambe ma ka nóteru úsptia sési xanharani, ísï jimbo no jarhuajpespti enga Saúli no sési kaapka gabaonitechani. Ka Dabidi pakatperakua ma úspti Jonatánini jingoni parakaksï méntkisï sési pájperapiringa ka inde pakatperakua marhuakuapirindi Jonatániri desendientichani komu Mefibósetini (1 Sam. 18:1; 20:42). Tekstuechaksï í ambe uandasïndi Dabidiri ambe: “Rei pʼamojkusti Mefibósetini —Jonatániri uájpani enga Saúliri uájpeeka— jimboka Dabidi ka Jonatani [...] pakatperakuaksï ma úspka Tata Diosï Jeobani japarini” (2 Sam. 21:7).

Peru Dabidi úspti ambe engaksï gabaonitecha arhipka. Íntspiaspti sinko Saúliri nimakua jémbeechani ka tsimani Saúliri uájpeechani, ma arhinhasïreendi Mefibóseti (2 Sam. 21:8, 9). Ísï úparini, Dabidi sési peentaspti imani ambe enga Saúli úpka ka úspti eska Tata Diosï ménderu újchakurapiringa echerini.

I ambe enga úkuarhipka jorhendasïndijtsïni ambe ma. Engaksï Saúliri tsimani uájpeecha ka sinko nimakua jémbeecha nóksï kulpa jatsipiringa imani ambe jingoni enga Saúli úpka, Tata Diosï Jeoba no jurajkupirindi eskaksï uándikunhapiringa, jimboka Tata Diosïri lei uandasïreenga eskaksï uájpeecha no jatsispka para uarhini imani ambe jimbo engaksï imeecheri taati jémbeecha uénga. Inde mismu juramukua uandasïreendi: “Mándani kʼuiripu jatsisti para uarhini imeeri mismu pekadu jimbo” (Deut. 24:16). I ambe úsïndi eskachi eratseaka eskaksï siete Saúliri familiaricha engaksï uarhipka jarhuajpespkaksï paraksï uándikuani gabaonitechani. Ka jimboksïsï uándikunhapti.

Jiájkani ¿ambechi jorhenguarhisïni? Eska no nema uáka máteru ambe arhiparhatani imani ambe jimbo enga újka eratseparini eska solu úxapka ambe enga arhinhajka, sánderu sési jatsipirindi para jiókuarhini ambe enga úpka. Ambakiti proberbiu ma arhisïndi: “Sési exe nani engari ísï xanharaaka ka iámindu chiiti xanharuechaksï segurueuatiksï. Asï ní jurhijkandani ladu jimbo ka ni uikixkandani. Kéndita chiiti jantsirichani jima enga no sési ambe únhajka” (Prov. 4:24-27; Efes. 5:15).