1, 2. a) ¿Ambejtsïni jarhuatasïni pauani pauani orhepani uérani? b) ¿Ambechi exea ini artikulu jimbo?

ENGACHI na orhepani uérakujkia tsʼéjkukuani ma, uánikuachi eratsisïnga eskachi no úpiringa jandiajku ísï úni. Jamberichi ísï uandaka engachi eratsintapkia na engachi orhepani uérakuka pʼamenchakuani ma o engachi uarhiranchaka nemani. Úskachi pauani pauani orhepani uérani solu jimbokajtsïni Jeobaeri espiritu santu íntskuska “uinhapikua enga xáni kʼéri ambeka” (2 Kor. 4:7-9).

² Ístuchi uétarhinchasïnga espiritu santu parachi úni orhepani uérani ini parhakpinirhu enga xáni no sési jánhaskuarhini jaka (1 Juanu 5:19). Ka ístuchi jatsiska para orhepani uérakuani “noambakitiri espirituechani” (Efes. 6:12). Míteparini eskachi jatsiska para orhepani uérakuni iámindu ini ambe, ju je exeni tsimani ambe na engajtsïni espiritu santu jarhuatajka. Tátsekuachi exeaka ambechi uá úni parajtsïni espiritu santu meru jarhuatani.

3. ¿Nénajtsïni jarhuatasïni espiritu santu orhepani uérakuani uandanhiatechani?

³ Jeobaeri espiritu santujtsïni jarhuatasïndi engajtsïni uinhapikua íntskujka parachi úni juchari ánchikuarhitani nájkirukachi uandanhiatechani jatsiauaka. Apostuli Pablu exesïrendi eska “Kristueri uinhapikua” jimbo, úsïrenga seguirini marhuakuni Jeobani nájkiruka uandanhiatechani jatsiapiringa (2 Kor. 12:9). Enga Pablu segundu biajini úni jámaenga eianhpikuarhu, no solu jánguarhintaspti kánikua aianhpini, sino ístu ánchikuarhispti para úni nitamakuarhini. Jini Korintu, kʼumanchikua ma jimbo pakaraspti enga Ákila ka Prisila irekapka, engaksï kʼumanchikuechani uáuenga chibueri sïkuiri jingoni. Ka jimboka Pablujtu indeni ambe uénga, ánchikuarhisïrendi imecha jingoni máru jurhiatikuechani (Uku. 18:1-4). Espiritu santu no solu íntskuspti uinhapikua para úni ánchikuarhini, sino ístu para aianhpini.

4. Eska na arhijka 2 Korintu 12:7b-9, ¿náki kʼéri mískuarhita jatsispi Pablu?

 ⁴ (Arhinta je 2 Korintu 12:7b-9). ¿Ambe arhikuekaspi Pablu ini karakatecha jimbo enga uandapka eska kʼéri mískuarhita ma jatsispka imeri kuerpurhu kómueska ma chekamita? Kánikuachi pʼamerapiringa engachi chekamita ma jukarhikorhetini japiringa. Ísï jimbo, Pablu arhikuekaxapti eska no sési nitamakuarhixapka imeri mismu uandanhiata ma jimbo. Uandaspti eska inde uandanhiata, ísïspka komueska “Noambakitiri jántspiri” enga no sési úkuni japka. Jamberi no jindepti Noambakiti ka imeri demoniuecha engaksï tsʼéjkuni japka. Peru engaksï exepka eska Pablu uandanhiata ma jatsispka, jamberiksï sánderu uandanhiatapti paraksï sánderu no sési pʼikuastani ka sánderuksï no sési úkuni. ¿Ambe úspi apostuli Pablu?

5. ¿Néna mókukuantaspi Jeoba, Pablueri kómarhikuechani?

⁵ Uénani jámani, Pablu nóteru uékasïrendia imani chekamikuani pʼikuarherani. Ima uandaspti: “Tanimu uelta kómarhiska juchiti Tatani [Jeoba] eskarini késtatachipiringa”. Nájkiruka xáni kómarhipka, seguirixapti pʼikuarherani chekamikuani. ¿I ambe arhikuekasïni eska Jeoba no mókukuantaspka imeri kómarhikuechani? Nómbe, Jeoba mókukuantaspti. Nájkiruka no kénditakupka uandanhiatani, íntskuspti uinhapikua para úni orhepani uérani ka arhispti: ‘Juchiti uinhapikua sési jimbo uinhapitisti para ima enga sánderu debilika’ (2 Kor. 12:8, 9). Jeobaeri jarhuajperata jimbo, Pablu úspti seguirini tsípikua ka pínandikua jingoni irekani (Filip. 4:4-7).

6. a) ¿Nénajtsïni mókuchiantasïni Jeoba juchari kómarhikuechani? b) ¿Náki tekstuecheri aiatsperakuechajtsïni uinhaperantasïni engaksï ini párrafurhu jaka?

⁶ ¿Ménisïchi kómarhiski Jeobani parajtsïni kénditachini tsʼéjkukua ma, ísï eska Pablu na úpka? Engachi méntku úndapka kómarhini Jeobani peruchi seguirini jarhani imani tsʼéjkukuani jatsini o asta sánderu kʼénia, jamberichi niárapka eratsini eskajtsïni ima nóteru jaiapanhintasïrenguia. Enga ísïka, ju je apostuli Pablueri ejempluni miáni. Ísï eska Jeoba na mókukuantapka imeri kómarhikuechani, juchantsïntujtsïni mókuchiantauati. Nájkirukachi jamberi útasï jatsiaka imani uandanhiatani, imeri espiritu santu jimbojtsïni íntskuati uinhapikua parachi úni orhepani uérani (Sal. 61:3, 4). Jamberichi ísï pʼikuarheraaka enajkichi nóteru uáia, perujtsïni Jeoba no méni jurajkuati (2 Kor. 4:8, 9; Filip. 4:13, TNM).

7, 8. a) ¿Néna terukuntasïni tarhiata, espiritu santu jingoni? b) ¿Ambe uandaspi Pedru para xarhatani na enga jarhuajpijka espiritu santu?

⁷ ¿Ístujtsïni néna jarhuatasïni espiritu santu? Ísï eska tarhiata na pájka ambakiti lugari ma jimbo barkuni ma engaksï marirhu anapu olecha uinhamu manatani jarhajka, espiritu santujtsïni jarhuatasïndi orhepani uérakuani uandanhiatechani parakachi uáka niárani jimbanhi parhakpinirhu engajtsïni Jeoba aiachika.

⁸ Jimboka apostuli Pedru kurucha pʼimati máespka, mítespti naniasï ísï nirani marhirhu. Jamberi jimbosï uandapti eska espiritu santu ísï jarhuajpisïnga komueska tarhiata na pájka barkuni ma jimesïsï enga jatsika para nirani. Karaspti: “No méni karanhasti profesia ma kʼuiripuecheri eratsikua jimbo, sino achamasïchaksïsï uandapti Tata Diosïni jimbo ísï eska espiritu santu na jarhuataapka”. Uandakua griegu enga tradusirikuarhijka “jarhuataapka”, arhikuekasïndi “paapka” o “manataapka” (2 Ped. 1:21, TNM).

9. ¿Ambe uékasïreni Pedru eskaksï máteruecha eranhaskapiringa uandakua jingoni “paapka”?

⁹ ¿Ambe uékasïreni Pedru eskaksï máteruecha eranhaskapiringa uandakua jingoni “paapka”? Lukasï enga Apostulicheri Ukuechani karaapka, májkueni jásï ma uandakua griegu úraspti para arhikuekani na enga barku ma jurajkutakuarhijka eska tarhiata paaka (Uku. 27:15).  Kʼuiripu ma enga Bibliaeri ambe estudiarijka, uandasti eska, enga Pedru uandapka eska espiritu santu paaspka o manataani Bibliaeri kararichani, barku ma jingoni terokutantaspti enga tarhiata manatajka o páni. Ini uandakua jingoni, Pedru arhikuekaxapti eska, ísï eska tarhiata na pájka o jarhuatani barkuni lugari ma jimbo niárani, espiritu santu jarhuataaspti profetechani ka Bibliaeri kararichani paraksï imecheri ánchikuarhitani úni. I mismu kʼuiripu enga Bibliaeri ambe estudiarijka, uandaspti eskaksï profetecha ísïspka komueska ima barku enga sési pʼirakuajka belechani (kʼérati takusïcha engaksï barkuecha jukaajka), i ambe arhikuekasïndi “eskaksï listu jarhaspkia para úni ambe enga espiritu santu arhiapiringa”. Ka Jeoba úspti eska “tarhiapiringa”, o sea, íntsaaspti espiritu santu. Jimajkani, Bibliaeri kararichaksï jurajkuspti eska espiritu santu paapiringa o jarhuataani.

10, 11. ¿Ambe tsimani ambechi jatsiski para úni parajtsïni espiritu santu meru jarhuatani? Jatsiku je ejemplu ma.

¹⁰ Iásï Jeoba nóteru úrasïndia imeri espirituni para kararkuarhiani Bibliaeri libruechani. Peru seguirixati úrani para imeri marhuarichani jarhuataani. Ima seguirixati jarhuajpini. Jimajkani, parajtsïni espiritu santu meru jarhuatani, jatsiskachi para juchajtu úni ambe ma. ¿Ambechi jatsiski para úni?

¹¹ Ju je eratsini arini ejempluni, enga kʼuiripu ma uéjka eska tarhiata jarhuataaka para barku manakuarhini, jatsisti para tsimani ambe úni. Orheta, jatsisti para barkuni jima pérani enga tarhiani jarhajka, jimboka barku no manakuarhiaka enga uanamukunisï pakaraska. Tsimani úni jámani, jatsisti para karhataani ka sési pʼirakuani belechani, jimboka tarhiata solu ísï uáka manatani barkuni. Májkueni, soluchi ísï uáka seguirini marhuakuni Jeobani engajtsïni imeri espiritu jarhuataska. Ka parajtsïni úni jarhuatani, jatsiskachi para tsimani ambe úni. Uénani jámani, jima niárani enga tarhiani jarhajka, enga jindeka marhuakuni Tata Diosïni parajtsïni imeri espiritu santu úni jarhuatani. Tsimani úni jámani, karhatani belani, o sea jánguarhintani na engachi xáni uáka para Jeobani marhuakuni (Sal. 119:32). Engachi ini ambe úska,  espiritu santujtsïni jarhuataati seguirini sési marhuakuni Jeobani nájkirukaksï máteruecha no uékaaka eskachi ísï uáka ochi kʼérati tsʼéjkukuechani jatsiani ka parachi úni niárani jimbanhi parhakpinirhu enga Tata Diosïrika.

12. ¿Ambechi exea iáiasï?

¹² Asta ixú jamberichi exeskia tsimani ambe na engajtsïni jarhuatajka espiritu santu. Úsïndi eskachi uinhapiti jauaka ka jarhuatasïndijtsïni parachi no jurajkuni Jeobani engachi tsʼéjkukua ambe nitamakuarhijka. Ístu úsïndi eskachi seguiriuaka marhuakuni Jeobani ka eskachi niáraaka jatsini tsípikua para méntkisï. Iásï, ju je exeni tʼámu ambe engachi jatsika para úni parajtsïni espiritu santu meru jarhuatani.

13. a) Eska na arhijka 2 Timoteo 3:16, 17, ¿nénajtsïni jarhuataa Tata Diosïri Karakata? b) ¿Ambechi jatsiski para úni?

¹³ Uénani jámani, arhintani Tata Diosïri Karatani (arhinta je 2 Timoteo 3:16, 17). Jeoba imeri espirituni úrasti paraksï ima kʼuiripuecha engaksï Bibliani karaka, imani ambe eratsipiringa enga Tata Diosï uékenga eskaksï karapiringa. Arhintani Bibliani ka eratsintani, úsïndi eska niáraaka juchari eratsikuarhu ka mintsitarhu ambe engajtsïni Tata Diosï jorhendajka. Ambe enga Tata Diosï kararkuarhika jarhuatasïndijtsïni parachi ísï irekani eska ima na uéjka (Ebr. 4:12). Peru parajtsïni espiritu santu meru jarhuatani, jatsiskachi para tiempu arhutani para Bibliani arhintani ka jingontku eratsintani ambe enga arhijka. Engachi ísï úska, Tata Diosïri Karakatajtsïni jarhuataati ambakiti ambe uandani ka úni.

14. a) ¿Andichisï uandajki eska tánguarhikuecharhu “tarhiani jarhasïnga”? b) ¿Ambechi uá úni parachi ísï nirani tánguarhikuecharhu komueska “ima barku enga sési pʼirakuajka belechani”?

¹⁴ Tsimani úni jámani, kómarhini Tata Diosïni imeri marhuaricha jingoni (Sal. 22:22). Úpiringachi uandani eska tánguarhikuecharhu “tarhiani jarhasïnga”, jimboka Jeobaeri espiritu jima jarhasïnga (Jaŋ. 2:29). ¿Andichisï ísï uandajki? Jimboka engachi tánguarhijka juchari erachichani jingoni, kurhakusïngachi imeri espiritu santuni kómarhikua jimbo, pireasïngachi pirekuechani engaksï Bibliarhu pʼitakata jaka, ka Bibliaeri ambechi jorhendanhasïnga orhejtsïkutichani jimbo ka ístu orhejtsïkutiri jarhuajpirichani jimbo engaksï espiritu santu jimbo erakunhaka. Ka i mismu espiritu santu, jarhuataasïndi pirenchichani paraksï uáni ka nitamataraani imecheri partichani. Peru engachi uéjka eskajtsïni espiritu santu meru jarhuataaka, jatsiskachi para sési preparadu nirani tánguarhikuecharhu para mókutskuechani íntspiani. Engachi ísï úska, ísïuakachi komueska “ima barku enga sési pʼirakuajka belechani”.

15. ¿Ambechi uá úni parajtsïni espiritu santu jarhuatani aianhpikuarhu?

¹⁵ Tanimu úni jámani, nirani aianhpini. Engachi Bibliani úrajka jiáni engachi aianhpini jámani jarhajka ka jorhentpini, jurajkusïngachi eskajtsïni espiritu santu jarhuataaka aianhpikuarhu (Rom. 15:18, 19). Peru jatsiskachi para no kueratani aianhpikuarhu ka úrani Bibliani na engachi xáni uáka parajtsïni espiritu sánderu jarhuatani. Ambe ma engachi uáka úni para sánderu sési uandontskuarheni kʼuiripuecha jingoni Bibliaeri ambe, jindesti úraani imani ejempluechani engaksï jaka Programarhu para ánchikuarhini tánguarhikuarhu Kristianuecheri Irekua ka Aianhpikua.

16. ¿Ambechi jatsiski para úni parachi sánderu sóntku jatsini espiritu santu?

¹⁶ Tʼámu, kómarhini Jeobani (Mat. 7:7-11; Luk. 11:13). Ma ambe engajtsïni jarhuataaka sánderu sóntku jatsini espiritu santu, jindesti kurhakuni Jeobani kómarhikua jimbo. No ma ambe ni kárseli ni Noambakiti uá eska Jeoba no kurhauaka ambe engachi kómarhijka o eskajtsïni no niárachiaka imeri espiritu santu enga jindeka intsïmperakua ma (Sant. 1:17). ¿Nénachi jatsiski para kómarhini parajtsïni espiritu santu meru jarhuatani? Parachi mókuntani ini kurhamarhikuani,  ju je sánderu sési jorhenguarhini kómarhikueri ambe, ejemplu ma jingoni enga solu Lukasʌri Ebanjeliu jimbo karakata jaka. *

17. ¿Ambejtsïni jorhendasïni kómarhikueri ambe ima ejemplu enga Jesusi úrapka enga Lukasʌ 11:5-9, 13 jimbo jaka?

¹⁷ (Arhinta je Lukasʌ 11:5-9, 13). I ejemplu enga Jesusi úrapka, jorhendasïndijtsïni na engachi jatsika para kurhajkuarhini espiritu santu. I ejemplu xarhatasïndi eska acheeti intsïnhaspka ambe enga uétarhinchani japka jimboka ‘méntku jauenaspka’ kurhajkuarhini. No chéspti kurhakuni imeri amiguni eska jarhuatapiringa, nájkiruka terujkani chúrikuepkia (exe je nota para estudiarini “persistencia atrevida”, Programarhu para ánchikuarhini tánguarhikuarhu Kristianuecheri Irekua ka Aianhpikua juliueri 2018). ¿Néna terukutantaspi Jesusi ini ejempluni kómarhikua jingoni? Uandaspti: “Kurhajkuarhi je ka intsïnhaakajtsï, jirinha je ka exentaakajtsï, tentenasta je, ka uéraminhaakajtsï”. Jimajkani, jorhenguarhisïngachi eska parajtsïni espiritu santu úni jarhuatani, jatsiskachi para méntku kurhajkuarhini jarhani kómarhikua jimbo.

18. ¿Andichisï uá seguru jarhani eskajtsïni Jeoba íntskuaka imeri espiritu santu?

¹⁸ Ístu, i ejemplujtsïni jarhuatasïndi kurhanguni andijtsïnisï Jeoba íntskua espiritu santu. Ima acheeti enga Jesusi ejemplurhu uandapka, uékasïrendi sési kámani imani kʼuiripuni enga xáni chúrikua niárapka. Uékasïrendi íntskuni ambe ma para arhani peru no ma ambe jatsispti. Jesusi uandaspti eska imeri besinu jemba kurhinda íntskuspka jimboka méntku úndaspka kurhakuni. ¿Ambejtsïni uékasïreni jorhendani? Eska, enga kʼuiripu ma enga no perfektueka jarhuatajka besinu jembani ma jimboka méntku úndasïnga kurhajkuarhini ambe ma, uákachi seguru jarhani eska juchari Táti enga auandarhu jaka, íntsauaka espiritu santu imechani engaksï méntku úndajka kurhajkuarhini. Ísï jimbo, uákachi kurhakuni Jeobani imeri espiritu santu mintsikaparini eskajtsïni íntskuaka (Sal. 10:17; 66:19).

19. ¿Andichisï uá seguru jarhani eskachi uáka orhepani uérani?

¹⁹ Uákachi seguru jarhani eskachi uáka orhepani uérani nájkiruka Noambakiti méntku jánguarhintani jauaka parajtsïni no sési úchini. ¿Andichisï uá seguru jarhani? Jimbokajtsïni espiritu santu jarhuatasïnga. Uénani jámani, íntskusïndijtsïni uinhapikua parachi úni orhepani uérakuani tsʼéjkukuechani. Ka tsimani úni jámani, jarhuatasïndijtsïni parachi seguirini marhuakuni Jeobani astakachi jimbanhi parhakpinirhu niáraaka. Ísï jimbo, ju je jánguarhintani parajtsïni espiritu santu meru jarhuatani.