Ambe enga kurhanguarhijka ima enga arhintajka
¿Eclesiastés 5:8 solu parhakpini anapu juramutichani arhikuekaasïni o ístu Jeobani?
▪ Eclesiastés 5:8 karakata máesti enga uétarhijka eskachi sési eratsentaaka, jimboka arhisïnga: “Engari exeska eska chíti ireta jimbo no jurhimbikua jingoni kánhaska ima enga pobrika ka no janhanharhinhani, eskakini inde ambe no ísku pákataaka. Jimboka indeni kʼuiripuni enga juramukua jatsika exexati nema enga sánderu juramukua jatsika eska ima, joperu jarhastiksï máteruecha engaksï iauani sánderu kʼéri ambeka eska ícha”.
Úpiringachi sóntku kurhanguni eska i karakata imechani arhikuekaasïnga engaksï sánderu juramukua jatsika eska juramuti ma. Joperu jatsiskachi para sánderu sési kurhanguni ini karakatani. Xarhatasïndi ambe ma Jeobaeri engajtsïni uinhaperantajka ka sési pʼikuastantani.
Eclesiastés 5:8 juramutiri ma uandasïndi enga no sési kaajka pobrichani ka no jurhimbikua jingoni kaani. I juramuti jatsipirindi para miáni eska exexaka nema enga sánderu juramukua jatsika o sánderu kʼéri ambeni eska ima. Asta jati nema enga sánderu kʼéri ambeka eska ícha. Joperu xáni no sési engaksï parhakpini anapu juramuticha no jurhimbikua jingoni újka ambe ma ka indeni ambe jimboksï kʼuiripuecha no sési nitamakuarhini.
Peru nájkirukachi nóteru jánhaskaakia ambe úni, sésichi pʼikuarherasïnga míteni eska Jeoba exeaxaka imechani engaksï sánderu juramukua jatsika eska juramuti ma. Uákachi kómarhini Tata Diosïni eskajtsïni jarhuataaka ka imanchi jurajkukuni iámu ambe (Sal. 55:22; Filip. 4:6, 7). Míteskachi eskaksï “Jeobaeri éskuecha iápurisï exexaka echerirhu para uinhapikua xarhatakuani imechani engaksï iámu mintsita jingoni marhuakujka” (2 Crón. 16:9).
Ísï jimbo, Eclesiastés 5:8 uandasïndi ambe ma enga ísïka: eska parhakpini anapu juramuti ma jimbo méntkisï jarhasïnga nema enga sánderu juramukua jatsijka eska i. Joperu sánderu jukaparhakua ambe i karakateri, jindesti eska Jeobaeska enga sánderu juramukua jatsika eska né uéjkini. Ini jurhiatikuecha jimbo, ima juramuxati úraparini imeri Uájpa Jesukristuni enga jindeka Rei Reinurhu. Ima enga Iámindu ambe Újka úni, iámu ambe exexati ka kʼamakʼamasï jurhimbikua jingoni úsïndi ambe ma ka ístu májkueni úsïndi imeri Uájpa.
