1922: sieni uéxurhini nitamastia
“TATA Diosïjtsïni jarhuatasïndi parachi andapiti uérani tata Jesukristuni jimbo” (1 Cor. 15:57, Versión Moderna [VM], 1910). I uandakuechaksï jindeesti karakata para uéxurhini 1922 ka miátantasïreendi Biblieri Jorhenguarhiriichani eskaksï újchakuranhapiringa jimbokaksï no jurajkuspka Tata Diosïni. Tata Diosï Jeoba újchakuraaspti imani ambakiti aianhpiriichani imani uéxurhini jimbo, jimbokaksï ueenaspka imprimiriuani ka uaani libruechani imeecheeri kuenta jimbo ka úrani radiuni para uandantani jurhimbikua ambe Reinueri. Sánderu orhepatini ima mismu uéxurhini jimbo xarharaspti eska Tata Diosï Jeoba meru újchakuraxapka imeeri iretani. Biblieri Jorhenguarhirichaksï úspti tánguarhini kʼéri tánguarhikua ma jimbo jini Cedar Point (Ohio, Estados Unidos). Ima kʼéri tánguarhikua xarhataspti ambe enga úni japiringa Tata Diosï Jeobaeri kúnguarhikua asta ini jurhiatikuechani jamberi.
“AMBE ENGA ERACHI UANDAPKA ÍSKUJTSÏNI PAKATASPTI”
Eskaksï na sánderu uánipani japkia aianhpiriicha ueenasptiksï kueratani publikasionicha. Brooklyn anapu Beteli jimbo (Nueva York, Estados Unidos) únhasïreendiksï rebistecha, peru erachiichaksï jatsisïreendi para útasï imprimiritarkurhiani imeecheeri libruechani máteru empreseecha jingoni. Uánikua mesiichani jimbo nóteruksï jarhasptia libruecha ka indeni ambe jimbo nóteru xáni aianhpinhasïreendia. Ísï jimbo, erachi Rutherford kurhamarhispti erachi Robert Martinini, enga fabrikaeri enkargaduepka sini eratsesïreeni eskaksï imeecha úpiringa libruechani úkuarhiani.
Fabrika enga xanharu Concord jimbo jaka jini Brooklyn (Nueva york)
Erachi Martin uandantaspti: “Ambe enga erachi uandapka ískujtsïni pakataspti jimbokachi jatsipiringa para fabrika ma jatsini iámu ambe jingoni enga úpiringa uaani libruechani”. Erachiichaksï rentarispti kʼumanchikua ma edifisiurhu ma jimbo enga xanharu Concord jimbo japka númeru 18 jini Brooklyn ka piásptiksï iámu ambe enga xáni uétarhikuaripiringa.
Nóksï iáminduecha tsípixapti indeni ambe jingoni. Empreseri enkargadu ma engajtsïni jarhuateenga uaani juchaari libruechani jurhaspti exeni fabrikani ka uandaspti: “Kánikua ambarhati makineechantsï jatsiaska para libruechani imprimiriuani ka ixú no nema mítesti néna úraani, seisi mesesi jimbo i makineechaksï nóteru sáni marhuauatia”.
Erachi Martin uandaspti: “Ísï xarharasïreendi enajkiksï imeeri uandakuecha meru ísï úkuarhipirini, joperuchi míteska eskajtsïni Tata Diosï Jeoba jarhuatapiringa jimboka ima méntkisï juchantsïni jingoni jarhaska”. Ka meru ísï úkuarhispti eska erachi Martin na uandapka: no ióni jimbo, ini jimbanhi fabrikarhu únhaxaptia 2,000 libruechani pauani pauani.
Ánchikuarhiriicha engaksï makineecha jingoni jaka engaksï imprimiriijka
RADIU ÚRAKUARHESÏNDI PARA SÁNDERU UÁNIKUA KʼUIRIPU KURHAANI
Tata Diosï Jeobaeri marhuariichaksï no solu imprimirikuarhiaspti libruechani sino ístuksï úraspti máteru ambe para uandantani ambakiti aianhperakuani: radiunksï úraspti. Erachi Rutherford ueenaspti úrani radiuni domingu 26 de febreruni 1922 jimbo. Ka nitamataraspti arhijtsïkperatani, “Uánikuecha engaksï iásï irekani jaka nóksï méni uarhiati” jini Los Ángeles (California, Estados Unidos) radiu KOG jimbo.
Ma 25,000 kʼuiripuechaksï kurhaaspti programani. Máruksï axaaspti kartechani paraksï diosmaiamukua íntspintani. Komu Willard Ashford, enga Santa Ana (California) irekani japka. Ima arhispti erachi Rutherfordini eska kánikua sési jarhaspka enga xáni ambakiti arhijtsïkperatani nitamatarapka. Ima uandaspti: “Enga no radiu jimboepiringa nóchi kurhaapiringa arhijtsïkperatani jimbokaksï juchiiti kʼumanchikuarhu tanimu kʼuiripuecha pʼamenchaxati, ka nóksï úpirindi nirani kurhaani arhijtsïkperatani, nájkirukajtsï máteru xanharu jimbojku japiringa”.
Máteru semanecha jimbo jarhasptiksï máteru programeecha. Ka rebista The Watch Tower uandantaspti eska sáno ma uéxurhini jimbo, ma 300,000 kʼuiripuechaksï ísï kurhaaspka Tata Diosïiri uandakuani radiu jimbo.
Biblieri Jorhenguarhirichaksï kánikua tsípixapti jimbokaksï kánikua sési nikuaxapka radiu jimbo aianhpini, inde ambe úspti eskaksï jatsikuarhepiringa imeecheeri radiu jini Staten Island jima no iauani enga Brooklyn anapu Beteli japka. Ísï tátsekua, máteru uéxurhiniichani jimbo Biblieri Jorhenguarhirichaksï úpirindi úrani radiuni WBBR, para sánderu uápurisï aianhpini Reinueri ambe.
“ADV”
Rebista The Watch Tower del 15 de juniu 1922 anapu, aianhpispti eska k’éri tánguarhikua ma japiringa jini Cedar Point (Ohio) del 5 al 13 de septiembri 1922 jimbo. Engaksï Biblieri Jorhenguarhiricha na niárapani japkia Cedar Point kánikuaksï sési pʼikuarheraxapti.
Primeru arhijtsïkperatarhu, erachi Rutherford uandaspti: “Seguru jarhaska eska Tata Diosï […] újchakuraaka ini k’éri tánguarhikuani ka uaati eska kánikua aianhpinhaaka iámu Parhakpinirhu”. Máteru arhijtsïkpitiicha i k’éri tánguarhikueri méminduksï pʼímarhiaspti erachiichani parakaksï jánguarhintapiringa aianhpini.
Uánikua kʼuiripuecha engaksï k’éri tánguarhikua jimbo jaka 1922 jimbo jini Cedar Point (Ohio)
Biernesï 8 de septiembrini, ma 8,000 kʼuiripuechaksï jarhaspti k’éri tánguarhikuarhu ka uékaxaptiksïa kurhaani arhijtsïkperatani enga erachi Rutherford nitamatarapiringa. Erokaxaptiksï eska aianguapiringa ambe enga arhikuekeenga letreecha “ADV” engaksï pʼímarperakuarhu jukanharhipka. Enga uaxakanhani japkia uánikuechaksï eranchespti k’éri lona ma enga pʼirakukata japka plataformarhu iótakuarhu. Arthur Claustten enga desde Tulsa (Oklahoma, Estados Unidos) uératini nípka, jirinhantani jámaxapti uaxantskuani ma nani enga uératini úpiringa sési kurhaani, jimboka imani jurhiatikuechani ísï nóksï jarhaspti mikrofonuecha nijtu bosineecha.
“Jingontkuchi kurhaaxapka”
Paraka no japiringa ójkutakua ambe, xarhentku anapu orhejtsïkuti uandaspti eska imeecha engaksï ióndapiringa janoni nóteruksï úpiringia inchani. A las nuebe i media tsípa anapu, erachi Rutherford ueenaspti imani uandakuecha jingoni enga Jesúsi uandaapka ka engaksï Mateu 4:17 jimbo jaka: “Auandarhu anapu Reinu axuterku jarhastia” (VM, 1910). Enga uandani japka néna engaksï kʼuiripuecha kurhaapiringa Reinueri ambe, uandaspti: “Jesúsi mismu uandaspti eska imani tiempu jimbo enga ima ixú japiringuia pʼikuntskua ma japiringa ka tánaantapirindi imeeri jurhimbiti marhuariichani engaksï no méni jurajkupka”.
Erachi Claus enga auditoriurhu uaxakatini japka uandantaspti: “Jingontkuchi kurhaaxapka”. Peru ma repentku erachi Claus ueenaspti no sési pʼikuarherani ka jatsispti para uéntani auditoriurhu uératini, nájkiruka no uékeenga jimboka mítespka eska nóteru úpiringuia inchantani, jatsispti para ísï úni.
Sóntku sési pʼikuarherantaspti. Uandantaspti eska enga kʼuanhatsentani japkia auditoriurhu, kurhaaspka eska uinhamu pasajkunhaxapka. Inde ambe kánikua sési pʼikuastaspti. Uandaspti eska enga jatsipiringa para techurhu karharani para úni seguiriini kurhaani arhijtsïkperatani, eska ísï úpiringa. Imani tiempu jimbo, ima 23 jatirispti ka ísï jimbo úspti jini karharani. Enga na ísï úpkia exespti eskaksï bentaneecha mítakuarhetixapka, enga na andaparhakuerani japkia exepti eska arhijtsïkperata sési kurhaakuarhisïreenga jima uératini.
Joperu Arthur no jandiajku jarhaspti. Máru imeeri amiguechajtuskï techurhu jarhaspti. Ma jindeespti Frank Johnson, ima uiriispti andarhierani ka kurhamarhini: “¿Nóri ma kámasïni nabaja enga kánikua atajka?”.
Arthur arhispti: “Jo”.
Jiájkani Frank mókukuspti: “Tʼuri jindeeska mókuntskua juchaari kómarhikuecheri”. ¿Exexakiri indeni lonani enga irhikukata jaka? Letreru máesti ka indeni klabuecha jingoni cháparhakata jarhasti. Jingontku kurhaa enga juesi a uandaaka “uandanta je, uandanta je…”, jirejiresï katsïkua indeni sïndarichani.
Arthur nabaja jupikatini, erokaxapti eskaksï arhipiringa káni enga katsïkuapiringa sïndariichani. Erachi Rutherford kʼamaraxaptia imeeri arhijtsïkperatani ka kánikua tsípikua jingoni uandaspti: “Ambakiti ka jurhimbiti Tata Diosïiri testiguechee je. Seguirii je jánguarhintani astaka Babilonia kʼamajkunhaaka. Iauanisï ka iápurisï uandanta je. Parhakpini jatsisti para míteni eska Jeoba jindeeska Tata Diosï ka eska Jesukristu jindeeska Rei reiicheeri ka Tata tateecheri. I jindeesti sánderu ambakiti jurhiatikua. ¡Exe je, Rei juramuxatiia! Chájtsï jindeeska imeeri aianhpiricha. Ísï jimbo, aianhpi je, aianhpi je Reiini ka imeeri reinueri ambe”.
Arthur uandantaspti eska ima ka máteru erachiichaksï katsïkuaspka sïndariichani ka lona iatsitakuarhu kuerakuarhintaspti. Letreru uandasïreendi: “Aianhpi je Reiini ka imeeri reinueri ambe”. “ADV” primeru letrecheestiksï uandakueri advertise, enga inglesi jimboeka ka enga tradusirikuarhijka “aianhpi je”.
ÁNCHIKUARHITA MA ENGA KÁNIKUA JUKAPARHAKUEKA
Kʼéri tánguarhikua enga Cedar Point úkuarhipka kánikua jarhuataaspti erachiichani parakaksï jánguarhintapiringa imani ambe úni enga sánderu jukaparhakueka: aianhpini Reinueri ambe. Ka imeecha engaksï uékeenga ísï úni, sésiksï pʼikuarheraspti jimbokaksï úpiringuia aianhpini. Oklahoma anapu kolportor ma (engaksï iásï prekursori arhikuarhijka) karaspti: “Niraspkachi aianhpini jimeesïsï engaksï kʼuiripuecha karboni pʼitajka ka indeni lugariicha jimbo kʼuiripuechaksï kánikua pobriisti”. Ka uandantaspti eska sáno méntkisï engaksï kʼuiripuecha kurhaauenga ambe enga uandeenga rebista The Golden Age, uerasïreengaksï. Ima uandaspti: “Kánikuachi sési pʼikuarherasïnga engachi úka sési pʼikuastantaani imani kʼuiripuechani”.
Ima Biblieri Jorhenguarhirichaksï sési kurhanguspti eska kánikua jukaparhakuespka ísï úni eska Jesúsi na uandapka ixú Lukasʌ 10:2 jimbo: “Sési jimbo pʼikuntskua kánikuesti, ka namunituestiksï pʼikuntstiicha”. Imani uéxurhini kʼamarhukuni ísï, sánderuksï eratsetixaptia uandantani Reinueri ambe iámu parhakpinirhu.
a Ménichanksï erachi Rutherfordini “juesi” arhisïreendi jimboka ménichani juesiini ánchikuarhisïreenga Misuri (Estados Unidos).
