¿Andisï ima enga Boasi arhipka “tata”, uandapi eska enga tembuchapiringa Ruti jingoni ʻkʼamajkupiringaʼ imeeri erensiani? (Rut 4:1, 6).

Ióntki, enga acheeti ma uarhienga ka no kánguarhiani sapiichani, ¿né pakarasïreeni imeeri echeriicha jingoni?, ¿tsïnchesïreeni imeeri apeidu? Moisésiiri Lei uandasïreendi ambe enga úkuarhipiringa.

Enga acheeti ma uarhienga o enga ataranteenga imeeri echeriichani jimboka pobri pakarasïreenga, imeeri ermanu jémba o parienti ma enga no iauanikuarhuepiringa úsïreendi piántaani echeriichani. Ísï, echeriichaksï seguirisïreendi ima mismu familieriini (Lev. 25:23-28; Núm. 27:8-11).

Paraka uarhiriiri apeidu no tsïnchepiringa, uarhiriiri ermanu jémba tembuntasïreendi uarhiriiri témbani paraksï sapini ma kánguarhini ka ísï no tsïnchesïreendi uarhiriiri apeidu ka sapi pʼíuasïreendi uarhiriiri echeriichani. I ambe enga únheenga ísï mítekateespti komueska tembuperani kuniadu jingoni, ka ístu i ambe marhuakusïreendi tsïndini para no ma ambe kueratanchani (Deut. 25:5-7; Mat. 22:23-28). Ka i ambesï úkuarhipti enga Ruti tsïndi pakarapka.

Ju je exeni Noemíiri ejemplu. Ima Eliméleki jingoni uámbuchatixapti. Peru enga ima ka imeeri tsimani uájpeechaksï uarhipka nóteru ma acheeti jarhasptia imeeri familiarhu enga úpiringa kuidarini (Rut 1:1-5). Enga Noemí kʼuanhatsentapka Judá, arhispti Rutini eska arhipiringa Boasini enga Elimélekiiri parienti máepka enga no iauanikuarhuepka eska piántapiringa echeriichani (Rut 2: 1, 19, 20; 3:1-4). Peru Boasi mítespti eska jarhaspka máteru parienti enga sánderu no iauanikuarhuepka, ka eska ima orheta jatsispka derechu para piántaani echeriichani (Rut 3:9, 12, 13). Biblia no uandasïndi na enga arhinheenga inde acheeti.

Ueenakuarhu inde acheeti uékaspti piántaani echeriichani (Rut 4:1-4). Nájkiruka mítepka eska kánikua sentabu úrapiringa, ístu mítespti eska Noemí jatiriispkia ka eska nóteru úpiringia uájpani ma kánguarhini enga úpiringa Elimélekiiri echeriichani pakatakuarhiani, ísï jimbo inde acheeti pakatakuarhiapirindia echeriichani. Ka ísï xarharasïreendi enajki ambakiti negosiu máepi.

Peru enga inde acheeti mítepka eska jatsipka para Ruti jingoni tembuchani, nóteru uékasptia piántaani echeriichani. Uandaspti: “No uaaka piántani jimbokani kʼamajkupiringa juchiiti erensiani” (Rut 4:5, 6). ¿Andisï nóteru uékapia piántaani echeriichani?

Enga inde acheeti o máteru parienti ma enga no iauanikuarhuepiringa tembuchapiringa Ruti jingoni ka ima kánguarhini sapini ma, inde sapi Elimélekiiri echeriichani jingoni pakarapirindi. Peru inde ambe, ¿néna úpirini eska inde acheeti tsïtaapiringa imeeri echeriichani? Biblia no uandasïndi andi, peru ju je exeni máru ambe enga jimbo no uékapka piántani.

• Primeru, inde acheeti eratsepti eska ísku inchajpapiringa sentabu jimboka Rutiiri uájpa pakarapiringa Elimélekiiri echeriicha jingoni, ka no ima.

• Segundu, jatsipirindi para Noemíni ka Rutini kéndani.

• Terseru, enga Ruti kánguarhiapiringa máteru uájpeechani ini acheeti jingoni, indeechaksï jatsipirindi para arhungurhiani echeeriichani acheetiiri uájpeecha jingoni.

• Kuartu, enga inde acheeti no kaapiringa máteru uájpeechani, ima sapi enga Ruti jingoni kánguarhipiringa, pakataapirindi Elimélekiiri ka inde acheetiiri echeriichani. Ísï jimbo, enga ima acheeti uarhipiringia imeeri echeriichaksï Rutiiri uájpeeripirindia enga Elimélekiiri apeidu pápiringa ka no i acheetiiri. I acheeti no uékaspti jarhuatani Noemíni jimboka úpiringa tsïtani imeeri echeriichani. Jimbosï arhipti Boasini eska piántaapiringa echeriichani jimboka ima jindeespka máteru enga úpiringa ísï úni ka Boasi uékaspti ísï úni. ¿Andi? Ima mismu uandaspti: “Paraka imeeri nombri enga uarhikia no tsïncheaka imeeri erensiarhu” (Rut 4:10).

Xarharasïreendi eska ambe enga sánderu uandanhiateenga indeni acheetini jindeespti eska imeeri nombri no tsïnchepiringa ni imeeri echeriicha. ¡Ima no sáni pendienti paasïreendi máteruechani! Ka méntku no sáni marhuaspti ambe enga xáni úpka jimboka iásï nóteru nema miásïngia imeeri nombri. Ístu, tsïtaspti imani kʼéri kóntperatani enga Boasi intsïnhapka: Boasi niáraspti jindeeni ióntki anapu parienti ma Mesíasiiri, tata Jesukristueri. Ima acheeti tsïtakuarhispti indeni ambe jimboka imajku pendienti pákuarhisïreenga ka no uékaspti jarhuatani imani enga uétarhinchani japka (Mat. 1:5; Luk. 3:23, 32).