MARDOKEU jindeesti ma enga sánderu uandanhajka librurhu de Ester enga Bibliarhu jaka. Judiu máespti enga Persia pánhapka uéxurhini 496 jimbo ísï ante de Jesúsi, enga “rei Asueru irekani japka” (iásï uánikuechaksï uandasïndi eska i rei jindeespka Jerjesi I). Mardokeu úspti ambe ma paraka Persia anapu rei no uándikunhapiringa. Rei xáni agradesidu jarhaspti imani jingoni enga uandapka eska kʼéri ambe arhinhapiringa Mardokeu iáminduechani japarini. Ísï tátsekua enga na uarhipka Amani, Mardokeueri ikiatspiti ma ka ístu judiuecheeri, rei juramukuarhu peeraspti Mardokeuni. Ini ambe jimbo, Mardokeu úspti kénditani juramukuani enga uandeenga eskaksï uándikunhapiringa judiuecha engaksï Persia irekapka (Est. 1:1; 2:5, 21-23; 8:1, 2; 9:16).

Máru kʼuiripuecha engaksï istorieri ambe jorhenaka, uandasptiksï eska no méni úkuarhispka ambe enga libru de Ester uandajka ka eska Mardokeu no méni irekaspka. Joperu 1941 jimbo, arkeologuechaksï exentaspti ambe ma enga úpiringa xarhatani eska ísïiska ambe enga Biblia uandajka Mardokeueri ambe. ¿Ambeksï exentaspi?

Inbestigadoriichaksï exentaspti máru atsïmueri tabliiechani engaksï idioma persa jimbo karakata jaka ka uandasïndiksï acheetiiri ma enga Marduka arhinheenga (Mardoqueo turhisï jimbo) enga ánchikuarhienga Susa anapu juramukuarhu, jamberi ima exeendi sentabueri ambe. Enga i ambe exenhantapka, Arthur Ungnad enga sési míteka Susaeri anapu istorieri ambe, uandaspti eska “aparte de Biblia indejku jindeeska karakata enga Mardokeueri ambe uandajka”.

Desde enga Arthur Ungnad i ambe uandapka, uánikua atsïmueri tabliiechaksï tradusirikuarhistia engaksï idioma Persa jimbo karakata jaka. Ixúksï kuenta úkuarhisïndi Persépolisi anapu karakateecha engaksï tabliiecha jimbo karanhapka ka engaksï exenhantapka inde ireteeri bardecharhisï jima enga sentabu patsanheenga. Íksï tabliiecha jiánisïksï karanhasti enga Jerjesi I juramuni japka. Karanhasptiksï idioma elamita jimbo ka uánikua nombriichaksï jataasti enga libru de Ester uandaajka. a

Uánikua Persépolisi anapu tabliiechaksï uandasïndi nemeeri enga Marduka arhinheenga ka enga karariipka Susa anapu palasiurhu, jiánisï enga Jerjesi I juramuni japka. Ma tabliia uandasïndi eska Marduka traduktori máespka. I ambe sési terukuntasïndi imani ambe jingoni enga Biblia uandajka Mardokeueri ambe. Ima, rei Asuerueri juramukuarhu ánchikuarhisïreendi (Jerjesi I), tsimani idioma uandasïreendi ka ima pʼindespti uaxakani reiiri palasiurhu puertarhu enga Susa japka (Est. 2:19, 21; 3:3). I puerta kʼéri kʼumanchikuarhu ma jimbo jarhaspti nani engaksï ánchikuarhienga imeecha engaksï juramukuarhu japka.

Eskachi na exekia, uánikua ambe jimbo sáno májkuenistiksï Marduka enga tabliiecharhu uandajka ka Mardokeu enga Bibliarhu uandajka. Májku tiempu jimboksï irekaspti ka mismu lugari jimbo; ístuksï mismu lugarirhuksï ánchikuarhispti. Iámindu i ambe xarhatasïndi eska Marduka ka Mardokeu májku kʼuiripu máeska.