SEMANA 46
PIREKUA 49 Ju je tsíperani Jeobaeri mintsitani
¿Uékasïndi sierbo ministerialiini?
“Ma sánderu sési pʼikuarherasïndi intsïmpini ka eska intsïmbinhani” (ÚKU. 20:35).
AMBE ENGACHI JORHENGUARHIAKA
Na engachi uaaka jarhuataani erachiichani engaksï itsï atakuarhikia paraksï sierbo ministerialiini.
1. ¿Na exeasïreeni apostoli Pablu sierbo ministerialiichani?
SIERBO ministerialiichaksï ambakiti ánchikuarhita ma úsïndi kúnguarhikuecharhu. Apostoli Pablu kánikua jukaparharasïreendi indeechani jimbokaksï sési marhuakuxapka Tata Diosïni. Ísï jimbo, jiáni enga karakuapka Filipusï anapu kristianuechani, uandajperata ma axakuaspti sierbo ministerialiichani ka orhejtsïkutiichani (Filip. 1:1).
2. ¿Néna pʼikuarherasïni Luisi enga ísï marhuani jaka komu sierbo ministeriali?
2 Uánikua erachiicha engaksï itsï atakuarhikia, sésiksï pʼikuarherasïndi ísï marhuani jarhani komu sierbo ministeriali nájkirukaksï máru sapichku jauaka oksï kʼériinia. Pori ejemplu, Devan 18 jatiriispti ka Luisi jukari 50 jatiriisptia engaksï sierbo ministeriali únhapka. ¿Néna pʼikuarherasïni erachi Luisi enga ísï marhuani jaka komu sierbo ministeriali? Ima uandantasïndi: “Kánikua sési pʼikuarherasïnga jimbokajtsïni erachiicha ka pirenchiicha xénchasïnga ka jíjtuni xénchaasïnga”. Ka uánikua sierbo ministerialiichaksï májkueni pʼikuarherasïndi.
3. ¿Náki kurhamarhikuechanchi mókuantani jaua?
3 Engari itsï atakuarhikia ka nótkiri sierbo ministerialiini, ¿andiresï no jánguarhintajki parari sierbo ministerialiini? ¿Ambekini jarhuataa parari ísï úni? ¿Ambe uandasïni Biblia eskari jatsiska para úni? Ini jorhenguarhikua jimbo, mókuantanchi jauaka ini kurhamarhikuechani. Joperu orhetachi exeaka ambe engaksï xáni újka sierbo ministerialiicha kúnguarhikuarhu.
¿AMBE KA AMBEKSÏ ÚSÏNI SIERBO MINISTERIALIICHA?
4. ¿Ambe ka ambeksï úsïni sierbo ministerialiicha? (Ístu exe je imajenini).
4 Sierbo ministerialiichaksï espiritu santu jimbo erakunhasïndi paraksï jarhuatani orhejtsïkutiichani mámaru ambe úni kúnguarhikuarhu. Pori ejemplu, máruksï pendienti jarhasïndi paraksï aianhpiricha míteni naniksï aianhpia ka ístu eskaksï jatsiauaka publikasionichani. Ístu, máruksï arreglariuasïndi kʼumanchikuechani Rinueri ka eskaksï limpiu jauaka. Ka máteruecha jarhuajpesïndi tánguarhikuecharhu paraksï akomodadoriini oksï sonidurhu jarhani. Iámindu sierbo ministerialiichaksï ini ambe úsïndi jimbokaksï xénchasïnga Tata Diosï Jeobani ka ísïksï irekasïndi eskaksï na uandajka Bibliarhu anapu juramukuecha ka ístuksï kánikua xénchasïndi erachiichani (Mat. 22:37-39). ¿Ambe jatsiski para úni erachi ma enga itsï atakuarhikia para sierbo ministerialiini?
Sierbo ministerialiichaksï májkueni úsïndi eska Jesúsi engaksï marhuakuajka máteruechani. (Exe je párrafu 4).
5. ¿Ambe jatsiski para úni erachi ma para sierbo ministerialiini?
5 Bibliarhu uandasïndi ambe engaksï uaaka úni paraksï sierbo ministerialiini (1 Tim. 3:8-10, 12, 13). ¿Ambejtsï uaa úni? Jorhenguarhini ambe enga uandajka Biblia ka jánguarhintani ísï úni. Joperu ístu uétarhisïndi orheta exeni andiresï uéjki sierbo ministerialiini.
¿ANDIRISÏ UÉJKI SIERBO MINISTERIALIINI?
6. ¿Ambekini jarhuataa parakari uékaaka máteruechani marhuakuani? (Mateu 20:28; ístu exe je imajenini enga).
6 Tata Jesukristu sánderu ambakiti ejempluesti. Ima xénchasïndi Taati jémbani ka ístu kʼuiripuechani. Jesúsi kánikua xénchpesïreendi, jimbosï jánguarhintapti marhuakuani kʼuiripuechani ka ístu imani ambe úni engaksï máteruecha no uékeenga úni (arhinta je Mateu 20:28; Juanu 13:5, 14, 15). Enga chá uékperakua jimbo uéjka sierbo ministerialiini, Tata Diosï Jeobaksïni újchakuraati ka jarhuatatiksïni parakajtsï sierbo ministerialiuaka (1 Kor. 16:14; 1 Ped. 5:5).
Jesúsi ejemplu jingoni jorhendaaspti imeeri apostoliichani paraksï kaxumbikua jingoni marhuakuani máteruechani enbesi deksï k’eri ambe exenhani. (Exe je párrafu 6).
7. ¿Andisï no sési jaki eska erachi ma uékaaka sierbo ministerialiini nomasi para k’eri ambe exenhani?
7 Parhakpinirhu, imani kʼuiripuechanksï sési exeasïndi engaksï kʼéramakuarhijka, joperu Tata Diosï Jeobaeri kúnguarhikuarhu ménderueniisti. Erachi ma enga ísï xénchauaka máteruechani eska Jesúsi, no uékasïndi juramukuani máteruechani ni eskaksï k’eri ambe exeaka. Enga kúnguarhikuarhu, sierbo ministeriali únhapiringa ima erachi enga nomasi uéjka paraksï k’eri ambe exeni, no uékapirindi imani ambe úni enga no xáni jukaparhakueka nijtu uékani jarhuataani máteruechani. Ima úpirindi eratseni eska indeni ambe úni no sáni jukaparhakueska (Juanu 10:12). Tata Diosï Jeoba no méni újchakurauati imani kʼuiripuechani engaksï uéjka ima ambe úni nomasi paraksï k’eri ambe exenhani (1 Kor. 10:24, 33; 13:4, 5).
8. ¿Ambe arhiaspi Jesúsi imeeri chúxapatiichani?
8 Ménichani, asta Jesúsiiri amigu jémbeechaksï uékasïreendi imani ánchikuarhiteechani jatsiani nomasi paraksï k’eri ambe exenhani. Indeni ambeksï úspti tsimani Jesúsiiri chúxapatiicha: Santiagu ka Juanu. Imeechaksï kurhakuspti Jesúsini eska íntsaapiringa ánchikuarhita ma enga kánikua jukaparhakuepiringa. Joperu, enbesi de Jesúsi felisitariuani, arhiaspti 12 imeeri chúxapatiichani: “Ima enga uékaaka sánderu kʼéri ambeeni, jatsisti para máteruechani jántspikuani ka ima enga uékaaka orheteeni chánksïni jingoni, jatsisti para iáminduechani jántspikuani” (Mar. 10:35-37, 43, 44). Ima erachiicha engaksï sierbo ministerialiijka jimbokaksï uékasïnga jarhuataani erachiichani, k’eri kóntperata máesïndiksï kúnguarhikuarhu (1 Tes. 2:8).
¿AMBEKINI JARHUATAA PARARI UÉKANI JARHUATANI MÁTERUECHANI?
9. ¿Ambekini jarhuataa parari sánderu ambe úni kúnguarhikuarhu?
9 Seguruchi jarhaska eskari xénchasïnga Tata Diosï Jeobani ka uékandi marhuakuani máteru erachiichani. Joperu jamberiri no uéjka sierbo ministerialiini. ¿Ambekini jarhuataa parari ísï úni? ¿Ambekini jarhuata parari sánderu ambe úni kúnguarhikuarhu? Úpiringari eratsentani na enga xáni sési pʼikuarherakuarhijka marhuakuani erachiichani ísï eska Jesúsi na uandapka: “Ma sánderu sési pʼikuarherasïndi intsïmpini ka eska intsïmbinhani” (Úku. 20:35). Jesúsi no solu ini ambe uandasti sino ísï úsïreendi. Jesúsi kánikua sési pʼikuarherasïreendi jimboka jarhuatasïreenga máteruechani ka tʼujturi uaaka májkueni p’ikuarherani.
10. ¿Néna xarhataspi Jesúsi eska sési pʼikuarherasïreenga marhuakuani máteruechani? (Markusï 6:31-34).
10 Ju je exeni na enga xáni sési pʼikuarhereenga Jesúsi jimboka marhuakuasïreenga máteruechani (arhinta je Markusï 6:31-34). Ma xanhari enga Jesúsi ka imeeri chúxapatiicha kánikua kuataratini japka, nirasptiksï jimeesïsï engaksï úpiringa sáni mintsikuarhini. Joperu engaksï na niárapkia, k’uiripuechaksï tʼuini jima jarhasptia, jimbokaksï uékasïreenga eska Jesúsi jorhendaapiringa. Jesúsi úpirindi arhiani eska no tiempu jatsispka ‘jimbokaksï imeecha no jamberi úsïreenga tʼireni’. Joperu ima no ísï arhiaspti jimboka xénchpesïreenga, jimbosï ueenapti “uánikua ambe jorhendaani” ka inchatiru jamberi (Mar. 6:35). Jesúsi no ísï úsïreendi jimboka jatsispka para ísï úni, sánderu sési, jimboka ‘mintsita jingoni pʼamojkuasïreenga kʼuiripuechani’. Ima jorhendaasïreendi jimboka xénchaasïreenga ka inde ambe kánikua sési pʼikuastasïreendi.
11. ¿Néna jarhuataaspi Jesúsi kʼuiripuechani? (Ístu exe je imajenini).
11 Jesúsi jorhendaasïreendi kʼuiripuechani Tata Diosïiri ambe ka ístu jarhuatasïreendi. Pori ejemplu, milagru ma úspti paraka japiringa t’irekua ka arhiaspti imeeri chúxapatiichani eskaksï íntsaapiringa kʼuiripuechani (Mar. 6:41). Ini ambe jimbo, xarhataspti ambe enga arhikuekajka marhuakuani máteruechani. Ka ístu xarhataspti eska kánikua jukaparhakueska jarhuajpeni, ísï eskaksï sierbo ministerialiicha na újka. ¡Eranhaska je na engaksï sési pʼikuarherapka apostoliicha! Jarhuatasptiksï Jesúsini, íntsaasptiksï t’irekua iámindu kʼuiripuechani astakaksï sési uiniarhapkia (Mar. 6:42). No i xanharkuespti enga Jesúsi xarhatapka eska sánderu pendienti jarhasïreenga máteruechani jimbo ka eska imajkumindu. Enga ima Echerirhu jámani japka, méntkisï jánguarhintaspti marhuakuani kʼuiripuechani (Mat. 4:23; 8:16). Jesúsi kánikua sési pʼikuarherasïreendi enga jorhendauenga ka jarhuataani máteruechani. Engajtsï chájtu na sierbo ministerialiuakia, kánikuajtsï sési pʼikuarheraaka engajtsï jánguarhintaaka máteruechani marhuakuani.
Engajtsï xénchajka Tata Diosï Jeobani ka uékantsï marhuakuani máteruechani, jánguarhintaakajtsï jarhuajpeni kúnguarhikuarhu. (Exe je párrafu 11). a
12. ¿Andisï no nema jatsi para eratseni eska no ma ambe jorhenaska úni?
12 Engari ísï p’ikuarherajka enajkiri no ma ambe jorhena úni, asï desanimarikuarhi. Jamberiri jatsiaka kualidadichani engari uaaka úraani parari kúnguarhikuarhu anapuechani jarhuataani. Eratsenta ambe enga uandapka Pablu ixú 1 Korintu 12:12-30 jimbo, ka kómarhi Tata Diosï Jeobani. Ambe enga Pablu uandapka, xarhatasïndi eska náki uéjki Tata Diosïiri marhuari ma, ambakiti ambe úsïnga imeeri kúnguarhikuarhu. Joperu, engari útasï kueratani jaka kualidadichani jatsiani parari niárani sierbo ministerialiini, asï kuatanta. Sánderu sési, jánguarhinta marhuakuni Tata Diosï Jeobani ka jarhuataani erachiichani. Ka uaakari seguru jarhani, eskaksï orhejtsïkutiicha orheta exeaka ambe engari tʼu újka sési úni ka imani ambeksïni arhiati eskari uaaka (Rom. 12:4-8).
13. ¿Ambeksï jatsiski para miáni erachiicha engaksï uéjka sierbo ministerialiini?
13 Eratsenta ini ambe, sáno iámindu kualidadichani enga Biblia uandajka engaksï jatsika para sierbo ministerialiicha xarhataani, ístuksï jatsisti para iámindu kristianuecha xarhataani ini kualidadichani. Iámindu kristianuechaksï jatsisti para andarhierani Tata Diosï Jeobani, tsípikua jingoni jarhuajpeni ka ísï irekani eska Tata Diosï na jaiapanhintajka. Ísï jimbo, jamberiri jatsiakia indeni kualidadichani enga uétarhijka para sierbo ministerialiini.
¿AMBERI JATSISKI PARA ÚNI ENGARI UÉJKA SIERBO MINISTERIALIINI?
14. ¿Ambe arhikuekasïni “eratsekua jukarini”? (1 Timoteu 3:8-10, 12).
14 Iásï ju je exeni 1 Timoteu 3:8-10, 12 (arhinta je) enga uandajka ambe enga uétarhijka para sierbo ministerialiini. Jatsisti para “eratsekua jukarini”. I uandakua ístu arhikuekasïndi eskaksï jatsiska para “responsabliini” o “sési jámani” parakaksï kʼuiripuecha uaaka respetariuani. Joperu i ambe no arhikuekasïndi eskaksï no uaaka tsípini nijtu tsípikuarhini (Ecl. 3:1, 4). Joperu uétarhisïndi eskaksï jánguarhintaaka sési úni ambe engaksï arhinhaaka ka eskaksï máteruecha uaaka mintsinharhiani, ka ísïksï iámindu kúnguarhikuarhu anapuecha respetariuauati.
15. ¿Ambe arhikuekasïni “nóksï jatsisti para chkuanderani jámani”, “nijtu sentabu tsitini ka nijtu imeecheeri ambe jimbojku uandanhiani”?
15 “Nóksï jatsisti para chkuanderani jámani”. I ambe arhikuekasïndi eskaksï jatsiska para mintsinharhikueni, jurhimbitku jámani ka no jámani chkuanderani. Íksï achamasïicha jatsisti para ísï úni eskaksï na uandaaka ka no nemani enganiarini (Prov. 3:32). “Nijtu sentabu tsitini ka nijtu imeecheeri ambe jimbojku uandanhiani”. I ambe arhikuekasïndi eskaksï jatsiska para jurhimbitku jámani engaksï negosiu ambe kámani jauaka, ka ístu kúnguarhikuarhu anapu sentabu jingoni. Ka nóksï jámasïndi sentabu ambe euani amigu jémbeechani ka tátsekuaksï nóteru íntskuantania.
16. a) ¿Ambe arhikuekasïni “no jukari kauikua ambe arhani”? b) ¿Ka nénaksï uaa “ambakiti konsiensia ma” jatsini?
16 “Nóksï jatsisti para jukari kauikua ambe arhani”. I ambe arhikuekasïndi eskaksï no jatsiska para ísï mítekateeni komueska kauicheecha. Ístu jatsistiksï para “ambakiti konsiensia ma” jatsini, jimbokaksï ísï irekasïndi eskaksï Tata Diosï Jeobaeri juramukuecha na uandajka. Ísïisti, no nema perfektuesti, joperuksï uaati sési p’ikuarherani jimbokaksï sési pájperasïnga Tata Diosï jingoni.
17. ¿Ambe arhikuekasïni eska “orhetaksï jatsisti para exenhani eskaksï uaaka indeni ánchikuarhitani úni”? (1 Timoteu 3:10; ístu exe je imajenini).
17 Máteru ambe enga uétarhijka, jindeesti eskaksï “orheta jatsiska para exenhani eskaksï uaaka indeni ánchikuarhitani úni”. I ambe arhikuekasïndi eska erachi ma xarhataskia eska mintsinharhikueska ka eska uaaka sési úni ánchikuarhita ma. Ísï jimbo, engaksï orhejtsïkutiicha arhiaka ambe enga jatsika para úni, erachi jatsisti para ísïmindu úni eska Tata Diosïiri kúnguarhikua na uandajka. Ísï jimbo, jatsistiksï para sési míteni néna úni ánchikuarhitani ka na jatini kʼamarani. Enga sési uaaka imeeri ánchikuarhitani ka tsípikua jingoni, kúnguarhikuarhu anapu erachiichaksï exeati eska sánderu ambakiti erachi máeskia ka eska jánguarhintasïnga sési úni náki uéjki ánchikuarhitani. Orhejtsïkutiicha, exe je náki erachiichantsï úpirini jurajkukuani ambe ma para jorhendaani (arhinta je 1 Timoteu 3:10). Pori ejemplu, ¿jarhaskiksï chaari kúnguarhikuarhu erachiicha engaksï tumbiika o engaksï sánderu sapirhatiika? ¿Pʼindeskiksï jandiajku jorhenguarhini Biblieri ambe? ¿Komentarisïnksï tánguarhikuecharhu ka nirani aianhpini? Engaksï ísï úni jaka, uaatiksïa úni máru ambe. Ka ísïksï orhejtsïkutiicha exeati sinksï i tumbi sapirhatiicha úsïndi úni máru ambe. Ka engaksï na sánderu kʼéakia ka sésiksï ánchikuarhini jarhania, jamberiksï uaatia sierbo ministerialiini.
Orhejtsïkutiichaksï uaati mámaru jásï ánchikuarhita íntsaani imeechani engaksï itsï atakuarhikia paraksï exeni sinksï uaa úni indeni ánchikuarhitani. (Exe je párrafu 17).
18. ¿Ambe arhikuekasïni ʻno ma ambe no sési exeminhani’?
18 Ístuksï sierbo ministerialiicha jatsisti para ʻno ma ambe no sési exeminhani’. I ambe arhikuekasïndi eska no ma rasoni jauaka para uandanhani eska k’eri pekadu ma niátaska. Ménisï, jauatiksï kʼuiripuecha engaksï ísku jatini uandaaka eskachi no sési ambe úska. Jesúsi ini ambe nitamakuarhispti ka uandaspti eskaksï imeeri chúxapatiichajtu ísï nitamakuarhipiringa (Juanu 15:20). Joperu engaksï erachiicha jánguarhintaaka sési jámani ísï eska Jesúsi, sésiksï exenhaati kúnguarhikuarhu (Mat. 11:19).
19. ¿Ambe arhikuekasïni “májku uarhiitini kámani”?
19 Imeecha engaksï tembuchatini jaka ka uékanksï sierbo ministerialiini, jatsistiksï “para májku uarhiitini kámani”. Jimboka Tata Diosï Jeoba ísï uaxastaska, eska temungurhiri ma jindeeska tataka ka nanaka ma (Mat. 19:3-9). Ísï jimbo, kristianu ma no méni jatsisti para ísku jándikua ambe niátani (Ebr. 13:4). I ambe arhikuekasïndi eska acheeti no méni jatsiska para jurajkuni imeeri uarhiitini ka ni jámani sési arhiani máteru nanakechani (Job 31:1).
20. ¿Néna sési orhejtsïkusïni acheeti ma imeeri kʼumanchikuani?
20 Ístuksï sierbo ministerialiicha jatsisti para “sési juramukuani imeeri uájpeechani ka ístu imeeri kʼumanchikuarhu anapuechani”. Ima engaksï orhejtsïkutiika familiarhu, jatsistiksï para sési úni imeecheeri ánchikuarhitani. Pori ejemplu, jatsistiksï para mándani semana jatsini familieri jorhenguarhikuani, jánguarhintanksï nirani aianhpini iámu familia jingoni ka jarhuataani imeeri uájpeechani sési pájperani Tata Diosï Jeoba jingoni (Éfes. 6:4). Ima enga sési kuidarijka imeeri familiani, xarhatani jarhasïndi eska uaaka sési kuidariini iámu kúnguarhikuarhu anapuechani (terukutanta je 1 Timoteu 3:5 jingoni).
21. ¿Ambejtsï uaa úni engajtsï nótki sierbo ministerialiini jaka?
21 Enga chá nótki sierbo ministerialiini jaka, kómarhi je Tata Diosï Jeobani ka jorhenguarhi je ini artikuluni. Exe je ambe uétarhisïndi para sierbo ministerialiini ka jánguarhinta je ísï úni. Eratsenta je na engajtsï xáni xénchajka Tata Diosï Jeobani ka jánguarhintsï je sánderu xénchaani chaari erachiicha ka ístu eratsenta je andijtsïsï uéjki marhuakuani máteruechani (1 Ped. 4:8, 10). Engajtsï jánguarhintaska ánchikuarhini para sierbo ministerialiini, kánikuajtsï tsípiaka marhuakuani erachiichani ka pirenchiichani kúnguarhikuarhu. Eskaksïni Tata Diosï Jeoba újchakuraaka parajtsï sierbo ministerialiini (Filip. 2:13).
PIREKUA 17 “Uékasïnga”
a AMBE ENGAKSÏ XARHATAJKA IMAJENIICHA: Uikixkandani ladu jimbo, xarharaxati na enga Jesúsi kaxumbikua jingoni marhuakuani jaka máteruechani; ka jurhijkandani ladu jimbo, xarharaxati erachi ma enga sierbo ministerialiika ka kúnguarhikuarhu anapuni ma jarhuataxati enga jatiriikia.
