SEMANA 43
¡Asï kuatanta je!
Ju je “no kuatantani ambakiti ambe úni” (GAL. 6:9).
PIREKUA 68 Ju je Jeobaeri Juramukua semiia jatsikuni
AMBE ENGACHI EXEAKA *
1. ¿Andichisï xáni sési pʼikuarherajki Jeobaeri testiguecha?
¡XÁNI engachi sési pʼikuarherajka Jeobaeri testigueni! Tata Diosï Jeobaeri ireteskachi ka xarhatasïngachi eskachi imeeri Testigueska engachi aianhpijka ka jorhentpini imeeri ambe. Kánikuachi sési pʼikuarherasïnga jarhuatani nemani enga uékajka “tsípikua para méntkisï jatsini” para úni marhuakuni Tata Diosï Jeobani (Hech. 13:48, TNM). Ísïchi pʼikuarherasïnga eska Jesúsi enga “meru tsípini pʼikuarherapka espiritu santu jimbo” enga imeeri chúxapaticha kʼuanhatsentapka jiáni engaksï nípka aianhpini ka engaksï aiangupka na enga xáni sési nikuapka (Luk. 10:1, 17, 21).
2. ¿Nénachi xarhatasïni eskachi kánikua jukaparharasïnga aianhpikuani?
2 Para jucha kánikua jukaparhakuesti nirani aianhpini. Apostoli Pablu i ambe arhispti Timoteuni: “Jatsi kuidadu para tʼujkumindu ka ístu para inde ambe engari jorhentpijka”. Ka ístu arhispti: “Engari ísï úska, tʼuri mismu pʼimutanskateuaka ka ístu imeecha engaksïni kurhajchaaka” (1 Tim. 4:16). I uandakuechaksï xarhatasïndi eska aianhpikua jimbo, kʼuiripuechaksï uaaka tsípikua jatsini. Jánguarhintasïngachi méntkisï sési jámani jimbokachi Tata Diosïri Reinurhu anapueska. Méntkisïchi uékasïnga eska juchaari jángua kʼéri ambe arhiaka Tata Diosï Jeobani ka eska xarhataaka eskachi jakajkusïnga ambakiti ambe engachi aianhpijka (Filip. 1:27). Ka jingontkuchi exesïnga imani ambe engachi jorhentpijka jimbochisï sési prepararikuarhijka parachi nirani aianhpini ka jimbochisï kurhakujka Tata Diosï Jeobani eskajtsïni jarhuataaka parachi úni aianguani máteruechani imeeri ambe.
3. ¿Iáminduechaksï uéka míteni Reinueri ambe? Jatsiku je ejemplu ma.
3 Nájkirukachi jánguarhintaaka aianhpini, jamberi jima anapu kʼuiripuecha engachi jucha aianhpijka, no uékaati kurhaani Tata Diosïri Reinueri ambe. Ju je eratsentani ambe enga nitamanchaka erachi Georg Lindal, enga iámu Islandia aianhpipka uéxurhini 1929 uératini asta 1947 jamberi. Uánikua publikasionichani jurajkukuaspti kʼuiripuechani, joperu no nema Testigu úkuarhispti. Erachi i ambe karaspti: “Máruksï no uékasïndi eska aianhpinhaaka jurhimbikua ka máteruechaksï no sáni uékasïndi kurhaani”. Ísï tátsekua, niárasptiksï máru misioneruecha engaksï Galaadiri Jorhentperakuarhu uéntapka paraksï aianhpini, joperuksï kʼuiripuecha no uékasïreendi kurhaani. Nuebe uéxurhini tátsekua, máru kʼuiripuecha ima paisi anapuecha, aiakukuarhesptiksï Tata Diosï Jeobani ka itsï atakuarhisptiksï. *
4. ¿Nénachi úpirini pʼikuarherani engaksï kʼuiripuecha no uékajka kurhaani ambakiti aianhperakuani?
4 Engaksï kʼuiripuecha no uéjka jorhenguarhini Biblieri ambe, kómu pʼikuarherasïngachi. Jamberichi úpiringa ísï pʼikuarherani eska apostoli Pablu enga uandapka eska “kʼéri ma mískuarhita” jatsipka ka “uandanhiani” jarhani jimbokaksï judiuecha no uékasïreenga jiókuarhini eska Jesúsi jindeespka Mesíasi engaksï aiaminhapka (Rom. 9:1-3). ¿Ka engachi jorhendani jaka nemani Biblieri ambe, joperu ima no úni jarhani ambe enga jorhenguarhini jaka nájkirukachi jucha kánikua jánguarhintani jaka sési jorhendani ka últimuchi jatsini para nóteru jorhendania? O ¿engachi no méni jorhendaka nemani enga niáraka itsï atakuarhini? ¿Jatsipirinchi para no sési pʼikuarherani ka eratseni eska Tata Diosï Jeoba no újchakuraxaka juchaari ánchikuarhitani? Ini jorhenguarhikua jimbo, arini kurhamarhikuechanchi mókuantauaka: ¿nénachi míteski eskajtsïni sési nichexaka aianhpikuarhu? ka ¿ambechi jatsiski para erokuarhini engachi aianguauaka máteruechani Biblieri ambe?
¿NÉNACHI MÍTESKI ESKAJTSÏNI SÉSI NICHEXAKA AIANHPIKUARHU?
5. ¿Andisï no méntkisï ísï uérajki eskachi na eratseni jarhajka ima ambe engachi újka para Tata Diosï Jeoba?
5 Enga Biblia uandajka ima kʼuiripueri enga újka ambe enga Tata Diosï uéjka, uandasïndi: “Iámindu ambe enga ima uaaka sési uérakuati” (Sal. 1:3). Joperu i ambe no arhikuekasïndi eska iámindu ima ambe engachi uaaka para Tata Diosï Jeoba, ísï uéraaka eskachi jucha na eratseni jaka. Jimbokachi iáminduecha pekadoriska, i ambe úsïndi eskaksï “uánikua uandanhiatecha jauaka” engajtsïni no jurajkujka marhuakuni Tata Diosïni xáni eskachi xáni uékapiringa (Job 14:1). Ístu, imeecha engajtsïni ikiachejka úpirindiksï úni eskachi no uaaka agustu aianhpini (1 Kor. 16:9; 1 Tes. 2:18). Jimajkani, ¿néna exesïni Tata Diosï Jeoba eskajtsïni sési nichexaka aianhpikuarhu? Ju je exeani máru Biblieri karakatechani engajtsïni jarhuataaka mókuntani ini kurhamarhikuani.
Tata Diosï Jeoba kánikua jukaparharasïndi na engachi xáni jánguarhintajka aianhpini imeeri ambe, iá sea kʼuiripuechani japarini, karta o telefonu jimbo. (Exe je párrafu 6).
6. ¿Néna exesïni Tata Diosï Jeoba eskajtsïni sési nichexaka aianhpikuarhu?
6 Tata Diosï Jeoba exesïndi na engachi xáni jánguarhintajka ka na engachi xáni tekaantani jaka. Para Tata Diosï, sésijtsïni nichesïndi aianhpikuarhu engachi jucha jánguarhintajka aianhpini ka engachi uékperakua jimbo ísï újka, no arhiparini engaksï kʼuiripuecha kurhauaka o nómbe. Pablu i ambe karaspti: Tata Diosï jurhimbitku úsïndi “ísï jimbo ima no mirikurhiauati chaari úkuechani ka nijtu indeni ambe engajtsï úni jaka xarhataparini eskajtsï uékasïnga Diosïni, jimbokajtsï jarhuataska imeeri míndakatechani ka útasïjtsï jarhuataaxaka” (Ebr. 6:10). Tata Diosï Jeoba no mirikurhisïndi na engachi xáni jánguarhintani jaka ka eskachi uékperakua jimbo úsïnga, nájkiruka no ma kʼuiripu uékaaka kurhaani. Ísï jimbo, ari ambe enga Pablu arhiapka Korintu anapu kristianuechani, ístu jindeesti para jucha: “Chaari ánchikuarhita no ísku uéraati juchaari Tatani jimbo” (1 Kor. 15:58). Ka i ambe ísïisti, nájkiruka no ísï úkuarhiaka eskachi jucha na eratsetini japka.
7. ¿Ambechi jorhenguarhisïni ambe enga apostoli Pablu uandapka aianhpikueri ambe?
7 Apostoli Pablu ambakiti misioneru máespti ka uánikua iretecha jimbo uaxastaaspti kúnguarhikuechani. Joperu, engaksï máru kristianuecha engaksï sánderu kʼéri ambe exekuarhienga eska ima, arhinchapka ka arhinksï eska no jorhenaspka sési jorhentpini, Pablu no méni uandaspti namuni kʼuiripuechani jarhuataspi paraksï niárani itsï atakuarhini, sánderu sési, kuájpikuarhispti arhiapariani: “Ji sánderuni ánchikuarhiska” (2 Kor. 11:23 Táta Diósïri Uandakua Tata Jesukristueri Aiatsperakua). Ju je májkueni úni eska Pablu ka no mirikurhini eska ambe enga sánderu jukaparhakueka para Tata Diosï Jeoba, jindeeska eskachi jánguarhintaaka ka eskachi no kuatantaaka.
8. ¿Ambechi jatsiski para miáni juchaari aianhpikueri ambe?
8 Tata Diosï Jeoba kánikua sési pʼikuarherasïndi engachi aianhpijka. Ma xanhari Jesúsi axaaspti imeeri 70 chúxapatichani parakaksï nipiringa aianhpini Tata Diosïri Reinuni ambe. Engaksï kʼamarapkia, Biblia uandasïndi eskaksï ‘kʼuanhatsentaspka tsípiparini’. ¿Andiksïsï xáni sési pʼikuarherani japi? Imeechaksï uandaspti: “Asta Noambakitiri espirituechajtsïni janhanharhisïndi chiiti nombri jimbo”. Joperu Jesúsi jurhimberantaaspti arhiaparini: “Asï jáma je tsípini indeni jimbo engaksïni Noambakitiri espirituecha janhanharhijka, sino tsípi je jimboka chaari nombricha karakata jarhaska auandarhu” (Luk. 10:17-20). Jesúsi mítespti eska no méntkisï sési nikuapiringa aianhpikuarhu. Nóchi míteska namuni ima kʼuiripuecheri engaksï Jesúsiri chúxapaticha aianguapka niárapi marhuakuani Tata Diosï Jeobani. Joperu Jesúsiri chúxapatichaksï jatsipirindi para sési pʼikuarherani, no solu jimbokaksï kʼuiripuecha sési kurhaapiringa, sino jimboka Tata Diosï Jeoba jaiapanhentapiringa na engaksï xáni jánguarhintapiringa.
9. Eska na uandajka Galasia 6:7-9, ¿ambechi jatsia engachi seguiriska aianhpini?
9 Engachi seguiriska aianhpini, jatsiakachi tsípikua para méntkisï. Engachi jánguarhintajka aianhpini ka jorhentpini Reinueri ambe, ístuchi úni jarhasïnga “ambe enga espiritu santu uékajka”. ¿Nénachi úsïni i ambe? Engachi jurajkutakuarhejka eskajtsïni espiritu santu jarhuataaka. Engachi ‘no kuatantaska’ Tata Diosï Jeobajtsïni aiachisïndi eskachi jatsiaka tsípikua para méntkisï, nájkirukachi no nemani jarhuataaka para itsï atakuarhini (arhinta je Galasia 6:7-9).
AMBECHI JATSISKI PARA EROKUARHINI ENGACHI AIANGUASKA MÁTERUECHANI BIBLIERI AMBE
10. ¿Ambesï újki eska kʼuiripu ma jiókuarhiaka o nómbe ambe engachi jucha aianhpijka?
10 Kʼuiripueri mintsitasï újti eska jiókuarhiaka o nómbe ambe engachi aianhpijka. Jesúsi uandaspti ejemplu ma nemeeri enga jatsikujka ambe ma. Ini uandantskua jimbo, acheeti mámaru jásï echerirhu jatsikusïndi ambe ma, joperu imajku fruta íntspisïndi enga ambakiti echerirhu andatserajka (Luk. 8:5-8). Jesúsi uandaspi eskaksï mámaru jásï echericha, arhikuekasïnga kʼuiripuecheri mintsita, engaksï máru jiókuarhijka ka máteruecha nómbe Tata “Diosïri uandakuani” (Luk. 8:8-15). Májkueni eska na úkuarhijka nema jingoni enga jatsikujka ambe ma, juchajtuchi no uaaka úni eska kʼuiripuecha afuersa kurhauaka o jiókuarhini Tata Diosïri Reinueri ambe, jimboka imeecheri mintsitasï újka eska ima jiókuarhiaka o nómbe. Juchaari ánchikuarhita jindeesti seguirini aianhpini Tata Diosïri Reinueri ambe. Eska na uandaka apostoli Pablu, “mándani arhini maiamunhantaati eskaksï na jukanchaaka imeecheri ánchikuarhita jimbo” ka no engaksï kʼuiripuecha uékaaka kurhaani o nómbe ambakiti aianhperakuani (1 Kor. 3:8).
Noé, uánikua uéxurhini jimbo no méni jurajkuspti aianhpini, joperu ima, témba, imeeri uájpeecha ka imeecheri tembechajkusïksï inchapti arkarhu. Nájkiruka ísï úkuarhipka, ima sési úspti imeeri ánchikuarhitani enga Tata Diosï íntskupka (Exe je párrafu 11).
11. ¿Andichisï uandajki eska Noéri ánchikuarhita enga “jurhimbitku uandajtsïkpienga” sési uéraspka? (Exe je dibujuni enga ueenakuarhu jaka i rebisteri).
11 Desde iónisïa, uánikuecha engaksï marhuakuka Tata Diosï Jeobani aianhpistiksïa, joperuksï uánikuecha no uékaspti kurhaani. Pori ejemplu, Noé kʼuiripu máespti enga “jurhimbitku uandajtsïkpienga” ka jamberi ióni aianhpipti Tata Diosïri ambe (2 Ped. 2:5). Ima erokuarhiendi eskaksï kʼuiripuecha kurhajchapiringa, joperu Tata Diosï Jeoba no méni arhispti eska ísï úkuarhipiringa. Sánderu sési, enga arhipka eska úpiringa arkani, ístu juramukuspti: “Jatsiskari parari arkarhu inchani chiiti sapiicha jingoni ka chiiti uarhiiti jingoni ka chiiti uájpeecheri uarhiiticha” jingoni (Gén 6:18). Ka engachi eratsentaska na enga xántku kʼépiringa arka, jamberi Noé kuenta íntskukuarhepti eskaksï no uánikuechepiringa engaksï kurhajchapiringa (Gén 6:15). Ka ísï úkuarhispti. No ma kʼuiripu ima jurhiatikuecheri enga xáni no sési jánhaskuarhipka, uékaspti kurhajchani Noéni (Gén 7:7). ¿Eratsespi Tata Diosï Jeoba eska no marhuaspka Noéri ánchikuarhita? Nómbe, no ísï eratsespti. Para ima, Noéri ánchikuarhita kánikua marhuaspti, jimboka Noé iámindu ambe ísï úspka eska na juramuminhapka (Gén 6:22).
12. ¿Ambe úspi Jeremíasi para sánderu tsípikua jingoni aianhpini nájkiruka kʼuiripu no uékapka kurhaani ka asta máruksï uékani pʼínguni?
12 Profeta Jeremíasi ístu ióni aianhpispti Tata Diosïri ambe, nájkirukaksï máru kʼuiripuecha no uékeenga kurhaani ka máteruechaksï jamberi uékani pʼínguni. Xáni no sési pʼikuarheraspti imani ambe jimbo engaksï arhienga ka na engaksï teresmarhuenga, enga niárapka eratseni nóteru aianhpini (Jer. 20:8, 9). Joperu no kuatantaspti. ¿Ambe jarhuataspi para sési eratsentani ka tsípikua jingoni aianhpini? Tsimani ambe enga kánikua jukaparhakueka. Orheta, eska ima ambe enga aianhpini japka, úpiringa úni eskaksï kʼuiripuecha sánderu orhepani úpiringa sési irekani ka erokuarhikuaksï ma jatsini (Jer. 29:11). Ka máteru, Tata Diosï Jeoba Jeremíasini erakuspti paraka aianhpepiringa imeeri ambe ka ambe enga ima uéjka úni (Jer. 15:16). Juchajtuchi aianguaxaka ambe ma enga erokuarhikua ma íntskuajka kʼuiripuechani ini jurhiatikuecha jimbo enga xáni no sési jánhaskuarhini jaka. Ka aianhpisïngachi Tata Diosï Jeobaeri nombrini, jimbokachi imeeri Testigueska. Engachi méntkisï eratsentaska ini tsimani ambe, sánderuchi tsitiaka aianhpini no arhiparini ambe engaksï uaaka kʼuiripuecha.
13. ¿Ambechi jorhenguarhisïni ejemplueri enga Jesúsi uandapka ka enga Markusʌ 4:26-29 jimbo jaka?
13 Tiempu uétarhisïndi para nema ueenani mintsikani Tata Diosï Jeobani. Jesúsi xarhataspti eska i ambe ísïiska enga ejempluni uandapka imeeri enga semiia jatsikupka ka tátsekua kʼuíni (arhinta je Markusʌ 4:26-29). Ima enga semiia jatsikupka, sánhani arhispti exeni na enga sési uérani japka imeeri ánchikuarhita ka no ma ambe úspti úni paraka semiia sánderu sóntku kʼépiringa. Sáno májkueni, jamberi tiempu uétarhiati paraka jorhenguarhiri ma ueenaaka úni ambe enga jorhenguarhini jaka, jimboka i ambe sánhani arhisïnga úkuarhini. Ísï eska ima kʼuiripu enga semiia jatsikujka na no újka úni eska sóntku andaraaka ambe enga jatsikuka, juchajtuchi no ma ambe uaaka úni paraka jorhenguarhiri ma sóntku mintsikaaka Tata Diosïni ísï eskachi jucha na uéjka. Joperu ju je no kuatantani enga jorhenguarhiri ma no jirejiresï úni jauaka imani ambe enga jorhenguarhini jaka. Para semiia jatsikuni ka para nemani jarhuatani Jesúsiri chúxapati úkuarhini, uétarhisïndi tekaantskua jatsini (Sant. 5:7, 8).
14. ¿Náki ejemplu xarhatasïni eska ménisï ióni nitamasïnga paraka kʼuiripu ma uékaaka kurhaani?
14 Máru iretecha jimbo kánikua tiempu nitamasïndi paraka nema uékaaka kurhaani Tata Diosïri ambe. Ju je exeni ambe engaksï nitamanchapka Gladys ka Ruby Allen, tsimani jingonikua jémbeecha engaksï Canadá anapueka. Uéxurhini 1959 jimbo, axanhasptiksï ireta ma jimbo enga Quebec jaka paraksï jima marhuani komu prekursora regularicha. * Kʼuiripuechaksï kánikua chérhiasïreendi saserdoti katolikuechani ka ístu ambe engaksï kʼuiripuecha uandapiringa, jimbosï no nema kurhajchauendi. Gladys uandasïndi: “Tsimani uéxurhini, ochu orachi aianhpispka pauani pauani ka no nema uékaspti kurhaani. Kʼuiripuechaksï bentanarhisï exesïreendi nésï kústani jarheni ka tátsekuaksï míkantasïreendi bentanani. Joperuchi no kuatantaspka”. Tátsekua kʼuiripuechaksï sánhani arhispti mójtakurhini ka ueenasptiksï kurhaani. Iásïksï jima tanimu kúnguarhikuecha jarhastia (Is. 60:22).
15. ¿Ambejtsïni jorhendasïni 1 Korintu 3:6, 7 aianhpikueri ambe?
15 Para Jesúsiri chúxapati uaani uétarhisïndi eskachi iáminduecha jarhuajperaaka. Uandanhasïndi eska kúnguarhikua ma uétarhisïnga para jarhuatani nemani niárani itsï atakuarhini (arhinta je 1 Korintu 3:6, 7). Pori ejemplu, jamberi aianhpiri ma úpirindi tratadu o rebista ma jurajkukuni nemani enga uékaka kurhaani, joperu erachi exesïndi eska no uaaka nirani pʼorhembintani. Ísï jimbo, arhisïndi máteru aianhpirini eska niuaka. I aianhpiri ueenasïndi jorhenguarhini Biblieri ambe imani kʼuiripu jingoni ka erachichani pʼímarhiasïndi parakaksï niuaka pámbetani ka íksï erachicha uinhaperantasïndi jorhenguarhirini. Erachicha enga i jorhenguarhiri míteajka, jarhuatasïndiksï paraka sánderu sési míteaka Tata Diosï Jeobani. Ísï, iáminduecha engaksï jarhuajpeka uaatiksï tsípini enga jorhenguarhiri niáraaka itsï atakuarhini ísï eska na uandapka Jesúsi (Juanu 4:35-38).
16. Nájkirukajtsï chá nóteru xáni uinhapekia ojtsï pʼamenchani jarhani, ¿andijtsïsï uaa tsípini jarhani imani ambe jimbo engajtsï újka úni aianhpikuarhu?
16 ¿Ka engajtsï nóteru xáni újkia aianhpini ka jorhentpini ísï eska antesi jimbokajtsï nóteru xáni uinhapeskia ojtsï pʼamenchani jarhani? Útasï ísï, uaakajtsï sési pʼikuarherani imani ambe jimbo engajtsï újka úni aianhpikuarhu. Ju je exeni ambe enga úpka rei Dabidi ka imeeri soldaduecha engaksï andaapka amalekitechani engaksï sïpatspeni jámeenga ka engaksï euantaapka imeecheri familiechani ka iámindu ambe engaksï sïpakuapka. Dosientu soldaduechaksï kánikua kuatarasptia ka nóksï niraspti uarhipeni, pakarasptiksï kuáni imeecheri ambe. Engaksï na andaapkia, Dabidi uandaspti eskaksï iáminduecha májkueni pʼipiringa imani ambe engaksï amalekitechani euapka (1 Sam. 30:21-25). Iásïjtu, sáno májkueni úkuarhisïndi engachi Jesúsiri chúxapatichani uaajka. Iáminduecha engachi jánguarhintajka xáni eskachi xáni uaaka Tata Diosï Jeobani marhuakuni, asta chá jamberi, uaakachi sési pʼikuarherani, méntkisï enga nema niáraka Tata Diosï Jeobani marhuakuni ka enga inchajka xanharurhu enga tsípikuarhu pájpijka para méntkisï.
17. ¿Andichisï uaa diosmaiamukua arhini Tata Diosï Jeobani?
17 Diosmaiamukuachi arhisïnga Tata Diosï Jeobani jimboka kánikua jukaparharasïnga na engachi xáni újka ánchikuarhikuni. Ima míteski eskachi jucha no uaaka úni eskaksï kʼuiripuecha kurhauaka, joperu exesïndi na engachi xáni jánguarhintajka ánchikuarhini ka eskachi uékperakua jimbo úsïnga ka imajtsïni kóndentasïndi. Ístujtsïni jorhendasïndi parachi sési pʼikuarherani imani ambe jingoni engachi újka úni aianhpikuarhu (Juanu 14:12). Ju je seguru jarhani eskajtsïni Tata Diosï jaiapanhentaaka engachi jucha no kuatantaska.
PIREKUA 67 “Eianhpiaka Diosïri uandakuani”
^ párr. 5 Iáminduechachi tsípisïnga engaksï kʼuiripuecha uéjka jorhenguarhini ambakiti aianhperakueri ambe. Joperuchi kómu pʼikuarherasïnga engaksï no ísï újka. ¿Ka engachi jorhendani jaka nemani ka ima no úni jarhani ambe enga jorhenguarhini jaka? O ¿engachi no méni úni jaka jarhuatani nemani paraka itsï atakuarhiaka? ¿Sési japirini eratseni eska no marhuaxaka juchaari ánchikuarhita? Ini jorhenguarhikua jimbo, exeakachi andichisï uaa sési pʼikuarherani aianhpikuarhu ka eskajtsïni sési nichexaka no arhiparini engaksï kʼuiripuecha uékaaka kurhaani o nómbe.
^ párr. 14 Exentakajtsï Gladys Alleniri eksperiensia enga arhinhajka “No cambiaría nada”, rebistarhu La Atalaya 1 de septiembri 2002 jimbo.
