Tratado de Versalles jimbo pakatperanhaspti grupuni ma uaxastani enga arhinhapka Sociedad de Naciones. I ambe uaxastanhaspti paraksï interu parhakpini anapu paisicha jarhuajperani ka úni eska pínandikua japiringa ka sési irenhani. Uánikua relijionicha engaksï seguni uandenga Kristuni jakajkuni, apoiarisptiksï indeni ambe. Consejo Federal de las Iglesias de Cristo en América, apoiarispti imani grupuni enga uaxastanhapka ka uandaspti eska i grupu politikuecheri Tata Diosïri Reinunisï arhikuekenga ixú Echerirhu. Consejo Federal axaaspti máru kʼuiripuechani imani tánguarhikuarhu enga arhinhenga Conferencia de la Paz de París. Ma kʼuiripu enga nípka tánguarhini, uandaspti eska imani tánguarhikua jingoni méntku máteru ambe uénakuarhipiringa interu parhakpini.

Ka ísïspti eska máteru ambe uénakuarhipiringa. Peru ima enga indeni ambe úpiringa, nóksï ima kʼuiripuechepirindi engaksï imani tánguarhikuarhu nípka. Uéxurhini 1919 jimbo máteru ambe uénakuarhispti aianhpikuarhu enga Jeoba úpka eska imeri uinhapikua jingoni, imeri ireta ísï aianhpepiringa eska no méni. Peru antesi de inde ambe úkuarhini, mójtakurhipirindi ambe ma enga kánikua jukaparhakuepka para Bibliaeri Jorhenguarhiticha.

Tánguarhikua enga mándani uéxurhini úkuarhienga para erakuani erachichani engaksï orhejtsïkupiringa Sociedad Watch Tower Bible and Tract, jiáni úkuarhipirindi sábadu 4 de eneru 1919 jimbo. Peru jiánisï, erachi Joseph Rutherford enga orhejtsïkuenga Betelini enga Estados Unidos japka, Atlanta (Georgia, Estados Unidos) ónhakuarhitixapti máteru siete erachicha jingoni. Jimajkani, erachichaksï jatsispti para uandani sinksï imechani mismu erakuapirini engaksï ónhakata japka oksï máteruechani erakuantapirini.

Erachi Rutherford uékasïrendi eska Jeobaeri kúnguarhikua sési japiringa. Mítespti eskaksï máru erachicha uékasïrenga máteru erachini erakuni para orhejtsïkuni Betelini enga Estados Unidos japka. Indeni ambe jimbo, kárselirhu uératini karta ma karakuaspti imechani engaksï tánguarhipiringa para arhiani eskaksï erachi Evander Cowardini erakupiringa. Rutherford arhiaspti eska Coward  kaxumbispka ka sési eratsintani ambe ma ka eska sési marhuakusïrenga Jeobani. Peru uánikuechaksï uékasïrendi eskaksï seisi kutsï erokuarhipiringa para máteru erachini erakuntani. Ístuksï májkueni uandasïrendi imecha engaksï kuájpiapka erachichani engaksï ónhakata japka. Máru erachichaksï uénaxaptia ikiani enga i ambe úkuarhini japka.

Peru tátsekua, ísï eska na uandantapka Richard Barber, jiájkani úkuarhispka ambe ma enga jarhuataapka paraksï orhepani uérakuni imani uandanhiatani. Erachi ma enga jima japka, uandaspti: “Ji no leichani estudiariuaska, peru paraka i ambe jurhimbitku úkuarhiaka, míteska ambe enga újka nema enga jurhimbitku jámajka. Tata Diosïjtsïni juramuchisïndi parachi jurhimbitku jámani. Eratsisïnga eskachi xarhatakuaka Tata Diosïni mintsinharhikua engachi ménderu erakuska erachi Rutherfordini para Betelini orhejtsïkuni” (Sal. 18:25).

Alexander Macmillan enga ístu ónhakata japka, uandaspti ambe enga úkuarhipka ísï pauandikua. Erachi Rutherford uanharhitakuspti seldarhu ka arhispti: “Petaata jájki”. Karta ma íntskuspti engaksï erachicha axakupka Rutherfordini. Macmillan arhintaspti kartani ka jirejiresï kuenta íntskukuarhispti ambe enga arhikuekenga. Ambe enga karta uandenga, xarhatasïrendi eska ménderu Joseph Rutherford, Charles Wise, ka William Van Amburgh jindepiringa engaksï orhejtsïkupiringa Betelini. Ísï jimbo, erachi Rutherford seguirini japirindi orhejtsïkuani iáminduechani.

Engaksï ocho erachicha ónhakata japka, Bibliaeri Jorhenguarhitichaksï sïranda ma kámaxapti paraksï kʼuiripuechani firmaritaraani nani engaksï kurhajkuarhini japka paraksï erachicha petanhantani kárselirhu. I erachicha ka pirenchicha engaksï no sáni chénga, jukari 700,000 firmechanksï tánaaspti. Antesi deksï erachicha pákuani indeni sïrandani juramutichani, mierkulisï 26 de marsu de 1919 jimbo, petataantasptiksïa kárselirhu erachi Rutherfordini ka máteru siete erachichani.

Erachi Rutherford arini ambe arhiaspti imechani engaksï erontapka: “Seguru jarhaska eska ambe engachi nitamakuarhika, úska eskachi listu jauaka para jiáni enga sánderu úkua jukaaka. [...] Na engajtsï xáni jánguarhintaka no jindesti parajtsï orheta erachichani petantaani kárselirhu. [...] Jánguarhintaskajtsï parajtsï jurhimbikua ambe uandantani; ka erachicha engaksï ini ambe úka, kʼéri kóntperata máestiksï”.

Ambe engaksï juesicha úpka erachicha jingoni, xarhataspti eska Jeoba jarhuataaxapka erachichani. Jurhiatikua 14 de maiu de 1919 jimbo, jusgadurhu anapuecha engaksï erachichani kuájpiani japka, ini ambeksï karaspti: “Iksï kʼuiripuecha engaksï demandarinhaka, nóksï ísï jusgarinhaxati [...] eska na jurhimbitkueka, ísï jimbo, nóksï ambe ma úminhaati”. Erachichaksï uánikua ambe arhinhasïrendi eskaksï no sési úspka, ka engaksï máru ambe jimbo útasï kulparinhapiringa, inde ambe karakata pakarapirindi eskaksï no sési úspka. Peruksï nóteru ambe ma arhiasptia. Ini ambe jimbo, juesi Rutherford seguirixapti abogadueni para Jeobaeri iretani  kuájpini para Tribunal Supremo de Estados Unidos no ma ambe úkuni ka uánikua xanhari ísï úspti enga na uéntapkia kárselirhu.

Erachi Macmillan uandaspti: “Nóchi ísku pakarapiringa erokuarhini jarhani eskajtsïni Tata Diosï auandarhu pápiringuia. Kuentachi íntskukuarhispka eskachi jatsispka para míteni ambe uékasïreni Tata Diosï eskachi úpiringa”.

Peru erachicha engaksï Bateli de Estados Unidos japka, nóksï úsïrendi ménderu úni imani ánchikuarhitani engaksï desde iónisï úpkia. ¿Andi nómbe? Jimboka jiáni engaksï erachicha ónhanhapka, iámindu ima ambe enga úrakuarhienga para publikasionichani imprimiriuani, nóteru marhuasïrendia. I ambe kánikua no sési pʼikuastaaspti erachichani ka máruksï eratsisïrendi sinksï nóteru aianhpepirinia.

¿Jarhaspiksï útasï kʼuiripuecha engaksï uékenga sánderu míteni Reinueri ambe engaksï Bibliaeri Jorhenguarhiticha aianhpienga? Para mókuntani ini kurhamarhikuani, erachi Rutherford uandaspti eska diskursu ma nitamatarapiringa ka iámindu kʼuiripuechanksï pʼimarhiapirindi. Erachi Macmillan uandaspti: “Iámindu ambe kʼamakurhipirindi enga no nema nipiringa”.

Ísï jimbo, nájkiruka erachi Rutherford kánikua pʼamenchani japka, 4 de maiuni 1919 jimbo, nitamataraspti diskursuni “La esperanza para la humanidad angustiada”, jini Los Ángeles (California). Tánguarhisptiksï 3,500 kʼuiripuecha ka útasïksï uánikuecha no úspti inchani. Ísï pauandikua, 1,500 kʼuiripuechaksï tánguarhispti. Erachichaksï mítesptia mókuntskuani: útasïksï jarhaspti kʼuiripuecha engaksï uékenga míteni Reinueri ambe.

Ambe engaksï erachicha úpka tátsekua, marhuasti eskachi asta iásï jamberi Jeobaeri testiguecha ísï aianhpiakia.

La Atalaya 1 de agostu de 1919 enga inglesi jimbo uérapka, uandaspti eska 1 de septiembrini kʼéri tánguarhikua ma japiringa para iáminduecha jini Cedar Point (Ohio). Misuri anapu tumbi Clarence Beaty enga Bibliaeri Jorhenguarhiti  máepka, miásïndi: “Iáminduechachi uandasïrenga eskachi jatsispka para jima jarhani”. Jukari seisi mili erachichaksï tánguarhispti, sánderu uáni ka eska na enga xáni erokuarhinhani japka. Jima no iauani enga japonda Erie japka, jukari dosientu kʼuiripuechaksï itsï atakuarhispti, inde ambe úspti eska imani kʼéri tánguarhikua jimbo kánikua ambakiti ambe úkuarhipiringa.

Jurhiatikua 5 de septiembrini 1919 jimbo, erachi Rutherford nitamarataspti “Discurso a los colaboradores”, nani enga jimbanhi rebista ma aianhpepka enga arhinhenga The Golden Age. * I rebista aianpepirindi jukaparhakua ambe enga úkuarhini japiringa parhakpinirhu ka Biblia jingoni xarhatani andisï ísï úkuarhini japi.

Iámindu Bibliaeri Jorhenguarhitichanksï pʼímarhiaspti paraksï no chéni ka aianhpini ini jimbanhi rebista jingoni. Karta ma enga uandenga na enga jatsipka para i ánchikuarhita úkuarhini, arhisïrendi: “Iáminduecha engaksï itsï atakuarhikia, miá je eska kʼéri kóntperata máeska marhuani ka jarhuajpini aianhpini ini xáni ambakiti ambe parhakpinirhu”. Uánikua kʼuiripu uékaspti aianhpini. Para disiembrinisï, jukari sinkuenta mili kʼuiripuechaksï kurhakuasptia Reinueri aianhpirichani ini rebistani.

Para 1919 kʼamarhukunisï, Jeobaeri testiguechaksï ménderu uénaspti ánchikuarhini ka kánikua uinhapikua jingoni. Ístuksï uánikua profesiaecha kumplirikuarhisptia engaksï últimu jurhiatikuecheri ambe uandajka. Malaquías 3:1-4 jimbo, tʼuini uandakata jarhasptia eska Tata Diosïri ireta tsʼéjkunhapiringa ka ístu pímbinhajkunhantani. Ka i tiempu kʼamakurhisptia. Ístu, Jeobaeri marhuarichaksï pʼímutanhantasptia relijioni no jurhimbiticheri ka Jesusi erakusptia jántspirini enga mintsinharhikueka ka jánhastiini * (Mat. 24:45; Jaŋ. 18:2, 4). Bibliaeri Jorhenguarhitichaksï listu jarhasptia paraksï imani ánchikuarhitani úni enga Jeoba íntsaapiringa.