1, 2. a) ¿Nénaksï no sési kaaski máru juramutiicha Tata Diosï Jeobaeri marhuariichani, ka nénaksï pʼikuarherasïni i erachiicha? b) ¿Andichisï uaa tsípini pʼikuarherani nájkirukachi no sési kánhaaka? (Ístu uandanta je ambe engaksï xarhatajka fotuecha engaksï ueenakuarhu jaka i rebistarhu).

 INI JURHIATIKUECHANI jimbo, nóchi jurajkunhasïnga parachi aianhpini jukari 30 paisiicha ka territoriuecha jimbo. Máru lugaricharhu, juramutiichaksï ónhaasti juchaari erachiichani ka pirenchichani. ¿Ambeksï no sési úski? No ma ambe, para Tata Diosï Jeoba imeechaksï no no sési úxati. Imeechaksï solu arhintasïndi ka jorhenguarhini Biblieri ambe, uandontskuarhekuani máteruechani ambe engaksï jakajkujka ka nirani tánguarhikuecharhu máteru kristianuecha jingoni. Ístuksï no jámasïndi politikarhisï inchamukuni. Joperu nájkirukaksï no sési kánhajka i ambakiti Jeobaeri marhuariichaksï iámu mintsita jingonksï jámasïndi b Tata Diosïni japarini ka xarhatastiksïa eskaksï uékasïnga imani marhuakuni ka ini ambe jimboksï tsípini pʼikuarherasïndi.

² Seguru eskajtsï exeaka máru fotuechani i Testiguecheri engaksï kánikua balori jukaka ka exentsï eskaksï iicha tsípenharhixaka. Tsípinksï pʼikuarherasïndi jimbokaksï míteska eska Tata Diosï Jeoba jaiapanheantasïnga jimbokaksï no méni jurajkusïnga (1 Crón. 29:17a). Jesúsi uandaspti: “Tsípisïndiksï imeecha engaksï no sési kánhajka jimbokaksï jurhimbitku jámasïnga […]. Tsípi je ka kánikua sési korokani, jimbokajtsï kʼéri ma premiu intsïnhaaka” (Mat. 5:10-12).

3. Eska na arhijka Ukuecha 4:19, 20, ¿ambeksï úspi apostoliicha engaksï no sési kánhani japka, ka andi?

³ Juchaari erachiichaksï májkueni nitamakuarhixati eska primeru siglurhu anapu apostoliicha engaksï no sési kánhapka jimbokaksï aianhpisïreenga Jesúsiiri ambe. Uánikua xanhari Judá anapu juesiichaksï uinhamarhikuaspti “eskaksï nóminduteru jámapiringa uandajtsïkpini ka níjtu jorhentpini Jesúsiiri nombri jimbo” (Uku. 4:18; 5:27, 28, 40). ¿Ambeksï úspi apostoliicha? (Arhinta je Ukuecha 4:19, 20). Mítesptiksï eska nema enga sánderu juramukua jatsika, juramukuaspka eskaksï aianhpepiringa iretarhu ka eskaksï iámu ambe uandantapiringa tata Jesukristueri ambe (Uku. 10:42). Ísï jimbo, Pedru ka Juanu engaksï apostoliicha jimbo uandani japka arhiasptiksï balori jingoni eskaksï no kurhajchapiringa imeechani sino Tata Diosïni, ka uandasptiksï eskaksï seguiripiringa uandantani Tata Diosïiri ambe. Ísïispti enajkiksï ini ambe kurhamarhiani japirini juesiicha: “¿Nájtsï tekaasïni ísï uandani? ¿Merujtsï eratsesïni eskajtsï sánderu juramukua jatsiska eska Tata Diosï?”.

4. Eska na arhijka Ukuecha 5:27-29, ¿apostoliicha, ambe ambakiti ejemplujtsïni jurajkucheski kristianu jurhimbitiichani, ka nénachi uaa májkueni úni?

⁴ Apostoliichaksï ambakiti ejemplu ma jurajkuspti para iámindu kristianu jurhimbitiicha engaksï jánguarhintani jaka ‘sánderu janhanharhini Tata Diosïni ka eska kʼuiripuechani’ (arhinta je Ukuecha 5:27-29). Engaksï na ataapkia apostoliichani jimbokaksï no jurajkuspka Tata Diosïni, imeechaksï uéntaspti jima engaksï Judá anapu juesiicha japka “kánikua tsípiparini, jimboka Diosï íntsaaspka sésikua no sési arhinhanksï Kristueri nombri jimbo”, ka seguirisptiksï aianhpini (Uku. 5:40-42).

5. ¿Náki kurhamarhikuechanchi jatsiska para mókuantani?

⁵ Inde ejemplu engajtsïni apostoliicha jurajkuchika úsïndi eskachi kurhamarhikuarhiaka máru ambe. Pori ejemplu, ¿nénaksï úsïreeni apostoliicha sánderu kurhajchani Tata Diosïni eska kʼuiripuechani ka ístu úni eska na uandajka Biblia para kurhajchaani “imeechani engaksï juramukua jatsika”? (Rom. 13:1). ¿Ka nénachi uaa jucha kurhajchani “gobiernuni ka juramutiichani”, ísï eska apostoli Pablu na uandapka no jurajkuparini Tata Diosïni enga jindeeka juchaari kʼéri juramuti? (Tito 3:1).

6. a) ¿Nénachi xarhatasïni eskachi kurhajchaasïnga “imeechani engaksï juramukua jatsika” enga Roma 13:1 jimbo uandajka? b) ¿Juramutiichaksï iámu juramukua jatsiski?

⁶ (Arhinta je Roma 13:1). Ini karakata jimbo, uandakuecha imeecha “engaksï juramukua jatsika” arhikuekasïndi imani juramutiichani engaksï juramukua jatsika para máteruechani juramukuani. Kristianuechachi jatsiska para kurhajchaani ini juramutiichani. Jimbokaksï imeecha úsïnga eska no jauaka uarhiperakua ambe, úsïndiksï eskachi kurhajchauaka leichani ka ménichanksï kuájpisïndi Tata Diosï Jeobaeri iretani (Jaŋ. 12:16). Jimbochisï arhinhajka eskachi maiampiauaka impuestuechani, kontribusionichani, eskachi kurhajchauaka ka janhanharhiani (Rom. 13:7). Joperu i gobiernuecha jatsistiksï juramukua jimboka Tata Diosï sésikua íntskuaxaka. Jesúsi xarhataspti eska i ambe ísïiska enga juramuti Roma anapu Ponsiu Pilatu mámaru ambe kurhamarhini japka Jesúsini. Ima arhispti eska juramukua jatsispka para puákuntani o para uánditarkuarheni ka Jesúsi arhispti: “Tʼuri nómbe juramukua jatsipiringa para jíndeni jingoni engari no desde karhakua uératini intsïnhapiringa” (Juanu 19:11). Májkueni eska Pilatu, iámindu juramutiicha ka politikuecha engaksï iásï jaka, sántkuksï juramukua jatsisti.

7. ¿Na jatinchi no jatsiski para kurhajchaani juramutiichani, ka ambeksï jatsiski para míteni imeecha?

⁷ Kristianuechachi kurhajchaasïnga juramutiichani engaksï imeecheeri leicha terukuntajka Tata Diosï Jeobaeri leichani jingoni. Peru engajtsïni arhijka eskachi uaaka imani ambe enga Tata Diosï no jaiapanhintajka ójtsïni no jurajkuni parachi úni imani ambe enga Tata Diosï uéjka eskachi uaaka, nóteruchi kurhajchaasïngia juramutiichani. Pori ejemplu, jamberiksï uaati kurhakuani tumbiichani eskaksï niuaka paisirhu anapu sondaduechani jingoni. c O jamberijtsïni arhini eskachi nóteru sésikua jatsiskia para úrani Bibliani ka juchaari publikasionichani. O eskachi ístu nóteru uaakia aianhpini o tánguarhintani para kʼéri ambe arhini Tata Diosïni. Engaksï juramutiicha úrajka juramukuani paraksï no sési útspini, komu no sési kaani Jesúsiiri chúxapatiichani, Tata Diosï kuenta kurhakuantauati. ¡Tata Diosï Jeoba exeaxati! (Ecl. 5:8).

8. ¿Andisï no májkueni juramukua jatsini ka sánderu k’éri ambeeni, ka andisï xáni jukaparhakue i ambe?

⁸ Gobiernuechaksï juramukua jatsisti paraksï ambakiti ambe úni ka máteruechani juramukuani, peru i ambe no arhikuekasïndi eskaksï perfektueska ka eskaksï sánderu kánikua juramukua jatsiska, jimboka Tata Diosï Jeobajkusï sánderu juramukua jatsika ka perfektueni. Ka Bibliarhu tʼámu uelta uandasïndi eska Tata Diosï Jeoba jindeeska enga Sánderu K’éri Ambeeka (Dan. 7:18, 22, 25, 27).

9. ¿Profeta Danieli ambe exespi jánhaskuecha máru jimbo?

⁹ Ima jánhaskuecha enga profeta Danieli exeapka xarhatastiksï eska Tata Diosï Jeoba sánderu juramukua jatsiska eska náki uéjki máteru juramuti ka eska sánderu kʼéri ambeeska. Orheta exeaspti tʼámu kʼérati animaliichani engaksï arhikuekajka kʼérati juramukuecha engaksï ióntki japka ka engaksï ístu iásï jaka: Babilonia, Medopersia, Gresia ka Roma, ka k’éri juramukua enga iásï juramuni jaka enga jindeeka Reino Unido ka Estados Unidos (Dan. 7:1-3, 17). Tátsekua, Danieli exespti Tata Diosï Jeobani uaxakatini jarhani tronu ma jimbo auandarhu anapu tribunalirhu (Dan. 7:9, 10). Ambe enga tátsekua exepka i profeta xarhatasïndi ambe engaksï úkuarhinchaaka iásï anapu juramutiicha.

10. Eska na uandajka Daniel 7:13, 14, 27, ¿Tata Diosï Jeoba neechani íntskuasïni juramukua paraksï Parhakpinini juramukuni, ka ambejtsïni xarhatachesïni imeeri ambe?

¹⁰ (Arhinta je Daniel 7:13, 14, 27). Danieli exesïndi eska Tata Diosï euantasïnga juramukua parhakpinirhu anapu juramutiichani ka  íntsaasïndi imeechani engaksï jukanchaka intsïnhani ka engaksï sánderu juramukua jatsika. ¿Neeskiksï iicha? Jindeesti “nema enga ísïika eska acheetiiri uájpa ma”, enga jindeeka Jesukristu, ka “Tata Diosï sánderu kʼériiri pimbinharati erakukateecha”, engaksï jindeeka 144,000 engaksï juramuaka “para méntkisï” (Dan. 7:18). Ísï jimbo, xarharasïndi eska Tata Diosï Jeoba jindeeska ima enga Sánderu K’éri Ambeeka, jimboka imajkusï újka íntspini ka euajpintani juramukuani.

11. ¿Ambe máteru ambe karaspi Danieli enga xarhatajka eska Tata Diosï Jeoba jindeeska sánderu kʼéri ambe ka eska náki uéjki máteru juramuti?

¹¹ Ambe enga Danieli exepka indeni jánhaskua jimbo xarhatachesïndijtsïni ambe ma enga antesi uandapkia. Danieli uandaspti eska ʻTata Diosï auandarhu anapu […] kénditaasïndi reiichani ka peeraasïndi reiichaniʼ. Ka ístu uandaspti eska “ima enga Sánderu Kʼéri Ambeeka jindeeska Juramuti kʼuiripuecheri juramukuarhu ka eska uaaka íntskuni Reinu ma néni enga ima uékaaka” (Dan. 2:19-21; 4:17). ¿Tata Diosï Jeoba niáraski ménisï kénditaani o peeraani reiichani? Jo, ísï ústia.

12. Uanda je ejemplu ma na enga ióntki Tata Diosï Jeoba kénditaapka reiichani. (Exe je dibujuni).

¹² Tata Diosï Jeoba xarhatastia eska ima jindeeska enga sánderu kʼéri ambeeka iámindu imeechani jingoni “engaksï juramukua jatsika”. Ju je exeani tanimu ejempluechani. Ejiptu anapu faraoni, uinhamu ánchitarasïreendi Tata Diosïiri iretani ka méntku no uékasïreendi jurajkuani. Peru Tata Diosï pʼímutantaspti imeeri iretani ka úspti eska faraoni uarhimepiringa mari Charhapitirhu (Éx. 14:26-28; Sal. 136:15). Ístu rei Belsasari Babilonia anapu, úspti kʼuínchikua ma ka no janhanharhispti “Tatani auandarhu anapuni” ka ʻkómarhiaspti diosïichani engaksï plateriipka ka orueriʼ ka no Tata Diosï Jeobani (Dan. 5:22, 23). Peru Tata Diosï úspti eska i acheeti enga xáni kʼéramakuarhienga kʼuratsekua jingoni pakarapiringa. “Ima mismu chúrikua” Belsasari uándikunhaspti, ka meduecha ka persecha intsïnhasptiksï imeeri juramukuani (Dan. 5:28, 30, 31). Ka rei Erodesi Agripa I, Palestina anapu, uándikuspti apostoli Santiaguni ka ístu tátsekua ónhatarkuarhispti apostoli Pedruni jimboka uékasïreenga uándikuni. Peru Tata Diosï no jurajkuspti paraka i ambe úpiringa. “Tata Diosï Jeobaeri ánjeli ma úsp[ti] eska Erodesi jirejiresï pʼamenchapiringa”, ka Erodesi uarhispti (Hech. 12:1-5, 21-23, TNM).

13. Uanda je ejemplu ma na enga Tata Diosï Jeoba kʼamajkuapka juramutiichani engaksï májku kʼéri úkuarhintapka.

¹³ Ístu Tata Diosï Jeoba xarhatasptia eska  sánderu kʼéri ambeeska ka eska náki uéjki grupu juramutiicheeri. Uarhipespti israeliteechani jimbo ka jarhuataaspti parakaksï andaapiringa 31 reiichani engaksï Kanaáni anapuepka engaksï májku kʼéri úkuarhintapka ka ísïksï úspti sáno iámindu Echerini pʼirani engaksï Aiaminhapka (Jos. 11:4-6, 20; 12:1, 7, 24). Ístu Tata Diosï Jeoba jarhuataaspti israeliteechani parakaksï méntku kʼamajkupiringa rei Ben-Adadini ka máteru 32 reiichani engaksï Siria anapuepka engaksï nípka israeliteechani jingoni uarhiperani (1 Rey. 20:1, 26-29).

14, 15. a) ¿Ambe uandaspi rei Nabukodonosori ka Darío, Tata Diosï Jeobaeri kʼéri juramukueri ambe? b) ¿Ambe uandaspi salmueri karari ma Tata Diosï Jeobaeri ambe ka imeeri ireteeri ambe?

¹⁴ Tata Diosï Jeoba mémindu xarhataspti eska imajkusï jindeeka enga Sánderu Kʼéri Ambeeka. Enga Nabukodonosori, Babilonia anapu juramuti kʼéramakuarhipka imeeri uinhapikua ka imeeri juramukua jimbo ka enga no kaxumbikua jingoni jiókuarhipka eska Tata Diosï Jeobajkusï jindeeka enga jatsika para kʼéri ambe arhinhani, Tata Diosï úspti eska loku úkuarhipiringa. Ka enga Nabukodonosori nóteru loku japkia, kʼéri ambe arhispti imani enga Sánderu Kʼériika ka jiókuarhispti eska Tata Diosï Jeobaeri juramukuasï para méntkisï jauaka. Ka ístu uandaspti eska no nema uaaka ójkutani enga ima uékaaka úni ambe ma (Dan. 4:30, 33-35). Ísï tátsekua, enga Danieli xarhatakupka Tata Diosï Jeobani eska no méni jurajkupiringa ka enga Tata Diosï úpka eska leoniicha no ántapiringa, rei Darío ini ambe juramuspti: “Iámindu kʼuiripuecha engaksï juchiiti reinurhu jaka jatsia[ti]ksï para kánikua janhanharhini Danieliiri Tata Diosïni. Jimboka ima jindeeska Tata Diosï tsípiti ka méntkisï jauati. Imeeri reinu no méni kʼamajkunhaati ka imeeri kʼéri juramukua méntkisï jauati” (Dan. 6:7-10, 19-22, 26, nota, 27).

¹⁵ Salmueri karari ma uandaspti: “Tata Diosï Jeoba úspti eska no sési uéraaka ambe engaksï nasionicha uéjka no sési úni; ústi eska no úkuarhiaka ambe engaksï ireteecha uéjka úni”. Ka ístu uandaspti: “¡Tsípisïndi nasioni enga imeeri Tata Diosï jindeeka Jeoba, ireta enga ima erakuka para imeeri erensia máeni!” (Sal. 33:10, 12). ¡I, ambakiti rasoni máesti parachi no méni jurajkuni Tata Diosïni!

16. ¿Ambeerichi uaa seguru jarhani, ka andi? (Exe je dibujuni).

¹⁶ Exeskachia ambe enga Tata Jeoba úpka ióntki. Jiájkani, ¿ambechi erokuarhixaki eska úkuarhiaka nóteru ióni jimbo? Uaakachi seguru jarhani eska Tata Diosï Jeoba pʼímutantauaka “kʼéri mískuarhitarhu” imeeri marhuariichani engaksï no méni jurajkuaka (Mat. 24:21; Dan. 12:1). Ka ísï uaati enga grupu ma nasionicheri enga arhinhajka Gog de Magog ueenaaka kánikua no sési kaani iámindu parhakpinirhu anapu Jeobaeri marhuariichani. Ka nájkiruka ini grupu jimboksï jauaka 193 paisiicha engaksï Naciones Unidasirhu jaka, nóksï uaati andani imani enga Sánderu Kʼéri Ambeeka ni imeeri ejersituechani engaksï auandarhu jaka. Tata Diosï Jeoba aiatspesïndi: “Sési jimbo uaaka eskani kʼéri ambe exenhaaka ka pímbinhajkukuarhintaaka ka uaaka eskajtsïni uánikua nasionicha míteaka; ka jatsiatiksï para míteni eskani ji jindeeska Jeoba” (Ezeq. 38:14-16, 23; Sal. 46:10).

17. ¿Ambeksï úkuarhinchaa iámindu Parhakpinirhu anapu reiicha, ka ambe úkuarhia imeechani jingoni engaksï no méni jurajkuaka Tata Diosïni?

¹⁷ Enga Gog ueenaaka no sési kaani Tata Diosïiri marhuariichani, jima ueenakuarhiati Armajedoni ka ini uarhiperakua jimbo Tata Diosï kʼamajkuauati “reiichani iápuru parhakpinirhu” anapuechani (Jaŋ. 16:14, 16; 19:19-21). Joperu “ima kʼuiripuecha engaksï jurhimbikua jingoni jámajka irekaatiksï echerirhu ka imeechajkuksïsï seguiriuati jima engaksï no méni jurajpijka” (Prov. 2:21, nota).

18. ¿Ambeksï niárasïni nitamakuarhini uánikua kristianu jurhimbitiicha, ka andi? (Daniel 3:28).

¹⁸ Desde iónisïa uánikua kristianu jurhimbitiichaksï jurajkusïndi paraksï ónhanhani ka niárasïndiksï jamberi sáno uarhini jimbokaksï xénchasïnga Tata Diosï Jeobani, imeecheeri Kʼéri Juramutini. Ka eratsetixatiksï no méni jurajkuni Tata Diosïni ísï eskaksï tanimu ebreuecha engaksï pʼímutantskata uérapka engaksï chpirirhu kʼuanijpanhapka jimbokaksï kurhajchaspka imeecheeri Sánderu Kʼéri Juramutini (arhinta je Daniel 3:28).

19. ¿Ambe exea Tata Diosï Jeoba para jusgariuani imeeri marhuariichani, ka ambechi jatsiski para úni iásï?

¹⁹ Dabidi enga salmuechani karaaka mítespti na enga xáni jukaparhakueka iámu mintsita jingoni jámani Tata Diosïni japarini. Ima karaspti: “Tata Diosï Jeoba jusgariuauati ireteechani. Oh, Tata Diosï Jeoba, ísïrini jusgarii eskari tʼu na exejka eskani jurhimbikua jingoni jámasïnga, ka ístu ambe engari exejka eskani kueratanchasïnga” (Sal. 7:8). Ka ístu uandaspti: “Eskarini kuájchakuaka engani ísï iámu mintsita jingoni jámajka ka jurhimbikua jingoni” (Sal. 25:21). Ambe uéjki úkuarhini, sánderu ambakiti ambe engachi uaaka úni jindeesti no méni jurajkuni Tata Diosï Jeobani. Engachi ísï úska, uaakachi májkueni pʼikuarherani eska salmista enga karapka: “Tsípisïndiksï imeecha engaksï iámu mintsita jingoni jámajka [...], engaksï ísï újka eska Tata Diosï Jeobaeri lei na uandajka” (Sal. 119:1, nota).