1. ¿Andisï Jeoba jukancha parachi imantku marhuakuni?

JEOBA jukanchasti parachi imantku marhuakuni jimbokajtsïni ima kueraaska ka íntskuntsïni tsípikua (Jaŋ. 4:11). Peru, nájkirukachi xénchajka Jeobani ka janhanharhini, jarhasti máru ambe engajtsïni uáka ójkutani ka nóchi ísï kómarhini eska ima na jukanchaka. Ka parachi no jurajkuni eskajtsïni ambe ma ójkutaaka, jatsiskachi para míteni néna úpirini inde ambe úkuarhini. Joperu ju je orheta exeni ambe arhikuekasïni Tata Diosïntku marhuakuni.

2. Eska na arhijka Éxodo 34:14, ¿ambechi no jatsiski para úni engachi solu Jeobantku marhuakujka?

² Biblia uandasïndi eska aiakukuarhini Tata Diosïni, arhikuekasïnga kánikua xénchani imani. Ka imantku marhuakuni, arhikuekasïndi solu imani kómarhini. Nóchi jurajkusïnga eska juchari mintsita sánderu xénchaaka nemani o ambe ma ka eska Jeobani (arhinta je Éxodo 34:14).

3. ¿Andichisï Jeobantku marhuakujki?

³ Ambe engachi jorhenguarhika Jeobaeri ambe, ústi eskachi imantku marhuakuaka. Niáraskachi jorhenguarhini na enga jásï Tata Diosï máeka. Míteskachia ambe enga jaiapanhintajka ka ambe nómbe ka juchajtuchi májkueni eratsisïnga. Míteskachi ambe enga Jeoba uéjka para jucha ka jarhuatasïngachi paraka ísï úkuarhiaka engachi ísï irekajka eska ima na juramujka. Kʼéri kóntperata máesti engajtsïni Jeoba íntskujka sésikua parachi imeri amigueni (Sal. 25:14). Ambe engachi xáni jorhenguarhijka juchari Kuerajpiriri ambe, úsïndi eskachi sánderu andarhieraaka imani (Sant. 4:8).

4. a) ¿Ambe úrasïni Noambakiti parachi no Jeobantku marhuakuni? b) ¿Ambechi exea ini artikulu jimbo?

⁴ Noambakiti juramuxati parhakpinirhu ka úrasïndi indeni ambe parachi sánderu jukaparharani ambe engachi tsitijka ka eskachi úkua jukanchaaka pʼíngukuarhini imani ambe jimbo enga no sési jaka (Efes. 2:1-3; 1 Juanu 5:19). Uékasïndi eskachi  sánderu jukaparharaaka máteru ambe ka eskachi no Jeobantku marhuakuaka. Ju je exeni tsimani ambe enga úrajka. Orheta, úsïndi eskachi sánderu tsitiaka jatsikuarhikua ambe. Ka tsimani úni jámani, jánguarhintasïndi eskachi no sési erakuaka ambe engachi jingoni uéjka tsípikuarhini.

5. ¿Andichisï jatsi para jingontku jámani parachi no uékani jukari jatsikuarhikuekani?

⁵ Iáminduechachi uékasïnga jatsini t’irekua, xukuparhakua ka nani engachi irekaaka. Peruchi jatsiska para jingontku jámani parachi no jukari tsitini tuminani. Iásïksï uánikua kʼuiripuecha uékasïndi ‘jukari jatsikuarhikuekani’ (2 Tim. 3:2). Jesusi mítespti eskaksï imeri chúxapaticha niárapiringa indeni ambe tsitini, jimbosï uandapti: “No nema úsïndi marhuakuani tsimani patronichani, jimboka máechakuani ikiakuaka ka máteruni uékani, ka máechakuani andarhieraati, ka máteruni ísku exeni, ísï jimbo nójtsï uáka marhuakuni Diosïni ka jatsikuarhikuani” (Mat. 6:24). Ima enga kómarhijka Tata Diosïni ka májku tiempu jimbo kánikua jánguarhintani jarhani jatsikuarhikua ambe jatsini, ísïsti komu tsimani patronichani marhuakuani. No Jeobantkusï marhuakuni jati.

6. ¿Ambechi jorhenguarhisïni ambe enga Jesusi arhiapka kúnguarhikuarhu anapuechani enga Laodisea japka?

⁶ Primeru sigluni kʼamarhukunisï, kúnguarhikuarhu anapuecha enga Laodisea japka, uandasïrendiksï eskaksï jatsikuarhirispka, uánikua ambeksï jatsikuarhispti ka no ma ambeksï uétarhinchasïrendi. Peruksï Jeoba ka Jesusi ísï exeasïrendi eskaksï no tsípikua jingoni irekaxapka, lastima jingonksï exeasïrendi, nóksï ambe na jatsikuarhispti ka sieguenksï ka patsikʼasïksï jarhani. Jesusi jurhimberantaaspti peru no jimbokaksï jatsikuarhiripiringa, sino jimboka jatsikuarhikua ambe úxapka eskaksï no jatsipiringa ambakiti pájperakua ma Jeoba jingoni (Jaŋ. 3:14-17). Engachi kuenta íntskukuarhiska eskachi uénaxaka tsitini  jatsikuarhikua ambe, ju je jirejiresï úni ambe ma (1 Tim. 6:7,8). Engachi no ísï úska, ístuchi uénaaka tsimani ambe tsitini ka Jeoba no jiókuarhiati na engachi kómarhijka, jimboka ima uékasïnga eskachi imantku marhuakuaka (Deut. 4:24). ¿Ambe úpirini úni eskachi niárapiringa jukari tsitini tuminani?

7-9. ¿Ambechi jorhenguarhisïni ambe enga nitamakuarhipka orhejtsïkuti ma enga arhinhajka David?

⁷ Ju je exeni ambe enga nitamakuarhipka David, ambakiti orhejtsïkuti ma enga Estados Unidos anapueka. Ima ísï exekuarhisïndi eska ambakiti ánchikuarhiri máeska. Imani empresarhu enga ima ánchikuarhienga, úspti eska intsïnhapiringa sánderu kʼéri ka ambakiti ánchikuarhita ma ka niáraspti iámu paisirhu ísï mítekateni komu sánderu ambakiti ánchikuarhiri ma. Ima uandantasïndi: “Jiánisï, eratsisïrenga eskarini sési nichexapka jimbokarini Jeoba újchakuraxapka”. Peru ¿ísïspi?

⁸ David úndaspti exeni eska imeri ánchikuarhita no sési úkuxapka imeri pájperakuani Jeoba jingoni. Ima uandantasïndi: “Engani tánguarhikuecharhu jarhenga o asta aianhpikuarhu, ánchikuarhitarhu anapu ambe eratsini jarhasïrenga. Kánikua tumina andasïrenga peruni sánhani arhixapka sánderu kuatarani ka nóteru xáni sési pájperania juchiti uarhiiti jingoni”.

⁹ Jimajkani, David kuenta íntskukuarhispti eska jatsispka para sési eratsïntani ambe sánderu jukaparhakuespi para ima. Uandasïndi: “Uékaxapka sési péntani iámindu ambe”. Sési eratsintaspti na enga xántku ánchikuarhipiringa ka patronini aianguspti ambe enga uékenga úni. Ka indeni ambe jimbo, David tsïtaspti ánchikuarhitani, peru ¿ambe úspi ima? Uandantasïndi eska ísï pauandikua íntspintaspka solisitudi para prekursori auksiliarini mándani kutsï. Paraksï úni nitamakuarhini, ima ka imeri uarhiiti uénasptiksï ánchikuarhini kʼérati kʼumanchikuecharhu ambantskantani jámani. Enga nitamapkia sáni tiempu, David uénaspti  marhuani komu prekursori regulari ka tátsekua imeri témbajtu prekursora úkuarhispti. Imani ambeksï ánchikuarhisïndi enga no nema tsitijka úni, peruksï imecha no indeni ambe exesïndi. Nájkirukaksï nóteru xáni kánikua maiamunhajkia eska antesi, nóksï méni kuerhatanchasïndi ambe ma. Uékasïndiksï orheta marhuakuni Jeobani ka úsïndiksï imecha mismu exeni na enga Jeoba újchakuraajka imechani engaksï orheta pérajka Reinueri ambe (Mat. 6:31-33).

10. ¿Nénachi uá kuájchakuni juchari mintsitani?

¹⁰ Nájkirukachi sánititu o kánikua ambe jatsikuarhiaka, jatsiskachi para kuájchakuni mintsitani. ¿Nénachi uá ísï úni? No jukari tsitini jatsikuarhikua ambe ka no sánderu jukaparharani juchari ánchikuarhitani ka eska Jeobani marhuakuni. Parachi exeni sinchi no indeni ambe úxaki, ju je kurhamarhikuarhini: “¿Someni eratsini jarhasïni ánchikuarhiteri ambe engani tánguarhikuarhu jarhajka o aianhpikuarhu? ¿Méntkuni uandanhiani jarhasïni sini jatsia tumina sánderu orhepani? ¿Niárasïni arhirperani juchiti uarhiiti o acheeti jingoni tumina jimbo ka jatsikuarhikua ambe jimbo? Parani úni sánderu marhuakuni Jeobani, ¿uékapirini úni ánchikuarhita ma engaksï máteruecha no tsitijka?” (1 Tim. 6:9-12). Engachi ini ambe kurhamarhikuarhiska, ju je miáni eskajtsïni Jeoba uékasïnga ka arini ambe aiakuasïndi imechani engaksï mintsita jingoni marhuakujka: “Jíkini no méni késtakuchiaka ka níjtukini méni jurajkuni jandiajku”. Ini ambe jimbo, apostuli Pablu uandaspti: “Asï jáma je jatsikuarhikuekani” (Ebr. 13:5, 6).

11. ¿Nénajtsïni uá no sési úchini tsípikuarhita ambe?

¹¹ Jeoba uékasïndi eskachi sési nitamakuarhiaka ka uákachi ísï úni engachi tsípikuarhiska ambe ma jingoni. Asta Bibliarhu uandasïndi eska para kʼuiripu no jarhaska sánderu ambakiti ambe eska tʼireni, binu sáni arhani ka sési pʼikuarherani ánchikuarhita jimbo (Ecl. 2:24). Peru, sáno iámindu jásï tsípikuarhita enga parhakpinirhu jaka no sési útspisïndi, úsïndi eskachi no kúrhajchauaka Tata Diosïri juramukuechani ka asta úsïndi eska kʼuiripu niáraaka jiókuarhini o asta tsitini imani ambe enga Tata Diosïri Karakata no jaiapanhintajka.

12. Ísï eska na arhijka 1 Korintu 10:21, 22, ¿andichisï jatsi para sési erakuni ambe engachi jingoni tsípikuarhiaka?

¹² Juchachi uékasïnga Jeobantku marhuakuni, ísï jimbo, nóchi jatsiska para “arhani juchari Tateri tʼirekuani ka ístu noambakitiri espirituecheri tʼirekuani” (arhinta je 1 Korintu 10:21, 22). Sáno méntkisï, nemani jingoni tʼireni arhikuekasïndi eskachi  sési pájperasïnga imani jingoni. Imani ambe jingoni tsípikuarhini enga uarhiperakueri ambeka, sïkuamikueri, ísku jándikueri ka máteru jásï ambe jingoni engachi tsitijka ka ísï jámani eska parhakpini anapuecha, májkuenisti eska Tata Diosïri ikiatspiticha jingoni uaxakani tʼireni ka imani ambe arhani engaksï imecha úmantaka. Engachi indeni ambe újka, no soluchi jucha mismu no sési úkuarhinchasïnga, sino ístuchi nóteru sési pájperasïnguia Jeoba jingoni.

13, 14. a) ¿Néna sáno májkueniski tʼirekua ka tsípikuarhita ambe? b) Míteparini ambe enga uandajka Santiagu 1:14, 15, ¿andichisï no jatsi para méntku eratsini jarhani ikichakueni jásï ambe?

¹³ ¿Néna úpirini májkuenini tʼirekua ka ambe engachi jingoni tsípikuarhijka? Engachi tʼirejka úsïngachi exeni na engachi xáni auaka. Peru engachi na kunajkajkia, sïturhi uénasïndi ánchikuarhini, asta úni eska ima ambe enga tʼirekuarhu jukajka, marhuakuaka juchari kuerpuni. Imani ambe arhani engajtsïni sési úchijka, úsïndi eska juchari kuerpu sési jauaka, perujtsïni no sési úchesïndi engachi no sési tʼirejka. I ambe no mátirku xarharasïndi, sino ióni jimbo.

¹⁴ Májkuenisti, engachi erakujka ambe jingonchi tsípikuarhia, juchachi uandasïnga ambe engachi péraaka juchari eratsikuarhu. Peru tátsekua, eratsikua uénasïndi ánchikuarhini asta úni eskachi ísï eratsiaka ka pʼikuarherani seguni ambe engachi jingoni tsípikuarhiaka. Sésichi pʼikuarherasïnga engachi ambakiti ambe jingoni tsípikuarhijka, peru no ísï úkuarhisïndi engachi imani ambe jingoni tsípikuarhijka enga no sési jaka (arhinta je Santiagu 1:14, 15). Jamberi no sóntku xarharaati na engajtsïni xáni no sési úchiaka, peruchi tátsekua niáraaka kuenta íntskukuarhini. Jimbojtsïnisï Biblia arhijti: “Asï jáma je kʼarakuarhini, jimboka no nema uáka teresamurhani Diosïni, jimboka iámindu ambe enga ma kʼuiripu jukskaaka, indeni ambemindu pʼikuntaaka, jimboka ima enga jukskajka ambe enga imeri mintsita tamapu tsitijka, ístu pʼikuntaaka uarhikuani” (Gal. 6:7, 8). Jimbosï xáni jukaparhakueti eskachi no jámaaka imani ambe jingoni tsípikuarhini enga Jeoba kurhunhijka (Sal. 97:10).

15. ¿Ambejtsïni intsïmbiski Jeoba?

¹⁵ Uánikua Jeobaeri marhuarichaksï tsitisïndi exeni juchari programani JW Broadcasting^®. Pirenchi ma enga Marilyn arhinhajka, uandaspti: “I programarini jarhuatasti no eratsini jarhani imani ambe engarini kómu pʼikuastajka ka no jatsisïnga parani erakuni jarhani ambe engachi exeaka. Engani jandiajku o no sési pʼikuarherani jarhajka, méntkisï jarhasïndi diskursu ma, o tsípa anapu jorhenguarhikua ma engarini sési pʼikuastantajka. Inde ambe úsïndi eskani sánderu andarhieraaka Jeobani ka imeri organisasionini. Programa JW Broadcasting, merurini kánikua jarhuatasti”. ¿Marhuataxakichi ambe engajtsïni Jeoba intsïmbijka? Aparte de i programecha engaksï mándani kutsï uérajka, uákachi na uéjki jatini exeani uánikua bideuechani, ístu kurhauani programechani engaksï grabadu jaka ka pirekuechani engajtsïni uinhaperantajka.

16, 17. ¿Andichisï jatsi para no xáni tiempu úrani tsípikuarhita ambe jingoni ka nénachi uá ísï úni?

¹⁶ No solu uétarhisïndi jingontku exeni na engachi jásï ambe jingoni tsípikuarhiaka. Ístuchi jatsiska para exeni na engachi xáni tiempu úrajka, jimbokachi úpiringa sánderu tiempu úrani ka eska Jeobani marhuakuni. Máruksï úkua jukanchasïndi pʼíngukuarhini. Por ejemplu, pirenchi ma enga 18 jatirikia ka Abigail arhinhani, uandantasïndi: “Tele exeni, úsïndi eskani sáni mintsikuarhiaka engani na uánikua ambe újkia ma jurhiatikua jimbo. Peru engani no jingontkuni jarhajka, pakareerasïnga tele exeni”. Ka tumbi ma enga Samuel arhinhajka,  uandasïndi: “Ménisï, méntkuni jupikasïnga exeani bideuechani Interneti jimbo. Ma jingoni uénasïnga ka engani jamberi kuenta íntskukuarhijkia tʼuini tanimu o kuatro ora nitamasïndia”.

¹⁷ ¿Ambechi úa parachi no xáni tiempu úrani tsípikuarhita ambe jingoni? Orheta, ju je exeni na xánchi meru tiempu úrasïni para tsípikuarhini. Ka para ísï úni, úpiringachi kalendariu ma jimbo karani na engachi xáni tiempu úrajka ma semana jimbo para tele exeni, Internetirhu inchani ka chʼanani tabletarhu o selularirhu. Engachi kuenta íntskukuarhiska eskachi jukari tiempu úrasïnga ini ambe jimbo, ju je jánguarhintani karani ambe engachi orheta uáka. Ju je orheta karani imani ambe enga sánderu jukaparhakueka ka tátsekua arhutani tiempu para tsípikuarhini. Tátsekua, ju je kurhakuni Jeobani eskajtsïni jarhuataaka ísï úni. Ísïchi jatsiaka tiempu ka uinhapikua para Bibliani estudiarini, familieri jorhenguarhikua jatsini, tánguarhikuecharhu nirani, aianhpini ka Jesusiri chúxapatichani uáni. Ístuchi no no sési pʼikuarheraaka engachi arhutaska sáni tiempu para tsípikuarhini.

18, 19. ¿Nénachi uá xarhatani eskachi Jeobantkusï marhuakujka?

¹⁸ Enga apostuli Pedru karapkia na enga kʼamajkunhaaka Noambakitiri parhakpini ka enga jimbanhi parhakpini jauakia, uandaspti: “Juchiti ermanuecha engaksïni ji xáni uékajka, engajtsï ísï erokuarhini jaka iámindu ini ambe, jimajkani jánguarhi je mintsita jingoni sési jámani, parakajtsï nómbe kʼamanharhintskua jingoni exenunguanhaaka, ka ístu no ma ambe jimbojtsï kʼuratsekueni uérani, ka parakaksïni ima pínandikua jingoni exenunguaka” (2 Ped. 3:14). Engachi ísï úska eska i karakata na uandajka ka jánguarhintanchi na engachi xáni uáka ísï irekani ka kómarhini Tata Diosïni eska ima na jaiapanhintajka, xarhatanchi jauaka eskachi Jeobantkusï marhuakujka.

¹⁹ Noambakiti ka imeri parhakpinijtsïni seguirini jauati tsʼéjkuni parachi sánderu jukaparharani máteru ambe (Luk. 4:13). Peru náki uéjki uandanhitachi jatsini, nóchi jurajkuaka eska juchari mintsita sánderu xénchaaka nemani o ambe ma ka eska Jeobani. Eratsitixakachi úni ambe enga solu Jeobajku jukanchaka: imantkuchisï jatsika para marhuakuni.