SEMANA 47
Ambe engachi jorhenguarhijka libru de Levítico jimbo
“Iámindu Diosïri Karakata, Diosïni jimboesti, ka marhoasïndi” (2 TIM. 3:16).
PIREKUA 98 Tata Diosïni jimboesti ambe enga Karakata jaka
AMBE ENGACHI EXEAKA *
1, 2. ¿Andichisï jatsipirini para jánguarhintani sési míteni ambe enga libru de Levítico arhijka?
APOSTULI Pablu miátantaspti Timoteuni eska iámindu Tata Diosïri Karakata, Tata Diosïni jimboeska ka eska marhuasïnga (2 Tim. 3:16). Ka ambe enga Levítico arhijka, jindesti ma parti i Karakateri. ¿Nájtsï exesïni cha ini libruni? Para máru kʼuiripuecha, i libru puru juramukuechani uandaasïndi engaksï iásï nóteru marhuajkia. Peruchi jucha ménderueni exesïnga.
2 Ma Tresi mili kinientu uéxurhini ísïstia enga libru de Levítico karanhaka, peru Jeoba ústi eska asta iásï jamberi japiringa “parajtsïni jorhendani” (Rom. 15:4). Tata Diosï kararkuarhisti ambe enga Levítico jimbo arhijka ka jorhendasïndijtsïni na enga eratsijka ima; ísï jimbo, jatsipiringachi para jánguarhintani sési míteni ambe enga i libru uandajka. Uákachi uánikua ambe jorhenguarhini. Ju je exeni tʼámu ambe.
AMBECHI UÁ ÚNI PARAJTSÏNI JEOBA JAIAPANHINTANI
3. ¿Ambe miátantaasïreni israelitechani kéjtsïtakuecha engaksï uáuenga imani Jurhiatikua enga Jeoba Puátspintenga?
3 Jorhenguarhikua ma: para Jeoba sési exeni na engachi marhuakujka uétarhisïndi eskajtsïni jaiapanhintaaka. Mándani uéxurhini, jarhaspti ma Jurhiatikua enga Jeoba Puátspintenga. Ima jurhiatikua jimbo, ireta Israeli tánguarhintasïrendi ka kʼéri saserdoti, animalichani kéjtsïtaasïrendi. Ima kéjtsïtakuechaksï miátantaasïrendi israelitechani eskaksï uétarhinchasïrenga pímbinhasï jarhani Jeobani japarini. Peru imani jurhiatikua jimbo, no sánderu jukaparhakuespti eska Tata Diosï puákuantapiringa israelitechani, sino ambe enga sánderu jukaparhakuepka, jindespti ambe enga orheta uénga kʼéri saserdoti ante de inchani Sánderu Pímbinhasï Kuarturhu kéjtsïtakuecheri iurhiri jingoni.
(Exe je párrafu 4). *
4. Eska na arhijka Levítico 16:12, 13, ¿ambe úsïreni kʼéri saserdoti enga primeru xanhari inchenga Sánderu Pímbinhasï Kuarturhu imani Jurhiatikua enga Jeoba Puátspintenga? (Exe je dibujuni enga uénakuarhu jaka).
4 (Arhinta je Levítico 16:12, 13). Ju je eranhaskani arini ambe. Kʼéri saserdoti inchasïndi tabernakulurhu. Ma jájki jingoni páxati insiensu enga sési jájkundijka ka máteru jájkirhu kámaxati pálaeni jásï ma orueri enga turhiri jataka. Anhaxurhisïndi kortinarhu enga marhuajka para no xarharani Sánderu Pímbinhasï Kuartu. Primeru xanhari inchasïndi ima jurhiatikua kánikua janhanharhikua jingoni (imani mismu jurhiatikua ménderu tsimani xanhari inchaati) ka anhaxurhisïndi Arka Pakatperakueri orhepani jimbo. Ini ambe úni, ísïspti komueska meru Jeobaeri orhepani jimbo jarhani. Tátsekua, kurhirasïndi insiensuni ka úndasïndi sési jájkundeni iámu kuarturhu. * Ka ménderu inchaati Sánderu Pímbinhasï Kuarturhu kéjtsïtakuecheri iurhiri jingoni para Tata Diosï puákuantani imecheri pekaduechani. Peru ju je exeni arini ambe: orheta kurhirasïndi insiensuni antesi de kéjtsïtani iurhirini para Jeoba puákuantani.
5. ¿Ambechi jorhenguarhisïni enga insiensu úranhenga ima Jurhiatikua enga Jeoba Puátspintenga?
5 ¿Ambechi jorhenguarhisïni enga insiensu úranhenga ima Jurhiatikua enga Jeoba Puátspintenga? Bibliarhu uandasïndi eska Jeoba ísï jaiapanhiantasïnga imeri marhuaricheri kómarhikuechani komueska insiensu (Sal. 141:2; Jaŋ. 5:8). Ju je miáni eska kʼéri saserdoti kánikua janhanharhikua jingoni pásïrenga insiensuni Jeobaeri orhepani jimbo. Májkueni, juchajtuchi kánikua janhanharhikua jingoni uandajpasïnga Jeobani kómarhikua jimbo. Kánikuachi jukaparharasïnga engajtsïni Kuerajpiri íntskujka sésikua parachi andarhierani, ísï eska sapi ma na újka táti jembani jingoni (Sant. 4:8). Jiókuarhisïndijtsïni parachi imeri amigueni (Sal. 25:14). Ka i ambe kʼéri kóntperata máesti, jimbochisï no uéjka imani ambe úni enga no sési pʼikuastaaka.
6. ¿Ambejtsïni jorhendasïni Jesusiri ambe enga saserdoti orheta insiensu kurhirenga antesi de kéjtsïtani iurhirini?
6 Ju je miáni eska kʼéri saserdoti orheta jatsisïrenga para insiensu kurhirani antesi de kéjtsïtani iurhirini. Enga ísï uénga, úsïrendi eska Jeoba jaiapanhintapiringa. ¿Ambechi jorhenguarhisïni iri ambe? Enga Jesusi Echerirhu jápka, para úni íntspini imeri tsípikuani, orheta úspti ambe ma enga sánderu jukaparhakuepka eska kʼuiripuechani pʼímutantaani. Paraka Jeoba úpiringa jukaparharani Jesusiri uarhikuani, Jesusi jatsispti para méntkisï kurhajchani. Ísï úparini xarhataspti eska sánderu sésiska úni ambe enga Jeoba juramujka. Xarhataspti eska Jeoba jurhimbitku juramusïnga.
7. ¿Jeoba andisï sési pʼikuarherapi iámindu ambe jimbo enga Jesusi úpka ixú Echerirhu?
7 Enga Jesusi echerirhu jápka, iámindu ambe jimbo kumpliriuaspti Jeobaeri ambakiti juramukuechani. Nájkiruka jatsiapka tsʼéjkukuechani, uandanhiatechani ka enga mítipka eska kánikua no sési kánhapiringa asta uándikunhani, méntkisï xarhataspti eska imeri Táti jembajkusï újka sési juramuni (Filip. 2:8). Enga Jesusi tsʼéjkukuechani jatsiapka, “ueparini ka mískuarhiparini kómarhispti” (Ebr. 5:7). Ambakiti mintsita jingoni kómarhisïrendi ka inde ambe úspti eska uékapiringa méntkisï kurhajchani. Jeoba ísï exeaspti Jesusiri kómarhikuechani komu insiensu enga xáni sési jájkundenga. Iámindu ambe enga Jesusi úpka ixú Echerirhu, sési pʼikuastaspti Táti jembani ka xarhataspti eska Jeobajkusï újka sési juramuni.
8. ¿Nénachi uá májkueni úni eska Jesusi?
8 Uákachi májkueni úni eska Jesusi engachi jánguarhintaska kumpliriuani Tata Diosïri juramukuechani ka engachi no méni jurajkuska. Engachi tsʼéjkukuechani jatsiajka, kómarhisïngachi Jeobani parajtsïni jarhuatani jimbokachi uékasïnga jaiapanherantani. Engachi iámindu ini ambe újka, xarhatasïngachi eska imajkusï újka sési juramuni. Míteskachi eska ima no jiókuarhiauaka juchari kómarhikuechani engachi imani ambe úska enga ima no jaiapanhintajka. Peru engachi ísï irekaska eska Jeoba na uéjka, uákachi mintsikani eskaksï juchari kómarhikuecha engachi mintsita jingoni uájka, ísïuaka komueska insiensu enga xáni sési jájkundenga. Ka ístuchi uáka seguru jarhani eska juchari Táti auandarhu anapu sési pʼikuarheraaka engachi no méni jurajkuska ka méntkisïchi kurhajchani (Prov. 27:11).
MARHUAKUSÏNGACHI JEOBANI JIMBOKACHI AGRADESIDU JARHASKA KA XÉNCHANCHI
(Exe je párrafu 9). *
9. ¿Andiksïsï israelitecha uáueni pínandikueri kéjtsïtakuechani?
9 Jorhenguarhikua tsimani: marhuakusïngachi Jeobani jimbokachi agradesidu jarhaska imani jingoni. Ju je exeni máteru jukaparhakua ambe engaksï israelitecha uénga para Jeobani kómarhini: pínandikueri kéjtsïtakuecha. * Libru de Levítico jimbo, jorhenguarhisïngachi eskaksï israelitecha úsïrenga uáni pínandikueri kéjtsïtakuechani paraksï xarhatani eskaksï agradesidu jarhasïrenga Jeobani jingoni (Lev. 7:11-13, 16-18). Nóksï úsïrendi ini kéjtsïtakuani jimboka juramukua máespka, sino jimbokaksï uékasïrenga ísï úni. Jimajkani, ima enga uénga ini jásï kéjtsïtakuani, úsïrendi jimboka xénchasïrenga imeri Tata Diosï Jeobani. Ima enga ini kéjtsïtakuani uénga, imeri familia ka saserdotichaksï arhasïrendi animaliri kʼuiripitani. Peruksï máru animaliri particha solu jindespti para Jeoba. ¿Náki particha?
(Exe je párrafu 10). *
10. ¿Néna terukuntasïni pínandikueri kéjtsïtakuecha enga Levítico 3:6, 12, 14-16 arhijka, na enga Jesusi marhuakupka Táti jembani?
10 Jorhenguarhikua tanimu: ambakiti ambechi íntskusïnga Jeobani jimbokachi xénchasïnga. Jeoba exesïrendi eska animaliri tamakua sánderu ambakiti ambespka. Ístu uandaspti eska rinionicha ka ígadu kánikua jukaparhakua ambespka para ima (arhinta je Levítico 3:6, 12, 14-16). Ísï jimbo, Jeoba kánikua tsípisïrendi enga israelita ma, rinionini, ígaduni ka tamakua kéjtsïtakupiringa. Ima israelita enga indeni ambe kéjtsïtenga, xarhatasïrendi eska mintsita jingoni uékasïrenga íntskuni Jeobani sánderu ambakiti ambe. Májkueni, Jesusi sánderu ambakiti ambe íntskuspti Táti jembani enga iámindu mintsita jingoni marhuakupka jimboka xénchasïrenga (Juanu 14:31). Jesusi tsípikua jingoni úsïrendi ambe enga Tata Diosï uéjka ka kánikua jukaparharaasïrendi imeri juramukuechani (Sal. 40:8). ¡Xáni enga sési pʼikuarherapka Jeoba exeni na enga xáni sési marhuakuenga imeri Uájpa!
Jimbokachi xénchasïnga Jeobani, íntskusïngachi sánderu ambakiti ambe. (Exe je párrafu 11 a 12). *
11. ¿Néna terukuntasïni na engachi marhuakujka Jeobani, pínandikueri kéjtsïtakuecha jingoni?
11 Israelita ma tsípikua jingoni kéjtsïtakusïrendi Tata Diosïni para xarhatani eska ambakiti pájperakua ma jatsisïrenga Jeobani jingoni ka ístu para uékperakua xarhatakuni. Marhuakuni Jeobani, ísïsti komueskaksï ima kéjtsïtakuecha jimbokajtsïni no nema afuersa arhisïnga parachi xarhatani ambe engachi pʼikuarhinhijka Jeobani jimbo. Jimbokachi mintsita jingoni xénchasïnga, ambakiti ambechi úsïnga imani jimbo. Jeoba kánikua sési pʼikuarherajti exeani xáni uáni kʼuiripuechani engaksï marhuakuni jaka jimbokaksï kánikua xénchasïnga ka jukaparharaanksï imeri juramukuechani. Kánikuajtsïni sési pʼikuastantasïndi enga ima no solu exejka ambe engachi újka para marhuakuni sino andichisï marhuakujki. Por ejemplu, engachi jatirikia ka nóteruchi únia xáni marhuakuni eskachi na uékapiringa, uákachi seguru jarhani eska Jeoba no exeni jarhasïnga ambe engachi nóteru újkia úni. Jamberichi ísï pʼikuarherajka enajkichi nóteru káni marhuakujkia, peru ima exesïndi na engachi xáni jánguarhintajka jimbokachi kánikua xénchasïnga. Kánikua tsípikua jingoni jiókuarhisïndi sánderu ambakiti ambe engachi újka para marhuakuni.
12. ¿Néna pʼikuarherasïreni Jeoba engaksï israelitecha pínandikueri kéjtsïtakuechani uáuenga ka amberichi uá seguru jarhani?
12 ¿Ambejtsïni jorhendasïni pínandikueri kéjtsïtakuecha? Jeoba kánikua sési pʼikuarherasïrendi enga sïraani jarhaenga jimboka kurhini jarhasïrenga sánderu ambakiti ambe animaliri ma. Ísï jimbo, uákachi seguru jarhani eska Jeoba sési pʼikuarherasïnga engachi tsípikua jingoni marhuakujka ka iámindu mintsita jingoni (Kol. 3:23). Jeoba kánikua sési pʼikuarherajti. Para ima kánikua jukaparhakua ambesti ka méntkisï miáuati iámindu ambe engachi uékperakua jimbo újka para imani marhuakuni, ia sea kánikua o sánititu (Mat. 6:20; Ebr. 6:10).
JEOBA ÚJCHAKURASÏNDI IMERI IRETANI
13. Eska na arhijka Levítico 9:23, 24, ¿néna xarhataspi Jeoba eska jeiapanhiantaspka saserdotichani?
13 Jorhenguarhikua tʼámu: Jeoba újchakurasïndi imeri iretani. Ju je exeni ambe enga úkuarhipka juáta Sinai jandukutini, jiáni enga tabernakulu uaxastanhapka 1512 jimbo ante de Jesusi (Éx. 40:17). Moisesi orhejtsïkuspti tánguarhikuani nani engaksï Aaronini ka imeri uájpechani saserdoti uápka. Ireta Israeli tánguarhispti paraksï primeru xanhari exeni engaksï saserdoticha animalichani kéjtsïtaapiringa (Lev. 9:1-5). ¿Néna xarhataspi Jeoba eska jaiapanhiantaspka imechani engaksï apenasi saserdoti únhapka? Engaksï Aaroni ka Moisesi újchakuraapka israelitechani, Jeoba auandarhu uératini chpiri uekopaspti para méntku iámu kéjtsïtakuani kurhirani enga altarirhu jápka (arhinta je Levítico 9:23, 24).
14. ¿Andisï jukaparhakue para jucha enga Tata Diosï xarhatapka eska jaiapanhiantaspka Aaronini ka uájpechani komu saserdoticha?
14 Imani xáni kʼéri ambe enga Jeoba úpka, xarhataspti eska jarhuataapiringa iámindu ambe jimbo Aaronini ka máteru saserdotichani. Engaksï israelitecha exepka eska Tata Diosï jarhuataapiringa saserdotichani, kurhangusptiksï eskaksï jatsispka para iámindu ambe jimbo kurhajchaani. Ka inde ambe jukaparhakua ambesti para jucha, jimboka Israeli anapu saserdotichaksï ejemplu máespka para sánderu kʼéri ambe enga tátsekua úkuarhipiringa. Kristu jindesti sánderu Kʼéri Saserdoti ka imani jingonksï 144,000 saserdoticha ka reicha juramuati auandarhu (Ebr. 4:14; 8:3-5; 10:1).
Jeoba újchakurasïndi ka jarhuatasïndi imeri kúnguarhikuani ka juchachi jatsiska para iámindu ambe jimbo kurhajchani imeri kúnguarhikuani. (Exe je párrafu 15 a 17). *
15, 16. ¿Ambe xarhatasïni eska Jeoba jarhuataxaka jántspirini enga mintsinharhikueka ka jánhaskatiini?
15 Uéxurhini 1919 jimbo, Jesusi erakuaspti namunitu kristianuechani paraksï jindeni jántspiri enga mintsinharhikueka ka jánhastiini. I jántspiri, orhejtsïkusïndi aianhpikuani ka tʼireraasïndi o jorhendaani Tata Diosïri ambe Jesusiri chúxapatichani (Mat. 24:45). ¿Exexakichi eska Tata Diosï jaiapanhintasïnga jántspirini enga mintsinharhikueka ka jánhastiini?
16 Nóambakiti ka imeri parhakpini sómeni jánguarhintastia ójkutani jántspirini enga mintsinharhikueka ka jánhastiini. Peru jántspiri no úpirindi jandiajku orhepani uérani enga no Jeobaeri jarhuajperata jimboepiringa. Niárastiksï tsimani kʼérati guerrecha úkuarhini ka uánikua paisicha no jatsini tumina; ka ístu, no sésiksï kaasti Tata Diosïri marhuarichani. Peru nájkiruka iámindu i ambe úkuarhika, jántspiri enga mintsinharhikueka ka jánhastiini, seguirixati jorhendaani Kristueri chúxapatichani Tata Diosïri ambe ixú Echerirhu. Ju je eratsini xáni uánikua publikasionichani engachi jatsiaka jukari nobesientu idiomecha jimbo ka iáminduksï gratisisti. I ambe meru xarhatasïndi eska Tata Diosï jarhuataxaka jántspirini. Aianhpikua ístu xarhatasïndi eska Jeoba jarhuataxaka jántspirini. Ambakiti ambe aianhpinhaxati “iápuru parhakpinirhu” (Mat. 24:14). Seguruchi jarhaska eska Jeoba kánikua jarhuataxaka ka újchakurani imeri iretani.
17. ¿Nénachi xarhatasïni eskachi apoiarixaka kúnguarhikuani enga Jeoba úrani jaka?
17 Ju je kurhamarhikuarhini: “¿Jukaparharasïni engani Jeobaeri irhetarhu jaka?”. Moisesiri ka Aaroniri jurhiatikuecha jimbo Jeoba chpiri uekopaspti auandarhu uératini para xarhatani eska jarhuataapiringa saserdotichani. Májkueni, juchari jurhiatikuecha jimbo, xarhatachestijtsïni eska jarhuataxaka imeri iretani. Jiájkani, uánikua ambechi jatsiska engachi jimbo jatsika para agradeserikuni Jeobani (1 Tes. 5:18). ¿Nénachi xarhatasïni eskachi apoiarixaka kúnguarhikuani enga Jeoba úrani jaka? Engachi kumpliriuajka Bibliaeri konsejuechani engaksï publikasionicharhu uérajka, tánguarhikuecharhu ka kʼéri tánguarhikuecharhu ka engachi jánguarhintajka aianhpini na engachi xáni újka ka ístu Jesusiri chúxapatichani uáni (1 Kor. 15:58).
18. ¿Ambechi eratsitixaki úni?
18 Jatsiskachi para eratsitini jarhani ísï úni eska libru de Levítico na uandajka. Ju je jánguarhintani parajtsïni Jeoba jaiapanhintani paraka jiókuarhiaka imani ambe engachi újka para marhuakuni. Ju je marhuakuni Tata Diosïni jimbokachi agradesidu jarhaska. Ka ju je seguirini sánderu ambakiti ambe íntskuni jimbokachi mintsita jingoni xénchasïnga. Ka ístu ju je kánikua apoiarini kúnguarhikuani enga Jeoba úrani jaka iásï. Engachi iámindu ini ambe úska, xarhatakuakachi Jeobani eskachi kánikua jukaparharasïnga engajtsïni íntskuka sésikua parachi marhuakuni ka imeri Testigueni.
PIREKUA 96 Tata Diosïri Karakata intsïmperata máesti
^ párr. 5 Libru de Levítico jimboksï jarhasti uánikua juramukuecha enga Jeoba ióntki anapu Israelini íntskupka. Iásï anapu kristianuechachi no jatsiska para kumpliriuani indeni juramukuechani, peruchi uáka uánikua ambe jorhenguarhini. Ini artikulu jimbochi exeaka jukaparhakua ambe engachi uáka jorhenguarhini ini librueri.
^ párr. 4 Insiensu engaksï ióntki anapu israelitecha tabenakulurhu kurhirenga, pímbinhasï ambespti ka jiántkuksïsï kurhirendi para Jeobani kómarhini (Éx. 30:34-38). No nani uandasïndi eska imecha engaksï uénapka Jesusini chúxapani, úrasïrenga insiensuni paraksï Jeobani kómarhini.
^ párr. 9 Parachi sánderu ambe míteni pínandikueri kéjtsïtakuecheri ambe, uákachi exeni libru Perspicacia para comprender las Escrituras, bolumeni 2, pájina 523 ka La Atalaya 15 de eneru de 2012.
^ párr. 54 AMBE ENGA XARHATAJKA IMAJENI: Ima Jurhiatikua enga Jeoba Puátspintenga, Israeli anapu kʼéri saserdoti inchasïrendi Sánderu Pímbinhasï Kuarturhu ka pásïrendi turhiri ka insiensu para iámu kuartu sési jájkundeni. Ka ménderu inchasïrendi kéjtsïtakuecheri iurhiri jingoni para Tata Diosï puákuantani imecheri pekaduechani.
^ párr. 56 AMBE ENGA XARHATAJKA IMAJENI: Israelita ma ka imeri familia, karichinksï ma pásti para saserdoti úrani komu pínandikueri kéjtsïtakua paraksï xarhatakuni Jeobani eskaksï agradesidu jarhaska.
^ párr. 58 AMBE ENGA XARHATAJKA IMAJENI: Enga Jesusi Echerirhu japka, xarhataspti na enga xáni xénchenga Jeobani enga iámindu ambe jimbo kurhajchapka ka enga jarhuataapka imeri chúxapatichani májkueni úni.
^ párr. 60 AMBE ENGA XARHATAJKA IMAJENI: Pirenchi ma enga jatirikia kartechani uáxati para aianhpini; ini ambe úparini, íntskuxati Jeobani sánderu ambakiti ambe enga jatsika, nájkiruka nóteru újkia uánikua ambe úni.
^ párr. 62 AMBE ENGA XARHATAJKA IMAJENI: Febreruni de 2019, Gerrit Lösch enga jaka Grupurhu enga Orhejtsïkuajka Iámindu Kúnguarhikuechani, aianhpispti eska uéraspkia edisioni rebisada Traducción del Nuevo Mundo alemán jimbo. Alemania anapu aianhpiricha, komu i tsimani pirenchicha, kánikuaksï tsípixati jimbokaksï úraxakaia ini Bibliani aianhpikuarhu.
