1. ¿Ambe arhikuekasïni méntkisï sési eratsentani iámindu ambe? (2 Timoteo 4:5, TNM).

 ENGA úkuarhijka ambe ma engachi jucha no tsitijka, jamberichi uékapiringa jurajkuni Tata Diosï Jeobani ka imeeri kúnguarhikuani. ¿Ambejtsïni jarhuataa orhepani uérani? Méntkisï sési eratsentani iámindu ambe, jingontku jarhani, ka kánikua mintsikani Tata Diosïni (arhinta je 2 Timoteo 4:5, TNM). ¿Nénachi úsïni méntkisï sési eratsentani iámindu ambe? No xáni uandanhiaparini, sési eratseparini ka jánguarhintani ísï exeni ambe ma eska Tata Diosï na exejka. Engachi ísï uaaka, nóchi no jánhaskani jauaka.

2. ¿Ambechi exea ini jorhenguarhikua jimbo?

² Máteru jorhenguarhikua jimbo, tanimu problemeechanchi exeaska engachi úpiringa kúnguarhikuarhu uérakua nitamakuarhini. Ka ini jorhenguarhikua jimbo, tanimu problemeechanchi exeani jauaka engachi úpiringa kúnguarhikuarhu jatsiani ka engachi jimbo uékapiringa jurajkuni Tata Diosï Jeobani: engachi eratsejka eskajtsïni erachi ma no sési kámaska, engachi jurhimberanhantajka ka engachi úkua jukanchajka jiókuarhini enga kúnguarhikua mójtakujka ambe ma. Engachi ini ambe úkuarhinchapiringa, ¿ambechi uaa úni parachi méntkisï sési eratsentani iámindu ambe ka no jurajkuni Tata Diosï Jeobani ka imeeri kúnguarhikuani?

3. ¿Ambechi úpirini eratseni engajtsïni erachi ma no sési kámaska?

³ ¿Ménisïchi eratseski eskajtsïni erachi ma no sési kámaska ka jamberi nema enga ambe máeka kúnguarhikuarhu? Jamberijtsïni inde erachi no uékapti no sési úchini (Rom. 3:23; Sant. 3:2). Joperu inde ambejtsïni kánikua no sési pʼikuastaspti. Jamberichi nóteru  újkia kʼuíni xáni indeni ambe eratsentani jarhani ka jamberichi kurhamarhikuarhini: “Enga erachi máeka enga ini ambe úka, ¿i jindee Tata Diosïiri kúnguarhikua?”. Meru indeni ambesï uéjti Satanási eskachi eratseaka (2 Kor. 2:11). Ísï eratseni úpirindijtsïni jarharitani Tata Diosï Jeobaeri ka imeeri kúnguarhikueri. Jiájkani, engachi eratseska eskajtsïni erachi o pirenchi ma no sési kámaska, ¿ambechi uaa úni parachi méntkisï sési eratsentani iámindu ambe ka nóchi no sési ambe eratseni?

4. a) ¿Ambe úspi José para méntkisï sési eratsentani engaksï no sési kámapka? (Génesis 50:19-21). b) ¿Ambechi jorhenguarhisïni imeeri ejemplueri?

⁴ Ju je no ikiani pakarani. Enga José tumbi sapichuepka, imeeri ermanu jémbeecha engaksï sánderu kʼériipka, no sésiksï kámaspti. Kurhunhisïreendiksï ka máruksï asta uékaspti uándikuni (Gén. 37:4, 18-22). Tátsekuaksï atarantaspti para jántspiri máeni. Indeni ambe jimbo, José 13 uéxurhinisï kʼérati tsʼéjkukuechani nitamakuarhiaspti. Jamberi niárapti kurhamarhikuarhini sini Tata Diosï Jeoba útasï xéncheeni o sini mirikurhipia jiáni enga xáni no sési nitamakuarhini japka. Peru ima no ikiani pakaraspti. Sánderu sési, méntkisï sési eratsentaspti iámindu ambe ka no jukari uandanhiaspti. Ka enga úpiringa maiamukuarhintani ermanu jémbeecheeri, no ísï úspti. Sánderu sési, xarhatakuaspti eska xénchaasïreenga ka puákuantaspti (Gén. 45:4, 5). ¿Andisï ísï úpi? Jimboka sési eratsentaspka iámindu ambe, no imeeri uandanhiatechantku, sino ístu ambe enga Tata Diosï Jeoba uékeenga úni (arhinta je Génesis 50:19-21). ¿Ambejtsïni jorhendasïni i ambe? Engajtsïni nema no sési kámaska, ju je no ikiani Tata Diosï Jeobani jingoni o eratseni eskajtsïni mirikurhiskia. Sánderu sési, ju je eratsentani néna engajtsïni ima jarhuatani jaka parachi orhepani uérakuni indeni uandanhiatani. Ístu, ju je puátspentani ka miáni eska “ima enga uékpijka puátspeantasïnga uánikua pekaduechani” (1 Ped. 4:8).

5. ¿Ambe úspi Miqueasi paraka méntkisï sési eratsentapiringa iámindu ambe enga ísï pʼikuarherapka eskaksï no sési kámaspka?

⁵ Ju je exeni orhejtsïkutiiri ejemplu ma enga Sudamérica irekaka enga Miqueas b arhinhajka. Ma xanhari ima ísï pʼikuarheraspti enajkiksï máru orhejtsïkutiicha no káni sési kámapi. Ima miásïndi: “No méni xáni no sési pʼikuarheraspka. Kánikua uandanhiaxapka. No úsïreenga kʼuíni ka uerasïreenga jimbokani no mítespka ambe úni”. Nájkiruka Miqueasi indeni ambe nitamakuarhini japka, méntkisï sési eratsentaspti iámindu ambe ka jánguarhintaspti no xáni no sési pʼikuarherani. Kánikua kómarhisïreendi Tata Diosï Jeobani paraka íntskupiringa imeeri espiritu santuni ka uinhapikua para úni tekaantani. Ístu, jirinhantaspti informasioni juchaari publikasionicharhu. ¿Ambejtsïni jorhendasïni inde ambe? Engachi eratsejka eskajtsïni kúnguarhikuarhu anapu ma erachi o pirenchi ma no sési kámaska, ju je no uandanhiani ka ju je jánguarhintani no no sési ambe eratseni. Jamberijtsïni ísï kámati ambe ma jimbo engachi jucha no míteka. Ísï jimbo, ju je aiangukuarhini iámindu ambe Tata Diosïni ka arhini eskajtsïni jarhuataaka ísï exeni ambe ma eska ima erachi na exejka. Engachi ísï úska, jarhuataatijtsïni parachi eratseni eskajtsïni erachi no uékaparinisï ísï kámaka ka únchi puákuntani (Prov. 19:11). Ju je miáni eska Tata Diosï Jeoba iámindu ambe exexaka ka eskajtsïni íntskuaka uinhapikua parachi úni tekaantani (2 Crón. 16:9; Ecl. 5:8).

6. ¿Andisï uétarhijki eskachi kurhanguaka eskajtsïni Tata Diosï Jeoba jurhimberantasïnga jimbokajtsïni xénchasïnga? (Ebreu 12:5, 6, 11).

⁶ Úpiringachi no sési pʼikuarherani engachi jurhimberanhantaaka. Peru engachi indeni ambejku eratseni jauaka, nóchi exeaka na enga xáni uétarhienga eskajtsïni nema jurhimberantapiringa ka eratsenchi eskachi no uétarhinchaxapka eskachi jurhimberanhantapiringa. Ístu, nóchi úpiringa kurhanguni eskajtsïni Tata Diosï Jeoba jimbosï jurhimberantajka jimbokajtsïni xénchasïnga (arhinta je Ebreu 12:5, 6, 11). Engachi sánderu kasu úkuska imani ambe engachi pʼikuarherajka, jurajkuni jauakachi eskajtsïni Satanási támisï jánhastaaka. Ima uékasïndi eskachi no jurajkutakuarhiaka  parachi jurhimberanhantani ka sánderu no sési ambe, uékasïndi eskachi jurajkuaka Tata Diosï Jeobani ka imeeri kúnguarhikuani. Engachi jucha jurhimberanhantaska, ¿ambejtsïni uaa jarhuatani parachi méntkisï sési eratsentani iámindu ambe?

7. a) Eska na xarharajka dibujuecharhu, enga Pedru na jurhimberanhantapkia, ¿Tata Diosï Jeoba náki ánchikuarhiteechani íntsaaspi? b) ¿Ambechi jorhenguarhisïni Pedrueri ejemplu jingoni?

⁷ Ju je jiókuarhini engachi jurhimberanhantaaka ka ju je sési peentani ambe ma. Jesúsi no ma xanharkusï jurhimberantapti Pedruni apostoliichani japarini (Mar. 8:33; Luk. 22:31-34). ¡Pedru kánikua kʼuratsepti! Joperu no jurajkuspti Jesúsini ka jorhenguarhispti ima ambeeri enga no sési úpka. Ka indeni ambe jimbo Tata Diosï Jeoba kóndentaspti jimboka no jurajkuspka imani ka sánderu kʼérati ánchikuarhiteechani íntskuaspti kúnguarhikuarhu (Juanu 21:15-17; Uku. 10:24-33; 1 Ped. 1:1). ¿Ambechi jorhenguarhisïni? Eskajtsïni kánikua marhuachesïnga juchantsïni ka máteruechani engachi jiókuarhijka parachi jurhimberanhantani ka engachi sési peentajka ambe ma. Engachi ísï úska, sánderuchi sési marhuakuaka Tata Diosï Jeobani ka juchaari erachiichani.

8, 9. ¿Ueenani jámani néna pʼikuarheraspi Bernardu engaksï jurhimberantapka, peru ambe jarhuataspi para nóteru no sési exeni indeni ambe?

⁸ Ju je exeni ambe enga nitamakuarhipka erachi ma enga Mozambique anapueka ka enga Bernardo arhinhajka. Ima orhejtsïkutiispti, peruksï tátsekua arhispti eska nóteru jindeepiringia. ¿Néna pʼikuarheraspi? Ima uandantasïndi: “Kánikua no sési pʼikuarheraspka jimbokani no tsitispka eskajtsïni jurhimberantapiringa”. Uandanhiasïreendi eskaksï erachiicha no sési ambe eratsepiringa imeeri ambe. Bernardu ístu uandasïndi: “Uánikua mesiichaksï nitamaspti parani úni kurhanguni eska sési jarhaspka eskajtsïni jurhimberantapiringa ka ístu parani ménderu ueenani mintsikani Tata Diosï Jeobani ka imeeri kúnguarhikuani”. ¿Ambe jarhuataspi?

⁹ Bernardu mójtakuspti na enga eratseenga. Uandantasïndi: “Engani orhejtsïkutiipka úrasïreenga Ebreu 12:7 parani jarhuataani erachiichani kurhanguni eska Tata Diosï jurhimberantasïreenga jimboka uékasïreenga jarhuataani. Tátsekua kurhamarhikuarhispka: ʻ¿Neechaksï jatsiski para ísï úni eska i bersikulu na uandajka?ʼ. Iámindu Tata Diosï Jeobaeri marhuariicha ka ístuni ji”. Bernardu ístu úspti máteru ambe para sánderu mintsikani Tata Diosï Jeobani ka imeeri kúnguarhikuani. Sánderu arhintasïreendi Bibliani ka eratsentasïreendi ambe enga arhinteenga. Ka nájkiruka útasï uandanhienga engaksï erachiicha no sési ambe eratsepiringa imeeri ambe, nirasïreendi aianhpini imeecha jingoni ka komentariini tánguarhikuecharhu.  Ísï tátsekua, niáraspti ménderu orhejtsïkutiini. Engachi jucha jurhimberanhantaaka májkueni eska Bernardu, ju je no kʼuratseni, jiókuarhiani konsejuechani ka sési peentani ambe ma (Prov. 8:33; 22:4). c Engachi ísï úska uaakachi seguru jarhani eskajtsïni Tata Diosï Jeoba kóndentaaka jimbokachi no jurajkuska imani ni imeeri kúnguarhikuani.

10. ¿Ambe mójtakurhispi Tata Diosï Jeobaeri kúnguarhikuarhu enga niárapka tsʼéjkukua máeni para israeliteecha?

¹⁰ Enga Tata Diosï Jeobaeri kúnguarhikuarhu mójtakurhijka ambe ma, inde ambe úpirindi úni eskachi uékapiringa jurajkuni Tata Diosïni. Engachi no xéparini jámaska niárapiringachi ísï úni. Pori ejemplu, ju je eratsentani na enga xáni uánikua ambe mójtakurhipka para israeliteecha jiáni enga uaxastanhapka Moisésiiri Lei. Ante de inde Lei uaxastanhani, familieri orhejtsïkutiichaksï saserdotiispti imeecheeri kʼumanchikuecharhu; imeechaksï uaasïreendi altariichani, kéjtsïtakusïreendiksï Tata Diosï Jeobani paraka imeecheeri familia sési japiringa imani jingoni (Gén. 8:20, 21; 12:7; 26:25; 35:1, 6, 7; Job 1:5). Joperu enga uaxastanhapkia Lei, nóteruksï sésikua jatsisptia para indeni ambe úni, jimboka iásï Tata Diosï Aaróniiri familiarhu erakuaspka saserdotiichani parakaksï kéjtsïtakupiringa. Jiáni uératini, enga familieri orhejtsïkuti ma no Aaróniiri familiarhu anapuepiringa ka saserdoti úkuarhini, úpirindi uarhini (Lev. 17:3-6, 8, 9). d ¿Ini ambe jimboepi enga Koré, Datáni ka Abirami ka 250 iretarhu anapu orhejtsïkutiicha nóteru kurhajchapkia Moisésini ka Aarónini? (Núm. 16:1-3). Nóchi seguru jarhaska. Peru ambe uéjki jimboeni, Koré ka ima kʼuiripuecha engaksï apoiaripka, jurajkusptiksï Tata Diosï Jeobani. ¿Ambechi úpirini úni enga Tata Diosïiri kúnguarhikuarhu mójtakurhiska ambe ma parachi no jurajkuni imani?

11. ¿Ambejtsïni jorhendasïni máru lebiteecheeri ejemplu engaksï Koatiiri familiarhu anapuepka?

¹¹ Ju je iámu mintsita jingoni apoiarini ambe enga Tata Diosïiri kúnguarhikua mójtakuaka. Engaksï israeliteecha desierturhisï jámani japka, lebiteecha engaksï Koatiiri familiarhu anapuepka, ambakiti ánchikuarhitaksï ma jatsispti. Méntkisï engaksï móskuenga kampamentuni, máru koatiteechaksï arka pakatperakuerinksï pásïreendi ka iámu ireta úsïreendi exeni indeni ambe (Núm. 3:29, 31; 10:33; Jos. 3:2-4). ¡Inde ambe kʼéri kóntperata máespti! Peru engaksï israeliteecha niárapkia imani Echeri jimbo engaksï Aiaminhapka, mójtakukuarhispti ambe ma. Nóteru uétarhipirindia eskaksï móskupiringa arkani. Ísï jimbo, imani tiempuni jimbo enga Salomóni reiipka, máru koatiteechaksï pirerispti, máteruechaksï puerteecharhu jarhasïreendi ka máteruechaksï almasenicharhu ánchikuarhisïreendi (1 Crón. 6:31-33; 26:1, 24). Biblia no uandasïndi eskaksï koatiteecha uandauandamisïreenga, o eskaksï sánderu kʼérati ánchikuarhiteechani kurhajkuarhiasïreenga jimbokaksï ióntki ambakiti ánchikuarhiteechani jatsiaspka. ¿Ambechi jorhenguarhisïni iiri ambe? Eskachi mintsita jingoni apoiariuaka enga Tata Diosï Jeobaeri kúnguarhikua mójtakuaka ambe ma nájkirukachi máteru ánchikuarhita ma intsïnhaakia. Ju je tsípikua jingoni úni náki uéjki ánchikuarhita ma. Ka miáni eska ma no indeni jimbosï sánderu jukaparhakuejka Tata Diosïiri kúnguarhikuarhu. Para Tata Diosï Jeoba, sánderu jukaparhakuesti eskachi kurhandiraaka ka eska náki uéjki responsabilidadi ma (1 Sam. 15:22).

12. ¿Néna pʼikuarheraspi Zaira enga uéntapka Beteli?

¹² Ju je exeni ambe enga nitamakuarhipka pirenchi Zaira enga Oriente Medio anapueka. Ima kánikua jukaparharasïreendi Beteli marhuani. Joperu enga na jukari 23 uéxurhini marhuapkia jima,  arhinhaspti eska iásï prekursora espesialipiringia. Ima uandantasïndi: “Kánikua no sési pʼikuarherasïreenga. Eratsesïreenga eskani no ma ambe jimbo marhuasïreenga ka kurhamarhikuarhisïreenga ambe no sési úspi”. Xáni no sési engaksï máru kúnguarhikuarhu anapu erachiicha ka pirenchicha no sési pʼikuasteenga pirenchini jimbokaksï arhisïreenga: “Engari sánderu sési úpiringa ambe ma nóksïni petantapirindi Beteli”. Ma tiempu, Zaira kánikua kómu pʼikuarherasïreendi ka mándani chúri uerasïreendi. Peru ima uandasïndi: “No méni no sési eratsespka Tata Diosïiri kúnguarhikueri ni eskarini Tata Diosï nóteru xénchasïreengia”. ¿Ambe jarhuataspi para seguiriini méntkisï sési eratsentani iámindu ambe?

13. ¿Ambe úspi Zaira para nóteru no sési pʼikuarhenhinia?

¹³ Para úni sési pʼikuarhenhintani, Zaira arhiantaspti máru jorhenguarhikuechani juchaari publikasionicharhu engaksï imeeri ambe uandajka enga ima nitamakuarhini japka. Ma ambe enga jarhuatapka jindeespti rebista La Atalaya 1 febrerueri 2001 anapu, enga arhinhajka “Usted puede afrontar el desánimo”. Indeni jorhenguarhikua jimbo, Markusïiri ambe uandasïndi enga Bibliani karaka, ka enga jamberi májkueni pʼikuarherapka eska i pirenchi enga Tata Diosï máteru ánchikuarhiteechani íntskuapka. Zaira uandantasïndi: “Engani chkétakukuarhetini japka, Markusïiri ejemplurini kánikua jarhuataspti”. Pirenchi no jurajkuaspti imeeri amigu jémbeechani, nijtu jarhariapi erachiichani ka nóteru seguiriispti eratsentani imani ambe enga kómu pʼikuasteenga. Ístu kurhanguspti eska Tata Diosï Jeoba imeeri espiritu santu jingoni orhekupaxaka imeeri kúnguarhikuani ka eskaksï erachiicha uandanhiasïreenga pirenchini jimbo. Peru ístu niáraspti exeni eska para Tata Diosïiri kúnguarhikua, ambe enga sánderu jukaparhakueka jindeeska eska úkuarhiaka ima ánchikuarhita enga Tata Diosï uandaka.

14. ¿Ambe mójtakuspi Tata Diosïiri kúnguarhikua enga Ivani jatsipka para jiókuarhini ka ambe jarhuataspi ísï úni?

¹⁴ Ivan Eslovenia anapu orhejtsïkuti ma enga 73 jatiriika, kánikua úkua jukanchaspti jiókuarhini eska imeeri kúnguarhikua máteru jingoni úkuarhintapiringia ka eskaksï míkapiringa Kʼumanchikua Reinuerini enga ima tánguarhienga. Ima uandantasïndi: “No kurhangusïreenga andiksïsï jatsipi para míkani xáni sési jásï Kʼumanchikua Reinuerini ma. Ikiaspka jimbokachi apenasi jimbanherantaspka. Ji karpinterueska ka ji uaaspka máru mueblichani. Ístu engaksï márku únhantapka kúnguarhikuecha, erachiicha engachi jatiriika kánikuachi úkua jukanchaspka”. ¿Ambe jarhuataspi paraka apoiaripiringa indeni ambe? Ima uandantasïndi:  “Jiókuarhini ambe enga Tata Diosïiri kúnguarhikua mójtakujka méntkisïjtsïni marhuachesïndi. I ambejtsïni preparariuati para jiáni enga sánderu kʼéri ambe mójtakurhiaka”. ¿Úkuachi jukanchaxaki jimboka juchaari kúnguarhikua márku únhantaska máteru jingoni o jimbokachi jimbanhi ánchikuarhita ma intsïnhaska? Ju je no uandanhiani, Tata Diosï Jeoba kurhangusïndi na engachi pʼikuarherajka. Engachi apoiariska ambe enga mójtakunhaaka ka no jurajkuni Tata Diosïni ka ni imeeri kúnguarhikuani enga ima úrani jaka, uánikua kóntperatechanchi intsïnhauaka (Sal. 18:25).

15. ¿Ambechi uaa úni parachi méntkisï sési eratsentani iámindu ambe enga kúnguarhikuarhu jauaka ambe ma?

¹⁵ Jimbokachi niáraxakaia ima jurhiatikua jimbo enga parhakpini kʼamajkunhaaka, nójtsïni ísku pakatasïndi enga kúnguarhikuarhu jauaka ambe ma enga úpiringa úni eskachi uékaaka jurajkuni Tata Diosï Jeobani. Ísï jimbo, jatsiskachi para méntkisï sési eratsentani iámindu ambe. Engachi eratseaka eskajtsïni erachi ma no sési kámaska, ju je no ikiani pakarani. Engachi jurhimberanhantaska, ju je no kʼuratseni, jiókuarhiani konsejuechani ka sési peentani ambe ma. Ka enga Tata Diosï Jeobaeri kúnguarhikua mójtakuska ambe ma engajtsïni jamberi juchantsïni afektariiska, ju je iámu mintsita jingoni apoiariini ka ju je úni ambe engachi arhinhaaka.

16. ¿Ambechi uaa úni parachi méntkisï mintsikani Tata Diosï Jeobani ka imeeri kúnguarhikuani?

¹⁶ Uaakachi méntkisï mintsikani Tata Diosï Jeobani ka imeeri kúnguarhikuani enga jauaka ambe ma enga úkua jukaaka. Joperu parachi ísï úni, jatsiskachi para iámindu ambe sési eratsentani, i ambe arhikuekasïndi eskachi no jukari uandanhiauaka, eskachi sési eratsentaaka ambe ma ka eskachi ísï exeaka ambe ma eska Tata Diosï Jeoba na exejka. Ju je jánguarhintani jorhenguarhini ima kʼuiripuecheeri enga Biblia uandaajka ka engaksï májkueni jásï ambe nitamakuarhika eska jucha ka eratseantani imeecheeri ejempluni. Ju je kurhakuni Tata Diosïni eskajtsïni jarhuataaka parachi no méni jurajkuani kúnguarhikuarhu anapu erachiichani. Engachi ísï úska, ambe uéjki úkuarhini, Satanási no uaati eskachi jarhariaka Tata Diosï Jeobani ni imeeri kúnguarhikuani (Sant. 4:7).