SEMANA 41
Ju je seguirini marhuakuni Jeobani enga kʼéri mískuarhita úkuarhiaka
“Xéncha je Jeobani iámindu cha engajtsï no méni jurajkujka imani. Jeoba kuájchakuasïndi imechani engaksï méntkisï marhuakujka” (SAL. 31:23).
PIREKUA 129 Juchachi no méni kuatantaaka
AMBE ENGACHI EXEAKA *
1, 2. a) ¿Ambeksï uandaa no ióni jimbo juramuticha? b) ¿Náki kurhamarhikuechanchi mókuantaua?
JU JE eranhaskani eska parhakpini anapu juramutichaksï iáiasï uandaskia “pínandisti ka sésichi nitamaxaka”. Jamberiksï uandani jauati eska no méni xáni pínandikua jarhaspka ka xáni sési irenhani. Ka uékaatiksï eskachi jakajkuaka eskaksï imecha úsïnga sési péntaani parhakpini anapu problemechani. Peru no ísïuati, jimbokaksï no ma ambe uáka úni para pʼínguni ambe enga tátsekua úkuarhiaka. ¿Andi? Jimboka Biblia uandasïnga eska ‘jimajkaniminduksïsï no sési úkuarhinchaaka’ ka “jimajkani no nema uáti kuájpikuarhini” (1 Tes. 5:3).
2 Jimajkani, jatsiskachi para mókuantaani máru kurhamarhikuechani engaksï jukaparhakueka: ¿Ambe úkuarhia kʼéri mískuarhitarhu? ¿Ambe uékasïni Jeoba eskachi uáka jiájkani? Ka ¿ambechi uá úni iáiasï parachi no jurajkuni Jeobani enga inde ambe úkuarhiaka? (Mat. 24:21).
AMBE ÚKUARHIA KʼÉRI MÍSKUARHITARHU
3. Eska na arhijka Jaŋaskuecha 17:5, 15-18, ¿Tata Diosï néna kʼamajkua Kʼéri Babiloniani?
3 (Arhinta je Jaŋaskuecha 17:5, 15-18). “Kʼéri Babilonia” kʼamajkunhaati ka eskachi na uandakia, juramutichaksï no ma ambe uáti úni paraka no ísï úkuarhiaka. ¿Andi? Jimboka Tata Diosï eratsitarauaka paraksï úni ambe enga ima uéjka. ¿Ambeski enga Tata Diosï uéjka? kʼamajkuani iámindu relijionichani engaksï no jurhimbitiika, asta imechani engaksï seguni uandajka eskaksï kristianueska peru engaksï no jorhentpijka kʼéri ambe arhini Jeobani ísï eska ima na jaiapanhintajka. Tata Diosï eratsitarauati ini ambe imani “diesi sïuanguechani” engaksï animali charhapitirika. Diesi sïuanguechaksï arhikuekaasïndi iámindu parhakpini anapu juramutichani engaksï ini animalini apoiarijka ka i animali, arhikuekasïndi paisichani engaksï kúnguarhintatini jaka (Naciones Unidas) (Jaŋ. 17:3, 11-13; 18:8). Engaksï i juramuticha uénaakia relijioni no jurhimbitini kʼamajkuni, arhikuekaati eska uénakuarhiakia kʼéri mískuarhita. Ambe máeuati enga mátirku úkuarhiaka interu parhakpinirhu ka enga meru kánikua no sési jánhaskuarhiaka.
4. a) ¿Jamberiksï ambe aianhpia juramuticha andiksïsï kʼamajkuaua relijioni no jurhimbitichani? b) ¿Jamberiksï ambe uá kʼuiripuecha engaksï antesi relijioni no jurhimbiticha jingoni tánguarhienga?
4 Nóchi míteska ambe engaksï aianhpiaka juramuticha andiksïsï uékaa kʼamajkuni Kʼéri Babiloniani. Jamberiksï uandaati eskaksï relijionicha ójkutpisïnga para úni pínandikua jarhani ka eskaksï someni inchamukusïnga politikarisï. Oksï jamberi uandaati eskaksï relijionicha jukari uánikua ambe jatsikuarhiskia (Jaŋ. 18:3, 7). Peru engaksï juramuticha uénaaka kʼamajkuani, jamberiksï no uandikuauati kʼuiripuechani engaksï relijioni no jurhimbitichani jingoni tánguarhijka, sino relijionichani. Engaksï relijionicha nóteru jauakia, kʼuiripuecha engaksï imecha jingoni tánguarhienga kuentaksï íntskukuarhiati eskaksï imecheri orhejtsïkuticha no jarhuataaska ka jamberiksï jánguarhintaati jurajkuani imani relijionichani.
5. ¿Ambe aiatspiski Jeoba kʼéri mískuarhiteri ambe ka andi?
5 Biblia no arhisïndi na xáni ióndaa kʼamajkunhani Kʼéri Babilonia, ambe engachi kʼóru míteka, jisdesti eska no ióndakuarhiaka (Jaŋ. 18:10, 21). Jeoba aiatspesti eska mískuarhita no xáni ióndaaka kʼamakurhini paraksï imeri erakukatecha ka relijioni jurhimbiti no kʼamajkunhani (Mar. 13:19, 20). Peru ¿ambe uékasïni Jeoba eskachi uáka jiáni enga uénakuarhiaka kʼéri mískuarhita asta Armajedonirhu jamberi?
JU JE SEGUIRINI MARHUAKUNI JEOBANI
6. ¿Ambe uékasïni Jeoba eskachi uáka imeri marhuaricha?
6 Eskachi na exekia máteru artikulu jimbo, Jeoba uékasïndi eskachi méntku jurajkuaka Kʼéri Babiloniani. Peru ístu uétarhisïndi eskachi uáka máteru ambe. Jatsiskachi para eratsitini jarhani seguirini marhuakuni Jeobani. Ju je exeni tsimani ambe engachi uáka úni.
Nóchi méni jurajkuaka tánguarhini ni jiáni enga úkua jukaaka. (Exe je párrafu 7). *
7. a) ¿Nénachi xarhatasïni eskachi meru úsïnga ambe enga Jeoba juramujka? b) Eska na arhijka Ebreu 10:24, 25, ¿andisï xáni jukaparhakue eskachi tánguarhiaka, sánderia iásï?
7 Orheta, jatsiskachi para meru ísï úni eskaksï Tata Diosïri juramukuecha na uandajka. Nóchi jatsiska para jiókuarhini imani ambe engaksï kʼuiripuecha jorhentpijka ni na engaksï jámajka. Por ejemplu, méntkuchi no sáni jaiapanhintasïnga iámindu jásï ísku jándikua ambe, ni enga tataka ma máteru tataka jingoni témbuperajka o enga nanaka ma máteru nanaka jingoni uambuchajka ka ni enga tataka ma nanakeni jámajka o nanaka ma tatakeni jámajka (Mat. 19:4, 5; Rom. 1:26, 27). Tsimani úni jámani, jatsiskachi para seguirini Jeobani marhuakuni juchari erachichani jingoni. Ka ísïchi úsïnga nani engachi uáka, ia sea Kʼumanchikua Reinuerirhu, o enga uétarhiaka, erachicheri kʼumanchikuecharhu ka asta sïpatikuarku. Ambe uéjki úkuarhini, jatsiskachi para seguirini tánguarhini parachi marhuakuni Jeobani. Jatsiskachi para ísï úni, sánderia “iásï engachi exeni jaka eska juchari Táteri jurhiatikua janoxamkia” (arhinta je Ebreu 10:24, 25).
8. ¿Jamberichi sánderu orhepani ambe aianguauaia kʼuiripuechani?
8 Jamberichi máteru ambe aianhpiakia kʼéri mískuarhita jimbo. Ini jurhiatikuecha jimbo, ambakiti ambechi aianhpixaka Reinueri ka jánguarhintaxakachi Jesusiri chúxapatichani uáni. Peru jamberichi jiáni máteru ambe aianhpiakia. Biblia uandasïndi eska ambe engachi aianhpiaka, ísïuaka komueska tsakapuecha xanuateri (Jaŋ. 16:21). Jamberichi aianhpiaka eska Noambakitiri parhakpini kʼamajkunhaakia. Sánderu tátsekuachi niáraka míteni ambe engachi aianhpiaka ka nénachi úa. ¿Seguirinchi jaua májkueni aianhpini eskachi na úkia jukari sieni uéxurhini jimbo, ochi ménderueni uáia? Parachi indeni ambe míteni, jatsiskachi para erokuarhini. Néna uéjki, peekachi intsïnhaaka kʼéri kóntperata parachi no chéparini aianhpini eska Jeoba jusgarpeaka (Ezeq. 2:3-5).
9. ¿Ambeksï uá juramuticha engaksï kurhauaka ambe engachi aianhpini jauaka, peru amberichi uá seguru jarhani?
9 Jamberi ima ambe engachi aianhpini jauaka, uáti eskajtsïni juramuticha jánguarhintaaka pʼínguni. Ísï eskachi iásï na mintsikajka Jeobani aianhpikuarhu, ístuchi májkueni mintsikaaka jiáni. Uákachi seguru jarhani eskajtsïni Jeoba íntskuaka uinhapikua parachi úni ambe enga ima uéjka (Miq. 3:8).
JU JE LISTU JARHANI PARA JIÁNI ENGA TATA DIOSÏRI IRETA UÉNAAKA NO SÉSI KÁNHANI
10. Eska na karakata jaka Lukasʌ 21:25-28 jimbo, ¿ambe uá sáno iámindu kʼuiripu enga exeaka ambe enga úkuarhini jauaka kʼéri miskuarhitarhu?
10 (Arhinta je Lukasʌ 21:25-28). Kʼéri mískuarhitarhu, kʼuiripuechaksï kánikua chéati jimbokaksï uénaaka exeni eska no marhuaxaka ambe engaksï xáni mintsikenga. Enga uénaakia no sési jánhaskuarheni, ambe ma enga no méni úkuarhini japka, kʼuiripuechaksï kánikua uandanhiauati ka nóksï uékaati uarhini (Sof. 1:14, 15). Ísï jimbo, jamberi kánikua úkua jukaati, asta para Tata Diosïri marhuaricha. Jamberichi no sési nitamakurhiaka jimbokachi no parhakpini anapueska. Jamberichi no jatsiaka imani ambe enga meru uétarhijka.
11. a) ¿Andijtsïnisï kʼuiripuecha solu juchantsïni exeni jaua? b) ¿Andichisï no jatsi para chéni kʼéri mískuarhitarhu?
11 Niáraati ima jurhiatikua engaksï kʼuiripuecha, engaksï exeka na engaksï kʼamajkunhaka imecheri relijionicha, kánikua ikiauaka jimboka Jeobaeri testiguecheri relijioni no kʼamajkunhaska. I ambe uáti eskachi iápurisï no sési exenhaaka, asta Internetirhu ísï. Kʼuiripuecha ka imecheri juramuti enga jindeka Noambakiti, kánikuajtsïni kurhunhiati jimboka solu juchari relijioniterku jauakia. Nóksï uáti kʼamajkuni relijionini ixú Echerirhu. Ísï jimbo, solujtsïni juchantsïnterkusï exeni jauatia. Jiájkani, iámindu parhakpini anapu juramuticha engaksï kúnguarhintaaka, niáraatiksï jindeni Gog de Magog. * Kúnguarhintaatiksï paraksï no sési kámani Tata Diosïri iretani ka paraksï méntku kʼamajkuni (Ezeq. 38:2, 14-16). Jimbokachi no míteska iámindu ambe, jamberichi uandanhiauaka imani ambe jimbo enga kʼéri mískuarhitarhu úkuarhiaka. Peruchi uáka seguru jarhani eskachi no jatsiska para chéni kʼéri mískuarhitarhu jimbokajtsïni Jeoba arhiaka ambe engachi uáka parachi no uarhini (Sal. 34:19). Anhaxurhitinchi jauaka ka karhakua ísïchi eranchiaka jimbokachi míteaka eskachi pʼímutanhantaakia. *
12. ¿Nénajtsïni jorhendaxaki jántspiri enga mintsinharhikueka ka jánhastiini imani ambe jimbo enga sánderu orhepani úkuarhiaka?
12 Jántspiri enga mintsinharhikueka ka jánhastiini, jorhendaxatijtsïni parachi no jurajkuni Jeobani kʼéri mískuarhitarhu (Mat. 24:45). Mámaru ambe ústia, peru ju je exeni ma ejemplu, kʼéri tánguarhikuecha rejioniri engachi jiáni jatsiapka engachi meru uétarhinchaani japka de 2016 a 2018. Ichajtsïni jarhuatasti parachi sánderu xarhataani máru kualidadichani enga jamberi janoaka Jeobaeri jurhiatikua. Ju je miáuantaani nákiskiksï.
JU JE SEGUIRINI JÁNGUARHINTANI PARACHI NO MÉNI JURAJKUNI JEOBANI, TEKAANTANI KA NO CHÉNI
Ju je desde iásï listu jarhani parachi úni tsípiti pakarani kʼéri mískuarhitarhu. (Exe je párrafu 13 a 16). *
13. ¿Nénachi uá úni parachi no jurajkuni Jeobani ka andichisï jatsi para ísï úni desde iásï?
13 No méni jurajkuni Jeobani. Kʼéri tánguarhikuarhu 2016, enga ahinhapka: “Ju je no méni jurajkuni Jeobani”, jorhendastijtsïni eskachi no méni jurajkuaka Jeobani engachi ambakiti pájperakua ma jatsiaka imani jingoni. Miátantastijtsïni eskachi andarhierasïnga Tata Diosïni engachi mintsita jingoni kómarhijka ka estudiariparini imeri Karakatani. Í ambejtsïni uinhaperantaati parachi úni orhepani uérakuani asta sánderu kʼérati uandanhiatechani. Enga na sánhani arhini jauaka niárani ima jurhiatikua enga Noambakitiri parhakpini kʼamajkunhaaka, sánderuchi úkua jukanchaaka marhuakuni Jeobani ka imeri Reinuni. Jamberijtsïni kʼuiripuecha seguirini jauati teresmarhuni (2 Ped. 3:3, 4). Ma ambe jimbo engaksï indeni ambe uáka, jindesti jimbokachi no apoiarisïnga politikani. Jatsiskachi para desde iásï eratsitini jarhania no jurajkuni Jeobani parachi úni tekaantani kʼéri mískuarhitarhu.
14. a) ¿Ambe úkuarhia imani erachicha jingoni engaksï orhejtsïkujka ánchikuarhitani ixú Echerirhu? b) ¿Andichisï jatsia para úni ambe engajtsïni erachicha arhiaka?
14 Kʼéri mískuarhitarhu, mójtakurhiati ambe ma imani erachicha jingoni engaksï orhejtsïkujka ánchikuarhitani ixú Echerirhu. Niáraati jurhiatikua engaksï iámindu erakukatecha engaksï pakarani jauaka Echerirhu, auandarhu niuaka paraksï uarhipeni Armajedonirhu (Mat. 24:31; Jaŋ. 2:26, 27). Ísï jimbo, nóteru juchantsïni jingoni jauatia Grupu enga Orhejtsïkuajka iámindu kúnguarhikuechani. Ambe uéjki úkuarhini, Tata Diosïri marhuarichaksï seguirini jauati sési ánchikuarhini ka májku kʼéri. Ambakiti erachicha engaksï máteru karichicha jingoni kuenta úkuarhijka, orhejtsïkuatiksï juchari ánchikuarhitani. Seguirinchi jauaka marhuakuni Jeobani engachi apoiariuaska ini erachichani ka kurhajchaani ambe engajtsïni arhiaka Tata Diosïri juramukua jimbo. Engachi ísï úska, uákachi tsípiti pakarani.
15. ¿Nénachi uá sánderu tekaantskua xarhatani ka andisï uétarhijki eskachi desde iásï ísï uáka?
15 Tekaantani. Kʼéri tánguarhikua 2017, arhinhaspti: “¡Asï kuatanta je!”. Jorhenguarhiskachi eska para tekaantani, no uétarhisïnga eska iámindu ambe sési jauaka, sino eskachi mintsikaaka Jeobani (Rom. 12:12). Ju je no méni mirikurhini arini Jesusiri aiatsperakuani: “Ima enga tekaantaka asta kʼamarhutani jamberi, ima jindeuati enga pʼímutantskateaka” (Mat. 24:13). I ambe arhikuekasïndi eskachi jatsiska para méntkisï marhuakuni Jeobani náki uéjki uandanhiatachi jatsini. Desde iásï tekaantani, uátijtsïni sánderu uinhaperantani para jiáni enga kʼéri mískuarhita janoaka.
16. ¿Andichisï no chéjki ka nénachi uá úni iásï parachi sánderu balori jukani?
16 No chéni. Kʼéri tánguarhikua 2018, arhinhaspti: “¡Asï ché je!”. Miátantastijtsïni eska engachi no chéjka, no jindeska jimbokachi meru balori jukariska, sino jimbokachi mintsikasïnga Jeobani, májkueni eska para úni tekaantani. ¿Ambechi uá úni parachi sánderu mintsikani Jeobani? Pauani pauani arhintani Bibliani ka eratsintani néna jarhuataaspi Tata Diosï imeri marhuarichani ióntki (Sal. 68:20; 2 Ped. 2:9). Engajtsïni kʼuiripuecha uénaaka no sési kámani kʼéri mískuarhitarhu, jatsiakachi para balori jukani ka sánderu mintsikani Jeobani eska no méni (Sal. 112:7, 8; Ebr. 13:6). Engachi iásï mintsinharhiska Jeobani, nóchi chéaka engajtsïni Gog uénaaka no sési kámani. *
TSÍPIKUA JINGONCHI EROKUARHIXAKA PARACHI PʼÍMUTANHANTANI
No ióni jimbo, Jesusi ka uánikua ánjelichaksï kʼamajkuauati Tata Diosïri ikiatspitichani guerrarhu enga arhinhajka Armajedoni (Exe je párrafu 17).
17. ¿Andichisï no jatsi para chérhini Armajedonini? (Exe je dibujuni enga uénakuarhu jaka).
17 Eska na uandaka máteru artikulu, sáno iáminduechachi irekaska ini últimu jurhiatikuecha jimbo. Peru ístuchi uékasïnga tsípiti pakarani kʼéri mískuarhitarhu. Armajedoni jimbo méntku kʼamajkunhaati i parhakpini. Peruchi no jatsiska para chéni, jimboka Tata Diosïsï uarhipeaka (Prov. 1:33; Ezeq. 38:18-20; Zac. 14:3). Na enga jatini Jeoba uandaaka, Jesusi orhejtsïkuati uarhiperakuani. Jesusi jingonksï jauati erakukatecha engaksï tsíntaakia ka uánikua ánjelicha. Iáminduechaksï májku kʼéri uarhiperaati Noambakiti ka demoniuecha jingoni ka ístu uánikua kʼuiripu parhakpinirhu anapuecha jingoni (Dan. 12:1; Jaŋ. 6:2; 17:14).
18. a) ¿Ambejtsïni aiacheski Jeoba? b) ¿Nénajtsïni jarhuatasïni Jaŋaskuecha 7:9, 13-17 parachi mintsikani ambe enga úkuarhiaka sánderu orhepani?
18 Jeobajtsïni arini ambe aiachesïndi: “No ma arma enga únhaaka parakini no sési úcheni úati ísï úni” (Is. 54:17). ‘Uánikua kʼuiripuecha’ engaksï Tata Diosïri marhuarika, tsípitiksï pakaraati kʼéri mískuarhitarhu ka seguiriuatiksï marhuakuni Tata Diosïni (arhinta je Jaŋaskuecha 7:9, 13-17). ¿No ísïski eskajtsïni Biblia uánikua ambe aiangusïndi parachi úni mintsikani ambe enga úkuarhiaka sánderu orhepani? Míteskachi eska ‘Jeoba kuájchakuasïnga imechani engaksï méntkisï marhuakujka’ (Sal. 31:23). Iáminduecha engachi xénchajka ka kʼéri ambe arhini Jeobani kánikuachi tsípikua jingoni irekaaka enga Tata Diosï pímbinhajkuntaakia imeri nombrini (Ezeq. 38:23).
19. ¿Náki ambakiti aiatsperakua úkuarhia no ióni jimbo?
19 Ju je eranhaskani na enga uandapiringa 2 Timoteo 3:2-5, imani kʼuiripuecheri engaksï jimbanhi parhakpinirhu irekaaka enga Noambakiti nóteru jauakia (exe je rekuadruni “ Na engaksï jásïuaka kʼuiripuecha sánderu orhepani”). Erachi George Gangas, * enga Grupurhu japka enga Orhejtsïkuajka iámindu kúnguarhikuechani, arini ambe uandaspti: “¡Xáni enga sési jánhaskuarhiaka parhakpinirhu engaksï solu erachicha ka pirenchicha jauakia! No ióni jimbo, intsïnhaatiksï kʼéri kóntperata para irekani jimbanhi parhakpinirhu, xánksï ióni irekaati eska Jeoba. Irekaakachi para méntkisï”. ¿A no eska ambakiti aiatsperakua máeska?
PIREKUA 122 ¡Ju je uinhapiti jarhani!
^ párr. 5 Míteskachi eska no ióni jimbo, interu parhakpinirhu kʼéri mískuarhita ma jauaka. ¿Ambechi úkuarhincha jucha engachi Tata Diosïni marhuakujka? ¿Ambe uékasïni Jeoba eskachi úni jauaka enga i ambe úkuarhini jauaka? ¿Náki kualidadichanchi jatsiski para sánderu xarhataani iásï, parachi no méni jurajkuni Jeobani? Í artikulujtsïni mókuchintaati ini ambe.
^ párr. 11 JUKAPARHAKUA AMBE: Uandakua Gog de Magog ka ístu ari uandakua Gog, arhikuekasïndi iámindu parhakpini anapu juramutichani engaksï kúnguarhintaaka paraksï no sési kaani Jeobaeri marhuarichani jiáni enga kʼéri mískuarhita úkuarhini jauaka.
^ párr. 11 Librurhu El Reino de Dios ya está gobernando kapitulu 21 jimbo, jarhasti sánderu informasioni enga arhijka ambe enga orheta úkuarhiaka antesi de Armajedoni. Ka rebistarhu La Atalaya del 15 de juliu de 2015, pájina 14-19, jarhasti sánderu informasioni enga uandajka enga Gog de Magog uénaaka no sési kámani Tata Diosïri iretani ka na enga Jeoba kuájchakuaka Armagedonirhu.
^ párr. 16 Kʼéri tánguarhikua rejioniri 2019 enga arhinhajka: “¡Uékperakua no méni kʼamakurhisïndi!”, Úsïndi eskachi seguru jauaka eskajtsïni Jeoba méntkisï uékperakua jingoni kuájchakusïnga (1 Kor. 13:8).
^ párr. 19 Exe je artikuluni “Sus obras lo siguen”, enga rebistarhu uéraka La Atalaya del 1 de disiembri de 1994.
^ párr. 64 AMBE ENGA XARHATAJKA IMAJENI: Kʼéri mískuaurhitarhu, namunitu erachicha engaksï no chéjka, juátarhuksï úxati imecheri tánguarhikuani.
^ párr. 66 AMBE ENGA XARHATAJKA IMAJENI: Uánikua kʼuiripuecha engaksï Tata Diosïri marhuarika, tsípitiksï pakarasïndi kʼéri mískuarhitarhu ka kánikuaksï tsípixati.
