1. ¿Iásï anapu kʼuiripuecha nénaksï exesïni jánhaskakuani enga Bibliarhu jaka? (Proverbios 1:20, 21).

 UÁNIKUA lugarichani jimbo exeasïreengachi erachiichani xanharuecharhisï publikasionichani íntspiani jarhani. ¿Chájtujtsï ménisï niáraspi ísï aianhpini? Engajtsï ísï úka, seguru eskajtsï eratsentaka ambe enga uandajka libru Proverbios jánhaskakueri ambe, jimini uandasïndi eska jánhaskakua xanharuecharhisï jámasïnga uinhachaparini, paraksï kʼuiripuecha kurhaani imeeri konsejuechani (arhinta je Proverbios 1:20, 21). Sánderu “ambakiti jánhaskakua”, Tata Diosï Jeobaeristi ka Bibliarhu ka juchaari publikasionicharhu jarhasti. Ka inde jásï jánhaskakuanksïsï uétarhinchajti kʼuiripuecha paraksï úni jatsini tsípikua para méntkisï. Kánikuachi sési pʼikuarherasïnga enga nema jiókuarhijka juchaari publikasionicha. Peruksï no iáminduecha jiókuarhiasïndi. Máruksï no uékasïndi míteni Biblieri ambe. Máteruechajtsïni teresmarhusïndi jimbokaksï eratsesïnga eska Biblia nóteru marhuasïngia. Ka ístuksï máru no sési exesïndi ambe enga Biblia uandajka ka uandasïndiksï eska imeecha engaksï ísï újka eska Biblia na uandajka, eskaksï arhinchpeni jámasïnga ka eskaksï sóntku no sési exesïnga ambe ma. Peru, Tata Diosï Jeoba útasï seguirixati xénchperakua jingoni arhiani eskaksï uaaka jatsini sánderu ambakiti jánhaskakua. ¿Néna úsïni i ambe?

2. ¿Iásï nanichi uaa exentani sánderu ambakiti jánhaskakua, peruksï ambe úsïni sáno iámindu kʼuiripuecha?

² Bibliani jimbo Tata Diosï Jeoba úsïndi eskaksï kʼuiripuecha uaaka jatsini ambakiti jánhaskakuani. Ka ini libruni, sáno iáminduechaksï jatsisti. ¿Ka ambechi uaa uandani juchaari publikasionicheri ambe engaksï Bibliarhu pʼitakata jaka? Tata Diosï Jeoba ústi eskaksï i publikasionicha jukari 1,000 idiomecha jimbo jauaka. Ka imeecha engaksï arhintajka Bibliani ka publikasionichani kánikua sési nikuasïndi. Peru uánikua kʼuiripuechaksï no uékasïndi jatsini Tata Diosï Jeobaeri jánhaskakuani. Engaksï uékani jarhajka úni ambe ma, jandiajkuksï  mintsinharhikuarhisïndi oksï máteru kʼuiripuechani kurhamarhiani ambe úni. Ka jamberijtsïni ikiacheati jimbokachi jucha uékasïnga kurhajchani ambe enga Biblia uandajka. Ini jorhenguarhikua jimbo exenchi jauaka andiksïsï kʼuiripuecha ísï jámajki. Peru orheta ju je exeni nénachi uaa jatsini jánhaskakua enga Tata Diosï Jeoba íntspijka.

3. ¿Ambechi uaa úni parachi sési jimbo jánhaskatiini?

³ Jánhaskakua jatsini arhikuekasïndi sési úrani ambe engachi míteka parachi ambakiti ambe úni. Joperu parachi sánderu ambakiti jánhaskakuani jatsini sánderu ambe uétarhisïndi. Biblia uandasïndi: “Para jánhastiini orheta uétarhisïndi janhanharhini Tata Diosï Jeobani, ka engari míteska imani enga sánderu Pímbinhasïtiika niárakari kurhanguni” (Prov. 9:10). Ísï jimbo, engachi uékani jauaka úni ambe ma enga kánikua jukaparhakueka, jatsiskachi para míteni “imani enga sánderu Pímbinhasïtiika”, i ambe arhikuekasïndi míteni na enga eratsejka Tata Diosï Jeoba. Ka uaakachi ísï úni engachi arhintaska Bibliani ka publikasionichani engaksï jima pʼitakata jaka. Engachi ísï úska xarhatani jauakachi eskachi sési jimbo jánhaskatiiska (Prov. 2:5-7).

4. ¿Andisï Tata Diosï Jeobajkusï újki íntspini ambakiti jánhaskakua?

⁴ Tata Diosï Jeobajkusï íntspijti ambakiti jánhaskakua (Rom. 16:27). ¿Andichisï ísï uandajki? Primeru, jimboka ima jindeeska juchaari Kueraajpiri ka iámindu ambe mítesti imeeri kueraakateri ambe (Sal. 104:24). Segundu, jimboka iámindu ambe enga ima újka, xarhatasïndi eska jánhastiiska (Rom. 11:33). Ka terseru, jimboka imeeri ambakiti konsejuecha méntkisï marhuakuasïnga imeechani engaksï kurhajchaajka (Prov. 2:10-12). Ísï jimbo, engachi uéjka sési jimbo jánhastiini, jatsiskachi para jakajkuni ini tanimu ambe ka jurajkuni eskajtsïni jarhuataaka engachi eratseni jauaka úni ambe ma.

5. ¿Na nikuaxaki kʼuiripuechani jimbokaksï no jiókuarhisïnga eska Tata Diosï Jeobajkusï újka íntspini ambakiti jánhaskakua?

⁵ Uánikua kʼuiripuecha engachi aianguajka Tata Diosïiri ambe uandasïndiksï eska naturalesa kánikua sési jáxeska, peruksï no jakajkusïndi eska Kueraajpiri ma jarhaska, uandasïndiksï eska iámindu ambe ebolusioni jimboeska. Máteruechaksï jakajkusïndi eska jarhaska Tata Diosï, peruksï eratsesïndi eska ambe enga Biblia uandajka nóteru marhuasïngia ka irekasïndiksï na engaksï imeecha uéjka. ¿Ambe úkuarhixaki engaksï ísï eratsejka? ¿Sánderu sési jarhaskia parhakpini jimbokaksï kʼuiripuecha sánderu mintsikasïnga imeecheeri jánhaskakuani ka no Tata Diosïriini? ¿Meruksï úsïni tsípikua jingoni irekani oksï jatsini erokuarhikua ma para sánderu orhepatini? Nómbe. Ambe enga xáni úkuarhini jaka parhakpinirhu xarhatachesïndijtsïni eska ísïiska eska na uandajka i karakata: “No jarhasti mímixekua ni jánhaskakua, ni konseju enga sánderu ambakitiika eska Tata Diosï Jeobaeri” (Prov. 21:30). I karakata úsïndi eskachi seguiriuaka kurhakuni Tata Diosï Jeobani eskajtsïni íntskuaka ambakiti jánhaskakua. Peruksï uánikua kʼuiripuecha no ísï úsïndi. ¿Andi?

6. Eska na arhijka Proverbios 1:22-25, ¿neechaksï no uékasïni kurhaani ambakiti jánhaskakuani?

⁶ Uánikuechaksï no uékasïndi kurhaani ambakiti jánhaskakuani enga “xanharuecharhisï uinhachajka”. Biblia uandasïndi eska tanimu jásï kʼuiripuecha jarhaska engaksï no jiókuarhijka jánhaskakuani: “imeecha engaksï no jánhaskatiika”, “engaksï teresmarpejka” ka “tontuecha” (arhinta je Proverbios 1:22-25). Ju je exeni andiksïsï i kʼuiripuecha no jiókuarhijki Tata Diosïiri jánhaskakuani ka ambechi uaa úni parachi no ísïini eska iicha.

7. ¿Andiksïsï máru uéjki ʻno jánhaskatiiniʼ?

⁷ “Imeecha engaksï no jánhaskatiika” jindeestiksï ima kʼuiripuecha engaksï iámu ambe jakajkujka ka  engaksï fásili enganiariuajka (Prov. 14:15, nota). Engachi aianhpini jámajka méminduchi exeantasïnga i járhati kʼuiripuechani. Uánikua kʼuiripuechaksï jarhasti engaksï imeeri relijioniiri anapu orhejtsïkutiicha ka politikuecha niáraka enganiariuani. Máruksï kánikua no sési pʼikuarherasïndi engaksï kuenta íntskukuarhejka eskaksï enganiariuaska. Peru imeecha enga Proverbios 1:22 uandaajka uékasïndiksï no jánhaskatiini jimbokaksï tsitisïnga ísï jámani (Jer. 5:31). Tsitisïndiksï úni ambe engaksï ima uékajka ka nóksï uékasïndi jorhenguarhini ambe enga Biblia uandajka ni kurhajchaani imeeri juramukuechani. Uánikuechaksï májkueni uandasïndi eska Quebec (Canadá) anapu ma uarhiiti enga relijioni ma jatsika, ima i ambe uandaspti enga erachi ma pʼorhembipka: “Engajtsïni saserdoti enganiariika, imeeri kulpaesti ka no juchaari”. Juchachi no sáni uékasïnga ísïini eska ima kʼuiripuecha engaksï no uéjka jánhaskatiini (Prov. 1:32; 27:12).

8. ¿Ambejtsïni jarhuataa parachi jánhaskakua jatsini?

⁸ Bibliajtsïni pʼímarhisïndi no ísï jámani eska imeecha engaksï no jánhastiika. Sánderu sési, íntskusïndijtsïni ini konsejuni: “Ísï eratsi je eska kʼératiicha” (1 Kor. 14:20). Uaakachi jánhaskakua jatsini engachi jánguarhintaska ísï irekani eskaksï na uandajka Biblieri prinsipiuecha. Engachi ísï újka, sánhani arhisïngachi kuenta íntskukuarheni eskaksï Biblieri prinsipiuecha marhuasïnga parachi ambakiti ambe erakuni úni ka ísïchi no xáni uandanhiateechani jatsiani. Ístu kánikua sési jarhasti eskachi exeaka ambe engachi xáni úkia juchaari tsípikuarhu. Pori ejemplu, engajtsï ióni páni jakaia Bibliani jorhenguarhini ka tánguarhikuecharhu nirani perujtsï útasï nótki aiakukuarheni Tata Diosï Jeobani nijtu itsï atakuarhini, uaakajtsï kurhamarhikuarhini andisïjtsï no ísï úni jaki. O engajtsï itsï atakuarhikia, ¿sánderujtsï sési aianhpisïnia ka jorhentpini Biblieri ambe? ¿Ambe engajtsï erakujka úni xarhatasïni eskajtsï jurajkusïnga eskaksïni Biblieri prinsipiuecha jarhuataaka? ¿Ísïjtsï kaasïni máteruechani eska Jesúsi na kaapiringa? Engachi exeska eskachi uaaka sánderu sési úni ambe ma, ju je ísï úni eskaksï na uandajka Tata Diosï Jeobaeri konsejuecha engaksï mímixeti újka “imani enga no ma ambe míteka” (Sal. 19:7).

9. ¿Nénaksï xarhatasïni “imeecha engaksï teresmarpejka” eskaksï no uékasïnga jánhaskakuani jatsini?

⁹ Máteru jásï kʼuiripuecha engaksï no uéjka Tata Diosïiri jánhaskakuani jatsini jindeestiksï “imeecha engaksï teresmarpejka”. Ménichani engachi aianhpini jámajka i járhati kʼuiripuechanchi exeantasïnga (Sal. 123:4). Biblia uandasptia eska últimu jurhiatikuechani jimbo, i járhati kʼuiripuechaksï japiringa (2 Ped. 3:3, 4). Ísï eska Lotiiri tarhambeecha, iásï máru kʼuiripuechaksï no uékasïndi kurhaani ambe enga Tata Diosï uandajka eska úkuarhiaka (Gén. 19:14). Uánikuechaksï teresmarhuasïndi imeechani engaksï ísï irekajka eska Biblia na uandajka. Inde kʼuiripuecha engaksï teresmarpejka ísïksï úsïndi eskaksï “imeecheeri no sési járhati eratsekuecha na eratsetaraa[j]ka” (Jud. 7, 17, 18). ¿A no eska ambe enga Biblia uandajka imeecheeri engaksï teresmarpejka sési terukuntasïnga na engaksï jámajka apostateecha ka máteruecha engaksï no jiókuarhijka Tata Diosï Jeobani?

10. Eska na arhijka Salmo 1:1, ¿ambechi uaa úni parachi no ísïini eska imeecha engaksï teresmarpejka?

¹⁰ ¿Ambechi uaa úni parachi no ísïini eska imeecha engaksï teresmarpejka? Ma ambe engachi uaaka úni jindeesti, no kúrhiani imeechani engaksï iámindu ambeeri uandauandamijka (arhinta je Salmo 1:1). I ambe arhikuekasïndi eskachi no kurhaasïnga ni arhintani apostateecheri ambe. Engachi no jingontku jámaska, úpiringachi ueenani iámu ambeeri uandauandamini ka eratseni eska ambe engajtsïni arhijka Tata Diosï Jeoba ka imeeri organisasioni no sési jarhaska. Kurhamarhikuarhini arini ambe jarhuatatijtsïni parachi no ísï eratseni: “¿Pʼindeski uandauandamini engajtsïni organisasioni aiangujka na engachi kurhangujkia máru ambe iásï o engajtsïni arhijka néna úni ambe ma? ¿Méntkuni exeni jarhasïni ambe engaksï no sési újka erachiicha engajtsïni  orhejtsïkujka?”. Engachi jánguarhintaska no ísï eratseni, Tata Diosï Jeoba sési pʼikuarheraati juchantsïni jingoni (Prov. 3:34, 35).

11. ¿Nénaksï exeasïni “tontuecha” Tata Diosï Jeobaeri juramukuechani?

¹¹ Terseru grupu kʼuiripuecheri engaksï no jiókuarhijka Tata Diosïiri jánhaskakuani jindeestiksï “tontuecha”. Ísïksï arhiasïndi jimbokaksï no uékasïnga ísï irekani eskaksï na uandajka Tata Diosïiri leiicha. Ka úsïndiksï ambe engaksï imeecha eratsejka eska sési jarhaska (Prov. 12:15). Nóksï jiókuarhisïndi Tata Diosï Jeobani, imani enga jánhaskakua íntspijka (Sal. 53:1). Engachi aianhpini jámajka ka exeantani inde járhati kʼuiripuechani, mémindujtsïni arhinchasïndi jimbokachi kurhajchaasïnga Biblieri juramukuechani, peru inde kʼuiripuecha nójtsïni uaati jarhuatani sési irekani. Biblia uandasïndi: “Tontu no úsïndi jatsini ambakiti jánhaskakua; ima no mítesti ambe uandani siudadiiri puertarhu” (Prov. 24:7). Tontuechaksï no úsïndi ambakiti konseju ma íntspini. Jimbojtsïnisï Tata Diosï Jeoba arhijti: “Iauani jarharitini ja imani enga tontueka” (Prov. 14:7).

12. ¿Ambejtsïni jarhuataa parachi no ísïini eska tontuecha?

¹² Juchachi no ísïiska eska imeecha engaksï no sáni jaiapanheantajka Tata Diosïiri konsejuechani. Sánderu sési, jánguarhintasïngachi tsitini ísï eratseni eska Tata Diosï ka ístu tsitiani imeeri juramukuechani. Engachi eratsentaska na enga nikuajka imeechani engaksï kurhandirajka ka ístu imeechani engaksï no kurhandirajka, sánderuchi uékasïnga ísï úni eskajtsïni Tata Diosï Jeoba na arhijka. Úsïngachi exeni eska imeecha engaksï no jiókuarhiajka Tata Diosï Jeobaeri ambakiti konsejuechani, uánikua uandanhiateechanksï jatsiasïnga. Joperu juchachi sési irekasïnga jimbokachi kurhajchasïnga Tata Diosïni (Sal. 32:8, 10).

13. ¿Tata Diosï Jeoba afuersa úsïni eskachi kurhajchauaka imeeri ambakiti konsejuechani?

¹³ Tata Diosï Jeoba iáminduechani íntsaasïndi imeeri ambakiti konsejuechani, peru no afuersa úsïndi eskaksï kʼuiripuecha kurhajchauaka. Peru kʼóru aianguasïndi na enga nikuauaka engaksï no jiókuarhiaska (Prov. 1:29-32). Imeecha engaksï erakujka no kurhajchani Tata Diosïni “nóksï sési nitamakuarhiati imeecheeri jángua jimbo”. Ka iichaksï sánderu orhepatini uandanhiateechanksï jatsiauati ka no sésiksï nitamakuarhiati ka últimu kʼamajkunhaatiksï. Joperu imeecha engaksï jiókuarhiajka Tata Diosï Jeobaeri ambakiti konsejuechani ka ísïksï úni, i ambeksï aiaminhasïndi: “Ima engareni kurhajchajka no chéparini irekaati, pínandikua jingoni irekaati nájkiruka uaaka no sési nitamakuarhini” (Prov. 1:33).

14, 15. ¿Ambejtsïni jorhendasïni Proverbios 4:23?

¹⁴ Engachi ísï irekajka eskaksï na uandajka Tata Diosïiri ambakiti konsejuecha, méntkisïjtsïni sési nichesïndi. Ka eskachi na exekia, Tata Diosï Jeoba úsïndi eskachi iáminduecha uaaka jatsiani imeeri ambakiti konsejuechani. Pori ejemplu, libru de Proverbios jimbo, ambakiti konsejuechaksï jarhasti engajtsïni méntkisï marhuacheaka ka engachi ísï úska eskaksï na arhijka uaakachi sánderu sési irekani. Ju je exeani tʼámu ambakiti konsejuechani.

¹⁵ Ju je kuájchakuni ambe enga jaka juchaari mintsitarhu. Biblia uandasïndi: “Kuájchaku chiiti  mintsitani, sánderu eska ambe uéjki engari kuájchakujka, jimboka ísï újka eska tsípikua jauaka” (Prov. 4:23). Ju je eratsentani ambe enga xáni uétarhijka parachi no pʼamenchani juchaari mintsitarhu. Jatsiskachi para imani ambe tʼireni engajtsïni sési úchiaka, ejersisiu úni ka no úni ni arhani imani ambe engajtsïni uaaka no sési úchini. Ka sáno májkueni ambechi jatsiska para úni para kuidarini ambe enga jaka juchaari mintsitarhu. Jatsiskachi para pauani pauani arhintani Bibliani. Ístu uétarhisïndi eskachi prepararikuarhiaka para tánguarhikuecha, no kueratani ka íntspiani komentariuechani. Ístuchi jatsiska para kánikua jánguarhintani aianhpini. Ka nóchi úsïnga o exeni ambe engajtsïni uaaka no sési ambe eratsetarani, komu exeni o kurhaani ísku jándikueri ambe ka ístuchi no kúrhiasïnga imeechani engajtsïni uaaka no sési ambe úrani.

16. ¿Andisï xáni marhuajki iásï konseju enga Proverbios 23:4, 5 jimbo jaka?

¹⁶ Ju je sési pʼikuarherani imani ambe jingoni engachi jatsika. Biblia ini konsejuni íntspisïndi: “Asï jánguarhinta jatsikuarhekua ambe jatsini. […] Engari chiiti éskuecha jingoni exejka, inde ambe no ma ambeesïndi, jimboka aleechani jukaasïnga ísï eska águila ma ka auandarhisï kárasïndi” (Prov. 23:4, 5). Kʼuiripuechaksï sóntku tsïtasïndi sentabuni ka jatsikuarhekua ambe. Nájkiruka ísïika, iásï ini jurhiatikuechani jimbo, xáni imeecha engaksï jatsikuarheka ka engaksï no jatsikuarheka, kánikuaksï sentabu uékasïndi jatsini. Ísï jimbo, sáno méntkisïksï niárasïndi imani ambe úni enga tátsekua no sési pakatajka, nóteruksï úsïndia sési pájperani máteruechani jingoni ka astaksï niárasïndi pʼamenchani (Prov. 28:20; 1 Tim. 6:9, 10). Joperujtsïni jánhaskakua jarhuatasïndi parachi no jukari uandanhiani sentabuni jimbo. Ka i ambejtsïni kuájchakusïndi parachi no jukari tsitini jatsikuarhekua ambe ka ístujtsïni jarhuatasïndi parachi sési pʼikuarherani imani ambe jingoni engachi jatsikuarheka ka parachi tsípikua jingoni irekani (Ecl. 7:12).

17. Eska na arhijka Proverbios 12:18, ¿ambechi uaa úni parachi jánhaskakua jingoni uandani?

¹⁷ Ju je orheta eratsentani ambe engachi uandaaka. Engachi no eratsentaska ambe engachi uandaaka, uaakachi kánikua no sési pʼikuastaani máteruechani. Biblia uandasïndi: “Enga nema no eratseparini uandajka ísïisïndi komueska espada ma jingoni chʼurhurpini jarhani, peru ima enga jánhaskakua jingoni uandajka sési pʼikuastpentasïndi” (Prov. 12:18). Engachi no jámaska uandatsiani máteruechani ima ambeeri engaksï  no sési újka, uaakachi sési pájperani iáminduechani jingoni (Prov. 20:19). Engachi uéjka sési pʼikuastpentani imani ambe jingoni engachi uandajka ka no no sési pʼikuastpeni, jatsiskachi para pauani pauani arhintani Tata Diosïiri Karakatani ka eratsentani ambe engachi arhintajka (Luk. 6:45). Engachi eratseantajka Biblieri konsejuechani, úsïngachi jánhaskakua jingoni uandani ka ambe engachi uandajka uinhaperantaasïndi máteruechani (Prov. 18:4).

18. ¿Nénajtsïni jarhuatasïni Proverbios 24:6 parachi sánderu sési aianhpini ka jorhentpini?

¹⁸ Ju je úni ambe engajtsïni Tata Diosïiri kúnguarhikua arhijka. Biblia ini ambakiti konsejuni íntspisïndi: “Uaakari sési uarhipeni engakeni jánhasti ma arhistachiaka; ma úsïndi andani engaksï uánikuecha jarhajka engaksï konseju íntspijka” (Prov. 24:6, noteecha). Ju je eratsentani na engajtsïni jarhuatajka i konseju parachi sánderu sési aianhpini ka jorhentpini. Nóchi ísï aianhpisïnga na enga jucha sési exeaka, sánderu sési, jánguarhintasïngachi ísï aianhpini eskajtsïni na arhijka Tata Diosïiri kúnguarhikua. Tánguarhikuechani jimbo ambakiti konsejuechanchi intsïnhaasïnga. Arhijtsïkperatechani jimbo ka demostrasioniichani jimbo engaksï juchaari erachiicha nitamataraajka, jorhenguarhisïngachi sánderu sési úrani Bibliani. Ístujtsïni Tata Diosï Jeobaeri kúnguarhikua íntskuasïndijtsïni publikasionichani ka bideuechani engachi uaaka úrani para jarhuataani kʼuiripuechani kurhanguni Bibliani. ¿Jánguarhintaxakijtsï sési úraani publikasionichani ka bideuechani?

19. ¿Ambejtsï eratsesïni jánhaskakueri engajtsïni Tata Diosï Jeoba íntskujka? (Proverbios 3:13-18).

¹⁹ (Arhinta je Proverbios 3:13-18). ¡Kánikuachi jukaparharaasïnga konsejuechani engaksï Tata Diosïiri Karakatarhu jaka! Engachi no jatsiapiringa indeni konsejuechani nóchi úpiringa tsípikua jingoni irekani. Ini jorhenguarhikua jimbo, exeaskachi máru konsejuechani engaksï libru Proverbios jimbo jaka ka engajtsïni kánikua marhuachejka. Peru ístu, Tata Diosï Jeobajtsïni íntskuasïndi máteru ambakiti konsejuechani engaksï Bibliarhu jaka. Ju je jánguarhintani méntkisï úni ambe engajtsïni Tata Diosï arhistachijka. Nájkiruka parhakpinirhu uánikuecha no jukaparharajka Tata Diosïiri jánhaskakuani, juchachi kʼóru seguru jarhaska “eska imeecha engaksï sési jupikatini jatsika [jánhaskakuani] arhinhaa[ka]ksï eskaksï tsípisïnga”.