SEMANA 45
Tata Diosï Jeobajtsïni jarhuatasïndi parachi seguiriini aianhpini
“Mítetinksï jauati eska profeta ma jarhaspka imeecha jingoni” (EZEQ. 2:5).
PIREKUA 67 “Eianhpiaka Diosïri uandakuani”
AMBE ENGACHI EXEAKA a
1. ¿Ambechi mítetixaki kristianuecha, ka ambeerichi seguru jarhaski?
NÓJTSÏNI ísku pakatasïndi engajtsïni máru kʼuiripuecha no jiárhitajka parachi aianhpini, ka jamberi sánderu orhepatini sánderujtsïni no jurajkuati (Dan. 11:44; 2 Tim. 3:12; Jaŋ. 16:21). Peruchi seguru jarhaska eskajtsïni Tata Diosï Jeoba jarhuataaka. ¿Andichisï ísï uandajki? Jimboka ima méntkisï jarhuataaska imeeri marhuariichani úni imani ánchikuarhitani enga ima íntsaaka nájkiruka úkua jukapiringa. Parachi exeni eska i ambe meru ísïiska, ju je exeni máru ambe enga profeta Esekieli nitamakuarhipka jiáni enga ima aianguapka Tata Diosïiri ambe judiuechani engaksï Babilonia japka.
2. a) ¿Uanda je na jásï kʼuiripuespiksï imeecha enga Esekieli jatsipka para aianguani Tata Diosïiri ambe? (Ezequiel 2:3-6). b) ¿Ambechi exea ini jorhenguarhikua jimbo?
2 ¿Na jásï kʼuiripuespiksï imeecha enga Esekieli aianguapiringa Tata Diosïiri ambe? Tata Diosï Jeoba uandaspti eskaksï ima judiuecha ʻnóksï kurhandireespkaʼ, eskaksï ʻmókukuarhisïreengaʼ ka eskaksï ʻno nani máru kurhangusïreengaʼ. Xánksï no ambarhaspti eska planta ma enga chekamikua jukajka ka ísïksï peligrosueni eska alakranicha. Jimbosï Tata Diosï Jeoba méntku úndapti arhini Esekielini: “Asï chérhia” (arhinta je Ezequiel 2:3-6). Esekieli úspti úni imeeri ánchikuarhitani jimboka 1) Tata Diosï Jeobasï axapka, 2) espiritu santu uinhaperantaspka ka 3) Tata Diosïiri uandakua úspti eska Esekieli sánderu mintsikapiringa Tata Diosïni. ¿Néna jarhuataspi i tanimu ambe ka nénajtsïni jarhuata iásï juchantsïni?
TATA DIOSÏ JEOBA AXASPTI ESEKIELINI
3. ¿Náki uandakuechaksï uinhaperantaspi Esekielini, ka néna xarhatakuspi Tata Diosï Jeoba eska jarhuatapiringa?
3 Tata Diosï Jeoba arhispti Esekielini: “Axaxakakeni” (Ezeq. 2:3, 4). Inde ambe kánikua uinhaperantapti. Seguru eska miánteenga eska Tata Diosï Jeoba sáno májkueni jásï ambe arhispka Moisésini ka Isaíasini jiáni enga erakuapka parakaksï imeeri profeteepiringa (Éx. 3:10; Is. 6:8). Esekieli ístu mítespti eska Tata Diosï Jeoba jarhuataaspka ini profetechani parakaksï úpiringa úni imani ánchikuarhiteechani engaksï kánikua úkua jukapka. Ísï jimbo, enga Tata Diosï tsimani uelta arhipka: “Axaxakakeni”, ima mítespti eska Tata Diosï meru jarhuatapiringa. Ístu libru Ezequiel jimbo uánikua ueltaksï jarhasti ari uandakuecha: “Tata Diosï Jeobareni arini ambe arhisti” (Ezeq. 14:2). Ka uánikua ueltaksï jarhasti ari uandakuecha: “Tata Diosï Jeobareni ménderu arhispti ini ambe” (Ezeq. 6:1). Ísï jimbo, profeta seguru jarhaspti eska Tata Diosïsï axapka. Ístu, jimboka imeeri taati jémba saserdotiispka, seguru eska jorhendaspka eska Tata Diosï Jeoba méntkisï arhiasïreenga imeeri profetechani eska jarhuataapiringa. Ístu Tata Diosï Jeoba arhispti Isaakini, Jakobuni ka Jeremíasini: “Ji tʼungini jingoni jarhaska” (Gén. 26:24; 28:15; Jer. 1:8).
4. ¿Náki ambakiti uandakuechaksï uinhaperantapi Esekielini?
4 ¿Nénaksï jámapirini sáno iámindu israeliteecha? Tata Diosï Jeoba arhispti Esekielini: “Israeliri kʼumanchikuarhu anapuechaksïni no uékaati kurhajchani jimbokajtsïni no uékasïnga kurhajchani jíndeni” (Ezeq. 3:7). Engaksï no kurhajchani japka ini profetani, Tata Diosï Jeobanksïsï no kurhajchani japti. I uandakuechaksï sési pʼikuastantapti Esekielini, jimboka enga kʼuiripu no uékapiringa kurhajchani no arhikuekani japirindi eska ima no ambakiti profeta máespka. Ístu, Tata Diosï Jeoba arhispti eska enga na ísï úkuarhipiringia eska ima na uandapka, imeechaksï mítepirindi “eska profeta ma jarhaspka imeecha jingoni” (Ezeq. 2:5; 33:33). Seguru eska i xáni ambarhati uandakuechaksï kánikua sési pʼikuastantapka Esekielini paraka úpiringa seguiriini aianhpini.
TATA DIOSÏ JEOBAJTSÏNISÏ AXAJTI
Májkueni eska Esekieli, jamberi kʼuiripuechajtsïni no uékaati kurhajchani ojtsïni no sési kámani. Peruchi míteska eska Tata Diosï Jeoba juchantsïni jingoni jarhaska. (Exea je párrafuechani 5 ka 6).
5. ¿Andijtsïnisï uinhaperantajki Isaías 44:8?
5 Juchantsïntu kánikua uinhaperantasïndi míteni eskajtsïni Tata Diosï Jeobasï axajka. Imajtsïni kʼéri kóntperata ma íntskusti parachi imeeri ambe uandantani (Is. 43:10). Májkueni eska Tata Diosï na arhipka Esekielini: “Asï ché”, juchantsïntujtsïni arhisïndi: “Asï ché je”. ¿Andichisï no jatsi para chérhiani imeechani engajtsïni no xénchajka? Jimboka májkueni eska Esekielini jingoni, Tata Diosï Jeobajtsïnisï axajti juchantsïni ka imajtsïni jarhuatasïndi (arhinta je Isaías 44:8).
6. a) ¿Nénajtsïni xarhatachesïni Tata Diosï Jeoba eskajtsïni jarhuatasïnga? b) ¿Ambejtsïni sési pʼikuastantasïni ka uinhaperantani?
6 Tata Diosï Jeobajtsïni arhisïndi eskajtsïni jarhuataaka. Pori ejemplu, ante de uandani: “Chájtsï jindeeska juchiiti testiguecha”, ima uandaspti: “Engari itsïrhisï parhimeaka, ji tʼungini jingoni jauaka ka, engari iorhekuechani parhikuauaka, nóksïni ójchakuraati. Engari chpirirhu ísï nitamaaka, nóri kurhiaka ka chpirikini no sáni kurhiraati” (Is. 43:2). Engachi aianhpijka, ménichanksï jarhasïndi ójkutakuecha engaksï ísïijka eska iorhekuecha ka tsʼéjkukuecha engaksï ísïijka eska chpiri. Joperu Tata Diosïiri jarhuajperata jingoni, seguirisïngachi aianhpini (Is. 41:13). Juchajtuchi májkueni úkuarhinchasïnga eska Esekieli: sáno iámindu kʼuiripuechajtsïni no uékasïndi kurhajchani. Joperuchi míteskia eska inde ambe no arhikuekasïnga eskachi no ambakiti Jeobaeri testiguecheeska. Kánikuajtsïni sési pʼikuastantasïndi ka uinhaperantani míteni eska Tata Diosï Jeoba sési pʼikuarherasïnga engachi seguiriijka aianhpini. Apostoli Pablu uandaspti: “Eska mándani arhini maiamunhantaaka eskaksï na jukanchaaka imeecheeri ánchikuarhitani jimbo” (1 Kor. 3:8; 4:1, 2). Pirenchi ma enga ióni marhuapkia komueska prekursora ma, uandasïndi: “Kánikua tsípini pʼikuarherasïnga míteni eskajtsïni Tata Diosï Jeoba maiamuntasïnga engachi jánguarhintajka aianhpini”.
ESPIRITU SANTU UINHAPERANTASPTI ESEKIELINI
Esekieli exesïndi jánhaskakua ma jimbo Tata Diosï Jeobaeri auandarhu anapu karruni, enga újka eska sánderu seguru jauaka eska ima jarhuataaka imeeri ánchikuarhitani úni (Exe je párrafu 7).
7. ¿Néna pʼikuarherapi Esekieli mándani xanhari enga miánteenga imani jánhaskakua enga exepka? (Exe je dibujuni enga ueenakuarhu jaka i rebistarhu).
7 Esekieli exespti na enga xáni uinhapitiika Tata Diosïiri espiritu santu. Jánhaskua ma jimbo exespti na enga espiritu santu jarhuatauenga ánjeliichani engaksï xáni uinhapitiika ka na enga manatauenga auandarhu anapu karrueri ruedechani (Ezeq. 1:20, 21). Ima mismujtsïni aiangusïndi na enga pʼikuastapka inde ambe, aiangusïndijtsïni: “Engani exepka, tinguikuatsespka echerirhu”. Ísku pakaraspti enga jamberi tinguikuatsepka echerirhu (Ezeq. 1:28). Jamberi mándani xanhari enga miánteenga indeni jánhaskakuani, sánderu seguru jarhasïreendi eska úpiringa seguiriini aianhpini Tata Diosïiri espiritu santueri jarhuajperata jingoni.
8, 9. a) ¿Ambe juramukuspi Tata Diosï Jeoba Esekielini? b) ¿Ambe máteru ambe úspi Tata Diosï para uinhaperantani Esekielini?
8 Jeoba juramukuspti Esekielini: “Acheetiiri uájpa, jauara parakeni uandontskuarhechini”. Ima ambe enga juramuminhapka ka Tata Diosïiri espiritu, uinhaperantaspti paraka úpiringa jauarani. Ima karaspti: “Tata Diosïiri espiritu úspti eskani úpiringa jauarani” (Ezeq. 2:1, 2). Ísï tátsekua ka iámindu imani tiempu jimbo enga jámapka aianhpini, úspti exeni eska “Tata Diosïiri jájki”, enga jindeeka imeeri espiritu santu, jarhuataspka (Ezeq. 3:22; 8:1; 33:22; 37:1; 40:1). Tata Diosïiri espiritu íntskuspti uinhapikua paraka úpiringa Tata Diosïiri ambe aianguani judiuechani, nájkirukaksï imeecha ‘méntku no nani máru uékeenga kurhanguni ka mintsita jingonksï no uékani kurhanguni’ (Ezeq. 3:7). Tata Diosï Jeoba arhispti: “Úska eska chiiti kánharhikua chopeaka ísï eska imeecheeri kánharhikuecha ka eska chiiti tsʼérhukua ísï chopeaka eska imeecheeri tsʼérhukuecha. Úska eska chiiti tsʼérhukua ísïiuaka eska diamanti, sánderu choperi eska pedernali. Asï chérhia, ka eskaksïni no chéraaka na engaksïni jánharhichintaaka” (Ezeq. 3:8, 9). Ísïipirindi enajki Tata Diosï Jeoba arhini japirini: “Engaksï no nani máru uéjka kurhanguni, asï jáma chkétakuarhini. Ji uaaka eskari sánderu uinhapitiuaka”.
9 Jiáni uératini, Tata Diosïiri espiritu páspti Esekielini nani enga aianhpepiringa. Ima karaspti: “Tata Diosï Jeobaeri jájkirini uinhamu jupikatixapti”. Profeta, ma semana jimbo úspti kurhanguni ka jorhenguarhini ambe enga jatsipka para aianhpini (Ezeq. 3:14, 15). Tátsekua, Tata Diosï Jeoba arhispti eska nipiringa pákua ma jimbo, nani enga espiritu santu intsïnhapiringa (Ezeq. 3:23, 24). Esekieli iásï kʼóru listu jarhasptia para ueenani aianhpini.
ESPIRITU SANTUJTSÏNI UINHAPERANTASÏNDI
Májkueni eska na úkuarhinchapka Esekieli, ¿ambejtsïni jarhuataa iásï no kuatantani aianhpini? (Exe je párrafu 10).
10. ¿Náki jarhuajperatachi uétarhinchasïni parachi úni seguiriini aianhpini, ka andi?
10 ¿Ambejtsïni jarhuataa parachi seguiriini aianhpini? Parachi ini ambe míteni, ju je eratsentani Esekielini. Ante de ueenani aianhpini, espiritu santu íntskuspti uinhapikua enga uétarhinchani japka. Májkueni eska Esekieli, juchachi no úpiringa aianhpini engajtsïni espiritu santu no jarhuatapiringa. ¿Andichisï ísï uandajki? Jimbokajtsïni Satanásisï no jurajkujka parachi aianhpini (Jaŋ. 12:17). Para kʼuiripuecha úpirindi ísï xarharani eska Satanási kánikua uinhapikua jatsiska ka eskachi jucha no uaaka imani jingoni. Joperuchi andaxaka jimbokachi úxaka aianhpini (Jaŋ. 12:9-11). Engachi uérajka aianhpini, xarhatasïngachi eskajtsïni Satanási no chérasïnga. Méntkisï engachi aianhpijka Satanási tsïtani jarhasïndi. Ísï jimbo, engachi úni jaka aianhpini nájkirukachi no jurajkunhajka, xarharasïndi eskajtsïni espiritu santu jarhuataxaka ka eskajtsïni Tata Diosï Jeoba jaiapanhentasïnga (Mat. 5:10-12; 1 Ped. 4:14).
11. ¿Nénajtsïni jarhuataa espiritu santu, ka ambechi jatsiski para úni parachi seguiriini intsïnhani?
11 Enga Tata Diosï Jeoba úpka eska Esekieliiri kánharhikua ka tsʼérhukua chopepiringa, úsïndi eskachi seguru jauaka máteru ambeeri: eskajtsïni espiritu santu uaaka jarhuatani parachi úni orhepani uérakuni náki uéjki ójkutakua ma engajtsïni no jurajkuaka parachi seguiriini aianhpini (2 Kor. 4:7-9). Jiájkani, ¿ambechi jatsiski para úni parakajtsïni Tata Diosï seguiriuaka íntskuni imeeri espirituni? Méntku úndani jarhani kurhakuni ka seguru jarhani eskajtsïni Tata Diosï Jeoba kurhajchaaka. Jesúsi arhiaspti imeeri chúxapatiichani: ‘seguirii je kurhajkuarhini’, ‘seguirii je jirinhantani’ ka ‘seguirii je téntenastani’. ¿Ka nénajtsïni mókuchintaa Tata Diosï Jeoba? Ima ‘íntsauati espiritu santu imeechani engaksï kurhajkuarhiaka’ (Luk. 11:9, 13; Uku. 1:14; 2:4).
TATA DIOSÏIRI UANDAKUECHAKSÏ ÚSPTI ESKA ESEKIELI SÁNDERU MINTSIKAPIRINGA TATA DIOSÏNI
12. Eska na uandajka Ezequiel 2:9-3:3, ¿nani uéraspi roiu, ka ambe uandasïreeni?
12 Tata Diosïiri espiritu uinhaperantaspti Esekielini. Peru ístu Tata Diosïiri uandakua kánikua jarhuataspti. Jánhaskakua ma jimbo, Esekieli jájkini ma exespti enga roiuni ma páni japka (arhinta je Ezequiel 2:9–3:3). ¿Nani uéraspi inde roiu? ¿Ambe uandasïreeni? ¿Ka néna marhuakuspi Esekielini? Roiu kʼéri uaxantskuarhu uératini jurhasïreendi enga Tata Diosï Jeoba jaka. Jamberi Tata Diosï úrapti ánjelini ma, ima tʼámu ánjelicheeri enga Esekieli exeapka paraka íntskuntapiringa roiuni (Ezeq. 1:8; 10:7, 20). Roiu Tata Diosïiri uandakuechani jataaspti: ambe enga Esekieli jatsipka para aianguani eskaksï úkuarhinchapiringa imeecha engaksï no kurhandireenga ka engaksï iauanisï pánhapka (Ezeq. 2:7). Inde uandakuechaksï roiurhu tátsepani ka orhepani karakata jarhaspti.
13. ¿Ambe arhispi Tata Diosï Jeoba Esekielini eska úpiringa roiu jingoni, ka andisï tépi?
13 Tata Diosï Jeoba arhispti imeeri profetani: “A roiuni […] ka uiniarantsï indeni jingoni”. Esekieli kurhajchaspti ka iámu arhaspti. ¿Ambe arhikuekasïreeni i ambe? Eska Esekieli jatsispka para sési kurhanguni ambe enga jatsipka para uandantani. Ima jatsispti para jakajkuni indeni uandakuani para ísï úni mintsita jingoni aianguani. Tátsekua úkuarhispti ambe ma enga ísku pakatapka. Esekieli exespti eska roiu ʻxáni téspka eska tékolmenaʼ (Ezeq. 3:3). ¿Andi? Jimboka para ima, aianhpini ambe enga Tata Diosï Jeoba uandapka, kʼéri kóntperata máespka, ísïispti komueska tékua ambe o eska ambe ma enga kánikua sési pʼikuastpejka (Sal. 19:8-11). Kánikua agradesidu jarhaspti enga Tata Diosï erakupka paraka imeeri profeteepiringa.
14. ¿Ambe jarhuataspi Esekielini para listu jarhani ka para úni kʼamarhukuni imeeri ánchikuarhitani?
14 Tátsekua Tata Diosï Jeoba arhispti Esekielini: “Kurhaa ka jiókuarhi chiiti mintsitarhu iámindu uandakuechani engakeni arhijka” (Ezeq. 3:10). Ini ambe jingoni, Tata Diosï arhixapti eska jánguarhintapiringa miántani ambe enga arhienga roiurhu ka eska eratsentapiringa indeni ambe. I ambe úpirindi eska Esekieli sánderu mintsikapiringa Tata Diosïni ka eska sési mítetini japiringa na enga xáni jukaparhakuepka ima ambe enga aianguapiringa kʼuiripuechani (Ezeq. 3:11). Enga Esekieli na sési kurhangupkia ka jakajkuni ambe enga Tata Diosï uandapka, listu jarhasptia para ueenani aianhpini ka úni imeeri ánchikuarhitani asta kʼamarhukuni (terukutanta je Salmo 19:14 jingoni).
TATA DIOSÏIRI UANDAKUA ÚSÏNDI ESKACHI SÁNDERU MINTSIKAAKA TATA DIOSÏNI
15. ¿Ambechi jatsiski para jiókuarhini juchaari mintsitarhu parachi seguiriini aianhpini?
15 Parachi seguiriini aianhpini, juchajtuchi jatsiska parachi seguiriini jurajkuni eskajtsïni Tata Diosïiri Uandakua jarhuataaka parachi sánderu mintsikani imani. Ísï jimbo, jatsiskachi para jakajkuni iámu juchaari mintsita jingoni ambe engajtsïni Tata Diosï Jeoba arhijka. Tata Diosï Jeobajtsïni iásï Bibliani jimbo uandajpasïndi. Peru, ¿ambechi uaa úni parachi seguru jarhani eskajtsïni Tata Diosïiri Uandakua seguirixaka jarhuatani juchaari eratsekuecha, pʼikuarhinhikuecha jingoni ka imani ambe jingoni engachi uéjka úni?
16. ¿Ambechi uaa úni parajtsïni Tata Diosïiri Uandakua mintsitarhu niáracheni?
16 Engachi tʼirejka ka engajtsïni inde tʼirekua incharhijka, juchaari kuerpu sánderu uiuinhasï jarhasïndi. Ka sáno májkueni, engachi arhintajka Tata Diosïiri Uandakuani ka eratsentani indeeri ambe, sánderuchi mintsikasïnga Tata Diosïni. Inde ambejtsïnisï jorhendajti roiueri jánhaskakua. Tata Diosï Jeoba uékasïndi eskachi “uiniarhantaaka” imeeri uandakua jingoni ka eskachi kurhanguaka ambe engajtsïni uéjka arhini. Ka uaakachi indeni ambe úni engachi kómarhiaka Tata Diosïni, engachi arhintaaka imeeri Uandakuani ka engachi eratsentaaka ambe engachi arhintaaka. Orheta, jatsiskachi para kómarhini paraka juchaari mintsita listu jauaka para jiókuarhini ambe enga Tata Diosï eratsejka. Tátsekua arhintani ma parti Biblieri ka anhaxurhini parachi iatsitakuarhu eratsentani ambe engachi arhintakia. ¿Nénajtsïni marhuachea ísï úni? Engachi sánderu eratsentaaka, sánderuchi kurhanguaka Tata Diosïiri Uandakuani ka mintsitarhujtsïni niáracheati.
17. ¿Andisï xáni jukaparhakue eskachi eratsentaaka ambe engachi arhintajka Bibliarhu?
17 ¿Andisï xáni jukaparhakue eskachi arhintaaka Bibliani ka eskachi eratsentaaka? Jimboka engachi ísï úska jatsiakachi uinhapikua engachi uétarhinchajka parachi úni uandantani Reinueri ambe iásï ka sánderu orhepatini jamberi uandantani ambe engaksï úkuarhinchaaka imeecha engaksï no kurhajchaaka Tata Diosïni. Ístu, engachi eratsentajka sési járhati kualidadiichani enga Tata Diosï Jeoba jatsiaka, sánderuchi sési pájperasïnga imani jingoni. Ka ini ambe jimbo, uaakachi ambakiti ambe jatsini: pínandikua ka sési pʼikuarherakua (Sal. 119:103).
JU JE NO KUATANTANI
18. ¿Ambeksï jatsia para jiókuarhini kʼuiripuecha engaksï jimeesïsï irekaka engachi aianhpijka, ka andi?
18 Juchachi no profeteeska ísï eska Esekieli, peruchi jatsiska Tata Diosïiri Uandakuani, Bibliani. Ka eratsetixakachi seguiriini aianhpini astaka Tata Diosï Jeoba uandaaka eskachi nóteru aianhpiakia. Enga na niárakia ima tiempu enga Tata Diosï Jeoba jusgariuauaka kʼuiripuechani engaksï jimeesïsï irekaka engachi aianhpijka, nóksï uaati uandani eskaksï no aiangunhaska o eska Tata Diosï no miáuaska (Ezeq. 3:19; 18:23). Sánderu sési, jatsiatiksï para jiókuarhini eska ambe engachi aianhpienga Tata Diosïni jimboespka.
19. ¿Ambejtsïni uinhaperantaa parachi no kuatantani aianhpini?
19 ¿Ambejtsïni jarhuataa no kuatantani aianhpini? Ima mismu tanimu ambe enga jarhuatapka Esekielini: seguirisïngachi aianhpini jimbokachi míteska eska Tata Diosï Jeobajtsïnisï axajka, ístu jimbokajtsïni espiritu santu uinhaperantasïnga ka jimbokajtsïni Tata Diosïiri Uandakua jarhuatasïnga parachi sánderu mintsikani Tata Diosïni. Ka Jeobaeri jarhuajperata jingoni, eratsetixakachi no kuatantani aianhpini ka tekaantani “asta k’amarhutani jamberi” (Mat. 24:13).
PIREKUA 65 Jánguarhinta sési jarhani Jeobani jingoni
a Ini jorhenguarhikua jimbo, tanimu ambechi exeni jauaka enga jarhuatapka profeta Esekielini paraka úpiringa aianhpini ambe enga Tata Diosï arhipka. Exeni na enga Tata Diosï jarhuatapka imani uaati eskachi sánderu mintsikaaka eskajtsïni Tata Diosï Jeoba ístu jarhuataaka juchantsïni parachi seguiriini aianhpini.