1. ¿Ambechi úpirini jirejiresï eratseni engachi eratsejka nemani enga pʼamojpitiika?

ENGACHI eratsentajka nemani enga pʼamojpitijka jamberichi eratsejka nemani enga sési kámpijka, enga sési útspijka ka enga intsïmpirijka. Jamberichi jirejiresï eratsejka imani samaria anapuni enga Jesúsi uandapka Bibliarhu. I achamasï enga no judiuepka pʼamojkuspti judiuni ma engaksï no sési úkupka kuarhukpiticha máru. I Samaria anapu “uéki jimbo pʼamojkuspti” judiuni ka uékperakua jimbo úspti eskaksï sési kuidaripiringa (Luk. 10:29-37). I uandantskua, xarhatasïndi ambakiti ambe juchaari Tata Diosïri, engajtsïni mámaru ambe jimbo xarhatachejka ka pauani pauani: pʼamojperakua.

2. ¿Nénajtsïni xarhatachesïni Tata Diosï Jeoba pʼamojperakua?

² Pʼamojperakua, ístu jindeesti no kastigarini nemani enga uétarhijka ísï úni. Tata Diosï Jeoba kánikuajtsïni pʼamojperata xarhatachesti juchantsïni, jimboka eska na uandapka salmueri karari ma, “nójtsïni no sési kámasïndi eskachi na uétarhinchajka juchaari pekaduechani jimbo” (Sal. 103:10). Joperu ménisï Tata Diosï Jeoba jatsisïndi para uinhamu jurhimberantani nemani enga pekadu ma újka.

3. ¿Náki kurhamarhikuenchanchi mókuantaua ini jorhenguarhikua jimbo?

³ Ini jorhenguarhikua jimbo, exeakachi ambe enga Biblia mókuantajka ini tanimu kurhamarhikuechani: ¿andisï pʼamojperakua xarhatatspejki Tata Diosï Jeoba?, ¿andisï sáno májkuenii uinhamu jurhimberantani nemani ka pʼamojperakua xarhatakuni? ka ¿ambejtsïni jarhuataa parachi pʼamojpini?

4. ¿Andisï pʼamojperakua xarhatatspejki Tata Diosï Jeoba?

⁴ Uékperakua jimbo. Apostoli Pablu karaspti eska Tata Diosï “kánikua pʼamojpisïnga”. Ixú apostoli Pablu uandaxapti eska Tata Diosï erokuarhikua ma íntsaasïnga imeechani engaksï erakukateka paraksï auandarhu irekani nájkirukaksï pekadoriuaka (Efes. 2:4-7). Peru  Tata Diosï no kristianu erakukatechankusï pʼamojperakua xarhatakuajti. Dabidi uandaspti salmurhu ma: “Tata Diosï Jeoba ambakitisti iáminduechani jingoni ka xarharasïndi na enga xáni pʼamojpijka iámindu imani ambe jimbo enga újka” (Sal. 145:9). Tata Diosï Jeoba xénchaasïndi kʼuiripuechani, ka ima pʼamojperakua xarhatakuasïndi, méntkisï enga uaaka ísï úni.

5. ¿Néna jorhenguarhispi Jesúsi eska Tata Diosï Jeoba pʼamojpitiska?

⁵ Jesúsi kánikua sési mítesti eska Tata Diosï Jeoba tsitisïnga pʼamojperakua xarhatatspeni. Uánikua uéxurhini imeeri Taati jingoni irekaspti auandarhu ante de jurhani echerirhu (Prov. 8:30, 31). Mémindu exespti na enga imeeri Taati pʼamojperakua xarhatakuauenga kʼuiripuechani engaksï pekadorika (Sal. 78:37-42). Enga Jesúsi jorhendaani japka máteruechani, mémindu uandaspti na enga xáni pʼamojpijka imeeri Taati jémba.

6. ¿Náki ejempluni úraspi Jesúsi parajtsïni jarhuatani exeni eska imeeri Taati kánikua pʼamojpitiska?

⁶ Eskachi na exekia máteru jorhenguarhikua jimbo, Jesúsi ambakiti uandantskua ma uandantaspti, tumbiiri ma enga tsïnchekata japka parajtsïni jorhendani eska Tata Diosï Jeoba kánikua tsitisïnga pʼamojperakua xarhatatspeni. I tumbi, uéntaspti imeo ka “kʼamajkuntaspti iámindu imeeri jatsikuarhekuani jimboka xáni tsïnchekata irekaspka” (Luk. 15:13). Sánderu orhepatini, i tumbi móantaspti, jurajkuspti imani no sési irekua enga páni japka, mójtakurhispti ka kʼuanhatsentaspti imeo. ¿Ambe úspi taati jémba? I tumbi no ióni erokuarhispti para míteni ambe úpirini taati jémba. Jesúsi uandasïndi: “Enga útasï iauani japka para niántani, eraaspti taati jémba ka uéki jimbo lástima úspti ka seguirispti uiriipani kúmantani ka kamajchakuspti ka putimukuni”. Taati jémba no no sési arhispti, pʼamojperakua xarhatakuspti, puákuntaspti ka jióntaspti ménderu imeeri kʼumanchikuarhu. I tumbi k’éri pekaduechani uaaspti, peru imeeri taati jémba puákuntaspti jimboka móantaspkia. I taati jémba xáni pʼamojpiti enga Jesúsi uandapka, Tata Diosï Jeobani arhikuekasïndi. Ini xáni ambakiti ejemplu jingoni, Jesúsi jorhentpispti eska imeeri Taati jémba uékasïnga puákuantani pekadorichani engaksï mintsita jingoni móantajka (Luk. 15:17-24).

7. Na enga Tata Diosï Jeoba pʼamojperakua xarhatakuajka kʼuiripuechani, ¿néna xarhatasïni eska kánikua jánhaskatiiska?

⁷ Jimboka kánikua jánhaskatiiska. Tata Diosï Jeoba méntkisï úsïndi ambe enga sésiuaka para imeeri kueraakata. Biblia uandasïndi eska ‘eratsekua enga karhakua uératini jurhajka, pʼamojpisïnga ka ambakiti ambe útspini’ (Sant. 3:17). Májkueni eska taati uékpiti ma, Tata Diosï Jeoba mítesti na enga xáni marhuakuajka pʼamojperakua xarhatakuani imeeri uájpeechani (Sal. 103:13; Is. 49:15). Erokuarhikua ma íntsaasïndi nájkirukaksï imperfektueka, imeeri kánikua jánhaskakua  jimbo pʼamojperakua xarhatakuasïndi méntkisï enga uaaka ísï úni. Joperu ístu mítesti káni no xarhatani pʼamojperakua. Tata Diosï Jeoba kánikua jánhaskatiisti jimbosï no méni pʼamojperakua xarhatapirindi enga indeni ambe jimbo jaiapanhentani japiringa no sési járhati úkuechani.

8. ¿Ambe uétarhisïni úni ménisï, ka andi?

⁸ Ju je eratseni eska nema enga marhuakuni jaka Tata Diosïni ueenasïnga pekaduechani uáni. Jimajkani ¿ambe jatsiski para úkuarhini? Tata Diosï arhispti apostoli Pabluni eska karakupiringa kúnguarhikuani eskaksï “no kúnguarhipiringa” imani jingoni (1 Kor. 5:11). Ima kʼuiripuecha engaksï pekadu újka ka no móantani jatsistiksï para petanhantani kúnguarhikuarhu uératini. Jatsisti para i ambe úkuarhini para kuájchakuani erachichani engaksï sési marhuakuni jaka Tata Diosïni ka para xarhatani eska Tata Diosï Jeoba pímbinhasïska. Joperuksï máru eratsesïndi eska petantani nemani kúnguarhikuarhu uératini no jindeeska Tata Diosïri uékperakua xarhatakuni. Ju je exeni sini ísïiski i ambe.

9, 10. a) Eska na uandajka Ebreu 12:5, 6, ¿andichisï ísï uandajki eska enga nema petanhantajka kúnguarhikuarhu jindeesïnga pʼamojperata xarhatakuni? b) ¿Náki ejemplujtsïni jarhuatasïni kurhanguni?

⁹ Engachi kurhaajka tánguarhikuarhu, eska nema engachi xénchajka nóteru Jeobaeri testigueskia, kánikuachi kómu pʼikuarherasïnga. Úpiringachi jamberi kurhamarhikuarhini meru uétarhisïreeni eskaksï petantapiringa. ¿Meru jindeeski pʼamojperakua xarhatakuni enga nema petanhantajka kúnguarhikuarhu? Jo. Enga nemani uétarhijka jurhimberantani, ísï úni, jindeesti xarhatakuni eskachi pʼamojkusïnga ka eskachi xénchasïnga (Prov. 13:24). Enga nema pekadu ma újka ka no móantani ka enga petanhantajka kúnguarhikuarhu, ¿jarhuatasïni i ambe? Jo. Uánikua engaksï k’éri pekadu ma úpka ka petanhantanksï, kuenta íntskukuarhesptiksï eska i ambe engaksï orhejtsïkuticha úka jarhuataska imeechani parakaksï sési eratsentapiringa, móantani ka paraksï kʼuanhatsentani Tata Diosï Jeoba jingoni (arhinta je Ebreu 12:5, 6).

¹⁰ Ju je eratsentani ini ejempluni. Eratsenta je eska karichi eranguti ma kuenta íntskukuarhesïnga eska karichi ma pʼamenchaxaka. Ima mítesti eska para úni karichi sési pʼikuarherantani jatsiska para támu peerani. Joperuksï karichicha tsitisïndi márku jámani ka kánikuaksï uerasïndi engaksï jandiajku jarhajka. Jimajkani enga karichi eranguti támu peerajka karichini para i úni sési pʼikuarherantani, ¿arhikuekasïni eska no pʼamojkuxaka? Nómbe. Ima mítesti eska enga jurajkuska eska i karichi máteruecha jingoni jauaka, i karichi uaati kéritaani pʼamenchakua. Ísï jimbo, enga támu peerajka karichini, kuájchakuni jarhasïndi máteru karichichani (terukutanta je Levítico 13:3, 4).

11. a) ¿Andichisï úpirini terukutantani nemani enga petanhantajka kúnguarhikuarhu, karichi ma jingoni enga pʼamenchani jarhajka? b) ¿Náki jarhuajperatechani jatsiaski ima enga petanhantajka kúnguarhikuarhu?

¹¹ Nema enga petanhantajka kúnguarhikuarhu uératini, sáno májkuenisïndi eska karichi ma enga pʼamenchani jarhajka, jimboka imeeri pájperakua Tata Diosï Jeoba jingoni no sési jarhaska (Sant. 5:14). Májkueni eska pʼamenchati na úpiringa máteruechani kéritani pʼamenchakua ma, nema enga no ambakiti pájperakua jatsika Tata Diosï Jeoba jingoni ístu úpirindi úni eskaksï máteruechajtu no sési ambe uaaka. Jimbosï ménisï uétarhijti eska ma nóteru kúnguarhiaka imani jingoni. Enga nema petanhantajka kúnguarhikuarhu, ístu jindeesti para xarhatani na enga Tata Diosï Jeoba xáni xénchaajka imeechani engaksï sési marhuakuni jaka. Ístu úsïndi eska kʼuiripu móantaaka ka eska kʼuanhatsentaaka Tata Diosï Jeoba jingoni. Enga nema petanhantajka kúnguarhikuarhu útasï úsïndi nirani tánguarhikuecharhu, nani enga uaaka jorhenguarhini Tata Diosï Jeobaeri ambe ka ménderu niárani jatsini ambakiti pájperakua ma imani jingoni. Ístu, uaati jatsiani publikasionichani para ima úraani ka  exeni JW Broadcasting^®. Ka engaksï orhejtsïkuticha exejka eska mójtakurhixakaia, ménichanisïksï úsïndi konsejuechani íntskuani paraka ima uaaka sési pájperantani Tata Diosï jingoni ka ísï ménderu úni jindeeni Jeobaeri testigu ma. *

12. ¿Ambeksï úsïni orhejtsïkuticha paraksï úni xarhatatspeni uékperakua ka pʼamojperakua jiáni enga pekadori ma no móantajka?

¹² Kánikua jukaparhakuesti miántani eska imasï petanhantajka enga no sési ambe újka ka no móantani. Orhejtsïkutichaksï mítesti eska i ambe kánikua jukaparhakua ambeeska ka jimboksïsï jánguarhintajti sési ambe úni. Ka ístuksï mítesïndi eska Tata Diosï Jeoba jurhimberantasïnga nemani “asta nani enga jamberi uétarhiaka” (Jer. 30:11). Xénchaasïndiksï imeecheri erachichani ka nóksï méni úpirindi ambe ma enga úpiringa úni eska imeecheri erachicheri pájperakua Tata Diosï Jeoba jingoni no sési úkuarhinchaaka. Joperu ménisï para úni xarhatatspeni uékperakua ka pʼamojperakua, jatsisti para petanhantani kúnguarhikuarhu ima pekadorini enga no móantajka.

13. ¿Andisï jatsipi para petanhantani kúnguarhikuarhu Korintu anapu kristianu ma?

¹³ Ju je exeni ambe enga úpka apostoli Pablu primeru siglurhu enga mítepka eska jarhaspka achamasï ma enga no sési ambe niátani japka ka no móantani. I kristianu Korintu anapu ísku jándikua ambe úxapti jimboka irekaxapka taati jémbeeri témba jingoni. ¡Xáni no sési jásï ambe! Tata Diosï Jeoba arhispti ióntki anapu Israelini: “Enga achamasï ma apondeska taati jémbeeri uarhiti jingoni kʼuratsekua juákusti imeeri taati jémbani. Tsimarhanksï jatsisti para uarhini” (Lev. 20:11). Ísïisti, Pablu no úpirindi arhini Korintu anapu kúnguarhikuani eskaksï uándikupiringa imani achamasïni; joperu k’oru arhispti eskaksï petantapiringa kúnguarhikuarhu. Ísku jándikua ambe enga i kʼuiripu úni japka no sési úkuxapti kúnguarhikuani. Máruksï jamberi niárasïreendi eratseni eska no xáni no sési jarhaspka i ambe enga i kʼuiripu úni japka (1 Kor. 5:1, 2, 13).

14. ¿Pablu néna xarhatakuspi pʼamojperakua imani kʼuiripu Korintu anapuni enga petanhantapka kúnguarhikuarhu, ka andi? (2 Korintu 2:5-8, 11).

¹⁴ Sánisï tátsekua Pablu mítespti eska ima kʼuiripu mójtakurhispkia ka eska meru móantaspkia. Nájkiruka ima acheeti no sési pakatapka kúnguarhikuani, Pablu arhiaspti orhejtsïkutichani eska ima no uékasïreenga jukari uinhamu jurhimberantani. Jimbosï i ambe arhiapti: “Jatsiskajtsïa [para] mejori puákuntani ka mintsita jatsikuntani”. Ka arhiaspti andiksïsï jatsipi para ísï úni: “Paraka no jukari uandanhiauaka”. Pablu pʼamojkuspti ini acheetini enga meru móantapkia. Pablu no uékasïreendi eska i xáni no sési pʼikuarherapiringa  imani ambe jimbo enga úpka enga nóteru jánguarhintapiringia Tata Diosï Jeobaeri jarhuajperatani jirinhani (arhinta je 2 Korintu 2:5-8, 11).

15. ¿Nénaksï xarhatasïni orhejtsïkuticha eskaksï uinhamu jurhimberpintasïnga, joperu ístu pʼamojperakua jingoni?

¹⁵ Ísï eska Tata Diosï Jeoba na újka, orhejtsïkutichajtuksï tsitisïndi pʼamojperakua xarhatatspeni. Jiáni enga uétarhiaka, uinhamuksï jurhimberantasïndi nemani, peruksï pʼamojperakua xarhatasïndi jiáni enga jauaka ambe ma engaksï jimbo uaaka ísï úni. Engaksï no jurhimberantapiringa no sési úrini, nóksï pʼamojperata xarhatani japirindi, sánderu sési, jurajkuni japirindiksï pekadorini eska uaaka ambe enga ima uékaaka. Joperu, ¿orhejtsïkutichajkuksïsï jatsi para pʼamojperata xarhatatspeni?

16. Eska na uandajka Proverbios 21:13, ¿ambe úsïni Tata Diosï Jeoba imeecha jingoni engaksï no pʼamojperakua xarhatatspejka?

¹⁶ Iámindu kristianuechachi uékasïnga ísï pʼamojpini eska Tata Diosï Jeoba. ¿Andi? Ma ambe jimbo jindeesti jimboka ima no kurhaasïnga imeechani engaksï no pʼamojpijka (arhinta je Proverbios 21:13). Jucha no uékasïnga eska Tata Diosï Jeoba no kurhauaka juchaari kómarhikuechani, jimbochisï kánikua jingontku jámajka parachi no no sési kaani máteruechani. Uékasïngachi kurhaani imeechani engaksï “uinhachaparini kurhajkuarhijka eskaksï uétarhinchasïnga ambe ma”, méntkisïchi listu jarhasïnga parachi kurhajchani erachichani engaksï kómu nitamakuarhini jarhajka. Ístu, kánikuachi jukaparharasïnga ambe enga Biblia uandajka: “Ima enga no pʼamojpijka, ístu no pʼamojkunhaparini jusgarinhaa[ti]” (Sant. 2:13). Engachi kaxumbitijka ka engachi no méni mirikurhijka na engachi xáni uétarhinchajka eskajtsïni pʼamojperakua xarhatacheaka, ístuchi listu jarhasïnga para pʼamojperakua xarhatakuani máteruechani. Joperu sánderuchi uékasïnga pʼamojperakua xarhatatspeni jiáni enga pekadori ma enga móantajkia kʼuanhatsentajka kúnguarhikuarhu.

17. ¿Néna xarhataspi rei Dabidi eska mintsita jingoni pʼamojpesïrenga?

¹⁷ Bibliarhu uánikua ejempluechaksï jarhasti engajtsïni jorhendajka parachi pʼamojperakua xarhatakuani máteruechani ka no no sési kaani. Ju je eratseni rei Dabidini, ima mémindu mintsita jingoni xarhatakuaspti pʼamojperakua máteruechani. Nájkiruka Saúli uékeenga uándikuni, Dabidi pʼamojperakua xarhatakuspti ini reini enga Tata Diosï erakupka ka no méni jámaspti no sési úkuntani (1 Sam. 24:9-12, 18, 19).

18, 19. ¿Dabidi káni no xarhatatspespi pʼamojperakua?

¹⁸ Joperu Dabidi no méntkisï pʼamojperata jingoni kámpispti. Ma xanhari enga Nabali —enga jindeepka achamasï ma enga no sáni jánhaskakua jingoni jámeenga— no sési arhipka Dabidini enga no uékapka t’irekua íntskuni imani ka imani acheetichani engaksï imani jingoni jámani japka, Dabidi kánikua ikiaspti ka uandaspti eska uándikupiringa Nabalini ka iámindu imeechani engaksï imeeri kʼumanchikuarhu irekapka. Nabaliri témba, Abigaíli, pʼamojperata ka tekaantskua jingoni niraspti exeni Dabidini ka jimbosï Dabidi no nemani uándikupti (1 Sam. 25:9-22, 32-35).

¹⁹ Máteru xanhari, profeta Natani uandontskuarhekuspti Dabidini achamasïri ma enga jatsikuarheripka ka enga sïpakupka karichi sapichuni ma, achamasïni ma enga no jatsikuarheripka ka ima karichini enga kánikua xéncheenga. Dabidi kánikua ikiaspti ka uandaspti: “¡Ísï eska Jeoba na tsípiti  jaka ima achamasï enga i ambe úka jatsisti para uarhini!” (2 Sam. 12:1-6). Ima mítespti eska Moisésiri Lei uandasïreenga eska enga nema sïpakupiringa máteru nemani karichini ma, jatsispka para kuatru íntskuntani (Éx. 22:1). Peru uandani eska ima achamasï jatsispka para uarhini, jukari no sési jarhaspti. Natani úraspti ini ejempluni para jarhuatani Dabidini paraka kurhangupiringa eska ima mismu sánderu k’éri pekaduechani uaaspka. Ka Tata Diosï Jeoba sánderu pʼamojperakua xarhatakuspti Dabidini, eska Dabidi, imani achamasïni enga Natani uandapka (2 Sam. 12:7-13).

20. ¿Ambejtsïni jorhendasïni Dabidiri ejemplu?

²⁰ Enga Dabidi kánikua ikiapka, uandaspti eska Nabali ka ima kʼuiripuecha engaksï imeeri kʼumanchikuarhu anapuepka jatsipiringaksï para uarhini. Ka tátsekua no sáni chéparini uandaspti eska ima kʼuiripu enga Natani uandapka jatsispka para uarhini. Ini últimu ejemplu jimbo, úpiringachi jamberi kurhamarhikuarhini andisï kʼuiripu ma enga xáni pʼamojpitipka xáni no sési uandani japi. Joperu, ju je eratsentani ambe enga nitamakuarhini japka Dabidi. Dabidi no sési niátaspti ka no jatsispti pímbinhasï konsiensia ma. Ísï jimbo enga nema jukari no sési jusgariauaka máteruechani, xarhatani jarhasïndi eska no jatsiska ambakiti pájperakua ma Tata Diosï Jeoba jingoni. Jesúsi i ambe uandaspti: “Asï jáma je jusgarpini paraka chájtu no jusgarinhantaaka, jimboka eskajtsï na jusgarpiaka, chájtujtsï ísï jusgarinhantaaka” (Mat. 7:1, 2). Ísï jimbo, ju je no jukari uinhamu jusgarpini ka jánguarhintani ísï pʼamojpitiini eska juchaari Tata Diosï.

21, 22. ¿Nénachi uaa pʼamojperata xarhatatspeni?

²¹ Pʼamojperakua sánderu ambeesti eska nomasi pʼikuarherani ambe ma. Arhikuekasïndi eskachi jatsiska para úni ambe ma máteruecha jimbo. Ísï jimbo, iáminduchi uaaka eratsentani nemani engachi uaaka jarhuatani juchaari familiarhu, kúnguarhikuarhu o jima engachi aianhpijka. Uánikua ambe jauati engachi jimbo uaaka xarhatani eskachi pʼamojkuasïnga. ¿Míteskichi nemani enga uétarhinchani jaka eskachi uinhaperantaaka? ¿Úpirinchi tʼirekua sáni pákuni nemani o jarhuatani máteru ambe ma jimbo? ¿Úpirinchi uinhaperantani o sési pʼikuastantani erachini ma enga apenasi kʼuanhatsentaka kúnguarhikuarhu? ¿Úpirinchi aianguani Biblieri ambe máteruechani? I jindeesti ambe ma engachi jimbo uaaka sánderu xarhatani eskachi pʼamojkuasïnga kʼuiripuechani (Job 29:12, 13; Rom. 10:14, 15; Sant. 1:27).

²² Engachi jingontku jarhaska, exeakachi eskachi uaaka uánikuechani pʼamojperata xarhatakuani, engachi ísï úska, kánikuachi sési pʼikuastaaka juchaari Tata Diosï auandarhu anapuni, Tata Diosïni enga kánikua pʼamojpijka.