1. Eska na arhijka Mateu 7:13, 14, ¿néna jimbo kristianuecheri tsípikua ísïska komu biajirhu ma nirani jarhani?

IÁMINDU kristianuecheri tsípikua ísïsti komu biajirhu ma nirani jarhani. Uékasïngachi niárani jimbanhi parhakpinirhu, nani enga juramuaka juchari Tata Diosï uékpiti, Jeoba. Pauani pauanchi jánguarhintasïnga imani xanharu jimbo nirani enga tsípikuarhu pájpijka. Joperu Jesusi uandasti eska inde xanharu no kórhuraska ka eska ménisï úkua jukasïnga inde xanharu jimbo nirani (arhinta je Mateu 7:13, 14). Jimbokachi no perfektueska, sóntkuchi támisï nirasïnga (Gal. 6:1).

2. ¿Ambechi exea ini jorhenguarhikua jimbo? (Ístu exe je rekuadruni “ Kaxumbikuajtsïni jarhuatasïndi sési peentani ambe ma engachi no sési úni jaka”).

² Para no jurajkuni inde xanharuni enga no kórhuraka ka enga tsípikuarhu pájpijka, jatsiskachi para uékani mójtakuni na engachi eratsejka, jámajka ka na engachi jásïika. Indeni ambesï arhikuekani japti apostuli Pablu enga arhiapka Korintu anapu kristianuechani paraksï seguirini jarhani sési peentani ambe ma (2 Kor. 13:11, TNM). I konseju iásï májkueni marhuasïndi. Ini jorhenguarhikua jimbo, exeakachi néna engajtsïni Biblia uáka jarhuatani sési peentani ambe ma engachi no sési úni jaka ka nénajtsïni uá jarhuatani juchari amiguecha engaksï sési marhuakuni jaka Jeobani parachi seguirini ini xanharu jimbo enga tsípikuarhu pájpijka. Ístuchi exeaka ambe jimbochi úpirini úkua jukanchani ísï úni eskajtsïni Jeobaeri kúnguarhikua na arhijka. Ka exeakachi na enga xáni jukaparhakueka kaxumbitiini parachi úni mójtakurhini ka seguirini tsípikua jingoni marhuakuni Jeobani.

3. ¿Nénajtsïni jarhuatasïni Tata Diosïri Karakata?

³ Úkua jukasïndi exeni na engachi eratsejka ka pʼikuarherani. ¿Andi? Jimboka juchari mintsita traisionerueska ka úkua jukasïndi exeni ambejtsïni úraa (Jer. 17:9). Sóntkuchi támisï nirasïnga  imani eratsekuecha jingoni engaksï no ísïka (Sant. 1:22). Jimbosï xáni uétarhijti eskachi Tata Diosï Karakatani úraaka parachi exekuarhini. Bibliajtsïni jarhuatasïndi parachi incharinisï exekuarhini, ambe engachi “eratsejka ka pʼikuarhinheni” iauani incharinisï (Ebr. 4:12, 13). Sáno májkuenisti eska mákina ma enga radiografia pʼitajpijka, enga újka eskachi exekuarhiaka incharinisï. Ísï jimbo, engachi uéjka eskajtsïni marhuachiaka Bibliaeri konsejuecha ka imecheri enga Tata Diosï úraajka, jatsiskachi para kaxumbitiini.

4. ¿Nénachi míteska eska rei Sauli uénaspka kʼéramakuarhini?

⁴ Ambe enga úkuarhinchapka rei Sauli, xarhatasïndi ambe engachi uáka úkuarhinchani engachi no kaxumbitiska. Niáraspti xáni kʼéramakuarhini, enga no jiókuarhipka eska jatsispka para mójtakuni na enga eratsenga ka jámani (Sal. 36:1, 2; Hab. 2:4). I ambe xarharaspti jiáni enga Jeoba arhipka ambe enga meru úpiringa enga na andaapiringuia amalekitechani ka Sauli no kurhajchaspti. Enga profeta Samueli arhipka eska no sési úspka, Sauli no jiókurhispti. Sánderu sési kuájpekuarhispti uandaparini eska no xáni kʼéri ambespka ka eska kʼuiripusï arhipka eska ísï úpiringa (1 Sam. 15:13-24). Joperu no jiáni uénaspti ísï jámani (1 Sam. 13:10-14). Kánikua no sési úspti jimboka jurajkuspka eska imeri mintsita kʼéramakuarhipiringa. Jeoba xukaspti ka nóteru jaiapanhentasptia jimboka no mójtakuspka imeri eratsekuani.

5. ¿Ambechi jorhenguarhisïni Sauliri ejemplu jingoni?

⁵ Nóchi uékasïnga ísïni eska Sauli, ísï jimbo ju je kurhamarhikuarhini: “¿Jirinhakuntasïni parani no ísï úni eskaksï Bibliaeri konsejuecha na arhijka? ¿Eratsesïni eskarini no xáni no sési nicheaka imani ambe jimbo engani uáka? ¿Uandasïni eskajtsïni máteruecha pájtamasïnga parani no sési ambe úni?”. Engachi máru ini kurhamarhikuechani mókuanta eska jo, jatsiskachi para mójtakuni na engachi eratsejka ka jámani. Engachi no ísï úska, juchari mintsita úpirindi xáni kʼéramakuarhini enga Jeoba no uékapirindi juchari amigueni (Sant. 4:6).

6. ¿Néna jimboksï ménderueni jámaspi Sauli ka Dabidi?

⁶ Exe je néna engaksï ménderueni jámapka rei Sauli ka rei Dabidi, achamasï ma enga tsitienga “Jeobaeri leini” (Sal. 1:1-3). Dabidi mítespti eska Jeoba pʼímutantaasïnga kaxumbitichani joperu eska no jiókuarhiasïnga imechani engaksï kʼéramakuarhijka (2 Sam. 22:28). Jimbosï jiókuarhipti eska Tata Diosïri juramukua jarhuatapiringa para mójtakuni na enga eratsenga. Karaspti: “Kʼéri ambe arhiaka Jeobani, engarini íntsaaka konsejuechani. Asta chúrikuechani, ima ambe engani iauani incharinisï pʼikuarhinhijka jurhimberantasïndirini” (Sal. 16:7).

7. Engachi kaxumbitiska, ¿ambechi uá?

⁷ Engachi kaxumbitiska, jiókuarhiakachi eska Biblia jurhimberantauaka juchari eratsekuechani antedechi no sési ambe niátani. Ísïuati enajkijtsïni Tata Diosïri Karakata arhini jaua: “I jindesti xanharu. Jimini jáma”. Aianguatijtsïni engachi uénaaka imani ambe úni enga no sési jaka (Is. 30:21). Kánikuajtsïni sési nicheati engachi kurhajchaaka Jeobani (Is. 48:17). Por ejemplu, nóchi kʼuratsekua jingoni pakaraaka engajtsïni nema jurhimberantaaka. Ka sánderuchi andarhieraaka Jeobani jimbokachi míteska eska ima uandanhiasïnga juchantsïni jimbo ísï eska táti uékpiti ma (Ebr. 12:7).

8. Ísï eska na uandajka Santiagu 1:22-25, ¿Tata Diosïri Karakata néna ísïski eska espeju ma para jucha?

⁸ Tata Diosïri Karakata uáti ísïni komu espeju ma para jucha (arhinta je Santiagu 1:22-25). Pauani pauani, sáno iáminduechachi eratikuarhisïnga espejurhu ma antedechi uérani kʼumanchikuarhu. Ísïchi exesïnga ambe engachi jatsika para sési peentani antedejtsïni máteruecha exeni. Májkueni, engachi pauani pauani arhintajka Bibliani, exesïngachi sinchi jatsiski para sési peentani na engachi eratsejka o jámani. Uánikua erachichaksï arhintasïndi mándani jurhiatikua  anapu karakatani antedeksï uérani imeecho ka inde ambe jarhuataasïndi paraksï sési eratseni. Ka tátsekuaksï exesïndi nénaksï uá ísï úni eska Tata Diosïri Karakata na arhijka. Ístu, jatsiskachi para pauani pauani arhintani Bibliani ka eratsentani ambe engachi arhintajka. Nájkiruka ísï xarharajka eska fásiliska para úni, jindesti ambe ma engajtsïni kánikua jarhuatajka parachi seguirini ini xanharu jimbo enga no kórhuraka ka enga tsípikuarhu pájpijka.

9. ¿Kánchi uá uétarhinchani eskajtsïni amigu ma jurhimberantaaka?

⁹ ¿Ménisïchi uénaxapi imani ambe úni engajtsïni jarharitani japka Jeobani jingoni? (Sal. 73:2, 3). Enga amigu ma enga eratsekua jukariika, balori jatsipka parajtsïni jurhimberantani, ¿kurhajchaspichi ka ísïchi úspi eskajtsïni na arhipka? Engachi ísï úka, kánikua sési jarhaspti ka seguru eskachi agradesidu jarhaska engajtsïni uandontskuarhechipka (Prov. 1:5).

10. ¿Ambechi jatsipirini para úni engajtsïni amigu ma jurhimberantapiringa?

¹⁰ Tata Diosïri Karakatajtsïni miátantasïndi eska “engajtsïni amigu ma no sési pʼikuastajka, kánikua ambakiti” ambesïnga (Prov. 27:6). ¿Ambe arhikuekasïni i ambe? Ju je eranhaskani eskachi erokuarhixaka para parhikuni xanharu ma jimbo engaksï uánikua karruecha nitamajka ka masichi arhisïnga telefonuni exeni. Uénasïngachi xanharani kʼutinchatini. Jimajkani, amigujtsïni ma jupixukusïndi ka tátsïpanisïjtsïni antsïpatasïndi, xántsïni uinhamu jupixukusïndi engajtsïni xarhixarhisï úxurhatajka. Joperu enga sóntku ísï úka, úsïndi eskajtsïni no ataaka karru. Jamberichi máru jurhiatikuecha jimbo pʼamexurhaaka, joperu, ¿a no eskachi no ikiapiringa juchari amigu jingoni? Sánderu sési, agradesiduchi japiringa imeri jarhuajperata jingoni. Májkueni, engajtsïni amigu ma arhiska eska no terukuntasïnga Tata Diosïri juramukuecha jingoni na engachi uandajka o jámani, jamberichi no sési pʼikuarheraaka, joperu ju je no ikiani engajtsïni konseju ma íntskuska, jimboka engachi ísï úska no sési japirindi (Ecl. 7:9). Sánderu sési, jatsipiringachi para diosmaiamukua arhini jimboka balori jukaspka para juchantsïni jingoni uandontskuarheni.

11. ¿Ambe jimbo nema no jiókuarhipirini ambakiti konseju ma enga amigu ma íntskupiringa?

¹¹ ¿Ambe jimbo nema no jiókuarhipirini ambakiti konseju ma enga amigu ma íntskupiringa? Kʼéramakua jimbo. Imecha engaksï kʼéramakuarhijka tsitisïndiksï para imani ambe arhiani engaksï kurhandinchajka ka nóteruksï uékasïndia kurhandini imani ambe enga ísïika (2 Tim. 4:3, 4). Nóksï nemani kurhajchasïndi jimbokaksï eratsesïnga eskaksï sánderu míteska ka eskaksï sánderu kʼéri ambeeska eska máteruecha. Joperu apostuli Pablu karaspti: “Ima enga ísï exekuarhijka eska kʼéri ambe jindeeni no ma ambe jindeeparini, kʼarhakuarhisïn[di] jandiajkumindu” (Gal. 6:3). Rei Salomoni ari ambe uandaspti inderi ambe: “Sánderu sésisti sapi ma enga pobrika joperu jánhastiini ka eska rei ma enga tʼarhepikia peru no jánhastiini, enga nóteru újkia sési eratsekuntani para jiókuarhiani konsejuechani” (Ecl. 4:13).

12. Engachi arhintajka Galasia 2:11-14, ¿ambechi jorhenguarhisïni apostuli Pedrueri ambe?

¹² Ambakiti ejemplujtsïni ma íntskusti apostuli Pedru jiáni enga apostuli Pablu jurhimberantapka iáminduechani japarini (arhinta je Galasia 2:11-14). Pedru úpirindi ikiani Pablu jingoni imani ambe jimbo enga arhipka ka nani enga arhipka. Joperu komu Pedru jánhastiipka, jiókuarhispti konsejuni ka no jatanhekuspti Pabluni. Sánderu sési, tiempu jingoni arhispti juchiti ermanu engachi xáni uékajka (2 Ped. 3:15).

13. ¿Ambechi jatsiski para exeni engachi konseju ma íntskuaka nemani?

¹³ Engachi ménisï jatsipiringa para amiguni ma konseju ma íntskuni, ¿ambechi jatsipirini para miáni? Antedechi imani jingoni uandontskuarheni ju je kurhamarhikuarhini:  “¿No jukariminduni uékaxaki eska sési úkuarhiaka ambe ma?” (Ecl. 7:16). Kʼuiripu ma enga uéjka eska jukarimindu sési úkuarhiaka ambe ma, imeri eratsekuecha jingoni jusgariuasïndi máteruechani ka no Jeobaeri juramukuechani jingoni ka no káni pʼamojpisïndi. Engachi eratsentakia ini ambe ka útasïchi exeni eskachi jatsiska para juchari amigu jingoni uandontskuarheni, ju je jurhimbitku arhini náki jindesti problema ka ju je kurhamarhikuechani úkuani para exerani ambe enga no sési úni jaka. Jatsiskachi para seguru jarhani eskachi imani ambe arhiaka enga Bibliarhu jaka. Ka miáni eska Jeobanisï jatsika para kuenta íntskuntani ka no juchantsïni (Rom. 14:10). Ju je úrani imani jánhaskakuani enga Tata Diosïri Karakatarhu jaka ka engachi nemani konseju ma íntskuaka ju je májkueni pʼamojpitiini eska Jesusi (Prov. 3:5; Mat. 12:20). Ju je miáni eskajtsïni Jeoba májkueni kámaaka ísï eskachi jucha na kaajka máteruechani (Sant. 2:13).

14. ¿Ambe ka ambe úsïni Tata Diosïri kúnguarhikua para jucha?

¹⁴ Jeoba imeri kúnguarhikuani úrasïndi enga ixú parhakpinirhu jaka parajtsïni orhechepani imani xanharu jimbo enga tsípikuarhu pájpijka. I kúnguarhikua uásïndi bideuechani, publikasionichani ka tánguarhikuechani engajtsïni jarhuatajka ísï úni eskaksï Bibliaeri konsejuecha na arhijka. Iámindu i ambe sési terukuntasïndi Tata Diosïri Karakata jingoni. Grupu enga Orhejtsïkuajka iámindu kúnguarhikuechani, espiritu santueri jarhuajperata jimbo exesïndi néna enga sánderu sési jauaka para aianhpinhani. Joperuksï ménderu uénasïndi exeni i ánchikuarhiteri ambe, jimboka méntku mójtakurhixaka ambe enga parhakpinirhu úkuarhijka, jimbosï Tata Diosïri kúnguarhikua jatsiti para májkueni úni (1 Kor. 7:31).

15. ¿Ambeksï nitamakuarhiski máru aianhpiricha?

¹⁵ Engajtsïni Tata Diosïri kúnguarhikua aiangujka eskaksï mójtakuska na engaksï kurhanguenga Bibliaeri jorhenguarhikua ma o engajtsïni arhijka na engachi jatsika para jámani, jirejiresïchi jiókuarhisïnga. Joperu, ¿ambechi úsïni enga ambe ma mójtakukuarhijka ka juchantsïni jamberi pájtamani? Por ejemplu, arini uéxurhinicha jimbo, sánderu jukaparhastia para uáni ka kuidariuani kʼumanchikuecha nani engachi Jeobani kʼéri ambe arhijka. Jimbosï Grupu enga Orhejtsïkuajka iámindu kúnguarhikuechani, uandati eskaksï máru kúnguarhikuecha tánguarhiaka májku Kʼumanchikua Reinueri jimbo. Jimboksïsï máru kúnguarhikuecha kúnguarhintati ka máruksï Kʼumanchikuecha Reinueri niárasti ataranhantani.  Ka inde tumina úrakuarhexati paraksï máteru nanisï únhani enga sánderu uétarhini jaka. Engachi jimesïsï irekaka nani engaksï ataranhantani jaka Kʼumanchikuecha Reinueri ka márkuksï uántani jarhani kúnguarhikuechani, jamberichi úkua jukanchaaka pʼindeni imani ambe jingoni enga mójtakurhini jaka. Iásïksï máru aianhpiricha jatsistia para sánderu iauani nirania tánguarhikuecharhu. Ka imecha engaksï kánikua ánchikuarhipka para úni ka kuidarini Kʼumanchikua Reinuerini ma ka enga iásï ataranhantani jakaia, jamberiksï kurhamarhikuarhijti andiksïsï atarantani jaki. Jamberiksï ísï pʼikuarherajti eska no ma ambe marhuaska na engaksï xáni tiempu úraka ka jánguarhintani para úni. Ka nájkiruka i ambe úkuarhini jaka, seguirixatiksï jarhuajpini jimbanhi ánchikuarhita ambe jimbo ka felisitariuasïngachi ini ambe jimbo.

16. ¿Nénajtsïni jarhuatasïni Kolosasi 3:23, 24 parachi seguirini jarhani tsípikua jingoni jámani?

¹⁶ Ambe ma engajtsïni jarhuataaka parachi seguirini tsípikua jingoni jámani, jindesti miáni eskachi ánchikuarhisïnga para Jeoba ka eska ima orhejtsïkuxaka imeri kúnguarhikuani (arhinta je Kolosasi 3:23, 24). Rei Dabidi, ambakiti ejemplujtsïni ma íntskusti enga tumina íntspipka para templu únhani. Uandaspti: “¿Néski ji ka néski juchiti ireta, paraksïni úni mintsita jingoni íntskuni kéjtsïtakuechani? Jimboka iámindu ambe tʼunguini jimbo jurhasïnga, ka ambe engaksïni íntskujka jindesti ima ambe engajtsïni tʼu íntskujka” (1 Crón. 29:14). Engachi íntspijka tumina, juchajtuchi imani ambe íntskuni jarhasïnga Jeobani engajtsïni ima íntskujka. Joperu Jeoba jukaparharasïndi tiempuni, uinhapikuani ka tuminani engachi íntspijka para jarhuajpini imani ánchikuarhita jingoni enga ima uéjka eskachi uáka (2 Kor. 9:7).

17. ¿Andichisï no jatsi para no sési pʼikuarherani engachi jatsiaka para mójtakuni ambe ma?

¹⁷ Parachi seguirini ini xanharu jimbo jámani enga no kórhuraka ka enga tsípikuarhu pájpijka, iáminduechachi jatsiska para ísïmindu jámani eska Jesusi (1 Ped. 2:21). Engachi exejka eskachi jatsiska para mójtakuni ambe ma, ju je no no sési pʼikuarherani, jimboka i ambe uáka xarhatani eskachi uékasïnga ísï úni eskajtsïni Jeoba na arhijka. Jeoba mítesti eskachi no perfektueska, ísï jimbo, no erokuarhisïndi eskachi meru iámindu ambe ísï uáka eska Jesusi.

18. ¿Ambechi jatsiski para úni niárani nani engachi nirani jaka?

¹⁸ Para kʼamarani, ju je sánderu imani ambe eratseni enga sánderu orhepani úkuarhiaka, ka enga uétarhiaka ju je mójtakuni na eskachi eratsejka ka jámani, ka na engachi jásïika (Prov. 4:25; Luk. 9:62). Ju je seguirini kaxumbitiini ka úni ambe enga arhijka 2 Korintu 13:11, TNM: “Seguiri je tsípini, sési peentaparini ambe ma”. Engachi ísï úska, “Tata Diosï enga uékpijka ka pínandikua íntspini” juchantsïni jingoni jauati. Ka nóchi solu niáraaka nani engachi nirani jaka, sino ístuchi tsípikuarhiaka ini biaji jimbo nirani enga tsípikuarhu pájpijka.