1, 2. ¿Ambe jimboksï no májkuenispi Akabi ka Manasési, ka náki kurhamarhikuechanchi mókuantaua?

JU JE tsimani reiicheri uandani engaksï ióntki irekapka, ma Israeli juramuspti 10 tribuecharhu ka máteru Judá, tsimani tribuecharhu. Nájkirukaksï no imani mismu tiempu jimbo irekapka, sáno májkueni jásï ambeksï úspti, tsimarhanksï nóteru kurhajchasptia Tata Diosï Jeobani ka úsptiksï eska Tata Diosïri ireta no sési jásï ambe úpiringa, diosï úkatechanksï kómarhiaspti ka uándikpisptiksï. Joperu jarhaspti ambe ma engaksï jimbo no májkuenipka. Ma, seguirispti no sési jásï ambe úni asta jiáni jamberi enga uarhipka ka máteru móantaspti imeeri ambe enga no sési úpka ka puáminhantaspti. ¿Neecherichi uandaxaki?

² Israeli anapu reiri enga Akabi arhinheenga ka Judá anapueri enga Manasési arhinheenga. Ambe engaksï jimbo no májkuenipka kánikua ambejtsïni jorhendasïndi ambe enga arhikuekajka móantani (Uku. 17:30; Rom. 3:23). ¿Ambeeski móantani ka néna xarhatasïni ma i ambe? Jatsiskachi para míteni ini ambe jimbokachi iáminduecha uékasïnga eskajtsïni Tata Diosï Jeoba puáchentaaka engachi no sési jásï ambe niátaska. Parachi mókuantaani indeni kurhamarhikuechani, exeakachi ini tsimani reiicheri irekuani ka exeakachi ambechi uaa jorhenguarhini imeecheri ejemplu jingoni. Tátsekuachi exeaka ambe enga Jesúsi jorhentpipka eska jindeespka móantani.

3. ¿Na jásï ma reispi Akabi?

³ Akabi jindeespti septimu rei Israeliri, Jesabelini tembuspti enga Sidóni anapu reiri uájpeepka. Sidóni, paisi máespti enga nortirhisï japka Israeli uératini ka jatsikuarhenhaspti. Ísï jimbo, enga Akabi tembuchapka Jesabelini jingoni, úpti eska Israeli jatsipiringa jatsikuarhekua ambe, joperu inde ambe úspti eskaksï jurajkupiringa Tata Diosï Jeobani. Jesabeli, Baalini kómarhisïreendi ka  úspti eska Akabi arhiapiringa kʼuiripuechani eskaksï indeni relijioni jingoni úkuarhintapiringa enga ikichakueni jásï ambe ueenga komu ísku jándikua ambe niátani templuecharhu ka uándikuani sapiichani para kéjtsïtakua uaani. Jiáni enga Jesabeli juramuni japka, iámindu profetechaksï peligrurhu jarhaspti, asta niáraspti uánikuechani uánditarkurhiani (1 Rey. 18:13). Akabi jindeespti rei enga “sánderu no sési ambe niátapka Tata Diosï Jeobaeri orhepani jimbo ka eska iámindu imeecha engaksï antesi juramupka” (1 Rey. 16:30). Tata Diosï Jeoba iámu ambe exexapti enga Akabi ka Jesabeli úni japka, joperu pʼamojkuspti imeeri iretani ka axaspti profeta Elíasini para jarhuatani mójtakukuarhini ka paraksï imani marhuakuni ante de nóteru jarhania tiempu. Joperu Akabi ka Jesabeli, nóksï uékaspti kurhajchani.

4. ¿Ambe úkuarhinchapirini Akabi, ka ambe úspi ima?

⁴ Ísï tátsekua Tata Diosï Jeoba nóteru tekaantasptia. Axaspti Elíasini paraka aiangupiringa Akabini ka Jesabelini ambe engaksï úkuarhinchapiringa: iámu imeeri familia kʼamajkunhapirindi. Ambe enga profeta uandapka úspti eska Akabi kánikua no sési pʼikuarherapiringa. Ma repenku inde acheeti enga xáni kʼéramakuarhienga niáraspti kaxumbintani (1 Rey. 21:19-29).

5, 6. ¿Nénachi míteski eska Akabi no meru móantaspka?

⁵ Nájkiruka Akabi kaxumbintapka enga ísï arhinhapka, tátsekua xarhataspti eska no meru móantaspka. No ma ambe úspti paraka nóteru kómarhinhapiringia Baali, ni arhipi ireta Israelini eska kómarhipiringa Tata Diosï Jeobani. Ístu, úspti máteru ambe enga xarhatapka eska no móantaspka.

⁶ Ísï tátsekua, enga Akabi kurhakupka Judá anapu ambakiti rei Jeosafatini eska jarhuatapiringa uarhipeni Siria anapuecha jingoni, Jeosafati arhispti eskaksï orheta kurhamarhipiringa Tata Diosï Jeobaeri profetani ma, ambe enga jatsipka para úni ante de nirani uarhipeni. Orheta, Akabi no uékasïndi ka arhisïndi: “Útasteru jarhasti achamasï ma parachi Tata Diosï Jeobani kurhamarhini, joperuni ji kurhunhisïnga, jimboka no méni sési ambe uandasïnga juchiiti ambe, solu no sési jásï ambe”. Nájkiruka ísï uandapka, kurhamarhisptiksï profeta Mikaiani ka i arhispti Akabini eska no sési jásï ambe úkuarhinchapiringa. Enbesi de móantani ka kurhakuni Tata Diosï Jeobani eska puákuntapiringa, i no ambakiti rei ónhatarkuarhispti Mikaiani (1 Rey. 22:7-9, 23, 27). Nájkiruka i rei ónhatarkuarhipka Tata Diosï Jeobaeri profetani, no úspti úni eska no ísï úkuarhipiringa eska na arhinhapka. Enga nípkia uarhipeni, uándikusptiksï (1 Rey. 22:34-38).

7. ¿Ambe uandaspi Tata Diosï Jeoba Akabiri ambe enga na uarhipkia?

⁷ Enga Akabi na uarhipkia, Tata Diosï Jeoba uandaspti ambe enga eratsenga imeeri ambe. Enga ambakiti rei Jeosafati no ma ambe úkuarhinchapka ka enga kʼuanhatsentapkia imeo, Tata Diosï Jeoba axaspti profeta Jeúni paraka xukapiringa enga ísï jarhuatapka Akabini. Arhispti: “¿Exesïndi eska sési jarhaska no sési úrichani jarhuataani ka eskari xénchauaka imeechani engaksï ikiakujka Tata Diosï Jeobani?” (2 Crón. 19:1, 2). Ju je eratseni ini ambe: enga Akabi sési jimbo móantapiringa, profeta no uandapirindi eska imajtu no sési úri máespka ka eska ikiakusïreenga Tata Diosï Jeobani. Ísï jimbo, nájkiruka Akabi no sési pʼikuarherapka imani ambe jimbo enga úpka, no meru móantaspti.

8. ¿Ambejtsïni jorhendasïni rei Akabiri ejemplu ambe enga no jindeeka móantani?

⁸ ¿Ambechi jorhenguarhisïni Akabiri ejemplueri? Enga Elíasi aiangupka ambe enga úkuarhinchapiringa imeeri familia, orheta Akabi kaxumbintaspti. Sési ueenaxapti, joperu ambe enga tátsekua úpka, xarhataspti eska no meru mintsita jingoni móantaspka. I ambejtsïni jorhendasïndi eska enga nema meru móantajka, no nomasi no sési pʼikuarherasïndi imani ambe jimbo enga úka, sino sánderu ambe arhikuekasïndi. Ju je exeni máteru ejemplu engajtsïni jarhuataaka kurhanguni.

9. ¿Na jásï ma reispi Manasési?

⁹ Ma 200 uéxurhini tátsekua, Manasési niáraspti Judá anapu reini. Jamberi ambe enga Manasési úpka, sánderu no sési japti eska ambe enga Akabi úpka. Biblia uandasïndi eska “kánikua no sési jásï ambe úsp[ka] Tata Diosï Jeobani japarini para ikiatani” (2 Crón. 33:1-9). Uaaspti altarichani paraksï diosï no jurhimbitichani kómarhiani ka asta peeraspti Tata Diosï Jeobaeri templurhu posti ma enga jamberi jindeepka para seksuni kómarhini. Úraspti xérkuarhikuani, majia ka sïkuamikua ambe. Ístu, uánikua kʼuiripuechani uándikuaspti ka asta imeeri “uájpeechani kurhiraspti chpirirhu” para kéjtsïtakuani diosï no jurhimbitichani (2 Rey. 21:6, 7, 10, 11, 16).

10. ¿Néna jurhimberantaspi Tata Diosï Jeoba Manasésini ka ambe úspi i rei?

¹⁰ Májkueni eska Akabi, Manasési no kasu úspti ambe enga Tata Diosï Jeoba arhipka imeeri profetecha jimbo. Últimu, “Tata Diosï Jeoba úspti eskaksï Siria anapu reiri ejersituecha jupiringa paraksï uarhipeni” Judá jingoni. “Jupikasptiksï Manasésini ganchuecha jingoni ka kobriri kadenecha jingonksï jóndukuspti ka Babiloniaksï páspti”. Péringa enga Babilonia japkia jupikakata, eratsentapka ambe enga xáni úpka. “Kánikua kaxumbikua xarhataspti imeeri ióntki anapu parienticheri Tata Diosïri orhepani jimbo”. Joperu sánderu ambe úspti: “Mintsita jingoni kómarhispti imeeri Tata Diosï Jeobani” ka “seguirispti kómarhini”. Ima kʼuiripu enga xáni no ambakepka ueenaspti mójtakurhini. Ueenaspti ísï exeni Tata Diosï Jeobani komueska imeeri “Tata Diosï” ka mémindu kómarhispti (2 Crón. 33:10-13).

11. ¿Néna xarhataspi Manasési eska sési jimbo móantaspkia? (2 Crónicas 33:15, 16).

¹¹ Sánderu orhepani, Tata Diosï Jeoba mókukuntaspti Manasésini. Exespti eska imeeri mintsita mójtakurhispkia ka i ambe xarharaspti imeeri kómarhikuecha jimbo. Tata Diosï Jeoba pʼamojkuspti enga ima ísï kómarhipka ka úspti eska ima ménderu reipiringa. Manasési kánikua jánguarhintaspti para xarhatani eska sési jimbo móantaspkia, úspti ambe enga Akabi no méni úpka: mójtakuspti imeeri jánguani, jánguarhintaspti parakaksï máteruecha no kómarhiapiringa diosï no jurhimbitichani ka arhispti iretani eska kómarhipiringa Tata Diosï Jeobani (arhinta je 2 Crónicas 33:15, 16). Uánikua uéxurhini no ambakiti ejemplu máespti para imeeri familia, para imeeri ánchikuarhiricha ka para ireta, ísï jimbo, uétarhinchasïreendi mintsikani Tata Diosïni ka balori jukani para indeni ambe úni. Joperu iásï enga jatiripkia, jánguarhintaspti para sési peentani ambe enga no sési úpka. Jamberi ima jindeepti ambakiti ejemplu ma para imeeri nimakua Josíasi enga sánderu orhepatini niárapka ambakiti rei máeni (2 Rey. 22:1, 2).

12. ¿Ambejtsïni jorhendasïni Manasésiri ejemplu, ambe enga jindeeka sési jimbo móantani?

¹² ¿Ambechi jorhenguarhisïni Manasésiri ambe? Ima no solu kánikua kaxumbikua xarhataspti, sino kómarhispti Tata Diosï Jeobani ka kurhakuspti eska pʼamojkupiringa ka mójtakuspti  imeeri jánguani. Ístu, jánguarhintaspti sési peentani iámindu no sési jásï ambe enga úpka ka jánguarhintaspti para kómarhini Tata Diosï Jeobani ka jarhuataspti máteruechani parakaksï májkueni úpiringa. Manasésiri ejemplu jarhuataasïndi imeechani engaksïni kánikua no sési jásï ambe úka. Ka xarhatachesïndijtsïni eska Tata Diosï kánikua sési kámpisïnga ka eska jingontku jarhaska “para puátspentani” (Sal. 86:5). Tata Diosï Jeoba uaati puákuantani imeechani engaksï mintsita jingoni móantajka.

13. ¿Náki ejemplujtsïni jarhuatasïni kurhanguni ambe enga meru arhikuekajka móantani?

¹³ Eskachi na exekia, Manasési sánderu ambe úspti ka eska nomasi no sési pʼikuarherani imeeri pekaduecha jimbo. I ambejtsïni jorhendasïndi ambe ma enga kánikua jukaparhakueka, ambe enga arhikuekajka meru móantani. Parachi úni kurhanguni, ju je eratsentani ini ejempluni. Eranhaska je eskachi kurhinda ma nirasïnga piáni ka kurhinda úri nójtsïni íntskuni kurhinda ma, sinojtsïni jarina íntskuni. ¿Jiókuarhipirinchi? Nómbe. ¿Joperu engajtsïni arhipiringa eska jarina jingoni úkata jarhaska kurhinda? Útasï ísï juchachi no jiókuarhipiringa indeni ambe. Sáno májkueni, Tata Diosï Jeoba kurhakuasïndi imeechani engaksï pekadu ma újka, eskaksï sési jimbo móantaaka. Enga kʼuiripu ma no sési pʼikuarherajka imeeri pekaduecha jimbo sési jarhasti, jimboka i ambe jukaparhakua ambeeska. Joperu no i ambejkusï uétarhijti. Parachi míteni ambe máteru ambe uétarhisïni, ju je exeni ejemplu ma enga Jesúsi uandapka.

14. Ejemplurhu enga Jesúsi uandantapka, ¿néna ueenaspi xarhatani tumbi enga tsïnchepka eska móantaspkia?

¹⁴ Jesúsi uandaspti ejemplu ma tumbiiri ma enga tsïnchepka ka engachi uaaka arhintani jimini Lukasʌ 15:11-32 jimbo. I tataka nóteru uékasptia kurhajchani taati jémbani ka uéntaspti imeo ka niraspti asta “máteru nasioni jimbo ísï”. Jimini kánikua no sési jásï ambe úspti. Joperu enga ueenapka problemechani jatsiani, ueenaspti eratsentani ka kuenta íntskukuarhespti eska sánderu sési irekaspka imeeri taati jémbeeri kʼumanchikuarhu. Ísï eska na uandapka Jesúsi, i tumbi eratsentaspti. Kʼuanhatsentaspti imeeri taati jémbeeri kʼumanchikuarhu ka arhisti taati jémbani eska puákuntapiringa. Kánikua jukaparhakuespti enga kuenta íntskukuarhepka eska no sési ambe úspka, joperu no i ambejkusï uétarhipti. Jatsispti para mójtakurhini.

15. Ejemplurhu enga Jesúsi uandantapka, ¿néna xarhataspi tumbi enga tsïnchepka eska meru móantaspkia?

¹⁵ ¿Néna xarhataspi tumbi enga tsïnchepka eska meru móantaspkia? Iauani xanharaspti para úni kʼuanhatsentani imeeri kʼumanchikuarhu. Enga niántapkia ka enga exepka imeeri taati jémbani, arhispti: “Taati, ji pekadu úska Diosïni japarini ka ístu tʼungini japarini, ka nóteruni jukanchaska eskani arhinhaaka eskani jindeeska chiiti uátsïti” (Luk. 15:21). Ini ambakiti uandakuecha jingoni, xarhataspti eska uékasïreenga ménderu sési pájperantani Tata Diosï Jeoba jingoni. Ístu jiókuarhispti eska imeeri úkuecha jingoni no sési úkuspka imeeri taati jémbani.  Ka uékasïreendi jánguarhintani para imeeri taati ménderu jaiapanhentani, asta uékasïreendi eskaksï ísï kámapiringa eska ánchikuarhirini ma (Luk. 15:19). I ejemplu enga Jesúsi uandantapka no solujtsïni mintsitarhu niárachesïndi. Ambakiti ambe jorhendaasïndi orhejtsïkutichani engaksï uékani jauaka míteni sini sési jimbo móantaskia nema enga kʼéri pekadu ma úka.

16. ¿Andisï no fásilii paraksï orhejtsïkuticha exeni sini meru mintsita jingoni móantaskia nema enga no sési úka?

¹⁶ No fásilisti paraksï orhejtsïkuticha úni exeni sini meru mintsita jingoni móantaskia ima enga kʼéri pekadu ma úka. ¿Andi nómbe? Jimbokaksï ima no úsïnga exeni ambe enga mintsitarhu jaka, ísï jimbo, jatsistiksï para jirinhani ambe ma enga jarhuatauaka exeni sienga meru mintsita jingoni mójtakurhiskia ima enga pekadu úka ka sienga kurhunhisïnia imani ambe enga úka. Ka jamberi ménichanisï, nema úpirindi kʼéri pekadu ma úni meru uékaparini ka orhejtsïkuticha engaksï imani jingoni tánguarhijka para jarhuatani, úpirindiksï no seguru jarhani sini sési jimbo móantaskia i kʼuiripu.

17. a) ¿Náki ejemplu xarhatasïni eska jamberi no sési úri ma no meru móantaskia nájkiruka uandaaka eska kánikua no sési pʼikuarherasïnga? b) ¿Ambe jatsiski para úni ima kʼuiripu enga no sési úka para xarhatani eska meru móantaskia? (2 Korintu 7:11).

¹⁷ Ju je exeni ejemplu ma. Erachi ma uánikua uéxurhini ísku jándikua ambe niátasïndi, joperu no kurhajkuarhisïndi jarhuajperata, sánderu sési, jiskakusïndi imeeri uarhiitini, amigu jémbechani ka orhejtsïkutichani ambe enga úka. Joperu ma jurhiani, orhejtsïkutichaksï mítesïndi ambe enga úka. Ka engaksï ícha arhijka eskaksï jatsiaska pruebechani enga xarhatajka eska no sési ambe úska, erachi jiókuarhisïndi ka ísï xarharasïndi enajki no sési pʼikuarherajka imani ambe jimbo enga úka. ¿Xarhatasïni i ambe eska meru móantaska? Nómbe. Orhejtsïkutichaksï jatsisti para sánderu ambe exeni. I kʼuiripu no ma xanharkusï no sési úti, sino mémindu ka uánikua uéxurhini. Ístu, no jandiajku uandakurhintasti, sino máteru nema exesti ka imasï aianguati orhejtsïkutichani. Ísï jimbo, uétarhisïndi eskaksï orhejtsïkuticha exeaka ambe ma enga uaaka eskaksï seguru jauaka eska i kʼuiripu mójtakuskia na enga eratsejka, na enga pʼikuarherajka ka na enga jámajka (arhinta je 2 Korintu 7:11). Jamberi ióndaati mójtakurhini para sési jimbo xarhatani eska meru móantaskia. Ísï jimbo, jamberi petanhantaati kúnguarhikuarhu (1 Kor. 5:11-13; 6:9, 10).

18. ¿Néna xarhatasïni nema enga petanhantaka kúnguarhikuarhu eska meru móantaskia, ka ambe úkuarhia enga ísï úska?

¹⁸ ¿Néna xarhatasïni nema enga petanhantaka kúnguarhikuarhu eska meru móantaskia? Jatsisti para no kueratani tánguarhikuecharhu, ka úni ambe engaksï orhejtsïkuticha arhijka para pʼindeni pauani pauani kómarhini Tata Diosïni ka jorhenguarhini Bibliani. Ístu, jatsisti para jánguarhintani no úni imani ambe enga úpiringa páni para ménderu no sési ambe niátani. Enga jánguarhintaska sési pájperantani Tata Diosï Jeoba jingoni,  uaati seguru jarhani eska ima puákuntaaka. Ka orhejtsïkutichaksï uaati jarhuatani para kʼuanhatsentani kúnguarhikuarhu. Ísïisti, orhejtsïkutichaksï mítesti eskaksï no iáminduechani uaaka májkueni jusgariuani. Ísï jimbo, engaksï jusgariuaka nemani, jatsistiksï para sési exeni iámindu ambe ka pʼamojperakua jingoni jusgarini.

19. ¿Ambe jatsiski para úni ima enga no sési niátajka para xarhatani eska sési jimbo móantaskia? (Ezequiel 33:14-16).

¹⁹ Eskachi na exekia, ima pekadori enga xarhatajka eska sési jimbo móantaskia, no nomasi jatsisti para uandani eska no sési pʼikuarherasïnga imani ambe jimbo enga úka. Ístu, jatsisti para mójtakuni imeeri eratsekuani, ambe enga pʼikuarherajka ka úkuecha jingoni xarhatani. Jatsisti para jurajkuni imani no sési jásï ambe enga úni japka ka ménderu kurhajchani Tata Diosï Jeobaeri juramukuechani (arhinta je Ezequiel 33:14-16). Ambe enga jatsika para sánderu jukaparhakueni para ima, jindeesti sési pájperantani Tata Diosï Jeoba jingoni.

20, 21. ¿Nénachi uaa jarhuatani nemani enga kʼéri pekadu ma úka?

²⁰ Jesúsi uandaspti ambe ma enga jimbo aianhpini japka ka enga kánikua jukaparhakuepka. Ima uandaspti: “Jurhaska ióarhiani [...] pekadorichani para eskaksï móantaaka” (Luk. 5:32). Ka juchajtuchi jatsiska para uékani ini ambe úni. Jimajkani, ¿ambechi jatsiski para úni engachi kuenta íntskukuarheska eska juchaari amigu ma kʼéri pekadu ma úska?

²¹ Engachi jískaska ambe enga úka, no sésichi úkuni jauaka juchaari amiguni. Ístu, inde ambe, para no ma ambe marhuauati, jimboka Tata Diosï Jeoba iámu ambe exesïnga (Prov. 5:21, 22; 28:13). Uaakachi jarhuatani juchaari amiguni engachi arhiska eskaksï orhejtsïkuticha uékasïnga jarhuatani. Enga no uékaska aianguani orhejtsïkutichani, juchachi jatsiska para uandontskuarheni imeecha jingoni. Ísïchi xarhatani jauaka eskachi meru uékasïnga jarhuatani. I ambe kánikua jukaparhakuesti jimboka ima uaaka tsïtani imeeri pájperakua Tata Diosï Jeoba jingoni.

22. ¿Ambechi exea máteru jorhenguarhikua jimbo?

²² Joperu, ¿enga nema ióni no sési niátaskia ka orhejtsïkutichaksï petantani kúnguarhikuarhu? ¿Arhikuekasïni i ambe eskaksï no pʼamojperakua jingoni kámaska? Máteru jorhenguarhikua jimbo exeakachi na enga Tata Diosï Jeoba pʼamojperakua jingoni jurhimberantaajka imeechani engaksï no sési niátajka ka nénachi uaa jucha májkueni úni.