SEMANA 47
PIREKUA 103 Jeobajtsïni íntsaasti orhejtsïkutichani
¿Uékasïntsï orhejtsïkutiini?
“Enga tataka ma jánguarhintani jaka orhejtsïkutiini, ambakiti ambesï uékani jati úni” (1 TIM. 3:1).
AMBE ENGACHI JORHENGUARHIAKA
Biblia arhisïndi ambe enga jatsika para úni erachi ma enga uéjka orhejtsïkutiini.
1, 2. ¿Ambe ka ambe xáni úsïni orhejtsïkuti ma?
JAMBERIJTSÏ ióni páni jakaia sierbo ministerialiini, ka jamberijtsï ánchikuarhini jakaia parajtsï orhejtsïkutiini. Ísï jimbo, ¿tsitipirintsï jarhuataani erachiichani ka pirenchiicha ka marhuani komueska orhejtsïkuti ma? (1 Tim. 3:1).
2 ¿Ambe ka ambe úsïni orhejtsïkuti ma? Tsípikua jingoni nirasïndi aianhpini erachiicha jingoni ka ístu kuidariuasïndi ka jorhendaani, jarhuataasïndi paraksï sánderu mintsikani Tata Diosï Jeobani imani ambe jimbo enga uandajka ka enga újka. Ini ambe jimbosï Biblia arhiajti eskaksï orhejtsïkutiicha ísïiska “komueska intsïmperata ma” (Éfes. 4:8).
3. ¿Ambe jatsiski para úni erachi ma para úni orhejtsïkutiini? (1 Timoteu 3:1-7; Titu 1:5-9).
3 ¿Ambe uétarhisïndi para nema niárani orhejtsïkutiini? Rekisituecha para orhejtsïkutiini nóksï májkueniisti eska para ánchikuarhita ma jirinhani. Jimboka jima solu uétarhisïnga jorhenani imani ambe úni enga patroni kurhajkuarhijka, joperu para orhejtsïkutiini no solu uétarhisïndi jorhenani aianhpini o jorhentpini. Erachi ma jatsisti para imani ambe úni enga Biblia arhijka ixú 1 Timoteu 3:1-7 ka Titu 1:5-9 jimbo (arhinta je). Ini jorhenguarhikua jimbo, exenchi jauaka tanimu ambe engaksï orhejtsïkutiicha jatsika para úni: jatsistiksï para ísï mítekateeni eskaksï ambakiti kʼuiripu máeska, eskaksï sési orhejtsïkusïnga imeeri familiani ka eskaksï listu jarhasïnga paraksï jarhuataani kúnguarhikuarhu anapuechani.
ÍSÏ MÍTEKATEENI ESKA AMBAKITI KʼUIRIPU MÁESKA
4. ¿Ambe arhikuekasïni “sési jámani”?
4 Ma ambe enga uétarhijka para erachi ma orhejtsïkutiini, jindeesti eska jatsiska para“sési jámani”. Ka ísï, no ma kúnguarhikuarhu anapu uaati uandani eska no sési ambe niátasïnga. Ka ístu, “ima kʼuiripuecha engaksï no jakajkutiika, jatsistiksï para ísï míteni eska ambakiti kʼuiripu máeska”. Jamberiksï i kʼuiripuecha uaati no sési arhini erachini jimboka Tata Diosï Jeobani marhuakusïnga, joperu erachi no jatsisti para rasoniichani íntsaani paraksï imeecha uandani eska erachi no ambakiti kʼuiripu máeska (Dan. 6:4, 5). Kurhamarhikuarhi je: “¿Nénajtsïni míteski kʼuiripuecha ka kúnguarhikuarhu anapu erachiicha?”
5. ¿Ambe arhikuekasïndi “tsitini imani ambe úni enga sési jaka”?
5 “Tsitini imani ambe úni enga sési jaka”. I ambe arhikuekasïndi eska sési jásï ambe exekuasïnga máteruechani ka felisitariuani indeni ambe jimbo. Ístuksï kánikua sési pʼikuarherasïndi jimbokaksï jarhuataasïnga máteruechani ka ménichanksï sánderu ambe úsïndi erachiichani jimbo (1 Tes. 2:8). ¿Andisï xáni jukaparhakue eskaksï orhejtsïkutiicha tsitiaka imani ambe úni enga sési jaka? Jimbokaksï kánikua tiempu úrasïnga para kuidariuani erachiichani ka ístu paraksï máteru ambe úni (1 Ped. 5:1-3). Ka nájkirukaksï kánikua ánchikuarhijka, orhejtsïkutiichaksï kánikua sési pʼikuarherasïndi engaksï jarhuataajka máteruechani (Úku. 20:35).
6. ¿Néna xarhatasïndi nema eska sési “kámpisïnga”? (Ebreu 13:2, 16; ístu exe je imajenini).
6 Erachi enga sési “Kámpijka” no solu imeeri amiguechani jarhuataasïndi, sino ístu máteruechani (1 Ped. 4:9). Diksionariu ma enga jindeeka para Biblia, uandasïndi: “Tataka ma enga sési kámpijka, mintsita jingoni sési kaasïndi imeechani enga no míteaka ka tsípikua jingoni pʼímarhiasïndi imeeri kʼumanchikuarhu”. Ísï jimbo, kurhamarhikuarhi je: “¿Ísï mítikateska eskani sési eroasïnga imeechani engajtsïni pʼorhembijka?” (arhinta je Úkuecha 13:2, 16). Tataka ma enga sési kámpijka, intsïmbiasïndi imani kʼuiripuechani engaksï pʼorhembijka, pori ejemplu imeechani engaksï no jatsikuarheriika ka imeechani engaksï kánikua ánchikuarhijka erachiichani jimbo, komueska sirkuitueri orhejtsïkutiichani ka uérakua anapu arhijtsïkpitiichani (Gén. 18:2-8; Prov. 3:27; Luk. 14:13, 14; Úku. 16:15; Rom. 12:13).
Temungurhiri ma, pʼímarhisti imeeri kʼumanchikuarhu sirkuitueri orhejtsïkutiini ka imeeri témbani. (Exe je párrafu 6).
7. ¿Néna xarhatasïni orhejtsïkuti ma eska no sánderu jukaparharasïnga sentabuni?
7 “No jatsisti para sentabu tsitini”. I ambe arhikuekasïndi eska no sánderu jukaparharaka sentabuni nijtu jatsikuarhekua ambe. Enga jatsikuarheriika o no ambe, uétarhisïndi eska orheta peeraka Tata Diosïiri Reinueri ambe imeeri irekuarhu (Mat. 6:33). Jatsisti para úrani imeeri tiempuni, uinhapikuani ka ambe enga jatsikuarheka para Tata Diosï Jeobani marhuakuni, familiani kuidarini ka marhuani kúnguarhikuarhu (Mat. 6:24; 1 Juanu 2:15-17). Ísï jimbo, kurhamarhikuarhi je: ¿Na xáni jukaparharasïni sentabuni? ¿Sési pʼikuarherasïni imani ambe jingontku engani jatsikuarheka? ¿O uékasïni sánderu sentabu jatsini ka ístu jatsikuarhekua ambe?” (1 Tim. 6:6, 17-19).
8. ¿Néna xarhatasïni nema eska iámindu ambe jimbo pʼíngukuarhisïnga?
8 Ima enga ʻiámindu ambe jimbo pʼíngukuarhijka’, xarhatasïndi imeeri irekuarhu. Pori ejemplu no jukari tʼiresïndi nijtu jukari itsïmani, sési xukuparhasïndi ka arreglarikuarhini ka ístu sési úrasïndi imeeri tiempuni. Ka no ísï irekasïndi eskaksï imeecha engaksï no marhuakujka Tata Diosï Jeobani (Luk. 21:34; Sant. 4:4). Ka asta jiáni engaksï no sési arhini jauaka, tekaantasïndi. Orhejtsïkuti, “no jatsisti para kauicheeni” nijtu ísï mítekateeni eska jukari kauikua arhasïnga. Kurhamarhikuarhi je: “¿Xarhatasïni eskani iámindu ambe jimbo pʼíngukuarhisïnga?”.
9. ¿Ambe arhikuekasïni iámindu ambe sési eratsentani ka sési úni?
9 Enga orhejtsïkuti ma Bibliani úrajka para exeni ambesï jatsi para úni, xarhatasïndi eska ʻméntkisï sési eratsentasïnga ambe ma’. Enga eratsentajka ambesï uandajki Biblia, sési kurhangusïndi ambesï jatsi para úni ka úsïndi ambakiti ambe erakuni (Prov. 18:13). Engaksï ísï újka, imani ambeksï erakusïndi enga Tata Diosï Jeoba jaiapanhentajka. Ístuksï jánguarhintasïndi iámindu ambe sési úni, i ambe arhikuekasïndi eska organisadueska ka eska méntkisï ora jimbo niárasïnga iápurisï. Iáminduechaksï mítesïndi eska mintsinharhikueska ka eska ísï úsïnga eskaksï na uandajka instruksioniicha. Jiájkani, indeni kualidadiicha jimbo, iáminduechaksï sési uandasïndi imeeri ambe. Iásï, ju exeani indeni kualidadiichani enga Biblia uandaajka paraka orhejtsïkuti ma ambakiti ejemplu máeuaka.
AMBAKITI ORHEJTSÏKUTI MÁENI FAMILIARHU
10. ¿Ambe arhikuekasïni para erachi ma “sési juramukuani imeeri kʼumanchikuarhu anapuechani”?
10 Paraka erachi ma enga tembuchatini jaka uaaka orhejtsïkutiini, uétarhisïndi eska imeeri familia ambakiti ejemplu máeuaka. Ísï jimbo, arhisïndiksï imani erachini eska jatsiska para “sési juramukuani imeeri kʼumanchikuarhu anapuechani”. Jimbosï jatsiti para uékperakua jingoni kuidariini imeri familiani ka kánikua jánguarhintani parakaksï iáminduecha sési marhuakuaka Tata Diosï Jeobani. ¿Andisï jukaparhakue eska indeni ambe uaaka? Jimboka apostoli Pablu uandaspka: “Enga tataka ma no uaaka sési juramukuania imeeri kʼumanchikuarhu anapuechani, ¿nénajtu uaa exeni jarhani Tata Diosïiri kúnguarhikuani?” (1 Tim. 3:5).
11, 12. ¿Andisï xáni jukaparhakue eskaksï uájpeecha sési jámaaka paraka erachi ma niáraaka orhejtsïkutiini? (Ístu exe je imajenini).
11 Enga erachi ma kaajka sapiichani engaksï nótki 18 jatiriika, “uájpeechaksï jatsisti para méntkisï kurhajchani ka sésiksï jámani”. I taati jatsisti para xénchperakua jingoni jorhendaani ka arhistakuani uájpeechani. Ísïisti, iámindu sapiichaksï tsitisïndi chʼanani ka tsípikuarhini, joperu enga taati sési jorhendauaka, imeeri sapiichaksï kurhandiraati, respetarpiatiksï ka sésiksï jámaati. Ístu taati jatsisti para jarhuataati sapiichani paraksï Tata Diosïiri amigueni, paraksï ísï irekani eskaksï na uandajka Biblieri prinsipiuecha ka paraksï niárani itsï atakuarhini.
12 Ima erachiiri “uájpeechajtuksï jatsisti para jakajkutiini, nóksï jatsisti para ísï mítekateeni eskaksï tsïnchekuarhintasïnga o eskaksï no kurhandirasïnga”. Joperu enga erachiiri uájpa ma enga itsï atakuarhikia niárajka kʼéri pekadu ma úni, ¿ambe úkuarhisïni? Exenhasïndi sini taati jémbasï no sési jorhendani japi o no jánguarhintani japi arhistakuni, enga ísïika, jamberi nótki uaati orhejtsïkutiini (ístu exe je rebistani La Atalaya 15 de oktubri de 1996, pájina 21, párrafuecha 6 ka 7).
Taatiichaksï jorhendaasïndi uájpeechani paraksï mámaru marhuakuni Tata Diosïni. (Exe je párrafu 11).
KÚNGUARHIKUANI MARHUAKUNI
13. ¿Néna xarhatasïni nema eska kurhangutspisïnga ka eska no inchandimentasïnga?
13 Ima erachiicha engaksï sési járhati kualidadiichani xarhatajka, kʼéri kóntperataksï máesïndi kúnguarhikuarhu. Enga erachi ma ‘kurhangutspijka ka no inchandimeni’, úsïndi eska pínandikua jauaka. Enga chá uéjka ísï mítekateeni eskajtsï kurhangutspisïnga, jatsiskajtsï para jingontku kurhajchaani máteruechani ka kurhangukuani na engaksï exejka ambe ma. Pori ejemplu eranhaska je eskaksï orhejtsïkutiicha tánguarhintasïnga ka imani ambeksï erakuni úni enga terukuntajka Biblieri prinsipiuecha jingoni, ¿erachi apoiaripirini indeni ambe? Orhejtsïkuti ma “no jatsisti para inchandimeni”, i ambe arhikuekasïndi eska no fuersa uékasïnga eska ima ambe úkuarhiaka ambe enga ima uéjka, sino kurhangusïndi eska sánderu sésiiska kurhajchani máteruechani (Gén. 13:8, 9; Prov. 15:22). “No jatsisti para ísku jatini arhirperani jámani máteruecha jingoni” “nijtu sóntku ikiani”. Sánderu sési, sési kámpisïndi ka pʼímukukuarhisïndi ka no no sési kámpini. Ka jimboka jánguarhintasïnga iáminduecha jingoni sési pájperani, no uékasïndi eskaksï máteruecha arhirperaaka sino eska jauaka pínandikua nájkiruka sánisï úkua jukaaka (Sant. 3:17, 18). Ka imani ambe uandasïndi enga sési pʼikuastantauaka máteruechani nájkirukaksï ikiani jauaka o asta imeechani engaksï no de akuerdu jarhajka juchaari jakajkukuecha jingoni (Juec. 8:1-3; Prov. 20:3; 25:15; Mat. 5:23, 24).
14. ¿Andisï no sóntku orhejtsïkutijki ima erachi enga iásï no ióni ueenaka jakajkuni Tata Diosïiri ambe, ka néna xarhatasïni eska mintsinharhikueska?
14 Ima erachi enga uéjka orhejtsïkutiini, “no jatsisti para iásï sáni ueenani jakajkuni”. Enga nótki ióni páni jaka enga itsï atakuarhika, útasï uétarhinchaati tiempu para sánderu sési pájperani Tata Diosï Jeoba jingoni ka eska jorhenguarhiaka sánderu sési úrani Bibliani para ambakiti ambe erakuni úni. Ante de orhejtsïkutiini, jatsisti para májkueni jámani eska Jesúsi, kaxumbitiini ka tsípikua jingoni marhuakuni Tata Diosï Jeobani. Ka tekaantskua jingoni erokuarhisïndi astaka Tata Diosï Jeoba íntskuaka ánchikuarhitani (Mat. 20:23; Filip. 2:5-8). Ístu, xarhataati eska mintsinharhikueska enga no jurajkuaka Tata Diosï Jeobani, enga kurhajchauaka Bibliarhu anapu juramukuechani ka instruksioniichani enga Tata Diosï íntspiajka imeeri kúnguarhikuarhu (1 Tim. 4:15).
15. ¿Uétarhisïni eska orhejtsïkuti ma ambakiti arhijtsïkpiti máeuaka?
15 Biblia uandasïndi eska orhejtsïkuti ma ʻjatsiska para míteni néna jorhentpini’. ¿I ambe arhikuekasïni eska jatsiska para jorhenani sési arhijtsïkpini? Nómbe. Jimbokaksï uánikua orhejtsïkutiicha jarhaska engaksï no káni sési arhijtsïkpijka, joperuksï kʼóru jorhenasti sési ainhpini ka kuidariuani kúnguarhikuarhu anapuechani (terukutanta je 1 Korintu 12:28, 29 ka Éfesu 4:11). Ísï jimbo, ima erachi ma enga uéjka orhejtsïkuti máeni, jatsisti para seguiriini jarhani jánguarhintani para sánderu ambakiti arhijtsïkpini máeni. Joperu, ¿néna uaa ísï úni?
16. ¿Néna uaa erachi ma ambakiti jorhentpiri máeni? (Ístu exe je imajenini).
16 “Jatsisti para Tata Diosïiri uandakua jimbo jupindaskuarhini”. Paraka orhejtsïkuti ma uaaka sési jorhentpini, jatsisti para méntkisï Tata Diosï karakatani úrani na uéjki arhijtsïkpini jarhani o enga konseju ambe íntspiaka. Ístu, sési jorhenguarhisïndi Bibliani ka arhiantasïndi publikasionichani (Prov. 15:28; 16:23). Enga estudiarini jarhajka Bibliani, jánguarhintasïndi kurhanguni néna uaa sési úrani imani ambe enga arhintani jarhajka; ka enga jorhentpini jarhajka, jánguarhintasïndi eska inde ambe mintsitarhu niárakuauaka kʼuiripuechani. Ka ma ambe enga jarhuataaka ísï úni, jindeesti jarhuajperata kurhakuani orhejtsïkutiichani engaksï ióni orhejtsïkutiikia, ka ísï úni eskaksï imeecha na arhiaka (1 Tim. 5:17). Orhejtsïkutiichaksï ístu jatsisti para jorhenani uinhaperaantani erachiichani ka pirenchiichani nájkirukaksï ménisï jatsiaka para konseju ambe íntsaani o asta “xukaani” jamberi, joperuksï jatsisti para pʼamojperakua jingoni ísï úni. Engaksï xénchpeaka ka sésiksï kámpini ka ístu Tata Diosïiri Karakatani úrani engaksï jorhentpini jauaka, ambakiti jorhentpiri máeuatiksï jimbokaksï májkueni úni jauaka eska sánderu kʼéri jorhentpiri, Jesúsi (Mat. 11:28-30; 2 Tim. 2:24).
Sierbo ministeriali ma nirasïndi pámbeni orhejtsïkutini ma ka jorhenguarhisïndi néna úrani Bibliani para uinhaperaantani máteruechani. Ima mismu sierbo ministeriali praktikarixati espejurhu ma exekuarhiparini ambe enga uandaaka. (Exe je párrafu 16).
SEGUIRII JE JÁNGUARHINTANI
17. a) ¿Ambe uaa jarhuataani sierbo ministerialiichani paraksï seguiriini jánguarhintani paraksï orhejtsïkutiini? b) ¿Ambeksï jatsiski para miáni orhejtsïkutiicha engaksï exeni jauaka sini erachi ma uaa orhejtsïkutiini? (Ístu exe je rekuadruni “ Orhejtsïkutiicha, asï jukari ambe kurhakua je imeechani engaksï uéjka orhejtsïkutiini”).
17 Jamberi máru sierbo ministerialiichaksï niárajti ísï pʼikuarherani enajkiksï no méni uaa orhejtsïkutiini, jimbokaksï jatsiska para uánikua kualidadiicha xarhataani. Joperu jatsistiksï para miáni eska Tata Diosï Jeoba no erokuarhisïnga eskaksï sésimindu xarhatauaka indeni kualidadichani ka nijtu imeeri kúnguarhikua (1 Ped. 2:21). Ka ístu, Tata Diosï Jeoba jarhuatauati imeri espiritu santu jingoni parakaksï uaaka orhejtsïkutiini (Filip. 2:13). ¿Ka chaia? ¿Náki kualidadintsï uékapirini xarhatani? Jiájkani kómarhi je Tata Diosï Jeobani, jorhenguarhi je sánderu inde temeeri ambe ka kurhakua je orhejtsïkutiichani nénajtsï uaa sánderu ambakiti erachi máeni.
18. ¿Ambeksï jatsiski para úni sierbo ministerialiicha?
18 Iámindu erachiicha asta orhejtsïkutiicha jamberi, uaatiksï seguiriini jarhani jorhenguarhiani ini kualidadichani engachi exeakia (Filip. 3:16). Ísï jimbo, enga chá sierbo ministerialiika, seguirii je jánguarhintani parajtsï orhejtsïkutiini. Kurhaku je Tata Diosï Jeobani eskaksïni jorhendaaka ka eskaksïni jarhuataaka parajtsï sánderu marhuakuni imani ka ístu kúnguarhikuani (Is. 64:8). Tata Diosï Jeobaksïni újchakuraati engajtsï jánguarhintaaka parajtsï orhejtsïkutiini.
PIREKUA 101 Ju je májku kʼéri ánchikuarhini
