1. ¿Andichisï seguru jaki eskachi últimu jurhiatikuecha jimbo irekaxaka?

ENGACHI 1914 ísï tátsekua andajpenuka, irekaskachi iámindu “últimu jurhiatikuechani jimbo” ini parhakpiniri (2 Tim. 3:1). Iáminduechachi notisiarhu ísï kurhaasïnga imani ambe enga Jesusi uandapka eska úkuarhipiringa ini jurhiatikuecha jimbo: guerra ambe, kʼarhingua, kʼérati jenchekuechani, kʼérati pʼamenchakua ambe, sánderuksï uáninia no sési úricha ka no sésiksï kaani Tata Diosïri marhuaricha ka máteru ambe (Mat. 24:3, 7-9, 12; Luk. 21:10-12). Ístuchi exesïnga eska kʼuiripu ísï jámasïnga eska apostuli Pablu na uandapka (exe je rekuadruni “ Na engaksï jásïka iásï anapu kʼuiripuecha”). Tata Diosïri marhuarichachi seguru jarhaska eskachi irekaxaka imani tiempu jimbo engaksï kʼamakurhiakia últimu jurhiatikuecha (Miq. 4:1).

2. ¿Náki kurhamarhikuechanchi jatsiski para mókuantaani?

² Jimboka ióni nitamaskia desde 1914 uératini, axuterku jarhastia paraksï últimu jurhiatikuecha kʼamakurhini. No ióni jimbo, no sési úrichaksï kʼamajkunhaati, ísï jimbo ju je mókuantani tsimani kurhamarhikuechani engaksï jukaparhakueka: ¿Ambe úkuarhia engaksï kʼamakurhini jauakia últimu jurhiatikuecha? Ka ¿ambe uékasïni Jeoba eskachi úni jauaka enga jamberi ísï úkuarhiaka?

3. Eska na arhijka profesia 1 Tesalonika 5:1-3 jimbo, ¿ambeksï uandaa juramuticha?

³ (Arhinta je 1 Tesalonika 5:1-3). Apostuli Pablu, Tata Diosïri jurhiatikueri ambe uandasïndi. Ini karakata jimbo, arhikuekasïndi imani tiempuni enga uénaaka kʼamajkunhani “Kʼéri Babilonia” —engaksï interu parhakpini anapu no jurhimbiti relijionicheka—  ka Armajedoni jingoni kʼamakurhiati (Jaŋ. 16:14, 16; 17:5). Sánititu antesi de uénakuarhini inde “jurhiatikua”, uandanhaati eska iásï kʼóru pínandikua jarhaskia ka sési irenhani. Parhakpini anapu juramutichaksï ménisï úrasïndi indeni uandakuani paraksï arhikuekani eskaksï jánguarhintaxaka sánderu sési pájperani iámindu paisicha jingoni. * Peru enga Biblia arhijka eska uandanhaaka “pínandisti ka sésichi nitamaxaka”, no májkueniuati. ¿Andi? Jimboka enga indeni ambe uandanhaaka, uánikua kʼuiripu eratsiati eskaksï juramuticha iásï kʼóru úskia paraksï kʼuiripuecha sánderu seguru irekani echerirhu. Peru no ísïuati, sino jimajkaniminduksïsï no sési úkuarhinchaati (Mat. 24:21).

4. a) ¿Ambe ka ambechi no míteski enga uandanhaaka “pínandisti ka sésichi nitamaxaka”? b) ¿Peru ambechi kʼóru míteski?

⁴ Míteskachi máru ambe enga jiáni úkuarhiaka enga uandanhaaka “pínandisti ka sésichi nitamaxaka”. Peru jarhasti máru ambe engachi no míteka, por ejemplu, ambe uá eskaksï juramuticha indeni ambe uandaaka ka nénaksï aianhpia. Ístuchi no míteska sinksï ma ambejku aianhpia o uánikua ambe. Néna uéjkiini, jarhasti ambe ma engachi kʼóru míteka: eskachi no jatsiska para indeni ambe jakajkuni ka eratsini eskaksï juramuticha uáka para interu parhakpinirhu pínandikua jarhani. Sánderu sési, indeni ambechisï erokuarhini jaka, engajtsïni aianguaka eska Jeobaeri jurhiatikua uénakuarhiakia.

5. ¿Nénajtsïni jarhuatasïni 1 Tesalonika 5:4-6 parachi jingontku jarhani Jeobaeri jurhiatikua jimbo?

⁵ (Arhinta je 1 Tesalonika 5:4-6). Pablu uandasïndi ambe engachi jatsika para úni parachi listu jarhani Jeobaeri jurhiatikua jimbo. Nóchi jatsiska para kʼuíni jarhani ísï “eska máteruecha”, sino tsínharhitini jarhani ka jingontku. Por ejemplu, jatsiskachi para jingontku jámani parachi no inchamukuni politikarhisï ka uénanchi apoiarini indeni ambe. Engachi indeni ambe úpiringa, uénapiringachi parhakpini anapuecha jingoni kuenta úkuarhini (Juanu 15:19). Míteskachi eska solu Tata Diosïri Reinu uáka eska pínandikua jauaka interu parhakpini.

6. ¿Amberichi uékasïni jarhuatani kʼuiripuni ka andi?

⁶ Ístuchi uékasïnga jarhuataani máteruechani paraksï tsínharhini, i ambe arhikuekasïndi, jarhuataani míteni ambe enga arhijka Biblia eska úkuarhiaka ini parhakpini jingoni. Ju miáni eska enga na uénakuarhiakia kʼéri mískuarhita, nóteru tiempueuatia paraksï kʼuiripuecha andarhierani Jeobani, jimbosï uétarhijti eskachi niuaka aianhpini. *

7. ¿Ambe uékasïni Jeoba eskachi úni jauaka iásï?

⁷ Ini sánititu tiempu enga pakarani jaka antesi de janoni “Tateri jurhiatikua”, Jeoba erokuarhisïndi eskachi okupadu jauaka aianhpikuarhu. Jatsiskachi para exeni eskachi ‘méntku jauenaxaka úni Diosïri úkuani’ (1 Kor. 15:58). Enga Jesusi uandapka ambe enga xáni úkuarhipiringa últimu jurhiatikuecha jimbo, uandaspti ambe engachi úpiringa Tata Diosïri marhuaricha. Uandaspti: “Peru uétarhisïndi eska orheta iápuru nasionicharhisï eianhpinhaaka ambakiti eianhperakua” (Mar. 13:4, 8, 10; Mat. 24:14). Ju je eratsini arini ambe: méni engachi nirajka aianhpini, jarhuajpisïngachi paraka kumplirikuarhiaka ambe enga Biblia uandajka.

8. ¿Ambe xarhatasïni eskaksï sánderu uániskia Reinueri aianhpiricha?

⁸ Mándani uéxurhini enga nitamajka, sánderu uáni kʼuiripu kurhaasïndi ambakiti aianhperakua Reinueri. Ju je exeni na engaksï sánderu uánikia Reinueri aianhpiricha ini últimu jurhiatikuecha jimbo. Uéxurhini 1914 jimbo, 5,155 aianhpirichaksï jarhaspti 43 paisicha jimbo. Iásïchi ma 8,500,000 aianhpiricheskia 240 paisicha ka territoriucha jimbo. Peru juchari ánchikuarhita nótki kʼamakurhisïndi. Jatsiskachi para seguirini uandantani eska solu Tata Diosïri Reinu kénditaaka iámindu uandanhiata ambe engaksï kʼuiripuecha jatsijka (Sal. 145:11-13).

9. ¿Andichisï jatsi para seguirini Reinueri ambe uandantani?

⁹ Seguirinchi jauaka aiapini astaka Jeoba uandaaka eska i ánchikuarhita nóteru úkuarhiakia. ¿Na xánteru tiempu jatsiski kʼuiripu para míteni Jeobani ka Jesusini? (Juanu 17:3). Nóchi míteska. Ambe engachi kʼóru míteka, jindesti eska ima kʼuiripu enga uéjka tsípikua para méntkisï jatsini, uáka jorhenguarhini ambakiti aianhperakuani iásï enga nótki uénakuarhini jaka kʼéri mískuarhita (Uku. 13:48). ¿Nénachi jarhuataua indeni kʼuiripuechani iásï enga útasï tiempu jaka?

10. ¿Nénajtsïni jarhuatasïni Jeoba parachi jorhendaani kʼuiripuechani jurhimbikua ambe?

¹⁰ Jeobajtsïni íntskuxati ambe engachi xáni uétarhinchajka para jorhendaani kʼuiripuechani jurhimbikua ambe. Por ejemplu, mándani semanajtsïni jorhendasïndi tánguarhikuecharhu engaksï semana jimbo jarhajka, nani engachi jorhenguarhijka néna uénani uandontskuarheni kʼuiripu jingoni ka engachi ménderu pʼorhembintaska ka néna jorhentpini Bibliaeri ambe. Ístujtsïni Jeobaeri kúnguarhikua íntsaasïndi publikasionichani engaksï jindeka  para jorhentpini. I ambejtsïni uáti jarhuatani para:

• uénani uandontskuarheni,

• úni eskajtsïni kʼuiripu uékaaka kurhajchani,

• úni eska kʼuiripu uékaaka sánderu ambe míteni Bibliaeri,

• jorhentpini jurhimbikua engachi Bibliaeri ambe niuaka jorhentpini ka

• para pʼímarhiani kʼuiripuechani paraksï inchani juchari pájina Internetirirhu ka niranksï Kʼumanchikua Reinuerirhu.

Jatsiskachi para ini ambe úrani. * Por ejmplu, engachi uandontskuarheska nema jingoni enga uéjka sánderu ambe míteni ka jurajkukuskachi tratadu o rebista ma, ima kʼuiripu uáti sánderu ambe arhintani ima amberi engachi uandontskuarheka astakachi ménderu pʼorhembintaaka. Mándani arhinchi jatsiska para seguirini jarhani ánchikuarhini aianhpikuarhu mándani kutsï.

11. ¿Andisï jaki ima parti para Bibliaeri ambe jorhenguarhini Interneti jimbo?

¹¹ Ju je exeni néna Jeoba útasï jarhuataaxaki kʼuiripuechani paraksï jorhenguarhini jurhimbikueri ambe. Pájinarhu jw.org^® nema uáti Bibliaeri ambe jorhenguarhini Interneti jimbo. * ¿Andiksïsï ú indeni partini? Mándani kutsï, uánikua kʼuiripu interu parhakpini anapu Internetirhuksï inchasïndi paraksï Bibliaeri ambe jorhenguarhini. Ka ima parti enga juchari pájina Internetirirhu jaka, úsïndi jarhuataani paraksï míteni ambe enga Tata Diosïri karakata uandajka. Máru kʼuiripuecha engachi jingoni uandontskuarhejka, jamberiksï no káni uékaati eskachi pʼorhembiauaka para Bibliaeri ambe jorhendaani. Jimajkani, ju je exerani ini partini enga juchari pájinarhu jaka o pájineri direksioni enga Bibliaeri jorhenguarhikua ma jaka imani idioma jimbo enga kʼuiripu kurhangujka.

12. ¿Kʼuiripu ambe uá jorhenguarhini Bibliaeri ambe Interneti jimbo?

¹² Íksï jorhentperakuecha, Bibliaeri ambe uandasïndi ka ne enga kararkuarhika, máru kʼuiripuecheri enga Biblia sánderu uandaajka ka ambakiti ambe engachi erokuarhini jaka. Engaksï kʼuiripuecha exeaska, arini ambeksï jorhenguarhiati:

• nénajtsïni jarhuatasïni Biblia,

• néski Jeoba, Jesusi ka ánjelicha,

• Tata Diosï andisï kueraa kʼuiripuni,

• andichisï kómu nitamakuarhijki ka andisï jaki no sési jásï ambe.

Ístuksï uáti arini ambe jorhenguarhini:

• ambe uá Jeoba para nóteru nema kómu nitamakuarhinia ni uarhini,

• néna uá eska kʼuiripu tsíntaaka ka

• néna kénditaua Tata Diosïri Reinu parhakpini anapu juramutichani engaksï no ma ambe marhuajka.

13. Uandanta je sini Bibliaeri ambe jorhenkuarhini Interneti jimbo, jindeski parachi jucha nóteru jorhentaania kʼuiripuechani imecheri kʼumanchikuecharhu.

¹³ Bibliaeri ambe jorhenguarhini Interneti jimbo, no jindesti parachi jucha nóteru jorhentaania kʼuiripuechani imecheri kʼumanchikuecharhu. Jesusijtsïni juchantsïni íntskusti kóntperata parachi imeri chúxapati uáni. Uékasïngachi eskaksï ima kʼuiripuecha engaksï ambakiti mintsita ma jukaka, uékaaka Bibliaeri ambe jorhenguarhini Interneti jimbo, jukaparharaaka ambe engaksï jorhenguarhiaka ka eskaksï uékaaka sánderu ambe míteni. Enga inde ambe úkuarhiska, jamberi kʼuiripu uékaati eska aianhpiri ma jorhendaaka Bibliaeri ambe. Enga na kʼamakurhijkia ma jorhenguarhikua, pʼímarpisïndi para kurhajkuarhini eska nema niuaka jarhuatani para sánderu ambe jorhenguarhini. Pauani pauani, interu parhakpini anapuechaksï kurhajkuarhisïndi juchari pájina  Internetirirhu paraksï jorhendanhani Bibliaeri ambe. Kánikua jukaparhakuesti eska mándani kʼuiripu jorhendanhaaka Bibliaeri ambe.

14. Ambe enga Jesusi juramuka ixú Mateu 28:19, 20, ¿ambechi jánguarhintaa úni ka andi?

¹⁴ (Arhinta je Mateu 28:19, 20). Engachi Bibliaeri ambe jorhentpijka, jatsiskachi para jánguarhintani Jesusiri chúxapatichani uáni ka jorhendaani úni iámindu ambe enga Jesusi juramuka. Jatsiskachi para jarhuataani kurhanguni eska kánikua jukaparhakueska marhuakuni Jeobani ka apoiarini imeri Reinuni. I ambe arhikuekasïndi eskachi jánguarhintaaka jarhuataani paraksï ísï úni eskaksï na jorhenguarhini jaka, eskaksï aiakukuarhiaka Jeobani ka itsï atakuarhinksï. Soluksï ísï uáti tsípiti pakarani Jeobaeri jurhiatikua jimbo (1 Ped. 3:21).

15. ¿Para ambe no jarhaski tiempu ka andi?

¹⁵ Eskachi na exekia, nóteru xáni kuerataxatia para i parhakpini kʼamajkunhani. Ísï jimbo, no jarhasti tiempu para imechani jorhendaani jarhani Bibliaeri ambe engaksï no uéjka Kristueri chúxapatiini (1 Kor. 9:26). Meru uétarhisïndi eskachi niuaka aianhpini, jimboka útasï uánikua kʼuiripu jarhaska enga jatsika para míteni Reinueri ambe antesi de nóteru jarhania tiempu.

16. Eska na arhijka Jaŋaskuecha 18:2, 4, 5, 8, ¿ambechi jatsiski para úni iáminduecha? (Ístu exe je notani).

¹⁶ (Arhinta je Jaŋaskuecha 18:2, 4, 5, 8). Íksï karakatecha sánderu ambe uandasïndi enga Jeoba uéjka eskachi uáka. Iámindu ambakiti kristianuechachi jatsiska para meru uéakuntani Kʼéri Babilonia. Jamberi máru engaksï Bibliaeri ambe jorhenguarhini jaka, relijioni no jurhimbiti ma jimbo japti antesi deksï jorhenguarhini jurhimbikuani. Jamberiksï tánguarhiendi imecha jingoni, úni ambe engaksï imecha uénga, oksï tumina íntspini. Antesi deksï intsïnhani sésikua paraksï úni aianhpini kúnguarhikua jingoni nájkirukaksï nótki itsï atakuarhini jauaka, jatsistiksï para méntku jurajkuni imani ambe enga relijioni no jurhimbiti újka. Jatsistiksï para sïranda ma úni engaksï xarhataaka eskaksï nóteru kuenta úkuarhiakia relijioni ma jingoni enga no jurhimbitika o enga Kʼéri Babilonia jingoni kuenta úkuarhijka. *

17. ¿Na jásï ánchikuarhitachi no jatsiski para jiókuarhini kristianuecha ka andi?

¹⁷ Ambakiti kristianuechachi jatsiska para sési exeni eska juchari ánchikuarhita no ma ambe jimbo jarhuatani jauaka Kʼéri Babiloniani (2 Kor. 6:14-17). Por ejemplu, no ma iglesia jimbochi  jatsiska para ánchikuarhini. Ístu, engachi empresa ma jimbo ánchikuarhijka, nóchi jatsiska para ióni ánchikuarhini imani lugari jimbo enga jindeka para relijioni no jurhimbiti. Ka enga negosiu jucharika, nóchi aiakukuarhiaka para ánchikuarhita ma úni ni jiókuarhini ánchikuarhita ma para Kʼéri Babilonia. ¿Andichisï méntku no uéjki indeni ambe úni? Jimbokachi no uékasïnga imani ambe úni enga relijioni no jurhimbiti újka, enga ikichakueni jásï ambeka para Tata Diosï (Is. 52:11). *

18. ¿Ambe úspi erachi ma enga arhinhapka para ánchikuarhita ma úni iglesia ma jimbo?

¹⁸ Sáni iónistia enga nema arhipka orhejtsïkutini ma enga negosiu ma jatsipka, eska ánchikuarhita ma úpiringa iglesia ma jimbo enga imani ireta jimbo japka nani enga irekapka erachi. Ima enga uékenga eska erachi úpiringa ánchikuarhitani, mítespti eska ima erachi méntkisï uandaspka eska no ma iglesia jimbo ánchikuarhipiringa. Peru ima kʼuiripu meru uékaxapti eska nema ánchikuarhita ma úpiringa. Peru erachi úspti ambe enga Biblia uandajka ka no jiókuarhispti imani ánchikuarhitani. Ísï ma semana jimbo, periodikurhu uéraspti acheeti ma, enga ístu karpinterueka, krusi ma jatsikuni jarhani iglesiarhu. Enga erachi jiókuarhipiringa imani ánchikuarhitani, jamberi imaepirindi enga uérapiringa periodikurhu. Ju je eranhaskani na enga xáni no sési pakarapiringa erachi kúnguarhikuarhu ka na enga pʼikuarherapiringa Jeoba.

19, 20. a) ¿Ambechi jorhenguarhiskia asta ixú jamberi? b) ¿Ambechi jorhenguarhia sánderu?

¹⁹ Máteru Bibliaeri profesia enga ístu kánikua jukaparhakueka enga nótki úkuarhini jaka, jindesti enga uandanhaaka “pínandisti ka sésichi nitamaxaka”. Peru Jeobajtsïni jorhendasti eskaksï kʼuiripuecha no méni uáka úni eska pínandikua jauaka ka para méntkisï. ¿Ambechi jatsiski para úni enga jamberi i ambe úkuarhiaka ka enga mátirku janoaka kʼéri mískuarhita? Tata Diosï uékasïndi eskachi seguirini jauaka aianhpini Reinueri ambe ka jánguarhintani sánderu uáni Jesusiri chúxapatichani. Ka ístuchi jatsiska para jurajkuni relijioni no jurhimbitini. I ambe arhikuekasïndi eskachi nóteru kuenta úkuarhiakia imani jingoni ni eskachi imani ánchikuarhita ambe uáka enga jindeuaka para relijioni no jurhimbiti.

²⁰ Jarhasti sánderu ambe enga jiáni úkuarhiaka engaksï kʼamakurhini jauakia últimu jurhiatikuecha ka ístu jarhasti sánderu ambe enga Jeoba erokuarhijka eskachi uáka. ¿Ambeski? Ka ¿nénachi uá listu jarhani para iámindu ambe enga no ióni jimbo úkuarhiaka? Máteru artikulu jimbochi exeaka.