SEMANA 45
PIREKUA 138 Tʼupuntsïkua, korona máesti enga sési xarharajka
Ambechi jorhenguarhisïni ima ambeeri engaksï máru achamasïicha uandapka
“¿A no eskaksï jatiriicha jánhaskatiisïnga? ¿Ka a no eska imeecha engaksï ióni irekakia úsïnga sési kurhanguni ambe ma?” (JOB 12:12).
AMBE ENGACHI JORHENGUARHIAKA
Engachi kurhajchaaka Tata Diosï Jeobani, sésijtsïni nicheati ka niáraakachi jatsini tsípikua para méntkisï.
1. ¿Andichisï uaa uánikua ambe jorhenguarhini imeecheeri ambe engaksï jatiriikia?
IÁMINDUECHACHI uétarhinchasïnga eskajtsïni nema jarhuataaka exeni ambechisï uaa. Ka kúnguarhikuarhu anapu orhejtsïkutiicha ka máteru kristianuecha engaksï eratsekua jukariika, uaatijtsïni kánikua jarhuatani. Ka nájkirukaksï indeecha iauani sánderu jatiriikia eska jucha, nóchi jatsiska para jirejiresï eratseni eskajtsïni indeecheeri konsejuecha no marhuacheaka. Sánderu sési, Tata Diosï Jeoba uékasïndi eskachi uánikua ambe jorhenguarhiaka indeecheeri ambe engaksï jatiriikia. Indeechaksï sánderu ióni irekastia eska jucha jimboksïsï sánderu uánikua ambe mítetia, sésiksï kurhangusïndi ambe ma ka jánhaskatiistiksï (Job 12:12).
2. ¿Ambechi exea ini jorhenguarhikua jimbo?
2 Ióntki, Tata Diosï Jeoba ambakiti acheetiichani úraaspti, komu Moisésini, Dabidini ka apostoli Juanuni para uinhaperantani imeeri iretani ka para orhejtsïkuni. Íksï tanimu achamasïicha no májku tiempu jimbo irekaspti ka ístuksï mámaru járhati asignasionichani jatsiaspti. Ka ante deksï uarhini, ambarhati konsejuechanksï íntskuaspti imeechani engaksï sánderu sapichku japka. Moisési, Dabidi ka apostoli Juanu, xarhatasptiksï na enga xáni jukaparhakueka kurhajchani Tata Diosï Jeobani, ka Tata Diosï úspti eskaksï imeecheeri konsejuecha karakata pakarapiringa parajtsïni jarhuatani. Ísï jimbo, na uéjkichi sapichku jarhani ochi jatiriinia, imeecheeri konsejuechajtsïni kánikua jarhuataati (Rom. 15:4; 2 Tim. 3:16). Ini jorhenguarhikua jimbo, exeakachi ambe engaksï inde tanimu achamasïicha uandapka ante deksï uarhini, ka ístuchi exeaka ambe engachi jorhenguarhijka.
CHÁJTSÏ IÓNI IREKAAKA
3. ¿Moisési néna marhuakuspi Tata Diosïni ka ireta Israelini?
3 Moisési kánikua sési marhuakuspti Tata Diosï Jeobani. Ima profeta máespti, jusgariuasïreendi kʼuiripuechani, karari máespti ka ístu orhejtsïkuspti ireta Israelini. Indeni ambe jimbo, ima niáraspti uánikua ambe míteni. Jiáni engaksï israeliteecha Ejiptu uéakuntapka, Moisési orhejtsïkuaspti. Ístu, ima exeaspti uánikua milagruechani enga Tata Diosï Jeoba uaapka. Ka Tata Diosï úraspti Moisésini paraka ima karaapiringa sinko libruechani engaksï Bibliarhu anapueka, Salmo 90 ka peeka Salmo 91. Ístu, xarharasïndi eska ima karaska libruni enga Job arhinhajka.
4. ¿Neechani uinhaperaantaspi Moisési ka andi?
4 Jiáni enga Moisési 120 uéxurhini jatiripkia ka ante de uarhini, tánaantaspti iámindu israeliteechani ka miátaantaspti ambe engaksï xáni exepka ka nitamakuarhini. Ka máru israeliteechaksï sapichku jarhaspti jiáni enga Tata Diosï Jeoba milagruechani uaapka ka enga kastigariuapka Ejiptu anapuechani (Éx. 7:3, 4). Ístuksï exespti na enga Tata Diosï arhukupka mari Charhapitini paraksï imeecha jimeesïsï nitamani ka na enga kʼamajkupka faraonini ka imeeri sondaduechani (Éx. 14:29-31). Ka engaksï israeliteecha na desierturhu japkia, ístuksï exespti na enga Tata Diosï Jeoba kuájchakuapka ka kuidariuani (Deut. 8:3, 4). Ka engaksï na niárani japkia imani Echeri jimbo engaksï Aiaminhapka, Moisési jánguarhintaspti uinhaperaantani, ka i jindeepirindia últimu xanhari enga ísï úpiringa. a
5. ¿Ambe aianguaspi Moisési israeliteechani? (Deuteronomio 30:19, 20).
5 ¿Ambe arhiaspi Moisési? (Arhinta je Deuteronomio 30:19, 20). Israeliteechaksï niárapirindi kánikua sési irekuarhini. Imeechaksï ióni irekapirindi imani echeri jimbo engaksï aiaminhapka jimboka Tata Diosï Jeoba újchakuraapiringa. Jima kánikua sési jándespti ka úsïreendi mámaru jásï ambe tsikini. Moisési aianguaspti israeliteechani na enga jáxepka ima Echeri. Arhiaspti: “Indeni echeri jimbo, kʼérati ka sési járhati ireteechaksï jarhasti ka nóri tʼu uaaska, ísturi pʼiuauaka kʼumanchikuechani engaksï uinirini jaka sési jásï ambe, ka jarhakukataksï jarhastia posuecha, ka ístuksï jarhasti echeriicha engaksï ubasï ka olibu jukaka ka indeni amberi no tʼu ikaraska” (Deut. 6:10, 11).
6. ¿Andisï Tata Diosï jurajkupi eskaksï máteru ireteecha andaapiringa israeliteechani?
6 Moisési arhiaspti israeliteechani eskaksï jatsispka para kurhajchani Tata Diosïni paraksï úni irekani imani echeri jimbo. Arhiaspti eskaksï tsípikuani erakupiringa, ka ísïksï úpirindi engaksï kurhajchapiringa Tata Diosïni ka nóksï méni jurajkuni. Joperu imeechaksï no uékaspti kurhajchani, jimbosï Tata Diosï jurajkupti eskaksï Asiria anapuecha andaapiringa ka ístu Babilonia anapuecha ka iauanisïksï paani (2 Rey. 17:6-8, 13, 14; 2 Crón. 36:15-17, 20).
7. ¿Ambechi jorhenguarhisïni ima ambeeri enga Moisési uandapka? (Ístu exea je imajeniichani).
7 Jiájkani, jorhenguarhisïngachi eskachi jatsiska para kurhajchani Tata Diosïni parachi úni tsípiti pakarani. Ísï eskaksï israeliteecha na no ióni jimbo niárapiringia imani Echeri jimbo engaksï Aiaminhapka, juchajtuchi no ióni jimbo jimbanhi parhakpinirhu jauakia engajtsïni Tata Diosï aiachika, ka exeakachi na enga iámu Echeri paraisu máeuakia (Is. 35:1; Luk. 23:43). Jima, Satanási nóteru jauatia ka nijtu demoniuecha (Apok. 20:2, 3). Nóteru ma relijioni jorhentpiatia chkuanderakua ambe Tata Diosïiri (Apok. 17:16). Nijtuksï jaua juramutiicha engaksï no sési káuaka kʼuiripuechani (Apok. 19:19, 20). Tata Diosï méntku nóteru jurajkuatia eska kʼuiripu ma no sési ambe uaaka (Sal. 37:10, 11). Iáminduechaksï kurhajchaati Tata Diosïni, ísïksï uaati eska ima na juramuaka ka i ambe uaati eskachi májku kʼéri jauaka ka pínandikua jingoni, ka iáminduechachi xénchperaaka ka mintsinharperani (Is. 11:9). Kánikuachi ambakiti ambe erokuarhixaka, ¿no ísïiski? Joperu no inde ambejkuesti, engachi kurhajchaska Tata Diosï Jeobani, nóchi solu máru uéxurhinku irekaaka Paraisurhu, sino para méntkisï (Sal. 37:29; Juanu 3:16).
Engachi kurhajchaska Tata Diosï Jeobani, nóchi solu máru uéxurhinku irekaaka Paraisurhu, sino para méntkisï. (Exe je párrafu 7).
8. ¿Néna jarhuataspi misioneruni ma inde aiatsperakua enga jindeeka irekani para méntkisï? (Judasï 20, 21).
8 Náki uéjkichi tsʼéjkukua ma jatsini, nóchi méni jurajkuaka Tata Diosï Jeobani jimbokachi méntkisï miáuaka eskachi uaaka irekani para méntkisï (arhinta je Judasï 20, 21). Ambe engajtsïni Tata Diosï aiachika, jarhuataatijtsïni parachi méntkisï orhepani uérakuni tsʼéjkukua ma. Erachi ma enga ióni marhuaka komueska misioneru ma jini África, uánikua xanhari niáraspti tsʼéjkukua ma jatsini. I erachi uandantasïndi: “Engani kuenta íntskukuarhepka eskani úpiringa tsïtakuarhini indeni aiatsperakuani enga jindeeka irekani para méntkisï, ji kánikua jánguarhintaspka orhepani uérakuni indeni tsʼéjkukuani ka kómarhispka Tata Diosï Jeobani eskarini jarhuatapiringa. Ka jimbokarini ima jarhuataspka, úspka seguiriini sési marhuakuni ka juchiiti konsiensia sési jarhasti”.
IÁMINDU AMBEKINI SÉSI UÉRACHIATI
9. ¿Ambe xáni nitamakuarhispi Dabidi?
9 Dabidi ambakiti rei máespti, kústatiispti, profeteespti, nirasïreendi uarhipeni ka sési jásï ambe karasïreendi. Joperu niáraspti uánikua ambe nitamakuarhini. Ióni jámaspti sïpakuarhini paraka rei Saúli no ma ambe úkupiringa. Ka ménderu enga na reipkia, niraspti sïpakuarhini paraka imeeri uájpa Absalóni no uándikupiringa ka euakuarhini juramukuani. Ka nájkiruka xáni uánikua problemeechani jatsiapka ka ménisï imajtu no sési ambe úni, no méni jurajkuspti Tata Diosï Jeobani astaka uarhipka. Ka Tata Diosï uandaspti eska Dabidi achamasï máespka enga sési pʼikuasteenga imeeri mintsitani. Ísï jimbo, kánikua jukaparhakuesti eskachi jingontku exeaka ambe enga Dabidi uandapka (1 Rey. 15:5; Úku. 13:22).
10. ¿Andisï Dabidi konseju íntskupi Salomónini?
10 Tata Diosï Jeoba Salomónini erakuspti paraka templu ma úkupiringa ka paraksï kʼuiripuecha jima nirani kómarhini Tata Diosïni. Ka para jiánisï, Salomóni tumbi máespti (1 Crón. 22:5). Jamberi niárapirindi uánikua ambe jimbo úkua jukanchani jimboka no ióni jimbo reipiringia. Jimbosï imeeri taati jémba Dabidi konsejuechani íntskuapti. Ju je exeni ambe enga arhipka.
11. ¿Dabidi náki konseju íntskuspi Salomónini ka na xáni marhuakuspi? (Ístu exea je imajeniichani).
11 ¿Ambe arhispi Dabidi imeeri uájpani? (Arhinta je 1 Reyes 2:2, 3). Dabidi uandontskuarhekuspti ka arhispti eska kurhajchapiringa Tata Diosï Jeobani paraka sési nikupiringa ka paraka iámindu ambe sési uérakupiringa. Ka Salomóni uánikua uéxurhini ísï úspti (1 Crón. 29:23-25). Salomóni kánikua sési jásï templu ma úspti, karaaspti máru libruechani engaksï Bibliarhu jaka ka ístu máru ambe enga uandapka ístu karakata pakarasti Bibliarhu. Salomóni kánikua mítekateespti jimboka kánikua jánhaskatiispka ka uánikua ambe jatsikuarhespti (1 Rey. 4:34). Joperu ísï eska Dabidi na uandapka, Salomónini jiántkusï sési nikupirindi enga kurhajchapiringa Tata Diosï Jeobani, joperu ima no ísï úspti. Jiáni enga jatiriipkia, ueenaspti diosï úkateechani kómarhiani ka inde ambe úspti eska Tata Diosï nóteru jaiapanhentapiringa, jimbosï nóteru úptia sési juramuni ni jurhimbikua jingoni (1 Rey. 11:9, 10; 12:4).
Ambe enga Dabidi arhipka Salomónini, exerasïndijtsïni eska kánikua jukaparhakueska kurhajchani Tata Diosïni parajtsïni ima íntskuni jánhaskakua ka ísïchi ambakiti ambe erakuni úni. (Exea je párrafuechani 11 ka 12). b
12. ¿Ambechi jorhenguarhisïni ima ambeeri enga Dabidi uandapka?
12 Jiájkani, jorhenguarhisïngachi eskajtsïni sési nicheaka engachi méntkisï kurhajchaaka Tata Diosï Jeobani (Sal. 1:1-3). Ka nájkirukajtsïni Tata Diosï Jeoba no aiachini jaka eskajtsïni íntskuaka jatsikuarhekua ambe o eskachi niáraaka ísï kʼéri ambeeni eska Salomóni. Joperu kʼórujtsïni arhisïndi eska engachi kurhajchaaka, eskajtsïni jarhuataaka jánhaskani parachi ambakiti ambe erakuni úni (Prov. 2:6, 7; Sant. 1:5). Bibliarhu anapu karakateecha o prinsipiuecha, kánikuajtsïni jarhuatasïndi parachi exeni ambe sánderu sési jaua para ánchikuarhini, ambe jingonchi tsípikuarhia, o parachi no xáni jukaparharani sentabuni ka ístujtsïni jarhuatasïndi exeni sinchi estudiariua karrera ma o nómbe. Engachi kurhandiraska ka ísïchi úni eskajtsïni Tata Diosï Jeoba na arhistachijka, uaakachi irekani para méntkisï ka imajtsïni méntkisï jaiapanhentaati (Prov. 2:10, 11). Ístuchi jatsiauaka ambakiti amiguechani ka uaakachi tsípikua jingoni irekani juchaari familia jingoni.
13. ¿Ambe úspi Carmen paraka meru sési nikupiringa?
13 Carmen enga Mozambique anapueka, eratsesïreendi eska imani sési nikupiringa enga karrera ma estudiaripiringa, ka jimbosï nípti unibersidadirhu para arkitektura estudiariini. I pirenchi uandantasïndi: “Kánikua tsitisïreenga ambe engani jorhenguarhini japka, joperureni kánikua tiempu euasïreendi ka kánikua kuatarani. A las 7:30 inchasïreenga ka a las 6:00 uéntani, jimbosïni no káni ueenga nirani tánguarhikuecharhu ka ueenaspkia nóteruni mintsikani Tata Diosïni. Ji ménichani ísï pʼikuarherasïreenga enajkini tsimani patroniichani marhuakuani japi” (Mat. 6:24). Ju je exeni ambe enga úpka i pirenchi enga na kómarhipkia Tata Diosïni ka sánderu inbestigariini publikasioniicharhu. Pirenchi uandantasïndi: “Engajtsïni ambakiti erachiicha ka juchiiti naandi íntskuapka konsejuechani, ji sési eratsentaspka ka nóteruni niraspkia unibersidadirhu. Sánderu sési, ueenaspka tiempu kompletueri marhuakuni Tata Diosï Jeobani, ka inde ambe úspti eskani sánderuni ambakiti ambe erakupiringa úni ka no no sési pʼikuarherasïnga ambe engani erakuka”.
14. ¿Náki konsejuksï íntspispi Moisési ka Dabidi?
14 Moisési ka Dabidi xénchasïreendiksï Tata Diosï Jeobani ka sésiksï mítespti na enga xáni jukaparhakueka kurhajchani imani. Ante de Moisési uarhini, arhiaspti israeliteechani eskaksï májkueni úpiringa eska ima ka eskaksï no méni jámapiringa jurajkuni Tata Diosï Jeobani, ka Dabidijtu májkueni arhispti Salomónini. Íksï achamasïicha uandaspti eska Tata Diosï nóteru jaiapanheantapiringia imeechani engaksï jurajkupiringa ka nijtu íntskuani ambe enga aiakuapka. Ka ísï ióni jimbo, máteru Tata Diosïiri marhuari májkueni ambe uandaspti, xarhataspti eska kánikua jukaparhakueska kurhajchani Tata Diosïni ka no méni jurajkuni. Ambe engaksï i achamasïicha uandapka, ístujtsïni kánikua marhuacheati juchantsïni.
“NO MA AMBERINI XÁNI SÉSI PʼIKUASTASÏNDI”
15. ¿Ambe ka ambe exespi apostoli Juanu?
15 Juanu apostoli máespti enga Jesúsi kánikua uékeenga (Mat. 10:2; Juanu 19:26). Juanu nirasïreendi pámbeni Jesúsini enga ima aianhpini nireenga, exespti na enga milagruechani uaauenga, ka Jesúsi jingoni jarhaspti jiáni enga xáni no sési nitamakuarhini japka. Jima jarhaspti enga Jesúsi uándikunhapka ka exespti enga na tsíntapkia. Ístu, exespti na engaksï sánderu uánikua kristianuecha japkia kúnguarhikuarhu. Juanu exespti na enga ambakiti aianhperakua “iámu parhakpinirhu uandanhantapkia” (Kol. 1:23).
16. ¿Neechani jarhuataaskia ima karteecha enga Juanu karaapka?
16 Enga Juanu na tʼarhepipkia, intsïnhaspti sésikua para karani Tata Diosïiri uandakuani. Ima karasti ambe enga “tata Jesukristu mítetarpikia” (Apok. 1:1). Ístu karaspti Ebanjeliu ma enga imeeri nombri jukaka, ka últimu kartani, erachini ma karakuspti enga Gaiu arhinheenga. Ini erachini ísï exesïreendi komueska imeeri uájpa ma (3 Juanu 1). Para indeni tiempu jimboisï, jamberi uánikua kʼuiripuechani jarhuataaptia ka jimbosï ísï exeauendi komueska imeeri uájpeecha. Ambe enga karapka i achamasï enga jatiripkia, iásï jamberi seguiriixati kánikua jarhuataani Jesúsiiri chúxapatiichani.
17. Ísï eska 3 Juanu 4 na uandajka, ¿ambesï újki eskachi tsípikua jingoni irekaaka?
17 ¿Ambe karaspi Juanu? (Arhinta je 3 Juanu 4). Juanu karaspti eska kurhajchani Tata Diosï Jeobani úsïnga eskachi kánikua sési pʼikuarheraaka. Jiáni enga Juanu últimu kartani karapka, máru kʼuiripuechaksï chkuanderakua ambe jorhentpixapti ka arhukuni kúnguarhikuani. Joperu jarhastiksï máteru erachiicha engaksï seguiriini japka jurhimbikuarhu jámani. Imeechaksï kurhajchaxapti Tata Diosï Jeobani ka ísïksï jámaxapti eska ima na juramukuapka (2 Juanu 4, 6). Ísï jimbo, i kristianuechaksï no solu Juanu sési pʼikuastasïreendi, sino ístu Tata Diosï Jeobani (Prov. 27:11).
18. ¿Ambechi jorhenguarhisïni ima ambeeri enga Juanu uandapka?
18 Jiájkani, jorhenguarhisïngachi eskachi kánikua tsípisïnga engachi kurhajchajka Tata Diosïni ka nóchi jurajkuni (1 Juanu 5:3). Juchachi kánikua tsípisïnga engachi mítejka eskachi sési pʼikuastasïnga Tata Diosï Jeobani. Ka ima kánikua sési pʼikuarherasïndi engachi kurhajchajka ka no úni imani ambe enga no sési jaka. Ka ístuksï ánjeliicha kánikua tsípisïndi engajtsïni ísï exejka (Prov. 23:15; Luk. 15:10). Ka juchajtuchi kánikua tsípisïnga engachi exejka na engaksï máteru erachiicha tekaantajka engaksï kʼuiripuecha no sési kaajka o engaksï orhepani uérakujka tsʼéjkukua ma (2 Tes. 1:4). Jo, jiáni enga Noambakitiiri parhakpini kʼamajkunhaakia, juchachi kánikua sési pʼikuarheraaka jimbokachi mítetini jauaka eskachi méntkisï kurhajchaska Tata Diosï Jeobani ka nóchi méni jurajkuska.
19. ¿Néna pʼikuarherasïni Rachel enga jorhendaajka máteruechani Tata Diosïiri ambe? (Ístu exea je imajeniichani).
19 Juchachi kánikua sési pʼikuarherasïnga engachi jorhendaajka máteruechani Biblieri ambe. Rachel enga República Dominicana anapueka, uandasïndi eska meru kʼéri kóntperata máeska juchaari Tata Diosïiri ambe aianguani máteruechani. Ju je exeni ambe enga uandajka imeeri estudiantiicheri ambe. Rachel uandasïndi: “No jánhaskasïnga néna uandani parani xarhatani na engani sési pʼikuarherajka exeani juchiiti estudiantiichani na engaksï mójtakurhijka, xénchani ka mintsikani Tata Diosï Jeobani. Ka i ambe sési pʼikuastasïndi Tata Diosïni. No arhiparini na enga ménisï úkua jukajka, ji meru kánikua sési pʼikuarherasïnga engani újka jarhuataani”.
Kánikuachi sési pʼikuarherasïnga engachi jorhendaajka máteruechani paraksï xénchani ka kurhajchani Tata Diosï Jeobani. (Exe je párrafu 19).
JU JE ÍSÏ ÚNI ESKAKSÏ I TANIMU ACHAMASÏICHA NA UANDAPKA ANTE DEKSÏ UARHINI
20. ¿Andichisï juchajtu májkueni úni jaki eska Moisési, Dabidi, ka Juanu?
20 Ísï eska Moisési, Dabidi ka Juanu na marhuakupka imani Tata Diosïni enga sési jimboeka, juchajtuchi májkueni úxaka nájkirukachi máteru tiempu jimbo irekani jaka ka máteru asignasionichani jatsiani. Ísï eskaksï imeecha na ueenga, juchajtuchi kómarhisïnga Tata Diosï Jeobani, mitsikasïngachi ka imanchi kurhakusïnga eskajtsïni jarhuataaka. Ka ísï eskaksï ima ióntki anapu achamasïicha na seguru japka, juchajtuchi seguru jarhaska eska Tata Diosï Jeoba kánikua kóndeantasïnga imeechani engaksï kurhajchajka.
21. ¿Náki kóntperateechanksï intsïnhaua imeecha engaksï ísï újka eskaksï na uandapka Moisési, Dabidi ka Juanu?
21 Ísï jimbo, jatsiskachi para jingontku exeni ambe engaksï uandapka i tanimu achamasïicha ka kurhajchani Tata Diosï Jeobani. Ka engachi kurhajchaaka, méntkisïjtsïni sési nicheati ka irekaakachi para méntkisï (Deut. 30:20). Ístuchi kánikua sési pʼikuarheraaka jimbokajtsïni jaiapanhentaaka juchaari Taati auandarhu anapu enga kumplirijka ambe enga aiatspejka. Jo, Tata Diosï Jeobajtsïni meru uánikua ambe íntskuati (Éfes. 3:20).
PIREKUA 129 Juchachi no méni kuatantaaka
a Sáno iámindu ima israeliteecha engaksï exepka na enga Tata Diosï Jeoba milagru jimbo arhukupka mari Charhapitini, uarhisptiksï ka nóksï niáraspti imani Echeri jimbo engaksï Aiaminhapka (Núm. 14:22, 23). Tata Diosï juramuspti eskaksï desierturhu uarhipiringa imeecha engaksï 20 uéxurhini jatiriipka o sánderu, ka engaksï imeeri nombriicha registradu japkia (Núm. 14:29). Joperu Josué, Kalebi ka máteru israeliteecha engaksï sánderu sapichku japka, exesptiksï na enga Tata Diosï kumpliriipka ambe enga aiatspipka. Inde ambe jiáni úkuarhispti enga ireta parhikupka iurhekua Jordánini paraksï Kanaáni niárani (Deut. 1:24-40).
b AMBE ENGAKSÏ XARHATAJKA IMAJENIICHA: Uikixkandani: Ante de uarhini, Dabidi ambakiti konsejuechani íntsaaspti Salomónini. Jurhijkandani: Uánikua erachiicha ka pirenchiichaksï ambakiti ambe jorhenguarhixati Jorhentperakuarhu para Prekursoriicha.
