SEMANA 43
PIREKUA 90 Ju je uinhaperperantani máteru ka máteruni jingoni
Jatsiskajtsï para exeni eska iámindu ambe ísïiska
“Jatsiskajtsï para exeni eska iámindu ambe ísïiska” (1 TES. 5:21).
AMBE ENGACHI JORHENGUARHIAKA
Ambechi uaa úni engachi no seguru jauaka eskajtsïni Tata Diosï Jeoba xénchasïnga o eskachi ambakiti ambe erakuxaka úni.
1, 2. a) ¿Ambechi úpirini kurhamarhikuarhini? b) ¿Ambechi exea ini jorhenguarhikua jimbo?
IÁMINDU kʼuiripuechaksï ménisï niárasïndi ísï pʼikuarherani sinksï sési ambe úxaki o nómbe oksï no seguru jarhani ambe ma jimbo. a Pori ejemplu, eranhaska je tumbini ma enga no seguru jaka sini Tata Diosï Jeoba uékasïni ka jimbosï no teekani jarhajti itsï atakuarhini. O eranhaska je máteru erachini enga tumbiitini orhetku peerapka Tata Diosï Jeobani enbesi de sánderu sentabu andani. Joperu, iásï familiani ma jatsistia ka ísï pʼikuarherasïndi eska no andangutasïnga sentabuni, ka jamberi niárajti eratseni sini ambakiti ambe erakuspi úni ióntki. O ístu eranhaska je pirenchini ma enga jatiriikia. Ima kómu pʼikuarherasïndi jimboka nóteru úsïngia májkueni ambe úni eska antesi. Ísï jimbo, jamberijtsï chá ménisï niárajka eratseni: “¿Tata Diosï Jeoba pendienti jaki jíndeni jimbo? ¿Jukaparharajki ambe engani xáni úkia imani jimbo? ¿Para Tata Diosï Jeoba ji útasteru marhuajki?”.
2 Engachi ueenaaka ísï eratseni, uaati eskachi nóteru xáni mintsikaakia Tata Diosï Jeobani ka eskachi nóteru uékaakia marhuakuni. Ini jorhenguarhikua jimbochi exeaka nénajtsïni uaa jarhuatani Biblia engachi eratseska eska Tata Diosï Jeoba no uandanhiasïnga juchantsïni jimbo, eska no sési jarhaspka ambe engachi erakupka úni ióntki o eskachi nóteru xáni uaakia marhuakuni Tata Diosï Jeobani.
NÉNACHI UAAKA SEGURU JARHANI
3. ¿Ambejtsïni jarhuataa engachi no seguru jauaka ambe máeri?
3 Tata Diosïiri uandakuajtsïni jarhuataati engachi no seguru jauaka ambe máeri. Jo, Bibliajtsïni jarhuatasïndi parachi sánderu mintsikani Tata Diosï Jeobani ka parachi sánderu sési pájperani imani jingoni ka uaakachi ‘méntkisï mintsikani’ (1 Kor. 16:13).
4. Eska na arhijka 1 Tesalónika 5:21, ¿nénachi uaa terukutantani ambe ma?
4 (Arhinta je 1 Tesalónika 5:21). Bibliajtsïni arhini konsejuni íntskusïndi: “Jatsiskajtsï para exeni eska iámindu ambe ísïiska”. ¿Ka nénachi uaa ísï úni? Jatsiakachi para terukutantani imani ambe engachi eratsejka imani ambe jingoni enga Biblia arhijka. Pori ejemplu, ju je eratsentani tumbini ma enga no seguru jaka eska Tata Diosï uékasïnga. ¿Jatsipirini para exeni ambe enga arhijka Biblia? Jo, jatsisti para arhintani Bibliani ka exeni na enga eratsejka Tata Diosï Jeoba.
5. ¿Nénachi uaa “kurhaani” ambe engajtsïni Tata Diosï Jeoba arhijka?
5 Engachi arhintajka Bibliani, ísïisti komuchi Tata Diosï Jeobani jingoni uandontskuarheni. Joperu, parachi “kurhaani” ambe engajtsïni arhijka ima ambeeri engachi no seguru jaka, jatsiakachi para úni ambe ma. Jatsiakachi para jirinhaantani Bibliarhu anapu karakateechani engaksï indeeri ambe uandajka ka úrani iámu imani ambe engajtsïni kúnguarhikua íntskujka para jirinhantani imani temeeri ambe (Prov. 2:3-6). Kánikua jukaparhakuesti eskachi kurhakuaka Tata Diosï Jeobani eskajtsïni jarhuataaka parachi jirinhantani informasioni ka eskajtsïni jarhuataaka exentani ambe engachi uétarhinchani jaka. Kánikua jukaparhakuesti eskachi jirinhantaaka Bibliarhu anapu prinsipiuechani ka imani informasionini engajtsïni uaaka jarhuatani. Ka ístuchi uaaka jorhenguarhiani Bibliarhu anapu ejempluechani ima kʼuiripuecheri engaksï sáno májkueni ambe nitamakuarhika eska jucha.
6. ¿Nénajtsïni jarhuatasïni tánguarhikuecha parachi seguru jarhani ima ambeeri engachi no xáni seguru japka?
6 Tánguarhikuecharhu, ístuchi úsïnga kurhaani ambe engajtsïni Tata Diosï Jeoba arhijka. Engachi no kuerataska, jamberichi kurhauaka arhijtsïkperatarhu ma o komentariurhu ma, imani ambe engachi uétarhinchani japka (Prov. 27:17). Iásï ju je exeni ambe engachi úpiringa eratseni ka ambejtsïni jarhuataa ménderueni eratseni.
“¿UANDANHIAJKI TATA DIOSÏ JEOBA JÍNDENI JIMBO?”
7. ¿Ambechi úpirini kurhamarhikuarhini?
7 Jamberijtsï ménisï niáraka kurhamarhikuarhini sini Jeoba pendienti jarhajki juchantsïni jimbo. Engajtsï ísï pʼikuarherajka eskajtsï no jukaparhakueska, jamberijtsï eratsejka eskachi no uaaka Tata Diosïiri amigueni ka eskachi no méni uaaka andarhierani. Rei Dabidi jamberi ísï pʼikuarheraspti. Ima no úsïreendi kurhanguni andisï Tata Diosï Jeoba xáni pendienti jarheeni kʼuiripuechani jimbo ka jimbosï kurhamarhipti: “Oh, Tata Diosï Jeoba, ¿ambeski kʼuiripu ma parari tʼu ísï miáni jarhani, kʼuiripueri uájpa parari tʼu xáni pendienti jarhani imani jimbo?” (Sal. 144:3). Ju je exeni nénachi uaa exentani mókuntskuani i kurhamarhikueri.
8. Ísï eska na arhijka 1 Samuel 16:6, 7, 10-12, ¿ambe exekusïni Tata Diosï Jeoba kʼuiripuni ma?
8 Bibliajtsïni exerasïndi eska Tata Diosï Jeoba ístu pendienti jarhasïnga imeecha jimbo engaksï máteruecha úpiringa no jukaparharaani. Pori ejemplu, axaspti Samuelini Jeséeri kʼumanchikuarhu para erakuni imeeri uájpani ma para reiini Israeli. Jesé úspti eskaksï imeeri siete uájpeecha nipiringa Samuelini jingoni, ka nájkiruka no axapka Dabidini, Tata Diosï Jeoba Dabidini erakuspti (arhinta je 1 Samuel 16:6, 7, 10-12). b ¿Andi? Jimboka Tata Diosï Jeoba exespka eska Dabidi mintsita jingoni xénchasïreenga imani.
9. ¿Andijtsïsï uaa seguru jarhani eska Tata Diosï Jeoba pendienti jarhasïnga chánksïni jimbo? (Ístu exe je imajenini).
9 Eratsenta je ambe enga xáni úkia Tata Diosï Jeoba paraksïni xarhatacheni eskaksïni xénchasïnga. Íntsaasïndiksïni konsejuechani engajtsï chá meru uétarhinchani jarhajka (Sal. 32:8). Ka paraksï úni ambakiti konseju ma íntskuni, orhetaksïni jatsisti para kánikua sési míteni (Sal. 139:1). Ka enga chá ísï úska eskaksïni ima na arhiaka ka exentsï eskaksïni kánikua jarhuataska, inde ambeksïni jarhuataati seguru jarhani eska Tata Diosï Jeoba uandanhiasïnga chánksïni jimbo (1 Crón. 28:9; Úku. 17:26, 27). Ima exesïndi iámu ambe engajtsï chá újka imani jimbo ka ambakiti ambeksïni exechisïndi (Jer. 17:10). Ima uékasïndi chaari amigueni ka uékasïndi eska chá andarhieraaka (1 Juanu 4:19).
“Engari tʼu jirinhantaska, ima jurajkuati eskari exentaaka” (1 Crón. 28:9). (Exe je párrafu 9). c
“¿SÉSI AMBE ERAKUSKI ÚNI?”
10. Engajtsï ióni marhuakukia Tata Diosï Jeobani, ¿ambejtsï úpirini kurhamarhikuarhini?
10 Engajtsï uánikua uéxurhini páni jakaia marhuakuni Tata Diosï Jeobani, jamberijtsï úpiringa eratseni sini sési jarhaspi ambe engajtsï erakupka úni. Jamberijtsï jurajkupka ambakiti ánchikuarhita ma ojtsï no uékapka jatsini negosiu ma parajtsï sánderu marhuakuni Tata Diosï Jeobani. Joperu iásï enga na ióni nitamakia, jamberijtsï exejka eska ima kʼuiripuecha engaksï jánguarhintapka sánderu sentabu andani, kánikuaksï sési irekaxaka. Ísï jimbo, úpiringajtsï kurhamarhikuarhini: “¿Sési jaki ambe engani xáni úkia parani Tata Diosï Jeobani marhuakuni? ¿Orini sánderu sési nichepirini engani máteru ambe úpiringa?”.
11. ¿Andisï xáni uandanhiaueni ima kʼuiripu enga Salmo 73 karaka?
11 Engajtsï niáraka ménisï ísï pʼikuarherani, eratsenta je na enga pʼikuarherapka ima kʼuiripu enga Salmo 73 karaka. Ima exesïreendi eskaksï ima kʼuiripuecha engaksï no marhuakuenga Tata Diosï Jeobani kánikuaksï sési irekuarhispka ka jatsikuarheriinksï (Sal. 73:3-5, 12). Jimboka ísï xarharasïreenga eskaksï kánikua sési irekuarhispka ima kʼuiripuecha, salmista ísï pʼikuarherasïreendi eska no marhuasïreenga ambe enga xáni ueenga Tata Diosï Jeobani jimbo. Ima “chúskutasïreendi uandanhiani” jimboka méntku imani ambe eratseni jarhasïreenga (Sal. 73:13, 14). ¿Ambe jarhuataspi?
12. Ísï eska na arhijka Salmo 73:16-18, ¿ambe jarhuataspi salmistani paraka úpiringa sési eratsentani?
12 (Arhinta je Salmo 73:16-18). Salmista niraspti Tata Diosï Jeobaeri templurhu. Jima niraspti ka sési pʼikuarheraspti, ka ístu úspti sési eratsentani. Kurhanguspti eska ima kʼuiripuecha engaksï sési irekuarhini japka tátsekuaksï niárapiringa no sési nitamakuarhini. Exespti eska sánderu ambakiti ambeespka orhetku peerani Tata Diosï Jeobani. Inde ambe jarhuataspti paraka sési pʼikuarherantapiringa ka uinhapikua jatsini para seguiriini sési marhuakuni Tata Diosï Jeobani (Sal. 73:23-28).
13. ¿Nénachi uaa sési pʼikuarherantani? (Ístu exea je imajeniichani).
13 Májkueni eska salmista chájtujtsï uaaka sési pʼikuarherantani. ¿Néna? Engajtsï eratsentaska iámindu ambakiti ambe engajtsï jatsikuarheka ka ístu indeni kʼérati kóntperateechani engaksïni Tata Diosï Jeoba íntsaani jaka. Joperu imeecha engaksï no marhuakujka Tata Diosï Jeobani, nóksï ambe ma jatsisti. Imantkuksïsï jatsiti ambe enga xáni jaka i parhakpinirhu. Ka jimbokaksï no ma erokuarhikua jatsiska, imani ambejkuksïsï mintsikajti engaksï iáiasï jatsikuarheka. Joperu Tata Diosï Jeobajtsïni aiachixati eskajtsïni kánikua ambakiti ambe íntskuaka sánderu orhepatini (Sal. 145:16). Ka ístu eratsenta je eskajtsï no méni uaaka míteni nénajtsï meru irekuarhini japirini iáiasï engajtsï máteru ambe erakupiringa úni. Joperu kʼóruchi uaaka seguru jarhani eska imeecha engaksï orhetku peeraaka Tata Diosï Jeobani ka kʼuiripuechani, méntkisïksï ambakiti ambe jatsiaka.
Ju je méntkisï miáni ambe engajtsïni aiachika Tata Diosï Jeoba. (Exe je párrafu 13). d
“¿PARA TATA DIOSÏ JEOBA JI ÚTASTERU MARHUAJKI?”
14. ¿Ambeksï úpirini kurhamarhikuarhini máru Tata Diosï Jeobaeri marhuariicha ka andi?
14 Máru Tata Diosï Jeobaeri marhuariichaksï uékapirindi sánderu ambe úni imani jimbo, joperu ménichani nóksï úsïndi ísï úni pʼamenchakua ambe jimbo, jimbokaksï jatiriiskia o jimbokaksï no úsïnga úni máru ambe o diskapasidadi ma jimbo. Jamberi inde ambe uaati eskaksï ísï pʼikuarheraaka eskaksï no jukaparhakueska para Tata Diosï Jeoba ka niáranksï kurhamarhikuarhini: “¿Para Tata Diosï Jeoba ji útasteru marhuajki?”.
15. ¿Ambeeri seguru jarhaspi ima enga Salmo 71 karaka?
15 Ima kʼuiripu enga karaka Salmo 71 sáno májkueni pʼikuarheraspti. Arhispti Tata Diosï Jeobani: “Asïrini jurajku, iásï engani nóteruni uinhapekia” (Sal. 71:9, 18). Joperu seguru jarhaspti eska enga sési marhuakupiringa Tata Diosï Jeobani, eska ima orhekupaapiringa ka jarhuatani. Exespti eska Tata Diosï Jeoba kánikua sési pʼikuarherasïnga imeecha jingoni engaksï kánikua jánguarhintajka marhuakuni nájkirukaksï ménisï no uaaka uánikua ambe úni (Sal. 37:23-25).
16. ¿Andichisï seguru jaki eskaksï ima erachiicha engaksï jatiriikia kánikua marhuakusïnga Tata Diosï Jeobani? (Salmo 92:12-15).
16 Enga chá jatiriikia, jánguarhinta je ísï exekuarhini eskaksïni Tata Diosï Jeoba na exejka. Nájkirukajtsï ísï pʼikuarheraaka enajkijtsï nóteru jatsiia uinhapikua, Tata Diosï Jeobaksïni jarhuataati parajtsï chá útasï uánikua ambe úni imani jimbo (arhinta je Salmo 92:12-15). Enbesi dejtsï eratseni jarhani ambe engajtsï no uaaka úni, jánguarhinta je imani ambe eratseni ambe engajkujtsï uaaka úni. Uaakajtsï uinhaperaantani máteruechani chaari ambakiti ejemplu jingoni ka xarhatakuani erachiichani eskajtsï uandanhiasïnga imeecha jimbo. Ístujtsï uaaka aianguani na engaksïni Tata Diosï méntkisï jarhuataka ka ístu eskajtsï uékaxakaia eska úkuarhiaka ambe engajtsïni ima aiachika. Ka asï méni mirikurhi je eska kánikua marhuasïnga engajtsï kómarhijpikuajka máteruechani (1 Ped. 3:12). No arhiparini ambe uéjki jimbochi nitamakuarhini jarhani, iáminduechachi uaaka úni ambe ma Tata Diosï Jeobani jimbo ka ístu máteruechani jimbo.
17. ¿Andichisï no jatsi para terukukuarhintani máteruecha jingoni?
17 Engajtsï chá no sési pʼikuarherajka jimbokajtsï no úsïnga xáni ambe úni Tata Diosï Jeobani jimbo, uaakajtsï seguru jarhani eska ima kánikua jukaparharasïnga ambe engajtsï xáni jánguarhintajka úni. Ístujtsï jamberi terukukuarhintajka máteruecha jingoni, joperu asï jáma je indeni ambe úni. ¿Andi? Jimbokaksïni Tata Diosï Jeoba no méni terukutantasïnga máteru kʼuiripuecha jingoni (Gal. 6:4). Pori ejemplu, María aseiti ma atandukuspti Jesúsini enga kánikua jukaparhapka (Juanu 12:3-5). Joperu ístu jarhaspti uarhiiti ma enga Tata Diosï Jeobaeri templurhu tsimani monedajkusï jatsirapti enga no xáni jukaparhapka (Luk. 21:1-4). Para Jesúsi, ambe engaksï úpka inde tsimani uarhiitiicha, xarhatasptiksï na engaksï xáni mintsinharhienga Tata Diosïni. Ka imeeri Taati, Tata Diosï Jeoba, kánikua jukaparharasïndi ambe engajtsï xáni újka imani jimbo jimbokajtsï xénchasïnga ka uékasïngajtsï marhuakuni nájkiruka para chá no xáni kʼéri ambeuaka.
18. ¿Ambeksïni jarhuataa seguru jarhani ambe máeri? (Ístu exe je rekuadruni “ Tata Diosïiri Uandakuaksïni jarhuataati seguru jarhani”).
18 Iáminduechachi ménisï no seguru jarhasïnga ambe máeri. Joperu eskachi na jorhenguarhikia, Tata Diosï Jeobaeri Uandakuajtsïni jarhuataati indeni ambe jingoni. Ísï jimbo, jima jirinhantaa je mókuntskuechani engajtsï uétarhinchani jaka, ka kánikuajtsï sési pʼikuarheraaka ka ístujtsï sánderu mintsikaaka Tata Diosï Jeobani mintsita jingoni. Ima uandanhiasïndi chánksïni jimbo ka kánikua jukaparharasïndi ambe engajtsï újka para marhuakuni ka aiachixatiksïni eskaksïni kóndentaaka. Asï méni mirikurhi je: Tata Diosï Jeoba xénchaasïndi ka kuidariuasïndi mándani imeeri marhuariichani engaksï no méni jurajkujka.
PIREKUA 111 Ambe engachi jimbo tsípini pʼikuarherajka
a JUKAPARHAKUA AMBE: Ini jorhenguarhikua jimbo, engachi uandani jaka no seguru jarhani, no arhikuekasïndi eskachi no mintsikasïnga Tata Diosï Jeobani o imeeri aiatsperakuechani, sino no seguru jarhani eskachi jukaparhakueska para Tata Diosï Jeoba o no seguru jarhani eskachi ambakiti ambe erakuska úni.
b Nájkiruka Biblia no uandajka na xáni jatiriispia Dabidi enga Tata Diosï Jeoba erakupka, peeka tumbi sapichu máepka (exe je La Atalaya del 1 de septiembri de 2011, pájina 29, párrafu 2).
c AMBE ENGAKSÏ XARHATAJKA IMAJENIICHA: Para pirenchi ma míteni ambe enga eratsejka Tata Diosï Jeoba imeeri ambe enga nitamakuarhini jaka, Bibliarhu jirinhaantasïndi konsejuechani.
d AMBE ENGAKSÏ XARHATAJKA IMAJENIICHA: Jiáni enga erachi ma ánchikuarhini jarhajka para kéndani imeeri familiani, eranhaskasïndi Paraisurhu jámani jarhani.
