1, 2. Eska na arhijka 1 Pedru 4:7, 8, ¿ambejtsïni jarhuataa orhepani uérani jiáni engachi no sési nitamakuarhini jauaka?

JAMBERICHI sánderu no sési ambe nitamakuarhiaka engaksï ‘últimu jurhiatikuecha’ kʼamakurhini jauakia (2 Tim. 3:1). Por ejemplu, paisi ma jimbo enga África jaka, uarhiperanhaspti enga na jimbanhi juramuti ma japkia. Jukari seisi kutsï jimboksï kánikua no sési nitamakuarhispti erachicha ka pirenchicha engaksï no úpka imani lugari jimbo uéakuntani. ¿Ambe jarhuataaspi jiáni enga xáni no sési ambe úkuarhini japka? Máruksï máteru erachicheri kʼumanchikuarhu niraspti pakarani, nani engaksï úpiringa sánderu sési kuájchakukata jarhani. Erachi ma uandaspti: “Enga inde ambe úkuarhini japka, kánikua sési pʼikuarheraspka jimbokani amiguecha jingoni jarhaspka. Iáminduechachi uinhaperperantasïrenga”.

² Enga kʼéri mískuarhita uénakuarhiaka, sésichi pʼikuarheraaka jatsiani amiguechani engajtsïni uékaaka (Jaŋ. 7:14). Jimbosï xáni jukaparhakueti eskachi jatsiauaka ambakiti amiguechani iásï (arhinta je 1 Pedru 4:7, 8). Uánikua ambechi jorhenguarhisïnga ambe enga Jeremiasi nitamakuarhipka, engaksï imeri amigu jembecha jarhuatapka imani tiempu jimbo enga Jerusaleni kʼamajkunhapka. * ¿Nénachi uá májkueni úni eska Jeremiasi?

3. a) ¿Ambe úpirini úni eska Jeremiasi jurajkuapiringa amigu jembechani? b) ¿Ambe aiangukuarhispi Jeremiasi imeri jarhuajpirini ka ambe úkuarhispi?

³ Jeremiasi, kuarenta uéxurhinisï irekaspti imani kʼuiripuecha jingoni engaksï no kurhajchenga Jeobani, komu imeri besinuecha ka jamberi máru imeri parienticha engaksï Anatoti anapuepka nani enga ima andajpenupka (Jer. 11:21; 12:6). Peru no jurajkuaspti  amigu jembechani. Asta aianguspti Barukini, imeri ambakiti jarhuajpiri, na enga pʼikuarherenga ka i ambe karakata pakarasti jimbochisï asta jucha jamberi míteka ambe enga Jeremiasi pʼikuarherenga (Jer. 8:21; 9:1; 20:14-18; 45:1). Jamberi imani tiempu jimbo enga Baruki iámindu ambe karani japka ambe enga xáni Jeremiasi nitamakuarhipka, úpti eskaksï tsimarhani kánikua sési pájperapiringa ka janhanharperani (Jer. 20:1, 2; 26:7-11).

4. ¿Jeoba ambe arhispi Jeremiasini eska úpiringa ka andiksïsï Jeremiasi ka Baruki niárapi sánderu sési pájperani engaksï imani ánchikuarhitani úpka?

⁴ Jeremiasi no sáni chéparini aianguaspti israelitechani ambe enga Jerusaleni úkuarhipiringa (Jer. 25:3). Últimu xanhari enga Jeoba úpka ambe ma paraksï kʼuiripuecha moantani, arhispti Jeremiasini eska roiiu ma jimbo karapiringa ambe enga úpiringa (Jer. 36:1-4). Jeremiasi ka Barukiksï májku kʼéri ánchikuarhispti, jamberi uánikua kutsïcha jimbo, paraksï úni ambe enga Tata Diosï arhiapka. Seguru eska imani tiempu jimbo, imecheri jakajkukua sánderu kʼépka imani ambe jimbo engaksï uandontskuarhienga.

5. ¿Andichisï míti eska Baruki ambakiti amigu máespka Jeremiasiri?

⁵ Engaksï jatsipkia para mítetarpini ambe enga roiiurhu karakata japka, Jeremiasi imeri amigu Barukini mintsikaspti para arhintani (Jer. 36:5, 6). Baruki balori jukaspti ka úspti imani ánchikuarhitani enga xáni úkua jukapka. ¿Eranhaskasïnchi na enga xáni sési pʼikuarherapka Jeremiasi enga Baruki templurhu nipka ka iretani japarini arhintani roiiuni? (Jer. 36:8-10). Engaksï Juda anapu prinsipecha mítipka ambe enga Baruki úpka, arhisptiksï eska imechantu arhikuantaapiringa (Jer. 36:14, 15). Jimajkani, eratsisptiksï aianguni rei Jeoiakimini ambe enga Jeremiasi uandapka. Peru pʼamojkusptiksï Barukini ka arhisptiksï: “Ní ka jirikuarhi, tʼu ka Jeremiasi; eska méntku no nema míteaka nani engajtsï jauaka” (Jer. 36:16-19).

6. ¿Ambeksï úspi Jeremiasi ka Baruki engaksï no sési kánhapka?

 ⁶ Enga rei Jeoiakimi mítepka ambe enga Jeremiasi karapka, xáni ikiaspti enga jamberi kurhirapka roiiuni ka úni eskaksï ónhapiringa profetani ka Barukini. Peru Jeremiasi no chéspti. Pʼíkuspti máteru roiiuni ka Barukini íntskuspti ka arhipaspti para karani ambe enga Jeoba uandapka. Ísï jimbo, Baruki karantaspti iámindu uandakuechani engaksï roiiurhu karakata japka enga rei Jeoiakimi chpirirhu kurhirapka (Jer. 36:26-28, 32).

7. ¿Ambe úkuarhipi jiáni engaksï Jeremiasi ka Baruki májku kʼéri ánchikuarhipka?

⁷ Sáno méntkisï, imecha engaksï májku kʼéri no sési ambe nitamanchajka niárasïndiksï meru sési pájperani. Ísï jimbo, Jeremiasi ka Baruki niáraptiksï sánderu sési pájperani engaksï ménderu uéntapka karani roiiuni enga no sési úri Jeoiakimi kurhirapka. ¿Ambechi jorhenguarhisïni ini tsimani ambakiti acheeticheri?

8. ¿Andisïchi úpirini úkua jukanchani ambakiti amiguechani jatsiani ka andichisï no jatsi para ísï eratsini?

⁸ Engajtsïni ménisï nema no sési ambe úchika, jamberichi úkua jukanchajkia aianguani máteruechani na engachi pʼikuarherajka (Prov. 18:19, 24). Ístuchi úpiringa ísï exeni enajkichi nóteru uáia ambakiti amiguechani jatsiani ochi no jatsini tiempu para ísï úni. Peruchi no jatsiska para ísï eratsini. Engachi uéjka eskajtsïni juchari erachicha o pirenchicha jarhuataaka jiáni engachi tsʼéjkukua ambe jatsiaka, jatsiskachi para desde iásï mintsikaani ka aianguani ambe engachi eratsijka ka pʼikuarherani. Ísï úni, kánikua jukaparhakuesti para ambakiti amiguechani jatsiani (1 Ped. 1:22).

9. a) ¿Néna xarhataspi Jesusi eska mintsikaasïrenga imeri amiguechani? b) ¿Ambe uá úkuarhini engachi aianguska nemani ambe engachi eratsijka ka pʼikuarherani? Jatsiku je ejemplu ma.

⁹ Jesusi xarhataspti eska mintsikaasïrenga imeri amiguechani jimboka iámindu amberi uandontskuarhikuasïrenga (Juanu 15:15). Uákachi májkueni úni engachi aiangukuarhiska nemani ambe engajtsïni sési pʼikuastajka, uandanhiatajka o engajtsïni máteru nema no sési pʼikuastaka. Peru ístu, jatsiskachi para jingontku kurhajchani nemani engajtsïni aiangukuarhini jauaka ambe ma, jamberichi ísï uáka míteni eskaksï imechajtu májkueni pʼikuarherasïnga ka eratsini eska jucha ka eskachi májkueni ambe uékasïnga úni. Ju je exeni ambe enga nitamakuarhipka pirenchi Cindy enga 29 jatirika. Uénaspti kánikua sési pájperani prekursora ma jingoni enga Marie-Louise arhinhajka enga jukari 60 jatirikia. Májku kʼériksï uérasïndi aianhpini mándani juebisï tsípechani ka mámaru amberiksï uandontskuarhisïndi. Cindy uandasïndi: “Kánikua tsitisïnga juchiti amiguecha  jingoni imeri ambe uandontskuarheni enga jukaparhakueka, jimboka inde amberini jarhuatasïnga sánderu sési míteani ka sési kurhangukuani”. Sánderuchi sési pájperasïnga máteruecha jingoni engachi aianguajka ambe engachi eratsijka ka pʼikuarherhani ka engachi kurhaajka ambe engajtsïni imechajtu aiangujka. Ísï jimbo, ju je májkueni úni eska Cindy ka jucha uénani mintsita jingoni uandontskuarhikuani máteruechani ka uékperakua jingoni (Prov. 27:9).

10. Eska na arhijka Proverbios 27:17, ¿ambe uá úkuarhini engachi májku kʼéri aianhpiska erachicha jingoni?

¹⁰ Májkueni eska na úkuarhipka Jeremiasi ka Baruki jingoni, engachi jarhuataajka erachichani ka exenchi eskaksï ambakiti kʼuiripueska, jorhenguarhisïngachi imecheri ambe ka niárasïngachi sánderu sési pájperani (arhinta je Proverbios 27:17). Por ejemplu engachi erachi o pirenchi ma jingoni uérajka aianhpini ka exenchi na enga no sáni chéparini uandantajka ambe enga jakajkujka o mintsita jingoni uandantani Jeobaeri ambe ka ambe enga ima aiatspijka, jamberichi sánderu xénchaaka imani erachini o pirenchini.

11, 12. Jatsiku je ejemplu ma, enga xarhatajka eska uérani aianhpini erachi o pirenchi ma jingoni, úsïnga eskachi sánderu sési pájperaaka.

¹¹ Ju je exeani tsimani eksperiensiechani engaksï xarhatajka eska uérani aianhpini erachi o pirenchi ma jingoni, úsïnga eskachi sánderu sési pájperaaka. Adeline pirenchi máesti enga 23 jatirika ka arhispti imeri amiga Candiceni eskaksï nipiringa tsimarhani aianhpini lugari ma jimbo enga iauani ménisï aianhpinhajka. Adeline uandantasïndi: “Uékasïrengachi sánderu aianhpini ka tsípikua jingoni. Tsimarhanchi uétarhinchaxapka ambe engajtsïni jarhuatapiringa sánderu sési marhuakuni Jeobani”. ¿Néna jarhuataaspi engaksï tsimarhani nipka aianhpini? Adeline uandasïndi: “Chúrikuechanchi uandontskuarhisïrenga na engachi pʼikuarherani jarhenga, na engajtsïni sési pʼikuastenga uandontskuarheni kʼuiripuecha jingoni ka na engachi exenga Jeobaeri jarhuajperata. Tsimarhanchi tsitisïrenga imeri ambe uandontskuarheni enga kánikua jukaparhakueka ka niáraskachi sánderu sési mítperani”.

 ¹² Francia anapu tsimani pirenchicha, Laïla ka Marianne, nóksï uambuchatisti ka nirasptiksï sinku semana aianhpini jini Bangui enga República Centroafricana kapitalika. Laïla miásïndi: “Marianne ka ji jatsiaspkachi máru uandanhiatechani, peru jimbokachi jánguarhintaspka sési uandontskuarheni ka uékperakua xarhatatsperani, niáraspkachi sánderu sési pájperani. Niáraspka sánderu janhanharhini Marianneni engani exepka eska sóntku pʼindesïrenga ambe uéjki nitamakuarhini, na enga xénchauenga kʼuiripuechani imani paisirhu anapuechani ka na enga xáni tsípikua jingoni aianhpienga”. No uétarhisïndi eskachi máteru paisirhu niuaka parachi májkueni ambakiti ambe nitamakuarhini. Méni engachi uérajka aianhpini erachi o pirenchi ma jingoni enga juchari kúnguarhikuarhu jaka, úsïngachi sánderu sési mítperani ka sánderu sési pájperani.

13. ¿Ambe úpirini úkuarhini engachi erachicha jingoni uérajka aianhpini?

¹³ Engachi erachicha jingoni aianhpijka, ménisïchi no solu ambakiti ambejku exekuasïnga sino ístu ambe engaksï no sési újka. ¿Ambejtsïni jarhuataa enga ísï úkuarhiska? Ju je ménderu exeni Jeremiasiri ejemplu. ¿Ambe jarhuataspi imani para ambakiti ambe exeni máteruecheri ka puákuantani?

14. ¿Ambe jorhenguarhispi Jeremiasi Jeobaeri ambe ka i ambe néna jarhuataspi?

¹⁴ Jamberi Jeremiasi karaapti libruechani 1 ka 2 de Reyes ka ístu ima karaspti libruni enga Jeremías arhinhajka. I ánchikuarhita úspti eska Jeramiasi exepiringa na enga Jeoba xáni pʼamojkuajka kʼuiripuechani. Por ejemplu, niáraspti míteni eska enga rei Akabi moantapka imani no sési amberi enga úpka, Jeoba aiakuspti eska no exepiringa na enga kʼamajkuapiringa imeri kʼumanchikuarhu anapuechani (1 Rey. 21:27-29). Ístu mítespti eska, jiáni enga Manasesi arrepentirikuarhipka, Jeoba puákuntaspka nájkiruka sánderu no sési jásï ambe úpka eska Akabi (2 Rey. 21:16, 17; 2 Crón. 33:10-13). Íksï relatuecha kánikua jarhuatapti Jeremiasini para tekantskua ka pʼamojperakua xarhatakuani imeri amiguechani, májkueni eska Jeoba (Sal. 103:8, 9).

15. ¿Jeremiasi néna májkueni tekantskua xarhataspi eska Jeoba, jiáni enga Baruki nóteru xáni sési marhuani japkia?

¹⁵ Ju je eratsini ambe enga úpka Jeremiasi jiáni enga ma tiempu imeri amigu Baruki nóteru xáni sési marhuakuni japkia Jeobani. Jeremiasi no eratsispti eska nóteru úpiringuia mójtakurhini, sánderu sési jarhuataspti enga aiangupka ambe enga Jeoba uandapka para Baruki (Jer. 45:1-5). ¿Ambechi jorhenguarhisïni íri ambe?

16. Eska na arhijka Proverbios 17:9, ¿ambechi jatsiski para úni parachi méntkisï sési pájperani nema jingoni?

¹⁶ Sési jimbo, nóchi uáka erokuarhini eskaksï erachicha iámu ambe sési uáka. Ísï jimbo, ju je jánguarhintani méntkisï sési pájperani juchari amiguecha jingoni. Enga juchari amigu ma no sési ambe úska, jamberichi jatsiaka para jurhimbitku arhini ambe enga no sési úka peru uékperakua jingoni ka konseju ma íntskuni Bibliani úraparini (Sal. 141:5). Ka jatsiskachi para puákuntani engajtsïni juchantsïni no sési úchiaka. Ka engachi puákuntakia, nóchi jatsiska para miántani jarhani ambe engajtsïni úchika (arhinta je Proverbios 17:9). Kánikua jukaparhakuesti eska ini jurhiatikuecha jimbo enga xáni úkua jukaka, nóchi masi arhini jauaka imani ambe exeni ambe engaksï no sési újka erachicha ka pirenchicha, sino ambakiti ambe engaksï újka. Ini ambe úparini, sánderuchi sési pájperaaka. Ka meru uétarhisïndi eskachi ísï uáka, jimbokachi kʼéri mískuarhitarhu uétarhinchauaka ambakiti amiguechani.

17. ¿Nénachi míteski eska Jeremiasi ambakiti amigu máespka jiáni enga nema no sési nitamakuarhini japka?

¹⁷ Profeta Jeremiasi niáraspti ambakiti amigu máeni jiáni enga nema no sési nitamakuarhini japka. Por ejemplu, ju je exeni na enga jarhuatapka Ébedi-mélekini, kʼuiripu ma enga reiri kʼumanchikuarhu ánchikuarhienga. Ébedi-méleki posurhu uératini pʼínhantaspti Jeremiasini para no uarhini. Peru enga na ísï úpkia, chéspti eskaksï prinsipecha no sési úkupiringa. Enga Jeremiasi mítepka indeni ambe, no ísku pakaraspti erokuarhini ambe enga úpiringa imeri amigu jemba. Nájkiruka Jeremiasi ónhakata japka, jánguarhintaspti jarhuatani Ébedi-mélekini aianguparini ambakiti ambe enga Jeoba aiakupka (Jer. 38:7-13; 39:15-18).

18. Ísï eska na arhijka Proverbios 17:17, ¿ambechi uá úni enga erachi o pirenchi ma no sési nitamakuarhini jauaka?

¹⁸ Ini jurhiatikuecha jimbo, erachicha ka pirenchichaksï uánikua ambe no sési nitamakuarhisïndi. Por ejemplu, uánikuaksï no sési nitamakuarhisïndi kʼérati janikuecha jimbo, kʼérati jenchekuecha o guerrecha jimbo. Enga inde ambe úkuarhiska, jamberichi uáka paani máru erachichani juchari kʼumanchikuarhu. Jamberiksï máteruecha úpirindi tumina jingoni jarhuajpini. Peruchi iáminduecha uáka kómarhini Jeobani eska jarhuatauaka. Engachi míteska eska erachi ma kómu pʼikuarheraxaka, jamberichi no jánhaskaaka ambe arhini o ambe úni. Peruchi uáka kánikua jarhuatani, por ejemplu, uákachi imani jingoni jarhani, jingontku kurhajchani engajtsïni aiangukuarhini jauaka ambe ma ka tekstu ma arhikuntani engajtsïni juchantsïni sési pʼikuastantajka (Is. 50:4). Ambe enga sánderu jukaparhakueka, jindesti juchari amiguecha jingoni jarhani jiáni engajtsïni sánderu uétarhinchani jauaka (arhinta je Proverbios 17:17).

19. ¿Nénajtsïni jarhuataa sánderu orhepani ima amiguecha engachi desde iásï jatsiauaka?

¹⁹ Ju je eratsitini jarhani sánderu amiguechani jatsiani ka méntkisï sési pájperani imecha jingoni desde iásï. ¿Andi? Jimbokaksï juchari ikiatspiticha jánguarhintaaka parachi no májku kʼéri jarhani úraparinksï mámaru jásï chkuanderakua ambe. Jánguarhintaatiksï parachi no jarhuajperani ni eskachi mintsikperaaka. Peruksï no uáti ísï úni. Nóksï uáti úni eskachi nóteru xénchperaakia juchari erachicha ka pirenchicha jingoni. Ambe uéjkiksï úni, nójtsïni uáti jarharitani juchari amiguechani jingoni. Amiguechani engachi jatsiaka, nóksï solu jindesti para jiáni jamberi enga i parhakpini kʼamajkunhaaka, sino para méntkisï.