SEMANA 46
Tata Diosï Jeobajtsïni jarhuatasïndi tsípikua jingoni tekaantani
“Tata Diosï Jeoba tekaantskua jingoni erokuarhixati paraksïni kóntperatechani íntskuani, ka jauaraati paraksïni pʼamojperakua xarhatacheni” (IS. 30:18).
PIREKUA 3 Jeoba, tʼuri jíndeni jingoni jarhaska
AMBE ENGACHI EXEAKA a
1, 2. a) ¿Ambechi exeni jaua ini jorhenguarhikua jimbo? b) ¿Nénachi míteski eskajtsïni Tata Diosï Jeoba uékasïnga jarhuatani?
TATA Diosï Jeobajtsïni uaati jarhuatani parachi tekaantani engachi uandanhiateechani jatsiauaka ka parachi tsípikua jingoni marhuakuni. Ini jorhenguarhikua jimbo, exeni jauakachi ambe enga újka Jeoba parajtsïni jarhuatani ka na engachi uaaka marhuatani ambe enga xáni úrajka ima parajtsïni jarhuatani. Joperu antesi ju je mókuntani arini kurhamarhikuani “¿Merujtsïni uékasïni jarhuatani Tata Diosï Jeoba?”.
2 Parachi exeni mókuntskuani, ju je exeni uandakuani ma enga apostoli Pablu úrapka enga Ebreu uandariichani karakuapka. Ima karaspti: ‘Tata Diosï Jeoba jindeesti juchiiti jarhuajpiri, ísï jimbo ji no sáni chéaka ambe engajtsïni kʼuiripuecha uékaaka úchini’ (Ebr. 13:6). Máru diksionariuecha engaksï Biblieri ambe uandajka, uandasïndiksï eska inde uandakua enga ísï tradusirikuarhijka “jarhuajpiri”, ini bersikulu jimbo, imani kʼuiripuni arhikuekasïndi enga uiriipajka jarhuatani nemani enga jarhuajperata kurhajkuarhini jarhajka. Eranhaska je Tata Diosï Jeobani uiriipani jarhani para jarhuatani nemani enga kʼéri uandanhiata ma jatsika. I ambe xarhatasïndi eskajtsïni Tata Diosï Jeoba no solu uékasïnga jarhuatani sino eska iámu imeeri mintsita jingoni uékasïnga ísï úni. Enga Tata Diosï Jeoba juchantsïni jingoni jauaka, uaakachi tekaantani tsʼéjkukuechani ka seguiriini tsípikua jingoni irekani.
3. Tata Diosï Jeoba, ¿ambe tanimu ambe úsïni parajtsïni jarhuatani tsípikua jingoni tekaantani?
3 ¿Nénajtsïni jarhuatasïni Tata Diosï Jeoba parachi tsípikua jingoni tekaantani? Libru de Isaías jimbochi exentasïnga mókuntskuani. Uánikua profesiecha enga Isaíasi karaaka Tata Diosïni jimbo ambakiti ambeksï uandasïndi para iásï anapu Tata Diosïiri marhuariicha. Ístu, uánikua uelta Isaíasi uandasïndi na enga jásïika Tata Diosï Jeoba, uandakuechani úrapariani engaksï no úkua jukaka para kurhanguni. Pori ejemplu, kapitulu 30 jimbo, sési jásï ambe jingoni terukutantasïndi para xarhatani na enga Tata Diosï Jeoba jarhuatajka imeeri iretani. Jima uandasïndi eska Tata Diosï Jeoba 1) kurhauasïnga ka mókuantani juchaari kómarhikuechani, 2) eskajtsïni arhistachisïnga ka 3) eskajtsïni újchakurasïnga iásï ka sánderu orhepatini. Ju je exeni ini tanimu ambe.
TATA DIOSÏ JEOBAJTSÏNI KURHAJCHASÏNDI
4. a) ¿Ambe uandaspi Tata Diosï Jeoba judiuecheri engaksï Isaíasiiri tiempu jimbo irekapka, ka ambe jurajkuspi eskaksï úkuarhinchapiringa? b) ¿Ambe ambakiti ambe aianguaspi Jeoba judiuechani engaksï no jurajkupka imani? (Isaías 30:18, 19).
4 Ueenakuarhu Isaías kapitulu 30 jimbo, Tata Diosï Jeoba arhiaspti judiuechani chá “uájpeecha engajtsï no kurhandirajka” ka arhiaspti eskaksï ʻsánderu pekadu úxapkia eska antesiʼ. Ka ístu uandaspti: “Ireta[jtsï] máeska enga no kurhandirajka” ka nójtsï uékasïnga “kurhaani Tata Diosï Jeobaeri juramukuani” (Is. 30:1, 9). Engaksï ísï no kurhandirapka, Isaíasi uandarixaptia eska Tata Diosï Jeoba jurajkupiringa eskaksï kánikua no sési ambe úkuarhinchapiringa (Is. 30:5, 17; Jer. 25:8-11). Ka ísïksï úkuarhinchaspti, jimbokaksï babiloniuecha iauanisï paaspka. Joperu jarhasptiksï máru judiuecha engaksï no jurajkupka Tata Diosïni, ka profeta Isaíasi ambakiti ambe jatsispti para aianguani: ma jurhiani Tata Diosï Jeoba ménderu jaiapanheantapirindi (arhinta je Isaías 30:18, 19). Ka inde uandakuechaksï niáraspti ísï úkuarhini. Tata Diosï Jeoba petaantaspti Babilonia uératini, joperu no jirejiresï. Uandakuecha “Tata Diosï Jeoba tekaantskua jingoni erokuarhixati paraksïni kóntperatechani íntskuani”, arhikuekasïreendi eska nitamapiringa ma tiempu ante de Tata Diosï petaantani judiuechani engaksï no jurajkupka imani. Ka ísï úspti, 70 uéxurhini nitamaspti paraka Tata Diosï Jeoba jurajkuapiringa máru judiuechani eskaksï kʼuanhatsentapiringa Jerusaléni (Is. 10:21; Jer. 29:10). Engaksï imeecheeri echeri jimbo kʼuanhatsentapkia, nóteruksï uerasptia ísï eska jiáni engaksï iauanisï pánhapka, iásïksï uerasïreendia peru jimbokaksï sési pʼikuarherasïreengia.
5. Eska na uandajka Isaías 30:19, ¿ambeerichi uaa seguru jarhani?
5 Iásïjtujtsïni i uandakuecha kánikua uinhaperantasïndi: “Engari uinhachaaka para jarhuajperata kurhajkuarhini, imakeni pʼamojkuati” (Is. 30:19). Isaíasi arhisïndijtsïni eska Tata Diosï Jeoba jingontku kurhauaka juchaari kómarhikuechani ka eska sóntku mókuantauaka. Profeta ístu uandasïndi: “Imakeni jirejiresï mókuchintaati engakeni kurhajchaaka”. I uandakuechajtsïni miátantasïndi eska juchaari Taati no solu uékasïnga jarhuataani imeechani engaksï jarhuajperata kurhakujka, sino eska mintsita jingoni uékasïnga jarhuataani. ¿A no eska míteni ini ambe jarhuatasïngajtsïni tsípikua jingoni tekaantani?
6. Eska na uandajka Isaíasi, ¿néna kurhauasïni Tata Diosï Jeoba juchaari kómarhikuechani?
6 Ístujtsïni i bersikulu xarhatachesïndi eska Tata Diosï Jeoba jingontku kurhauasïnga juchaari kómarhikuechani. ¿Andichisï ísï uandajki? Ueenani jámani Isaías kapitulu 30 jimbo, Jeoba uandasïndi “chá”, jimboka iámindu iretanisï arhini jaka. Joperu bersikulu 19 jimbo uandasïndi “tʼu”, jimboka mándani imeeri marhuarinisï arhikuekani jaka. Isaíasi uandasïndi: “tʼuri meru nóteru ueraakia”, “imakeni meru pʼamojkuati”, ʻimakeni mókuchintaatiʼ. Jimboka Tata Diosï Jeoba, Taati máeska enga kánikua uékpitiika, enga imeeri uájpa ma komu pʼikuarherani jarhajka, ima no arhisïndi: “Jatsiskari para ísï uinhapitiini eska chiiti ermanu”. Sánderu sési, uandanhiasïndi juchantsïni jimbo ka mándani arhintsïni kurhajchasïndi engachi kómarhijka (Sal. 116:1; Is. 57:15).
¿Ambe arhikuekaspi Isaíasi enga uandapka eskachi no jurajkuaka eska Tata Diosï Jeoba mintsikuarhiaka? (Exe je párrafu 7).
7. ¿Néna xarhatasïni Isaíasi ka Jesúsi eska kánikua jukaparhakueska no kuatantani kómarhini?
7 Engachi kómarhijka juchaari Tata Diosïni ambe máeri engachi uandanhiani jarhajka, jamberi imajtsïni orheta uinhaperantaati parachi úni tekaantani indeni uandanhiatani. Joperu engachi no jurajkuska uandanhiani ísï eskachi na uékapiringa, jamberichi jatsiaka para uánikua uelta kómarhini parakajtsïni íntskuaka uinhapikua parachi úni tekaantani. Ka ima mismujtsïni arhisïndi eskachi indeni ambe uaaka. Ka Isaíasijtsïni pʼímarhisïndi: “Asï jurajku je eska ima mintsikuarhiaka”, para Tata Diosï Jeobani arhikuekani (Is. 62:7). ¿Ambe arhikuekasïni i ambe? Eskachi no kuatantaaka kómarhini imani, i ambe arhikuekasïndi no jurajkuni eska Tata Diosï Jeoba mintsikuarhiaka. I ambejtsïni miátantasïndi ambe ma enga tata Jesukristu uandapka kómarhikueri ambe ixú Lukasʌ 11:8-10, 13 jimbo. Úrapariani uánikua ejempluechani, pʼímarhisptijtsïni parachi méntku kómarhini jarhani no kuatantaparini, ka seguiriini espiritu santu kurhakuni. Ístuchi uaaka kurhakuni Tata Diosï Jeobani eskajtsïni arhistachiaka parachi imani ambe erakuni úni enga sési jaka.
TATA DIOSÏ JEOBAJTSÏNI ARHISTACHISÏNDI
8. ¿Nénaksï niáraspi ísï úkuarhini uandakuecha engaksï Isaías 30:20, 21 jimbo jaka?
8 (Arhinta je Isaías 30:20, 21). Babilonia anapu ejersitu uirhipandaspti Jerusalénini ma uéxurhini ka terujkani. Imani tiempu jimbo, judiuechaksï kánikua komu nitamakuarhispti, xánksï uánikua uandanhiateechani jatsiaspti engaksï ísïipka komueska kurhinda ka itsï enga pauani pauani uétarhijka. Joperu bersikulu 20 ka 21 jimbo, Tata Diosï Jeoba aiakuaspti eska pʼímutantaapiringa engaksï moántapiringa ka ménderuksï sési jámani. Isaíasi uandaspti eska Tata Jeoba jindeeska imeeri ireteeri sánderu “Ambakiti Jorhentpiri” ka eska jorhendaapiringa parakaksï ísï kómarhipiringa eska ima na uékajka. I uandakuechaksï niáraspti ísï úkuarhini engaksï judiuecha petanhantapka Babilonia uératini. Tata Diosï Jeoba xarhataspti eska ima jindeespka imeecheeri sánderu Ambakiti Jorhentpiri. Jimboka ima arhistakuaspka, judiuechaksï úspti ménderu ísï kómarhini eska ima na jaiapanhintajka. Ini jurhiatikuechani jimbo, Jeoba ístu jindeesti juchaari sánderu Ambakiti Jorhentpiri ka inde ambe úsïndi eskachi kánikua sési pʼikuarheraaka.
9. ¿Nénajtsïni arhistachisïni Tata Diosï Jeoba iásï?
9 Kʼéri kóntperata máesti eskajtsïni Tata Diosï Jeoba jorhendaaka. Ini bersikuluecha jimbo, Isaíasijtsïni terukutantasïndi máru jorhenguarhiricha jingoni enga Tata Diosï Jeoba tsimani ambe jásï jorhendaajka. Orheta, Isaíasi uandasïndi: “Exeakari chiiti Ambakiti Jorhentpirini chiiti éskuecha jingoni”. Ini ejemplu jimbo, jorhentpiri imeeri jorhenguarhiricheri orhepani jimbo jarhasti. ¿Nénajtsïni jorhendasïni Tata Diosï Jeoba iásï? Imeeri kúnguarhikuani úraparini. Kánikuachi agradesidu jarhaska engajtsïni xáni ambakiti ambe jorhendajka imeeri kúnguarhikua, úrapariani tánguarhikuechani, kʼéri tánguarhikuechani, publikasionichani, programeechani engaksï JW Broadcasting® jimbo jaka ka uánikua máteru ambe jingoni. Iámindu i ambejtsïni jarhuatasïndi tsípikua jingoni tekaantani engachi no sési nitamakuarhini jauaka.
10. ¿Nénachi kurhaasïni Tata Diosïiri uandakuani enga ísïika enajkijtsïni tátsepani uératini uandajpani jaki?
10 Isaíasi uandasïndi máteru ambe enga Tata Diosï Jeoba úrajka parajtsïni jorhendani, uandasïndi: “Chiiti kutsïkuechandi jimbo kurhauaka arini uandakuechani chiiti tátsepani jimbo”. Iásï profeta uandasïndi eska Tata Diosï Jeoba jorhentpiri máeska enga imeeri jorhenguarhiricheri tátsepani jimbo nirani jaka para arhiani nani engaksï ísï niuaka. ¿Nénachi kurhaasïni iásï Tata Diosïiri uandakuani enga ísïika enajkitsïni tátsepani uératini uandajpani jaki? Engachi Bibliani arhintajka. Jimbokaksï ióntki ixú karanhaska Tata Diosïiri uandakua. Ísï jimbo, engachi arhintajka ísïipirindi enajkichi kurhaani japiringa Tata Diosï Jeobaeri uandakuani juchaari tátsepani jimbo (Is. 51:4).
11. ¿Ambechi jatsiski para úni parachi tsípikua jingoni tekaantani, ka andi?
11 ¿Ambechi jatsiski para úni parachi úni marhuatani ambe engajtsïni Tata Diosï Jeoba arhijka imeeri kúnguarhikua jimbo ka Bibliarhu? Isaíasi tsimani ambe uandasïndi. Orheta uandasïndi “I jindeesti xanharu”, ka tátsekua, “Jimini jáma” (Is. 30:21). Ísï jimbo no solu uétarhisïndi míteni “xanharuni”, ístuchi jatsiska para jima jámani. Biblia jimbo ka ambe engajtsïni Tata Diosïiri kúnguarhikua jorhendajka, mítesïngachi ambe enga Tata Diosï Jeoba uéjka eskachi uaaka ka néna engachi uaaka ísï úni eskachi na jorhenguarhijka. I tsimani ambejtsïni jarhuataati parachi tsípikua jingoni tekaantani engachi Tata Diosï Jeobani marhuakujka. Soluchi ísï uaaka seguru jarhani eskajtsïni ima újchakuraaka.
TATA DIOSÏ JEOBAJTSÏNI ÚJCHAKURASÏNDI
12. Eska na arhijka Isaías 30:23-26, ¿néna újchakurapirini Tata Diosï Jeoba imeeri iretani?
12 (Arhinta je Isaías 30:23-26). ¿Néna niáraspi ísï úkuarhini i profesia ióntki? Judiuecha engaksï kʼuanhatsentapka Babilonia uératini uánikua kóntperatechaksï intsïnhaspti, enga jarhuatapka paraksï sési irekani ka Tata Diosïni marhuakuni. Tata Diosï Jeoba kánikua tʼirekua íntsaaspti. Joperu jarhaspti ambe ma enga sánderu jukaparhakuepka. Sánderu jorhendaxapti parakaksï sánhani arhipiringa ísï kómarhini eska ima na jaiapanhintajka. Tata Diosïiri ireta no méni xáni uánikua kóntperatechani jatsiaspti eska jiáni. Eska na arhijka bersikulu 26, Jeoba úspti eskaksï niárapiringa kurhanguni imeeri Uandakuani (Is. 60:2). Indeni kóntperatecha jimbo, imeeri ireta sési pʼikuarherasïreendi ka uinhapiti jarhaspti para seguiriini imani marhuakuni. Imeechaksï kánikua sési pʼikuarherasïreendi (Is. 65:14).
13. Ini jurhiatikuechani jimbo, ¿néna úkuarhixaki profesia enga uandajka eska ísï kómarhinhapiringa Tata Diosï eska ima na uékajka?
13 Ini jurhiatikuechani jimbo, ¿úkuarhixaki eska na uandenga profesia eska Tata Diosï ísï kómarhinhapiringa eska ima na uékajka? Jo. Desde 1919 uératini, uánikua kʼuiripuechaksï jurajkustia Kʼéri Babiloniani engaksï iámindu relijioni no jurhimbitiicheeka engaksï ini parhakpinirhu jaka. Ka i kʼuiripuechaksï pánhastia lugari ma jimbo enga sánderu sési jaka eska ima Echeri engaksï israeliteecha Aiaminhapka, enga jindeeka: nani engachi sési ka májku kʼéri kómarhijka Tata Diosï Jeobani (Is. 51:3; 66:8).
14. ¿Náki kóntperateechanksï jatsiaski erakukateecha ka “máteru karichicha” enga kánikua sési pʼikuastaajka ka ambechi jatsiski para úni parachi ini kóntperateechani jatsiani?
14 Desde 1919 uératini, erakukateechaksï kánikua sési pʼikuarherasïndi májku kʼéri kómarhini Tata Diosï Jeobani ka ísï eska ima na uéjka. Tiempu jingoni, ima kristianuecha engaksï erokani jaka Echerirhu irekani, engaksï jindeeka “máteru karichicha”, ístuksï úxati sési marhuakuni Tata Diosïni ka erakukateecha jingoni kánikua ambeksï jorhenguarhisïndi Tata Diosïiri ambe. Nóksï jorhenguarhisïndi chkuanderakua ambe relijioni no jurhimbitiicheri ka tsitisïndiksï aianhpini Tata Diosïiri Reinueri ambe. Iáminduechachi sési pʼikuarherasïnga sési pájperani Tata Diosï Jeoba jingoni, juchaari erachiicha ka pirenchicha jingoni engajtsïni jarhuatajka tsípikua jingoni tekaantani engachi uandanhiateechani jatsiajka. Niárasïngachi iámindu ini ambe jatsini engachi ueenajka marhuakuni Tata Diosï Jeobani ísï eska ima na uéjka ka engachi jánguarhintajka na engachi xáni uaaka para májkueni úni eska ima (Juanu 10:16; Is. 25:6; 65:13).
15. ¿Nanichi uaa sési ka májku kʼéri kómarhini Tata Diosï Jeobani?
15 Ini jurhiatikuechani jimbo, ¿nanichi uaa sési ka májku kʼéri kómarhini Tata Diosï Jeobani? Jimbokachi interu parhakpinirhu jarhaska Tata Diosï Jeobaeri marhuariicha, nani uéjkichi irekani, uaakachi méntkisï sési ka májku kʼéri kómarhini Tata Diosïni engachi iámu mintsita jingoni apoiariska jurhimbiti kómarhikuani.
¿Ambechi uaa úni mándani jucha parachi sánderu sési ka májku kʼéri kómarhini Tata Diosï Jeobani? (Exea je párrafuechani 16 ka 17).
16. ¿Ambechi uaa úni parachi seguiriini jarhani exeni na enga xáni sésiika májku kʼéri kómarhini Tata Diosï Jeobani?
16 Ma ambe engachi uaaka úni parachi seguiriini sési ka májku kʼéri kómarhini Tata Diosï Jeobani, jindeesti eskachi jukaparharaaka kúnguarhikuani enga interu parhakpinirhu jaka. ¿Nénachi uaa ísï úni? Engachi sési ambe exekuaska imeechani engaksï kúnguarhikuarhu jaka ka no imani ambe engaksï no sési újka (Juanu 17:20, 21). ¿Andisï xáni jukaparhakue eskachi indeni ambe uaaka? Ju je exeni ejemplu ma. Sési jásï juáta ma jimbo mámaru járhati anhatapuechaksï jarhasti. Májkueni, kúnguarhikuarhu engachi sési ka májku kʼéri kómarhijka Tata Diosï Jeobani, mámaru járhati kʼuiripuechaksï jarhasti engaksï ísïika komueska anhatapuecha (Is. 44:4; 61:3). Ju je no jurajkuni eskaksï ima “anhatapuecha” engaksï no xáni sési járhaka uaaka eskachi no exeaka na enga xáni sési jáxeka “juáta”. I ambe arhikuekasïndi, eskachi no jurajkuaka eska ima ambe engachi jucha o juchaari erachiicha no sési újka, uaaka eskachi no exeaka na enga xáni sésiika Jeobaeri kúnguarhikuarhu jarhani ka májku kʼéri.
17. ¿Ambechi uaa úni mándani jucha parachi sánderu májku kʼéri jarhani kúnguarhikuarhu?
17 ¿Ambechi uaa úni parachi sánderu márku úkuarhintatini jarhani? Ju je jánguarhintani parachi iáminduecha sési pájperani (Mat. 5:9; Rom. 12:18). Engachi jánguarhintajka jucha ueenani sési pájperani kúnguarhikuarhu anapu erachiicha jingoni, sánderuchi sési ka májku kʼéri kómarhisïnga Tata Diosï Jeobani. Ju je no mirikurhini eska Tata Diosï Jeobasï úka eskaksï iámindu imeecha engaksï sési ka májku kʼéri kómarhijka imani pímbinhasï kómarhikuarhu jauaka (Juanu 6:44). Eranhaska je na enga xáni sési pʼikuarherajka Tata Diosï enga exejka eskachi imeeri marhuariicha jánguarhintasïnga sánderu sési pájperani ka májku kʼéri jarhani, jimboka para ima iáminduechachi kánikua jukaparhakueska (Is. 26:3; Ageo 2:7).
18. ¿Ambechi jatsiski para méntku eratsentani jarhani, ka andi?
18 ¿Ambechi uaa úni parachi sánderu marhuatani kóntperatechani engajtsïni Tata Diosï Jeoba íntskuajka? Ju je iatsitakuarhu eratsentani ambe engachi jorhenguarhijka Bibliarhu ka juchaari publikasionicharhu. Ístu, engachi jorhenguarhiska ka eratsentani, niáraakachi sési járhati kualidadichani jatsiani engajtsïni jarhuataaka parachi ‘uékperani máteru ka máteruni jingoni eska májku ermanuecha’ kúnguarhikuarhu (Rom. 12:10). Engachi eratseantajka kóntperatechani engachi iásï jatsiaka, sánderuchi sési pájperaaka Tata Diosï Jeobani jingoni. Ka engachi eratseantajka kóntperatechani engajtsïni Tata Diosï Jeoba íntsauaka sánderu orhepatini, jarhuatasïndijtsïni parachi miáni jarhani eskachi uaaka marhuakuni imani para méntkisï. Iámindu i ambe jarhuataatijtsïni parachi kánikua tsípikua jingoni marhuakuni Tata Diosï Jeobani.
JU JE SEGUIRIINI TEKAANTANI
19. a) Eska na arhijka Isaías 30:18, ¿ambeerichi uaa seguru jarhani? b) ¿Ambejtsïni jarhuataa parachi seguiriini tsípikua jingoni tekaantani?
19 Jeoba “jauaraati” parajtsïni jarhuatani jiáni enga kʼamajkuaka ini parhakpinini enga xáni no sési jaka (Is. 30:18). Jimboka ima “Tata Diosï máeska jurhimbikueri”, seguruchi jarhaska eska no jurajkuaka eska Satanásiiri parhakpini seguiriuaka ióni jamberi jarhani (Is. 25:9). Tata Diosï Jeoba ka ístu jucha, tekaantskua jingonchi erokuarhixaka eska niáraaka ima jurhiatikua engachi pʼímutanhantaaka. Enga jamberi niáraaka i jurhiatikua, ju je jukaparharani kóntperatani engachi jatsika para kómarhini, para jorhenguarhini Biblieri ambe ka ísï úni eskachi na jorhenguarhijka, ka eratseantani juchaari kóntperatechani. Engachi seguiriska ini ambe úni, Tata Diosï Jeobajtsïni jarhuataati parachi tekaantskua ka tsípikua jingoni marhuakuni.
PIREKUA 142 Ju je tsípikua jingoni erokuarhini
a Ini jorhenguarhikua jimbo, tanimu ambeerichi uandani jauaka enga Jeoba újka para jarhuataani imeeri marhuariichani tsípikua jingoni tekaantani engaksï uandanhiateechani jatsiauaka. Para ísï úni, exeni jauakachi kapitulu 30 libru de Isaías. I jorhenguarhikua miátantaatijtsïni na enga xáni jukaparhakueka kómarhini Tata Diosï Jeobani, jorhenguarhini imeeri Uandakueri ambe ka eratseantani imani kóntperatechani engachi iásï jatsiaka ka engachi sánderu orhepatini jatsiauaka.