SEMANA 41
Néna jarhuatani jorhenguarhirini ma paraka niáraaka itsï atakuarhini (parti 1)
“Jimboka chámindu xarharasïnga eskajtsï jindeska ma Kristueri karakata enga juchantsïni jimbo karakateka” (2 KOR. 3:3).
PIREKUA 78 Ju je Tata Diosïri Uandakuani jorhentpini
AMBE ENGACHI EXEAKA *
Kánikuachi tsípisïnga enga jorhenguarhiri ma enga juchari kúnguarhikuarhu jaka itsï atakuarhijka (Exe je párrafu 1).
1. ¿Nénajtsïni jarhuatasïni kurhanguni 2 Korintu 3:1-3, eska kʼéri kóntperata máeska Bibliaeri jorhenguarhirini ma jarhuatani para niárani itsï atakuarhini? (Exe je fotuni enga uénakuarhu jaka).
¿NÉNACHI pʼikuarherasïni enga jorhenguarhiri ma enga juchari kúnguarhikuarhu jaka itsï atakuarhijka? Kánikuachi tsípisïnga (Mat. 28:19). Ka sánderuchi sési pʼikuarherasïnga engachi jucha jorhendaka Bibliaeri ambe (1 Tes. 2:19, 20). Imecha engaksï apenasi itsï atakuarhijka ísïsïndiksï komueska ambakiti karakata ma enga sési ambe uandajka imeri ambe enga Bibliaeri ambe jorhendaka ka ístu iámindu kúnguarhikueri (arhinta je 2 Korintu 3:1-3).
2. a) ¿Ambechi jatsiski para kurhamarhikuarhini, ka andi? b) ¿Ambeski Bibliaeri jorhenguarhikua ma? (Exe je nota).
2 Kánikuachi tsípisïnga enga últimu tʼámu uéxurhinicha jimbo, interu parhakpinirhu, mándani kutsï, ma 10,000,000 Bibliaeri jorhenguarhikuechani * únhaaska. Ka ini mismu tiempu jimbo, mándani uéxurhini jukari 280,000 kʼuiripuechaksï itsï atakuarhisti. Eskachi na exejka, útasïksï uánikua jorhenguarhiricha jarhasti engaksï uáka itsï atakuarhini. ¿Nénachi uá jarhuataani? Jeoba tekaantstisti ka íntsaaxati kʼuiripuechani tiempu paraksï niárani tata Jesukristueri chúxapati úkuarhini. Sánderkusï tiempu pakarani jatiia, jimbochisï uéjka jánguarhintani na engachi xáni uáka para jarhuataani parakaksï niáraaka marhuakuni Tata Diosïni ka itsï atakuarhini (1 Kor. 7:29a; 1 Ped. 4:7).
3. ¿Ambechi exea ini jorhenguarhikua jimbo?
3 Jimboka kánikua jukaparhakueska Jesusiri chúxapatichani uáni, Grupu enga Orhejtsïkuajka iámindu kúnguarhikuechani, kurhamarhiaspti imechani engaksï máteru Betelicharhu jaka néna jarhuataani jorhenguarhirichani paraksï niárani itsï atakuarhini. Ini jorhenguarhikua ka máteru jimbo, exeakachi ambe engachi uáka jorhenguarhini uánikua sirkuitueri orhejtsïkuticheri, misioneruecheri ka ambakiti prekursoricheri ambe (Prov. 11:14; 15:22). * Ambe engaksï imecha uandajka, exerasïndijtsïni ambe enga uáka úni ima enga jorhentpijka ka ístu ima enga jorhenguarhini jaka. Ini jorhenguarhikua jimbo, iúmu ambechi exeaka enga jorhenguarhiri jatsika para úni para niárani itsï atakuarhini ka na enga jorhentpiri uáka jarhuatani.
MÁNDANI SEMANA JORHENGUARHINI BIBLIAERI AMBE
Ju je kurhamarhini jorhenguarhirini sinchi uá sáni uaxakani para Bibliaeri ambe jorhenguarhini. (Exe je párrafu 4 a 6).
4. ¿Ambechi jatsiski para kurhanguni engachi kʼuiripuni puertarhu jorhendaska Bibliaeri ma?
4 Uánikua erachichaksï jorhendaasïndi kʼuiripuechani Bibliaeri ambe imecheri puertarhu. Nájkiruka sési jaka ísï jorhentpini paraka kʼuiripu uékaaka sánderu ambe míteni, sáno méntkisï máratkuksïsï újti uandontskuarheni ka no mándani semana. Ka para seguirini jorhendani kʼuiripuni, uánikuechaksï kurhakuasïndi imeri datuechani ka tátsekuaksï uandajpasïndi o axakuni mensaji ma paraksï Bibliaeri ambe aianguni. * Úpirindi ióni nitamani enga jorhenguarhiri ísï jorhenguarhini japiringa ka no sáni mójtakurhini. Joperuchi jatsiska para kurhanguni eska jorhenguarhiri jamberi no niáraka aiakukuarheni Jeobani ni itsï atakuarhini enga sántku arhutaska tiempu ka no xáni jánguarhintani para Tata Diosïri Karakateri ambe jorhenguarhini.
5. ¿Ambe jorhentpispi Jesusi ixú Lukasʌ 14:27-33, enga uáka jarhuataani jorhenguarhirichani?
5 Ma xanhari, Jesusi tsimani ejempluechani úraaspti para jorhentpini ambe enga jatsika para úni ima enga uéjka imeri chúxapatini. Uandaspti kʼuiripueri ma enga kʼéri kʼumanchikua ma uéjka úni ka juramutiri ma enga uéjka nirani máteru juramuti jingoni uarhipeni. Uandaspti eska ima enga uéjka kʼéri kʼumanchikua ma úni, jatsisti para ‘kuenta úntani sentabu para exeni abersienga andangutaaka para kʼamarani’ ka eska juramuti jatsiska para orheta exeni sinksï imeri soldaduecha uáka andani (arhinta je Lukasʌ 14:27-33). Jesusi mítespti, eska sáno májkueni, imecha engaksï uékaaka imeri chúxapatini, jatsistiksï para sési eratsentani ambe engaksï jatsika para úni paraksïni niárani imeri chúxapatini. Paraka jorhenguarhiri uáka ísï úni eska Jesusi na uandapka, jatsiskachi para pʼímarhini para mándani semana jorhenguarhini. ¿Nénachi uá ísï úni?
6. ¿Ambechi úpirini úni para jorhenguarhiri sánderu jorhenguarhini Bibliaeri ambe?
6 Uénani jámani, uákachi sánderu ióni jorhendani kʼuiripuni Bibliaeri ambe puertarhu. Por ejemplu, uákajtsï sánderu ambe jorhendani méni engajtsï niuaka pʼorhembini. Enga kʼuiripu pʼindeakia sánderu tiempu uandontskuarheni juchantsïni jingoni, ju je kurhamarhini nanichi úpirini sáni uaxakani parachi seguirini uandontskuarheni. Ambe engajtsïni mókuchintaaka, uákachi míteni sini uékasïni seguirini jorhenguarhini Bibliaeri ambe. Ka para kʼuiripu sánderu jorhenguarhini Bibliaeri ambe, úpiringachi kurhamarhini sini uékapirindi mándani semana tsimani xanhari jorhenguarhini. Ju je exeni máteru ambe enga jorhenguarhiri jatsika para úni.
PREPARIKUARHINI MÉNI ENGA JORHENGUARHIAKA
Ju je sési prepararikuarhini para Bibliaeri ambe jorhentpini ka ju je jorhendani jorhenguarhirini néna uá sési prepararikuarhini. (Exe je párrafu 7 a 9).
7. ¿Néna jatsiski para prepararikuarhini jorhentpiri méni enga niuaka Bibliaeri ambe jorhentpini?
7 Kánikua jukaparhakuesti eska jorhentpiri sési prepararikuarhiaka méni enga niuaka Bibliaeri ambe jorhentpini. Uénani jámani, uákachi arhintani informasionini ka jirinhantaani Bibliaeri karakatechani. Ju je exeni amberi ambe uandasïni. Ju je eratsentani jorhenguarhikueri títuluni, subtituluechani, kurhamarhikuechani, Bibliaeri karakatechani engaksï jindeka para arhintani, imajenichani ka bideu ma engajtsïni jarhuataaka eksplikarini imani ambe engachi exeni jauaka. Tátsekua, jorhenguarhirini eratseparini, exe je nénajtsï uá eksplikarikuni informasionini paraka ima sési ka sóntku kurhanguaka ka para ísï úni eska na jorhenguarhiaka (Neh. 8:8; Prov. 15:28a).
8. Eska na uandapka Pablu ixú Kolosasi 1:9, 10, ¿ambechi uá kurhajpikuni jorhenguarhirini kómarhikua jimbo?
8 Engachi prepararikuarhini jámaaka, ju je kómarhini Jeobani juchari jorhenguarhirini jimbo ka imani ambe jimbo enga uétarhinchani jaka. Ju je kurhakuni eskajtsïni jarhuataaka sési úrani Bibliani paraka mintsitarhu niárakuaka ima ambe enga jorhenguarhiaka (arhinta je Kolosasi 1:9, 10). Ka eratsenta je, ambe úpirini jorhenguarhiri úkua jukanchani kurhanguni o jiókuarhini. Ambe engachi jucha uéjka, jindesti eska niáraaka itsï atakuarhini.
9. ¿Nénachi uá jarhuatani jorhenguarhirini para méntkisï prepararikuarhini?
9 Enga jorhenguarhiri mándani semana jorhenguarhiaaka Bibliaeri ambe, ju je erokuarhini eska jukaparharaaka ambe enga Jeoba ka Jesusi úka imani jimbo ka eska uékaaka sánderu ambe jorhenguarhini (Mat. 5:3, 6). Paraka marhuakuaka jorhenguarhirini ima ambe enga jorhenguarhini jaka, jatsisti para jingontku kurhaani. Ka para ísï úni, jatsiskachi para arhini eska kánikua jukaparhakueska eska tʼuini arhintaakia jorhenguarhikuani engachi exeni jauaka ka eska eratsentaaka néna uá imani ambe enga jorhenguarhika. Paraka ísï uáka, uákachi májku kʼéri prepararikuarhini paraka ima exeaka néna úni. * Ju je jorhendani jirinhantani mókuntskua kurhamarhikueri ka eska enga kuirutsiaka uánikua uandakuechani jarhuataaka miántani mókuntskuani. Tátsekua, ju je arhini eska mókuntaaka ambe enga ima kurhanguka. Ísïchi uáka míteni sini sési kurhanguski ambe engachi jorhenguarhini jaka. Ju je exeni máteru ambe enga jatsika para úni jorhenguarhiri.
PAUANI PAUANI ARHINTANI BIBLIANI KA KÓMARHINI JEOBANI
Ju je jorhendani jorhenguarhirini pauani pauani arhintani Bibliani ka kómarhini Jeobani. (Exe je párrafu 10 ka 11).
10. ¿Andisï jukaparhakue eska jorhenguarhiri pauani pauani arhintaaka Biblia, ka ambe jatsiski para úni paraka marhuakuaka ima ambe enga arhintaaka?
10 Aparte de jorhenguarhini mándani semana, jorhenguarhiri ístu jatsisti para pauani pauani jandiajku úni ambe ma. Jatsisti para kurhajchani ka uandontskuarheni Jeobani jingoni. Ka para úni kurhajchani Jeobani jatsiti para pauani pauani arhintani Bibliani (Jos. 1:8; Sal. 1:1-3). Ju je jorhendani néna úrani “programani para Bibliani arhintani enga jw.org jaka ka úsïndi ma imprimirini. * Ísïsti, paraka marhuakuaka ambe enga arhintaaka, ju je arhini eska eratsentaaka ambe enga jorhenguarhiaka Jeobaeri ambe ka na enga uáka úrani imeri irekuarhu ima ambe enga jorhenguarhiaka (Uku. 17:11; Sant. 1:25).
11. ¿Jorhenguarhiri néna uá jorhenguarhini kómarhikua úni, ka andisï xáni jukaparhakue eska pʼindeaka kómarhini?
11 Ju je arhini jorhenguarhirini eska uandontskuarhekuaka Jeobani pauani pauani kómarhiparini. Méni engachi jorhenguarhiaka Bibliaeri ambe, ju je mintsita jingoni kómarhini Jeobani engachi uénani jámaaka ka engachi kʼamarani jámaaka ka ju je kómarhijpikuni jorhenguarhirini. Ísï, ima jorhenguarhiati mintsita jingoni kómarhini ka úrani tata Jesukristueri nombrini para Jeobani kómarhini (Mat. 6:9; Juanu 15:16). Ju je eranhaskani na enga xáni andarhieraaka Jeobani enga pauani pauani arhintaska Bibliani ka enga kómarhiska (Sant. 4:8). Enga pʼindeska ini ambe úni, jarhuataati paraka niáraaka aiakukuarheni Jeobani ka itsï atakuarhini. Ju je exeni ambe máteru ambe jarhuataa.
JEOBAERI AMIGU ÚKUARHINI
12. ¿Nénachi uá jarhuatani jorhenguarhirini para Jeobaeri amigu úkuarhini?
12 Ambe enga jorhenguarhiri jorhenguarhijka Bibliaeri ambe, no solu jatsisti para eratsekuarhu niárakuni, sino ístu mintsitarhu. ¿Andi? Jimboka mintsita —enga ístu arhikuekajka ambe engachi tsitijka ka pʼikuarherani— úsïnga eskachi niáraaka ísï úni ambe engachi jorhenguarhijka. Jesusi uánikua ambe jorhendaaspti kʼuiripuechani ka imechaksï tsitisïrendi ambe engaksï jorhenguarhienga. Joperuksï chúxapasïrendi jimboka ístu mintsitarhu niárakuasïrenga ima ambe enga jorhendauenga (Luk. 24:15, 27, 32). Ka jorhenguarhiri jatsisti para jakajkuni eska Jeoba meru jarhaska ka eska uáka niárani imeri Tátini, imeri Tata Diosï ka imeri amigu (Sal. 25:4, 5). Engajtsï jorhenguarhini jauaka Bibliaeri ambe, exera je jorhenguarhirini na enga xáni sési járhati kualidadichani jatsiaka juchari Tata Diosï (Éx. 34:5, 6; 1 Ped. 5:6, 7). Náki uéjkichi tema jorhendani jarhani, ju je exerani na enga jásï kʼuiripu máeka Jeoba, ju je jarhuatani paraka jukaparharaaka na enga xáni uékpitika Jeoba, sési kámpini ka pʼamojpini. Jesusi uandaspti eska “primeru mandamientu enga sánderu kʼéri ambeka” jindeska “Uékaakari chíti Tata Diosïni” (Mat. 22:37, 38). Ju je jánguarhintani para jorhenguarhiri niárani kánikua xénchani Tata Diosïni.
13. Ejemplu ma úraparini, uanda je nénachi úpirini jarhuatani jorhenguarhirini para míteni na enga jásï kʼuiripu máeka Jeoba.
13 Engachi uandontskuarheaka jorhenguarhiri jingoni, ju je aianguni na engachi xáni xénchajka Jeobani. Jamberi i ambe jarhuataati jorhenguarhirini paraka imajtu uékaaka Tata Diosïri amigueni ka niárani xénchani (Sal. 73:28). Por ejemplu, ju je eranhaskani eskachi jorhenguarhixaka ambe ma, ochi arhintani jarhani Bibliaeri karakata ma engachi kánikua tsitijka ka enga uandajka na enga Jeoba xáni uékpitika, jánhastini, na enga jurhimbitku újka ambe ma o na enga xáni uinhapitika. Jiájkani, úpiringachi arhini jorhenguarhirini eska i jindeska ambe ma engachi jimbo xáni xénchajka juchari Táti auandarhu anapuni. Ju je exeni últimu ambe enga jorhenguarhiri jatsika para úni paraka niáraaka itsï atakuarhini.
NIRANI TÁNGUARHIKUECHARHU
Ju je pʼímarhini jorhenguarhirini paraka niuaka tánguarhikuecharhu. (Exe je párrafu 14 ka 15).
14. Eska na arhijka Ebreu 10:24, 25, ¿Ambe jarhuataa jorhenguarhirini paraka niáraaka Tata Diosïni marhuakuni?
14 Iáminduechachi uékasïnga eskaksï jorhenguarhiricha niáraaka itsï atakuarhini. Ma ambe engachi uáka úni enga kánikua jukaparhakueka, jindesti pʼímarhiani paraksï nirani tánguarhikuecharhu. Bibliaeri jorhentpiricha engaksï kánikua sési jorhentpijka, uandasïndiksï eska engaksï jorhenguarhiricha nirajka tánguarhikuecharhu sánderuksï sóntku niárasïnga marhuakuni Tata Diosïni (Sal. 111:1). Uánikuaksï arhiasïndi imeri jorhenguarhirichani eska útasï uánikua ambe jorhenguarhiaka engaksï niuaka tánguarhikuecharhu. Ju je arhintani jorhenguarhiri jingoni Ebreu 10:24, 25 ka ju je arhini na enga xáni marhuakuaka nirani tánguarhikuecharhu (arhinta je). Ístuchi uáka exerani arini na bideuni ¿Nénaksï úkuarhisïni juchari tánguarhikuecha? * Ju je jarhuatani jorhenguarhirini paraka no ma tánguarhikuarhu kuerataaka.
15. ¿Ambechi uá úni paraka jorhenguarhiri uékaaka nirani iámindu tánguarhikuecharhu?
15 ¿Ambechi uá úni enga jorhenguarhiri nótki uénani jaka nirani tánguarhikuarhu o enga solu iauani ménisï nirajka? Ju je tsípikua jingoni aianguni ambe engachi jorhenguarhika tánguarhikuarhu ma enga apenasi úkuarhika. I ambe sánderu marhuakuati ka eska solu pʼímarhini para nirani tánguarhikuecharhu. Ju je íntskuni rebistani Aianhpiri o Programa para ánchikuarhini tánguarhikuarhu enga jingoni jorhenguarhinhani jaka. Ju je exerani ambe engachi jorhenguarhiaka máteru tánguarhikuarhu ka kurhamarhini náki parti sánderu tsitiski para jorhenguarhini. Ambe enga exeaka ka kurhaani primeru xanhari enga niuaka tánguarhikuarhu, sánderu ambakiti ambeuati eska náki uéjki máteru relijionirhu enga ima nika (1 Kor. 14:24, 25). Míteauati máteru kʼuiripuechani engaksï ambakiti ambe jorhendaaka ka engaksï jarhuataaka para niárani itsï atakuarhini.
16. a) ¿Ambechi jatsiski para úni jarhuatani jorhenguarhirini ma itsï atakuarhini? b) ¿Ambechi jorhenguarhia máteru jorhenguarhikua jimbo?
16 Eskachi na exekia, ¿ambechi uá úni parachi jarhuatani jorhenguarhiri ma paraka niáraaka itsï atakuarhini? Parachi jarhuataani jukaparharani Bibliaeri jorhenguarhikuani, ju je pʼímarhini mándani semana jorhenguarhini ka paraka sési prepararikuarhiaka. Ju je jorhendani jorhenguarhiri paraka pauani pauani arhintaaka Bibliani ka eska kómarhiaka Jeobani ka paraka niáraaka imeri amigu úkuarhini. Ístu, ju je pʼímarhini para nirani tánguarhikuecharhu. (Exe je rekuadruni “ Ambe enga jatsika para úni jorhenguarhiri”). Eskachi na exeni jauaka máteru jorhenguarhikua jimbo, iúmu ambe jarhasti engaksï jatsika para úni Bibliaeri jorhentpiricha para jarhuatani jorhenguarhirini ma itsï atakuarhini.
PIREKUA 76 Kánikua sési pʼikuarherasïnga
^ párr. 5 Jorhendani kʼuiripuni ambe ma arhikuekasïndi jarhuatani para ima ménderueni eratseni, pʼikuarherani o jámani. Karakata uéxurhini 2020 anapu, Mateu 28:19, miátantasïdijtsïni na enga xáni jukaparhakueka Bibliaeri ambe jorhendaani kʼuiripuechani ka arhistakuani ambe engaksï jatsika para úni paraksï niárani Jesusiri chúxapati máeni. Ini jorhenguarhikua ka máteru jimbo, exeakachi nénachi uá sánderu sési úni ini ánchikuarhitani enga xáni jukaparhakueka.
^ párr. 2 JUKAPARHAKUA AMBE: Engachi someni uandontskuarhekuska kʼuiripuni ma Bibliaeri ambe ka úranchi jarhani publikasioni ma, Bibliaeri jorhenguarhikua máesïndia. Engachi tsimani xanhari jorhendakia kʼuiripuni ma ka engachi arhika na enga úkuarhijka Bibliaeri jorhenguarhikua ma ka ístu engachi exeaka eska seguiriuaka jorhenguarhini, uákachia ísï kuenta úni komueska jorhenguarhiri ma.
^ párr. 3 Ini tsimani jorhenguarhikuecha jimbo ístu uandasïndi ambe engaksï arhijka arini particha jimbo “Dirijamos estudios bíblicos progresivos” engaksï uéraka juliu de 2004 a maiu de 2005 jamberi Nuestro Ministerio del Reino jimbo.
^ párr. 4 Iámindu jásï aianhpikuarhu, aianhpirichaksï jatsisti para úni eskaksï na uandajka juramukuecha para kuájchakuni informasionini paisirhu anapu.
^ párr. 9 Exe je bideuni Jorhenda je chári estudiantini prepararikuarhini. Íxu jw.org®, incha je PUBLIKASIONICHA > BIDEUECHA > JUCHARI TÁNGUARHIKUECHA KA EIANHPIKUA > JORHENGUARHI JE NÉNA SÁNDERU SÉSI AIANHPINI.
^ párr. 10 Incha je PUBLIKASIONICHA > LIBRUECHA KA FOIETUECHA.
^ párr. 14 Pájinarhu jw.org, exe je BIBLIAERI JORHENGUARHIKUECHA > JARHUAJPERATECHA PARA BIBLIANI ESTUDIARINI > JORHENGUARHI JE BIBLIAERI AMBE NEMA JINGONI ENGAKSÏ UÁKA JORHENDANI.
