1, 2. Engajtsï útasï nótki listu jaka parajtsï itsï atakuarhini, ¿andijtsïsï no jatsi para no sési pʼikuarherani? (Exea je fotuechani engaksï ueenakuarhu jaka rebistarhu).

 ENGAJTSÏ CHÁ eratsetini jakaia itsï atakuarhini, felisitarisïngaksïni. ¿Listujtsï jarhaskia parajtsï ísï úni? Enga chá exejka eskajtsï uaakia itsï atakuarhini ka ístu orhejtsïkutiicha, asï iónda je ísï úni. Ísïjtsï uaaka tsípikua jingoni irekani engajtsï marhuakuska Tata Diosï Jeobani.

² Peru ¿engajtsï arhinhaska eskajtsï nótki listu jarhaska parajtsï itsï atakuarhini? ¿O chá ísï pʼikuarherani? Asï no sési pʼikuarhera je, no arhiparini engajtsï sapichku jaka ojtsï jatiriinia, uaakajtsï seguiriini ánchikuarhini parajtsï niárani itsï atakuarhini.

3. Etiopía anapu acheeti, ¿ambe arhispi Felipeni, ka ambechi uaa kurhamarhikuarhini? (Ukuecha 8:36, 38).

³ (Arhinta je Ukuecha 8:36, 38). Acheeti ma enga Etiopía anapuepka, kurhamarhispti Felipeni enga aianhpiri máepka: “¿Andisïni ji no uaa bautisarikuarhini?”. Xarharasïreendi eska i acheeti uékasïreenga itsï atakuarhini. Peru, ¿listu jarhaspia para ini ambe úni enga xáni jukaparhakueka?

4. ¿Néna xarhataspi Etiopía anapu acheeti eska uékasïreenga seguiriini jarhani jorhenguarhini?

⁴ Etiopía anapu acheeti “Jerusaléni niraspti [Tata] Diosïni kʼéri ambe arhini” (Úku. 8:27, Táta Diósïri uandakua Tata Jesukristueri aiatsperakua). Ísï jimbo, jamberi ima jiókuarhipti judiuecheri relijionini. Ima míteaspti Karakata Ebreaechani ka jima jorhenguarhispti Tata Diosï Jeobaeri ambe. Peru uékasïreendi sánderu ambe míteni. Ka ¿ambe úxapi ima acheeti enga Felipe xanharu jimbo exentapka? Roiu ma arhintaxapti enga profeta Isaíasi karapka (Uku. 8:28). Inde karakateechaksï no xáni fásiliispti para kurhanguni. Etiopía anapu acheeti no solu uékasïreendi míteni ambe enga ma orhetku ueenajka jorhenguarhini; ima uékasïreendi sánderu ambe míteni.

5. ¿Ambe úspi Etiopía anapu acheeti imani ambe jimbo enga jorhenguarhipka?

⁵ Acheeti ánchikuarhiri máespti enga kánikua juramukua jatsipka ka enga marhuakuenga Kandaseni, Etiopía anapu reinani. Ima “tesoreru[espti] Kandaseri juramukua jimbo” (Uku. 8:27). Seguru eska uánikua ánchikuarhiteechani jatsiapka ka eska kánikua úkua ambe jatsispka. Joperu ima arhutaspti tiempu para kʼéri ambe arhini Tata Diosï Jeobani. No solu jorhenguarhispti jurhimbikuani; sino inde ambe úspti eska úpiringa ambe ma. Etiopía uératini niraspti asta Jerusaléniiri templurhu para kʼéri ambe arhini Tata Diosï Jeobani. Jamberi ióni biajaripti ka kánikua sentabu úrani para nirani, peru uékasïreendi kʼéri ambe arhini Tata Diosï Jeobani, no arhiparini ambe enga xáni jatsipiringa para úni.

6, 7. ¿Ambe úspi Etiopía anapu acheeti para sánderu xénchani Tata Diosï Jeobani?

⁶ Felipe jorhendaspti Etiopía anapu acheetini máru ambe enga ima no mítepka ka enga kánikua jukaparhakueka, komu eska Jesúsi jindeespka Mesíasi (Uku. 8:34, 35). Ambe enga Etiopía anapu acheeti jorhenguarhipka ima ambeeri enga Jesúsi úpka imani jimbo, mintsitarhu niárakuspti. Ka ¿ambe úpirini ísï tátsekua enga na jorhenguarhipkia indeni ambe? Úpirindi no ma ambe úni ka seguiriini judiuecheri relijionirhu jarhani nani enga janhanharhinheenga. Peru jimboka niáraspka kánikua xénchani Tata Diosï Jeobani ka Jesúsini, uékasïreendi itsï atakuarhini ka Jesúsiiri chúxapati úkuarhini. Felipe exespti eska listu jarhaspkia para indeni ambe úni, ísï jimbosï itsï atapti.

⁷ Etiopía anapu acheetiiri ejemplu, jarhuatatiksïni listu jarhani parajtsï itsï atakuarhini. Májkueni eska ima, uaakajtsï seguru uandani: “¿Andisïni ji no uaa bautisarikuarhini?”. Iásï exenchi jauaka, nénajtsï uaa chá májkueni úni eska ima: seguiriini jorhenguarhini, ísï úni ambe ma eskajtsï na jorhenguarhini jaka ka jánguarhintantsï parajtsï sánderu xénchani Tata Diosï Jeobani.

8. Eska na arhijka Juanu 17:3, ¿ambejtsï jatsiski para úni?

⁸ (Arhinta je Juanu 17:3). ¿Ambe enga Jesúsi uandapka jarhuataskiksïni parajtsï Biblieri ambe jorhenguarhini? Uánikuechani jarhuatastia. Joperu ístu ambe enga uandapka, jarhuatasïndijtsïni parachi seguiriini jarhani jorhenguarhini. Nóchi méni kʼamaraaka jorhenguarhini “Tata Diosïiri enga sési jimboeka” (Ecl. 3:11). Seguiriini jauakachi jorhenguarhini imeeri ambe para méntkisï. Engachi sánderu sési míteaka Tata Diosï Jeobani, sánderuchi andarhieraaka (Sal. 73:28).

9. ¿Ambechi jatsiski para úni engachi na jorhenguarhiakia imani ambe engachi orheta jatsika para jorhenguarhini Bibliarhu?

⁹ Enga nema ueenajka jorhenguarhini Tata Diosï Jeobaeri ambe, ueenasïndi jorhenguarhini imani ambe enga no úkua jukaka. Enga apostoli  Pablu karakuapka Ebreuechani, uandaspti eska i ambe jindeeska ambe enga nema ‘ueenajka jorhenguarhini’. No arhikuekaxapti eska i ambe no jukaparhakua ambeeska, sino eska ísïiska komueska lechi enga charhaku ma arhajka (Ebr. 5:12; 6:1). Pablu, ístu pʼímarhiaspti kristianuechani eskaksï no solu jorhenguarhipiringa imani ambe enga ma ueenajka jorhenguarhini, sino ístu imani ambe enga no xáni fásiliika para kurhanguni ka enga Tata Diosïiri Karakata jorhentpijka. ¿Chá kánikua tsitisïni jorhenguarhini indeni ambe? ¿Uékasïntsï seguiriini jánguarhintani míteni ka jorhenguarhini Tata Diosï Jeobaeri ambe ka ima ambeeri enga ima eratseni jaka úni?

10. Para máru, ¿andisï xáni úkua juka jorhenguarhini?

¹⁰ Para máru kánikua úkua jukasti estudiarini. ¿Ka chaia? ¿Jorhendanhaskijtsï eskuelarhu arhintani ka estudiarini? ¿Tsitisïrentsï ísï úni? ¿Ojtsï seguru jarhaski eskajtsï no úsïnga libruechani jorhenguarhiani? Nójtsï chájkueska engajtsï ísï eratsejka. Joperu Tata Diosï Jeoba jingontku jarhasti paraksïni jarhuatani, ima perfektuesti ka ima jindeesti sánderu ambakiti jorhentpiri enga jaka.

11. ¿Andisï Tata Diosï Jeoba jindee “Ambakiti Jorhentpiri”?

¹¹ Tata Diosï Jeoba uandasïndi eska ima jindeeska “Ambakiti Jorhentpiri” (Is. 30:20, 21). Ima tekaantskua jingoni jorhentpisïndi, sési kámpisïndi ka kurhangutspisïndi ka méntkisï ambakiti ambe exesïndi imeeri jorhenguarhiriicheeri ambe (Sal. 130:3). Imajtsïni no méni kurhachesïndi ambe ma engachi jucha no uaaka úni. Ju je no mirikurhini eska imasï úka juchaari serebruni enga xáni ambakiti regalu máeka (Sal. 139:14). Ístu, imajtsïni kueraasti parachi tsitini jorhenguarhini ka uékasïndi eskachi seguiriuaka ísï úni para méntkisï ka eskachi sési pʼikuarheraaka jorhenguarhini. Ísï jimbo, desde iásï ueenani ju je jánguarhintani tsitini jorhenguarhini ambe enga Biblia jorhentpijka (1 Ped. 2:2). ¿Ambeksïni jarhuata ísï úni? Jánguarhinta je imani ambe úni engaksïni jarhuataaka parajtsï arhintani ka jorhenguarhini Bibliani (Jos. 1:8). Tata Diosï Jeobaeri jarhuajperata jingoni, sánderujtsï tsitiaka arhintani ka jorhenguarhini imeeri ambe.

12. ¿Andichisï jatsi para jorhenguarhini na enga irekapka Jesúsi ka na enga aianhpipka?

¹² Arhuta je tiempu parajtsï someni eratsentani na enga irekapka Jesúsi ka na enga aianhpipka. Kánikua jukaparhakuesti parachi májkueni jámani eska Jesúsi, parachi úni marhuakuni Tata Diosï Jeobani ka sánderia ini jurhiatikuechani jimbo engaksï xáni úkua jukaka (1 Ped. 2:21). Jesúsi mátirku arhiaspti imeeri chúxapatiichani eskaksï jatsiapiringa uandanhiateechani (Luc. 14:27, 28, TNM). Peru mítespti eska májkueni eska ima, imeechajtuksï úpiringa no méni jurajkuni Tata Diosïni (Juanu 16:33). Jorhenguarhi je na enga irekapka Jesúsi ka eratsenta je ambe engajtsï uaaka úni parajtsï májkueni jámani eska ima mándani pauani.

13. ¿Ambejtsï jatsiski para seguiriini jarhani kurhakuni Tata Diosï Jeobani, ka andi?

¹³ Engachi jorhenguarhini jarhajka no jindeesti parachi kánikua ambe míteni. Ambe engachi uéjka jindeesti míteni Tata Diosï Jeobani, xénchani ka mintsikani (1 Kor. 8:1-3). Seguirii je sánderu ka sánderu jorhenguarhini Tata Diosï Jeobaeri ambe ka seguirii je kurhakuni eskaksïni jarhuataaka sánderu mintsikani (Luk. 17:5). Ka imaksïni íntskuati ambe engajtsï chá kurhakuaka. Engajtsï chá mintsikaska Tata Diosïni jimbokajtsï sési míteska, uaakajtsï seguiriini jarhani jánguarhintani parajtsï úni marhuakuni (Sant. 2:26).

14. ¿Néna xarhataspi Pedru na enga xáni jukaparhakueka ísï úni eskachi na jorhenguarhini jauaka? (Ístu exe je imajenini).

¹⁴ Apostoli Pedru, Noéri ejempluni úraspti para xarhatani eska kánikua jukaparhakueska eskaksï Kristueri chúxapatiicha ísï uaaka eskaksï na jorhenguarhini jauaka. Tata Diosï Jeoba arhispti Noéni eska kʼéri janikua ma juápiringa para kʼamajkuani  no sési úriichani engaksï imani tiempu jimbo irekapka. Peruksï no solu jatsispti para míteni ambe enga úkuarhipiringa. Noé ka imeeri familia jatsisptiksï para úni ambe ma paraksï úni tsípiti pakarani. Enga Pedru uandapka “mientrasi enga Noé úni japka [arkani]”, arhikuekaxapti imani tiempuni ante de kʼéri janini (1 Ped. 3:20). Noé ka imeeri familia ísïksï úspti eska Tata Diosï Jeoba na arhiapka ka kʼéri arkaksï ma úspti (Ebr. 11:7). Tátsekua Pedru terukutantaspti ambe enga Noé úpka bautismu jingoni. Ima uandaspti: “Inde ambe ísï terukuntasïndi eska bautismu iásï anapu, jimboka indejtsïni májku jásï pʼímutantasïnga” (1 Ped. 3:21). Máru ambe jimbo, ambe engajtsï chá úni jaka iásï parajtsï úni itsï atakuarhini, terukuntasïndi imani ambe jingoni engaksï Noe ka imeeri familia úpka imani tiempu jimbo engaksï arkani úni japka. Jimajkani, ¿ambejtsï jatsiski para úni parajtsï listu jarhani para itsï atakuarhini?

15. ¿Ambe arhikuekasïni sési jimbo móantani?

¹⁵ Ambe ma engachi jatsika para úni jindeesti mintsita jingoni móantani juchaari pekaduecheeri (Uku. 2:37, 38). Nema enga sési jimbo móantajka, mójtakukuarhisïndi. ¿Nóterujtsï úsïnia imani ambe enga Tata Diosï Jeoba no jaiapanhentajka? Komu ísku jándikua ambe niátani, itsutani ka no sési járhati uandakuechani úraani (1 Kor. 6:9, 10; 2 Kor. 7:1; Efes. 4:29). Engajtsï útasï nótki ísï úni jaka, seguirii je jánguarhintani parajtsï mójtakukuarhini. Ka engajtsï uétarhinchajka paraksïni nema jarhuatani o konsejuechani íntsaani, uaakajtsï uandontskuarheni imani jingoni engaksïni Biblieri ambe jorhendani jaka o orhejtsïkutiicha jingoni. Engari tumbiika ka útasïri chiiti taatiicha jingoni irekani jarhani, uaakari arhiani eskaksïni jarhuataaka jurajkuni imani ambe engakeni no jurajkuni jaka parari itsï atakuarhini.

16. ¿Ambe ka ambechi jatsiski para úni engachi uéjka méntkisï kʼéri ambe arhini Tata Diosï Jeobani?

¹⁶ Ístu kánikua jukaparhakuesti eskajtsï imani ambe uaaka engaksïni jarhuataaka sánderu andarhierani Tata Diosïni, komu tánguarhikuecharhu nirani ka komentariuechani íntspiani (Ebr. 10:24, 25). Engaksïni arhiaka eskajtsï uaakia uérani aianhpini jánguarhinta je ísï úni. Exeakajtsï eska engajtsï sánderu uéraska, sánderujtsï tsitiaka aianhpini (2 Tim. 4:5). Engari tumbiika ka útasïri chiiti taatiicha jingoni irekani jarhani, kurhamarhikuarhi: “¿Imeechajtsïni méntku miátantani jarhasïni eskani jatsiska parani tánguarhikuecharhu nirani ka aianhpini?  ¿O nirasïni jimbokani tsitisïnga ísï úni?”. Engari úska ini ambe jimbokari tsitisïnga ísï úni, xarhatasïngari eskari mintsikasïnga Tata Diosï Jeobani, eskari xénchasïnga ka eskari kánikua agradesidu jarhaska imani jingoni. Engari imani ambe uaaka engakeni jarhuataaka sánderu andarhierani Tata Diosïni, xarhatani jarhasïngari eskari jánguarhintaxaka “sési marhuakuni Tata Diosïini” ka i ambe ísïisïndi enajkiri regaluechani íntsaani japirini Tata Diosïni Jeobani (2 Ped. 3:11, TNM; Ebr. 13:15). Ima tsitisïndi eskachi íntsauaka regaluechani jimbokachi xénchasïnga ka no jimbokachi jatsiska para ísï úni (terukutanta je 2 Korintu 9:7 jingoni). Ka juchachi kánikua sési pʼikuarherasïnga engachi sánderu ambakiti ambe íntskujka.

17, 18. ¿Ambeksïni jarhuataa parajtsï niárani itsï atakuarhini, ka andi? (Proverbios 3:3-6).

¹⁷ Engajtsï uékani jauaka itsï atakuarhini, jauati máru ambe engaksïni ójkutaaka. Jamberiksïni máru teresmarhuati, oksïni no sési kamani imani ambe jimbo engajtsï jakajkujka (2 Tim. 3:12). Ojtsï jamberi jánguarhintani jaka para jurajkuni ambe ma enga no sési jaka, joperujtsï ménichani niárani ménderu indeni ambe úni. Ojtsï jamberi eratseni eskajtsï no méni uaaka itsï atakuarhini ka inde ambeksïni no sési pʼikuastani. ¿Ambeksïni jarhuataa parajtsï no kuatantani? Ambe ma enga kánikua jukaparhakueka, xénchani Tata Diosï Jeobani.

¹⁸ Xénchani Tata Diosï Jeobani, jindeesti sánderu ambakiti ambe engajtsï uaaka úni (arhinta je Proverbios 3:3-6). Engajtsï chá xénchaska Tata Diosï Jeobani iámindu chaari uinhapikua jingoni, uaakajtsï orhepani uérakuani uandanhiateechani engajtsï jatsiauaka. Biblia uánikua xanharu uandasïndi eska Tata Diosï Jeoba, ambakiti uékperakua xarhatakuasïnga imeeri marhuariichani. I ambe arhikuekasïndi eska no méni jurajkuasïnga ka eska méntkisï xénchaasïnga (Sal. 100:5). Tata Diosïksïni ísï kueraasti eska ima na jásïika (Gén. 1:26). Jimajkani, ¿nénajtsï uaa xarhatani i jásï uékperakua?

19. ¿Ambejtsï uaa úni parajtsï xarhatani eskajtsï agradeserisïnga iámindu ambe enga Tata Diosï újka chánksïni jimbo? (Galasia 2:20).

¹⁹ Orheta, jatsiskajtsï para agradesidueni (1 Tes. 5:18). Mándani pauani kurhamarhikuarhi je: “¿Iásï nénarini xarhatacheski Tata Diosï Jeoba eskarini xénchasïnga?”. Ka tátsekua, engajtsï kómarhini jauaka Tata Diosïni, grasiasi íntskunta je indeni ambe jimbo enga úka chánksïni jimbo. Májkueni eska apostoli Pablu, exe je eska ambe enga Tata Diosï Jeoba újka chánksïni jimbo jindeeska jimbokaksïni xénchasïnga (arhinta je Galasia 2:20). Ka ístu  kurhamarhikuarhi je: “¿Uékasïni xarhatakuni Tata Diosï Jeobani eskani jíjtuni xénchasïnga?”. Xénchani Tata Diosïni jarhuataatiksïni parajtsï no niátani imani ambe engajtsï tsitijka ka enga no sési jaka, parajtsï úni orhepani uérakuani uandanhiateechani ka parajtsï seguiriini imani ambe úni engaksïni jarhuataaka sánderu andarhierani Tata Diosïni. Ísïjtsï pauani pauani xarhatani jauaka eskajtsï xénchasïnga chaari Taati auandarhu anapuni.

20. ¿Ambe arhikuekasïni aiakukuarheni Tata Diosï Jeobani, ka andisï xáni jukaparhakue ísï úni?

²⁰ Jimbokajtsï kánikua xénchasïnga Tata Diosï Jeobani, tiempu jingoni niáraakajtsï mintsita jingoni kómarhini imani parajtsï aiakukuarheni. Ka engajtsï aiakukuarheakia Tata Diosï Jeobani, niáraakajtsï imeeriini para méntkisï ka inde ambe kʼéri kóntperata máesti. Engajtsï chá ini ambe úska, aiakuni jauakajtsï Tata Diosïni eskajtsï méntkisï marhuakuaka ambe uéjki úkuarhini jarhani. Ka ma xanharkujtsïsï uaaka i ambe. Ísïisti, kʼéri responsabilidadi máesti aiakukuarheni Tata Diosïni. Peru miá je, no jarhasti sánderu ambakiti ambe ka eska aiakukuarheni Tata Diosïni (Sal. 50:14). Satanási jánguarhintaati parajtsï chá nóteru xénchani Tata Diosï Jeobani ka parajtsï nóteru marhuakunia. Peru asï jurajku je eska Noambakiti andaaka (Job 27:5). Na engajtsï xáni xénchajka chaari Taati auandarhu anapuni, jarhuatatiksïni parajtsï ísï úni eskajtsï na aiakukuarheka ka parajtsï sánderu andarhierani Tata Diosïni.

21. ¿Andichisï uandajki eska engachi itsï atakuarhijka, apenasichi ueenani jarhasïnga marhuakuni Tata Diosïni?

²¹ Engajtsï na aiakukuarheakia Tata Diosï Jeobani, uandontskuarhi je orhejtsïkutiicha jingoni paraksïni arhini ambe máteru ambejtsï uaa úni. Peru miá je eska engajtsï itsï atakuarhiaka apenasijtsï ueenani jauaka marhuakuni Tata Diosï Jeobani ka uaakajtsï seguiriini ísï úni para méntkisï. Ísï jimbo, desde iásï jánguarhinta je parajtsï sánderu xénchani chaari Taati auandarhu anapuni ka eratsenta je ambejtsï uaa úni parajtsï pauani pauani sánderu xénchani. Inde ambeksï jarhuataati parajtsï niárani itsï atakuarhini. Nójtsï méni mirikurhiaka inde jurhiatikuani. Peru apenasijtsï ueenani jauaka. Ísï jimbo, seguirii je jánguarhintani sánderu xénchani Tata Diosï Jeobani ka imeeri Uájpani.