1. ¿Ambe ambakiti ambejtsïni aiachiski Tata Diosï Jeoba?

 TATA Diosï Jeobajtsïni aiachixati ambakiti ambe, irekani para méntkisï. Máru imeeri marhuariicha erokuarhixatiksï irekani auandarhu ísï eska espirituecha engaksï no méni uarhiaka (1 Kor. 15:50, 53). Joperu sáno iáminduecha erokuarhixatiksï Echerirhu irekani para méntkisï tsípikua jingoni ka no ma pʼamenchakua jingoni (Jaŋ. 21:3, 4). Nani uéjki engachi irekaaka, auandarhu o Echerirhu iáminduechachi mintsita jingoni jukaparharasïnga ambe engajtsïni Tata Diosï aiachini jaka.

2. ¿Andichisï uaa seguru jarhani eska úkuarhiaka ambe engachi erokuarhini jaka, ka andichisï ísï uandajki?

² Kánikuachi mintsikasïnga ambe engajtsïni Tata Diosï aiachini jaka Bibliarhu. Ka uaakachi seguru jarhani eska ísï úkuarhiaka jimboka Tata Diosï Jeobasï ísï uandani jaka (Rom. 15:13). Míteskachi iámindu ambe engajtsïni ima aiachini jaka ka ístuchi míteska eska ima méntkisï úsïnga ambe enga uandajka (Núm. 23:19). Seguruchi jarhaska eska Tata Diosï Jeoba uékasïnga ka eska úsïnga úni iámindu ambe enga ima uandajka. Ísï jimbo, ambe engachi erokuarhini jaka no ísku tsánharhikua ambeesti o ambe ma engachi tsitipiringa, jimboka jarhaska uánikua ambe enga xarhatajka eska ísïiuaka.

3. ¿Ambechi exea ini jorhenguarhikua jimbo? (Salmo 27:14).

³ Juchaari Taati auandarhu anapu xénchasïndijtsïni ka uékasïndi eskachi mintsikaaka imani (arhinta je Salmo 27:14). Engachi mintsita jingoni mintsikaska Tata Diosï Jeobani, uaakachi balori jatsini ka tsípini pʼikuarherani ambe uéjkichi nitamakuarhini. Ini jorhenguarhikua jimbo exeakachi nénajtsïni kuájchakusïni ima ambe engachi erokuarhini jaka. Peru ju je orheta exeni andichisï uandajki eska ambe engachi erokuarhini jaka ísïiska komueska ankla ma o komueska kájtsïkua tiámueri ma. Tátsekuachi exeaka nénachi uaa sánderu seguru jarhani eska ísï úkuarhiaka ambe engachi erokuarhini jaka.

4. ¿Andisï erokuarhikua ísïi eska ankla ma? (Ebreu 6:19).

⁴ Enga apostoli Pablu karakuapka kristianu Ebreuechani, uandaspti eska ambe engachi erokuarhini jaka ísïiska komueska ankla ma (arhinta je Ebreu 6:19). Ima mémindu nirasïreendi marirhisï, jimbosï ima mítepti eskaksï ankleecha marhuasïnga para barkuni ma jupiskuni. Ma xanhari, enga ima barku ma jimbo nirani japka, ueenaspti uinhamu janini ka ima exespti eskaksï marineruecha anklechani kʼuanimaaspka paraka barku no uátatakuarhipiringa tsakapuecharhisï (Uku. 27:29, 39-41). Ísï eska ankla ma na jupiskujka barkuni ma, erokuarhikuajtsïni jarhuatasïndi parachi no jarharini Tata Diosï Jeobani engachi uandanhiateechani jatsiauaka engaksï ísïika komueska kʼérati janikuecha. Mintsikani eska no ióni jimbo sési jánhaskuarhintaakia jarhuatasïndijtsïni parachi úni orhepani uérakuani tsʼéjkukuechani engachi iásï jatsiajka. Ju je miántani eska Jesúsi uandaspka eskachi no sési kánhapiringa (Juanu 15:20). Jiájkani, eratsentani ambe engajtsïni Tata Diosï aiachini jaka, jarhuatasïndijtsïni para seguiriini imani marhuakuni.

5. ¿Erokuarhikua néna jarhuataspi Jesúsini enga uándikunhapiringa?

⁵ Ju je exeni néna enga erokuarhikua jarhuatapka Jesúsini paraka no jurajkupiringa imeeri Taatini, nájkiruka mítepka eska no sési kánhapiringa para uándikunhani. Uéxurhini 33 Pentekostesiiri jurhiatikua jimbo, apostoli Pedru uandaspti profesia ma enga Salmos jimbo jaka, enga uandajka eska Jesúsi no sáni chépiringa ka eska kánikua mintsikapiringa. Profesia uandasïndi: “Ka ji Tata Diosïni mintsikaparini irekaaka, jimbokarini tʼu no jurajkuaka Tumbarhu ka nóri jurajkuaka eska tereaka chiiti jántspiri engakeni no méni jurajkuka. […] Ka ji kánikua tsípiaka tʼungini japarini” (Hech. 2:25-28, TNM; Sal. 16:8-11). Nájkiruka Jesúsi mítepka eska uarhipiringa, seguru jarhaspti eska Tata Diosï tsítantapiringa ka kánikua tsípikua jingoni erokuarhixapti eska ménderu níntapiringa auandarhu imeeri Taatini jingoni (Heb. 12:2, 3, TNM).

6. ¿Ambe uandaspi erachi ma erokuarhikueri ambe?

⁶ Erokuarhikua jarhuataastia uánikua kristianuechani orhepani uérakuani tsʼéjkukuechani. Ju je exeni erachi Leonard Chinniiri ejempluni enga Inglaterra irekapka ka enga no méni jurajkupka Tata Diosïni. Ima ónhanhaspti jimboka no uékaspka ejersituni jingoni nirani uarhipeni Primera Guerra Mundiali jimbo. Jandiajku peeranhaspti tsimani mesiicha ka tátsekuaksï uinhamu ánchitaraspti. Sánderu orhepatini ima karaspti: “Ima ambe engani nitamakuarhika, jorhendastireni eska para úni tekaantani jatsiskachi para no mirikurhini imani ambe engachi erokuarhini jaka. Ístu, Jesúsiiri ejemplu, apostoliicheri, profeteecheri ka ima ambe enga Biblia aiatspejka úsïndi eskachi ambakiti erokuarhikua ma jatsiaka ka uinhapikuajtsïni íntskusïndi parachi úni tekaantani”. Erokuarhikua ísïispti eska ankla ma para erachi Leonard ka uaati májkueniini para jucha.

7. ¿Nénajtsïni jarhuatasïni uandanhiateecha parachi sánderu mintsikani ambe engachi erokuarhini jaka? (Roma 5:3-5; Santiagu 1:12).

⁷ Engachi uandanhiateechani tekaantajka ka exeni na engajtsïni Tata Diosï Jeoba újchakurajka ka jarhuatani, úsïndi eskachi sánderu mintsikaaka ambe engachi erokuarhini jaka (arhinta je Roma 5:3-5; Santiagu 1:12). Ísï jimbo, iásïchi sánderu seguru jarhaskia eska ísï úkuarhiaka ambe engachi erokuarhini jaka eska jiáni engachi ueenaka Biblieri ambe míteni. Satanási uékasïndi eskajtsïni uandanhiateecha no sési pʼikuastaaka, peru Tata Diosï Jeobaeri jarhuajperatani jingoni uaakachi orhepani uérakuani.

8. ¿Andisï erokuarhikua ísïi eska kájtsïkua tiámueri ma? (1 Tesalonika 5:8).

⁸ Biblia uandasïndi eska erokuarhikua ísïiska komueska kájtsïkua tiámueri ma (arhinta je 1 Tesalonika 5:8). Sondadu ma úrasïndi  kájtsïkua tiámuerini parakaksï imeeri enemiguecha no éjpurhu ataaka. Juchajtuchi jatsiska para kuájchakuni juchaari eratsekuani parakajtsïni Satanási no no sési jásï ambe eratsetaraaka. Imajtsïni mámaru ambe tsitirasïndi ka úrasïndi máru ambe parajtsïni no sési jásï ambe eratsetarani. Ísï eska kájtsïkua tiámueri na kuájchakujka sondadueri éjpuni, erokuarhikuajtsïni kuájchakusïndi parachi no no sési jásï ambe eratseni ka ísïchi úsïnga seguiriini sési marhuakuni jarhani Tata Diosï Jeobani.

9. ¿Ambeksï úsïni kʼuiripuecha engaksï no ma erokuarhikua jatsika?

⁹ Erokani eskachi irekaaka para méntkisï jarhuataatijtsïni ambakiti ambe erakuni úni. Peru engachi imani ambejku eratseni jauaka engachi jucha tsitijka, úpiringachi mirikurhini ambe engachi erokuarhini jaka. Ju je eratsentani ambe enga úkuarhipka máru kristianu Korintu anapuecha jingoni. Imeechaksï nóteru mintsikasïreendia eska Tata Diosï úpiringa tsítantaani uarhiriichani (1 Kor. 15:12). Pablu uandaspti eska imeecha engaksï no jakajkuenga tsíntskuani soluksï irekasïreenga para tsípikuarhini jámani (1 Kor. 15:32). Iásï, uánikua kʼuiripuechaksï no mintsikasïndi ambe enga Tata Diosï aiatspejka, jimboksïsï sánderu tsitijti tsípikuarhini jimbokaksï no ma erokuarhikua jatsiska. Peruchi jucha kʼóru mintsikasïnga ambe engajtsïni Tata Diosï aiachini jaka. Erokuarhikua ísïisti komueska kájtsïkua tiámueri ma enga kuájchakujka juchaari eratsekuani ka jarhuatasïndijtsïni parachi no sánderu tsitini tsípikuarhini jámani, jimbokachi nóteru sési pájperapiringuia Tata Diosïni jingoni (1 Kor. 15:33, 34).

10. ¿Erokuarhikuajtsïni néna uaa jarhuatani parachi no jakajkuani eratsekuechani engaksï chkuanderakuecheka?

¹⁰ Erokuarhikuajtsïni kuájchakusïndi parachi no eratseni eskachi no uaaka jaiapanherantani Tata Diosï Jeobani. Pori ejemplu, nema úpirindi eratseni: “Ji no méni uaaka jatsini tsípikua para méntkisï. No xáni ambakiti kʼuiripueska. No méni uaaka úni ambe enga Tata Diosï uéjka”. Ju je miántani eska Elifasi, Jobueri amigu arhikata ma, sáno májkueni ambe uandaspka: “¿Néna uaa kʼuiripu ma enga uarhijka pímbinhasïtiini […]?”. Ka ístu uandaspti: “Exe, Tata Diosï no mintsikaasïndi imeeri pímbinharhatiichani, ka ni auandechani jamberi ísï exeajki eskaksï pímbinharhatiiska” (Job 15:14, 15). ¡I ambe chkuanderakua máesti! Ju je miáni eska Satanásisï uéjka eskachi ísï eratseaka. Ima mítesti eska engachi seguiriska ísï eratseni uaakachi nóteru mintsikani indeni erokuarhikuani. Ísï jimbo, ju je no jiókuarhini indeni chkuanderakuani, sánderu sési ju je imani ambejku eratseni jarhani engajtsïni Tata Diosï aiachijka. Ístu, ju je seguru jarhani eska Tata Diosï uékasïnga parakachi iámindu imeeri marhuariicha irekaaka para méntkisï ka eskajtsïni jarhuataaka (1 Tim. 2:3, 4).

11. ¿Andichisï jatsi para tekaantskua jingoni seguiriini mintsikani iámindu ambe enga Tata Diosï aiatspekia?

¹¹ No méntkisï fásiliisïndi mintsikani eska ísï úkuarhiaka ambe engachi erokuarhini jaka. Jamberichi uaaka kuatantani erokuarhini eska Tata Diosï ísï uaaka eska na aiatspeka. Peru Tata Diosï Jeoba no májkueni exesïndi tiempuni eska jucha ka ima méntkisï jauati (2 Ped. 3:8, 9). Ima jánguarhiati ísï úni eska na eratsetini jakaia, peru no jiáni engachi jucha uékaaka. ¿Ambejtsïni jarhuataa parachi tekaantskua jingoni seguiriini mintsikani iámindu ambe enga Tata Diosï aiatspekia? (Sant. 5:7, 8).

12. Eska na arhijka Ebreu 11:1, 6, ¿nénajtsïni marhuachesïni erokuarhikua jatsini ka jakajkuni eska Tata Diosï jarhaska?

¹² Uaakachi seguiriini mintsikani ambe engachi erokuarhini jaka engachi sánderu andarhieraska Tata Diosï Jeobani, jimboka imasï újka eska úkuarhiaka ambe engachi erokani jaka. Biblia uandasïndi eska para erokuarhikua jatsini, uétarhisïnga jakajkuni eska Tata Diosï jarhaska ka eska “premiu íntsauaka imeechani engaksï jirinhantajka imani” (arhinta je Ebreu 11:1, 6). Engachi sési jimbo jakajkuska eska Tata Diosï Jeoba  jarhaska sánderuchi mintsikaaka eska ima kumpliriuaka ambe enga aiatspekia. Ju je exeni nénachi uaa sánderu sési pájperani imani jingoni ka ísïchi úni sánderu mintsikani ambe engachi erokuarhini jaka.

13. ¿Nénachi uaa Tata Diosïiri amigueni?

¹³ Ju je kómarhini Tata Diosï Jeobani ka arhintani imeeri Karakatani. Ísïisti, nóchi úsïnga exeni Tata Diosïni, peruchi uaaka imeeri amigueni. Engachi kómarhijka, uandontskuarhenchi jarhasïnga imani jingoni, ka imajtsïni meru kurhajchani jarhasïndi (Jer. 29:11, 12). Ka úsïngachi kurhangukuni engachi arhintajka imeeri Karakatani ka eratsentani ambe engachi arhintajka. Engachi arhintaska na enga ióntki Tata Diosï Jeoba kuidariuapka imeeri marhuariichani, sánderuchi mintsikasïnga eska úkuarhiaka ambe enga ima aiatspejka. Iámindu ambe enga Tata Diosïiri Karakatarhu jaka ‘karakata jarhasti parajtsïni jorhendani, para eska Diosïiri karakateechani jimbo jucha tekaantskua jatsiaka ka uinhapini korokanchi ka ísï ambakiti ambe erokanchi’ (Rom. 15:4).

14. ¿Andisï sési jaki eskachi eratsentaaka ambe enga Tata Diosï Jeoba úka máteruecha jimbo?

¹⁴ Ju je eratsentani na enga Tata Diosï Jeoba ísï úka eska na aiatspipka. Ju je eratsentani ambe enga úka Abraáni ka Sarani jimbo. Jimbokaksï imeecha jatiriispkia, nóteruksï úpirindia kánguarhiani sapiichani, joperu Tata Diosï aiakuaspti eskaksï kámapiringa sapini ma (Gén. 18:10). ¿Ambe úspi Abraáni? Biblia uandasïndi eska ima jakajkuspka “eska ima jindeepiringa uánikuecheeri taati jémba” (Rom. 4:18). Jamberi para Abraáni úpirindi ísï xarharani eska Tata Diosï no úpiringa ísï úni eska na aiakuni japka, joperu Abraáni seguru jarhaspti eska Tata Diosï Jeoba meru ísï úpiringa eska na aiakupka. Ka i ambakiti Tata Diosïiri marhuari úspti exeni eska ísï úkuarhispka (Rom. 4:19-21). I járhati ejempluechajtsïni jorhendasïndi eskachi uaaka méntkisï mintsikani eska Tata Diosï ísï uaaka eska na uandajka, nájkirukachi jucha ísï exeaka eska no uaaka ísï úkuarhini.

15. ¿Andichisï jatsipirini para eratsentani ambe enga Tata Diosï úkia juchantsïni jimbo?

 ¹⁵ Ju je eratsentani ambe enga Tata Diosï Jeoba úkia juchantsïni jimbo. Ju je exeni néna engachi marhuanchakia máru ambe engajtsïni Tata Diosï Bibliarhu aiachijka. Pori ejemplu, Jesúsi uandaspti eska imeeri Taati íntskupiringa ambe engachi uétarhinchapiringa parachi úni irekani (Mat. 6:32, 33). Jesúsijtu uandaspti eskajtsïni Tata Diosï Jeoba íntskupiringa imeeri espiritu santuni engachi kurhakupiringa (Luk. 11:13). Tata Diosï meru ísï ústia eska na aiatspipka. Ka jamberichi exekia eska Tata Diosï úskia máru ambe engajtsïni aiachipka, komu eskajtsïni puáchentapiringa, eskajtsïni sési pʼikuastantapiringa ka eskajtsïni jarhuatapiringa parachi sési pájperani imani jingoni (Mat. 6:14; 24:45; 2 Kor. 1:3). Engachi eratsentaska indeni ambe enga Tata Diosï úkia juchantsïni jimbo, inde ambe uaati eskachi sánderu seguru jauaka eska ambe engachi erokuarhini jaka para sánderu orhepatini meru ísï úkuarhiaka.

16. ¿Andisï erokuarhikua xáni kʼéri kóntperata máe?

¹⁶ Kʼéri kóntperata máesti míteni eskachi uaaka irekani para méntkisï. Uékaxakachia eska niáraaka inde jurhiatikua ka seguruchi jarhaska eska meru ísï úkuarhiaka. Erokuarhikua ísïisti eska ankla ma jimbokajtsïni jarhuatasïnga parachi orhepani uérakuani tsʼéjkukuechani, uarhikuani ka engachi no sési kánhajka. Ístu, ísïisti eska kájtsïkua tiámueri ma, jimboka kuájchakuasïnga juchaari eratsekuechani ka jarhuatasïndijtsïni parachi no imani ambe úni enga no sési jaka sino ambe enga sési jaka. Erokuarhikua engajtsïni Biblia íntskujka jarhuatasïndijtsïni parachi sánderu andarhierani Tata Diosïni ka xarhatasïndi na engajtsïni xáni xénchajka ima. Seguru jarhani eska úkuarhiaka ambe engachi erokuarhini jaka kánikuajtsïni sési úchisïndi.

17. ¿Andichisï sési pʼikuarherajki imani ambe jimbo engachi erokuarhini jaka?

¹⁷ Enga apostoli Pablu Roma anapuechani karakuapka, arhiaspti: “Tsípi je indeni ambe jimbo engajtsï erokani jaka” (Rom. 12:12). Pablu úsïreendi sési pʼikuarherani jimboka seguru jarhaspka eska úpiringa irekani para méntkisï auandarhu enga no méni jurajkupiringa Tata Diosï Jeobani. Juchajtuchi uaaka sési pʼikuarherani imani ambe jimbo engachi erokuarhini jaka jimbokachi seguru jarhaska eska Tata Diosï Jeoba ísï uaaka eska na aiatspika. Ísï eska na uandapka ima enga Salmo ma karaka: “Tsípini pʼikuarherasïndi ima […] enga mintsikajka imeeri Tata Diosï Jeobani, […] enga méntkisï újka ambe enga uandajka” (Sal. 146:5, 6).