Uéxurhini 1983 jimbo andajpenuska. Sési tʼarhexexapka, joperu engani 10 jatiripkia, uénaspka uinhamu pʼamerhikuarhini. Ísï tsimani uéxurhini tátsekua, ma jurhiatikua tsínharhispka ka nóteruni úspkia manakuarhini. Jánguarhintasïrenga manataani jantsirichani joperuni no úsïrenga. Jiáni uératini nóteruni méni úska xanharani. Ístu ini pʼamenchakua jimbo, nóteruni úspkia kʼéni. Ísï jimbo, xántkuni kʼéska eska tataka sapichu ma.

Sáni iónisptia engani nóteruni uérenguia juchiniu, jiájkantsïni pʼorhembispti tsimani uarhiiticha, Jeobaeri testiguecha. Sáno méntkisï, no nemani xarhakusïrenga engajtsïni pʼorhembipiringa, joperu ima jurhiatikua uékaspka uandontskuarheni imani Testiguecha jingoni. Engajtsïni Paraisueri ambe aianguni japka, miántaspka eska jiáni engani sinku ísï jatiripkia, misioneru ma enga Jethro arhinhenga, mándani kutsï jurhasïrenga iretarhu Surinam uératini ka Bibliaeri ambe jorhendasïrendi tátini. Sési pʼikuarherasïrenga Jethro jingoni, jimbokarini sési kámasïrenga. Ístu, ménisïjtsïni papa kʼéricha pásïrendi tánguarhikuecharhu engaksï Testiguecha uáuenga juchiti iretarhu. Ísï jimbo, engarini Florence, ma ima Testiguecheri engajtsïni ima jurhiatikua pʼorhembipka, kurhamarhipka sini uékasïreni sánderu ambe míteni Bibliaeri ambe arhispka eska jo.

Florence ménderu kʼuanhatsentaspti imeri uámba Justus jingoni ka uénasptijtsïni jorhendani Bibliaeri ambe. Engaksï kuenta íntskukuarhepka eskani no jorhendaspka arhintani, jorhendasptijtsïni. Ísï no ióni jimbo, úsïrenguia jandiajku arhintani. Ma jurhiatikuajtsïni arhispti eskaksï Surinam axanhaspka paraksï aianhpini. Ka nóteru nema pákarapirindia Orealla parareni seguirini jarhani jorhendani Bibliaeri ambe. Joperuni kánikua sési pʼikuarheraspka engani exepka eskarini Jeoba no mirikurhispka.

Ísï tátsekua, prekursori ma niáraspti Orealla enga Floyd arhinhenga. Ma jurhiatikua enga kʼumanchikuecha jimbo jámani japka aianhpini, pʼorhembisptireni. Engarini arhipka eskarini ima jorhendapiringa Bibliaeri ambe, tsípispka. Ka imarini arhispti: “¿Andirisï tsípijki?”. Mókukuspka eskani jorhenguarhispkia foietuni ¿Ambejtsïni kurhachesïni Tata Diosï?, ka eskani uénaspkia jorhenguarhini libruni El conocimiento que lleva a vida eterna. * Ístuni aianguspka andisïni nóteruni jorhenguarhini japkia Bibliaeri ambe. Floyd jingoni kʼamaraspka jorhenguarhini libruni Conocimiento, peru imantuksï máteru nani ísï axaspti para aianhpini. Ménderu nóteru nema jarhasptia parareni Bibliaeri ambe jorhendani.

Joperu 2004 jimbo, jurhasptiksï Orealla máru prekursori espesialicha engaksï Granville ka Joshua  arhinhenga. Aianhpisïrendiksï kʼumanchikuecha jimbo, ka ísïjtsïni exentaspti. Engajtsïni kurhamarhipka sini uékasïreni Bibliaeri ambe jorhenguarhini, tsípispka. Arhiaspka eskachi jorhenguarhipiringa libru Conocimiento jingoni desde uénakuarhu. Uékasïrenga exeni eskajtsïni májkueni ambe jorhendapiringa eska máteruecha engajtsïni tʼuini jorhendani japkia. Granvillerini arhispti eskaksï iretarhu úkuarhisïrenga tánguarhikuecha. Nájkirukani diesi uéxurhini páni japkia engani no uérenga juchiniu, uékasïrenga nirani. Ísï jimbo, Granvillerini pʼimasïrendi parareni páni siia de rueda jimbo Kʼumanchikua Reinuerirhu.

Ísï tátsekua, Granvillerini pʼímarhispti parani karakuarhini Eskuelarhu engajtsïni Jorhendajka Eianhpini. Arhisptirini: “Ísïsti eskari no iámindu ambe úsïnga úni, joperuri úsïnga uandani. Ma jurhianiri niáraaka arhijtsïkperata ma nitamatarani. Exeakaria”. Ambe engarini arhipka, uinhaperantasptireni ka ísïrini pʼikuastaspti eskani úpiringa ísï úni.

Uénaspka imani jingoni nirani aianhpini, joperu sáno iámindu iretarhu anapu xanharuechaksï kánikua no sési jándespti parani siia de rueda jingoni nirani. Ísï jimbo, arhispka eskarini mejori karretiia ma jimbo pápiringa ka sésijtsïni nichespti. Abrilini 2005 jimbo itsï atakuarhiska. Ísï tátsekua, erachichajtsïni jorhendaspti parani publikasionicheri ambe exeni kúnguarhikuarhu ka sonidueri ambe Kʼumanchikua Reinuerirhu.

Uéxurhini 2007 jimbo, no sésichi nitamakuarhispka, papa no sési úkuarhinchaspti barku ma jimbo ka uarhispti. Juchiti familia kánikua no sési pʼikuarheraxapti. Granville kómarhisïrendi juchantsïni jingoni ka uinhaperantasïrendijtsïni Biblia jingoni. Tsimani uéxurhini tátsekua, ménderuchi no sési nitamakuarhispka: Granville ístu no sési úkuarhinchaspti barku ma jimbo ka uarhispti.

Juchari kúnguarhikua sapichu jandiajku pakaraspti, no ma orhejtsïkuti jingoni ka ni orhejtsïkutiri jarhuajpiri jingoni. Enga Granville uarhipka, kánikua no sési pʼikuarheraspka, jimbokani kánikua xénchasïrenga ka ima méntkisï jima jarhasïrendi parareni jarhuatani sánderu sési pájperani Jeobani jingoni ka ístu parareni jarhuatani imani ambe jingoni engani uétarhinchenga. Primeru tánguarhikuarhu, ísï tátsekua enga Granville uarhipkia, ji arhiantapiringa párrafuechani para jorhenguarhikua Aianhpiri jingoni. Solu tsimani párrafu úspka arhintaani ka úndaspka uerani. Jimbosïni jatsipka parani kétsentani plataformarhu, jimbokani no úsïrenga para no uerani.

Jiáni uénaspka nóteruni xáni no sési pʼikuarherania engaksï máteru kúnguarhikuarhu anapu erachicha jupka jarhuajpini ixú Orealla. Ístu, Beteli axaspti prekursori espesialini ma enga Kojo arhinhenga. Kánikua tsípispka enga juchiti nándi ka juchiti ermanu sánderu sapichu uénapka jorhenguarhini Bibliaeri ambe ka itsï atakuarhinksï. Marsuni 2015 jimbo, orhejtsïkutiri jarhuajpirispkia. Ka ísï tátsekua uénaspka nitamatarani arhijtsïkperata ma. Tsípikua jingoni miántaspka ka ueparini ambe engarini ióntki arhipka Granville: “Ma jurhianiri niáraaka arhijtsïkperata ma nitamatarani. Exeakaria”.

Programa JW Broadcasting^® jimbo, niáraska míteani máru erachichani engaksï májkueni ambe nitamakuarhini jaka eska ji. Nájkirukaksï pʼamenchakua ambe kánguarhijka, úsïndiksï uánikua ambe úni ka tsípikua jingonksï irekani. Ka jíjtuni uáka úni máru ambe. Uékasïrenga marhuakuani Jeobani xáni eskani xáni úpiringa, jimbosïni uénapka marhuani komueska prekursori regulari. Ka ískuni pakaraspka engajtsïni septiembrini 2019 jimbo arhipka eskani orhejtsïkutispkia juchari kúnguarhikuarhu engaksï ma kuarenta aianhpiricha jaka.

Diosmaiamukua arhiasïnga erachichani ka pirenchichani engajtsïni jorhendaka jurhimbikua ambe ka engajtsïni jarhuataka Jeobani marhuakuni. Joperu ambe engani sánderu jukaparharajka jindesti eskarini Jeoba no méni mirikurhiska.