ISRAELITEECHAKSÏ kánikua jukaparharasïreendi kústakuani. Biblia uánikua xanhari uandaasïndi imani kʼuiripuechani engaksï kústeenga o pireni. Sáno 10% enga Bibliarhu karakata jaka pirekuestiksï. Pori ejemplu Salmos, El Cantar de los Cantares ka Lamentaciones, karanhasptiksï para pirenhani. Libru Music in Biblical Life (La música en la vida bíblica) uandasïndi eska Biblia xarhatasïnga “eskaksï israeliteecha kánikua úrasïreenga kústakuani imeecheeri irekuarhu”.

Kústakua engaksï pauani pauani úreenga. Israeliteechaksï úrasïreendi kústakuani para xarhatani na engaksï pʼikuarhereenga (Is. 30:29). Nanakeechaksï kústaasïreendi pandereteechani, tsípikua jingonksï piresïreendi ka uarhani jiáni engaksï erakuenga jimbanhi reini ma, engaksï kʼuínchikuechani uaantauenga ka ístu engaksï andeenga guerra ma (Juec. 11:34; 1 Sam. 18:6, 7; 1 Rey. 1:39, 40). Ístu, israeliteechaksï piresïreendi engaksï uarhirancheenga nemani paraksï xarhatani na engaksï kómu p’ikuarherani jarheenga (2 Crón. 35:25). Libru ma enga Biblieri ambe uandajka, uandasïndi eskaksï “israeliteecha kánikua tsitisïreenga kústakuani” (Cyclopedia, de McClintock y Strong).

Israeli anapu reiichaksï kánikua tsitisïreendi kústakuani. Rei Saúli Dabidini erakuspti para arpani kústani (1 Sam. 16:18, 23). Enga Dabidi reiipkia, jimbanhi instrumentuechani uaaspti, sési járhati pirekuechani karaspti ka úspti eska orkesta ma japiringa enga sánderu tátsekua Tata Diosï Jeobaeri templurhu japiringia (2 Crón. 7:6; Amós 6:5). Ka rei Salomóni jatsiaspti tataka ka nanakechani engaksï imeeri kʼéri kʼumanchikuarhu pireenga (Ecl. 2:8).

Israeliteechaksï kústakuani úrasïreendi paraksï Tata Diosï Jeobani kómarhini. Jerusaléni anapu templurhu 4,000 kústatiichaksï jarhaspti, kústaasïreendiksï simbaluechani, instrumentuechani engaksï kuerderika, arpani ka trompeteechani (1 Crón. 23:5; 2 Crón. 5:12). Peru no imeechajkuksïsï úreendi kústakuani paraksï Tata Diosï Jeobani kómarhini. Uánikua israeliteechaksï pirepasïreendi engaksï nirani jarheenga Jerusaléni paraksï kʼuínchikua úntani, imeechaksï pireasïreendi Salmos 120-134. Ka máru judiuecheeri libruechaksï uandasïndi eskaksï israeliteecha piresïreenga pirekuani enga arhinhajka Aieli a jiáni engaksï Paskuani únteenga.

Ini jurhiatikuecha jimbo, ístu kústakua kánikua jukaparhakuesti para Tata Diosïiri ireta (Sant. 5:13). Piresïngachi para kʼéri ambe arhini Tata Diosï Jeobani (Éfes. 5:19). Pirekuechaksï úsïndi eskachi sánderu andarhierauaka juchaari erachiichani ka íntskusïndijtsïni uinhapikua parachi úni tekaantaani uandanhiateechani (Úku. 16:25; Kol. 3:16). Pirekuechaksï úsïndi eskachi xarhataaka eskachi mintsikasïnga Tata Diosï Jeobani ka eskachi kánikua xénchasïnga.