1, 2. Uanda je ejemplu ma jingoni nénachi uá úni ambe enga Proverbios 4:25 arhijka.

JU JE eratseantani arhini tanimu ejempluechani. Pirenchi ma enga jatirikia eratsentasïndi ambakiti ambe enga ióntki nitamakuarhipka. Joperu iásï sánderu úkua jukastia imeri irekua, peru ima jánguarhintaxati marhuakuni Jeobani na enga xáni uáka (1 Kor. 15:58). Pauani pauani eratsentasïndi na enga jindeuaka irekani Paraisurhu imecha jingoni enga ima xáni xénchaajka. Máteru pirenchi miántasïndi eska ma xanhari pirenchi ma kúnguarhikuarhu no sési pʼikuastaska, peru i pirenchi no jatanhekusti (Kol. 3:13). Ka erachi ma no mirikurhisïndi no sési jásï ambe enga ióntki úpka, peru iásï jánguarhintasïndia para no jurajkuni Jeobani (Sal. 51:10).

² ¿Nénaksï sáno májkueni nitamakuarhiski i tanimu erachicha? Eskaksï no mirikurhisïnga ambe engaksï nitamakuarhika, peruksï no méntku indeni ambejku miáni jarhasïndi. Sánderu sési, orhepanisïksï eraasïndi o ambe enga sánderu orhepani úkuarhiaka (arhinta je Proverbios 4:25).

3. ¿Andisï jukaparhakue eskachi no mirikurhiaka ambe enga sánderu orhepani úkuarhiaka?

³ ¿Andisï xáni jukaparhakue eskachi no mirikurhiaka ambe enga sánderu orhepani úkuarhiaka? Jimboka, májkueni eska kʼuiripu ma na no uáka jurhimbitku xanharani enga méntku tátsepanisï eraani jauaka, juchajtuchi no uáka sési marhuakuni Jeobani engachi méntku imani ambe eratseni jauaka enga ióntki úkuarhika (Luk. 9:62).

4. ¿Ambechi exea ini jorhenguarhikua jimbo?

⁴ Ini jorhenguarhikua jimbo, tanimu ambechi exeaka enga úpiringa eskachi méntku imani ambe miáni japiringa enga nitamakia: *  komu pʼikuarherakua, jatanhetspini ka jukari no sési pʼikuarherani. Mándani jimbo, exeauakachi Bibliaeri karakatechani engajtsïni jarhuataaka tátsepani jurajkuni “ambe enga nitamakia” ka parachi andanguni “imani ambe enga orhepani jaka” (Filip. 3:13).

5. ¿Ambejtsïni arhisïni Eclesiastés 7:10 eskachi no uáka?

⁵ (Arhinta je Eclesiastés 7:10). Exesïngachi eska i karakata no uandasïnga eska no sési jarhaska uandani eska sésispka ambe enga nitamakia, ambe enga no sési jaka jindesti uandani eskaksï sánderu sésispka eska iásï anapu ambe. Míteskachi eska ambakiti ambe miántani Jeobaeri intsïmperata máeska. Ambe enga no sési jaka, jindesti terukutantani ambe engachi ióntki nitamaka indeni ambe jingoni engachi iásï nitamakuarhini jaka ka uandani eska ióntki anapu ambe sánderu sési jarhaspka. Máteru Biblia ísï peentasïndi ini karakatani: “Asï méni kurhamarhikuarhi andisï ióntki iámindu ambe sánderu sésipi eska iásï, jimboka inde kurhamarhikua no jánhasticheriska”.

6. ¿Andisï no sési jaki méntku eratseni jarhani eskachi ióntki sánderu sési irekaspka? Uanda je ejemplu ma.

⁶ ¿Andisï no jánhasticheri méntku eratseni jarhani eskachi ióntki sánderu sési irekaspka? Jimboka komu pʼikuarherakua uáka eskachi puru imani ambe miántaaka engachi ióntki sési nitamakuarhipka ochi no miáni imani uandanhiatechani engachi jiáni jatsiapka. Ju je eratseni ambe engaksï ióntki nitamakuarhipka israelitecha: engaksï na uéntapkia Ejiptu uératini, sóntkuksï mirikurhispti na engaksï xáni kómu irekapka ka imantku ambeksï miántasïrendi na engaksï xáni sési tʼirekuarhienga jini. Uandasïrendiksï: “¡Na engachi xáni jirinhantajka kurucha engachi intsïmbinhenga jini Ejiptu, pepinu, sandia, [...], seboia ka ajusï!” (Núm. 11:5). Joperu, ¿ísïspi eskaksï intsïmbinhasïrenga? Nómbe, kánikuaksï kómu jámasïrendi paraksï andakuarhini ambe engaksï arhenga, jimbokaksï jini Ejiptu jántspirispka ka no sésiksï kánhasïrendi (Éx. 1:13, 14; 3:6-9). Peruksï sóntku mirikurhiaspti imecheri uandanhiatechani ka uénasptiksï miántani ambe  enga nitamapkia. Enbesdeksï imani ambe miáni jarhani ambe enga Jeoba apenasi úpka imecha jimbo, sánderuksï imani ambe eratsexapti enga nitamapkia. I ambe kánikua ikiataspti Jeobani (Núm. 11:10).

7. ¿Ambe jarhuataspi pirenchini ma para no xáni kómu pʼikuarherani?

⁷ ¿Ambejtsïni jarhuataa parachi no xáni kómu pʼikuarherani? Ju je exeni ambe enga nitamakuarhipka pirenchi ma enga uénapka Beteli marhuani jini Brooklyn 1945 jimbo. Engaksï nitamapkia máru uéxurhinicha, uambuchaspti erachi ma jingoni enga ístu Beteli marhuani japka, tsimarhanksï ióni marhuaspti jima. Erachi pʼamenchaspti 1976 jimbo ka enga kuenta íntskukuarhepka eska no ióni jimbo uarhipiringuia, ambakiti konsejuechani íntsaaspti témbani para jiáni enga jandiajku pakarapiringuia. Arhispti: “Tsípikua jingonchi irekaska temungurhiri. Uánikuaksï no mítesti nénaeski ísï irekani”. Ka ístu arhispti: “Nájkirukari no mirikurhiaka ambe enga nitamakia, asï méntku indeni ambe eratseni ja. Sánhandi arhiaka nóteru xáni kómu pʼikuarherania. Tsípikua jingoni ireka ka asï jukari pʼamojkukuarhi. Jukaparhara na engachi xáni tsípikuarhika Jeobani marhuakuparini. [...] Miántani ambe ma Tata Diosïri intsïmperatesti”. ¡Xáni ambakiti konsejuecha!

8. ¿Náki kóntperatechani intsïnhaaspi i pirenchi jimboka no méntku imani ambe miáni jarhasïrenga enga nitamapkia?

⁸ Pirenchi ísï úspti eska na arhinhapka. No méni jurajkusti Jeobani astaka uarhika enga 92 uéxurhini jatiripkia. Máru uéxurhini antede uarhini, uandaspti: “Engani eratsentajka eskani jukari sesentaitresi uéxurhini kʼamakʼamasï marhuakuskia Jeobani, úsïnga mintsita jingoni uandani eskani kánikua sési irekuarhiska”. ¿Andi? Ima mismu uandasïndi: “Ambe engarini sánderu sési pʼikuastajka jindesti eskani kʼéri familiarhu ma jarhaska ka eskachi mintsikaxaka májku kʼéri irekani juchari erachicha jingoni enga Echeri paraisu máeuakia, Tata Diosï jurhimbitini marhuakuparini para méntkisï, enga jindeeka juchari Ambakiti Kuerajpirini, Jeoba”. * ¡Xáni ambakiti ejemplu ma nemeeri enga méntkisï orhepanisï eraaka!

9. Ísï eska na arhijka Levítico 19:18, ¿káni sánderu úkua jukasïni no jatanhetspini?

⁹ (Arhinta je Levítico 19:18). Engajtsïni nema no sési pʼikuastajka, sánderuchi úkua jukanchasïnga puákuntani enga erachi máejka, ambakiti amigu ma o familiari ma. Ma xanhari, pirenchi ma uandaspti eska máteru pirenchi tumina sïpakuspka, peru tátsekua exespti eska no ísïspka ka arhispti pirenchini eska puákuntapiringa, joperu inde pirenchi no úsïrendi mirikurhini ambe enga úkuarhipka. Jamberichi jucha no méni ísï úkuarhinchani jaka, peruchi jamberi sáno iáminduecha ménisï niáraka ísï pʼikuarherani eskachi no úpiringa no jatanhetspini.

10. ¿Ambejtsïni uá jarhuatani parachi no jatanhetspini?

¹⁰ ¿Ambejtsïni uá jarhuatani parachi no jatanhetspini? Orheta, miáni eska Jeoba iámindu ambe exesïnga. Ima méntkisï exeni jarhasïndi uandanhiatechani engachi jatsiajka ka engachi no jurhimbikua jingoni kánhajka (Ebr. 4:13). Jeoba no sési pʼikuarherasïndi engachi kómu nitamakuarhijka (Is. 63:9). Ka aiachisïndijtsïni eska sánderu orhepani sési peentaaka iámindu no sési jásï ambe engachi nitamakuarhika jimbokachi no jurhimbikua jingoni kánhaska (Jaŋ. 21:3, 4).

11. ¿Nénajtsïni marhuachisïni no jatanhetspini?

¹¹ Ístuchi jatsiska para miáni eskajtsïni marhuachisïnga no jatanhetspini. Inde ambesï nitamakuarhipti pirenchi enga ísku jatini arhinhapka eska tumina sïpaspka. Tiempu jingoni, úspti no jatanhetspini. Kurhanguspti eskajtsïni Jeoba puáchintaaka engachi juchajtu puákuantaaska máteruechani (Mat. 6:14). I ambe no arhikuekasïndi eska pirenchi ísku exespka ambe enga máteru pirenchi úkupka, joperu erakuspti no jatanhekuni. Ini ambe jimbo úspti sánderu tsípikua jingoni irekani ka seguirini sési marhuakuni Jeobani.

12. ¿Ambejtsïni jorhendasïni 1 Juanu 3:19, 20?

¹² (Arhinta je 1 Juanu 3:19, 20). Iáminduechachi ménisï jukari no sési pʼikuarherasïnga. Ka ménisï imani ambe jimboesïndi engachi úka antedechi míteni jurhimbikuani o engachi no sési jásï ambe úka jiáni engachi na itsï atakuarhipkia. Ambe uéjki jimboeni, no no sési jarhasti ísï pʼikuarherani (Rom. 3:23). Ísïsti, nájkirukachi jánguarhintajka méntkisï sési ambe úni, ménisïchi “mámaru ambe jimbo pekadu úsïnga” (Sant. 3:2; Rom. 7:21-23). Nóchi tsitisïnga jukari no sési pʼikuarherani jarhani, peru ísï pʼikuarherani marhuachisïndijtsïni. ¿Andi? Jimbokajtsïni jarhuataaka parachi jurhimbitku jámani ka parachi méntku eratsetini jarhani nóteru méni no sési ambe niátani (Ebr. 12:12, 13).

13. ¿Andisï xáni jukaparhakue eskachi no jukari no sési pʼikuarheraaka?

¹³ Peruchi útasï úpiringa jukari no sési pʼikuarherani jarhani, nájkirukachi móantakia ka Jeobajtsïni xarhatachenia eskajtsïni puáchintaskia. Jukari no sési pʼikuarherani uátijtsïni kánikua no sési úchini (Sal. 31:10; 38:3, 4). ¿Andichisï ísï uandajki? Ju je exeni ambe enga nitamakuarhipka pirenchi ma. Pirenchi méntku no sési pʼikuarherani jarhasïrendi imani no sési jásï ambe jimbo enga ióntki úpka. Uandantasïndi: “Eratsesïrenga eska sánderu sésispka no xáni jánguarhintani marhuakuni Jeobani jimbokani jamberi no niárapiringa pʼímutantskateni”. Uánikuechachi úpiringa májkueni pʼikuarherani eska i pirenchi. Peru kánikua jukaparhakuesti eskachi no jukari no sési pʼikuarheraaka. Noambakiti kánikua tsípipirindi engachi ísï eratsepiringa eskachi nóteru uákia marhuakuni Jeobani, joperujtsïni Jeoba no ísï exesïndi (terukutanta je 2 Korintu 2:5-7, 11 jingoni).

14. ¿Nénachi uá seguru jarhani eskajtsïni Jeoba ísï exesïnga eskachi uáka marhuakuni?

¹⁴ Peruchi útasï úpiringa kurhamarhikuarhini: “¿Néna uá seguru jarhani eska Jeoba exesïnga eskani útasï uáka sési marhuakuni?”. Úpiringachi uandani, eskachi ini kurhamarhikuani sánisï mókuntaskia. ¿Andichisï ísï uandajki? Iónistia enga rebista La Atalaya uandapka na engachi uáka  pʼikuarherani engachi ióntki no sési jásï ambe niátenga ka engaksï iásï ménderuni májkueni úni jakaia. Jorhenguarhikua uandasïrendi: “Asï kuatanta je. Asï eratsi je eskajtsï úska ambe ma engaksïni Jeoba no méni uáka puáchintani. Inde ambesï tsitipirindi Noambakiti eskajtsï ísï eratsepiringa. Engajtsï cha no sési pʼikuarherajka ka ikiantsï cha mismu jingoni, arhikuekasïndi eskajtsï uáka puáminhantani. Asï méni kuatanta je, kaxumbi je ka mintsita jingoni kurhaku je Tata Diosïni eskaksïni puáchintaaka parajtsï sési pʼikuarherantani ka paraksïni jarhuatani nóteru no sési ambe niátania. Ísï uandajpakuarhi je Tata Diosïni eska sapi na uandajpajka táti jémbani enga no sési nitamakuarhini jarhajka, no arhiparini namuni xanhari uandapasïni imani mismu ambe jimbo, méntkisï kurhakusïndi táti jémbani eska jarhuakaata. Ísï jimbo méntkisï kurhaku je Jeobani eskaksïni jarhuataaka ka imaksïni uékperakua jingoni jarhuataati”. *

15, 16. ¿Nénaksï pʼikuarherasïni máru erachi engaksï mítejka eska Jeoba no ísï exeasïnga eskaksï no úka marhuakuni?

¹⁵ Uánikua erachichaksï sési pʼikuarherasïndi míteni eska Jeoba no ísï exeasïnga eskaksï nóteru uákia marhuakuni. Máru uéxurhinichestia enga erachi ma kánikua uinhapikuarhintapka enga arhintapka eksperiensia ma enga uérapka indeni parti jimbo enga arhinhenga “La Biblia les cambió la vida”. Jimini, pirenchi ma uandasïrendi eska úkua jukanchasïrenga jakajkuni eska Jeoba úpiringa xénchani, imani ambe jimbo enga ióntki úpka. Ka nájkiruka ióni nitamapkia enga itsï atakuarhipka útasï niárasïrendi ísï pʼikuarherani. Peru uénaspti eratsentani Jesusiri uarhikuani ka inde ambe jarhuataspti para ménderueni eratseni. *

¹⁶ ¿Néna jarhuataspi i eksperiensia ini erachini? Ima uandaspti: “Engani tumbipka pʼíndespka pornografia ambe exeni, peruni úspka jurajkuni. Joperu tátsekua ménderuni uéntaspka exeni. Arhiaspka kúnguarhikuarhu anapu orhejtsïkutichani eskajtsïni jarhuatapiringa, ka úskia máru ambe parani úni jurajkuni ini pʼindekuani. Orhejtsïkutichajtsïni arhisïndi eskani uáka mintsikani eskarini Tata Diosï xénchasïnga ka pʼamojkuni. Joperuni útasï ménisï ísï exesïnga eskani no ma ambe jukaparhaska, eskarini  Tata Diosï meru no uáka xénchani”. Erachi uandasïndi eska kánikua jarhuataska ambe enga pirenchi uandapka: “Iásï kurhangusïnguia eska engani eratsejka eskarini Jeoba no méni uáka puáchintani, no jukaparharani jarhasïnga kéjtsïtakuani enga Jeobaeri Uájpa úka parani puáminhantani pekaduechani. Pʼitaska inde artikuluni parani arhintani ka eratsentani méntkisï engani eratseaka eskarini Jeoba no xénchasïnga”.

17. ¿Ambe úspi apostuli Pablu para no xáni no sési pʼikuarherani?

¹⁷ I járhati eksperiensiechajtsïni apostuli Pabluni miátantasïndi. Ima no sési jásï ambe niátaspti antede kristianueni. Miásïrendi ambe enga úpka peru no chúskutasïrendi indeni ambe eratseni (1 Tim. 1:12-15). Jesusiri uarhikuani ísï exesïrendi komueska intsïmperata ma enga Tata Diosï imani úkupka (Gal. 2:20). Enga apostuli Pablu ísï úpka, nóteru xáni no sési pʼikuarherasptia ka sánderu sési jánguarhintaspti sési marhuakuni Jeobani jima para orhepani.

18. ¿Ambechi jorhenguarhiski ini jorhenguarhikua jimbo?

¹⁸ ¿Ambechi jorhenguarhiski ini jorhenguarhikua jimbo? Orheta, eska ambakiti ambe miántani Jeobaeri intsïmperata máeska; peru, nájkirukachi ambakiti ambe irekuarhika, juchari irekua jimbanhi parhakpinirhu sánderu ambakitiuati. Máteru, uátijtsïni nema no sési pʼikuastani, peru engachi puákuntaska uákachi orhepani uérani. Ístu, jukari no sési pʼikuarherani uáti eskachi no tsípikua jingoni marhuakuaka Jeobani. Ísï jimbo, májkueni eska Pablu jatsiskachi para jakajkuni eskajtsïni Jeoba puáchintaskia.

19. ¿Nénachi míteski eskachi jimbanhi parhakpinirhu nóteru miáuakia no sési jásï ambe?

¹⁹ Jimbanhi parhakpini jimbo engachi erokuarhini jaka, nani engachi irekaaka para méntkisï, nóteruchi méni miáuakia no sési jásï ambe. Biblia uandasïndi eska jiáni, “nóteru miánhantaatia no sési jásï ambe enga ióntki japka” (Is. 65:17). Máruchi ióni páxakaia Jeobani marhuakuni ka jatirinchia; peru eranhaska je, jimbanhi parhakpini jimbochi ménderu sapichkuentaakia (Job 33:25). Ísï jimbo, ju je jánguarhintani no tátsepanisï eraani ka ju je iásï irekani eratseparini ambe enga úkuarhia sánderu orhepani.