SEGUNDA Guerra Mundiali jimbo, Alemania anapu sondadu ma i ambe uinhachakuaspti máru Jeobaeri testiguechani: “Enga ma ísï chá no uékaska nirani ataani Francia ka Inglaterra anapuechani, ¡iáminduechajtsï uarhiaka!”. Nájkiruka jimajku japka Alemania anapu ejersitu engaksï sési armadu japka, no ma juchaari erachi uékaspti úni ambe engaksï arhinhani japka. ¡Kánikuaksï balori jukaspti! I ambakiti ejemplu máesti na engachi exejka Jeobaeri testiguecha uarhiperakuani: nóchi uékasïnga nirani uarhipeni guerrecharhu. Ka nójtuchi inchamukusïnga politikarhisï nájkirukajtsïni arhini jauaka eskajtsïni uándikuaka.

1. IÁMINDU TATA DIOSÏIRI MARHUARIICHAKSÏ MÁJKU NASIONI JIMBO ANAPUESPTI

Ióntki, Tata Diosï Jeoba erakuspti Israeli anapu nasionini paraka jindeepiringa imeeri ireta. Uandaspti eska iámindu ireteecheeri, imeechaksï jindeepiringa enga ima ʻsánderu jukaparharapiringaʼ (Éx. 19:5). Ístu íntsaaspti echeri ma. Ísï jimbo, enga juramukuauenga eskaksï uarhiperapiringa máteru nasionicha jingoni, israeliteechaksï no ataasïreendi ni uándikuani máteru Tata Diosïiri marhuariichani. a

Iásï, Tata Diosï Jeobaeri marhuariichaksï “iámindu nasionicharhu ka iámindu tribuecharhu ka ireteecharhu” anapuestiksï (Jaŋ. 7:9). Engaksï guerrarhu nipiringa, uarhiperani japirindiksï ka asta niárapirindiksï uándikuani imeeri mismu erachiichani.

2. TATA DIOSÏ JEOBA JURAMUKUASÏREENDI ISRAELITEECHANI ESKAKSÏ NIPIRINGA GUERRARHU

Ióntki, Tata Diosï Jeobasï uandeendi káni ka andiksïsï nipirini israeliteecha guerrarhu. Pori ejemplu,  juramukuaspti parakaksï uarhipepiringa Kanaáni anapuecha jingoni para kastigariuani, jimbokaksï ísï mítekateespka eskaksï demoniuechani kómarhiasïreenga, eskaksï ísku jándikua ambe niátasïreenga ka eskaksï sapiichani jamberi kʼéjtsïtaasïreenga. Tata Diosï juramukuaspti israeliteechani eskaksï kʼamajkuapiringa imani kʼuiripuechani engaksï irekani japka imani Echeri jimbo engaksï Aiaminhapka, parakaksï imeechajtu no niárapiringa májkueni ambe úni (Lev. 18:24, 25). Engaksï israeliteecha irekani japkia imani Echeri jimbo engaksï Aiaminhapka, ménichani Tata Diosï sésikua íntsaaspti paraksï kuájpikuarhini imeecheeri enemiguecheri (2 Sam. 5:17-25). Joperu no méni sésikua íntsaaspti paraksï jandiajku pʼitsïkuarhini guerrarhu nirani. Peru engaksï ísï ueenga, uánikua xanhariksï no sési uéranchasïreendi (Núm. 14:41-45; 2 Crón. 35:20-24).

Iásï, Tata Diosï Jeoba no sésikua íntsaasïndi kʼuiripuechani paraksï guerrarhu nirani. Nasionichaksï uarhiperasïndi paraksï kuájpini imeecheeri ambe ka no Tata Diosïiri ambe. Jamberiksï uarhiperajti jimbokaksï uékasïnga sánderu káneerani imeecheeri territoriuni o sánderuksï sentabu uékani jatsini, o politika ambe jimbo o imeecheeri eratsekuechani jimbo. ¿Ka ambechi uaa uandani imeecheeri engaksï uandajka eskaksï Tata Diosïni jimbosï uarhipejka paraksï kuájpini ambe engaksï jakajkujka o paraksï kʼamajkuani Tata Diosïiri enemiguechani? Imeechajtuksï no Tata Diosïni jimbosï jámajti. Tata Diosï Jeoba uandasïndi eska imasï kuájchakuauaka imeeri marhuariichani ka eska kʼamajkuauaka imeeri ikiatspitiichani guerra ma jimbo enga sánderu orhepatini úkuarhiaka: Armajedonirhu (Jaŋ. 16:14, 16). Indeni guerra jimbo, Tata Diosïiri ejersitujkusï uarhipeati enga auandarhu jaka ka no imeeri ireta enga Echerirhu jaka (Jaŋ. 19:11-15).

3. ISRAELITEECHAKSÏ NO UÁNDIKUASÏREENDI IMEECHANI ENGAKSÏ MINTSIKEENGA TATA DIOSÏ JEOBANI

Ióntki, Israeli anapu ejersitu uánikua xanhari pʼamojkuasïreendi imeechani engaksï mintsikeenga Tata Diosïni ka imeechantkuksïsï uándikuauendi enga Tata Diosï uandeenga eskaksï jatsipiringa para uarhini. Ju je exeani tsimani ejempluechani. Nájkiruka Tata Diosï Jeoba juramupka eskaksï kʼamajkupiringa ireta Jerikóni, israeliteechaksï tsípiti pakataspti  Raabini ka imeeri familiani jimboka Raabi mintsikaspti Tata Diosïni (Jos. 2:9-16; 6:16, 17). Ka ísï tátsekua, nóksï uándikuaspti Gabaóni anapuechani jimbokaksï janhanharhispka Tata Diosïni (Jos. 9:3-9, 17-19).

Iásï, ejersituecha engaksï guerrarhu nirajka astaksï imeechani uándikuasïndi engaksï mintsikajka Tata Diosïni ka ménichani asta na uéjki kʼuiripuni ma.

4. ISRAELITEECHAKSÏ JATSISPTI PARA ÍSÏ UARHIPENI ESKA TATA DIOSÏ NA ARHIAPIRINGA

Ióntki, Tata Diosï Jeoba arhiaspti Israeli anapu sondaduechani ambe engaksï úpiringa engaksï guerrarhu nipiringa. Pori ejemplu, ménichani Tata Diosï kurhakuasïreendi eskaksï “pínandikueri pakatperakua” ma úpiringa imani iretani jingoni enga imeecheeri enemiguepiringa (Deut. 20:10). Ístu, Tata Diosï Jeoba juramukuasïreendi eskaksï sondaduecha ka jima engaksï pakarapiringa limpiu japiringa ka eskaksï ísï jámapiringa eska Tata Diosï na jaiapanhentajka (Deut. 23:9-14). Ístu, Tata Diosï Jeoba arhiaspti eska engaksï na andapiringia nóksï jámapiringa biolariuani nanakechani ísï eskaksï na ueenga máteru nasioniiri anapu ejersituecha. Ka asta arhiaspti eska enga Israeli anapu sondadu ma uékapiringa tembuni nanakani ma engaksï na andapiringia, eska jatsipiringa para ma kutsï erokuarhini (Deut. 21:10-13).

Iásï, sáno iámindu paisiichaksï firmariuasti pakatperakuechani engaksï leichani uandajka para jiáni enga guerra ma úkuarhijka. Nájkirukaksï inde pakatperakuecha jindeeka para kuájchakuani kʼuiripuechani, no ísï úkuarhisïndi eskaksï inde leicha na uandajka.

5. TATA DIOSÏ UARHIPESÏREENDI IMEERI IRETANI JIMBO

Ióntki, Tata Diosï Jeoba uarhipespti Israeli anapuechani jimbo ka uánikua xanhari milagruechani uaaspti parakaksï úpiringa andani. Pori ejemplu, jarhuataaspti parakaksï andaapiringa Jerikó anapuechani. Arhiaspti israeliteechani eskaksï ʻuinhamu uinhachapiringa enajkiksï guerrarhu japiriniʼ ka jimajkani “barda kuarhatsespti”. Ísï úparini, Tata Diosï Jeoba jarhuataaspti parakaksï úpiringa andani imani iretani (Jos. 6:20). Ka ísï tátsekua úsptiksï andaani amorreuechani engaksï imeecheeri ikiatspitiipka. ¿Néna? Tata Diosï Jeoba úspti eska kʼéri ma xanuapiringa ka sánderuksï uánikua amorreuecha uarhispti xanuata jimbo eska uarhiperata jimbo (Jos. 10:6-11).

JURHIMBITI KRISTIANUECHACHI JÁNGUARHINTASÏNGA PARAKA SÉSI PÁJPERANHAAKA

Eskachi na exeka, ambe enga úkuarhini jaka ini jurhiatikuechani jimbo kánikua ménderueniisti eska jiáni engaksï israeliteecha irekani japka. Joperu jarhasti máteru ambe engachi jimbo no nirajka guerrarhu. Pori ejemplu, Tata Diosï uandaspti eska últimu jurhiatikuechani jimbo, imeecha engaksï jurajkukuarhipiringa eska ima jorhendaapiringa, ʻnóteruksï jorhenguarhipirindia uarhipeniʼ ka nijtuksï guerrarhu nirani (Is. 2:2-4). Ístu, tata Jesukristu uandaspti eskaksï imeeri chúxapatiicha nóteru ʻparhakpini anapuepiringaʼ, nijtuksï jámapirindi politikarhisï inchamukuni (Juanu 15:19).

Tata Jesukristu kurhakuaspti imeeri chúxapatiichani eskaksï sánderu ambe úpiringa. Jorhendaaspti eskaksï no jámapiringa kurhunhpini, ikiani ka nijtu úni eska guerra ambe japiringa (Mat. 5:21, 22, TNM). Ka ístu jorhendaaspti eskaksï jarhuataapiringa máteruechani sési pájperani ka eskaksï xénchaapiringa imeeri ikiatspitiichani (Mat. 5:9, 44).

¿Ambejtsïni jorhendasïni i ambe? Ísïisti, juchachi no uékasïnga guerrarhu nirani. Peruchi, úpiringa ikiakuni nemani kúnguarhikuarhu ka indeni ambe jimbo úni eska kúnguarhikua arhukurhitini jauaka o eska arhirperata ambe jauaka. Ísï jimbo, ju je seguiriini jánguarhintani no indeni ambe pʼikuarhinheni (Sant. 4:1, 11).

Nóchi jámasïnga inchamukuni ini parhakpinirhu anapu guerrecharhu. Sánderu sési, kristianuechachi jánguarhintasïnga sési pájperani ka uékperani (Juanu 13:34, 35). Ísï jimbo, nóchi jatsiska para inchamukuni guerrecharhisï nijtu politikarhisï enga jamberi niáraaka ima jurhiatikua enga Tata Diosï Jeoba kʼamajkuauaka iámindu guerreechani para méntkisï (Sal. 46:9).