1. Iáminduecha engachi itsï atakuarhikia, ¿ambe uétarhisïni eskachi seguirini jauaka úni?

ENGACHI itsï atakuarhikia, arhikuekasïndi eskachi uánikuechani japarini xarhataskia eskachi mintsikasïnga Jeobani ka eskachi uékasïnga marhuakuni imeri kúnguarhikua jingoni. * Jimajkani, uétarhisïndi eskachi sánderu jakajkuaka ka mintsikani eska ini jurhiatikuecha jimbo, Jeoba úraxaka imeri kúnguarhikuani paraka úkuarhiaka ambe enga ima uéjka.

2, 3. Na enga orhejtsïkujka Jeoba imeri kúnguarhikuani, ¿ambe xarhatasïni imeri ambe?

² Ini jurhiatikuecha jimbo, na enga orhejtsïkujka Jeoba imeri kúnguarhikuani, xarhatasïndi na enga jásïka ima, ambe enga eratsetini jaka úni ka na enga uéjka eska úkuarhiaka ambe ma. Ju je exeni tanimu ambe enga Jeoba újka ka enga imeri kúnguarhikua xarhatajka.

³ Uénani jámani,‘Tata Diosï no nani kʼuetsapesïndi’ (Uku. 10:34). Uékperakua úspti eska Jeoba íntspepiringa imeri Uájpani para iáminduechani pʼímutantaani (Juanu 3:16 1 Tim. 2:6). Parachi úni uánikua kʼuiripuechani jarhuataani paraksï pʼímutantskata uérani, Jeoba imeri iretani úrasïndi para ambakiti ambe aianguani iámindu kʼuiripuechani engaksï uékaaka kurhaani. Tsimani úni jámani, Jeoba Tata Diosï máesti enga uékajka eska iámindu ambe sési úkuarhiaka ka eska pínandikua jauaka (1 Kor. 14:33, 40). Ísï jimbo, erokuarhisïngachi eska imeri ireta marhuakuaka Jeobani sési úparini ambe ma ka pínandikua jingoni. Tanimu ini jámani, Jeoba jindesti “Ambakiti Jorhentpiri” (Is. 30:20, 21). Ísï jimbo, Jeobaeri kúnguarhikua kánikua jánguarhintasïndi Bibliaeri ambe jorhentpini kúnguarhikuarhu ka ístu aianhpikuarhu. Primeru sigluru anapu  erachicha, ¿nénaksï xarhataspi kúnguarhikuarhu ini tanimu ambe enga Jeoba xarhatajka? ¿Néna májkueni úxaki iásï imeri ireta? ¿Ka iásïjtsïni néna jarhuatasïni espiritu santu engachi marhuakuni jaka Jeobani imeri kúnguarhikua jingoni?

4. Eska na arhijka Ukuecha 1:8, ¿ambe juramukuaspi Jesusi imeri chúxapatichani, ka ambe jarhuataapirini?

⁴ Primeru sigluru. Jesusi erokuarhikua ma íntsaaspti iámindu kʼuiripuechani imani ambe jingoni enga jorhentpipka (Luk. 4:43). Juramukuaspti imeri chúxapatichani eskaksï seguiripiringa imani ánchikuarhitani úni enga ima uénapka ka eskaksï aianhpepiringa “asta jima enga sánderu iauanika” (arhinta je Ukuecha 1:8). Ísïsti, nóksï úpirindi imecheri uinhapikua jingontku úni, uétarhinchapirindiksï espiritu santu, “jarhuajpiri” enga Jesusi aiakuapka (Juanu 14:26; Zac. 4:6).

5, 6. ¿Néna jarhuataaspi espiritu santu Jesusiri chúxapatichani?

⁵ Jesusiri chúxapatichaksï intsïnhaspti espiritu santu Pentekostesiru uéxurhini 33 jimbo. I espiritueri jarhuajperata jimbo, jirejiresïksï uénaspti aianhpini ka no ióni jimboksï uánikua kʼuiripuecha jiókuarhispti ambakiti aianhperakuani (Uku. 2:41; 4:4). Ka engaksï uénapka no sési kánhani nóksï chéspti. Sánderu sési, kurhakusptiksï Tata Diosïni jarhuajperata ka kómarhisptiksï: “Íntskujtsïni uinhapikua juchantsïni engachi jindeka chíti jántspiricha, ka eskachi uáka uandantani chíti uandakuani no sáni chéparini”. Jimajkani, intsïnhasptiksï espiritu santu ka seguirisptiksï uandantani Tata “Diosïri uandakuani no sáni chéparini” (Uku. 4:18-20, 29, 31).

⁶ Joperu i ambakiti Jesusiri chúxapatichaksï ístu máteru ambe nitamakuarhispti. Por ejemplu, soluksï namunitu kopiechani jatsiaspti Tata Diosïri Karakateri ka nóksï jatsiaspti publikasionichani enga jarhuataapiringa paraksï jorhenguarhini, ísï eska iásï. Ka jatsisptiksï para aianguani uánikua kʼuiripuechani engaksï máteru jásï idioma uandenga. Nájkirukaksï uánikua ójkutakuecha japka, Jesusiri chúxapatichaksï úspti úni imani ambe enga ísï xarharenga enajkiksï no úpirini úni: ma treinta uéxurhini jimbojku, iápuru parhakpinirhuksï aianhpispti ambakiti ambe (Kol. 1:6, 23).

7. Jukari sieni uéxurhini enga nitamakia, ¿nénaksï mítespi Jeobaeri marhuaricha ambe enga Jeoba erokuarhini japka imecheri ambe, ka ambeksï úspti?

⁷ Ini jurhiatikuecha jimbo. Jeoba seguirixati orhejtsïkuni ka uinhapikua íntskuni imeri iretani. Ísïsti, íntskusïndijtsïni jarhuajperata imeri Karakata jimbo. Bibliarhu karakata jarhasti ambe enga Jesusi aianhpipka ka ambe enga juramukuapka imeri chúxapatichani paraksï seguirini úni imani ánchikuarhitani enga ima uénapka (Mat. 28:19, 20). Juliuni 1881 jimbo, i rebista uandaspti: “Nóchi pʼímarhinhaska ni erakunhani parachi kʼéri ambe exenhani ka parachi jatsikuarhekua ambe tánani, sino parachi úrani ka ánchikuarhini ka ístu parachi aianhpini ambakiti ambe”. Foietu To Whom the Work Is Entrusted (Imecha engaksï mintsinharhinhaka para ini ánchikuarhitani úni) enga 1919 uérapka, uandaspti: “Ísï xarharasïndi enajki Kʼéri ánchikuarhita máe, peru Táteristi ka imeri jarhuajperata jimbochisï uáka úni”. Ísïsti, májkueni eskaksï primeru sigluru anapu erachicha, íksï erachicha no sáni chéparini ústi ini ánchikuarhitani, mintsikaparini eska espiritu santu jarhuataapiringa iámindu jásï kʼuiripuni aianguni. Ka juchajtuchi iásï májkueni mintsikasïnga.

8, 9. ¿Ambe úraskia Jeobaeri kúnguarhikua para aianhpini ambakiti ambe ka ambe úraxaki iásï?

⁸ Para aianhpinhani ambakiti ambe, Jeobaeri kúnguarhikua, úraspti ka seguirixati úrani sánderu ambakiti jarhuajperata enga jaka. Ariksï jindesti máru ambe, publikasionicha sïranda jimbo, “Pelikulecha ka Dibujuecha Kueraakateri ambe”, tokadiskueni járhaticha, bosinecha engaksï karruechani jatsikuauenga, programecha engaksï radiu jimbo kurhauenga ka sánderu jimbanhi ambe engachi komputadora ka Interneti jimbo úrajka. Ístu, desde iónisï no nema xáni uánikua  idiomecha jimbo tradusirixati ambe ma, ísï eska na úni jaka Jeobaeri kúnguarhikua. ¿Ka andichisï ísï újki? Paraka iámindu jásï kʼuiripu kurhauaka ambakiti ambe imecheri idioma jimbo. Jeoba iáminduechani májkueni kaasïndi, ka uandaspti eska ambakiti aianhperakua aianhpinhapiringa “iámindu nasionicharhu ísï, ka tribuechani, ka imechani engaksï táchani jásï idioma uandajka ka iámindu kʼuiripuechani” (Jaŋ. 14:6, 7). Jeoba uékasïndi eskaksï iámindu kʼuiripuecha míteaka ini ambakiti ambe Reinueri.

⁹ ¿Ka nénachi úpirini aianguani imani kʼuiripuechani engaksï edifisiuecharhisï irekaka ka enga úkua jukajka para uandontskuarhekuani? Para indeni kʼuiripuechani aianguani, Jeobaeri kúnguarhikua úspti eska tsʼéjkunhapiringa mámaru jásï aianhpikua para xanharu jimbo aianhpini. Por ejemplu, 2001 jimbo, Grupu enga Orhejtsïkuajka iámindu kúnguarhikuechani, uandaspti eskaksï Francia úpiringa úraani karrituechani o máteru ambe paraksï publikasionichani íntspiani. Ka tátsekua, ístu máteru lugaricharhuksï uénaspti ísï aianhpini. Kánikua sési uéraspti i jásï aianhpikua. Uéxurhini 2011 jimbo, uénakuarhispti ísï aianhpinhani nani enga sánderu kʼuiripu jámajka jini Nueva York (Estados Unidos). Ma uéxurhini jimbo, kʼuiripuechanksï íntsaaspti 102,129 libruechani ka 68,911 rebistechani ka 4,701 kʼuiripuechaksï kurhajkuarhispti paraksï Bibliaeri ambe jorhendaani. Úsïngachi exeni eska Jeoba úraxapka espiritu santu para jarhuajpini ini ánchikuarhitarhu. Ísï jimbo, Grupu enga Orhejtsïkuajka iámindu kúnguarhikuechani, uandaspti eska úpiringa interu parhakpinirhu úranhaani karrituechani ka máteru ambe para publikasionichani íntspiani.

10. ¿Ambechi uá úni parachi sánderu sési aianhpini ka jorhentpini?

¹⁰ Ambe engachi jucha uáka úni. Ju je sési úrani ambe engajtsïni Jeoba jorhendajka tánguarhikuecharhu. Ju je uérani aianhpini juchari grupu jingoni. Enga jauaka ambe ma engachi jatsiaka para sánderu sési úni, grupuru anapu erachichajtsïni jarhuataati ka uinhaperantaatijtsïni imecheri ambakiti ejemplu jingoni. Ju je seguirini aianhpini nájkiruka uandanhiata ambe jauaka. Ísï eskajtsïni na miátantajka karakata nani enga pʼitakataka jaka i jorhenguarhikua, úsïngachi ambe enga Tata Diosï uéjka espiritu santueri jarhuajperata jimbo ka no juchari uinhapikua jimbo (Zac. 4:6). Jimboka i ánchikuarhita Tata Diosïriska.

11. Primeru sigluru anapu grupu enga orhejtsïkuenga iámindu kúnguarhikuechani, ¿néna májku kʼéri ánchikuarhispi paraka iámindu ambe sési úkuarhipiringa Tata Diosïri iretarhu?

¹¹ Primeru sigluru. Grupu enga orhejtsïkuenga iámindu kúnguarhikuechani enga Jerusaleni japka, májku kʼériksï ánchikuarhisïrendi paraka iámindu ambe sési úkuarhipiringa ka pínandikua jarhani Tata Diosïri iretarhu (Uku. 2:42). Por ejemplu, uéxurhini 49 jimbo, engaksï uénapka sirkunsisioniri ambe uandani, grupu enga orhejtsïkuenga iámindu kúnguarhikuechani exespti ini ambe espiritu santueri jarhuajperata jingoni. Enga kúnguarhikua arhukukata pakarapiringa, nóteruksï úpirindia sési aianhpini. Nájkirukaksï apostulicha ka orhejtsïkuticha judiuepka, nóksï jurajkutakuarhispti eskaksï pʼindekuecha o imecha engaksï indeni ambe jorhentpienga támisï jánhastaapiringa. Sánderu sési, úrasptiksï Tata Diosïri Karakatani ka kurhakusptiksï imeri espiritu santu paraka jarhuataapiringa (Uku.15:1, 2, 5-20, 28). Jeoba újchakuraspti ambe engaksï erakupka úni ka kúnguarhikua májku kʼéri jarhaspti ka pínandikua jingoni ka seguirisptiksï aianhpini (Uku.15:30, 31; 16:4, 5).

12. ¿Andichisï uandajki eska Jeobaeri kúnguarhikuarhu iámindu ambe sési úkuarhisïnga ka pínandikua jingoni?

¹² Ini jurhiatikuecha jimbo. Jeobaeri kúnguarhikua jánguarhintaxati paraka iámindu ambe sési úkuarhiaka ka pínandikua jarhani Tata Diosïri iretarhu. Uéxurhini 1895 jimbo, i rebista 15 de nobiembriri inglesi jimbo, juáspti jorhenguarhikua ma enga 1 Korintu 14:40 jimbo pʼitakata japka, enga arhinhenga: “Decentemente y con orden”. Ixú arhisïrendi: “Apostulichaksï uánikua konsejuechani íntsaaspti kúnguarhikuarhu anapuechani enga uénani japka úkuarhini, paraka iámindu ambe sési úkuarhipiringa [...]. Kánikua jukaparhakuesti eskachi seguirini jauaka exeni imani ambe enga karanhapka parajtsïni jorhendani” (Rom. 15:4). Ka ístu ini jurhiatikuecha jimbo, Jeobaeri kúnguarhikua kánikua ánchikuarhisïndi paraka iámindu ambe sési úkuarhiaka ka eska pínandikua jauaka iámindu kúnguarhikuecharhu, ísï eska primeru sigluru. Por ejemplu, engachi nipiringa máteru kúnguarhikuarhu ka jorhenguarhinhani jarhani rebista Aianhpiri jingoni, nájkiruka máteru paisirupiringa, mítepiringachi na enga úkuarhijka jorhenguarhikua ka náki jorhenguarhikua exenhani japirini. Ísïchi pʼikuarherapiringa enajkichi juchari kúnguarhikuarhu japirini.  Solu Tata Diosïri espiritu úsïndi eskachi májku kʼéri jauaka (Sof. 3:9, nota).

13. Eska na arhijka Santiagu 3:17, ¿ambechi jatsipirini para kurhamarhikuarhini?

¹³ Ambe engachi jucha uáka úni. Jeoba uékasïndi eskachi májku kʼéri jauaka ka ísï jámanchi “uáka sési arhijperani jarhani [o pájperani]” (Ef. 4:1-3, Táta Diósïri Uandakua Tata Jesukristueri Aiatsperakua). Ísï jimbo, ju je kurhamarhikuarhini: “¿Jarhuajpisïni jí para pínandikua jarhani ka para kúnguarhikua májku kʼéri jarhani? ¿Kurhajchaasïni imani erachichani engaksï orhejtsïkujka? ¿Úpirintsïni máteruecha mintsikani, ka sánderia engani jatsika ánchikuarhita ambe kúnguarhikuarhu? ¿Xarhentkuni niárasïni nani, marhuatspisïni ka listu jarhasïni parani jarhuajpini?” (arhinta je Santiagu 3:17). Engachi exejka eskachi jatsiska para ambe ma sánderu sési úni, ju je kurhakuni Jeobani espiritu santu. Engachi sánderu jurajkuska eskajtsïni espiritu santu jarhuataaka juchari jángua ka juchari úkuecha jingoni, erachichajtsïni sánderu xénchaati ka jukaparharaani.

14. Eska na xarhatajka Kolosasi 1:9, 10, ¿néna jarhuataaspi Jeoba imeri marhuarichani engaksï primeru sigluru irekapka “sésimindu janhaskani” ambe enga Tata Diosï uékajka?

¹⁴ Primeru sigluru. Jeoba tsitisïndi imeri iretani jorhendani (Sal. 32:8). Uékasïndi eskaksï imeri uájpecha enga ima xáni xénchaajka, míteaka, xénchaaka ka eskaksï irekaaka para méntkisï. Iámindu i ambe uáti ísï úkuarhini jimbokajtsïni ima jorhendasïnga (Juanu 17:3). Primeru sigluru, ima úraspti kúnguarhikua kristianani para jorhendani imeri iretani (arhinta je Kolosasi 1:9, 10). Ka espiritu santu, enga jindeka “jarhuajpiri” enga Jesusi aiakuapka imeri chúxapatichani (Juanu 14:16). Jarhuataaspti Jesusiri chúxapatichani parakaksï kurhangupiringa Tata Diosïri Karakatani ka miátantaaspti imani ambe enga Jesusi úpka ka uandani ka engaksï tátsekua karakata pakarapka Ebanjeliuecharhu. Engaksï erachicha mítepka ini ambe, sánderuksï mintsikaspti ka xénchani Tata Diosïni, imeri Uájpani ka erachichani.

15. Eska na uandajka Jeobaeri profesia enga Isaías 2:2, 3 jaka, ¿nénajtsï exeski cha eska ísï úkuarhixaka?

 ¹⁵ Ini jurhiatikuecha jimbo. Jeoba uandasptia eska “últimu jurhiatikuecha jimbo”, iámindu nasionirhu anapu kʼuiripu karharapiringa por ísï arhini juátarhu paraka ima jorhendaapiringa imeri ambe (arhinta je Isaías 2:2, 3). Iásïchi exexakaia eska ísï úkuarhixaka. Jurhimbiti relijioni sánderu ambakiti ambe úsïndi eska náki uéjki máteru relijioni. ¡Ka Jeobajtsïni kánikua ambe jorhendaxati Bibliaeri ambe! (Isa. 25:6). Úraparini imeri jántspirini enga mintsinharhikueka ka jánhastini, kánikua ambejtsïni jorhendasïndi, úraparini, jorhenguarhikuechani, arhijtsïkperatechani, dibujuechani engajtsïni jorhendajka ka bideuechani (Mat. 24:45). Ísïchi pʼikuarherasïnga eska Eliu, Jobueri amigu, enga arini ambe uandapka Tata Diosïri ambe: “¿Náki jorhentpiri ísïski eska ima?” (Job 36:22).

16. ¿Ambechi uá úni parachi sánderu sési marhuatani ambe engajtsïni Jeoba jorhendajka?

¹⁶ Ambe engachi jucha uáka úni. Espiritu santujtsïni jarhuataati parachi ísï úni eskachi na arhintaaka ka jorhenguarhini Tata Diosïri Karakatarhu. Ju je májkueni ambe kurhakuni Jeobani eska salmista: “Oh Jeoba, jorhendarini nani enganisï jámaaka. Jí chíti jurhimbikuarhu jámaaka. Ú eskani iámu mintsita jingoni janhanharhiaka chíti nombrini” (Sal. 86:11). Ísï jimbo, ju je seguirini marhuatani ambe engajtsïni Jeoba jorhendajka imeri Karakatarhu ka imeri kúnguarhikua jimbo. Ísïsti, nóchi solu uékasïnga uánikua ambe míteni. Sánderu sési, ju je juchari mintsitarhu peerani jurhimbikuani ka ísï úni. Jeobaeri espiritujtsïni jarhuataati ísï úni. Ju je uinhaperantaani juchari erachichani ka pirenchichani jimbokaksï juchari familieska (Ebr. 10:24, 25). Ju je kómarhini Tata Diosïni eskajtsïni jarhuataaka imeri espirituni jingoni parachi mintsita jingoni komentarini tánguarhikuarhu ka parakachi sési nitamataraaka parti ma tánguarhikuarhu. Engachi úska ini ambe, xarhatakunchi jauaka Jeobani ka imeri Uájpani eskachi xénchaasïnga imeri karichichani engaksï ima xáni jukaparharaajka (Juanu 21:15-17).

17. ¿Nénachi uá xarhatani eskachi méntkisï apoiarisïnga Jeobaeri kúnguarhikuani?

¹⁷ Nóteru ióndani, ima kúnguarhikuajku pakaraati Echerirhu enga Tata Diosï orhejtsïkujka imeri espiritu jingoni. Ísï jimbo, ju je tsípikua jingoni ánchikuarhini imeri kúnguarhikua jingoni. Ju je aianguani ambakiti aianhperakuani iámindu kʼuiripuechani. Ísïchi xarhatani jauaka eskachi májkueni xénchpitiska eska Tata Diosï ka eskachi no nemani jingoni sánderu kʼuetsapisïnga. Ju je jánguarhintani paraka kúnguarhikuarhu májku kʼéri jánhaaka, engachi ísï úska, májkuenchi úni jauaka eska Jeoba enga tsitijka eskachi sési pájperaaka ka eska sési úkuarhiaka ambe ma. Engachi jánguarhintaska jorhenguarhini na engachi xáni uáka, kurhajchanchi jauaka sánderu Ambakiti Jorhentpirini. Ka jiáni enga kʼamajkunhakia Noambakitiri parhakpini, nóchi chéaka. Balori jingonchi jauaka imecha jingoni engaksï méntkisï marhuakujka Jeobani imeri kúnguarhikua jingoni.