SEMANA 41
PIREKUA 13 Kristu juchari ejempluesti
Ambechi jorhenguarhisïni ima últimu 40 jurhiatikuecheri enga Jesúsi echerirhu japka
“Ka 40 jurhiatikua jimbo someni xarhakuaspti ka Tata Diosïiri Reinueri ambe aianguasïreendi” (ÚKU. 1:3).
AMBE ENGACHI JORHENGUARHIAKA
Nénachi uaa májkueni úni eska Jesúsi na úpka imani últimu 40 jurhiatikuecha jimbo enga echerirhu japka.
1, 2. ¿Ambeksï úkuarhinchaspi tsimani Jesúsiiri chúxapatiicha engaksï Emaúsi nirani japka?
JURHIATIKUA 16 de nisani uéxurhini 33 jimbo, Jesúsiiri chúxapatiichaksï kánikua kómu pʼikuarheraxapti ka chéxaptiksï. Jerusaléni uératini, tsimani Jesúsiiri chúxapatiichaksï nirasïndi Emaúsi, ireta ma jimbo enga 11 kilometru iauani japka. Imeechaksï meru kánikua chéxapti jimboka apenasi uándikunhaspka Jesúsi, ima achamasï engaksï imeecha jámeenga chúxapani. Iámindu ambe engaksï mintsikani japka eska úpiringa Mesíasi ísï xarharasïreendi enajki nóteru ambe ma úkuarhipirinia. Joperuksï no erokuarhixapti ambe enga úkuarhipiringa.
2 Engaksï xanharu jimbo nirani japkia ima tsimani chúxapatiicha, achamasï ma andarhieraaspti ka ueenaspti uandontskuarhekuani. Ima tsimani chúxapatiichaksï aianguspti eskaksï no sési pʼikuarheraxapka ka kómu pʼikuarherani imani ambe jimbo enga Jesúsi nitamakuarhipka. Tátsekua imeeri ambe uandontskuarhekuaspti enga kánikua jarhuataapiringa. Aianguaspti andisï Mesíasi no sési nitamakuarhipi ka uarhini, ka ʻMoisésiiri karakateecha jingoni ueenaspti asta ambe engaksï xáni karapka’ profeteecha. Engaksï taniperani na niárapkia Emaúsi, ima tsimani chúxapatiichaksï kuenta íntskukuarhespti eska ima achamasï Jesúsiispka enga tsíntapkia. Imeechaksï kánikua tsípipti exeni eska Mesíasi tsípiti jarhaspka (Luk. 24:13-35).
3, 4. a) ¿Ambeksï úkuarhinchaspi Jesúsiiri chúxapatiicha? (Úkuecha 1:3). b) ¿Ambechi exea ini jorhenguarhikua jimbo?
3 Jesúsi uánikua uelta xarhakuaspti imani últimu 40 jurhiatikuecha jimbo enga ixú Echerirhu japka a (arhinta je Úkuecha 1:3). Ima kánikua uinhaperantaaspti, ísï jimbo nóteruksï chéxaptia nijtu kómu pʼikuarherani, kánikuaksï sési pʼikuarheraspti ka ístu balori jukani para nirani aianhpini ka jorhentpini Tata Diosïiri Reinueri ambe.
4 Ambe enga Jesúsi úpka imani últimu jurhiatikuecha jimbo enga Echerirhu japka, uaakachi uánikua ambe jorhenguarhini ka kánikuajtsïni marhuacheati. Ini jorhenguarhikua jimbo exeakachi néna sési urhaspi Jesúsi imani tiempuni para 1) uinhaperantaani imeeri chúxapatiichani, 2) jarhuataani paraksï sánderu sési kurhanguantani karakateechani ka 3) para jorhendaani néna sési úni ánchikuarhita ma. Mándani puntu jimbochi exeaka nénachi uaa májkueni úni eska Jesúsi.
NÉNA UINHAPERAANTANI MÁTERUECHANI
5. ¿Andiksïsï Jesúsiiri chúxapatiicha uétarhincheeni eskaksï uinhaperanhantapiringa?
5 ¿Andiksïsï Jesúsiiri chúxapatiicha uétarhincheeni paraksï uinhaperanhantani? Jimbokaksï máru jurajkuspka imeecheeri kʼumanchikuechani, familiechani ka ánchikuarhita ambe paraksï pauani pauani chúxapani Jesúsini (Mat. 19:27). Máteruechaksï niáraspti no sési kánhani jimbokaksï iásï Jesúsiiri chúxapatiispkia (Juanu 9:22). Ka ini ambeksï úspti jimbokaksï jakajkusïreenga eska Jesúsi jindeespka ima Mesíasi enga Tata Diosï aiatspepka (Mat. 16:16). Joperu enga Jesúsi na uándikunhapkia, imeechaksï eratsespti eska nóteru úkuarhipiringia ambe engaksï erokuareni japka ka jimboksïsï niárapti kánikua no sési pʼikuarherani.
6. ¿Ambe úspi Jesúsi enga na tsíntapkia?
6 Jesúsi mítespti eska imeeri uarhikua jimboksïsï xáni kómu pʼikuarherani japka imeeri chúxapatiicha. Ka ístu mítespti eska no jindeespka jimbokaksï no mintsikasïreenga, jimbosï ueenapti uinhaperantaani imeeri amigu jémbeechani. Ima mismu jurhiatikua enga tsítanhantapkia xarhakuspti María Magdalenani jiáni enga ima uerani japka jima enga Jesúsi jatsinhantapka (Juanu 20:11, 16). Ka ístu xarhakuaspti imani tsimani chúxapatiichani engachi ueenani jámani uandaaka. Ka ístu xarhakuspti apostoli Pedruni (Luk. 24:34). ¿Ambechi jorhenguarhisïni Jesúsiiri ambe? Ju je exeni ambe enga úkuarhipka jiáni enga Maríani Magdalenani xarhakupka.
7. ¿Ambe úxapi María jiáni enga Jesúsi exeni japka ka ambe úspi imani jimbo? (Juanu 20:11-16; ístu exe je imajenini).
7 (Arhinta je Juanu 20:11-16). Jurhiatikua 16 de Nisani máru uarhiitiichaksï xarhentku niraspti jima enga Jesúsi jatsinhantapka (Luk. 24:1, 10). Ma jindeespti María Magdalena. Ka enga na niárapkia jima, exespti eska no nema jarhaspka ka uiriipaspti Pedruni aianguni ka Juanuni. Ka iichaksï tsimarhani uiriipaspti jima enga Jesúsi jatsinhantapka ka María imeecha jingoni niraspti. Ka enga Pedru ka Juanu na niárapkia, exesptiksï eska ísïispka ka níntasptiksï kʼumanchikuarhu. María jima pakaraspti ka ueraxapti, joperu no mítespti eska Jesúsi exexapka. Ka enga Jesúsi exepka na enga María uerani japka, kánikua pʼamojkuspti. Jiájkani xarhakuspti ka kánikua uinhaperaantaspti. Uandontskuarhekuspti ka arhispti eska ini ambe úpiringa: nirani aianguani imeeri ermanu jémbeechani eska Jesúsi tsíntaspkia (Juanu 20:17, 18).
Ísï eska Jesúsi na úpka, ju je juchajtu pendienti jarhani erachiichani jimbo ka kurhangukuani engaksï no sési pʼikuarherani jauaka. (Exe je párrafu 7).
8. ¿Nénachi uaa májkueni úni eska Jesúsi?
8 ¿Nénachi uaa májkueni úni eska Jesúsi? Ju je jarhuataani erachiichani paraksï seguiriini jarhani marhuakuni Tata Diosï Jeobani. Jiájkani ju je jingontku jarhani parachi úni jarhuataani jiáni engaksï imeecha no sési ambe nitamakuarhini jauaka, ju je xarhatakuani eskachi kurhangukuasïnga ka xénchperakua jingoni uandontskuarhekuani. Ju je exeni ambe enga nitamakuarhipka pirenchi ma enga Jocelyni arhinhajka. Íri jingonikua jémba aksidenti ma jimbo uarhispti. Jocelyni uandantasïndi: “Uánikua mesiicha jimbo, ji jandiajkuni pʼikuarherasïreenga ka kánikua komu p’ikuarherani”. Tátsekua temungurhiri ma pʼímarhispti imeo, jingontkuksï kurhajchaspti ka miátantasptiksï eska Tata Diosï kánikua jukaparharasïreenga Jocelynini. Ima uandantasïndi: “Asta inde jurhiatikua jimbo, ji no jánhaskasïreenga ambe úni, ísï pʼikuarherasïreenga enajkini jandiajku japi marirhu jiáni enga kʼéri janini jarhajka. Joperu enga Tata Diosï Jeoba úraapka ini erachiichani, ji ísï pʼikuarheraspka enajkijtsïni indeecha pʼímantapi itsïirhu ka barkurhujtsïni jatsirantani. Ka jarhuatasptijtsïni parani ji ménderuni tsitini marhuakuni Tata Diosïni”. Jiájkani engachi jucha uéjka uinhaperaantani máteruechani, ju je jurajkuni eskajtsïni iámindu ambe aiangukuarhiaka ka ju je jingontku kurhajchaani parachi úni uinhaperaantani ka jarhuataani paraksï imeecha seguiriini marhuakuni Tata Diosï Jeobani (Rom. 12:15).
NÉNACHI UAA JARHUATAANI MÁTERUECHANI PARAKSÏ SÉSI KURHANGUANI KARAKATEECHANI
9. ¿Ambeksï kueratanchaxapi Jesúsiiri chúxapatiicha ka Jesúsi néna jarhuataspi?
9 Jesúsiiri chúxapatiichaksï jakajkusïreendi ambe enga arhijka Tata Diosïiri karakata ka jánguarhintasïreendiksï paraksï ísï úni eskaksï na arhinteenga (Juanu 17:6). Joperuksï no jánhaskaxapti nijtu kurhanguni andisï Jesúsi ísï uarhipi eska no sési úri ma. Jesúsi mítespti eskaksï imeeri chúxapatiicha ambarhati kʼuiripuespka, joperu ístu exespti eskaksï útasï no úxapka sési kurhanguni ambe enga arhijka karakateecharhu (Luk. 9:44, 45; Juanu 20:9). Jimbosï jarhuataapti parakaksï úpiringa kurhanguni ambe engaksï arhinteenga. Ju je exeni ambe enga úpka Jesúsi jiáni enga tsimani chúxapatiichani xarhakuapka engaksï imeecha Emaúsi nirani japka.
10. ¿Néna jarhuataaspi Jesúsi imeeri chúxapatiichani paraksï kurhanguni eska ima jindeespka Mesíasi? (Lukasï 24:18-27).
10 (Arhinta je Lukasï 24:18-27). Jesúsi no jirejiresï arhiaspti indeni tsimani achamasïichani neespi ima, sino mámaru ambe kurhamarhiaspti. ¿Andi? Jimboka uékasïreenga eskaksï imeecha aiangupiringa na engaksï pʼikuarherani japka ka na engaksï eratseenga. Ka imeechaksï arhispti eskaksï erokuarhixapka eska Jesúsi jarhuatapiringa ireta Israelini paraka nóteru Roma juramukupiringia. Engaksï indeecha na indeni ambe aiangupkia, Jesúsi karakateechani úraaspti para jarhuataani kurhanguni eskaksï uánikua profesiecha kumplirikuarhispka. b Ísï tátsekua enga na chúripkia, Jesúsi xarhakuaspti máteru chúxapatiichani ka ístu aianguaspti ambe engaksï arhikuekeenga inde profesiecha (Luk. 24:33-48). ¿Ambechi jorhenguarhisïni Jesúsiiri ambe?
11, 12. a) ¿Ambechi jorhenguarhisïni na enga úraapka Jesúsi Karakateechani? (Ístu exea je imajeniichani). b) ¿Néna jarhuataspi Norteyni ima erachi enga Biblieri ambe jorhendaani japka?
11 ¿Nénachi uaa májkueni úni eska Jesúsi? Jiáni engachi Biblieri ambe jorhendani jauaka nemani, ju je kurhamarhikuechani úkuani parachi úni míteni ambe enga eratsejka ima ka na enga pʼikuarherajka (Prov. 20:5). Ka engachi na míteakia na enga pʼikuarherani jaka, ju je jorhendani jirinhaantani Biblieri tekstuechani engaksï jarhuataaka orhepani uérakuni imani ambe enga nitamakuarhini jaka. Ka ju je no arhini ambe enga jatsika para úni. Uaakachi tekstuechani arhiantani ka ístu kurhamarhikuechani úkuani para ima úni míteni nénaksï marhuakua inde tekstuecha. Ju je exeni ambe enga nitamakuarhipka Ghana anapu erachi ma enga Nortey arhinhajka.
12 Enga Nortey 16 jatiriipka, ueenaspti jorhenguarhini Biblieri ambe. Ka ísï sáni tátsekua imeeri familia ueenaspti no sési kamani. ¿Ambe jarhuataspi paraka ima no chképiringa? Ima erachi enga jorhendani japka Biblieri ambe exeraspti Mateu kapitulu 10 para jorhendani eskaksï ambakiti kristianuecha niárapiringa no sési kánhani. Nortey uandasïndi: “Engareni juchiiti familia ueenapka no sési kámani, kurhanguspka eskani exentaspkia jurhimbikuani”. Erachi enga jorhendani japka Biblieri ambe ístu exeraspti Mateu 10:16 enga uandajka eskachi jatsiska para jingontku jámani ka jarhuataspti paraka ima exepiringa néna úpirini jingontku jámani jiáni enga aianguapiringa imeeri familiarichani ambe enga iásï jakajkujkia. Enga na itsï atakuarhipkia, Nortey uékasïreendi prekursoriini, joperu imeeri taati jémba uékasïreendi eska ima unibersidadirhu nipiringa. Joperu erachi no arhispti ambe enga jatsipka para úni, sánderu sési kurhamarhikuechani úkuaspti ka jánhastaspti Biblieri prinsipiuecha jingoni. ¿Ambe úspi Nortey? Ima prekursori úkuarhispti ka taati jémba petantaspti kʼumanchikuarhu. Nortey uandantasïndi na enga exejka inde ambe enga nitamakuarhipka: “Ji seguru jarhaska eskani imani ambe úska enga sési jaka”. Engachi jarhuataajka máteruechani parakaksï sánderu sési kurhanguantani Karakateechani, jarhuataasïngachi paraksï jánhaskatiini (Éfes. 3:16-19).
Ísï eska Jesúsi na úpka, ju je jarhuataani máteruechani Biblia jingoni paraksï sési eratsentani ambe ma. (Exe je párrafu 11). e
NÉNA JORHENDAANI ERACHIICHANI PARAKSÏ ÍSÏINI KOMUESKA REGALU MA
13. ¿Ambe úspi Jesúsi paraka seguiripiringa aianhpinhani nájkiruka ima karhanchentapiringia auandarhu? (Éfesu 4:8).
13 Enga Jesúsi Echerirhu jámani japka, ima meru kánikua sési úspti imani ánchikuarhitani enga Taati jémba arhipka eska úpiringa (Juanu 17:4). Ka no méni eratsespti: “Ji uéksïnga eska iámu ambe sési úkuarhiaka, jimbosï sánderu sésiuati eskani ji uaaka iámindu ambe”. Tanimu uéxurhini ka terujkani enga jámapka aianhpini, arhistakuaspti máteruechani néna úni ánchikuarhita ma. Jesúsi mintsinharhiasïreendi imeeri chúxapatiichani. Ka jimbosï arhiapti eskaksï aianhpepiringa ka jorhentpini ambakiti ambe ka ístu paraksï kuidariuani Tata Diosï Jeobaeri karichiichani, ka jurajkukuaspti íni ánchikuarhitani nájkirukaksï máru nótki jatiriuenga 30 uéxurhini (arhinta je Éfesu 4:8). Ka nájkirukaksï i achamasïicha májku kʼéri ánchikuarhipka Jesúsi jingoni, ima útasï uánikua ambe jorhendaaspti ante de auandarhu karhanchentani parakaksï imeecha ísïipiringa komueska regalu ma. Ju je exeni néna jorhendaaspi.
14. ¿Ambe úspi Jesúsi ka ambe jorhendaaspi imeeri chúxapatiichani imani últimu 40 jurhiatikuecha jimbo enga útasï Echerirhu jámani japka? (Ístu exe je imajenini).
14 Jesúsi uékperakua jingoni arhiaspti imeeri chúxapatiichani ambe engaksï uétarhinchani japka úni. Pori ejemplu, ima exespti eskaksï máru no jakajkuxapka eska ima tsíntaspkia, jimbosï arhiapti eskaksï seguru japiringa eska inde ambe ísï úkuarhispka (Luk. 24:25-27; Juanu 20:27). Arhiaspti eskaksï jánguarhintapiringa jarhuataani Tata Diosïiri marhuariichani ka no masi arhini sentabu andakuekani (Juanu 21:15). Ístu miátantaaspti eskaksï no masi arhipiringa exeni náki ánchikuarhitaksï intsïnhapirini máteruecha (Juanu 21:20-22). Ka ístu jimboka exespka eskaksï imeeri chúxapatiicha máteru ambe erokuarhixapka Reinueri ambe, jurhimberantaaspti ka jarhuataaspti parakaksï imeecha sánderu jánguarhintapiringa aianhpini (Úku.1:6-8). ¿Ambeksï uaa jorhenguarhini orhejtsïkutiicha Jesúsiiri ambe?
Ísï eska Jesúsi na úpka, ju je jarhuataani máteruechani paraksï sánderu responsabilidadiichani jatsiani. (Exe je párrafu 14).
15, 16. a) ¿Nénaksï uaa orhejtsïkutiicha májkueni úni eska Jesúsi? b) ¿Nénaksï jarhuataspi Patrickini ima konsejuecha enga erachi íntsaapka?
15 ¿Nénaksï uaa orhejtsïkutiicha májkueni úni eska Jesúsi? Jorhendaani ka jarhuataani erachiichani paraksï máteru ánchikuarhita ambe úni, no arhiparini engaksï máru sapirhatku jauaka. c Orhejtsïkutiichaksï no erokuarhisïndi eskaksï inde erachiicha méntku iámindu ambe sési uaaka. Sánderu sési, xénchperakua jingonksï jorhendaasïndi parakaksï indeecha sánhani arhiaka máteru ambe míteni ka ístu parakaksï jorhenguarhiaka kaxumbitiini, mintsinharhikueni ka jingontkuksï jarhani paraksï máteruechani jarhuataani (1 Tim. 3:1; 2 Tim. 2:2; 1 Ped. 5:5).
16 Ju je exeni ambe enga nitamakuarhipka erachi ma enga Patrick arhinhajka. Enga tumbiipka, kueratasïreendi sési kaani máteruechani asta pirenchiichani jamberi ka uinhamarhitspisïreendi. Tátsekua erachi ma enga eratsekua jukariika, arhispti Patrickini na enga jámeenga ka uékperakua jingoni arhispti ambe enga jatsipka para mójtakuni. Patrick uandantasïndi: “Ji kánikua sési pʼikuarheraspka engareni ima erachi ísï uandontskuarhechipka. Antesi ji kánikua no sési pʼikuarherasïreenga enga máteru erachi intsïnheenga imani responsabilidadini enga ji uékeenga. Ambe engareni arhipka ima orhejtsïkuti jarhuatasptireni parani ji sánderu jánguarhintani kaxumbikua jingoni jarhuataani máteru erachiichani ka no parani responsabilidadi ma jatsini kúnguarhikuarhu”. I ambe kánikua jarhuataspti Patrickini jimboka ima orhejtsïkuti únhasti enga ima 23 jatiripka (Prov. 27:9).
17. ¿Néna xarhataspi Jesúsi eska mintsinharhiasïreenga imeeri chúxapatiichani?
17 Jesúsi no solu arhiaspti imeeri chúxapatiichani eskaksï aianhpepiringa Tata Diosïiri ambe, sino ístu eskaksï jorhentpipiringa (exe je notani para sánderu ambe jorhenguarhini “enseñenles” enga Mateu 28:20 jimbo jaka). Jamberiksï ima eratseendi eskaksï no úpiringa úni indeni ánchikuarhitani. Joperu Jesúsi sési mítetixapti eskaksï imeecha úpiringa ísï úni, jimbosï arhiapti na enga xáni mintsinharhiauenga. Arhiaspti: “Ísï eskarini Taati na axaka jíndeni, jíjtuksïni májkueni axaxaka chánksïni” (Juanu 20:21).
18. ¿Nénaksï uaa orhejtsïkutiicha májkueni úni eska Jesúsi?
18 ¿Nénaksï uaa orhejtsïkutiicha májkueni úni eska Jesúsi? Ima erachiicha engaksï ióni orhejtsïkutiikia mítestiksï eskaksï jatsiska para jorhendaani máteruechani ka jurajkukuani mámaru jásï responsabilidadichani (Filip. 2:19-22). Pori ejemplu, uaatiksï kurhakuani tumbiichani paraksï jarhuataani ambantskantani ka arreglarini ambe ma Kʼumanchikua Reinuerirhu. Ka ístuksï mintsikasïndi eska ima erachi enga ánchikuarhita ma uaaka kúnguarhikuarhu, sési uaaka indeni ambe. Erachi ma enga Matthew arhinhajka ka enga apenasi orhejtsïkuti únhaka kánikua sési pʼikuarherasïndi engaksï orhejtsïkutiicha jorhendapka para mámaru jásï ánchikuarhita úni kúnguarhikuarhu ka eskaksï mintsikapiringa eska sési úpiringa imeeri ánchikuarhitani. Matthew uandantasïndi: “Kánikuarini jarhuatasïndi engajtsïni orhejtsïkutiicha arhijka ambe engani no sési újka, jimbokani ísï úsïnga jorhenguarhini ka ístujtsïni arhisïndi néna uaa sánderu sési úni ánchikuarhita ma”. d
19. ¿Ambechi jatsiski para úni?
19 Imani últimu 40 jurhiatikuechani jimbo enga Jesúsi Echerirhu jámani japka, ima jánguarhintaspti uinhaperaantani máteruechani, jorhendaani ka ístu arhistakuani néna úni ánchikuarhita ma. Ju je juchajtu jánguarhintani májkueni úni eska ima (1 Ped. 2:21). Ka imajtsïni jarhuataati parachi májkueni úni jimbokajtsïni aiachiska: “Ji chánksïni jingoni jauaka pauani pauani astaka nóteru ióni kueratani jauakia para kʼamajkunhani parhakpini” (Mat. 28:20).
Pirekua 15 Ju je kʼéri ambe arhini Jeobaeri Orheta Uájpani
a Támu Ebanjeliuecha ka ístu máteru Biblieri anapu libruecha xarhatasïndiksï eska Jesúsi uánikua uelta xarhakuaspka imeeri chúxapatiichani enga na tsíntapkia, pori ejemplu María Magdalenani (Juanu 20:11-18); máteru uarhiitiichani (Mat. 28:8-10; Luk. 24:8-11); tsimani imeeri chúxapatiichani (Luk. 24:13-15); Pedruni (Luk. 24:34); apostoliichani joperu menusi Tomásini (Juanu 20:19-24); apostoliichani ka ístu Tomásini (Juanu 20:26); siete imeeri chúxapatiichani (Juanu 21:1, 2); jukari 500 chúxapatiichani (Mat. 28:16; 1 Kor. 15:6); imeeri ermanu jémbani Santiaguni (1 Kor. 15:7); iámindu apostoliichani (Úku. 1:4); ka apostoliichani Betania no iauani (Luk. 24:50-52). Ka jamberi útasteru uánikua xanhari xarhakuapti ka no karakata pakarani (Juanu 21:25).
b Artikulurhu, “¿Xarhatasïnksï Bibliarhu anapu profesiecha eska Jesúsi jindeespka Mesíasi?” enga pájina jw.org jimbo jaka, exeantauakajtsï uánikua profesiechani engaksï Mesíasiiri ambe uandajka.
c Ménisï, ima orhejtsïkutiicha engaksï 25 ka 30 uéxurhini jatiriika, niárasïndiksï sirkuitueri orhejtsïkuti unhani. Joperuksï antesi tʼuini jatsisïndia paraksï orhejtsïkutiini.
d Rebistarhu Aianhpiri agostu de 2018 anapu, pájineecha 11 ka 12, párrafuecha 15-17, ka 15 de abriliiri de 2015, pájina 3-13, jimintsï uaaka exeantani máteru konsejuechani engaksïni exeraaka nénajtsï uaa jarhuataani imani erachiichani engaksï tumbiika paraksï sánderu ánchikuarhita ambe úni kúnguarhikuarhu.
e AMBE ENGA XARHATAJKA IMAJENI: Erachi ma jarhuataasïndi imani kʼuiripuni enga jorhendani jaka Biblieri ambe para sánderu sési kurhanguni ambe engaksï arhijka karakateecha, ka ima achamasï kʼuanikuxati ambe enga xáni úrakuarhejka nabidadirhu.
