SEMANA 45
Néna jarhuataani máteruechani ísï úni eska Jesusi na juramuka
“Ní je jorhendaani iámindu kʼuiripuechani [...], ka jorhendaani eskaksï patsaaka [o úni] iámindu ambe engaksïni ji juramuchika” (MAT. 28:19, 20).
PIREKUA 89 Jeoba újchakurasïndi imani enga kurhandirajka
AMBE ENGACHI EXEAKA *
1. ¿Ambe juramuspi Jesusi ixú Mateu 28:18-20?
ENGA Jesusi na tsíntapkia, xarhakuaspti imeri chúxapatichani engaksï Galilea tánguarhitini japka. Jukaparhakua ambe jatsispti para arhiani. ¿Ambespi? Uákachi arhintani ixú Mateu 28:18-20 (arhinta je).
2. ¿Náki kurhamarhikuechanchi exeani jaua?
2 Ini jurhiatikuecha jimbo, iáminduecha engachi marhuakujka Tata Diosïni, jatsiskachi para ístu kurhajchani Jesusiri juramukuani para úni eskaksï kʼuiripuecha imeri chúxapati úkuarhiaka. Ísï jimbo, tanimu kurhamarhikuechanchi exeani jauaka engaksï uandajka ima ánchikuarhiteri ambe engajtsïni Jesusi jurajkuchika. Uénani jámani, ¿ambeteruchi jatsiski para úni aparte de jorhendaani jimbanhi Jesusiri chúxapatichani Tata Diosïri juramukuechani? Tsimani úni jámani, ¿nénaksï uá kúnguarhikuarhu anapuecha jarhuataani Bibliaeri jorhenguarhirichani paraksï niárani marhuakuni Tata Diosïni? Ka tanimu úni jámani, ¿nénachi uá jarhuataani imechani engaksï jarharika kúnguarhikuani paraksï ménderu uéntani uáni Jesusiri chúxapatichani?
JORHENDAANI ÍSÏ ÚNI ESKA TATA JESUKRISTU NA JURAMUKA
3. ¿Ambe juramuski Jesusi eskachi jatsiska para úni?
3 Jesusi klaru uandaspti eskachi jatsiska para jorhendani kʼuiripuni ambe enga ima juramuka. Joperu, ju je no mirikurhini eska Jesusi no solu uandaspka: ‘Jorhendaa je iámindu imani ambe engaksïni ji juramuchika’. Sánderu sési, ima arhiaspti: ‘Jorhendaa je eskaksï patsaaka [o úni] iámindu ambe engaksïni ji juramuchika’. Engachi uéjka ísï úni, jatsiskachi para jorhendaani juchari jorhenguarhirichani ambe engaksï jatsika para úni, joperu ístu néna engaksï uáka ísï úni. ¿Andi?
4. Ejempluni ma úraparini, uanda je nénachi uá jorhendani nemani para úni ambe enga tata Jesukristu juramuka.
4 ¿Nénachi uá jorhendani nemani para úni ambe enga tata Jesukristu juramuka? Ju je exeni arini ejempluni. Kʼuiripu ma enga jorhendani jarhajka nemani karruni ma xanhatatani, ¿ambe úsïni paraka ima enga jorhenguarhini jaka ísï uáka eskaksï juramukuecha na uandajka? Orheta, jatsisti para uandakua jingoni arhistakuni imani juramukuechani engaksï jindeeka para karruni ma xanhatatani. Joperu enga uéjka eska kurhajchauaka, jatsisti para imani jingoni nirani karreterarhu karruni xanhatatani para jarhuatani ísï úni eska na jorhendaka. ¿Ambechi jorhenguarhisïni?
5. a) Eska na arhijka Juanu 14:15 ka 1 Juanu 2:3, ¿ambechi jorhendaa úni Bibliaeri jorhenguarhirini? b) Máru ejempluechani úrapariani, uanda je nénachi uá ísï úni.
5 Engachi jorhendani jarhajka kʼuiripuni ma Bibliaeri ambe, jorhendasïngachi ambe enga Tata Diosï erokuarhijka eskachi uáka. Joperu no inde ambejkusï uétarhijti. Jatsiskachi para jorhendani ísï úni eska na jorhenguarhini jauaka (arhinta je Juanu 14:15; 1 Juanu 2:3). Juchari ejemplu jingoni, uákachi xarhatakuni néna úraani Bibliaeri karakatechani enga eskuelarhu jauaka, ánchikuarhitarhu o enga uékaaka tsípikuarhini. Ístuchi uáka aianguni ambe ma engachi jucha nitamakuarhika enga xarhatajka néna engajtsïni kuájchakuka Bibliaeri konsejuecha o néna engajtsïni jarhuataka sési erakuni úni ambe ma. Ka engachi kómarhikua úni jauaka jorhenguarhiri jingoni, uákachi kurhakuni Jeobani eska jarhuataaka imeri espiritu santu jingoni (Juanu 16:13).
6. ¿Ambeteruchi uá úni parachi jarhuataani máteruechani paraksï úni ambe enga Jesusi juramuka?
6 ¿Ambeteruchi uá úni parachi jorhendaani máteruechani paraksï ísï úni eska Jesusi na juramuka? Jatsiskachi para jarhuatani imani engachi Bibliaeri ambe jorhendani jaka paraka niáraaka mintsita jingoni uékani Jesusiri chúxapatichani uáni. Máru jorhenguarhirichaksï kánikua chésïndi aianhpini. Jimbochisï jatsika para tekaantskua jingoni jarhuataani sánderu sési kurhanguni ambe enga meru Biblia jorhentpijka parakaksï niáraaka sánderu mintsikani Tata Diosïni ka ísïksï uékani aianhpini. ¿Nénachi uá jarhuataani jorhenguarhirichani paraksï uékani aianhpini ambakiti ambe?
7. ¿Nénachi uá jarhuatani jorhenguarhirini paraka uékaaka aianhpini ambakiti ambe?
7 Úpiringachi kurhamarhini jorhenguarhirini: “¿Nénajtsï sánderu sési irekaskia desde engajtsï uénaka ísï úni eska Biblia na jorhentpijka? ¿Exesïntsï cha eskaksï máteruecha uétarhinchasïnga kurhaani ini ambe? ¿Ambejtsï úpirini úni imecha jimbo?” (Prov. 3:27; Mat. 9:37, 38). Ju je exeraani trataduechani engachi úraajka para jorhentpini ka ju je kurhamarhini nákichanksï tsitiapirini imeri familiaricha, amiguecha o imecha enga jingoni ánchikuarhijka. Ju je íntsaani máru enga ima erakuauaka ka imani jingoni jorhenguarhini paraka uáka janhanharhikua jingoni íntspiani. Ka enga uénaakia aianhpini, ju je seguirini jarhuatani (Ecl. 4:9, 10; Luk. 6:40).
KÚNGUARHIKUA JARHUATAASÏNDI JORHENGUARHIRICHANI PARAKSÏ MARHUAKUNI TATA DIOSÏNI
8. ¿Andisï xáni jukaparhakue eska jorhenguarhiri niáraaka kánikua uékani Tata Diosïni ka ístu máteruechani? (Ístu exe je rekuadruni “ Néna jarhuatani jorhenguarhirini paraka sánderu uékaaka Tata Diosïni”).
8 Ju je miáni eskajtsïni Jesusi arhiska eskachi jorhendauaka iámindu ambe úni ambe enga ima juramuka, enga ístu jindeeka kurhajchaani arini tsimani juramukuechani engaksï sánderu jukaparhakueka, uékani Tata Diosïni ka uékaani máteruechani (Mat. 22:37-39). Engachi jarhuataska jorhenguarhirini kurhajchaani ini tsimani juramukuechani, jarhuatanchi jauaka paraka uékaaka aianhpini. Ísïsti eskaksï máru jorhenguarhicha chésïnga, joperuchi uáka arhiani eska Jeoba jarhuatauaka paraksï sánhani arhini nóteru chérhiania kʼuiripuechani (Sal. 18:1-3; Prov. 29:25). Ini jorhenguarhikuarhu rekuadru ma jarhasti enga uandajka néna jarhuatani jorhenguarhirini ma paraka sánderu uékaaka Tata Diosïni. Ístu, iámindu kúnguarhikua uáti jarhuataani jimbanhichani parakaksï sánderu xénchpeaka. Ju je exeni néna.
9. ¿Néna jorhenguarhisïni kʼuiripu ma karruni ma xanhatatani?
9 Ju je exeni ménderu ejempluni enga ima kʼuiripueri uandajka enga jorhenguarhini jaka karruni ma xanhatatani. Enga karreterarhu xanhatatani jarhajka, no solu imani ambejkusï jorhenguarhijti ambe enga jorhentpiri arhijka, sino ístu enga exejka néna engaksï máteruecha sési xanhatataajka karruechani. Por ejemplu, jorhentpiri úpirindi arhini na enga karru ma jurajkuni jaka máteruni paraka ima orheta niuaka. O úpirindi arhini eska exeaka na enga máteru karru enga jini jurhani jaka késkuajka lusichani para no tsonhastpini. Indeni ejempluecha jingoni, jorhenguarhiri ambakiti ambe jorhenguarhisïndi.
10. ¿Ambe jarhuataa Bibliaeri jorhenguarhini paraka niáraaka Tata Diosïni marhuakuni?
10 Sáno májkueni, Bibliaeri jorhenguarhiri enga uénajkia Jeobani marhuakuni no solu jorhenguarhisïndi imeri jorhentpiriri, sino ístu imecheri engaksï sési marhuakuni jaka Jeobani. Jimbosï xáni jukaparhakueti eska niuaka tánguarhikuecharhu paraka niáraka Tata Diosïni marhuakuni. Ambe enga jima jorhenguarhiaka jarhuataati sánderu mintsikani Tata Diosïni ka para sánderu uékani (Uku. 15:30-32). Ístu tánguarhikuecharhu, imeri jorhentpiri uáti mítetaraani máteru erachichani ka pirenchichani engaksï májkueni ambe nitamakuarhini jaka eska ima. Ka ima exeati na engaksï xáni xénchperajka erachicha ka pirenchicha kúnguarhikuarhu. Ju je exeani máru ejempluechani.
11. ¿Náki ambakiti ejempluechani úpirini exeani jorhenguarhiri ma kúnguarhikuarhu, ka nénaksï uá jarhuatani?
11 Uarhiiti ma enga Bibliaeri ambe jorhenguarhini jaka ka enga jandiajku tʼarhexeraani jaka imeri sapiichani, exesïndi pirenchini ma enga sáno májkueni ambe nitamakuarhini jaka eska ima ka mintsitarhu niárakusïndi enga exejka na enga xáni jánguarhintajka para jurhani Kʼumanchikua Reinuerirhu imeri sapiicha jingoni. Máteru jorhenguarhiri enga jánguarhintani jaka nóteru itsutania, mítesïndi erachini ma enga úka jurajkuni indeni pʼindekuani. Erachi aianguspti eska jimbosï úpka jurajkuni indeni pʼindekuani ka kurhajchani Tata Diosïri juramukuechani jimboka niáraspka kánikua xénchani Jeobani (2 Kor. 7:1; 4:7). Enga erachi ini ambe aiangupka ka enga arhipka eska imajtu meru úpiringa ísï úni, jorhenguarhiri kánikua sési pʼikuarherantasïndi. Ka últimu, iurhitskiri ma enga Bibliaeri ambe jorhenguarhini jaka, exesïndi pirenchini ma enga imeeni jatirika enga kánikua tsípikua jingoni jámajka jimboka Jeobaeri testigueska. I ambe úsïndi eska jorhenguarhiri uékaaka míteni andisï i pirenchi méntkisï tsípikua jingoni jámajki.
12. ¿Andichisï uandajki eskachi iámindu kúnguarhikuarhu anapuecha uáka jarhuataani Bibliaeri jorhenguarhirichani parakaksï niáraaka marhuakuni Tata Diosïni?
12 Enga Bibliaeri jorhenguarhiri ma niárajka míteani uánikua erachichani engaksï sési marhuakujka Tata Diosïni, niárasïndi exeni ambe enga arhikuekajka uékani Tata Diosïni ka máteru kʼuiripuechani ísï eska na juramuka tata Jesukristu (Juanu 13:35; 1 Tim. 4:12). Ísï eskachi na exekia, erachicheri ejemplu engaksï sáno májkueni ambe nitamakuarhini jaka eska jorhenguarhiri, uáti jarhuatani exeni eska uáka mójtakurhini ka niárani tata Jesukristueri chúxapati máeni (Deut. 30:11). Iámindu kúnguarhikuarhu anapuechaksï uáti jarhuataani jorhenguarhirichani parakaksï niáraaka marhuakuni Tata Diosïni (Mat. 5:16). Ju je kurhamarhikuarhini: “¿Ambe úsïni parani sési pʼikuastaani Bibliaeri jorhenguarhirichani engaksï nirajka tánguarhikuecharhu?”.
JARHUATAANI IMECHANI ENGAKSÏ JARHARIKA KÚNGUARHIKUANI PARAKSÏ MÉNDERU AIANHPINI
13, 14. ¿Jesusi néna kaaspi imeri apostulichani engaksï kómu pʼikuarherani japka?
13 Uékasïngachi jarhuataani imani erachichani engaksï jarharika kúnguarhikuani paraksï ménderu uéntani uáni Jesusiri chúxapatichani ísï eskajtsïni tata Jesukristu na juramuchika. Ka parachi míteni néna ísï úni, ju je miáni na enga Jesusi kaapka imeri apostulichani jiáni engaksï kómu pʼikuarherani japka.
14 Enga Jesusi na kʼamarani japkia imeri ánchikuarhitani úni ixú Echerirhu, enga niárani japkia paraksï uándikuni, apostulichaksï jurajkuspti ka sïpakuarhisptiksï (Mar. 14:50; Juanu 16:32). ¿Ambe úspi Jesusi jiáni engaksï imeri apostulicha kómu pʼikuarherani japka? Enga na tsíntapkia, Jesusi arhiaspti imeri chúxapatichani: “Asï ché je, sino ni je aianguani juchiti ermanuechani” (Mat. 28:10a). Nájkirukaksï jurajkupka, ju je exeni eska Jesusi útasï seguirispka arhiani “juchiti ermanuecha”. Jesusi májkueni úspti eska Jeoba, pʼamojkuaspti ka puákuantani (2 Rey. 13:23).
15. ¿Nénachi pʼikuarherasïni imecha jimbo engaksï nóteru aianhpijkia?
15 Juchajtuchi kánikua uandanhiasïnga imecha jimbo engaksï nóteru aianhpijkia. Útasïksï juchari erachichesti ka xénchaasïngachi. Nóchi mirikurhisïnga na engaksï xáni ánchikuarhikuka Jeobani ka máruksï asta uánikua uéxurhinicha jimbo (Ebr. 6:10). Kánikuachi jirinhantaasïnga (Luk. 15:4-7). ¿Nénachi úpirini májkueni úni eska Jesusi ka xarhatakuani eskachi uandanhiasïnga imecha jimbo?
16. ¿Nénachi uá xarhatakuani juchari erachichani engaksï jarharika kúnguarhikuani eskachi uandanhiasïnga imecha jimbo?
16 Ju je uékperakua jingoni pʼímarhiani tánguarhikuecharhu. Ma ambe enga Jesusi úpka jiáni engaksï imeri apostulicha kómu pʼikuarherani japka, jindeespti pʼímarhiani parakaksï tánguarhipiringa (Mat. 28:10b; 1 Kor. 15:6). Juchajtuchi iásï uáka májkueni úni, engachi pʼímarhiaska imechani engaksï jarharika kúnguarhikuani paraksï nirani tánguarhikuecharhu. Ístu jamberichi uánikua xanhari jatsiaka para pʼímarhiani antedeksï uékani nirani. Jesusi kánikua tsípipti engaksï imeri chúxapaticha uékapka nirani tánguarhini ka juchajtuchi májkueni sési pʼikuarheraaka (Mat. 28:16; terukutanta je Lukasʌ 15:6 jingoni).
17. ¿Ambechi jatsiski para úni enga juuaka tánguarhikuarhu ima enga jarharika kúnguarhikuani?
17 Ju je uékperakua jingoni erokaani. Enga Jesusi exejperantapkia imeri chúxapaticha jingoni, andarhieraaspti ka uandontskuarhekuaspti para sési pʼikuastantaani (Mat. 28:18). Ka juchaia, ¿ambechi uá engachi exeaka nemani enga jarharika kúnguarhikuarhu inchani jarhani Kʼumanchikua Reinueriru? Jatsiskachi para andarhierani ka sési erokani. Uénani jámani, jamberichi no jánhaskaaka ambe arhini, joperuchi úpiringa arhini eskachi kánikua sési pʼikuarherasïnga exeni.
18. ¿Nénachi uá uinhaperantaani imani aianhpirichani engaksï jarharika kúnguarhikuani?
18 Ju je uinhaperantaani. Jesusiri chúxapatichaksï ísï pʼikuarherendi eskaksï no úpiringa aianhpini iámu parhakpinirhu. Jesusi sési pʼikuastantaaspti enga arhiapka: “Ji méntkisï jauaka chánksïni jingoni” (Mat. 28:20). ¿Jarhuataaspi ambe enga arhiapka? Jo, jimbokaksï no ióndani uénaspkia “uandajtsïkpini ka jorhentpini” ambakiti ambe (Uku. 5:42). Ima aianhpiricha engaksï jarharika kúnguarhikuani, ístuksï uétarhinchasïndi eska nema uinhaperantauaka. Úpirindiksï kánikua úkua jukanchani ménderu uéntani aianhpini. Úpiringachi uinhaperantaani arhipariani eskaksï no jandiajku aianhpiaka ka arhiani eskachi imecha jingoni uéraaka aianhpini jiáni engaksï na listu jauakia. Imaksï kánikua jukaparharaati engachi jarhuataaska. Engachi ísï exeaska ka ísï kaani komueska juchari erachicha, juchari kúnguarhikua jamberi sési pʼikuarheraati engaksï ménderu ueentaaka aianhpini.
KʼAMARANI ÁNCHIKUARHITANI ENGAJTSÏNI JESUSI ÍNTSKUKA
19. ¿Ambechi uékasïni úni iámu juchari mintsita jingoni, ka andi?
19 ¿Na jatinchi jamberi aianhpia para Jesusiri chúxapatichani uáni? Astaka kʼamakurhiaka no sési jásï ambe enga úkuarhini jaka parhakpinirhu (Mat. 28:20). ¿Uáchi aianhpini ka Jesusiri chúxapatichani uáni asta jiáni jamberi? ¡Eratsetixakachia ísï úni! Tsípikua jingonchi úrasïnga juchari tiempu, uinhapikua ka ambe engachi jatsikuarheka parachi exeantani ‘imechani engaksï tsípikua jingoni xarhatajka eskaksï uékasïnga irekani para méntkisï’ (Uku. 13:48, TNM). Engachi ísï úska, májkuenchi úni jauaka eska Jesusi enga uandapka: “Juchiti tʼirekua jindesti eskani uáka ambe enga jaiapanhentajka ima engarini axaka, ka eskani kʼamaraaka úni imeri úkuani” (Juanu 4:34; 17:4). Juchajtuchi iámu mintsita jingoni uékasïnga kʼamarani ini ánchikuarhitani engachi intsïnhaka (Juanu 20:21). Ka uékasïngachi eskaksï iámindu juchari erachicha asta imecha engaksï jarharika kúnguarhikuani, seguirini jauaka ánchikuarhini juchantsïni jingoni asta kʼamarhukuni jamberi (Mat. 24:13).
20. Eska na arhijka 2 Korintu 4:7, ¿andichisï uá kʼamarani ánchikuarhitani engajtsïni Jesusi juramuchika?
20 Ju je no mirikurhini eska úkua jukaska úni ambe engajtsïni Jesusi juramuchika. Joperuchi no jandiajku jarhaska, jimbokajtsïni ima aiachiska eska juchantsïni jingoni jauaka. Engachi Jesusiri chúxapatichani uájka, niárasïngachi jindeeni Tata “Diosïri jarhuajpiricha” ka májku kʼérichi jarhasïnga Jesusini jingoni (1 Kor. 3:9; 2 Kor. 2:17, TNM). Ísï jimbo, uákachi ísï úni. Kʼéri tsípikuarhita ka kʼéri kóntperata máesti úni juchari ánchikuarhitani ka jarhuataani máteruechani paraksï májkueni úni (arhinta je 2 Korintu 4:7).
PIREKUA 79 Jarhuataa paraksïni úni marhuachini
^ párr. 5 Jesusi arhiaspti imeri chúxapatichani eskaksï jarhuataapinga kʼuiripuechani paraksï niárani imeri chúxapatini ka paraksï úni iámindu imani ambe enga ima juramukuapka. Ini jorhenguarhikua jimbochi exeaka nénachi uá úni ambe enga Jesusi uandapka. Máru ambe enga ini informasionirhu jaka, jupindaskuarhisti rebistarhu La Atalaya 1 de juliueri 2004 anapu, pájina 14 a 19.
^ párr. 66 AMBE ENGAKSÏ XARHATAJKA IMAJENICHA: Pirenchi ma arhisïndi imeri jorhenguarhirini ambe enga jatsika para úni para sánderu uékani Tata Diosïni. Tátsekua, jorhenguarhiri úsïndi imani tanimu ambe enga pirenchi arhipka.
